Ke Kotou Malo ʼi Te Tau ʼAe ʼe Fakafeagai Ki Tokotou ʼAtamai
ʼE TAUʼI koutou e te fili, ia Satana. Pea ko te mahafu ʼae ʼe ina fakaʼaogaʼi ʼe malohi ʼaupito. Ko te mahafu ʼaia, neʼe faʼu tafito moʼo tauʼi tokotou ʼatamai, kaʼe mole ko tokotou sino. Kotea te mahafu ʼaia? Ko tana fakamafola ia he ʼu loi.
Neʼe iloʼi e te apositolo ko Paulo ʼe fakatupu tuʼutamaki ia te ʼu loi ʼa Satana. Kaʼe neʼe mole ko te kau Kilisitiano fuli ʼae neʼe mahino ki te aluʼaga ʼaia. Ohage la, neʼe lagi manatu e ʼihi kau Kolonito ʼe malohi tanatou tui pea neʼe mole feala ia ke kakaʼi natou e Satana. (1 Kolonito 10:12) Koia ʼae neʼe fai ai e Paulo ia te fakatokaga ʼaeni: “Ohage pe ko te fakahalaʼi ʼo Eva e te gata ʼaki ʼana kaka, ʼe au mataku naʼa ʼulihi ʼokotou ʼatamai ʼo puli ai takotou agatonu pea mo takotou maʼa ʼae ʼe tuha mo Kilisito.”—2 Kolonito 11:3.
ʼE fakaha mai e Paulo te maʼuhiga ʼae ke mole kotou falala fau kia koutou totonu. Pea ke feala hakotou malo ʼi te ʼu loi ʼae ʼe folahi e Satana, ʼe tonu foki ke kotou iloʼi ʼe fakatupu tuʼutamaki pea ke kotou fai he puleʼaki moʼo puipui ʼo koutou mai ai.
ʼE FAKATUPU TUʼUTAMAKI MOʼONI KOA IA TE ʼU LOI?
Ko te ʼu loi ʼe fakaʼaogaʼi moʼo kakaʼi te hahaʼi peʼe moʼo puleʼi tanatou faʼahiga manatu pea mo tanatou aga. Ohage ko tona ui ʼi te tohi (Propaganda and Persuasion), ko te ʼu loi ʼe ko he “aga fakakaka, mo fakatupu tuʼutamaki pea ʼe mole faitotonu.” Pea ka talanoa te hahaʼi ki te ʼu loi ʼaia, ʼe natou ui ko he kakaʼi ʼo he tahi, peʼe ko te puleʼi ʼo te ʼatamai ʼa te hahaʼi.
Ko te ʼu loi ʼe fakatupu tuʼutamaki ʼaupito, koteʼuhi ʼe feala ai ke fetogi mamalie tatatou faʼahiga fakakaukau kaʼe ʼe mole tou fakatokagaʼi. ʼE feala pe ke tou fakatatau te ʼu loi ki he kasa kona ʼe mole feala ke tou sisio mo mamanu ki ai. Ko Vance Packard ʼe ina ako te aga ʼa te hahaʼi neʼe ina ui, ko te ʼu loi ʼe ʼi ai ʼona fua kovi ki tatatou aga kaʼe ʼe mole tou iloʼi. Neʼe
ui e te tahi tagata poto, ʼuhi ko te ʼu loi neʼe fai, neʼe hoko ai te ʼu faifakapo ʼo lahi ai te matea, mo te tau, pea mo te fakatagaʼi ʼo te hahaʼi ʼuhi pe ko tonatou lanu peʼe ko tanatou lotu.—Easily Led: A History of Propaganda.Kapau ʼe lava kakaʼi tatou e te tagata, pea ʼe feafeaʼi age la ia Satana? ʼE ina iloʼi lelei te aga ʼa te hahaʼi talu mai te fakatupu ʼo te tagata. Pea ʼi te temi nei, kua ina puleʼi “te malamanei katoa.” Koia ʼe feala ai ke ina fakaʼaogaʼi ia te ʼu faʼahi fuli ʼo te malamanei moʼo fakamafola ʼana loi. (1 Soane 5:19; Soane 8:44) Neʼe ‘fakapoʼuliʼi e Satana te ʼatamai’ ʼo te hahaʼi kaugā malie ʼaki ʼana loi, ʼo ina ‘fakaheʼi ai te kele katoa.’ (2 Kolonito 4:4; Fakaha 12:9) Kaʼe ʼe feafeaʼi hatatou teteke ʼana loi?
