Kau Tupulaga—Kotou Fakafeagai Ki Te Tevolo
“Kotou kofuʼi te teu tau katoa ʼae ʼe foaki mai e te ʼAtua, ke feala ai hakotou tutuʼu malohi ʼo fakafeagai ki te ʼu kaka ʼa te Tevolo.”—EFESO 6:11.
1, 2. (1) He koʼe kua vave malo te kau tupulaga Kilisitiano ʼi te tau fakafeagai kia Satana mo te kau temonio? (Vakaʼi te ʼuluaki pāki.) (2) Kotea ka tou vakaʼi anai?
NEʼE fakatatau e te apositolo ko Paulo te kau Kilisitiano ki he kau solia. ʼE tou kau ʼi he tau ʼe fakafeagai ki he ʼu fili moʼoni. ʼE mole tou tau fakafeagai ki te tagata, kae kia Satana mo ʼana kau temonio. Ko he kau tau faiva talu mai te ʼu lauʼi taʼu ʼe afe. Koia ʼe hage mai ʼe faigataʼa kia tatou te malo ʼi te tau ʼaia, tafito la moka kei tou tupulaga. ʼI te tau fakafeagai ki te ʼu fili ʼe malolohi ʼaupito ʼaia, ʼe lava malo ai koa te kau tupulaga? ʼEi ʼe natou fealagia, pea kua vave tanatou malo. Kotea tona tupuʼaga? Koteʼuhi ʼe foaki age e Sehova kia natou te malohi. Tahi ʼae, ohage pe ko he kau solia kua akoako lelei, ʼe natou “kofuʼi te teu tau katoa ʼae ʼe foaki mai e te ʼAtua” ʼo feala ai hanatou teuteu lelei ki te tau.—Lau ia Efeso 6:10-12.
2 ʼI te fakaʼaogaʼi e Paulo te fakata ʼaia, neʼe lagi manatu ki te teu tau ʼae neʼe kofuʼi e te kau solia Loma. (Gaue 28:16) ʼI te alatike ʼaeni, ʼe tou vakaʼi anai te fakata makehe ʼaia. ʼE tou toe vakaʼi anai te manatu ʼa ʼihi kau tupulaga ʼo ʼuhiga mo te ʼu faigataʼaʼia pea mo te ʼu lelei ʼi tanatou kofuʼi te ʼu koga kehekehe ʼo totatou teu tau fakalaumalie.
TE KILIʼI PIPI ʼO TE MOʼONI
3, 4. Kotea ʼae ʼe fakatatau ai te ʼu moʼoni Fakatohi-tapu ki te kiliʼi pipi ʼo he tagata tau solia Loma?
3 Lau ia Efeso 6:14. Neʼe ʼi ai te ʼu kiʼi koga ukamea neʼe pipiki ʼi te kiliʼi pipi ʼo te tagata tau solia Loma moʼo puipui ai tona koga loto pea mo taʼofi ai tona kofu ukamea mamafa. Neʼe toe fakapipiki ki ʼihi kiliʼi pipi te ʼaiʼaga ʼo te heleta mo te kiʼi hele veliveli. Pea ʼi te haʼi leleiʼi ʼo tona kiliʼi pipi, ʼe lotomafana ai te tagata tau solia moka alu ʼo tau.
Ko te ʼu moʼoni ʼae ʼe tou ako ʼi te Folafola ʼa te ʼAtua ʼe ina puipui tatou mai te ʼu akonaki hala
4 Ohage pe ko he kiliʼi pipi, ko te ʼu moʼoni ʼae ʼe tou ako ʼi te Folafola ʼa te ʼAtua ʼe ina puipui tatou mai te ʼu akonaki hala. (Soane 8:31, 32; 1 Soane 4:1) Pea ka lahi tatatou ako ke tou leleiʼia te ʼu moʼoni ʼo te Folafola ʼa te ʼAtua, ʼe faigafua anai te fakaalu tahi ʼo totatou maʼuli mo te ʼu pelesepeto ʼa te ʼAtua, peʼe ko te tui ʼo totatou “kofu ukamea.” (Pesalemo 111:7, 8; 1 Soane 5:3) Tahi ʼae, ka tou mahino lelei ki te ʼu moʼoni ʼaia, ʼe feala anai ke tou lagolago ki te ʼu moʼoni ʼaia moka fakafeagai mai ʼotatou fili.—1 Petelo 3:15.
