TONATOU MAʼULI
Ka Tou Fai Te Meʼa ʼAe ʼe Kole Mai e Sehova, ʼe Ina Tapuakinaʼi Tatou
Ko au mo toku ʼohoana, pea mo toku tuagaʼane mo tona ʼohoana, neʼe hinoʼi matou ki he gaue makehe. Neʼe matou foimo tali atu aipe, “ ʼE matou fakahoko anai.” He koʼe neʼe matou tali ia te gaue ʼaia, pea neʼe tapuakinaʼi feafeaʼi matou e Sehova? Kaʼe, ʼe au fia fakamatala atu muʼa ia toku maʼuli.
NEʼE au tupu ʼi te taʼu 1923 ʼi Hemsworth, ko he kolo ʼi Yorkshire, ʼi Pilitania. Neʼe ʼi ai toku tokolua lahi ʼe higoa ko Bob. ʼI toku taʼu hiva, neʼe maʼu e taku tamai he ʼu tohi neʼe fakamahino ai pe neʼe feafeaʼi te kakaʼi e te lotu hala ia te hahaʼi. Neʼe malave ʼaupito ki taku tamai ia te ʼu manatu ʼae neʼe ina lau. Neʼe fehiʼa ki te malualoi ʼa te kau takitaki lotu, koteʼuhi neʼe natou akoʼi he meʼa kaʼe mole natou maʼuliʼi. ʼI ni taʼu ki muli age, neʼe haʼu ia Bob Atkinson ki tomatou ʼapi ʼo fakatagi ia he akonaki neʼe puke ʼo te tehina ko Rutherford. Neʼe matou mahino ai ko te ʼu tohi ʼae neʼe lau e taku tamai pea mo te akonaki ʼe haʼu pe mai te kutuga ʼe tahi. Neʼe fakaafe ai leva e ʼaku matuʼā ia te tehina ko Atkinson ke matou kakai ʼi te afiafi fuli pea mo tali ki ʼamatou fehuʼi Fakatohi-tapu. Pea neʼe ina fakaafe matou ki he fono ʼi te ʼapi ʼo te tehina ʼe tuʼu ovi mai pe. Neʼe matou kamata kau tuʼumaʼu ai ki te ʼu fono pea neʼe fakatuʼu ai leva ia te kiʼi kokelekasio ʼi Hemsworth. Mole tuai, pea neʼe matou fakaʼapi ia te ʼu taupau ʼo te siliko pea neʼe matou fakaafe te ʼu pionie ʼo te ʼu kokelekasio ʼe ovi mai. Neʼe fua lelei ʼaupito kia au taku fakatahi mo te ʼu tehina mo tuagaʼane ʼaia.
ʼI te temi ʼaia, neʼe kua kamata e toku famili ia tamatou kiʼi matani gaue. Kaʼe neʼe ui e taku tamai ki toku tuagaʼane, “Kapau ʼe ke fia pionie, ʼe tonu ke ke liakī te ʼu meʼa ʼaeni.” Neʼe mavae ai ia Bob ʼi tomatou ʼapi ʼi tona taʼu 21, ke ina toʼo ai tana selevisi pionie. ʼI ni taʼu ʼe lua ki muli age, ʼi toku taʼu 16, neʼe au toe pionie mo au. Pea ʼi te ʼu fakaʼosi vahaʼa neʼe au faifakamafola mo ʼihi, kaʼe ʼe mahani pe ʼe au faifakamafola tokotahi. Neʼe au fakaʼaogaʼi ia te fakatagi pea mo te kiʼi kate fakamoʼoni. Neʼe ko te kiʼi kate ʼe tohi ai ia he logo Fakatohi-tapu ʼe nounou mo faigafua. Pea neʼe tapuakinaʼi au e Sehova, he neʼe au maʼu taku ako Tohi-Tapu neʼe tuputupu lelei. Ki muli age, neʼe hahaʼi natou ʼo tona famili neʼe natou tali ia te moʼoni. ʼI te taʼu ʼae neʼe hoa mai ki ai, neʼe hinoʼi au mo Mary Henshall ke ma pionie makehe. Pea neʼe fekauʼi maua ki te telituale neʼe heʼeki gaueʼi ʼi Cheshire.
