“E Ina Foaki He Malohi Ki Ae Kua Vaivai”
Te vaega ʼo te taʼu 2018: “Ko natou ʼae ʼe falala kia Sehova ʼe natou toe malolohi anai.”—ESAIA 40:31, MN.
KATIKO: 3, 47
1. Kotea te ʼu faigataʼaʼia ʼe lagi tou felaveʼi mo ia? Kae he koʼe ʼe fiafia ia Sehova? (Vakaʼi te ʼuluaki pāki.)
KO TE maʼuli ʼi te tuʼu ʼaeni ʼe mole faigafua. Ohage la, tokolahi ʼi ʼotatou tehina mo tuagaʼane ʼe tau mo he mahaki kovi. ʼE tonu ki ʼihi ke natou tokakaga ki ʼanatou matuʼā ʼae kua vaivavai, kae kua toe vaivai pe la mo natou. Pea ko ʼihi, ʼe gaue kinakina ke natou taupau tonatou kiʼi famili. Kae tokolahi ia koutou ʼe felaveʼi mo te ʼu fihifihia ʼaia ʼi te moʼi temi pe ʼe tahi. Pea ʼe tonu ke kotou fakaʼaogaʼi ki ai tokotou temi, tokotou malohi mo takotou foʼi falā. Kae ʼe tou tui papau ʼe tokoni mai anai ia Sehova. Pea ohage pe ko tana fakapapau mai, ʼe ina pulihi anai ʼotatou fihifihia. ʼE tou iloʼi, ʼe fiafia ia Sehova he ʼe tou tui kia te ia.
2. Kotea te fakalotomalohi ʼae ʼe tou maʼu ia Esaia 40:29? Kae ko te hala mamafa fea ʼe feala ke tou fai?
2 ʼE hage koa ʼi ʼihi temi ʼe mole kei ke lavaʼi ʼou faigataʼaʼia? Kapau ko ia, manatuʼi ʼe ʼi ai tou falanakiʼaga. Ko ʼihi kaugana agatonu ʼa te ʼAtua ʼo te temi muʼa, neʼe natou toe logoʼi te faʼahi ʼaia. (1 Hau 19:4; Sopo 7:7) Kae kotea ʼae neʼe tokoni kia natou ke natou haga faʼa kataki? Neʼe natou falala ʼe foaki age anai e Sehova ia te malohi. ʼE ui ʼi te Tohi-Tapu, ʼe “foaki [e te ʼAtua] he malohi ki ʼae kua vaivai.” (Esaia 40:29) Kae meʼa fakaʼofaʼofa, he ʼe ʼi te manatu ʼa ʼihi kaugana ʼa te ʼAtua ia ʼaho nei, ʼe lelei age ke manava muʼa tanatou tauhi kia Sehova ke feala ai hanatou katakiʼi ʼonatou faigataʼaʼia. ʼI tanatou manatu, ko te tauhi ʼae kia Sehova ʼe ko he kavega kae mole ko he tapuakina. Koia ʼe natou tuku ai te lau ʼo te Tohi-Tapu, te kau ki te ʼu fono pea mo te faifakamafola. Pea ko te faʼahi pe ʼaia ʼe loto ki ai ia Satana.
3. (1) Kotea ʼe tonu ke tou fai ke mole fakavaivaiʼi tatou e Satana? (2) Kotea ʼae ka tou talanoa anai ki ai ʼi te alatike ʼaeni?