5. He koʼe ʼe tonu ke tou tala tuʼumaʼu te moʼoni?
5 ʼE tou fakalogo ki te ʼu faʼahi fuli ʼae ʼe ui mai ʼi te Tohi-Tapu pea mo tou tala tuʼumaʼu te moʼoni, koteʼuhi ʼe maʼuhiga kia tatou te ʼu moʼoni ʼae ʼe ʼi te Folafola ʼa te ʼAtua. Ko te ʼu loi ʼe kau ki te ʼu mahafu faiva kaka ʼa Satana. ʼE fakatupu kovi te loi kia ia ʼae ʼe ina fai pea mo natou ʼe tui ki ai. (Soane 8:44) Tatau aipe pe ʼe mole tou haohaoa, kae ʼe tou fai ia meʼa fuli ke tou tala tuʼumaʼu te moʼoni. (Efeso 4:25) Kae ʼe mole faigafua. Neʼe ui fenei e Abigail, ʼe taʼu 18: “ ʼE feala pe ke tou manatu ʼe mole he ʼaoga ke tou tala te moʼoni, tafito la moka ʼe tou fia fakatafa ʼi he aluʼaga ʼe faigataʼa.” Kae he koʼe ʼe ina fia tala tuʼumaʼu te moʼoni? ʼE ina ui fenei: “Kapau ʼe au tala tuʼumaʼu te moʼoni, ʼe au maʼu ai he leʼo ʼo loto ʼe maʼa ia muʼa ʼo Sehova. Pea kua au tuha mo te falala tatau aipe ʼi ʼaku matuʼā feia mo ʼoku kaumeʼa.” Neʼe ui fenei e Victoria, ʼe taʼu 23: “Ka ke tala te moʼoni pea mo lagolago ki tau tui, ʼe feala ke fakamamahiʼi ai koe. Kae ʼe ke maʼu tuʼumaʼu aipe he ʼu fua lelei fakaofoofo: ʼE ke lotofalala, ʼe ke fakaovi ai kia Sehova, pea ʼe toe fakaʼapaʼapaʼi ai koe e natou ʼe ʼoʼofa atu.” Kua ke iloʼi la te maʼuhiga ʼae ke ke haʼi “te moʼoni ohage ko he kiliʼi pipi” ʼi te temi fuli?
“TE KOFU UKAMEA ʼO TE FAITOTONU”
6, 7. He koʼe ʼe fakatatau te ʼu pelesepeto faitotonu ki he kofu ukamea?
6 ʼI ʼihi temi, neʼe fai te kofu ʼo te tagata tau Loma ʼaki ni lauʼi ukamea lau veliveli neʼe fehilihiliʼaki pea neʼe peluki fakatakafuafua ke ʼaofi ai tona fatafata. Neʼe haʼihaʼi te ʼu lauʼi ukamea ʼaki te ʼu haʼi kiliʼi manu ʼi ʼona fakamaʼu ukamea. Neʼe toe ʼaofi foki mo ʼona fuga ʼuma ʼaki te ʼu kiʼi lauʼi ukamea. ʼE moʼoni, neʼe
faigataʼa te gaugaue ʼa te tagata solia ʼuhi ko tona kofu ukamea, pea neʼe tonu ke ina vakavakaʼi tuʼumaʼu pe ʼe nofo maʼu te ʼu lauʼi ukamea. Kae ʼaki tona kofu ʼaia, neʼe puipui ai tona mafu pea mo te tahi ʼu koga maʼuhiga ʼo tona sino mai he heleta peʼe ko he kauʼi nahau.ʼE mole tou maʼu he poto feʼauga ke tou puipui ai ʼotatou loto
7 ʼE feala ke fakatatau te kofu ukamea ʼaia ki te ʼu pelesepeto faitotonu ʼa Sehova ʼae ʼe ina puipui totatou “loto” peʼe ko totatou ʼuhiga moʼoni. (Taaga Lea 4:23) ʼE mahino ia, ʼe mole fetogi anai e he tagata tau ia tona kofu ukamea mo he tahi kofu ʼe mole feala ke puipui ai. ʼO toe feia pe, ʼe mole tou fetogi anai te ʼu pelesepeto faitotonu ʼa Sehova ʼaki ʼatatou manatu. ʼE mole tou maʼu he poto feʼauga ke tou puipui ai ʼotatou loto. (Taaga Lea 3:5, 6) Koia la ʼae ʼe tonu ai ke tou vakavakaʼi tuʼumaʼu pe ʼe kei puipui totatou loto e te “kofu ukamea.”