KOTOU FAKAMALOHIʼI TAKOTOU TUI
Neʼe akoʼi mai e Sesu te faʼahiga tauʼi ʼo te ʼu loi. Neʼe ina ui fenei: “Kotou iloʼi . . . te moʼoni, pea ʼe fakaʼateaina anai koutou e te moʼoni.” (Soane 8:31, 32) Ka hoko he tau, ʼe ʼaoga ki he tagata solia ke ina iloʼi pe ʼe ina lava maʼu ʼifea he ʼu logo ʼe moʼoni. Koteʼuhi ʼe faigaʼi anai e te fili ke ina kakaʼi ia ia ʼaki he ʼu loi. Kaʼe kofea koa ʼae ʼe kotou lava maʼu ai he ʼu logo ʼe tuha mo te falala? Neʼe foaki mai e Sehova ia tana Folafola te Tohi-Tapu. ʼE kotou maʼu ai anai ia faʼahi fuli ʼe ʼaoga ke kotou tauʼi te ʼu loi ʼa Satana.—2 Timoteo 3:16, 17.
ʼE iloʼi te faʼahi ʼaia e Satana. Koia ʼae ʼe ina fakaʼaogaʼi ai te malama ʼae ʼe ina puleʼi moʼo fakaleluʼi pea mo fakaneke tatou ke mole tou lau pea ke mole tou ako ia te Tohi-Tapu. ʼAua naʼa kotou to ki “te ʼu puleʼaki [kaka] ʼa te Tevolo.” (Efeso 6:11, nota) Kaʼe ʼe mole gata ʼaki pe tatatou mahino ki te moʼoni. He ʼe tonu foki ke tou faigaʼi ʼo fakamalohiʼi totatou ʼatamai malama ʼo ʼuhiga mo te moʼoni. (Efeso 3:18) Pea ohage pe ko tona ui e te tagata faitohi ko Noam Chomsky, “ ʼE mole feala ki he tahi ke ina fakahu te moʼoni ki totatou ʼatamai. He ʼe tonu ke tou kumi e tatou totonu ia te moʼoni.” Koia “tou kumi e tatou totonu” ʼaki tatatou “vakavakaʼi fakalelei te ʼu Tohi Taputapu ʼi te ʼaho fuli.”—Gaue 17:11.
ʼE mole loto e Satana ke lelei takotou fakakaukau naʼa kotou mahino ki te ʼu moʼoni ʼae ʼe kotou logo ki ai. Kotea tona tupuʼaga? Koteʼuhi ‘ ʼe fua lelei ʼana loi mo kapau ʼe ina fai kia natou ʼae ʼe mole lelei ʼanatou fakakaukau.’ (Media and Society in the Twentieth Century) Kotou fakakaukauʼi lelei te ʼu meʼa fuli ʼae ʼe kotou logo ki ai, kaʼe ʼaua naʼa kotou hoko tui pe. (Taaga Lea 14:15) Neʼe foaki atu e te ʼAtua ia te fealagia fakakaukau ke kotou fakaʼaogaʼi moʼo fakamalohiʼi ia takotou tui.—Taaga Lea 2:10-15; Loma 12:1, 2.
