He Koʼe ʼe Tou Foaki Kia Ia ʼAe ʼe Ina Maʼu Ia Meʼa Fuli?
“Io tomatou ʼAtua, e matou fakafetaʼi kia koe; pea e matou fakavikiviki ki tou huafa fakakololia.”—1 KOLONIKO 29:13.
KATIKO: 80, 50
1, 2. ʼE lotofoaki feafeaʼi ia Sehova kia tatou?
KO SEHOVA ʼe ko te ʼAtua lotofoaki. Ko meʼa fuli ʼe tou maʼu ʼe haʼu mai ia te ia. Pea ko te ʼu meʼa maʼuhiga fuli ʼo te kele ʼe ʼaʼana, pea ʼe ina fakaʼaogaʼi ki ʼotatou maʼuli. (Pesalemo 104:13-15; Akeseo 2:8) ʼAki te ʼu fakamatala ʼo te Tohi-Tapu ʼe tou iloʼi ai, ʼi ʼihi temi neʼe fakaʼaogaʼi e Sehova te ʼu meʼa maʼuhiga ʼaia moʼo taupau te maʼuli ʼo tana hahaʼi ʼi hona aluʼaga fakamilakulo.
2 Ohage la, neʼe foaki e Sehova ia te mane mo te vai ki te puleʼaga ʼo Iselaele lolotoga tanatou maʼuli ʼi te toafa ia taʼu ʼe 40. (Ekesote 16:35) Koia neʼe natou maʼu ia meʼa fuli neʼe ʼaoga ki ʼonatou maʼuli. (Neemia 9:20, 21) Ki muli age, neʼe foaki e Sehova ia te malohi ki te polofeta ko Eliseo ke ina fakatuputupu te moʼi lolo ʼa te fafine vitua agatonu. Ko te meʼa ʼofa ʼaia mai te ʼAtua neʼe tokoni ki te fafine ke ina totogi ʼona maʼua pea mo ina maʼu hana foʼi falā feʼauga ki tona maʼuli mo ʼana tama. (2 Hau 4:1-7) Pea ʼaki te tokoni ʼa Sehova, neʼe foaki e Sesu ia he meʼa kai ki he hahaʼi kaugā malie pea mo ina foaki he foʼi falā kapau neʼe ʼaoga.—Mateo 15:35-38; 17:27.
3. Kotea anai ʼae ka tou vakaʼi ʼi te alatike ʼaeni?
3 ʼE feala ke fakaʼaogaʼi e Sehova ia meʼa fuli ʼe loto ki ai moʼo lagolago ki tana fakatupu. Kae, ʼe ina fakaafe ʼana kaugana ke natou foaki te meʼa ʼae ʼe natou lavaʼi moʼo lagolago ki te ʼu gaue ʼo tana kautahi. (Ekesote 36:3-7; lau ia Taaga Lea 3:9.) He koʼe ʼe loto e Sehova ke tou foaki age ʼatatou meʼa maʼuhiga? Neʼe lagolago feafeaʼi te ʼu kaugana ʼa Sehova ʼo te temi muʼa ki tana gaue? ʼE fakaʼaogaʼi feafeaʼi e te kautahi ʼa Sehova te falā ʼo te ʼu meʼa ʼofa ia ʼaho nei? ʼE tali anai te alatike ʼaeni ki te ʼu fehuʼi ʼaia.
HE KOʼE ʼE TOU FOAKI KIA SEHOVA?
4. Kotea ʼae ʼe tou fakaha kia Sehova moka ʼe tou lagolago ki tana gaue?
ʼE tou foaki kia Sehova, he ʼe tou ʼoʼofa ia te ia
4 ʼE tou foaki kia Sehova, he ʼe tou ʼoʼofa ia te ia pea ʼe tou fia fakaha kia te ia tatatou lotofakafetaʼi. Ka tou fakakaukau ki te ʼu gaue fuli neʼe fai e Sehova maʼa tatou, ʼe malave ki ʼotatou loto. Neʼe toe manatu feia pe la mo te Hau ko Tavite ʼi tana fakamahino pe kotea ʼae neʼe ʼaoga ki te laga ʼo te fale lotu. Neʼe ui e Tavite, ko meʼa fuli ʼe tou maʼu ʼe haʼu mai ia Sehova. Pea ko meʼa fuli ʼe tou foaki kia Sehova, ko te ʼu meʼa pe neʼe tou tali mai ʼona nima.—Lau ia 1 Koloniko 29:11-14.
