TONATOU MAʼULI
Neʼe Maʼuli Masiva Pea Kua Maʼuli Tapuakina
Neʼe au tupu ʼi he kiʼi fale papa ʼi te kiʼi kolo veliveli ʼe higoa ko Liberty, ʼi Indiana, ʼi Amelika. Neʼe kua ʼi ai te tama pea mo te ʼu tamaliki fafine ʼe lua ʼo ʼaku matuʼā ʼi muʼa ʼo taku tupu. Hili ia, neʼe toe fanauʼi e taku faʼe tamaliki tagata ʼe lua pea mo te taʼahine.
ʼI TAKU kei ako, neʼe mole lahi he ʼu fetogi. Ko ʼou kaugā ako ʼae ʼi tou ʼuluaki taʼu ako ko ʼou kaugā ako pe ʼaia ʼi tou taʼu ako fakaʼosi. Ko te teitei hahaʼi fuli ʼo te kolo ʼe matou feiloʼiʼaki, ʼo toe feia mo ʼomatou higoa.
Neʼe takafoli te kolo ko Liberty ʼaki te ʼu kiʼi fale gaue kele, pea neʼe natou to tafito ia te tulina. ʼI taku tupu ake, neʼe gaue taku tamai ki he tagata gaue kele ʼi tomatou kolo. ʼI taku lahi ake leva, neʼe au ako ke au gaue ʼi he masini fuli kele pea mo fai te tahi atu ʼu gaue.
Neʼe mole au iloʼi taku tamai ʼi tana kei tupulaga. He ʼe ʼi taku tupu ake neʼe kua taʼu 56 kae taʼu 35 taku faʼe. Kae neʼe malohi pea neʼe mole ʼi ai hona mahaki tau sino. Neʼe ina leleiʼia te gaue kinakina pea ina toe akoʼi ʼana fanau ke natou faʼa gaue. Neʼe mole lahi hana falā, kae neʼe ʼi ai pe tomatou meʼa nofo, te ʼu mutuʼi meʼa, pea mo te meʼa kai. Pea neʼe nofo tuʼumaʼu pe mo matou. Neʼe mate taku tamai ʼi tona taʼu 93 kae ko taku faʼe ʼi tona taʼu 86. Neʼe mole he tahi ia naua neʼe tauhi kia Sehova. Kae ko toku tahi tehina, neʼe tauhi agatonu talu mai te taʼu 1972 ʼi tona ʼuhiga tagata ʼafeā.
TOKU TEMI TUPULAGA
Neʼe tauhi lotu lelei taku faʼe. Neʼe ina ʼave matou ki te ʼekelesia Baptiste ʼi te ʼAhotapu fuli. Neʼe au ʼuluaki logo ki te akonaki ʼae ko te Tahitolutapu ʼi toku taʼu 12. Koia neʼe au fehuʼi fenei ai ki taku faʼe: “ ʼE feafeaʼi te liliu ʼa Sesu ko te ʼAlo pea toe liliu ko te Tamai?” ʼE kei au manatuʼi pe tana tali fenei mai: “Taku kiʼi tama, ʼe ko te misitelio. ʼE mole feala hatatou mahino ki ai.” Kia au neʼe ko te misitelio moʼoni. Kae ʼi toku taʼu 14 neʼe au papitema ʼi he kiʼi tafeʼaga vai. Neʼe fakauku tuʼa tolu au ki te vai, ʼuluaki ki te Tamai, lua ki te ʼAlo, pea tolu ki te laumalie maʼoniʼoni.
