1, 2. (1) Kotea ʼae ʼe feala ke hoko moka ʼe mole tou maʼu ia te lotololomi? (2) He koʼe ʼe ʼaoga ke tou talanoa ki te lotololomi?

KO SEHOVA ʼATUA, ʼe feala ke tokoni mai ke tou maʼu ia te kalitate ʼae ko te lotololomi. (Kalate 5:22, 23) ʼE mole he fakatatau ʼo te lotololomi ʼo Sehova. Kaʼe ʼe tou agahala, koia ʼae faigataʼa ai tatatou maʼu ia te lotololomi. Pea ʼe lahi te ʼu faigataʼaʼia ʼe tau mo te hahaʼi ia ʼaho nei, ʼuhi ko tanatou mole maʼu ia te lotololomi. Ohage la, moka ko he tahi ʼe ina tau holoʼi ia te ʼu gaue ʼae ʼe maʼuhiga ke fai, ʼe mole lelei anai tana ako peʼe ko tana gaue. ʼO toe feia pe foki, ka mole maʼu e he tahi ia te lotololomi, ʼe feala ke gutu tauvele, mo inu kava fakavale, mo agamalohi, mo mavete mo te ʼohoana, mo tuʼu maʼua, mo popula ki he aga ʼe kovi, mo pilisoni, mo lotomamahi, mo mahaki ʼuhi ko te ʼu felaveʼi fakasino heʼe ʼaoga pea mo faitama taka.—Pesalemo 34:12-15.

² Ko te hahaʼi ʼae ʼe mole lotololomi, ʼe natou fakatupu he ʼu fihifihia kia natou totonu pea mo ʼihi. Pea ʼaki te alu ʼo te temi, ʼe ha lelei mai ai kua tahitahiga te maʼu e te hahaʼi ia te lotololomi. Kaʼe ʼe mole tou punamaʼuli ki te faʼahi ʼaia. Koteʼuhi neʼe tala fakatomuʼa ʼi te Folafola ʼa te ʼAtua, ko te mole maʼu ʼo te lotololomi ʼe ko he fakamoʼoni ʼaia kua tou maʼuʼuli nei ʼi “te ʼu ʼaho fakamuli.”—2 Timoteo 3:1-3.

3. He koʼe ʼe tonu ke tou maʼu ia te lotololomi?

 ³ He koʼe ʼe tonu ke tou maʼu ia te lotololomi? ʼE ʼi ai ʼona tupuʼaga ʼe lua. ʼUluaki, ko he tahi ʼe ina lava lolomi ʼana manatu mo te ʼu meʼa ʼae ʼe ina logoʼi ʼi tona loto, ʼi te agamahani ʼe mole lahi ʼona fihifihia. ʼE toe faigafua age foki kia ia tana maʼu ia he ʼu felogoʼi lelei mo niʼihi pea mo tekeʼi ia te ita, mo te lotohoha pea mo te lotomamahi ʼaupito. Lua, ke feala hatatou fakakaumeʼa tuʼumaʼu mo te ʼAtua, ʼe tonu ke tou tekeʼi ia te ʼu fakahala pea mo tou lolomi ʼotatou holi ʼae ʼe kovi. Kaʼe ko te ʼu faʼahi ʼaia neʼe mole fai e Atama mo Eva. (Senesi 3:6) Ko te tokolahi ia ʼaho nei ʼe natou hage ko naua ʼaia. ʼE natou tau mo he ʼu faigataʼaʼia ʼaupito he ʼe mole natou maʼu ia te lotololomi.