3 ʼE mole loto e te Tevolo ke tou malolohi. Pea ʼe ina iloʼi, moka tou maʼumaʼua ʼi tatatou tauhi ʼae kia Sehova, ʼe tou malolohi ai. Koia, kapau ʼe ke logo vaivai ʼi te faʼahi fakasino peʼe ko tou loto, ʼaua tau fakamamaʼo mai ia Sehova. Kae ke ke fakaovi tuʼumaʼu kia te ia. ʼE ui fenei ʼi te Tohi-Tapu: “ ʼE ina fakalotomalohiʼi anai koutou, ʼe tokoni atu anai ke kotou nonofo agatonu.” (1 Petelo 5:10; Sakopo 4:8) ʼI te alatike ʼaeni, ʼe tou vakaʼi anai ʼi te ʼu vaega ʼo Esaia 40:26-31 ia te fealagia ʼae ʼa Sehova ke ina fakamalohiʼi tatou. ʼE tou talanoa anai kia aluʼaga ʼe lua ʼe feala ke ina fakavaivaiʼi tatatou tauhi ʼae kia Sehova. Pea ʼe tou ako anai ke tou maʼuliʼi te ʼu pelesepeto Fakatohi-tapu ʼae ʼe tokoni mai ke tou maʼu te faʼa kataki.
KO NATOU ʼAE ʼE FALALA KIA SEHOVA ʼE NATOU TOE MALOLOHI ANAI
4. Kotea te ako ʼe tou taʼofi mai ia Esaia 40:26?
ʼE feala kia Sehova ke ina foaki atu te malohi ke ke katakiʼi takitahi ʼou faigataʼaʼia
4 Lau ia Esaia 40:26. ʼE mole malau e he tahi te ʼu fetuʼu fuli ʼi te ʼatulaulau. ʼI te manatu ʼa te kau poto, ko fetuʼu ʼe 400 miliale ʼae ʼe lagi maʼu ʼi tatatou fakapupuga fetuʼu. Kae ʼe fakahigoaʼi takitahi e Sehova te ʼu fetuʼu. Kotea ʼae ʼe tou ako ʼo ʼuhiga mo Sehova? Kapau ʼe tokaga ia Sehova ki te ʼu fetuʼu ʼae ʼe mole maʼuʼuli, pea ʼe feafeaʼi age la kia koe ʼae ʼe ke tauhi kia te ia he ʼe ke ʼofa ai? (Pesalemo 19:2, 4, 15 ) Ko tatatou Tamai ʼofa ʼe ina iloʼi ia meʼa fuli ʼo ʼuhiga mo koe. ʼE ui ʼi te Tohi-Tapu, “ ʼo ʼuhiga mo koutou, kua [ina] lau fuli ʼokotou fuluʼi ʼulu.” (Mateo 10:30) Pea ʼaki te tagata faipesalemo, ʼe foaki mai e Sehova te fakalotofimalie ʼaeni: “E iloi e [Sehova] te u aho o te kau agatonu.” (Pesalemo 37:18) ʼE ha lelei mai, ʼe tokagaʼi e Sehova ʼou faigataʼaʼia. Pea ʼe feala ke ina foaki atu te malohi ke ke katakiʼi takitahi ʼou faigataʼaʼia.
5. He koʼe ʼe tou tui papau ʼe lava fakamalohiʼi tatou e Sehova?
5 Lau ia Esaia 40:28. Ko Sehova ʼe ko te matapuna ʼo te malohi fuli. Ohage la, tou fakakaukauʼi age muʼa ia te toe malohi ʼae ʼe ina foaki ki te laʼa. Neʼe ui e te tagata faitohi ʼo te sienesia ko David Bodanis, ko te malohi ʼae ʼe maʼu e te laʼa ʼi te sekonita fuli ʼe hage pe ko te paʼulu ʼo he ʼu foʼi pulu hila ʼe lauʼi miliale. Neʼe fakafuafua e te tahi tagata faifekumi, ko te malohi ʼae ʼe maʼu e te laʼa ʼi te sekonita pe ʼe tahi, ʼe ina fakafealagia ke maʼuli te tagata ʼi te kele lolotoga taʼu ʼe 200 000. Ko Sehova ʼae ʼe ina foaki te malohi ki te laʼa, pea ʼe mahino ia ʼe ina lava foaki mai te malohi ke tou katakiʼi ʼotatou faigataʼaʼia.
