1, 2. ʼI te taʼu 2018, ko te toʼotoʼoga fea ʼae ʼe ina fakatahiʼi anai tatou ʼi hona aluʼaga fakaofoofo? Pea kotea tona tupuʼaga? (Vakaʼi te ʼuluaki pāki.)

ʼI TE ʼaho 31 ʼo Malesio 2018, ʼe kau anai te toko lauʼi miliona hahaʼi ʼi te malamanei katoa ki he toʼotoʼoga ʼe hoko tuʼa tahi pe ʼi te taʼu. ʼI te ʼosi to ʼo te laʼa, ʼe fakatahitahi anai te kau Fakamoʼoni ʼa Sehova pea mo ʼihi ʼo fakamanatu te sakilifisio ʼae neʼe fai e Sesu maʼa tatou. ʼE mole he fakatatau ʼo te ʼAho Fakamanatu ʼo te mate ʼo Kilisito, he ʼe ʼi te taʼu fuli ʼe fakaofoofo tana fakatahiʼi ia te hahaʼi kehekehe.

² ʼE fiafia moʼoni ia Sehova pea mo Sesu ʼi tanā sio ifo ki te toko lauʼi miliona hahaʼi ʼe fakaholo ki te toʼotoʼoga makehe ʼaia ʼi te malamanei katoa. ʼE fakamatala ʼi te Tohi-Tapu ko “he toe hahaʼi tokolahi, neʼe mole feala ke lau e he tahi, mai te ʼu puleʼaga fuli, mo te ʼu telepi fuli, mo te ʼu lanu fuli pea mo te ʼu lea fuli” ʼe natou kalaga fenei: “ ʼE haʼu totatou haofaki mai totatou ʼAtua, ʼae ʼe heka ʼi te hekaʼaga fakahau, pea mai te Akeno.” (Fakaha 7:9, 10)  ʼE mahino ia ʼe tou fiafia, he ʼe ʼi te taʼu fuli, ʼe fakakololiaʼi e he kaugā malie ia Sehova pea mo Sesu ʼi te ʼAho Fakamanatu ʼo ʼuhiga mo te ʼu gaue taulekaleka ʼae neʼe nā fai.

3. Kotea te ʼu fehuʼi ʼae ka tali anai ki ai te alatike ʼaeni?

³ ʼI te alatike ʼaeni, ʼe tou maʼu anai te ʼu tali ki te ʼu fehuʼi ʼaeni ʼe fa: (1) ʼE au teuteuʼi feafeaʼi anai taku kau ki te ʼAho Fakamanatu pea ke fua lelei kia au? (2) ʼE ha feafeaʼi te logo tahi ʼa te hahaʼi ʼa te ʼAtua ʼi te ʼAho Fakamanatu? (3) ʼE feafeaʼi anai haku lagolago ki te logo tahi ʼaia? (4) ʼE ʼi ai anai koa he ʼAho Fakamanatu fakaʼosi? Kapau ko ia ʼaia ʼe hoko anai ʼafeā?

4. He koʼe ʼe maʼuhiga ke tou kau ki te ʼAho Fakamanatu?

⁴ He koʼe ʼe maʼuhiga ke tou kau ki te ʼAho Fakamanatu? Koteʼuhi ka tou kau ki te ʼu fono, ʼe tou tauhi kia Sehova. ʼE feala ke tou tui papau ʼe tokagaʼi e Sehova pea mo Sesu te ʼu faiga ʼe tou fai takitokotahi ke tou kau ki te fono ʼae ʼe maʼuhiga kehe age ʼi te taʼu. Pea ʼe tou loto ke sio ifo Sehova mo Sesu ʼe tou faiga malohi ke tou kau ki te ʼAho Fakamanatu. Ka tou fakaha ʼaki tatatou aga ʼe maʼuhiga kia tatou ia te ʼu fono, ko he tahi ʼaia faigamalie ke taupau e Sehova totatou higoa ʼi te “tohi fakamanatu.” ʼE toe fakahigoa te tohi ʼaia, ko “te tohi ʼo te maʼuli.” Pea ʼe fia foaki e Sehova ia te maʼuli heʼe gata kia natou fuli ʼae ʼe maʼu ʼonatou higoa ʼi te tohi ʼaia.—Malakia 3:16; Fakaha 20:15.