4. Kotea ʼe feala ke tokoni kia natou ʼae ʼe faiga ke natou lolomi ʼonatou holi ʼae ʼe kovi?

⁴ ʼE mahino ia Sehova ki totatou ʼuhiga agahala pea mo te faigataʼa ʼo tatatou maʼu ia te lotololomi. Pea ʼe fia tokoni mai ke tou lolomi ʼotatou holi ʼae ʼe kovi. (1 Hau 8:46-50) Ko Sehova ʼe ko he kaumeʼa ʼe ʼofa pea ʼe ina fakalotomalohiʼi ia natou ʼae ʼe faiga ke natou lolomi ʼanatou manatu pea mo ʼonatou holi. ʼI te alatike ʼaeni, ʼe tou vakaʼi anai te ʼu ako ʼe feala ke tou taʼofi mai te faʼifaʼitaki ʼo Sehova ʼo ʼuhiga mo te lotololomi. ʼE tou talanoa anai ki te ʼu faʼifaʼitaki ʼe lelei pea mo te ʼu faʼifaʼitaki ʼe kovi ʼi te Tohi-Tapu. Pea ʼe tou toe vakaʼi anai foki mo te ʼu tokoni ʼe ʼaoga kia tatou.

5, 6. Kotea te faʼifaʼitaki neʼe tuku mai e Sehova ʼo ʼuhiga mo te lotololomi?

⁵ ʼE haohaoa ia Sehova ʼi te ʼu faʼahi fuli, koia ʼae ʼe mole he fakatatau ʼo tona lotololomi. (Tetelonome 32:4) Kaʼe ko tatou ʼe tou agahala. Koia ʼae ʼe ʼaoga tuʼumaʼu ai ke tou ako ia tana lotololomi ke feala ai hatatou faʼifaʼitakiʼi lelei ia ia. ʼE tokoni mai anai te faʼahi ʼaia ke tou iloʼi pe kotea ʼae ʼe tonu ke tou fai moka ʼe hoko he aluʼaga ʼe tou iita ai. Kaʼe tou vakaʼi age muʼa he ʼu aluʼaga neʼe fakaha ai e Sehova ia tana lotololomi.

⁶ Tou fakakaukauʼi age muʼa pe kotea neʼe fai e Sehova ʼi te temi ʼae neʼe agatuʼu ai ia Satana ʼi te ʼoloto ʼo Eteni. ʼE mahino ia, ko te ʼu ʼaselo agatonu fuli ʼa te ʼAtua neʼe natou punamaʼuli, mo iita pea neʼe natou logoʼi honatou fehiʼa ʼo ʼuhiga mo te ʼu meʼa ʼae neʼe lau e te Tevolo. ʼE lagi ke toe logoʼi te ʼu faʼahi ʼaia, ʼuhi ko te ʼu mamahi ʼae neʼe fakatupu e Satana. Kaʼe, ko Sehova neʼe lotololomi. Pea neʼe tuha ia tana aga mo te aluʼaga ʼaia. He ʼe ha ia tana lotololomi pea mo tana faitotonu ʼi te puleʼaki ʼae neʼe ina fai ʼo ʼuhiga mo te agatuʼu ʼa Satana. (Ekesote 34:6; Sopo 2:2-6) Kotea tona tupuʼaga? Neʼe tuku e Sehova ke fakalaka he temi loaloaga he ʼe mole ina loto ke mate he tahi, kaʼe ke “kaku . . . ki te fakahemala.”—2 Petelo 3:9.

7. Kotea te ako ʼe tou taʼofi mai te faʼifaʼitaki ʼa Sehova?

⁷ ʼE tou ako ʼaki te faʼifaʼitaki ʼa Sehova, ʼe mole tonu ke tou iita vave kaʼe ʼe tonu muʼa ke tou fakakaukauʼi ʼatatou palalau. Koia, kapau ʼe maʼua ke ke fai he tonu ʼe maʼuhiga, toʼo he temi moʼo fakakaukauʼi te faʼahi ʼaia. Kole kia Sehova ke ina foaki atu te poto ke lelei ʼau palalau mo tau aga. (Pesalemo 141:3) Ka tou iita, ʼe faigataʼa hatatou maʼu ia te lotololomi. Pea koia la ʼae, tokolahi ʼe natou fakahemala ki te  ʼu palalau peʼe ki te ʼu meʼa ʼae neʼe natou fai kaʼe neʼe mole natou fakakaukauʼi.—Taaga Lea 14:29; 15:28; 19:2.