8. He koʼe ʼe tonu ke tou fakalogo ki te ʼu pelesepeto ʼa Sehova?
8 ʼE ke manatu koa ʼi ʼihi temi ʼe mamafa te ʼu pelesepeto ʼa Sehova peʼe puli ai koa tou ʼateaina? Ko Daniel ʼe taʼu 21, ʼe ina ui fenei: “Neʼe vaʼi au e ʼoku faiako mo ʼoku kaugā ako ʼuhi ko taku mulimuli ki te ʼu pelesepeto Fakatohi-tapu. Lolotoga he temi, neʼe mole kei au falala kia au pea neʼe au lotomamahi.” Kae kotea ʼe ina logoʼi ʼi te temi nei? ʼE ina ui fenei: “Ki muli age, neʼe au sio leva ki te ʼu fua lelei ʼo takita mulimuli ki te ʼu pelesepeto ʼa Sehova. Neʼe kamata fakaʼaogaʼi e ʼihi ʼo ʼoku kaumeʼa te toloke pea ko ʼihi neʼe natou tuku tanatou ako. Neʼe fakaʼofaʼofa tanatou tau mo te ʼu nunuʼa ʼo ʼanatou aga. ʼE puipui moʼoni tatou e Sehova.” Ko Madison ʼe taʼu 15, ʼe ina ui fenei: “ ʼE au faiga malohi ke au mulimuli ki te ʼu pelesepeto ʼa Sehova kae mole ki te manatu ʼo toku taʼiake ʼo ʼuhiga mo te ʼu meʼa ʼe natou faʼifaʼitaliha mo fiafia ai.” Kotea neʼe tokoni ki ai? ʼE ina ui fenei: “ ʼE au manatuʼi ʼe au fua te huafa ʼo Sehova pea ʼe hage pe te ʼu fakahala ko he ʼu kauʼi nahau ʼe haʼu mai ia Satana. Pea ka fua lelei ʼaku faiga, ʼe au fiafia lahi ai.”
“KE KOTOU TUI KI ʼOKOTOU VAʼE TE ʼU TAKA ʼO TE LOGO LELEI ʼO TE TOKALELEI”
9-11. (1) ʼI hona aluʼaga fakata, kotea te ʼu taka ʼae ʼe tui e te kau Kilisitiano? (2) Kotea ʼae ʼe lava tokoni mai ke tou palalau faʼifaʼitaliha ʼi te faifakamafola?
9 Lau ia Efeso 6:15. Neʼe mole feala ki he tagata solia Loma ke kau ki te tau mo kapau neʼe mole tui hona ʼu taka. Ko ʼona koga ʼe tolu pea neʼe fai ʼaki te kiliʼi manu pea neʼe tologa. Neʼe toe fimalie te haʼele ʼa te tagata tau pea neʼe mole feala ke heke ʼi tana tui te ʼu taka ʼaia.