5. ʼE fakaha feafeaʼi ʼi te Tohi-Tapu, ko te lotofoaki ʼe ko he koga maʼuhiga ʼo te tauhi moʼoni?
5 ʼE tou foaki kia Sehova he ʼe tou toe fakaha ai ʼe tou tauhi kia te ia. ʼI te faʼahi ʼae neʼe ha kia Soane, neʼe logo ai ki te ʼu kaugana ʼa Sehova ʼi te lagi ʼe natou ui fenei: “ ʼE tuha mo koe, Sehova tomatou ʼAtua, ke ke maʼu te kololia, mo te fakaʼapaʼapa pea mo te malohi, he neʼe ke fakatupu ia meʼa fuli. Neʼe fakatupu ia meʼa fuli ʼuhi ko tou finegalo.” (Fakaha 4:11) ʼE mahino papau ia, ʼe tuha mo Sehova ke ina maʼu te kololia fuli mo te fakaʼapaʼapa fuli, koia ʼe tou fia foaki ai ʼatatou meʼa lelei tukupau kia te ia. Neʼe fakaʼaogaʼi e Sehova ia Moisese ke ina fakatotonu ki te puleʼaga ʼo Iselaele ke natou fakatuʼutuʼu te ʼu ʼaho lalahi ʼe tolu ʼi te taʼu. ʼI te ʼu ʼaho lalahi ʼaia, neʼe natou tauhi kia Sehova pea neʼe mole tonu ke natou “olo . . . kia mua o [Sehova] mo te u nima atea.” (Tetelonome 16:16) ʼO toe feia pe ia ʼaho nei, ko te lotofoaki ʼe ko he koga maʼuhiga ʼo tatatou tauhi. He ʼe kapau ʼe tou fai feia, ʼe tou fakaha ai ʼe maʼuhiga te ʼu gaue ʼo te kautahi ʼa Sehova pea ʼe tou fia lagolago ki ai.
6. He koʼe ʼe lelei kia tatou ke tou lotofoaki? (Vakaʼi te ʼuluaki pāki.)
6 ʼE lelei kia tatou ke tou lotofoaki kae mole ke tou fakatalitali pe he meʼa. E ui fenei i te Tohi-Tapu: “Kapau ʼe kita fakapelepeleʼi hakita tagata faifekau ʼi tana kei veliveli, pea ʼe liliu anai ki ʼamuli ko he tagata ʼe maʼuli galo.” (Taaga Lea 29:21, MN) Tou fakakaukauʼi age muʼa mo kapau ʼe foaki e he ʼu matuʼā he kiʼi foʼi falā ki tanā fanau. Pea alu leva te fanau ʼo totogi mai hanā meʼa ʼofa. Kotea anai ka logoʼi e te ʼu matuʼā? Peʼe tou fakakaukauʼi age muʼa mo kapau ko he pionie tupulaga ʼe kei maʼuli mo ʼana matuʼā ʼe tokoni ki te totogi ʼo te ʼapi peʼe ko te meʼa kai. Neʼe lagi mole kole age e ʼana matuʼā ke ina fai te faʼahi ʼaia, kae ʼe nā tali tana foʼi falā. Kotea tona tupuʼaga? Koteʼuhi, ko he faigamalie ʼaia ke ina fakaha tana lotofakafetaʼi kia meʼa fuli ʼe nā fai maʼa ia. ʼO toe feia pe, ʼe iloʼi e Sehova ʼe lelei kia tatou ke tou foaki age ʼatatou meʼa maʼuhiga.
TE ʼU MEʼA ʼOFA ʼA TE ʼU KAUGANA ʼA TE ʼATUA ʼO TE TEMI MUʼA
7, 8. Neʼe lagolago feafeaʼi te hahaʼi ʼa Sehova ʼi te temi muʼa (1) ki he ʼu fakatuʼutuʼu tafito ʼi te tauhi? (2) ki tana gaue?