8. (1) ʼE tou maʼu ʼifea ia he ʼu faʼifaʼitaki lelei ʼo te lotololomi? (2) Kotea ʼae neʼe tokoni kia Sosefo ke mole to ki te fakahala ʼa te ʼohoana ʼo Potifale? (Vakaʼi te ʼuluaki pāki.)

⁸ Kotea te ʼu faʼifaʼitaki Fakatohi-tapu ʼe fakaha ai ia te maʼuhiga ʼo te lotololomi? ʼE feala ke tou fakakaukauʼi ia te faʼifaʼitaki ʼo te foha ʼo Sakopo, ia Sosefo. Neʼe ina tekeʼi ia te fakahala ʼi te temi ʼae neʼe gaue ai ʼi te loto fale ʼo Potifale, ia te pule ʼo te hahaʼi leʼo ʼa Falaone. Ko te ʼohoana ʼo Potifale neʼe fia fai ia Sosefo, koteʼuhi neʼe “fuafuatatau . . . mo tupulaga.” Pea neʼe tuʼa lahi tana faiga ke ina fakahalaʼi ia Sosefo. Kotea ʼae neʼe tokoni kia Sosefo ke ina teteke ia te fakahala ʼaia? ʼE mahino ia, neʼe ina toʼo he temi moʼo fakakaukauʼi fakatomuʼa ia te ʼu aluʼaga ʼae neʼe feala ke hoko mo kapau ʼe to ki te fakahala. Koia, ʼi te temi ʼae neʼe fa ai te fafine ki tona kofu, neʼe hola ia Sosefo. Neʼe ina ui fenei: “E feafeai anai ke au fai he mea kovi feia kia ia, pea ke au toe agahala ai ki te Atua?”—Senesi 39:6, 9; lau ia Taaga Lea 1:10.

9. ʼE feafeaʼi anai hau teuteu fakatomuʼa moʼo tekeʼi ia te ʼu fakahala?

⁹ Kotea ʼae ʼe tou ako mai te faʼifaʼitaki ʼa Sosefo? ʼI ʼihi temi, ʼe mole tou fia mulimuli ki te ʼu lao ʼa te ʼAtua, kaʼe ʼe tonu ke tou tekeʼi te fakahala ʼaia. Ko ʼihi ʼi muʼa ʼo tanatou liliu ko he kau Fakamoʼoni ʼa Sehova, neʼe tonu ke natou tauʼi te kai fakavale, mo te inu kava fakavale, mo te suluka, mo te fakaʼaogaʼi ʼo te toloke, mo te ʼu felaveʼi fakasino heʼe ʼaoga peʼe ko ʼihi atu aga ʼe kovi. Maʼia pe la ʼi tanatou kua ʼosi papitema, ʼi ʼihi temi ʼe feala pe ke natou toe fia fai te ʼu aga ʼaia. Kapau ʼe hoko he aluʼaga feia kia koe, ʼai muʼa hau kiʼi tuʼu pea ke fakakaukauʼi pe kotea anai ʼae ka hoko ki ʼau felogoʼi mo Sehova moka ʼe ke to ki te fakahala. Faigaʼi ke ke iloʼi fakatomuʼa te ʼu aluʼaga ʼae ʼe feala ke ke to ai ki te fakahala pea mo ke vakaʼi pe ʼe feafeaʼi anai hau tekeʼi ia te ʼu aluʼaga ʼaia. (Pesalemo 26:4, 5; Taaga Lea 22:3) Pea kapau leva ʼe ke felaveʼi mo he aluʼaga ʼe feala ke ke to ai ki te fakahala, faikole kia Sehova ke ina foaki atu ia te poto pea mo te lotololomi, ke feala hau tekeʼi ia te fakahala.