ʼI te fale ako, neʼe ʼi ai toku kaumeʼa faifuhu, pea neʼe ina uga au ke au ʼahiʼahi ako fuhu. Neʼe au kamata akoako fuhu ʼo au kau ai ki he kautahi faifuhu ʼe higoa ko te Golden Gloves. Neʼe mole au loko faiva, ʼo hili pe ki ai taku tahi ʼu fuhu pea au liʼaki. Ki muli leva, neʼe fakaui mai ke au kau ki te foʼi Solia Amelika pea neʼe fekauʼi au ki Siamani. ʼI ai, ko ʼoku takitaki neʼe natou fekauʼi au ki he fale ako solia, koteʼuhi ʼi tanatou manatu ʼe au liliu anai ko he takitaki solia faiva. Neʼe natou loto ke au foaki katoa toku maʼuli ki te solia. Kae neʼe mole au fia nofo ai, koia ʼi te hili ʼo te ʼu taʼu solia mahani ʼae ʼe lua, neʼe au mavae ai ʼi te solia ʼi te taʼu 1956. Mole fualoa ki ai, neʼe au foaki toku maʼuli ki te tahi age faʼahiga solia.
TE TAHI AGE MAʼULI
ʼI muʼa ʼo taku ako te moʼoni, neʼe ʼi ai ʼaku faʼahiga manatu hala ki tokita ʼuhiga tagata moʼoni. Neʼe au maʼu te ʼu faʼahiga manatu ʼaia ʼuhi pe ko te ʼu ʼata pea mo te hahaʼi ʼi ʼoku tafaʼaki. Kia au, ko te ʼu tagata ʼae ʼe palalau ki te Tohi-Tapu ʼe mole ko he ʼu tagata moʼoni. Kae ʼaki te temi neʼe au kamata mahino ai ki ʼihi aluʼaga neʼe ina fetogi katoa ai toku maʼuli. ʼI taku tahi ʼevaʼeva ʼi taku motoka kula mo matalelei ʼi te loto kolo, neʼe kaloʼi au e te ʼu taʼahine ʼe toko lua pea neʼe au alu ʼo fakatau kia naua. Ko te ʼu kiʼi tokolua liliki ʼo te ʼohoana ʼo toku tokolua ʼuluaki. ʼE nā Fakamoʼoni kia Sehova. Neʼe kua nā foaki mai Te ʼu Tule Leʼo pea mo te ʼu Réveillez-vous ! ʼi muʼa atu, kae kia au ʼe faigataʼa fau te mahino ki Te Tule Leʼo. Kae ʼi te ʼaho ʼaia, neʼe nā fakaafe leva au ki te Ako Tohi ʼo Te Kokelekasio, ko he kiʼi fono neʼe fai ʼi tonā ʼapi pea neʼe natou ako mo palalau ai ki te Tohi-Tapu. Neʼe au ui age kia naua tuku muʼa ke au fakakaukauʼi. Neʼe nā malimali pea nā ui mai, “Tou fai ki ai?” Pea au ui age, “Fai ki ai.”
Neʼe au fakahemala, kae neʼe maʼua ke au fakahoko taku fakapapau. Koia neʼe au alu ai ki te fono. Neʼe au punamaʼuli tafito ʼo ʼuhiga mo te tamaliki ʼi tanatou popoto ʼi te fakaʼaogaʼi ʼo te Tohi-Tapu. Logo la taku alu ki te ʼekelesia mo taku faʼe ʼi te ʼAhotapu fuli, kae neʼe mole leva au iloʼi feia te Tohi-Tapu. Pea neʼe au tali haku ako he neʼe au fia iloʼi lelei te Tohi-Tapu. Neʼe au ʼuluaki ako, ko te huafa ʼo te ʼAtua Mafimafi, ʼe ko Sehova. ʼI ni taʼu ki muʼa atu, moka au faifehuʼi ki taku faʼe ʼo ʼuhiga mo te kau Fakamoʼoni ʼa Sehova, neʼe ina ui mai, “ ʼOi, ʼe natou tauhi ki te matuʼa ʼe higoa ko Sehova.” Kae ʼi te temi leva ʼaia, neʼe kua au kamata mahino.
