1. He koʼe ʼe makehe te temi ʼae ʼe tou maʼuʼuli ai?

ʼE TOU maʼuʼuli nei ʼi he temi ʼe makehe ʼi te hisitolia ʼo te tagata. Pea ohage pe ko tona fakakikite ʼi te Tohi-Tapu, ʼe lolotoga fakatahiʼi nei e Sehova he toe hahaʼi tokolahi “mai te ʼu puleʼaga fuli, mo te ʼu telepi fuli, mo te ʼu lanu fuli pea mo te ʼu lea fuli.” Ko “he puleaga malohi” ʼo he hahaʼi fiafia ʼe toko valu miliona tupu ʼe “natou foaki [ki te ʼAtua] he tauhi taputapu ʼi te ʼaho mo te po.” (Fakaha 7:9, 15; Esaia 60:22) Neʼe heʼeki ʼi ai he toe hahaʼi kaugā malie feia kua ako ke natou ʼoʼofa ki te ʼAtua mo ʼonatou tatau.

2. Kotea te ʼofa ʼae ʼe maʼu e te hahaʼi ʼae ʼe mole ʼoʼofa ʼi te ʼAtua? (Vakaʼi te ʼuluaki pāki.)

² Kae, neʼe toe fakakikite ʼi te Tohi-Tapu, ko te hahaʼi ʼae ʼe mole ʼoʼofa ʼi te ʼAtua ʼe natou ʼoʼofa pe anai kia natou totonu. Neʼe tohi e te apositolo ko Paulo ʼe ʼi ai anai ʼi te ʼu ʼaho fakamuli he hahaʼi ʼe “ ʼoʼofa pe anai . . . kia natou totonu, mo manako ki te paʼaga” mo “natou ʼoʼofa ki te ʼu fakafiafia kaʼe mole ki te ʼAtua.” (2 Timoteo 3:1-4) Ko te ʼofa pe ʼae kia kita totonu ʼe fakafeagai  ki te ʼofa ʼae ki te ʼAtua. ʼE mole maʼuli fiafia he tahi moka ʼe ina kumi pe te ʼu meʼa ʼae ʼe ina leleiʼia. Ko te tupuʼaga la ʼaia ʼo te manatu pe ʼa te hahaʼi kia natou totonu pea mo faigataʼa ai te maʼuli.

3. Kotea ka tou vakaʼi anai ʼi te alatike ʼaeni? Pea kotea tona tupuʼaga?

³ Neʼe iloʼi e te apositolo ko Paulo ʼe mafola anai te faʼahiga ʼofa ʼaia, te ʼofa pe ʼae kia kita totonu. Pea ʼe fakatupu tuʼutamaki anai ki te kau Kilisitiano. Koia, neʼe ina fakatokaga ki te kau Kilisitiano ke natou “fakamamaʼo mai” ia natou ʼae ʼe natou maʼu te faʼahiga ʼofa ʼaia. (2 Timoteo 3:5) Kae, ʼe mole feala ke tou mamaʼo ʼosi mai ia natou. Koia, ʼe feafeaʼi hatatou puipui ia tatou mai te ʼu faʼahiga aga ʼae ʼe maʼu ʼi te malama mo tou faigaʼi ke leleiʼia tatou e Sehova, te ʼAtua ʼo te ʼofa? Tou vakaʼi te kehekehe ʼo te ʼofa ʼae ʼe loto e te ʼAtua ke tou maʼu mo te ʼofa ʼae ʼe fakamatalatala ia 2 Timoteo 3:2-4. ʼE tokoni mai anai ke tou vakavakaʼi ia tatou totonu mo tou iloʼi pe ʼe kotea te ʼofa ʼae ʼe feala ke tou fiafia moʼoni ai.