7 ʼE fakaha mai ʼi te Tohi-Tapu, neʼe fai e te hahaʼi ʼa Sehova ia he ʼu meʼa ʼofa moʼo lagolago ki tana gaue. ʼI ʼihi temi, neʼe natou foaki meʼa ʼofa ki he ʼu fakatuʼutuʼu tafito ʼi te tauhi. Ohage la, neʼe fakalotomalohiʼi e Moisese te kau Iselaele ke natou foaki he meʼa ʼofa ki te laga ʼo te tapenakulo. Ki muli age neʼe toe feia pe mo te Hau ko Tavite ki te laga ʼo te fale lotu. (Ekesote 35:5; 1 Koloniko 29:5-9) Lolotoga te ʼafio ʼa te Hau ko Soasi, neʼe fakaʼaogaʼi e te kau pelepitelo ia te falā ʼae neʼe foaki age e te hahaʼi ke toe faʼu ai te fale lotu. (2 Hau 12:4, 5) ʼI te ʼuluaki sekulo, neʼe iloʼi e te kau Kilisitiano neʼe ʼi ai te hoge ʼi Sutea pea neʼe ʼaoga he tokoni ki ʼonatou tehina. Koia, neʼe fakatotonu ai e te kau Kilisitiano fuli ʼo tahi mulimuli pe ki tona fealagia ke natou momoli he tokoni ki ʼonatou tehina ʼae ʼe maʼuʼuli ai.—Gaue 11:27-30.
8 Neʼe toe foaki e te hahaʼi ʼa Sehova he falā kia natou ʼae neʼe natou fakatuʼutuʼu te gaue. Ohage la, neʼe fakatotonu ʼi te Lao ʼa Moisese ke mole maʼu e te kau Levite honatou tofiʼa ohage ko te ʼu telepi ʼae. Koia neʼe foaki ai e te kau Iselaele ia te vahe hogofulu ʼo te ʼu meʼa fuli ʼae ʼe natou maʼu ki te kau Levite. Neʼe fakagafua ai ki te kau Levite ke natou tokakaga tafito ki tanatou gaue ʼi te tapenakulo. (Numelo 18:21) ʼO toe feia pe, neʼe fakaʼaogaʼi e te hahaʼi fafine lotofoaki te ʼu meʼa ʼae neʼe natou maʼu moʼo lagolago kia Sesu pea mo ʼana apositolo.—Luka 8:1-3.
Neʼe feala ki he tahi tatau aipe pe neʼe koloaʼia peʼe masiva ke ina foaki hana meʼa ʼofa
9. Neʼe ko te ʼu meʼa ʼofa feafeaʼi ʼae neʼe foaki e te ʼu kaugana ʼa te ʼAtua ʼi te temi muʼa?
9 Neʼe ko te ʼu meʼa ʼofa kehekehe ʼae neʼe foaki e te ʼu kaugana ʼa Sehova. Ko te kau Iselaele ʼae neʼe lagolago ki te laga ʼo te tapenakulo, neʼe lagi natou foaki he ʼu meʼa maʼuhiga neʼe natou ʼaumai mai Esipito. (Ekesote 3:21, 22; 35:22-24) ʼI te ʼuluaki sekulo neʼe fakatau e ʼihi Kilisitiano ʼanatou gaueʼaga peʼe ko ʼonatou ʼapi pea neʼe natou ʼave te falā ki te kau apositolo. Hili ia pea neʼe tufa leva e te kau apositolo ia te falā ʼaia ki te ʼu tehina mo tuagaʼane ʼae neʼe ʼaoga ki ai he tokoni. (Gaue 4:34, 35) Ko ʼihi Kilisitiano neʼe natou tanaki tuʼumaʼu he kiʼi falā ke natou foaki moʼo lagolago ki te ʼu gaue ʼa te tauhi. (1 Kolonito 16:2) Koia neʼe feala ki he tahi tatau aipe pe neʼe koloaʼia peʼe masiva ke ina foaki hana meʼa ʼofa.—Luka 21:1-4.
TE ʼU MEʼA ʼOFA IA ʼAHO NEI
10, 11. (1) ʼE feala ke tou faʼifaʼitakiʼi feafeaʼi te lotofoaki ʼa te ʼu kaugana ʼa Sehova ʼi te temi muʼa? (2) Kotea tau manatu ʼo ʼuhiga mo tau lagolago ki te gaue ʼo te Puleʼaga?