Neʼe au iloʼi kua au maʼu te moʼoni, koia ʼae neʼe vave ai taku tuputupu. Hili pe mahina ʼe hiva ki taku ʼuluaki fono, neʼe au papitema ʼi Malesio 1957. Neʼe kua fetogi taku faʼahiga manatu ʼo ʼuhiga mo te maʼuli. Pea neʼe au fiafia he ʼe akoʼi mai ʼi te Tohi-Tapu pe kotea te ʼuhiga tagata moʼoni. Ko Sesu neʼe ko he tagata haohaoa. Neʼe malohi age ia ʼi te tagata fuli pe. Kae, neʼe mole he temi neʼe fuhu ai. Pea ohage pe ko tona kua fakakikite, ‘neʼe ina tuku ke fakamamahi’i Esaia 53:2, 7) Neʼe au toe ako, ko he tisipulo ʼa Sesu “ ʼe tonu ke agalelei ki te hahaʼi fuli.”—2 Timoteo 2:24.
ia ia.’ (Neʼe au pionie ʼi te taʼu 1958, kae neʼe mole fualoa. Kotea tona tupuʼaga? Koteʼuhi neʼe au fakatotonu ke au ʼohoana mo Gloria. Neʼe ko te taʼahine pe ʼi te ʼu taʼahine ʼae neʼe nā fakaafe au ki te ako tohi. Pea ʼe mole au fakahemala ki te tonu ʼaia neʼe au fai. Kia au, ko Gloria neʼe ko he maka maʼuhiga pea ʼe heʼeki fetogi taku manatu ʼaia. ʼE laka age ia ʼi te taimani ʼae ʼe maʼuhiga ʼaupito, pea ʼe au fiafia ʼi taku ʼohoanaʼi ia ia. Kae tou tuku muʼa ke palalau ʼo ʼuhiga mo ia:
“Neʼe toko 17 tamatou fanau. Ko taku faʼe neʼe tauhi agatonu kia Sehova pea neʼe mate kae kei au taʼu 14. Hili ia, neʼe kamata ako e tamatou tamai te Tohi-Tapu. Pea ʼuhi ko te kua mate ʼa mama, neʼe kole leva e tamatou tamai ki te pule ʼo te fale ako pe ʼe feala la ke fetotoʼi ʼaho tamā olo ʼo ako mo toku taʼokete, ʼae neʼe ko tona taʼu ako fakaʼosi ʼaia. Neʼe feala ai ke nofo he tahi ia maua ʼi fale ʼo tokaga kia natou ʼae ʼe kei veliveli, mo fai te kuka ʼi muʼa te ʼosi gaue mai ʼa taku tamai ʼi te afiafi. Neʼe tali e te pule ʼo te fale ako, ʼo ma fai ai te faʼahi ʼaia ʼo kaku ki te maʼu pepa ʼo toku taʼokete. Neʼe matou ako te Tohi-Tapu mo te ʼu famili Fakamoʼoni ʼe lua, pea neʼe ko te toko 11 ʼi tamatou fanau neʼe liliu ko he kau Fakamoʼoni ʼa Sehova. Logo la neʼe au umiuminoa, kae neʼe au leleiʼia te faifakamafola. Pea neʼe tokoni lahi mai toku ʼohoana ia Sam ʼi te faʼahi ʼaia.”
Neʼe ma ʼohoana mo Gloria ʼi Fepualio 1959. Pea neʼe ma fiafia ʼi te pionie fakatahi. ʼI Sulio ʼo te taʼu pe ʼaia, neʼe ma fai tamā kole ke ma hu ki te Petele he neʼe ma fia gaue ʼi ʼatatou pilo lalahi. Neʼe ma felogoi leva mo te tehina ko Simon Kraker. Neʼe ina ui mai, neʼe mole toʼo ʼi te Petele ʼi te temi ʼaia te ʼu taumatuʼa. Kae neʼe ma taupau tuʼumaʼu pe tamā fakatuʼutuʼu ʼaia tatau aipe pe neʼe hoko ʼi ni taʼu ki muli mai.