6. He koʼe ʼe tou ui ʼe malū te ʼakau ʼamo ʼa Sesu? Pea ʼe malave feafeaʼi te faʼahi ʼaia kia tatou?
6 Lau ia Esaia 40:29. ʼE tou maʼu he toe fiafia ʼi tatatou tauhi kia Sehova. Neʼe ui fenei e Sesu ki ʼana tisipulo: “Kotou toʼo taku ʼakau ʼamo.” Pea neʼe ina toe ui fenei: “ ʼE kotou maʼu anai he fakafimalie. Koteʼuhi ʼe malū taku ʼakau ʼamo pea ʼe maʼamaʼa taku kavega.” (Mateo 11:28-30) Pea ʼe moʼoni ʼaupito te faʼahi ʼaia. ʼI ʼihi temi, moka tou teuteu ke tou olo ki te ʼu fono peʼe ki te faifakamafola ʼe tou logo vaivai. Kae ʼi tatatou toe liliu ki fale kotea ʼe tou logoʼi? ʼE tou logoʼi he fakafimalie pea ʼe tou lava katakiʼi ʼotatou faigataʼaʼia. Ko te ʼakau ʼamo ʼa Sesu ʼe malū moʼoni.
7. Kotea te aluʼaga ʼae neʼe hoko ki totatou tuagaʼane ʼe ha ai te moʼoni ʼo te ʼu palalau ʼae ia Mateo 11:28-30.
7 Tou vakaʼi te aluʼaga ʼae neʼe hoko ki totatou tuagaʼane. Neʼe kau ʼi te mahaki ʼae ko te gaʼegaʼe tuʼumaʼu, te lotomamahi ʼaupito pea mo te mamahi ʼulu. Koia ʼi ʼihi temi, ʼe faigataʼa ai tana kau ki te ʼu fono. Kae ʼi te tahi ʼaho, neʼe faiga malohi ke alu ʼo fono. Pea neʼe ina tohi fenei: “Neʼe talanoa te akonaki ki te lotovaivai. Neʼe fakaha te ʼu manatu ʼi te akonaki ʼaia ʼaki te manavaʼofa mo te lotoʼofa, pea neʼe au tagi ai. Neʼe fakamanatuʼi mai e te aluʼaga ʼaia ʼe maʼuhiga ke au kau ki te ʼu fono.” Ko he toe fiafia ia neʼe ina maʼu ʼuhi ko ʼana faiga.
8, 9. Kotea te fakaʼuhiga ʼo te ʼu palalau ʼaeni ʼa Paulo: “ ʼE hoki au malohi moka ʼe au vaivai”?
8 Lau ia Esaia 40:30. Logo la te ʼu fealagia ʼae ʼe tou maʼu, kae ʼe fakatuʼakoi totatou malohi. Ko he aluʼaga ia ʼe tonu ke tou fakamoʼoni fuli ki ai. Tou toʼo te faʼifaʼitaki ʼo te apositolo ko Paulo. Neʼe lahi te ʼu gaue neʼe feala ke ina fai, kae neʼe mole ina lava fai ia meʼa fuli neʼe loto ki ai. ʼI tana faikole kia Sehova ʼo ʼuhiga mo te faʼahi ʼaia, neʼe ui fenei age e Sehova: “Ke liliu toku malohi ʼo katoa moka ke vaivai.” Neʼe mahino ia Paulo ki te ʼu palalau ʼa Sehova. He neʼe ina ui fenei: “ ʼE hoki au malohi moka ʼe au vaivai.” (2 Kolonito 12:7-10) Kae kotea ʼae neʼe fia ui e Paulo?
9 Neʼe mahino kia Paulo, ko te ʼu gaue ʼae neʼe feala ke ina fai ʼaki pe tona malohi ʼe ʼi ai ʼona tuʼakoi. Neʼe ʼaoga ke tokoni age he tahi ʼe malohi age. Ko te ʼAtua neʼe feala ke ina fakamalohiʼi ia Paulo ʼaki tona laumalie maʼoniʼoni ʼi te temi ʼae neʼe vaivai ai. Kae ʼe mole gata ai. ʼAki te laumalie ʼo te ʼAtua, neʼe toe feala kia Paulo ke ina fakahoko he ʼu gaue neʼe mole feala ke ina fai ʼaki pe tona malohi. Pea ʼe toe feia pe kia tatou. Ka foaki mai e Sehova ia tona laumalie maʼoniʼoni, ʼe tou malolohi moʼoni anai.