10 Ia ʼaho nei, ʼe toe feala ke fakalotomalohiʼi tatou ke tou lagolago ki he gaue. Ohage la, ʼe lagi ʼaoga ke toe fakafoʼou totatou Fale Fono peʼe laga he tahi fale fono. ʼE lagi ʼaoga ke toe fakafoʼou ia tatatou filiale. Peʼe lagi ʼaoga he falā ki te ʼu fakatuʼutuʼu ʼo ʼatatou
fakatahi lalahi peʼe ki te ʼu tehina mo tuagaʼane ʼae neʼe tau mo he tuʼutamaki fakanatula. ʼE toe tokoni ʼatatou meʼa ʼofa ki te kau misionea, te kau pionie makehe, te ʼu taupau fakasiliko pea mo natou ʼae ʼe gaue ʼi ʼatatou pilo lalahi pea mo te ʼu Petele ʼi te malamanei katoa. Pea ʼe lagi momoli tuʼumaʼu e tokotou kokelekasio he ʼu meʼa ʼofa ki te laga ʼo te ʼu Fale Fakatahi Lalahi pea mo he ʼu Fale Fono maʼa ʼotatou tehina mo tuagaʼane ʼo ʼihi potu fenua.11 ʼE feala kia tatou fuli ke tou lagolago ki te ʼu gaue ʼa te kautahi ʼa Sehova ʼae ʼe fakahoko ʼi te ʼu ʼaho fakamuli ʼaeni. ʼE lahi te ʼu meʼa ʼofa ʼe mole tou iloʼi pe ʼe haʼu mai fea. Ka tou tuku he falā ki te ʼu puha meʼa ʼofa ʼae ʼi te ʼu Fale Fono, peʼe tou foaki he meʼa ʼofa ʼi te Neti ʼi tatatou tuʼasila jw.org, ʼe mole tou fakaha pe ʼe ko te fia ʼae neʼe tou foaki. Kae ʼe feafeaʼi mo kapau ʼe ke manatu ʼe mole maʼuhiga tau kiʼi meʼa ʼofa? ʼI tona fakahagatonu, ko te ʼu meʼa ʼofa ʼae ʼe maʼu e te kautahi ʼe lahi pe mai te ʼu kiʼi meʼa ʼofa liliki. Maʼia mo ʼotatou tehina mo tuagaʼane ʼae ʼe mole lahi tanatou foʼi falā, ʼe natou faʼifaʼitakiʼi te ʼu ʼuluaki Kilisitiano ʼo Masetonia. Logo la tonatou “masisiva,” kae neʼe natou kole mamahi ke feala hanatou foaki he tokoni pea neʼe natou fai ʼaki he lotofoaki.—2 Kolonito 8:1-4.
12. ʼE faigaʼi feafeaʼi e te kautahi ke ina fakaʼaogaʼi lelei te ʼu meʼa ʼofa?
12 Ko te Kolesi Pule ʼe agatonu pea mo poto ʼi tana faʼahiga fakaʼaogaʼi te ʼu meʼa ʼofa. (Mateo 24:45) ʼE natou faikole ke natou toʼo he ʼu tonu fakapotopoto moʼo fakatuʼutuʼu lelei te falā ʼo te ʼu meʼa ʼofa. (Luka 14:28) ʼI te temi muʼa, ko te ʼu tagata agatonu ʼae neʼe tokaga ki te ʼu meʼa ʼofa, neʼe natou tokakaga tafito ke fakaʼaogaʼi pe te ʼu meʼa ʼofa ki te tauhi ʼa Sehova. Tou toʼo te faʼifaʼitaki ʼo Esetalasi. Neʼe toe liliu ki Selusalemi mo te ʼu koloa neʼe foaki age e te hau ʼo Pelesia, ko te aulo, te siliva pea mo ʼihi atu ʼu koloa. Ia ʼaho nei, ʼe fakafuafua te ʼu koloa ʼaia ki te teitei 10 miliale CFP. ʼI te manatu ʼa Esetalasi ko te ʼu meʼa ʼofa ʼaia neʼe haʼu mai ia Sehova. Koia neʼe ina foaki ai he ʼu fakatotonu ke puipui te ʼu koloa ʼaia lolotoga tanatou faifagona, tafito la ʼi te ʼu koga meʼa fakamatakutaku. (Esetalasi 8:24-34) ʼI ni taʼu ki muli age neʼe tanaki e te apositolo ko Paulo ia he falā moʼo tokoni ki te ʼu tehina ʼo Sutea. Neʼe tokaga ke ʼave te meʼa ʼofa ʼaia e he ʼu tehina ʼe tokakaga “kia meʼa fuli ʼaki he aga fakahagatonu, ʼo mole gata pe ia muʼa ʼo Sehova kaʼe ʼo toe feia pe ia muʼa ʼo te tagata.” (Lau ia 2 Kolonito 8:18-21.) Ia ʼaho nei, ʼe faʼifaʼitakiʼi e tatatou kautahi ia Esetalasi pea mo Paulo ʼo ina fakaʼaogaʼi lelei te ʼu meʼa ʼofa.