Neʼe ma faitohi ki ʼatatou pilo lalahi ʼo kole ke fekauʼi maua ki he telituale ʼe ʼaoga ki ai he tokoni. Ko te koga meʼa pe ʼe tahi neʼe fekauʼi maua ki ai, ko Pine Bluff, ʼi Arkansas. ʼI te temi ʼaia, neʼe ʼi ai kokelekasio ʼe lua ʼi te kolo ʼaia. Ko te kokelekasio ʼo te kau papalagi pea mo te kokelekasio ʼo te kau ʼuli. Neʼe fekauʼi maua ki te kokelekasio ʼo te kau ʼuli, pea neʼe natou toko 14 kau faifakamafola.
TE ʼU FIHIFIHIA ʼUHI KO TE FAKAKEHEʼI PEA MO TE FEHIʼA KI TE TAHI LANU
ʼE lagi kotou feuiʼaki pe koʼe neʼe fakakeheʼi e te kau Fakamoʼoni ʼa Sehova ia te kau faifakamafola papalagi mo ʼuli. He neʼe ko he faʼahi neʼe fakamaʼua ʼi te temi ʼaia. Neʼe ʼi ai ʼihi lao neʼe tapuʼi ai te fefioʼaki ʼa te ʼu lanu pea ko te talagataʼa ki te ʼu lao ʼaia neʼe fakatupu tuʼutamaki. ʼE lahi te ʼu koga meʼa neʼe matataku ai te ʼu tehina naʼa maumauʼi tonatou Fale Fono mo kapau neʼe natou fakatahiʼi te ʼu lanu. Pea neʼe hoko moʼoni te ʼu aluʼaga ʼaia. Kapau neʼe faifakamafola he kau ʼuli ʼi he kolo ʼe maʼuʼuli ai he kau papalagi, neʼe feala pe ke taʼofi peʼe ke ta natou. Koia la ʼae neʼe matou mulimuli ai ki te ʼu lao ke hoko atu te gaue faifakamafola, pea mo fakaʼamu ke fetogi te ʼu aluʼaga ʼaia.
Neʼe faigataʼa te faifakamafola. ʼI ʼihi temi, ʼe ma tukituki hala ki te matapa ʼa he famili papalagi kae ma lolotoga faifakamafola ʼi he telituale ʼe maʼuʼuli ai te kau ʼuli. Neʼe tonu ke ma filifili ke fakanounou te ʼu ʼuluaki palalau peʼe ma faifakalelei mo mavae. Neʼe feia te ʼu aluʼaga ʼo te temi ʼaia.
ʼE moʼoni, neʼe tonu ke ma gaue pea mo hoko atu tamā selevisi pionie. Neʼe mole faʼa maʼuhiga te totogi ʼo tamā gaue ʼi te ʼaho katoa. Neʼe faimenasi ia Gloria. ʼI ʼihi ʼapi, neʼe fakagafua mai ke au tokoni ki ai, ʼo ʼosi vave ai tana gaue. Neʼe foaki mai e te famili ʼaia tamā kiʼi kamele meʼa kai ʼo ma taupau maʼuli ai ʼi muʼa ʼo tamā mavae. ʼI te vahaʼa fuli, neʼe fai e Gloria te fakamolemole ʼa te kiʼi famili. Kae au holo sioʼata, mo gaue ʼi te ʼoloto pea mo fai ʼihi atu kiʼi gaue. ʼI te ʼapi ʼo te famili papalagi, neʼe ma holo sioʼata, ko au ʼi tuʼa kae ko Gloria ʼi loto. Neʼe ʼaho katoa tamā gaue, koia neʼe foaki mai e te loto fale ʼaia tamā meʼa kai ʼi te fetapa. ʼI fale neʼe kai kehe pe te famili ia pea ko Gloria ʼi te tahi kiʼi faʼahi kae neʼe au kai ʼi tuʼa ʼi te tauʼaga motoka. Mole kovi ia, he neʼe kano lelei te meʼa kai. Neʼe agalelei te kiʼi famili, kae neʼe kua natou maʼu pe te faʼahiga manatu ʼa te hahaʼi ʼi ʼonatou tafaʼaki. ʼE au manatuʼi hili te tahi ʼutuʼaga ʼo tamā motoka, neʼe au kole age ki te tagata gaue pe ʼe feala la ke fakaʼaogaʼi e Gloria te fale mamaʼo. Neʼe ina tali fakaitaita mai, “ ʼE mapunu.”