5. ʼI ni vahaʼa ʼi muʼa ʼo te ʼAho Fakamanatu, ʼe feafeaʼi anai tatatou ‘haga vakavakaʼi pe ʼe tou maʼuʼuli ʼo mulimuli ki te tui’?

⁵ ʼI ni vahaʼa ʼi muʼa ʼo te ʼAho Fakamanatu, tou faigaʼi ke toe lahi age ʼatatou faikole pea mo tou vakaʼi pe ʼe feafeaʼi te malohi ʼo ʼatatou felogoi mo Sehova. (Lau ia 2 Kolonito 13:5.) Neʼe tohi fenei e te apositolo ko Paulo ki te kau Kilisitiano: “Kotou haga vakavakaʼi pe ʼe kotou maʼuʼuli ʼo mulimuli ki te tui.” ʼO feafeaʼi? ʼE feala ke tou fai te ʼu fehuʼi ʼaeni: ‘ ʼE au tui papau koa, ko te kautahi ʼaeni ʼae ʼe au kau ai neʼe filifili e Sehova moʼo fakahoko ia tona finegalo? ʼE au faiga fakamalotoloto koa ʼi te faifakamafola mo te akoʼi ʼo te logo lelei ki te hahaʼi? ʼE ha koa ʼi ʼaku aga ʼe au tui papau ʼe tou maʼuʼuli nei ʼi te ʼu ʼaho fakamuli pea kua vave pulihi pe te malama ʼa Satana? Kua toe malohi age koa taku falala kia Sehova mo Sesu ʼi taku kamata tauhi ʼae kia Sehova?’ (Mateo 24:14; 2 Timoteo 3:1; Hepeleo 3:14) Ka tou fakakaukauʼi te ʼu fehuʼi ʼaia, ʼe tokoni mai anai ke tou ‘haga vakavakaʼi’ ia tatou totonu.

6. (1) Kotea ʼe tonu ke tou fai ke hoki tou maʼu ai ia te maʼuli heʼe gata? (2) ʼE teuteuʼi feafeaʼi e he tagata ʼafeā ʼi te taʼu fuli te ʼAho Fakamanatu? Pea ʼe feafeaʼi hatatou faʼifaʼitakiʼi ia ia?

⁶ Tou lau mo metitasio ki te ʼu alatike ʼae ʼe fakamahino ai pe koʼe ʼe maʼuhiga ia te ʼAho Fakamanatu. (Lau ia Soane 3:16; 17:3.) ʼE hoki tou maʼu te maʼuli heʼe gata, mo kapau ʼe tou ako ke tou iloʼi ia Sehova pea mo tou tui ki tona ʼAlo ia Sesu. ʼI muʼa ʼo te hoko mai ʼo te ʼAho Fakamanatu, ʼe feala ke tou ako he ʼu alatike  ʼe tokoni mai anai ke tou fakaovi kia naua. Neʼe fai te faʼahi ʼaia e te tehina kua fualoa tana tagata ʼafeā. Ohage la lolotoga ni taʼu, neʼe ina tanaki te ʼu alatike ʼo Te Tule Leʼo ʼae ʼe talanoa ki te ʼAho Fakamanatu pea mo te ʼofa ʼae ʼe fakaha mai e Sehova mo Sesu kia tatou. ʼI ni vahaʼa ʼi muʼa ʼo te ʼAho Fakamanatu, ʼe ina toe lau te ʼu alatike ʼaia pea mo fakakaukau loloto ʼo ʼuhiga mo te maʼuhiga ʼo te toʼotoʼoga ʼaia. ʼI ʼihi temi, ʼe ina hilifaki he alatike ʼe tahi peʼe lua ki ʼana alatike ʼae kua ina tanaki. ʼE ina toe lau pea mo fakakaukauʼi fakamalotoloto ia te ʼu vaega Tohi-Tapu ʼae ʼe tonu ke ina lau ki te ʼAho Fakamanatu. ʼE ui e te tagata ʼafeā ʼaia, ʼaki tana fai te faʼahi ʼaia ʼe ina ako ai he ʼu faʼahi ʼe foʼou ʼi te taʼu fuli. Kae ko te maʼuhiga, ʼe toe lahi age ai ia tana ʼofa ʼae ia Sehova pea mo Sesu. Koia kapau ʼe ke faʼifaʼitakiʼi te faʼahiga ako ʼaia, ʼe toe lahi anai tou ʼofa kia Sehova pea mo Sesu. ʼE toe lahi ai foki mo tau lotofakafetaʼi kia meʼa fuli ʼae neʼe nā fai pea ʼe fua lelei anai ia te ʼAho Fakamanatu kia koe.