10, 11. (1) Kotea ʼae ʼe hoko ki te tokolahi ʼo te kau tupulaga ʼi te fale ako? (2) Kotea ʼe feala ke tokoni ki te kau tupulaga Kilisitiano moka ʼe mole natou fia mulimuli ʼi ʼihi temi ki te ʼu lao ʼa te ʼAtua?

¹⁰ Ko te aluʼaga ʼae neʼe hoko kia Sosefo, ʼe toe hoko pe ki te tokolahi ʼo te kau tupulaga Kilisitiano ia ʼaho nei. Tou vakaʼi te faʼifaʼitaki ʼo te tuagaʼane ʼe kei finemui ʼe higoa ko Kim. Ko ʼona kaugā ako neʼe natou fakamatala tuʼumaʼu mo laupisiʼi te ʼu felaveʼi fakasino ʼae neʼe natou fai ʼi te fakaʼosi vahaʼa. Kaʼe ko Kim ʼe mole feia ʼana fakamatala. ʼI tana manatu, ko tana mole hage ʼae ko ʼona kaugā ako, ʼe ina logoʼi ai ʼi ʼihi temi tona ‘liʼakina pea mo tana nofo tokotahi.’ Pea ʼe lau e ʼona kaugā ako tona vale ʼuhi ko tana mole fakatahi mo he tahi. Kaʼe, ʼi tona fakahagatonu ʼe aga fakapotopoto ia Kim. Neʼe mahino kia ia, ʼe ko te temi tupulaga ʼae ʼe malohi ai te ʼu fakahala ki te fai ʼo he ʼu felaveʼi fakasino. (2 Timoteo 2:22) Neʼe tau fehuʼi age e ʼihi ʼi te fale ako pe neʼe kei  taupoʼou. Neʼe ko he faigamalie ʼaia kia Kim ke ina fakamahino te tupuʼaga ʼo tana mole fai he ʼu felaveʼi fakasino. ʼE tou fiafia ʼo ʼuhiga mo te kau tupulaga Kilisitiano ʼae ʼe natou fakatotonu ke natou teteke ʼonatou fakaneke ʼae ke natou fai he ʼu felaveʼi fakasino heʼe ʼaoga. Pea ʼe toe fiafia ia Sehova ʼo ʼuhiga mo natou.

¹¹ ʼE tou toe maʼu foki ʼi te Tohi-Tapu ia he ʼu faʼifaʼitaki ʼo ni hahaʼi neʼe natou to ki te fakahala ʼae ko te fai ʼo te ʼu felaveʼi fakasino heʼe ʼaoga. Pea ʼe ha ai te ʼu fua kovi ʼe tou maʼu moka ʼe mole tou lotololomi. Kapau ʼe ke felaveʼi mo he aluʼaga ohage ko ʼae neʼe hoko kia Kim, fakakaukauʼi te aluʼaga ʼae neʼe hoko ki te tupulaga hala ʼatamai ʼae ʼe fakamatala ʼi te kapite 7 ʼo Taaga Lea. Toe fakakaukauʼi age te faʼifaʼitaki ʼo Amone pea mo te ʼu nunuʼa kovi ʼo tana aga. (2 Samuele 13:1, 2, 10-15, 28-32) ʼE feala ki te ʼu matuʼā ke natou tokoni ki ʼanatou fanau ke natou maʼu ia te lotololomi pea mo te poto, ʼaki tanatou faipalalau ki te ʼu faʼifaʼitaki ʼaia lolotoga tanatou ako fakafamili.

12. (1) Neʼe feafeaʼi te lolomi e Sosefo te ʼu meʼa ʼae neʼe ina logoʼi ʼi tona loto ʼo ʼuhiga mo ʼona tehina? (2) Kotea te ʼu aluʼaga ʼe tonu ai ke tou lolomi te ʼu meʼa ʼae ʼe tou logoʼi?