HE ʼU AGAʼOFA ʼE MOLE AU GALOʼI ANAI
Logo la te ʼu aluʼaga ʼaia, kae neʼe ʼi ai te ʼu lakaga fakafiafia neʼe ma fakatahi ai mo te ʼu tehina mo
tuagaʼane, pea neʼe ma leleiʼia tamā minisitelio. ʼI tamā tau atu ki Pine Bluff, neʼe ma nonofo ʼi te ʼapi ʼo te tehina ʼae neʼe ko te taupau ʼo te kokelekasio ʼi te temi ʼaia. (Kua fakahigoa ʼi te temi nei ko te kootinatea ʼo te kolesi ʼo te kau tagata ʼafeā) Ko tona ʼohoana neʼe heʼeki ʼi te moʼoni, kae neʼe ina kamata ako leva te Tohi-Tapu mo Gloria. Kae neʼe au fai au te ako Tohi-Tapu ʼo tanā taʼahine mo tona ʼohoana. Neʼe fakatotonu ai e te tau faʼe ke nā tauhi kia Sehova pea mo papitema.Neʼe ʼi ai ʼoma kaumeʼa ʼi te kokelekasio ʼo te kau papalagi. Neʼe natou fakaafe maua ki he kiʼi taupau maʼuli ʼi ʼonatou ʼapi. Kae neʼe hoki feala pe hamā tau atu kio natou ʼi te kua poʼuli ke mole sio he tahi ki tamatou fakatahi. Ko te Ku-Klux-Klan (KKK), ko te kautahi neʼe ina ʼekenaki te fehiʼa ki he tahi age lanu mo te agamalohi, pea neʼe malohi ʼana gaue ʼi te temi ʼaia. ʼE au manatuʼi te tahi afiafi ʼo Halloween, neʼe au sio ki te tagata neʼe heka ʼi tona muʼa matapa mo fiameʼameʼa ʼi tona kofu loa hina pea neʼe ʼuʼufi tona foʼi ʼulu. Neʼe ko te teu ʼaia ʼa te kautahi KKK. Kae, neʼe mole taʼofi e te ʼu aluʼaga ʼaia ia te agaʼofa ʼa te ʼu tehina mo tuagaʼane. ʼI te tahi temi vela, neʼe tonu ke ma maʼu hamā foʼi falā ke ma olo ai ki he fakatahi lahi. Neʼe ma fakatau ai tamā motoka pea neʼe toʼo e te tehina. Hili ki ai te mahina, neʼe ma punamaʼuli ʼi tamā tau gaʼegaʼe atu ki fale ʼuhi he neʼe ma faifakamafola ʼi te vevela pea mo fai he ʼu ako Tohi-Tapu. Neʼe tuʼu ʼi toma muʼa ʼapi tamā motoka. Neʼe ʼi ai te kiʼi pepa ʼe pipiki ʼi te sioʼata ʼo te motoka, ʼe tohi fenei ai: “ ʼE au toe liufaki atu takolua motoka, ko he meʼa ʼofa. Tokolua tehina.”