13. ʼI te ʼu taʼu ʼaeni neʼe hoki hili atu he koʼe neʼe fai e te kautahi ʼa Sehova he ʼu fetogi?
13 ʼE feala ki he kiʼi famili ke ina fetogi te faʼahiga fakaalualu ʼo tanatou foʼi falā ke natou fakaʼaogaʼi fakapotopoto. Peʼe natou kumi he ʼu puleʼaki ke natou maʼuli fakafeʼauga ke feala hanatou gaue ke lahi maʼa Sehova. Neʼe toe feia mo te kautahi ʼa Sehova. ʼI te ʼu taʼu ʼaeni neʼe hoki hili atu, neʼe lahi te ʼu fakatuʼutuʼu foʼou neʼe fai e te kautahi. Pea ʼi ʼihi temi, neʼe lahi age te falā ʼae neʼe fakaʼaogaʼi ʼi te ʼu meʼa ʼofa ʼae neʼe maʼu. Koia neʼe kumi e te kautahi he ʼu puleʼaki ke natou fakasiʼisiʼi te fakaʼaogaʼi ʼo te falā pea ke fakafaigafua te fakahoko ʼo te gaue. He ʼe feala ai leva ke toe lahi age te ʼu faʼahi ʼae ʼe fakaʼaogaʼi ki ai te ʼu meʼa ʼofa.
TE ʼU FUA LELEI ʼAE ʼE MAʼU ʼAKI ʼAKOTOU MEʼA ʼOFA
14-16. (1) Kotea te ʼu gaue ʼae fakaʼaogaʼi ki ai ʼakotou meʼa ʼofa? (2) Kotea te ʼu fua lelei ʼe ke maʼu mai te ʼu gaue ʼaia?
14 Ko te tokolahi ʼae ʼe tauhi kia Sehova talu mai fualoa ʼe natou ui kua lahi age totatou fakapelepeleʼi e te kautahi ʼa Sehova ʼaki te ʼu meʼa ʼofa ʼae ʼe ina foaki mai. Kua tou maʼu tatatou tuʼasila jw.org ʼi te Neti pea mo te JW Télédiffusion. Pea ko te Tohi-Tapu Les Saintes Écritures. Traduction du monde nouveau kua lahi te ʼu lea kua fakaliliu ki ai. ʼI te 2014 mo te 2015, ko te fakatahi fakamalamanei “Kotou Haga Kumi Muʼa Te Puleʼaga ʼo Te ʼAtua,” neʼe fai ia ʼaho ʼe tolu ʼi te ʼu malaʼe faigaoʼi lalahi ia kolo ʼe 14 ʼi te malamanei. Pea neʼe fiafia ʼaupito ia natou fuli ʼae neʼe kau ki te fakatahi ʼaia.
15 Ko te kaugā malie neʼe natou fakaha tanatou lotofakafetaʼi ʼo ʼuhiga mo te ʼu meʼa ʼofa neʼe natou maʼu mai te kautahi ʼa Sehova. Ohage la ko te taumatuʼa ʼe tauhi ʼi he fenua ʼo Asia. Neʼe nā tohi fenei: “Neʼe fekauʼi maua ki he kiʼi kolo veliveli. Koia ʼi ʼihi temi ʼe ma manatu ai kua mamaʼo maua ia meʼa fuli pea ma galoʼi vave ai te lahi ʼo te gaue ʼa Sehova. Kae ʼi te temi pe ʼae ʼe ma sioʼi ai te ʼu polokalama ʼi te JW Télédiffusion, ʼe ma toe manatuʼi ai ʼe ma kau ki te foʼi fale tau tehina fakamalamanei. Pea ko te ʼu tehina mo tuagaʼane ʼae ʼi te kiʼi kolo, ʼe natou leleiʼia te JW Télédiffusion. Moka natou sioʼi te polokalama ʼo te mahina, ʼe natou tau ui ʼe natou fakaovi ai ki te ʼu tehina ʼo te Kolesi Pule. Ia ʼaho nei, kua natou fiameʼameʼa ʼo lahi age ʼi tanatou iloʼi ʼae ʼe natou kau ki te kautahi ʼa te ʼAtua.”