KOTOU FAKATAHI TUʼUMAʼU MO TE HAHAʼI ʼA TE ʼATUA
Kapau neʼe fakalotoʼi ʼihi tagata solia ʼaki he ʼu loi neʼe fai, ʼe natou matataku ai pea mole kei natou fia
kau ki te tau. ʼE toe feala pe foki ke natou fetauʼaki ia natou peʼe mole kei natou fia fakatahi mo te foʼi solia katoa. ʼE ui e te senelale ʼo Siamani, neʼe ko he tahi tupuʼaga ʼaia ʼo te to ʼa te foʼi solia Siamani ʼi te ʼUluaki Tau Fakamalamanei. Neʼe ina ui, ʼi te mulimuli ʼa te hahaʼi ki te ʼu loi ʼae neʼe fai, neʼe hage ia kua puli ʼanatou fakakaukau. Pea ʼe toe fakaʼaogaʼi pe e Satana ia te aluʼaga ʼaia moʼo maumauʼi te logo tahi ʼa te kau Kilisitiano ia ʼaho nei. Ohage la, ʼe ina faigaʼi ke fihi te ʼu tehina mo tuagaʼane. Peʼe ina faigaʼi ke natou manatu neʼe fai e te kautahi ʼa Sehova ia he lakahala peʼe ko he aluʼaga ʼe mole faitotonu, ʼo tupu ai leva hanatou mavae mai te kautahi.Kotou mulimuli ki te ʼu tokoni ʼae ʼe tuʼu ʼi te Folafola ʼa te ʼAtua ke ʼaua naʼa kakaʼi koutou. Pea kotou logo tahi tuʼumaʼu mo ʼokotou tehina mo tuagaʼane. Ohage la, ʼe fakalotomalohiʼi tatou ʼi te Tohi-Tapu ke tou haga “fefakamolemoleʼaki ʼaki he lotolelei” pea ke tou fakatokatoka fakavilivili moka ʼe tou fetokakoviʼaki. (Kolose 3:13, 14; Mateo 5:23, 24) Pea ʼe toe fakatoga mai ʼi te Tohi-Tapu ke ʼaua naʼa tou fakamamaʼo mai te kokelekasio. (Taaga Lea 18:1) Kotou vakavakaʼi ia koutou pe ʼe kotou lava teteke ia te ʼu loi ʼa Satana. Koia kotou fai te fehuʼi ʼaeni: ‘ ʼAki taku aga, neʼe au fakafiafiaʼi koa ia te ʼAtua peʼe ko Satana, ʼi toku fakamamahiʼi e toku tehina peʼe ko toku tuagaʼane?’—Kalate 5:16-26; Efeso 2:2, 3.
KOTOU FALALA TUʼUMAʼU KI TE KAUTAHI ʼA SEHOVA
Ko te tagata solia ʼae ʼe mole agatonu ki tona pule, ʼe mole tau fakamalotoloto anai. Koia ʼae ʼe fakaʼaogaʼi ai e te ʼu fili ia te ʼu loi moʼo pulihi te falala ʼa te kau solia ki ʼonatou pule. Pea kapau ʼe fai e te ʼu pule hanatou lakahala, ʼe fakaʼaogaʼi anai e te ʼu fili te aluʼaga ʼaia pea ʼe natou ui fenei anai: “ ʼE mole feala ke ke falala kia natou” pea “ ʼAua naʼa ke tuku ke natou taki koe ki te malaʼia.” ʼE toe fai feia pe mo Satana. ʼE ina faigaʼi ke ina pulihi takotou falala kia natou ʼae ʼe fakaʼaogaʼi e Sehova moʼo takitaki ia tana hahaʼi.
Kaʼe ʼe kotou puipui feafeaʼi anai ia koutou? Ke kotou haga nonofo ʼi te kautahi ʼa Sehova. Pea ke hoko atu ia takotou agatonu mo lagolago ki te ʼu tagata ʼae ʼe natou takitaki te hahaʼi ʼa te ʼAtua, logo la tonatou ʼuhiga agahala. (1 Tesalonika 5:12, 13) ʼE feala ke tauʼi te kautahi e te kau aposita pea mo natou ʼae ʼe aga fakakaka. (Tito 1:10) Tatau aipe pe ʼe hage mai ʼe moʼoni ʼanatou palalau, kaʼe “ ʼaua naʼa kotou tuku he tahi ke ina haga ʼo fetogi takotou manatu ʼae ʼe totonu.” (2 Tesalonika 2:2) Kotou mulimuli ki te tokoni ʼaeni neʼe fai e te apositolo ko Paulo kia Timoteo: “Ke ke haga mulimuli ki te ʼu meʼa ʼae neʼe ke ako” pea ke ke manatuʼi “te hahaʼi ʼae neʼe natou akoʼi atu te ʼu meʼa ʼaia.” (2 Timoteo 3:14, 15) Kotou fakakaukauʼi te ʼu fakamoʼoni fuli ʼae ʼe feala ke kotou falala ai ki tagata faifekau agatonu ʼae kua teitei taʼu teau tona fakaʼaogaʼi e Sehova moʼo akoʼi mai ia te moʼoni.—Mateo 24:45-47; Hepeleo 13:7, 17.