ʼE ʼi ai te tahi agaʼofa ʼe au manatuʼi tuʼumaʼu anai. ʼI te taʼu 1962, neʼe fakaafe au ke au kau ki te Ako ʼo Te Minisitelio ʼo Te Puleʼaga ʼi South Lansing, ʼi New York. Neʼe ko te ako mahina katoa ki te ʼu taupau ʼo te ʼu kokelekasio, te ʼu taupau fakasiliko, pea mo te ʼu taupau fakatisitilike. ʼI te temi ʼaia, neʼe mole ʼi ai haku gaue, pea neʼe ma faigataʼaʼia. Kae, neʼe pauʼi mai te sosiete ʼo te telefoni ʼo te kolo ko Pine Bluff ke au alu age ʼo fakafelogoi ki haku gaue. Kapau neʼe natou toʼo au, pea ko te hoki gaue ʼaia ʼa he tagata ʼuli maʼa te sosiete ʼaia. Pea neʼe natou fakaha mai ʼe natou fia toʼo ʼosi leva au ki te gaue. Kotea anai ka au fai? Neʼe mole ʼi ai haku foʼi falā feʼauga ke au alu ai ki New York. Neʼe meihiʼi pe ke au tali te gaue kae au fakafisi ki toku fakaafe ʼae ki te ako. Pea neʼe kua au ʼamanaki pe la ke au faitohi ki te Petele ki te faʼahi ʼaia kae neʼe hoko leva he aluʼaga ʼe mole au galoʼi anai.
ʼI te tahi uhu, neʼe ʼi ai he tahi neʼe ina tukituki toma matapa. Neʼe ko te tuagaʼane ʼo toma kokelekasio, ʼe mole tauhi kia Sehova tona ʼohoana, neʼe haʼu ʼo fakatoʼo mai he sila ʼe ʼai ai te toe falā. Ko ia mo ʼihi ʼi ʼana fanau ʼae ʼe kei liliki neʼe natou olo mafoata ʼo huo ʼi te ʼu gaueʼaga vavae. Neʼe natou fai te faʼahi ʼaia ke totogi ʼaki ai toku tohi folau ʼae ki New York. Neʼe ui mai e te tuagaʼane ʼaia, “Alu ki tau ako pea hoki ke haʼu ʼo akoʼi mai te ʼu meʼa fuli ʼae neʼe ke ako.” Neʼe au pauʼi leva ki te sosiete ʼo te telefoni pe ʼe feala la ke hoki au kamata gaue ʼi ni vahaʼa ʼe nima ki muli age. Neʼe natou fakafisifisi mai. Kae neʼe mole malave mai te faʼahi ʼaia. Neʼe kua au toʼo taku tonu. Pea ʼe au fiafia ʼi taku mole tali te gaue ʼaia.
Koʼeni te aluʼaga ʼe manatuʼi tuʼumaʼu e Gloria ʼi tamā kei maʼuʼuli ʼi Pine Bluff: “Neʼe au leleiʼia ʼaupito te telituale ʼae neʼe au faifakamafola ai. Neʼe ko ʼaku ako Tohi-Tapu ʼe teitei 15 ki te 20. ʼI te uhu neʼe ma faimatapa ai pea ʼosi ʼaia neʼe ma faiako ʼo kaku ki te hola 11 poʼuli ʼi ʼihi temi. Neʼe au leleiʼia ʼosi taku selevisi pea neʼe au fia hoko atu. ʼI tona fakahagatonu, neʼe mole au fia kau ki te gaue fakasiliko, kae neʼe mole ko te manatu ʼaia ʼa Sehova.” Pea neʼe koia pe ia.
TE GAUE TAUPAU FAKASILIKO
ʼI tamā pionie ʼi te kolo ko Pine Bluff, neʼe fai tamā kole ke ma liliu ʼo pionie makehe. Neʼe ma manatu ʼe tali anai tamā kole. Kotea tona tupuʼaga? Koteʼuhi neʼe loto e te taupau ʼo te tisitilike ke ma liliu ko he ʼu pionie makehe pea ke ma olo ʼo tokoni ki te kokelekasio ʼi Texas. Neʼe ma leleiʼia te manatu ʼaia. Koia neʼe fualoa leva tamā atalitali ke hoki fakaha mai he tonu e te kautahi. Ki muli age, neʼe ma maʼu leva te tohi. Neʼe hinoʼi maua ki te gaue taupau fakasiliko. Neʼe ko te mahina ʼaia ʼo Sanualio 1965. ʼI te lakaga ʼaia, neʼe toe fakanofo mo te tehina ko Leon Weaver, ko te taupau ʼo te siliko, kae ʼi te temi nei ko te kootinatea ʼo te Komite ʼo te Filiale ʼo Amelika.