7. (1) Kotea ʼae neʼe faikole ki ai ia Sesu ʼi te po ʼo te ʼuluaki Taumafa ʼa Te ʼAliki? (2) Kotea ʼae ʼe ha ai neʼe tali e Sehova te kole ʼa Sesu?

⁷ ʼI te po ʼae neʼe ʼuluaki fakatuʼu ai e Sesu te Taumafa ʼa Te ʼAliki, neʼe ina fai te faikole makehe. Neʼe faikole ʼo ʼuhiga mo te logo tahi maʼuhiga ʼae neʼe ina maʼu mo tana Tamai. Neʼe toe fai kole foki ia Sesu ke toe feia te logo tahi ʼo ʼana tisipulo fuli. (Lau ia Soane 17:20, 21.) ʼE mahino papau ia neʼe tali e Sehova te faikole ʼaia ʼo tona ʼAlo ʼofaina. Pea ʼi ʼatatou fono fuli, ko te ʼAho Fakamanatu ʼae ʼe ha lelei ai te logo tahi ʼa te kau Fakamoʼoni ʼa Sehova. ʼI te ʼaho ʼaia, ʼe fakatahitahi ai te toko lauʼi miliona hahaʼi mai te ʼu fenua mo te ʼu lanu kehekehe ʼi te malamanei katoa ke natou fakaha, ʼe natou tui ko Sehova ʼae neʼe ina fekauʼi mai tona ʼAlo. ʼI ʼihi fenua ʼe mole ko he agamahani he fakatahitahi ʼa te hahaʼi lanu kehekehe ki he fono fakalotu. He ʼe lau e ʼihi ʼe mole ko he meʼa lelei ke natou fakatahitahi feia. Kae ʼe mole ko te manatu ʼaia ʼa Sehova mo Sesu, he ʼe kia naua ʼe matalelei tatatou logo tahi ʼae ʼi te ʼAho Fakamanatu.

8. Kotea te logo ʼae neʼe foaki e Sehova kia Esekiele?

⁸ ʼI tatatou kau ki te hahaʼi ʼa Sehova ʼe mole tou punamaʼuli ai ki tatatou logo tahi. Neʼe fakaha fakatomuʼa e Sehova te logo tahi ʼaia ʼi te logo ʼae neʼe ina foaki ki te polofeta ko Esekiele. Neʼe ina ui kia Esekiele ke ina toʼo he ʼu moʼi ʼakau ʼe lua, ko te tahi “kia Suta” pea ko te tahi “kia Sosefo.” Pea neʼe tonu ke ina fakatahiʼi te ʼu moʼi ʼakau ʼaia ke nā liliu ko he moʼi ʼakau ʼe tahi. (Lau ia Esekiele 37:15-17.) ʼI Te Tule Leʼo ʼo Sulio 2016, ʼi te alatike “Te ʼu Fehuʼi ʼa Te Kau Lautohi” neʼe fakamahino fenei ai: “ ʼAki tana polofeta ko Esekiele, neʼe fakakikite e Sehova ʼe toe liliu anai tana hahaʼi ki te Kele ʼo Te Fakapapau pea ʼe natou logo tahi anai ohage pe he puleʼaga ʼe tahi. Neʼe toe fakakikite ko natou ʼae ʼe tauhi ki te ʼAtua ʼi te ʼu ʼaho fakamuli ʼaeni ʼe natou liliu pe anai ko he hahaʼi ʼe logo tahi.”

9. ʼI te ʼAho Fakamanatu ʼo te taʼu fuli ʼe ha feafeaʼi te logo tahi ʼae neʼe fakakikite ʼi te lea fakapolofeta ʼa Esekiele?