4. He koʼe ʼe mole kovi hakita ʼofa kia kita totonu?

⁴ Neʼe tohi fenei e te apositolo ko Paulo: “ ʼE ʼoʼofa pe anai te hahaʼi kia natou totonu.” Ko tona fakaʼuhiga koa ʼe kovi takita ʼofa kia kita totonu? Kailoa ia, ʼe tonu ke tou ʼoʼofa kia tatou kae ʼi hona aluʼaga fakapotopoto. Pea neʼe feia totatou fakatupu e Sehova. Neʼe ui fenei e Sesu: “ ʼE tonu ke ke ʼofa ki tou tatau ohage pe ko koe totonu.” (Maleko 12:31) Kapau ʼe mole tou ʼoʼofa ia tatou totonu, ʼe mole feala ke tou ʼoʼofa ki ʼotatou tatau. Pea ʼe toe ui fenei ʼi te Tohi-Tapu: “ ʼE tonu ki te ʼu tagata ʼohoana ke natou ʼoʼofa ki ʼonatou ʼohoana ohage ko tanatou ʼoʼofa ki ʼonatou sino totonu. Ko te tagata ʼae ʼe ʼofa ki tona ʼohoana ʼe ʼofa ia kia ia totonu, koteʼuhi ʼe mole fehiʼa he tagata ki tona sino, kaʼe ʼe ina fafaga pea mo fakapelepeleʼi.” (Efeso 5:28, 29) Koia, ʼe ha lelei mai ʼe mole kovi takita ʼofa kia kita totonu kae ʼi hona aluʼaga fakapotopoto.

5. ʼE feafeaʼi te faʼahiga hahaʼi ʼae ʼe ʼoʼofa fau kia natou totonu?

⁵ Ko te ʼofa ʼae ʼe talanoa ki ai ia 2 Timoteo 3:2, ʼe mole lelei pea ʼe mole fakapotopoto. Ko te ʼofa ʼaia, ʼe ko te ʼofa fau ʼae kia kita totonu. Kapau ʼe lahi fau te ʼofa ʼa he tahi kia ia totonu, pea ʼi tana manatu ʼe maʼuhiga age ia ʼi ʼihi. (Lau ia Loma 12:3.) ʼE tokaga pe kia ia totonu. Pea moka hoko he ʼu fihifihia, ʼe ina tukugakoviʼi leva ʼihi. ʼE feala ke tou fakatatau te faʼahiga tagata ʼaia ki he tagata ʼe ina laga takafoli he kaupa maʼoluga ʼi tona ʼapi ke mole toe sio ki he tahi pea ke mole feala ki he tahi ke haʼu kia ia. ʼE mahino papau ia, ko te faʼahiga tagata ʼaia ʼe mole fiafia ʼi tona maʼuli.

6. Kotea te ʼu fua lelei ʼe tou maʼu moka tou ʼoʼofa ki te ʼAtua?

⁶ ʼI te manatu ʼa te tagata sivi Tohi-Tapu, neʼe ʼuluaki talanoa ia Paulo ki te ʼofa pe kia kita totonu koteʼuhi ʼe tupu ʼaki ai te ʼu aga kovi ʼae ʼe hoa atu ki ai. Kae ko te ʼofa ʼae ʼe loto e te ʼAtua ke tou maʼu ʼe ina fakatupu te  ʼu kalitate. Ohage la ko te fiafia, te tokalelei, te agaʼofa, te tui, te agamalū, pea mo te lotololomi. (Kalate 5:22, 23) Neʼe tohi fenei e te tagata faipesalemo: “Manuia te hahai ae e Atua [kia Sehova]!” (Pesalemo 144:15) Ko Sehova ʼe ko te ʼAtua fiafia pea ʼe toe fiafia mo tana hahaʼi. Ko te ʼu kaugana ʼa Sehova ʼe natou maʼuli fiafia koteʼuhi ʼe natou lotofoaki. ʼE mole hage ko natou ʼae ʼe ʼoʼofa fau kia natou totonu mo manatu pe ke foaki age he meʼa.—Gaue 20:35.