10 Neʼe ʼaoga te ʼu taka ʼa te kau solia Loma ki tanatou olo ki te tau. ʼO toe feia pe, ʼi hona aluʼaga fakata, ʼe tokoni mai te ʼu taka ʼae ʼe tou tui ke tou tala “te logo lelei ʼo te tokalelei.” (Esaia 52:7; Loma 10:15) Kae ʼi ʼihi temi, ʼe tonu ke toe lahi age totatou lototoʼa. Ko Bo ʼe taʼu 20, ʼe ina ui fenei: “Neʼe au tuʼania ʼi te faifakamafola ki ʼoku kaugā ako. Neʼe au aga ufiufi. Ka au toe manatuʼi te faʼahi ʼaia, ʼe mole au iloʼi pe koʼe neʼe au feia. ʼI te temi nei, ʼe au fiafia ʼi te faifakamafola ki ʼoku kaugā ako.”
11 Tokolahi te kau tupulaga Kilisitiano neʼe natou tokagaʼi moka natou teuteuʼi lelei tanatou faifakamafola, ʼe natou palalau faʼifaʼitaliha. ʼE ke lava teuteuʼi feafeaʼi tau faifakamafola? Ko Julia ʼe taʼu 16, ʼe ina ui fenei: “ ʼE au ʼai tuʼumaʼu he ʼu tohi ki taku kato fafaʼo meʼa ako, pea ʼe au fakalogo lelei moka fakaha e ʼoku kaugā ako ʼanatou manatu ʼo ʼuhiga mo he aluʼaga peʼe ko te ʼu meʼa ʼae ʼe natou tui ki ai. ʼO feala ai leva ke au fakakaukauʼi pe kotea ʼae ka tokoni anai kia natou pea mo palalau age ki he faʼahi ʼe fua lelei anai kia natou takitokotahi.” Ko Makenzie ʼe taʼu 23, ʼe ina ui fenei: “Kapau ʼe ke agalelei pea mo fakalogo lelei, ʼe feala ai anai ke ke iloʼi te ʼu faigataʼaʼia ʼae ʼe tau mo ʼou kaugā ako. Pea ʼe au faigaʼi ke au lau te ʼu tohi fuli ʼae neʼe ta maʼa te kau tupulaga.” Koia ko takita teuteuʼi lelei te faifakamafola, ʼe hage pe ko hakita tui “te ʼu taka” ʼae ʼe lave lelei ki ʼotatou vaʼe.
“TE MEʼA TALI TAU LAHI ʼO TE TUI”
12, 13. Kotea te ʼu “kauʼi nahau ulo” ʼe feala ke hokaʼi ʼaki tatou e Satana?
12 Lau ia Efeso 6:16. Neʼe toʼo e te tagata tau Loma tana meʼa tali tau lahi ʼe fakaloaloa ke kaku ki ʼona tuli pea ʼe ina toe ʼaofi ai foki ʼona fuga ʼuma. Neʼe ko hona puipui mai te ʼu heleta, te ʼu tao pea mo te ʼu kauʼi nahau.
13 Kotea te ʼu “kauʼi nahau ulo” ʼe feala ke hokaʼi ʼaki ai koe e Satana? ʼE lagi ko he ʼu loi ʼo ʼuhiga mo Sehova. Ohage la, ʼe loto e Satana ke ke manatu ʼe mole ʼofa Sehova ia koe pea ʼe mole tokaga he tahi kia koe. Ko Ida ʼe taʼu 19, ʼe ina ui fenei: “Tuʼumaʼu pe neʼe au ui ʼe mole ʼofa Sehova ia au pea ʼe mole fia liliu ko hoku Kaumeʼa.” Moka ina maʼu te ʼu manatu ʼaia, kotea ʼe ina fai? ʼE ina fakamahino fenei: “Ko te ʼu fono ʼe ina ʼekenaki taku tui. ʼI muʼa atu, neʼe au heka pe au kae mole fai haku tali. ʼI taku manatu, ʼe mole fia logo mai anai he tahi. Kae ʼi te temi nei, ʼe au teuteuʼi ʼaku fono pea mo faigaʼi ke au tali tuʼa lua peʼe tuʼa tolu. ʼE faigataʼa, kae ʼe au lotofimalie moka au fai te faʼahi ʼaia. Pea ʼe au lotomalohi ʼuhi ko te ʼu tehina mo tuagaʼane. ʼI te temi fuli pe ʼae ʼe au liliu ai ki fale, ʼe au tui papau ʼe ʼofa Sehova ia au.”