⁹ ʼI te taʼu 1919, neʼe toe kamata fakatuʼutuʼu mo fakatahiʼi mamalie e Sehova ia te kau fakanofo. Neʼe natou hage ko te moʼi ʼakau ʼae “kia Suta.” Hili ia neʼe ko te kaugā malie ʼae ʼe natou ʼamanaki ki te maʼuli heʼe gata ʼi te kele, neʼe natou kamata fakatahi ki te kau fakanofo. Ko natou ʼaia ʼe natou hage ko te moʼi ʼakau  ʼae “kia Sosefo.” Neʼe fakapapau e Sehova ʼe ina fakatahiʼi anai te ʼu moʼi ʼakau ʼaia ʼe lua pea ʼe nā liliu anai “ko he akau e tahi” ʼi tona nima. (Esekiele 37:19) Neʼe ina fakaliliu ia te kau fakanofo pea mo “ ʼihi atu ovi” ko he “faga ovi ʼe tahi.” (Soane 10:16; Sakalia 8:23) Ia ʼaho nei ʼe tauhi fakatahi te ʼu kutuga ʼaia ʼe lua kia Sehova. Ko tonatou Hau ʼe tahi, ia Sesu Kilisito, ʼae ʼe fakahigoaʼi e te ʼAtua ʼi te lea fakapolofeta ʼa Esekiele ko tana “tagata faifekau ko Tavite.” (Esekiele 37:24, 25) ʼI te taʼu fuli moka tou fakatahitahi ʼo fakamanatu te mate ʼo Sesu ʼi te ʼAho Fakamanatu, ʼe tou sisio ai ki te logo tahi ʼa te ʼu kutuga ʼaia ʼe lua ʼae neʼe fakakikite e Esekiele. Kae kotea ʼae ʼe feala ke tou fai ke tou lagolago mo fakamalohiʼi te logo tahi ʼo te hahaʼi ʼa te ʼAtua?

10. ʼE feafeaʼi hatatou lagolago ki te logo tahi ʼi te lotolotoiga ʼo te hahaʼi ʼa te ʼAtua?

¹⁰ Kotea te ʼuluaki faʼahi ʼae ʼe feala ke tou lagolago ai ki te logo tahi ʼi te lotolotoiga ʼo te hahaʼi ʼa te ʼAtua? ʼAki tatatou faiga malohi ke tou agavaivai. ʼI te kei nofo ʼa Sesu ʼi te kele, neʼe ina fakalotomalohiʼi ʼana tisipulo ke natou agavaivai. (Mateo 23:12) ʼI te malama ʼaeni, tokolahi ʼe natou manatu ʼe maʼuhiga age natou ʼi ʼihi. Kae kapau ʼe tou agavaivai, ʼe tou fakaʼapaʼapa anai ki te kau tagata ʼafeā ʼi te kokelekasio pea ʼe tou fakalogo anai ki tanatou takitaki. Pea ʼe hoki feala ai anai ke logo tahi te kokelekasio. Kae ko te maʼuhiga, kapau ʼe tou agavaivai ʼe tou fakafiafiaʼi anai te ʼAtua  koteʼuhi “e mole [ina] leleiʼia . . . te kau fialahi, kaʼe ʼe ina fakaha tona ʼofa makehe ki te kau agavaivai.”—1 Petelo 5:5.

11. ʼE tokoni feafeaʼi mai tatatou fakakaukau ki te pane mo te vino ʼae ʼe fakaʼaogaʼi ʼi te ʼAho Fakamanatu ke tou lagolago ki te logo tahi?

¹¹ Kotea te lua faʼahi ʼae ʼe feala ke tou lagolago ai ki te logo tahi? Ko tatatou fakakaukauʼi lelei ia te ʼuhiga moʼoni ʼo te pane pea mo te vino. ʼE tonu ke tou fai te faʼahi ʼaia ʼi muʼa ʼo te ʼAho Fakamanatu pea tafito ʼi te ʼaho tonu. (1 Kolonito 11:23-25) ʼE fakata e te pane hala fakatupu ia te sino haohaoa ʼo Sesu ʼae neʼe ina sakilifisioʼi. Pea ʼe fakata e te vino kula tona taʼataʼa. Kae ʼe mole gata ʼaki pe tatatou mahino ki ai. ʼE lelei ke tou manatuʼi ko te ʼofa ʼo Sehova mo te ʼofa ʼo Sesu ʼae ʼe tupu ai te sakilifisio ʼo Sesu. He neʼe foaki e Sehova tona ʼAlo maʼa tatou pea neʼe loto lelei Sesu ke ina foaki tona maʼuli maʼa tatou. Ka tou fakakaukau ki tonā ʼofa, ʼe uga ai tatou ke tou toe ʼoʼofa kia naua. Pea ko totatou ʼofa ʼae kia Sehova ʼe ina fakamalohiʼi anai tatatou logo tahi.

12. Neʼe fakaha feafeaʼi e Sesu ʼi tana fakamatala ʼo ʼuhiga mo he hau mo ʼana kaugana, ʼe loto e Sehova ke tou lotofakamolemole?