7. Kotea te ʼu fehuʼi ka tokoni mai anai ke tou vakavakaʼi pe ʼe feafeaʼi totatou ʼofa ʼae ki te ʼAtua?

⁷ ʼE feafeaʼi hatatou iloʼi pe ʼe lahi age totatou ʼofa ia tatou totonu ʼi te ʼAtua? Tou fakakaukau ki te tokoni fakapotopoto ʼaeni: “ ʼAua naʼa kotou fai he meʼa ʼaki he manatu fakataupiepie peʼe ʼaki he fiaha, kae ʼaki he agavaivai kotou fakaʼuhiga te hahaʼi fuli ʼe maʼoluga age ia koutou. Pea ʼaua naʼa kotou kumi pe te ʼu meʼa ʼae ʼe lelei kia koutou totonu, kae ke kotou toe kumi foki mo te ʼu meʼa ʼae ʼe lelei ki ʼihi.” (Filipe 2:3, 4) ʼE feala ke tou fai te ʼu fehuʼi ʼaeni: ‘ ʼE au maʼuliʼi koa te tokoni ʼaia? ʼE au faiga fakamalotoloto koa ke au fai te meʼa ʼae ʼe loto ki ai te ʼAtua? ʼE au faiga koa ke au tokoni ki ʼihi ʼi te kokelekasio pea mo te faifakamafola?’ ʼE moʼoni ʼe mole faigafua tuʼumaʼu takita foaki tokita temi mo tokita malohi. Koteʼuhi ʼe ʼaoga ki ai he ʼu faiga pea mo he ʼu sakilifisio. Kae ʼe mole ʼi ai he tahi faʼahi ʼe tou fiafia moʼoni ai ʼi tatatou iloʼi ʼae ʼe leleiʼia tatou e te Tuʼi ʼo te ʼatulaulau.

8. Kotea ʼae ʼe fai e ʼihi Kilisitiano ʼuhi pe ko tonatou ʼoʼofa ʼi te ʼAtua?

⁸ Ko ʼihi Kilisitiano neʼe natou tuku he gaue neʼe feala ke natou maʼu koloa ai ke natou tauhi ke lahi age kia Sehova ʼuhi pe ko tonatou ʼoʼofa ai. Tou toʼo te faʼifaʼitaki ʼo te toketa ko Ericka. Neʼe mole kei tokaga ia ki tana  gaue fakatoketa kae neʼe faiga ia ke liliu ʼo pionie. Koia neʼe lahi ai te ʼu fenua neʼe nā faifakamafola ai mo tona ʼohoana. ʼE ina ui fenei: “Ko te ʼu aluʼaga ʼae neʼe hoko kia maua ʼi tamā tokoni ki te hahaʼi ʼi te ʼu telituale lea matapule mo ʼoma kaumeʼa ʼae neʼe ma maʼu ai neʼe koloaʼia ai ʼoma maʼuli.” Ko Ericka ʼe kei toketa pe, kae ʼe lahi age tana fakaʼaogaʼi tona temi mo tona malohi ke ina akoʼi ki te hahaʼi pe ko ai ia Sehova pea mo tokoni ki ʼona tehina mo tuagaʼane. ʼE ina ui ʼe ina maʼu ai “he toe lotofiafia.”

9. He koe ʼe mole maʼuli fiafia ia ia ʼae ʼe manako ki te paʼaga?

⁹ Neʼe tohi e Paulo ʼe “manako anai te hahaʼi ki te paʼaga.” ʼI ni taʼu ki muʼa atu ʼi te fenua ko Irlande, ko te pionie neʼe palalau ki te tagata ʼo ʼuhiga mo te ʼAtua. Pea neʼe toʼo e te tagata te ʼu foʼi falā ʼi tana kiʼi kato pea ina ui fenei: “Ko toku ʼAtua ʼaeni.” Logo la ʼe manatu feia te tokolahi kae ʼe mole natou fai anai te ʼu palalau ʼaia. ʼE natou manako ki te paʼaga pea mo te ʼu meʼa ʼae ʼe feala ke natou totogi ʼaki. Kae ʼe fakatokaga fenei mai ʼi te Tohi-Tapu: “Ko ae e manako ki te paaga e mole makona i te paaga, pea ko ae e ofa ki te u koloa e mole ina mau he temi ke fiafia ai i ona koloa.” (Ekelesiasi 5:9) Ko he tahi ʼe manako ki te paʼaga ʼe manatu tuʼumaʼu pe anai ia ʼe mole feʼauga tana foʼi falā. Pea ʼe gaue kinakina anai ki ai lolotoga tona maʼuli. Kae ʼe ina “fakamamahiʼi lahi” pe anai ia ia.—1 Timoteo 6:9, 10.