14. Kotea te ako ʼe tou taʼofi mai te faʼifaʼitaki ʼo Ida?
14 ʼE mole fetogi ʼi he temi te lahi mo te laulahi ʼo te meʼa tali tau ʼa te tagata solia. Kae ko te ako ʼe tou taʼofi mai te faʼifaʼitaki ʼo Ida, ko tatatou tui ʼe feala pe ke malohi peʼe vaivai. ʼE fakalogo kia tatou. (Mateo 14:31; 2 Tesalonika 1:3) Koia ʼe tonu ke tou faiga ke malohi tuʼumaʼu tatatou tui ke feala ai hana puipui tatou ohage ko ‘te meʼa tali tau ʼo te tui.’
“TE PULOGA TAU ʼO TE HAOFAKI”
15, 16. He koʼe ʼe fakatatau te ʼamanaki ki he puloga?
15 Lau ia Efeso 6:17. ʼE ʼai e te tagata tau Loma tona puloga moʼo puipui ai tona ʼulu, tona kia, mo tona fofoga. Ko ʼihi puloga ʼe feala ke toʼotoʼo nima.
16 ʼE puipui e te puloga te foʼi ʼulu ʼo te tagata tau. Pea ʼe toe feia pe, ʼe puipui totatou ʼatamai e tatatou “ ʼamanaki ki te haofaki.” (1 Tesalonika 5:8; Taaga Lea 3:21) ʼE tokoni mai te ʼamanaki ʼaia ke tou fakahaga tafito ʼatatou fakakaukau ki te ʼu fakapapau ʼa te ʼAtua ʼo mole tou lotovaivai ai ʼuhi ko ʼotatou faigataʼaʼia. (Pesalemo 27:1, 14; Gaue 24:15) Kae ʼe tonu ke tou tui papau ki tatatou ʼamanaki mo kapau ʼe tou loto ke ina puipui tatou. ʼE mole tonu ke toʼotoʼo totatou “puloga” kae ʼe tonu ke tou ʼai ki totatou ʼulu.
17, 18. (1) ʼE lava kakaʼi feafeaʼi tatou e Satana ke tou toʼo kehe totatou puloga? (2) ʼE tou fakaha feafeaʼi ʼe mole tou to ki te fakahala ʼa Satana?
17 ʼE lava kakaʼi feafeaʼi tatou e Satana ke tou toʼo kehe totatou puloga? Manatuʼi tana ʼahiʼahiʼi Sesu. Neʼe iloʼi e Satana ka liliu anai Sesu ko te pule ʼo te tagata fuli. Kae ʼi muʼa ʼo te faʼahi ʼaia, ʼe tonu muʼa kia Sesu ke mamahi pea mate. Hili ia, ʼe tonu anai ke atali ki te temi ʼae kua fakatuʼutuʼu ai e Sehova ke liliu ʼo Hau. Koia la ʼae neʼe tuku age ai e Satana he faigamalie ke nofo hau fakatomuʼa. Neʼe fakapapau age e Satana kia Sesu kapau ʼe ina fai hana kiʼi atolasio tuʼa tahi pe kia ia, ʼe liliu atu aipe ko te pule ʼo te malamanei. (Luka 4:5-7) ʼO toe feia aipe, ʼe iloʼi e Satana te ʼu fakapapau neʼe fai e Sehova ʼo ʼuhiga mo he ʼu meʼa lelei maʼa tatou ʼi te malama foʼou. Kae ʼi tatatou atalitali ke hoko mai te ʼu fakapapau ʼaia, ʼe tou tau mo he ʼu faigataʼaʼia. Ko te tupuʼaga la ʼaia ʼo te tuku mai e Satana he faigamalie ke tou maʼu he maʼuli fimalie ʼo kamata atu ʼi te ʼaho nei. ʼE ina loto ke tou tuku ki muʼa totatou maʼuli fimalie pea hoki muli mai te Puleʼaga ʼo te ʼAtua.—Mateo 6:31-33.