10. Neʼe tokoni feafeaʼi ia Sehova kia Tavite ke ina katakiʼi ʼona faigataʼaʼia?
10 Neʼe tau logoʼi e te tagata faipesalemo ko Tavite ia te malohi ʼo te laumalie maʼoniʼoni ʼo te ʼAtua. Neʼe hiva fenei: “ ʼAki ia koe ʼe feala ke au lele fakafeagai ki he kutuga kaihaʼa; pea ʼaki toku ʼAtua ʼe feala haku kake ʼi he kaupa.” (Pesalemo 18:29, MN) Ohage ko he kaupa lahi ʼe mole feala ke tou lava kake ai, ʼi ʼihi temi ʼe mole tou lava fakatokatoka ʼotatou faigataʼaʼia ʼaki pe totatou malohi. ʼE ʼaoga ke tokoni mai ia Sehova.
11. ʼE tokoni feafeaʼi mai te laumalie maʼoniʼoni ke tou katakiʼi ʼotatou faigataʼaʼia?
11 ʼE tou lau fenei ia Esaia 40:31, MN: “Kae ko natou ʼae ʼe falala kia Sehova ʼe natou toe malolohi anai. ʼE natou mahiki ake anai ʼaki he ʼu kapakau, ohage ko te ʼu akuila. ʼE natou feleleʼi anai pea ʼe mole natou vaivavai anai; ʼe natou haʼele anai pea ʼe mole natou gaʼegagaʼe anai.” Ko te ʼu akuila ʼe mole natou lele ʼi te lagi ʼaki pe tonatou malohi. Kae ʼe natou fakaʼaogaʼi te ʼaele vela moʼo tokoni ki tanatou lele ʼi te lagi. ʼE feala ai ke natou lele lolotoga he ʼu kilometa pea mo taupau tonatou malohi. Koia moka ʼe ke felaveʼi mo he fihifihia ʼe mole ke lavaʼi, manatuʼi ia te akuila. Kole mamahi kia Sehova ke ina foaki atu te malohi ʼaki totatou “tokoni, ia te laumalie maʼoniʼoni.” (Soane 14:26) ʼE feala ke tou kole kia Sehova ke ina foaki mai tona laumalie ʼi te lakaga fuli, ʼi te ʼaho mo te po. Pea ʼe ʼaoga tafito anai ke tou kole te tokoni ʼa Sehova moka tou fetokakoviʼaki mo he tehina peʼe ko he tuagaʼane ʼi te kokelekasio. Kae he koʼe koa ʼe hoko te ʼu tokakovi ʼaia?
12, 13. (1) He koʼe ʼe hoko ʼi ʼihi temi he ʼu tokakovi ʼi te lotolotoiga ʼo te kau Kilisitiano? (2) Kotea ʼae ʼe tou ako mai te faʼifaʼitaki ʼo Sosefo ʼo ʼuhiga mo Sehova?
12 ʼE tou agahala fuli, koia ʼae ʼe hoko ai te ʼu tokakovi. ʼI ʼihi temi, ʼe lagi tou iita ʼi he ʼu palalau peʼe ko he aga ʼa he tahi. Peʼe lagi ita he tahi ʼuhi ko tatou. Pea ʼe feala ke faigataʼa te aluʼaga ʼaia. Kae ʼe tou maʼu ai te faigamalie ʼae ke tou fakaha tatatou agatonu kia Sehova. ʼO feafeaʼi? ʼAki tatatou ako ke tou gaue fakatahi mo ʼotatou tehina mo tuagaʼane ʼi te logo tahi. ʼE ʼofa Sehova ia natou logo la ʼonatou vaivaiʼaga pea ʼe tonu ke tou faʼifaʼitakiʼi ia ia.