10. Kotea ʼae ʼe ui ʼi te Tohi-Tapu ʼo ʼuhiga mo te maʼu koloa pea mo te masiva?

¹⁰ ʼE moʼoni ʼe ʼaoga kia tatou fuli te falā. Ko hotatou faʼahiga puipui. (Ekelesiasi 7:12) Kae ʼe feala koa ke tou maʼuli fiafia mo kapau ʼe tou maʼu pe te ʼu meʼa ʼae ʼe ʼaoga tafito ki te maʼuli? ʼEi. (Lau ia Ekelesiasi 5:11.) Neʼe tohi fenei e te foha ʼo Iake ko Akule: “Aua naa ke tuku kia au te masiva, pee ko te mau koloa, foaki mai kia au te pane ae e aoga kia au.” ʼE faigafua tatatou mahino pe koʼe neʼe mole fia masiva te tagata ʼaia. Neʼe ina ui neʼe mole fia kaihaʼa koteʼuhi ʼe ina fakalainoaʼi ai anai te ʼAtua. Kae he koe neʼe mole fia maʼu koloa? Neʼe ina tohi fenei: “Koteuhi naa au makona, pea e au fakafisi kia koe, o au ui: Ko ai [ia Sehova]?” (Taaga Lea 30:8, 9) ʼE mahino ia, ʼe lagi kotou iloʼi he hahaʼi ʼe falala age natou ki te ʼu koloa ʼi te ʼAtua.

11. Kotea ʼae neʼe ui e Sesu ʼo ʼuhiga mo te paʼaga?

¹¹ ʼE mole feala ke leleiʼia e te ʼAtua he tahi ʼe manako ki te paʼaga. Neʼe ui fenei e Sesu: “ ʼE mole feala ke kaugana he tahi ki he ʼu pule ʼe toko lua. Koteʼuhi ʼe fehiʼa anai ki te tahi kaʼe ʼofa ia ki te tahi, peʼe pipiki anai ki te tahi kaʼe ina meʼa noaʼi te tahi. ʼE mole feala ke kotou kaugana ki te ʼAtua pea mo te Paʼaga.” Neʼe ina toe ui fenei: “Tuku takotou tanaki maʼa koutou he ʼu koloa ʼi te kele, ʼae ʼe ukaukamea mo kaina e te ʼu kiʼi manu pea ʼe feala ia ke kaihaʼa. Kaʼe kotou tanaki maʼa koutou he ʼu koloa ʼi selo, ʼae ʼe mole ukaukamea mo kaina e te ʼu kiʼi manu pea ʼe mole feala ia ke kaihaʼa.”—Mateo 6:19, 20, 24.

12. ʼE tokoni feafeaʼi mai te maʼuli fakafeʼauga ke tou tauhi ki te ʼAtua? Kotou tuku mai he faʼifaʼitaki.

¹² Tokolahi te ʼu kaugana ʼa Sehova ʼe natou fakafeʼauga tonatou maʼuli. ʼE toe lahi age ai tanatou tauhi kia Sehova mo tonatou lotofiafia. Ko Jack ʼe maʼuli ʼi Amelika, neʼe ina fakatau tona foʼi ʼapi lahi mo tana matani gaue ke feala ai hana pionie mo tona ʼohoana. ʼE ina fakamahino fenei mai: “Neʼe faigataʼa ʼaupito  tamā liʼaki toma foʼi ʼapi matalelei pea mo toma kele.” Kae lolotoga he ʼu taʼu mo taku tau mai pe ki fale mo te hoha pe ʼuhi ʼae ko te ʼu fihifihia ʼo te gaue. ʼE ina ui fenei: “Ko toku ʼohoana neʼe pionie katoa pea neʼe fiafia tuʼumaʼu. Neʼe ina ui mai, ‘ ʼE lelei tokotahi age toku patolo.’ ʼI te temi nei kua au toe pionie mo au pea ʼe ma gaue tokolua kia Sehova.”

13. Kotea ʼe lava tokoni mai ke tou iloʼi tatatou faʼahiga manatu ʼo ʼuhiga mo te falā?

¹³ Ke tou iloʼi pe ʼe kotea tatatou faʼahiga manatu ʼo ʼuhiga mo te falā, ʼe tonu ke tou fai te ʼu fehuʼi ʼaeni: ‘ ʼE au fakaha koa ʼi toku maʼuli ʼe au tui moʼoni ki te ʼu faʼahi ʼae ʼe ui ʼi te Tohi-Tapu ʼo ʼuhiga mo te falā? ʼE maʼuhiga age koa kia au te maʼu ʼo he foʼi falā? ʼE maʼuhiga age koa te ʼu koloa ʼi ʼaku felogoi ʼae mo Sehova pea mo te hahaʼi? ʼE au tui papau koa ʼe foaki mai anai e Sehova te ʼu meʼa ʼae ʼe ʼaoga kia au?’ Tou falala kia Sehova he ʼe mole ina fakalotomamahiʼi anai ʼi he temi he tahi ʼe falanaki kia te ia.—Mateo 6:33.