Lolotoga te Lua Tau Fakamalamanei, neʼe fakatotonu ki te hahaʼi fafine ke natou fai he gaue ʼe lagolago anai ki te tau. Kaʼe neʼe mole fakatotonu ki te kau takitaki lotu ke natou olo ʼo tau. Koia ʼae neʼe ma manatu Esaia 41:10, 13.
ai ʼe mole fakatotonu mai anai ke ma kau ki te tau, he ko maua ko te ʼu pionie makehe. Kaʼe neʼe mole manatu feia te telepinale. Pea neʼe au pilisoni ia ʼaho ʼe 31. ʼI te taʼu ʼae neʼe hoa mai, ʼi toku taʼu 19, neʼe fakamauʼi tuʼa lua au, koteʼuhi neʼe heʼeki fetogi toku leʼo ʼo loto ʼo ʼuhiga mo te tau. Kaʼe ʼi ʼoku fakamauʼi ʼaia ʼe lua, neʼe mole natou pilisoniʼi au. Lolotoga te ʼahiʼahi ʼaia, neʼe au iloʼi ai neʼe tokoni mai ia te laumalie maʼoniʼoni. Pea neʼe fakamalohiʼi au e Sehova.—KO HOKU KAUGĀ GAUE FOʼOU
Neʼe au felaveʼi mo Arthur Matthews ʼi te taʼu 1946. Neʼe pilisoniʼi lolotoga mahina ʼe tolu ʼuhi ko tana mole kau ki te tau. ʼI tona ʼosi fakamavae pe mai te pilisoni, neʼe alu ki tona tehina ko Dennis, ʼae ʼe pionie makehe ʼi Hemsworth. Neʼe akoʼi naua e tanā tamai pe ko ai ia Sehova talu mai tanā kei liliki. Pea nā papitema, ko Arthur ʼi tona taʼu 17, kaʼe ko Dennis ʼi tona taʼu 16. Neʼe nā kamata pionie fakatahi, hili ia, neʼe hinoʼi ia Dennis ki Irlande. Koia, neʼe nofo tokotahi ai leva ia Arthur. Neʼe punamaʼuli ʼaku matuʼā ki te aga mo te faʼa gaue ʼa te pionie ʼaia. Neʼe nā fakaʼapi ai ia ia. ʼI te ʼu temi ʼae neʼe au alu ai ʼo fakasiosio ʼaku matuʼā, tuʼumaʼu pe ʼi te ʼosi kakai neʼe ko au mo Arthur ʼae ʼe fai fulu meʼa. Pea neʼe ma kamata fefaitohiʼaki leva. Lolotoga te taʼu 1948, neʼe toe pilisoniʼi ia Arthur ia mahina ʼe tolu. Pea ma ʼohoana ʼi Sanualio 1949 ʼo ma fakatuʼutuʼu ai ke ma nonofo fualoa ʼi te selevisi pionie. Neʼe ma tokakaga lelei ki te fakaʼaogaʼi ʼo tamā kiʼi foʼi falā. Pea ʼi te ʼu temi malolo neʼe ma kau ki te toli fuaʼi ʼakau ke maʼu hamā kiʼi foʼi falā. ʼAki te tapuakina ʼa Sehova, neʼe feala ai ke ma hoko atu tamā selevisi pionie.
Hili ki ai te taʼu katoa, neʼe hinoʼi maua ki te Potu Noleto ʼo Irlande. ʼUluaki, ko Armagh pea ʼosi ʼaia ko Newry. ʼI te ʼu kolo ʼaia neʼe teitei pe ke Katolika fuli te hahaʼi. Neʼe malohi te ʼu manatu fakapalatahi ʼo ʼuhiga mo te ʼu lotu ʼi te potu fenua ʼaia. Koia ʼae neʼe tonu ai ke ma tokakaga pea ke ma maʼu ia te fakasiosio poto moka ma faifakamafola. Neʼe matou fono ʼi te ʼapi ʼo te tehina mo te tuagaʼane ʼe tuʼu mamaʼo ia kilometa ʼe 16 kio maua. Pea neʼe ko te toko valu pe ʼae neʼe kau ki te ʼu fono. ʼI ʼihi temi, neʼe ma momoe ai logo la neʼe mole homa moeʼaga. Kaʼe ʼi te ʼaho ake leva neʼe lelei tamatou taupau maʼuli. Ko he toe fiafia ʼi te temi nei, he ʼe kua tokolahi te kau Fakamoʼoni ʼi te potu fenua ʼaia.