16 ʼI te malamanei katoa ko Fale Fono ʼe teitei 2 500 ʼae ʼe laga peʼe fakafoʼou. Neʼe ui fenei e te ʼu tehina mo tuagaʼane ʼo te kokelekasio ʼi Honduras ʼi te ʼosi laga ʼo tonatou Fale Fono: “ ʼE matou fiafia moʼoni ʼi tamatou kau ki te foʼi famili ʼa Sehova ʼae ʼi te lagi pea mo te kele.” Tokolahi ʼe natou manatu feia moka natou maʼu te Tohi-Tapu pea mo ʼihi atu tohi ʼi ʼanatou lea, peʼe moka tokoni age te ʼu
tehina mo tuagaʼane hili he tuʼutamaki fakanatula, peʼe moka natou sio ki te ʼu fua lelei ʼo te faifakamafola ʼi te ʼu koga meʼa ʼae ʼe kaugā malie ai te hahaʼi ʼi tonatou telituale.17. ʼE tou iloʼi feafeaʼi ʼe lagolago ia Sehova ki tana kautahi ia ʼaho nei?
17 Tokolahi te hahaʼi ʼe mole ko he kau Fakamoʼoni ʼa Sehova, ʼe natou feʼekeʼaki pe ʼe feafeaʼi hatatou fakahoko te ʼu gaue fuli ʼaia ʼaki pe he ʼu meʼa ʼofa. Ohage la ko te pule ʼo he matani gaue. ʼI tana ʼosi ʼaʼahi ʼatatou fale ta tohi neʼe punamaʼuli ai he ʼe ko te gaue ʼe fakahoko e te kau gaue ʼe mole totogi, pea ʼaki pe te ʼu meʼa ʼofa kae mole tou fai he tae falā. Pea neʼe ina ui ko te meʼa ʼae ʼe tou fai ʼe mole pe feafeala ia ke hoko. ʼE moʼoni, kae ʼe tou iloʼi ʼe feala pe ke hoko te faʼahi ʼaia he ʼe lagolago ia Sehova ki te fakahoko ʼo te ʼu gaue ʼaia.—Sopo 42:2.
TE ʼU TAPUAKINA ʼE TOU MAʼU MOKA TOU FOAKI KIA SEHOVA
18. (1) Kotea te ʼu tapuakina ʼae ʼe tou maʼu moka tou lagolago ki te puleʼaga? (2) ʼE feafeaʼi hatatou akoʼi ʼatatou fanau mo natou ʼae ʼe kei foʼofoʼou ke natou fai feia?
18 ʼE foaki mai e Sehova ia te pilivilesio pea mo te faigamalie ʼae ke tou lagolago ki te toe gaue ʼo te puleʼaga. ʼE ina fakamoʼoni mai ʼe ina tapuakinaʼi anai tatou moka tou fai te faʼahi ʼaia. (Malakia 3:10) ʼE fakapapauʼi mai e Sehova ʼe fua lelei anai kia tatou mo kapau ʼe tou lotofoaki. (Lau ia Taaga Lea 11:24, 25.) Pea tahi, ʼe ina toe ui mai ʼe tou fiafia anai moka tou foaki koteʼuhi “e lahi age te fiafia moka kita foaki, ʼi takita tali.” (Gaue 20:35) ʼAki ʼatatou palalau mo ʼatatou gaue, ʼe toe feala ke tou akoʼi ki ʼatatou fanau mo natou ʼae ʼe kei foʼofoʼou pe ʼe feafeaʼi hanatou lagolago ki te gaue ʼaia pea mo maʼu mai ai he ʼu tapuakina.
19. Kotea ʼae ʼe fakalotomalohiʼi ai koutou e te alatike ʼaeni ke kotou fai?
19 Ko te ʼu meʼa fuli ʼae ʼe tou maʼu ʼe haʼu mai ia Sehova. Koia ka tou foaki kia te ia, ʼe tou fakaha ai ʼe tou ʼoʼofa ia te ia pea ʼe maʼuhiga kia tatou ia meʼa fuli ʼae ʼe ina fai maʼa tatou. (1 Koloniko 29:17) ʼI te temi ʼae neʼe lagolago ai te kau Iselaele ki te laga ʼo te fale lotu, neʼe natou “fiafia leva . . . o tupu ko anatou molaga, koteuhi nee natou fai anatou meaofa [kia Sehova] mo te loto lelei.” (1 Koloniko 29:9) Tou toe hoko atu ke tou maʼu te fiafia ʼi tatatou foaki kia Sehova ʼatatou meʼa maʼuhiga ʼae neʼe tou maʼu mai ia te ia.