14. Kotea ia te manatu fakapotopoto ʼe tonu ke tou maʼu ʼo ʼuhiga mo te ʼu fakafiafia?

¹⁴ Neʼe toe fakakikite ʼi te Tohi-Tapu ko te hahaʼi ʼi te ʼu ʼaho fakamuli, ʼe natou ‘ ʼoʼofa anai ki te ʼu fakafiafia.’ Ohage pe ko tatatou kua vakaʼi, ʼe tonu ke tou maʼu he faʼahiga manatu fakapotopoto ʼo ʼuhiga mo tatou totonu pea mo te falā. Pea ʼe toe feia pe ki te ʼu fakafiafia he ʼe ʼi te manatu ʼa ʼihi ʼe mole tonu ke natou fakafiafia, kae ʼe mole ko te loto ʼaia ʼo Sehova. ʼI te Tohi-Tapu, ʼe fakalotomalohiʼi fenei ai te ʼu kaugana ʼa te ʼAtua: “Alu ia koe i tou ala, kai tau pane i te fiafia, pea inu tau vino i te fimalie.”—Ekelesiasi 9:7.

15. Kotea te fakaʼuhiga ʼo te kupusiga palalau ʼae “ ʼoʼofa ki te ʼu fakafiafia”?

¹⁵ ʼE talanoa ia 2 Timoteo 3:4 ʼo ʼuhiga mo natou ʼae ʼe ʼoʼofa ki te ʼu fakafiafia mo natou galoʼi te ʼAtua ʼi tonatou maʼuli. Tou fakatokagaʼi ʼe mole ui ʼi te vaega ʼe ʼoʼofa anai te hahaʼi ki te ʼu fakafiafia ʼo lahi age ʼi te ʼAtua. He ʼe fakaʼuhiga leva ʼe natou ʼofa veliveli pe anai ki te ʼAtua. Kae ʼe ui fenei ʼi te vaega: “[ʼE] natou ʼoʼofa ki te ʼu fakafiafia kaʼe mole ki te ʼAtua.” Neʼe ui e te tagata sivi Tohi-Tapu ʼe mole fakaʼuhiga te vaega ‘ ʼe natou ʼoʼofa ki te ʼAtua ʼi hona faʼahiga aluʼaga. Kailoa ia, ʼe mole natou ʼoʼofa ki te ʼAtua.’ Ko he fakatokaga maʼuhiga ʼaia kia natou ʼae ʼe ʼoʼofa ki te ʼu fakafiafia. ʼI te Tohi-Tapu, ʼe fakaʼuhiga ia natou ʼae ʼe ʼoʼofa ki te ʼu fakafiafia kia natou ʼae “ ʼe fakaheʼi” e te ʼu fiafia ʼo te maʼuli.—Luka 8:14.

16, 17. Kotea te faʼifaʼitaki lelei neʼe tuku mai e Sesu ʼo ʼuhiga mo tana faʼahiga manatu ki te ʼu fakafiafia?

¹⁶ Neʼe fakaha mai e Sesu te fakaʼuhiga ʼo te maʼu he manatu ʼe fakapotopoto ʼo ʼuhiga mo te ʼu fakafiafia. Neʼe kau ki “te kaitahi ʼo te faiʼohoana” pea mo te tahi “kaitahi.” (Soane 2:1-10; Luka 5:29) ʼI te faiʼohoana, neʼe mole feʼauga te vino, koia neʼe fakahoko ai e Sesu ia he milakulo ʼo ina fakaliliu te vai ko te vino. Pea ʼi te tahi ʼaho, neʼe fatufatuʼi e te hahaʼi ia Sesu ʼuhi ko tana kai  mo tana inu. Kae neʼe ina fakaha lelei neʼe mole fakapotopoto tanatou faʼahiga manatu.—Luka 7:33-36.