¹² Neʼe ʼi ai te tahi faʼifaʼitaki lelei neʼe tuku mai e Sosefo ʼo ʼuhiga mo te lotololomi. Neʼe ko te temi ʼae neʼe ʼomai ai ʼona tehina ki Esipito moʼo totogi hanatou meʼa kai. Ke feala hana mahino ki ʼanatou manatu, neʼe mole fakaha e Sosefo pe ko ai ia ia. Pea ʼi te temi ʼae neʼe mole kei ina lava fufu ai te ʼu meʼa ʼae ʼi tona loto, neʼe mavae mai ʼona tehina pea alu leva ia ʼo tagi. (Senesi 43:30, 31; 45:1) Kapau ʼe fai atu e he tehina peʼe ko he tuagaʼane he meʼa ʼe ke ita ai, faʼifaʼitakiʼi ia te lotololomi ʼa Sosefo, he ʼe mole ke fai anai he ʼu palalau peʼe ko he meʼa ʼe ke fakahemala ai anai ki ʼamuli. (Taaga Lea 16:32; 17:27) ʼE lagi ʼi ai hou kaiga kua fakamavae. Kapau koia, ʼe ʼaoga anai ke ke lolomi te ʼu meʼa ʼae ʼe ke logoʼi ʼi tou loto, ke mole ke felogoʼi mo ia. ʼE moʼoni, ʼe mole faigafua. Kaʼe ka ke fai te faʼahi ʼaia, ʼe ke faʼifaʼitakiʼi anai te lotololomi ʼa Sehova pea ʼe ke fakalogo anai ki ʼana fakatotonu.

13. Kotea te ʼu ako ʼe feala ke tou taʼofi mai te ʼu aluʼaga ʼae neʼe hoko ki te Hau ko Tavite?

¹³ ʼE tou toe maʼu foki mo te faʼifaʼitaki ʼo te Hau ko Tavite. ʼI te temi ʼae neʼe fakalaga fihi ai Saulo mo Simei kia Tavite, neʼe mole ina fakaʼaogaʼi tona malohi moʼo tauʼi ia naua, he neʼe ina maʼu ia te lotololomi. (1 Samuele 26:9-11; 2 Samuele 16:5-10) Kaʼe neʼe mole maʼu tuʼumaʼu e Tavite ia te lotololomi. ʼAki te Tohi-Tapu, ʼe tou iloʼi ai ia tana agahala mo Pate-Sepa pea mo tona ita ʼae ki te tagata manumanū ko Napale. (1 Samuele 25:10-13; 2 Samuele 11:2-4) ʼE maʼuhiga te ʼu ako ʼae ʼe feala ke tou taʼofi mai te faʼifaʼitaki ʼa Tavite. ʼUluaki, ko te ʼu tehina taupau ʼi te lotolotoiga ʼo te hahaʼi ʼa te ʼAtua, ʼe ʼaoga tafito ke natou maʼu ia te lotololomi ke mole natou fakaʼaogaʼi kovi ia tonatou ʼuhiga pule. Lua, ʼe mole tonu ki he tahi ke falala fau kia ia totonu, ʼo manatu ia ʼe mole to anai ʼi he temi ki te fakahala.—1 Kolonito 10:12.

