ʼI muʼa atu, neʼe ko tamatou manatu ʼaia, ʼuhi ko te vaega ʼo Hepeleo 12:16. ʼE ui ai ko Esau neʼe ina “meʼa noaʼi te ʼu meʼa taputapu” pea neʼe ina foaki kia Sakopo “tona ʼuhiga ʼuluaki tupu [ʼo ina fetogi] ʼaki he pa meʼa kai ʼe tahi.” Koia ʼae neʼe matou manatu ai, neʼe maʼu e Sakopo ia te pilivilesio ʼae ke liliu ko he kui ʼa te Mesia ʼi te temi ʼae neʼe ina maʼu ai te “ ʼuhiga ʼuluaki tupu.”—Mateo 1:2, 16; Luka 3:23, 34.

Kae, neʼe fai he ʼu fekumi loloto ʼo ʼuhiga mo te tahi ʼu fakamatala ʼi te Tohi-Tapu ʼe ha ai ʼe mole hoki liliu he tagata ko he kui ʼa te Mesia mo kapau neʼe ko he ʼuluaki tupu. Tou vakaʼi ʼihi ʼi te ʼu fakamatala ʼaia:

Ko Lupeni, neʼe ko te ʼuluaki foha ʼaia ʼo Sakopo pea mo Lea. Pea ko Sosefo, neʼe ko te ʼuluaki foha ʼaia ʼo Sakopo mo Lasele. ʼI te temi ʼae neʼe fai ai e Lupeni te aga heʼe ʼaoga, neʼe puli ai tona ʼuhiga ʼuluaki tupu pea ko Sosefo leva ʼae neʼe ina maʼu te ʼuhiga ʼuluaki tupu. (Senesi 29:31-35; 30:22-25; 35:22-26; 49:22-26; 1 Koloniko 5:1, 2) Kae, neʼe mole hifo mai te Mesia mai ia Lupeni peʼe ko Sosefo. Neʼe hifo mai te Mesia mai ia Suta, ia te foha tuʼulaga fa ʼo Sakopo pea mo Lea.—Senesi 49:10.

Ia Luka 3:32, ʼe talanoa ai ki te tahi ʼu kui ʼe toko nima ʼa te Mesia. Pea ko natou toko nima ʼaia, neʼe ko he ʼu ʼuluaki tupu. Ohage la, ko Poase, neʼe ko te tamai ʼa Opete, pea ko Opete neʼe ko te tamai ʼa Sese.—Lute 4:17, 20-22; 1 Koloniko 2:10-12.

Ko te foha ʼo Sese ʼae ko Tavite, neʼe mole ko he ʼuluaki tupu. Neʼe ko te muli ʼaia ʼo te fanau mai te toko valu tagata. Kae, neʼe hifo mai te Mesia mai ia Tavite. (1 Samuele 16:10, 11; 17:12; Mateo 1:5, 6) ʼO toe feia pe, ko te kui ʼa  te Mesia ʼae neʼe hoa mai kia Tavite, neʼe ko Salomone. Kae neʼe mole ko te foha ʼuluaki tupu ʼaia ʼo Tavite.—2 Samuele 3:2-5.

Ko tona fakaʼuhiga koa ʼe mole maʼuhiga ia te ʼuhiga ʼuluaki tupu. Neʼe maʼu e te foha ʼuluaki tupu ia he ʼu pilivilesio neʼe mole maʼu e ʼona tehina veliveli. Neʼe liliu tuʼumaʼu te foha ʼuluaki tupu ko te pule famili ʼae ʼe hoa atu ki tana tamai. Pea ko ʼona vahe ʼe lua ʼi te tofiʼa.—Senesi 43:33; Tetelonome 21:17; Sosue 17:1.

Ko te ʼuhiga ʼuluaki tupu neʼe mole feala ke foaki ki he tahi age foha. Kae ʼi te fekauʼi ʼae e Apalahamo ia Isemaele ke alu, ko tona ʼuhiga ʼuluaki tupu neʼe maʼu e Isaake. (Senesi 21:14-21; 22:2) Pea ohage ko tatatou kua talanoa ki ai, ko te ʼuhiga ʼuluaki tupu ʼo Lupeni neʼe foaki kia Sosefo.

Kotea ʼae neʼe fia ui e te apositolo ko Paulo ia Hepeleo 12:16? ʼE tou lau fenei: “Kotou tokakaga naʼa ʼi ai he tahi ia koutou ʼe ina fai he ʼu felaveʼi fakasino heʼe ʼaoga, pea mo he tahi ʼe ina meʼa noaʼi te ʼu meʼa taputapu, ohage ko Esau, ʼae neʼe ina fetogi tona ʼuhiga ʼuluaki tupu ʼaki he pa meʼa kai ʼe tahi.”

Neʼe mole talanoa ʼi heni ia Paulo ʼo ʼuhiga mo te ʼu kui ʼa te Mesia. Kae neʼe ina fai he fakatokaga ki te kau Kilisitiano. Neʼe ina ui fenei kia natou: “Kotou haga haʼele ʼi te ala ʼae ʼe totonu . . . naʼa ʼi ai he tahi ʼe mole ina maʼu te ʼofa makehe ʼo te ʼAtua.” Kae, ʼe feala ke hoko te aluʼaga ʼaia mo kapau ʼe natou fai he ʼu felaveʼi fakasino heʼe ʼaoga. (Hepeleo 12:12-16) Pea ʼe feala ai leva ke natou hage ko Esau, ʼae neʼe ina “meʼa noaʼi te ʼu meʼa taputapu,” kae ina fakafimalieʼi ʼona holi.

ʼO mulimuli ki te agaʼi fenua ʼo te temi ʼaia, neʼe lagi maʼu e Esau ia te pilivilesio ʼae ke ina momoli he ʼu sakilifisio kia Sehova. (Senesi 8:20, 21; 12:7, 8; Sopo 1:4, 5) Kae, neʼe fakamaʼuhigaʼi e Esau ʼona holi ʼo ina fetogi ai tona ʼuhiga ʼuluaki tupu ʼaki he pa lenitini. Neʼe lagi mole fia fakalaka ia Esau ʼi te ʼu mamahi ʼae neʼe fakakikite e Sehova ʼo ʼuhiga mo te hologa ʼo Apalahamo. (Senesi 15:13) Neʼe ina toe fakaha foki ia tana mole fakamaʼuhigaʼi ia te ʼu meʼa taputapu ʼaki tana ʼohoanaʼi he ʼu fafine pagani. Pea neʼe lotomamahi ʼaupito ai ʼana matuʼā. (Senesi 26:34, 35) Neʼe kehekehe ia mo Sakopo, koteʼuhi neʼe tokaga ia Sakopo ke ʼohoana mo he fafine ʼe atolasio ki te ʼAtua moʼoni.—Senesi 28:6, 7; 29:10-12, 18.

Kotea ʼe tou ako ʼi te ʼu fakamatala Fakatohi-tapu ʼaia ʼo ʼuhiga mo te ʼu kui ʼa te Mesia? Ko ʼihi ia natou neʼe ko he ʼu foha ʼuluaki tupu, pea ko ʼihi neʼe mole ko he ʼu foha ʼuluaki tupu. Neʼe mahino pea neʼe tali e te kau Sutea te aluʼaga ʼaia. ʼE tou iloʼi feafeaʼi te faʼahi ʼaia? Koteʼuhi neʼe natou fakamoʼoni, ko Kilisito ʼe kau anai ʼi te hologa ʼo Tavite, ia te foha fakamuli ʼo Sese.—Mateo 22:42.