“ ʼE MATOU FAKAHOKO ANAI”
Neʼe kua pionie makehe ia toku tokolua mo tona ʼohoana ko Lottie ʼi te Potu Noleto ʼo Irlande. Pea ʼi te taʼu 1952, neʼe matou kau toko fa ki te fakatahi fakatisitilike ʼi te kolo ko Belfast. Ko te tehina agalelei, neʼe ina fakaʼapi matou toko fa mo te tahi tehina ko Pryce Hughes, ʼae neʼe liliu leva ko te kootinatea ʼo te Petele ʼo Pilitania. ʼI te tahi po, neʼe matou faipalalau ki te kiʼi tohi foʼou, La voie de Dieu est une voie d’amour, ʼae neʼe fai tafito maʼa te hahaʼi ʼo Irlande. Pea neʼe fakamahino e te Tehina ko Hughes, neʼe faigataʼa ia te faifakamafola ki te hahaʼi Katolika ʼi te République dʼIrlande. Neʼe kapu te ʼu tehina mai ʼonatou nofoʼaga, pea neʼe uga e te ʼu patele ia te hahaʼi ke natou fakatagaʼi ia te ʼu tehina. Koia, neʼe ui fenei ai e Pryce: “ ʼE tonu ke ʼi ai he ʼu taumatuʼa mo hanatou ʼu motoka, ke natou kau ki te tufa makehe ʼo te kiʼi tohi ʼaeni ʼi te fenua katoa.” * (Vakaʼi te kiʼi nota.) Pea neʼe ko te temi ʼaia, neʼe matou ui fenei ai: “ ʼE matou fakahoko anai.”
ʼI Dublin, neʼe ʼi ai te nofoʼaga ʼo te kau pionie. Neʼe ko te ʼapi ʼo te tuagaʼane ko Ma Rutland, neʼe tauhi agatonu kia Sehova lolotoga ni lauʼi taʼu. Neʼe matou nonofo ʼi ai lolotoga he temi, ʼo feala ai ke matou fakatau ʼamatou ʼihi meʼa. Hili ia, neʼe matou fakahekaheka ki te moto ʼa Bob neʼe fakapipiki ki ai te tahi hekaʼaga, ʼo matou olo ai ʼo kumi hamatou motoka. Neʼe matou maʼu te motoka okasio, kaʼe neʼe kei lelei. Pea neʼe matou kole ki te tagata faifakatau ke ina taki age te motoka he neʼe mole matou popoto ʼi tona taki. ʼI te afiafi ʼaia, neʼe heka ia Arthur ʼi tona palepale, ʼo ina faʼifaʼitakiʼi ia te pase ʼo te vitesi ʼo te motoka. Pea ʼi te ʼaho ake, ʼi tana faigaʼi ʼae ke ina fakahu ki tuʼa ia te motoka ʼi tona tauʼaga, neʼe haʼu ia te misionea ʼe higoa ko Mildred Willett (ʼae neʼe ʼohoana ki muli age mo John Barr). Neʼe poto ʼi te taki motoka. Koia, neʼe ina akoʼi ai matou, pea neʼe matou tokalelei ai leva ki tamatou faifagona.
Neʼe tonu leva ke matou kumi homatou nofoʼaga. Pea neʼe ui mai e te ʼu tehina ke ʼaua naʼa matou nonofo ʼi he caravane he ʼe feala pe ke tutu e te kau fakafeagai. Koia, neʼe matou kumi ai homatou ʼapi, kaʼe neʼe mole matou maʼu. ʼI te afiafi ʼaia, neʼe matou momoe toko fa ʼi te motoka. Kaʼe ʼi te ʼaho ake, neʼe matou maʼu te kiʼi caravane mo ʼona kiʼi palepale ʼe fa. Neʼe ko tomatou leva ʼaia nofoʼaga. Kaʼe meʼa lelei foki, he neʼe feala ke tau ia te caravane ʼi te ʼu kele ʼo te ʼu tagata gaue kele agalelei. Pea neʼe matou faifakamafola ai ʼi te telituale ʼe kilometa 16 ki te 24 mai tamatou caravane. Moka matou hiki ki he tahi koga meʼa, neʼe matou toe liliu ʼo faifakamafola ki te hahaʼi ʼae neʼe lotolelei ke tau tamatou caravane io natou.
Neʼe matou ʼaʼahi te ʼu ʼapi fuli ʼi te potu saute esite ʼo te République dʼIrlande, pea neʼe mole lahi te fakafeagai. Neʼe matou tufa ai tohi ʼe 20 000, pea neʼe matou momoli ki te pilo ʼo te filiale ʼo Pilitania te ʼu higoa ʼo te hahaʼi ʼae neʼe fia logo ki te logo lelei. Ko he toe tapuakina ia, he ʼe ia ʼaho nei, kua toko lauʼi teau te kau Fakamoʼoni ʼi te koga meʼa ʼaia.