¹² Kotea te tolu faʼahi ʼae ʼe feala ke tou lagolago ai ki te logo tahi? Ke tou lotofakamolemole ki ʼihi. Ka tou fai feia, ʼe tou fakaha ai ʼe tou lotofakafetaʼi ki te fakamolemole ʼae e Sehova ʼatatou agahala ʼaki te sakilifisio ʼa Sesu. Neʼe fakamatala e Sesu te hisitolia ʼo ʼuhiga mo he hau pea mo ʼana kaugana moʼo fakaha te maʼuhiga ʼo te lotofakamolemole. Koia ʼe lelei ke ke lau ia Mateo 18:23-34 pea mo ke fai te ʼu fehuʼi ʼaeni: ‘ ʼE au fia maʼuliʼi koa te ʼu akonaki ʼa Sesu? ʼE au kataki fualoa koa pea mo lotomahino ki ʼoku tehina mo tuagaʼane? ʼE au lotolelei koa ke au fakamolemole kia natou ʼae neʼe au lotomamahi ai?’ ʼE moʼoni, ko ʼihi agahala ʼe mamafa age ia ʼi ʼihi. Pea tahi, ʼuhi ko totatou ʼuhiga agahala ʼe feala ke faigataʼa hatatou fakamolemole ki ʼihi. Kae ʼaki te fakamatala ʼa Sesu ʼe tou iloʼi ai pe kotea ʼae ʼe loto e Sehova ke tou fai. (Lau ia Mateo 18:35.) ʼE fakaha lelei ai e Sesu ʼe mole fakamolemole mai anai ia Sehova mo kapau ʼe mole tou fakamolemole ki ʼotatou tehina mo tuagaʼane ʼae ʼe fakahemala moʼoni. Pea ko he faʼahi ʼe tonu ke tou fakakaukauʼi lelei. He ʼe kapau ʼe tou fakamolemole ki ʼihi ohage ko tona akoʼi mai e Sesu, ʼe tou puipui ai mo lagolago ki tatatou logo tahi.

13. ʼE tou lagolago feafeaʼi ki te logo tahi mo kapau ʼe tou taupau te tokalelei mo ʼihi?

¹³ Ka tou maʼu ia te lotofakamolemole, ʼe tou taupau ai te tokalelei mo ʼotatou tehina mo tuagaʼane. Neʼe ui e te apositolo ko Paulo ʼe tonu ke tou gaue malohi ke tou taupau te logo tahi pea mo fetokaleleiʼaki. (Efeso 4:3) Koia ʼi te ovi mai ʼo te ʼAho Fakamanatu, kae tafito ʼi te po ʼae ʼe fai ai, fakakaukau fakamalotoloto ki tau faʼahiga aga ki te hahaʼi. Pea ʼe lelei ke ke fai te ʼu fehuʼi ʼaeni: ‘ ʼE ha lelei koa kia natou ʼae ʼe au iloʼi, ʼe mole au nofo mo hoku ita moka fakamamahiʼi au e he tahi? ʼE ha koa taku faiga malohi ʼae ke au lagolago ki te tokalelei pea mo te logo tahi?’ ʼE tonu ke tou fakakaukauʼi lelei te ʼu fehuʼi ʼaia.

14. ʼE tou fakaha feafeaʼi anai ʼe tou “fekatakiʼaki ʼi te ʼofa”?

¹⁴ Kotea te fa faʼahi ʼae ʼe feala ke tou lagolago ai ki te logo tahi? Ko tatatou faʼifaʼitakiʼi te ʼofa ʼo Sehova. (1 Soane 4:8) ʼAua naʼa tou ui ʼi he temi, “ ʼE moʼoni ʼe tonu ke au ʼofa ki ʼoku tehina mo tuagaʼane, kae ʼe mole fakaʼuhiga leva ʼe tonu ke au leleiʼia natou.” Kapau ʼe tou maʼu te manatu ʼaia, ʼe mole tou mulimuli ki te tokoni ʼaeni neʼe fai e Paulo:  “Kotou fekatakiʼaki ʼi te ʼofa.” (Efeso 4:2) Tou fakatokagaʼi, neʼe mole ui e Paulo ʼe tonu pe ke tou “fekatakiʼaki,” kae neʼe ina ui ʼe tonu ke tou “fekatakiʼaki ʼi te ʼofa.” ʼE ʼi ai tona kehekehe. Pea tahi, ʼi ʼotatou kokelekasio ʼe ʼi ai te hahaʼi kehekehe pea ko Sehova ʼae neʼe ina taki mai ia natou fuli ʼaia kia te ia. (Soane 6:44) ʼE mahino ia, ʼe lahi te ʼu tupuʼaga ʼe maʼu e Sehova ke ʼofa kia natou. Kapau ʼe tuha ʼotatou tehina mo tuagaʼane mo te ʼofa ʼo te ʼAtua, ʼe feafeaʼi pe anai hatatou ui ʼe mole tuha natou mo totatou ʼofa? ʼE tonu ke tou fiafia ʼo tou ʼoʼofa ia natou ohage pe ko tona loto ki ai e Sehova.—1 Soane 4:20, 21.