14. Kotea ʼae neʼe hoko ki te tehina? Pea he koʼe ʼe maʼuhiga ia tatatou aga ʼi te taʼi ʼu aluʼaga ʼaia?

¹⁴ Kotea ʼae ʼe feala ke ke fai ke toe lahi age ia tau lotololomi? Tou vakaʼi te aluʼaga neʼe hoko  kia Luigi. Neʼe fakaʼi te taumuli ʼo tana motoka e te tahi motoka. Logo la neʼe mole ko Luigi ʼae neʼe hala, kaʼe neʼe kalaga pea mo fakalaga fuhu age ki ai te tagata ʼae neʼe hala. Neʼe faikole ia Luigi kia Sehova ke ina maʼu ia te lotololomi pea neʼe ina faigaʼi ke malū ifo te ita ʼo te tagata. Kaʼe neʼe hoko atu pe te kalaga ʼa te tagata. Neʼe tohi e Luigi te higoa pea mo ʼihi atu faʼahi ʼo te assurance ʼa te tagata pea mavae ia ʼo alu kaʼe hoko atu pe te kalaga ʼa te tagata. Hili ki ai te vahaʼa, neʼe toe liliu ia Luigi ʼo ʼaʼahi te fafine neʼe fia logo ki te logo lelei. Pea ko te ʼohoana ʼo te fafine, neʼe ko te tagata ʼae neʼe ina fakaʼi te motoka ʼa Luigi. Neʼe ufiufi ia te tagata pea neʼe faifakalelei age ʼo ʼuhiga mo tana aga. Neʼe ina ui ai, ʼe felogoʼi anai mo te assurance ʼa Luigi ke tupu ai he gaohi fakavilivili ʼo te motoka ʼa Luigi. Neʼe haʼu leva te tagata ʼo kau ki te faipalalau Fakatohi-tapu pea neʼe ina leleiʼia te ʼu manatu ʼae neʼe logo ki ai. Neʼe mahino ai ia Luigi ki te maʼuhiga ʼo tana lotololomi ʼi te hili ʼo te fakaʼi. Pea neʼe toe mahino ai foki ki te ʼu nunuʼa kovi ʼae neʼe feala ke hoko mo ka na pau la neʼe mole lotololomi.—Lau ia 2 Kolonito 6:3, 4.

15, 16. Ko te ako ʼo te Tohi-Tapu ʼe lava tokoni feafeaʼi kia koe mo tou famili ke toe lahi age ia takotou lotololomi?

¹⁵ Ke toe lahi age ia te lotololomi ʼa te kau  Kilisitiano, ʼe tonu ke natou ako tuʼumaʼu pea mo ako loloto ia te Tohi-Tapu. Manatuʼi te ʼu palalau ʼaeni neʼe fai e te ʼAtua kia Sosue: “Ko te tohi ʼaeni ʼo te lao ʼe mole tonu anai ke mamaʼo mai tou gutu, pea ʼe tonu anai ke ke lau leʼo veliveli ʼi te ʼaho mo te po, ke feala hau tokaga ʼo fai ʼo mulimuli kia meʼa fuli ʼae ʼe tohi ai; he ʼe feala ai leva ke ke fakatupu manuʼia ki tou ala pea mo ke aga fakapotopoto.” (Sosue 1:8, MN) Kaʼe ʼe tokoni feafeaʼi atu ia tau ako te Tohi-Tapu ke toe lahi age pea mo ke gaueʼi ia te lotololomi?

¹⁶ ʼAki te ʼu faʼifaʼitaki ʼae ʼi te Tohi-Tapu, neʼe tou ako ai, ʼe fua lelei anai kia tatou moka ʼe tou maʼu ia te lotololomi. Pea kapau ʼe mole tou maʼu ia te lotololomi, ʼe tou tau anai mo he ʼu mamahi. Neʼe fekau e Sehova ke tohi ia te ʼu faʼifaʼitaki ʼaia ʼi te Tohi-Tapu, koteʼuhi ʼe ʼi ai tona tupuʼaga. (Loma 15:4) Pea ʼe ko he aga fakapotopoto hatatou lau, mo ako pea mo metitasio ki te ʼu faʼifaʼitaki ʼaia. Faigaʼi ke ke taʼofi he ʼu ako mai te ʼu faʼifaʼitaki ʼaia maʼa koe mo tou famili. Kole kia Sehova ke tokoni atu ke ke maʼuliʼi ia te ʼu tokoni Fakatohi-tapu. Kapau ʼe ke fakatokagaʼi, ʼe ʼi ai he ʼu faʼahi ʼe ke toto ai ʼo ʼuhiga mo te lotololomi, ʼaua tau fakafifihi kaʼe ke ke fakamoʼoni ki ai. Hili ia, pea ke faikole ʼo ʼuhiga mo te faʼahi ʼaia, mo ke faigaʼi ke toe lahi age ia tau lotololomi. (Sakopo 1:5) Fai hau ʼu fekumi ʼi ʼatatou tohi ke feala ai hau maʼu ia he ʼu tokoni ʼe ʼaoga anai kia koe.