Neʼe mole liʼakina Sosefo e Sehova, pea ʼe mole liʼakina anai koe e Sehova (Vakaʼi te palakalafe 13)
13 ʼE mole taʼofi e Sehova te ʼu ʼahiʼahi ʼae ʼe hoko ki ʼana kaugana. Pea ʼe tou iloʼi te faʼahi ʼaia ʼaki te faʼifaʼitaki ʼa Sosefo. ʼI te kei tupulaga ʼa Sosefo, neʼe maheka ʼona tehina kia ia. Neʼe natou fakatau ia ia ohage ko he kaugana pea neʼe ʼave ai ki Esipito. (Senesi 37:28) Neʼe sio ia Sehova ki te aluʼaga ʼaia pea ʼe mahino ia neʼe lotomamahi ʼi te gaohi koviʼi ʼo tona kaumeʼa, mo kaugana agatonu ʼae ko Sosefo. Kae, neʼe mole taʼofi e Sehova te aluʼaga ʼaia. Ki muli age, neʼe tukugakoviʼi ia Sosefo takua neʼe ina fia fakaʼalikiʼi te ʼohoana ʼo Potifale, pea neʼe pilisoniʼi ai. ʼI te lakaga ʼaia neʼe mole haofaki Sosefo e Sehova. Kae neʼe liʼakina koa Sosefo e te ʼAtua? Kailoa ia. ʼE ui ʼi te Tohi-Tapu “nee nofo [Sehova] mo ia. Pea nee fakamanuia leva e [Sehova] te u mea fuli ae nee ina fai.”—Senesi 39:21-23.
14. Kotea te ʼu fua lelei ʼe tou maʼu moka tou tuku ia te ita?
14 Tou vakaʼi ʼi te lakaga ʼaeni te faʼifaʼitaki ʼo Tavite. ʼE tahitahiga te gaohi koviʼi ʼo he tahi ohage ko Tavite. Kae, neʼe mole fakagafua e te kaumeʼa ʼaia ʼo te ʼAtua ke nofo mo hona ita. Neʼe ina tohi fenei: “Ke ke tuku te ita, ke ke siaki te itaita kovi; ke aua naa ke ita, koteuhi e ke fai anai te mea ae e kovi.” (Pesalemo 37:8) Ko te tupuʼaga tafito ʼae ke tou “tuku” ai te ita, ko tatatou fia faʼifaʼitakiʼi ia Sehova. He neʼe “mole ina fai kia tatou o mulimuli ki atatou agahala,” kae neʼe lotofakamolemole kia tatou. (Pesalemo 103:10) Moka tou tuku te ita, ʼe toe fua lelei foki kia tatou ʼi te faʼahi fakasino. He ʼe ka tou iita ʼe feala ai ke hake te tosio pea faigataʼa ai mo te manava. ʼE fakatupu kovi ki te ʼate mo te ʼatepili pea hifo kovi ai mo te kai. Pea tahi, ka tou iita, ʼe mole lelei tuʼumaʼu tatatou fakakaukau. ʼE feala pe ke tou fai he ʼu palalau peʼe tou fai he meʼa ʼe fakatupu mamahi ki ʼihi, ʼo tou lotomamahi ʼaupito ai lolotoga he temi loaloaga. Koia ʼe lelei age pe ke tou tuku te ita. ʼE ui fenei ʼi te Tohi-Tapu: “Ko he loto lelei ko te mauli ki te sino.” (Taaga Lea 14:30) Kotea ʼae ʼe feala ke tou fai moka fakamamahiʼi tatou e he tahi? Pea ʼe feafeaʼi hatatou kumi te tokalelei mo totatou tehina peʼe ko totatou tuagaʼane? Tou maʼuliʼi te ʼu tokoni fakapotopoto ʼo te Tohi-Tapu.
MOKA TOU LOTOMAMAHI ʼUHI KO HOTATOU TEHINA PEʼE TUAGAʼANE
15, 16. Kotea ʼe tonu ke tou fai moka fakamamahiʼi tatou e he tahi?