¹⁷ Kae ko te ʼu fakafiafia neʼe mole ko he faʼahi maʼuhiga ia ʼi te maʼuli ʼo Sesu. Neʼe ina fakamuʼamuʼa ia Sehova mo faiga fakamalotoloto ke tokoni ki ʼona tatau. Neʼe lotolelei ke mate ʼi he pou fakamamahi moʼo haofaki ia te malamanei. Pea kia natou ʼae neʼe fia mulimuli ia te ia neʼe ina ui fenei: “Manuʼia ia koutou moka laukoviʼi pea mo fakatagaʼi koutou e te hahaʼi pea moka natou loi mo palalau kovi ʼo ʼuhiga mo koutou ʼuhi ko au. Kotou fakafiafia lahi koteʼuhi ʼe lahi tokotou fakapale ʼi selo, he neʼe feia te fakatagaʼi ʼo te kau polofeta ʼi te temi muʼa.”—Mateo 5:11, 12.

18. Kotea te ʼu fehuʼi ka tokoni mai anai ke tou iloʼi pe ʼe feafeaʼi totatou ʼofa ki te ʼu fakafiafia?

¹⁸ Kotea ka tokoni mai anai ke tou iloʼi pe ʼe feafeaʼi totatou ʼofa ki te ʼu fakafiafia? ʼE lelei ke tou fai te ʼu fehuʼi ʼaeni: ‘ ʼE maʼuhiga age koa kia au te ʼu fakafiafia ʼi te ʼu fono mo te faifakamafola? ʼE au tali koa ke au tuku ʼihi meʼa ʼe au leleiʼia koteʼuhi ʼe au fia tauhi ki te ʼAtua? ʼE au fakakaukauʼi koa pe kotea anai te manatu ʼa Sehova moka au filifili ʼaku fakafiafia?’ Kapau ʼe tou ʼoʼofa ki te ʼAtua mo tou fia fakafiafiaʼi tona loto, ʼe tou liʼaki anai te meʼa ʼae ʼe mole ina leleiʼia pea mo ʼae ʼe feala ke mole ina leleiʼia.—Lau ia Mateo 22:37, 38.

19. Ko te faʼahiga hahaʼi feafeaʼi ʼae ʼe mole maʼuli fiafia?

¹⁹ Kua taʼu 6 000 nei mo te fakamamahi pe e te malama ʼa Satana ia te hahaʼi. ʼI te ʼu ʼaho fakamuli ʼo te tuʼu ʼaeni, kua mafola ʼi te kele te hahaʼi ʼae ʼe ʼoʼofa pe kia natou totonu, mo te falā pea mo te ʼu fakafiafia. ʼE manatu pe natou ki te ʼu meʼa ʼae ʼe feala ke natou maʼu mo natou fakamuʼamuʼa te ʼu meʼa ʼe natou loto ki ai ʼi tonatou maʼuli. Kae ʼe mole feala ke maʼuli fiafia te faʼahiga hahaʼi ʼaia. He ʼe ui fenei ʼi te Tohi-Tapu: “Manuʼia ia ia ʼae ko tona tokoni ko te ʼAtua ʼo Sakopo, ʼae ko tona falalaʼaga ko Sehova, tona ʼAtua.”—Pesalemo 146:5, MN.

20. ʼE feafeaʼi tau fiafia ʼi tau ʼofa ʼae ki te ʼAtua?

²⁰ ʼE ʼoʼofa moʼoni te ʼu kaugana ʼa Sehova ia te ia. ʼI te taʼu fuli, ko he hahaʼi kaugā malie ʼe ako ke natou iloʼi ia te ʼAtua mo natou toe ʼoʼofa ai. Ko he fakamoʼoni ʼaia kua pule te Puleʼaga ʼo te ʼAtua, pea kua tou vave maʼu pe anai ʼona tapuakina fakaofoofo. ʼE tou maʼuli fiafia moʼoni anai moka ʼe tou fai te meʼa ʼae ʼe loto ki ai Sehova pea mo fakafiafiaʼi tona loto. Ko natou ʼae ʼe ʼoʼofa kia Sehova, ʼe maʼuli fiafia anai ʼo talu ai. ʼI te alatike ʼae ka hoa mai, ʼe tou vakaʼi anai ʼihi agaaga ʼe tupu mai te ʼofa ʼae kia kita totonu. Pea ʼe tou vakaʼi anai pe ʼe fakafeagai feafeaʼi te ʼu agaaga ʼaia ki te ʼu kalitate ʼa te ʼu kaugana ʼa Sehova.