Neʼe au lotohoha ʼi taku iloʼi ʼae ka au liliu ko he taupau ʼo te siliko. ʼI te taʼu katoa ki muʼa atu peʼe siʼi ifo, neʼe vakaʼi ʼoku fealagia e te taupau ʼo te tisitilike ko James A. Thompson, Jr. Neʼe agalelei te tehina pea neʼe ina fakaha mai te ʼu faʼahi ʼae ʼe ʼaoga ke au tuputupu ai pea mo te ʼu kalitate ʼae ʼe tonu ke maʼu e he taupau ʼo te siliko. ʼI taku ʼosi kamata te gaue fakasiliko, neʼe au mahino atu aipe ki te maʼuhiga ʼo ʼana tokoni. Pea ko te ʼuluaki taupau ʼo te tisitilike ʼae neʼe ma gaue fakatahi, ko te tehina ko Thompson. Neʼe lahi te ʼu ako neʼe au taʼofi mai ʼi te tehina agatonu ʼaia.
ʼI temi ʼaia, neʼe mole fualoa te akoako ʼa te taupau ʼo te siliko. Lolotoga he vahaʼa katoa, neʼe au sioʼi te taupau ʼo te siliko moka ina ʼaʼahi he kokelekasio. Pea ʼi te tahi vahaʼa katoa, ko ia ʼae neʼe ina sioʼi au moka au ʼaʼahi he tahi kokelekasio. Neʼe ina foaki mai he ʼu tokoni. Kae neʼe tonu leva ke ma tahi gaue. ʼE au manatuʼi neʼe au ui fenei kia Gloria: “Ko tana levae alu?” Kae ʼaki te temi, neʼe au mahino ki te faʼahi maʼuhiga. ʼE ʼi ai tuʼumaʼu pe te ʼu tehina agalelei ʼe lava tokoni mai, mo kapau foki ʼe tou tuku ke natou tokoni mai. ʼE au manatuʼi tuʼumaʼu te tokoni maʼuhiga neʼe au maʼu mai te ʼu tehina faiva ohage ko te ʼu tehina ko J. R. Brown, neʼe ko te taupau fealuʼaki ʼi te temi ʼaia, pea mo Fred Rusk ko te Petelite.
Ko te fehiʼa ki te tahi lanu neʼe kua mafola ʼi te temi ʼaia. ʼI te ʼaho ʼae neʼe ma ʼaʼahi ai te kokelekasio ʼi Tennessee, neʼe fakatuʼutuʼu e te kautahi KKK tanatou laka ʼi te kolo. ʼE au manatuʼi te tahi ʼaho ʼi te ʼosi ʼo tamatou faifakamafola mo ʼihi tehina mo tuagaʼane, neʼe matou tutuʼu leva ʼi te kiʼi fale kai. ʼI taku alu ʼae
ki te fale mamaʼo, neʼe muliʼi au e te tagata mata itaita neʼe ta ʼi tona sino he ʼu manatu fakapalatahi. Kae neʼe toe haʼu mai muli te tehina papalagi ʼe lahi age ia matou ʼo ina fehuʼi fenei mai: “ ʼE lelei pe tehina ko Herd?” Neʼe alu fakavilivili atu aipe te tagata ʼae neʼe ina muliʼi au. ʼAki te temi, neʼe au mahino ai ki te tupuʼaga tafito ʼo te ʼu manatu fakapalatahi, ʼe mole ʼuhi ko te lanu ʼo he tahi kae ʼuhi he ʼe tou agahala fuli. Pea neʼe au iloʼi tatau aipe pe ʼe mole au lanu tahi mo he tehina, kae ʼe ma tau tehina tuʼumaʼu pe pea ʼe lotolelei ke ina foaki tona maʼuli moʼoku haofaki mo kapau ʼe ʼaoga.HE MAʼULI TAPUAKINA
Neʼe taʼu 12 tamā kau ki te gaue taupau fakasiliko kae neʼe taʼu 21 tamā kau ki te gaue taupau fakatisitilike. Neʼe ko he ʼu taʼu tapuakina ʼaia, pea neʼe lahi te ʼu aluʼaga fakalotomalohi neʼe hoko kia maua. ʼI ʼAukusito 1997, neʼe hoko ai leva tamā fakaʼamu talu mai fualoa. Neʼe fakaafe maua ki te gaue ʼi te Petele ʼi Amelika, kae kua hili taʼu ʼe 38 ki te fai ʼo tamā kole. Hili te mahina ki toma fakaafe, neʼe kamata ai leva tamā gaue ʼi te Petele. ʼI taku manatu, neʼe loto pe e te ʼu tehina takitaki ʼo te Petele ke au gaue ʼi he kiʼi temi siʼi, kae neʼe mole ko ia ʼaia.