15 Lau ia Efeso 4:26. Moka gaohi koviʼi tatou e te hahaʼi ʼae ʼe mole tauhi kia Sehova ʼe mole tou punamaʼuli ki ai. Kae moka fai e he tehina peʼe ko he tuagaʼane peʼe ko hotatou kaiga he ʼu palalau peʼe ko he meʼa ʼe lave kovi mai, ʼe feala ai ke tou lotomamahi ʼaupito. Kae ʼe feafeaʼi mo kapau ʼe mole feala ke tou galoʼi te aluʼaga ʼaia? ʼE tou nonofo anai koa mo hotatou ita lolotoga he ʼu taʼu? Peʼe tou mulimuli anai koa ki te ʼu tokoni fakapotopoto ʼo te Tohi-Tapu moʼo fakatokatoka fakavilivili te ʼu fihifihia? Kapau ʼe tou fakatuatuai ʼi te fakatokatoka ʼo te fihifihia, ʼe faigataʼa anai tatatou kumi ia te tokalelei.
16 Kae ʼe feafeaʼi mo kapau ʼe mole feala ke ke galoʼi te aluʼaga ʼae neʼe hoko? Kotea ʼae ka tokoni atu ke ke kumi ia te tokalelei? ʼUluaki, faikole kia Sehova. Kole mamahi kia te ia ke tokoni atu ke fua lelei takolua fai palalau mo tou tehina. Manatuʼi, ko tou tehina ʼe kaumeʼa mo Sehova. (Pesalemo 25:14, MN) ʼE ʼofa te ʼAtua ia ia. ʼE agalelei ia Sehova mo ʼona kaumeʼa, pea ʼe ina loto ke tou faʼifaʼitakiʼi ia ia. (Taaga Lea 15:23; Mateo 7:12; Kolose 4:6) Lua, fakakaukauʼi lelei ʼau palalau ʼae ka ke fai ki tou tehina. ʼAua tau manatu ʼae neʼe ina fia fakamamahiʼi koe. Neʼe lagi faihala pe ia peʼe ke mahino hala pe koe ki te aluʼaga ʼae neʼe hoko. Pea ʼe lelei ke ke toe manatu neʼe lagi ke toe faihala mo koe. ʼE feala ke ke kamata te faipalalau ʼo ke ui fenei: “ ʼE lagi au tokagaʼi fau te ʼu kiʼi meʼa noa fuli pe, kae ʼi tau palalau mai ʼanafi, neʼe hage ia . . . ” Kapau ʼe mole he fua ʼo tau faipalalau mo tou tehina ke kolua fakatokatoka, faigaʼi ke kolua toe faipalalau ʼi he tahi lakaga. Faikole ʼo ʼuhiga mo ia. Kole kia Sehova ke ina tapuakinaʼi ia ia pea ke tokoni atu ke ke tokagaʼi ʼona kalitate. ʼE mahino ia, ʼe fiafia anai Sehova ʼi tau faiga fakamalotoloto ʼae ke ke fakatokatoka mo tou tehina, ʼae ko tona kaumeʼa.
KA TOU TUKUGAKOVIʼI IA TATOU ʼUHI KO ʼATATOU AGAHALA ʼI MUʼA ATU
17. Kapau neʼe tou agahala, ʼe tokoni feafeaʼi mai ia Sehova ke tou toe maʼu he ʼu felogoi lelei pea mo ia? Pea he koʼe ʼe tonu ke tou tali ia tana tokoni?