15. ʼE tou iloʼi feafeaʼi ʼe ʼi anai he ʼAho Fakamanatu fakaʼosi?

¹⁵ ʼE ʼi ai pe anai he ʼaho ʼe fai fakaʼosi leva te ʼAho Fakamanatu. ʼE tou iloʼi feafeaʼi te faʼahi ʼaia? Neʼe ui e te apositolo ko Paulo ki te kau Kilisitiano fakanofo, ka natou fakamanatu te mate ʼo Sesu ʼi te taʼu fuli ʼe natou “haga tala te mate ʼo te ʼAliki, ʼo kaku ki tana haʼu.” (1 Kolonito 11:26) Neʼe toe talanoa ia Sesu ki tana “haʼu” ʼi tana lea fakapolofeta ʼo ʼuhiga mo te ʼu ʼaho fakamuli. Pea ʼo ʼuhiga mo te kua vave hoko mai pe ʼo te mamahi lahi, neʼe ina ui fenei: “ ʼE ha anai te fakailoga ʼo te Foha ʼo te tagata ʼi te lagi pea ʼe tuki fatafata anai te ʼu telepi fuli ʼo te kele ʼi tonatou lotomamahi. ʼE natou sisio anai ki te haʼu ʼo te Foha ʼo te tagata ʼi te ʼu ʼao ʼo te lagi ʼaki te malohi pea mo he toe kololia lahi. ʼE pupuhi malohi anai te fakatagi pupuhi pea ʼe ina fekauʼi anai ʼana ʼaselo ke natou tanaki mai te ʼu matagi ʼe fa ia natou ʼae neʼe ina filifili, mai te tahi potu taupotu ʼo te lagi ki tona tahi potu taupotu.” (Mateo 24:29-31) ʼE tanaki anai e Sesu ia “natou ʼae neʼe ina filifili” ʼi te temi ʼae ka natou fakatahitahi fuli ai ʼi selo. ʼE hoko anai te tanaki ʼaia ʼi te vaha ʼo te kamata ʼo te mamahi lahi mo te kamata ʼo te tau ʼo Alamaketone. ʼI te tau ʼaia, ko Sesu mo te toko 144 000, ʼe natou tauʼi anai te ʼu hau ʼo te kele pea ʼe natou malo anai. (Fakaha 17:12-14) Koia, ko te ʼAho Fakamanatu ʼae ka tou kau anai ki ai ʼi muʼa ʼo te “haʼu” ʼa Sesu ʼo tanaki ia te kau fakanofo, ʼe ko te ʼAho Fakamanatu fakaʼosi leva ʼaia.

16. He koʼe ʼe ke faiga fakamalotoloto anai ke ke kau ki te ʼAho Fakamanatu ʼo te taʼu ʼaeni?

¹⁶ Tou faiga fakamalotoloto ke tou kau ki te ʼAho Fakamanatu ʼi te ʼaho 31 ʼo Malesio 2018. Pea tou kole kia Sehova ke tokoni mai ke tou lagolago ki te logo tahi ʼo tana hahaʼi. (Lau ia Pesalemo 133:1.) ʼE ʼi ai anai he ʼaho ʼe tou kau fakaʼosi ai leva ki te ʼAho Fakamanatu. Kae ʼi muʼa ʼo te hoko mai ʼo te ʼaho ʼaia, tou fakaha ʼe tou fiafia pea ʼe maʼuhiga ʼaupito kia tatou ia te logo tahi ʼae ʼe tou sisio ki ai ʼi te taʼu fuli ʼi te ʼAho Fakamanatu.