17. ʼE lava tokoni feafeaʼi te ʼu matuʼā ki ʼanatou fanau ke toe lahi age ia tanatou lotololomi?

¹⁷ ʼE feafeaʼi hakotou tokoni ki ʼakotou fanau ke toe lahi age ia tanatou lotololomi? ʼE iloʼi e te ʼu matuʼā, neʼe mole tutupu ʼanatou fanau mo te kalitate ʼaia. Koia la ʼae ʼe ʼaoga ai ke natou akoʼi ki ʼanatou fanau ia te ʼu kalitate ʼaki ʼanatou faʼifaʼitaki. (Efeso 6:4) Kapau ʼe kotou fakatokagaʼi ʼe mole maʼu e takotou fanau ia te lotololomi, kotou vakavakaʼi muʼa pe ʼe kotou tuku ia he faʼifaʼitaki lelei. Kapau ʼe kotou kau tuʼumaʼu ki te faifakamafola, mo te ʼu fono pea mo fai tuʼumaʼu ia te ako famili, ʼe feala ai ke kotou tuku he faʼifaʼitaki lelei. Pea kapau ʼe ʼaoga, ʼaua naʼa kotou tuʼania ʼi te fakafisi ki he meʼa ʼe kole atu e ʼakotou fanau. Ko Sehova neʼe ina fakatuʼu he ʼu tuʼakoi kia Atama mo Eva. Pea neʼe feala pe ke tokoni te ʼu tuʼakoi ʼaia kia naua ke nā fakaʼapaʼapa ki te ʼuhiga pule ʼo Sehova. ʼO toe feia pe, ka fakatonutonuʼi e te ʼu matuʼā ʼanatou fanau pea mo natou tuku he faʼifaʼitaki lelei, ʼe natou akoʼi ai natou ke natou maʼu ia te lotololomi. Pea ko te ʼu faʼahi maʼuhiga ʼaupito ʼae ʼe feala ke kotou akoʼi ki ʼakotou fanau, ʼe ko te ʼofa ki te pule ʼa te ʼAtua pea mo natou fakaʼapaʼapa ki ʼana lao.—Lau ia Taaga Lea 1:5, 7, 8.

18. He koʼe ʼe tonu ke tou filifili lelei ʼotatou kaumeʼa?

¹⁸ Pe ʼe tou maʼu fanau peʼe kailoa, kaʼe ʼe tonu kia tatou fuli ke tou filifili lelei ʼotatou kaumeʼa. Kapau ʼe ʼoʼofa ʼokotou kaumeʼa kia Sehova, ʼe natou uga anai koutou ke kotou fai he ʼu fakatuʼutuʼu ʼe lelei pea ke kotou tekeʼi te ʼu fihifihia. (Taaga Lea 13:20) ʼE kotou fia faʼifaʼitakiʼi anai ia tanatou lotololomi. Pea ʼe mahino ia, ʼe kotou fakalotomalohiʼi anai natou ʼaki ʼakotou aga. Ka tou maʼu ia te lotololomi, ʼe feala ai ke tou maʼu ia te ʼofa ʼo te ʼAtua, mo he maʼuli fiafia pea ke tou vaevae he ʼu meʼa lelei kia natou ʼae ʼe tou ʼoʼofa ai.