18 Tokolahi te kau tupulaga Kilisitiano ʼe mole natou to ki te fakahala ʼa Satana.
Ohage la, ko Kiana ʼe taʼu 20, ʼe ina ui fenei: “ ʼE au iloʼi ko te puleʼaga pe ʼo te ʼAtua ʼe ko te puleʼaki pe ʼaia ʼe tahi moʼo fakatokatoka ai ʼotatou fihifihia.” Kotea tona fua ki tana fakakaukau mo tona maʼuli ʼuhi ko tana ʼamanaki? Ko he tokoni ki ai ke mahino ki te ʼu meʼa ʼae ʼi te malamanei ʼe fakatemi pe ia. ʼE fakaʼaogaʼi e Kiana tona temi mo tona malohi ʼo tauhi kia Sehova, kae mole fakaʼaogaʼi katoa tona temi ki he gaue.“TE HELETA ʼO TE LAUMALIE,” TE FOLAFOLA ʼA TE ʼATUA
19, 20. ʼE tou liliu feafeaʼi ʼo faiva ʼi te fakaʼaogaʼi ʼo te Folafola ʼa te ʼAtua?
19 Neʼe fakaʼaogaʼi e te kau solia Loma te ʼu heleta ʼe teitei 50 satimeta tona loa. Neʼe faiva te kau solia ʼaia ʼi te fakaʼaogaʼi ʼo ʼanatou heleta he neʼe natou akoako ʼi te ʼaho fuli.
20 Neʼe fakatatau e te apositolo ko Paulo ia te Folafola ʼa te ʼAtua ki he heleta neʼe foaki mai e Sehova. Kae ʼe tonu ke tou fakaʼaogaʼi fakalelei te heleta ʼaia moʼo lagolago ai ki tatatou tui pea mo fakatonutonuʼi ʼaki ʼatatou manatu. (2 Kolonito 10:4, 5; 2 Timoteo 2:15) ʼE tou liliu feafeaʼi ʼo faiva? Ko Sebastian ʼe taʼu 21, ʼe ina ui fenei: “ ʼI te temi fuli pe ʼe au lau ai te Tohi-Tapu ʼe au fakailoga he ʼu vaega ʼe au leleiʼia pea au hilifaki ki te ʼu vaega fuli ʼae neʼe kua au tohi.” Ko he tokoni ki ai ke mahino lelei ki te manatu ʼa Sehova. Ko Daniel ʼae neʼe kua tou palalau ki ai, neʼe ina ui fenei: “Ka au lau te Tohi-Tapu, au fakailoga te ʼu vaega ʼae ʼe feala ke tokoni ki te hahaʼi ʼae ʼe au fetaulaki mo natou ʼi te faifakamafola. Neʼe au tokagaʼi ko te hahaʼi ʼe natou leleiʼia moka ʼe natou sisio mai ʼe tou fakamaʼuhigaʼi te Tohi-Tapu pea mo tou fai ia meʼa fuli moʼo tokoni kia natou.”
21. He koʼe ʼe mole tonu ke tou matataku kia Satana mo ʼana kau temonio?
21 Ohage pe ko tatatou vakaʼi ʼi te ʼu faʼifaʼitaki ʼo te kau tupulaga ʼi te alatike ʼaeni, ʼe mole tonu ke tou matataku kia Satana mo ʼana kau temonio. ʼE moʼoni ʼe natou malolohi, kae ʼe malohi ʼaupito age leva Sehova ia. Pea ʼe mole natou maʼuʼuli anai ʼo heʼe gata. Kua vave pe tonatou pilisoniʼi lolotoga te ʼAfio ʼa Kilisito Ia Taʼu ʼe Afe pea ʼe mole natou toe fai anai he meʼa ʼe kovi ki he tahi. Hili ia pea ʼe fakaʼauha anai natou. (Fakaha 20:1-3, 7-10) Kua tou iloʼi totatou fili, ʼana hele, pea mo tana fakatuʼutuʼu. ʼAki te tokoni ʼa Sehova, ʼe tou tuʼu malohi ai ʼo fakafeagai kia ia.