NEʼE MA TOE LILIU KI PILITANIA PEA KI ÉCOSSE
ʼI ni taʼu ki muli age, neʼe hinoʼi maua ki te potu saute ʼo Londres. Hili ki ai ni vahaʼa, neʼe telefoni mai te ʼu tehina mai te pilo ʼo te filiale ʼo Pilitania kia Arthur ke ina kamata ia te gaue fakasiliko ʼi te ʼaho ake. Neʼe akoʼi maua ki te gaue ʼaia lolotoga te vahaʼa katoa pea ma olo ai ki te ʼu kokelekasio ʼae neʼe tonu ke ma ʼaʼahi ʼi Écosse. Koia neʼe mole maʼu e Arthur he temi feʼauga ke ina teuteuʼi ai ʼana akonaki. Kaʼe neʼe lotolelei tuʼumaʼu pe ke ina fakahoko te ʼu gaue fuli ʼe hinoʼi ki ai ʼi te tauhi ʼae ki te ʼAtua, tatau aipe pe ʼe faigataʼa. Neʼe ko he faʼifaʼitaki fakalotomalohi kia au. Neʼe lahi toma fiafia ʼi te gaue fakasiliko. Neʼe hinoʼi maua ki he telituale neʼe heʼeki gaueʼi, ʼo ma faifakamafola ai lolotoga ni taʼu. Neʼe ko he toe pilivilesio ia te gaue fakatahi mo te ʼu tehina mo tuagaʼane kaugā malie ʼo te telituale ʼaia.
ʼI te temi ʼae neʼe fakaafe ai ia Arthur ki te Ako ʼo Kileate ʼi te taʼu 1962, neʼe maʼua ke ma toʼo he tonu maʼuhiga. Neʼe mahina hogofulu ia te ako, kaʼe neʼe mole fakaafe au ki te ako ʼaia. Neʼe ma fakatotonu ke tali e Arthur ia te fakaafe ʼaia. Neʼe mole kei ʼi ai hoku kaugā gaue, koia ʼae neʼe toe fekauʼi au e te Petele ki Hemsworth pea ke au pionie makehe ʼi ai. ʼI te toe liliu mai ʼae ʼa Arthur hili te taʼu katoa, neʼe hinoʼi maua ki te gaue fakatisitilike. Pea koʼeni ʼomā telituale: Neʼe
ko Écosse, mo te potu noleto ʼo Pilitania pea mo te potu noleto ʼo Irlande.KO HE GAUE FOʼOU ʼI IRLANDE
ʼI te taʼu 1964, neʼe hinoʼi ia Arthur ki te komite ʼo te filiale ʼo te République dʼIrlande. ʼI te kamata, neʼe au tuʼania ʼi te gaue ʼi te Petele, koteʼuhi neʼe au leleiʼia te gaue taupau fealuʼaki. Kaʼe moka au fakakaukauʼi ʼi te temi nei, ʼe au lotofakafetaʼi ki te pilivilesio ʼae neʼe au maʼu ke au gaue ʼi te Petele. ʼE au tui papau, kapau ʼe tou tali ia he gaue maʼia pe ʼe ko he gaue ʼe mole tou fia fai, ʼe tapuakinaʼi tuʼumaʼu pe anai tatou e Sehova. ʼI te Petele, neʼe au gaue pilo, mo au teuteuʼi te ʼu tohi ke momoli, mo kuka pea fakamaʼa. ʼI ʼihi temi, neʼe ma toe kau foki ki te gaue fakatisitilike, ʼo feala ai tamā felaveʼi mo te ʼu tehina mo tuagaʼane ʼo te fenua. Pea neʼe ma toe sisio foki ki te tuputupu ʼo ʼama ako Tohi-Tapu ʼi te moʼoni. Koia ʼi te ʼu aluʼaga fuli ʼaia, neʼe toe malohi age ai ʼama felogoʼi mo te ʼu tehina mo tuagaʼane ʼi Irlande. ʼI toe tapuakina leva.