17 ʼI te manatu ʼa ʼihi, ʼe mole tuha ke natou tauhi kia Sehova koteʼuhi neʼe natou fai he ʼu agahala mamafa. Ka tukugakoviʼi e he tahi ia ia totonu, ʼe feala ai ke puli ia tona tokalelei, tona fiafia mo tona malohi. Neʼe hoko te aluʼaga ʼaia ki te Hau ko Tavite pea neʼe ina ui fenei: “ ʼI taku nofo fakalogologo, ko ʼoku hui Pesalemo 32:3-5, MN) Kapau neʼe ke fai he agahala mamafa, ʼe lotolelei e Sehova ke fakamolemole atu. ʼE fia tokoni atu ke ke toe maʼu he ʼu felogoi lelei pea mo ia. Kae ʼe tonu foki ke ke tali te tokoni ʼae ʼe ina foaki atu ʼaki te kau tagata ʼafeā. (Taaga Lea 24:16; Sakopo 5:13-15) Koia ʼaua tau fakatuatuai ʼi te fai ʼo te faʼahi ʼaia, he ʼe fakalogo ki ai tou maʼuli heʼe gata. Kae ʼe feafeaʼi mo kapau kua fakamolemole atu ia Sehova kae ʼe kei ke tukugakoviʼi pe ia koe? Kotea ʼae ʼe tonu ke ke fai?
neʼe kaina ʼuhi ko ʼaku tagi ʼi te ʼaho katoa. He ʼe ʼi te ʼaho mo te po ko tou nima neʼe mamafa kia au.” Kae meʼa lelei, he neʼe maʼu e Tavite te lototoʼa ke ina fai te meʼa ʼae ʼe loto e Sehova ke fai e ʼana kaugana. Neʼe ina ui fenei: “Ko taku agahala, neʼe au vevete atu kia te koe . . . Pea ko koe neʼe ke fakamolemole te hala ʼo ʼaku agahala.” (18. ʼE lava tokoni feafeaʼi te faʼifaʼitaki ʼo Paulo kia natou ʼae ʼe natou ui ʼe mole tuha ke natou tauhi kia Sehova?
18 ʼI ʼihi temi, neʼe lotovaivai ai te apositolo ko Paulo ʼuhi ko te ʼu agahala ʼae neʼe ina fai ʼi muʼa atu. Neʼe ina ui fenei: “ ʼE ko au ʼae ʼe veliveli ʼosi ʼi te kau apositolo, pea ʼe mole tuha mo au ke fakahigoaʼi au ko he apositolo, he neʼe au fakatagaʼi te kokelekasio ʼa te ʼAtua.” Kae neʼe toe ui fenei e Paulo: “Kaʼe ʼaki te ʼofa makehe ʼo te ʼAtua, ko au ko he apositolo.” (1 Kolonito 15:9, 10) Neʼe iloʼi e Sehova neʼe mole haohaoa ia Paulo. Kae neʼe loto e Sehova ke tui papau ia Paulo neʼe ina tali leleiʼi ia ia mo tona ʼuhiga. Kapau ʼe ke fakahemala moʼoni ki ʼau agahala ʼae neʼe ke fai, mo ke fakaha kia Sehova mo te kau tagata ʼafeā mo kapau ʼe ʼaoga, ʼe mahino ia ʼe fakamolemole atu anai ia Sehova. Falala kia Sehova pea mo ke tali ia tana lotofakamolemole.—Esaia 55:6, 7.
19. Kotea te vaega ʼo te taʼu 2018, pea he koʼe ʼe maʼuhiga te vaega ʼaia?
19 ʼI te kua ovi mai ʼo te fakaʼosi ʼo te tuʼu ʼaeni, ʼe mahino ia ʼe toe lahi age anai ʼotatou faigataʼaʼia. Kae ʼe tonu ke tou manatuʼi ko Sehova ʼae ʼe ina “foaki he malohi ki ae kua vaivai, pea e ina fakafonu aki te malohi ae kua osi tona malohi.” ʼE feala ke ina foaki atu ia meʼa fuli ʼe ʼaoga ke ke haga tauhi agatonu ai kia te ia. (Esaia 40:29; Pesalemo 55:23; 68:19, MN) Lolotoga anai te taʼu 2018, moka tou olo ʼo fono ʼi ʼotatou Fale Fono, ʼe tou fakamanatuʼi anai te manatu maʼuhiga ʼaia moka tou sisio ki te ʼu palalau ʼo te vaega ʼaeni ʼo te taʼu: “Ko natou ʼae ʼe falala kia Sehova ʼe natou toe malolohi anai.”—Esaia 40:31, MN.