Neʼe hinoʼi muʼa au ki te Selevisi Gaue. Neʼe lahi te ʼu faʼahi neʼe au ako ʼi ai. Ko te ʼu tehina ʼae ʼe gaue ai ʼe natou tokakaga ki te ʼu fehuʼi faigataʼa mo fakaʼeteʼete ʼe momoli mai ʼi te ʼu kolesi ʼo te kau tagata ʼafeā pea mo te ʼu taupau ʼo te siliko ʼo te fenua katoa. ʼE au lotofakafetaʼi he neʼe lelei toku akoako e te ʼu tehina faʼa kataki ʼaia. ʼE mahino ia, ʼe ʼaoga anai ke toe akoʼi au e te ʼu tehina ʼaia mo kapau ʼe toe hinoʼi au ki te selevisi ʼaia.
ʼE ma leleiʼia mo Gloria te maʼuli ʼae ʼi te Petele. Ko tamā agamahani ko te ʼala uhuuhu pea neʼe to lelei ʼi tamā gaue ʼi te Petele. Neʼe heʼeki taʼu katoa taku gaue ʼi te Petele, kae neʼe hinoʼi au ke au tokoni ki te Komite Gaue ʼo te Kolesi Pule ʼa te kau Fakamoʼoni ʼa Sehova. Pea ʼi te taʼu 1999, neʼe au kau ai leva ki te Kolesi Pule. Neʼe lahi te ʼu faʼahi neʼe au ako ʼi taku gaue ʼaia. Kae ko te ako maʼuhiga ʼae ʼe au taʼofi, ko te pule ʼo te kokelekasio Fakakilisitiano ʼe ko Sesu Kilisito, kae ʼe mole ko he tagata.
Ka au fakakaukauʼi toku maʼuli, ʼi ʼihi temi ʼe au hage ko te polofeta ko Amosi. Neʼe tokagaʼi e Sehova te tagata tauhi manu agavaivai ʼaia. Neʼe ko te tagata huki fiku pea ko te faʼahiga fiku ʼaia neʼe kai pe e te hahaʼi masisiva. Kae, neʼe fakanofo e te ʼAtua ia Amosi ko he polofeta ʼo ina tapuakinaʼi ʼi tana gaue ʼaia. (Amosi 7:14, 15) ʼO toe feia pe, neʼe tokagaʼi au e Sehova, kae ko taku tamai ko he tagata masiva neʼe gaue kele ʼi te kiʼi kolo ko Liberty, ʼi Indiana. Pea ʼi te lahi fau ʼo te ʼu tapuakina ʼae neʼe foaki mai e Sehova, ʼe mole feala ke au lau fuli atu. (Taaga Lea 10:22) ʼE moʼoni, ʼi te kamata neʼe au masiva ʼi te faʼahi fakasino, kae ʼi te temi nei kua au koloaʼia ʼi te faʼahi fakalaumalie ʼo laka age ʼi te ʼu meʼa fuli neʼe feala ke au fakaʼamu ki ai.