KO HE ALUʼAGA MAʼUHIGA KI TE KAU FAKAMOʼONI ʼA SEHOVA ʼI IRLANDE
Ko te ʼuluaki fakatahi fakamalamanei neʼe fai ʼi Irlande, ʼi Dublin ʼi te taʼu 1965. * (Vakaʼi te kiʼi nota.) Logo la te lahi ʼo te fakafeagai, kaʼe neʼe lava lelei ia te fakatahi. Neʼe lau ki te toko 3 948 ʼi te fakatahi ʼaia, pea neʼe ko papitema ʼe toko 65. Ko te toko 3 500 kau teleke, neʼe fakaʼapi natou e te hahaʼi ʼo Dublin. Hili ia, neʼe tahi faitohi te kau teleke ʼo fakamalō ki te hahaʼi ʼaia. Pea neʼe vikiʼi e te hahaʼi te lelei ʼo te aga ʼa te ʼu tehina mo tuagaʼane. Neʼe ko he toe fetogi fakaofoofo ia ki te fenua ko Irlande.
ʼI te taʼu 1966, neʼe fakatahitahiʼi e te pilo ʼo te filiale ʼo Dublin te potu noleto mo te potu saute ʼo Irlande. Ko te logo tahi ʼaia, neʼe kehe ia mo te maveuveu fakapolitike pea mo fakalotu ʼae neʼe lolotoga hoko ʼi Irlande. Neʼe ma fiafia ʼi tamā sisio ʼae, tokolahi te kau Katolika neʼe natou tali te moʼoni, ʼo natou tauhi fakatahi kia Sehova mo ʼonatou tehina ʼae neʼe Polotesita ʼi muʼa atu.
KO HE TOE FETOGI
ʼI te taʼu 2011, neʼe ʼi ai te toe fetogi neʼe hoko kia maua ʼi te fakatahiʼi ʼo te filiale ʼo Pilitania mo Irlande, pea mo toma hinoʼi ki te Petele ʼo Londres. ʼI te temi ʼaia, neʼe au kamata tuʼania ʼo ʼuhiga mo Arthur. He neʼe kau ki te mahaki ʼe higoa ko te Parkinson. Pea ʼi te ʼaho 20 ʼo Maio 2015, neʼe mate leva toku ʼohoana, ʼae neʼe kua taʼu 66 tamā tauhi fakatahi kia Sehova.
ʼI te ʼu taʼu ʼaeni kua hili, neʼe au lotomamahi ʼaupito. ʼI muʼa atu neʼe fakalotofimalieʼi tuʼumaʼu au e Arthur. Pea ʼe au manatu tuʼumaʼu pe kia ia. Kaʼe ka tou felaveʼi mo te ʼu faʼahiga aluʼaga ʼaia, ʼe toe malohi age ai ʼatatou felogoʼi mo Sehova. ʼE au fiafia he neʼe ʼofainaʼi ia Arthur. Neʼe faitohi mai te ʼu tehina mo tuagaʼane ʼo Irlande, mo Pilitania pea mo Amelika. Pea ʼe mole he kupu feʼauga ʼe au maʼu ʼo ʼuhiga mo te tokoni ʼo te ʼu tohi ʼaia, pea mo te ʼu fakalotomalohi ʼo te tehina ʼo Arthur ko Dennis, mo tona ʼohoana ko Mavis, pea mo ʼaku fakafotu ko Ruth mo Judy.
Ko te vaega ʼae neʼe ina fakalotomalohiʼi au, ko Esaia 30:18, MN. ʼE ui fenei ai: “ ʼE atalitali anai ia Sehova ʼaki he kataki fualoa ke ina fakaha atu tona ʼofa, pea ʼe tuʼu ake anai ʼo fakaha atu tona manavaʼofa. Koteʼuhi ko Sehova ko te ʼAtua ʼo te fakamau. Manuʼia ia natou fuli ʼae ʼe natou haga atalitali kia te ia.” Ko he fakalotofimalie moʼoni kia au, taku iloʼi ʼae ʼe atalitali ia Sehova ʼaki he kataki fualoa ke ina fakatokatoka ʼotatou fihifihia fuli pea ke ina foaki mai he ʼu gaue fakafiafia ʼi te malama foʼou.
Ka au fakakaukauʼi te ʼu aluʼaga ʼae neʼe hoko ʼi muʼa atu, ʼe au mahino ai neʼe takitaki mo tapuakinaʼi e Sehova ia te gaue faifakamafola ʼi Irlande. Pea ko taku kau kia natou ʼae neʼe tokoni ki te gaue ʼaia, ʼe ko he toe pilivilesio ia neʼe au maʼu. ʼEi ʼe moʼoni, ka tou fai te meʼa ʼae ʼe kole mai e Sehova, ʼe ina tapuakinaʼi tuʼumaʼu tatou.