ʼAUA NAʼA KOTOU MATATAKU
ʼE toe faigaʼi foki e Satana ke ina fakaneke koutou ʼi ʼihi atu aluʼaga. ʼI ʼihi temi, ʼe ina faigaʼi ke ina fakamatakuʼi koutou. Ko te fakamatakuʼi ʼo he tahi, ʼe ko “he tahi pe ʼaia agaaga fai talu mai fualoa moʼo folahi ʼo he ʼu loi.” (Easily Led: A History of Propaganda) Ohage la, neʼe tohi e te Tagata Faiako Pilitania ko Philip M. Taylor, ko te kau Asilia neʼe natou fakamatakuʼi te hahaʼi pea mo folahi he ʼu loi moʼo puleʼi ʼonatou fili. ʼE toe fakaʼaogaʼi pe e Satana ia te mataku ki te tagata, te mataku ki te fakataga pea mo te mataku ki te mate ke kotou fakagata takotou tauhi kia Sehova.—Esaia 8:12; Selemia 42:11; Hepeleo 2:15.
ʼAua naʼa kotou tuku ke malo Satana ia koutou. Neʼe ui fenei e Sesu: “ ʼAua naʼa kotou matataku ia natou ʼae ʼe natou matehi te sino pea ʼosi ʼaia ʼe mole feala ke natou fai he tahi age meʼa.” (Luka 12:4) Kotou tuku katoa takotou falala kia Sehova he ʼe ina fakapapau atu ʼe tokaga anai kia koutou, ʼo ina foaki atu “te malohi makehe.” Pea ʼe tokoni atu anai ke kotou teteke te ʼu ʼohofi ʼa Satana.—2 Kolonito 4:7-9; 1 Petelo 3:14.
ʼE moʼoni, ʼi ʼihi temi ʼe lagi kotou gaʼegagaʼe peʼe kotou matataku. Kaʼe kotou manatuʼi te ʼu palalau fakalotomalohi ʼaeni neʼe fai e Sehova kia Sosue: “Ke ke lototoʼa pea mo malohi. Ke ʼaua naʼa hoha tou loto peʼe ke mataku, koteʼuhi ko Sehova tou ʼAtua ʼe nofo mo koe ʼi te faʼahi fuli pe ʼae ʼe ke alu ki ai.” (Sosue 1:9, MN ) Kapau ʼe kotou loto hoha, kotou foimo faikole kia Sehova ʼo ʼuhiga mo ʼakotou tuʼania. He ʼe feala ke kotou tui papau ko “te tokalelei ʼo te ʼAtua ʼae ʼe maʼoluga age ʼi te ʼu ʼatamai fuli, ʼe ina taupau anai ʼokotou loto pea mo ʼokotou fealagia fakakaukau.” Hili ia, pea ʼe kotou maʼu anai te malohi moʼo teteke ʼo te ʼu loi fuli ʼae ʼe folahi e Satana.—Filipe 4:6, 7, 13.
ʼE kei kotou manatuʼi koa te ʼu loi ʼae neʼe fai e te tagata ʼave logo ʼo te kau Asilia, ia Lapesake, moʼo fakamatakuʼi te hahaʼi ʼa te ʼAtua? Neʼe loto ia ke tui te kau Iselaele ʼe mole feala ki he tahi maʼia mo Sehova ke ina puipui natou mai te kau Asilia. Neʼe ina toe ui foki ko Sehova ʼae neʼe ina fakatotonu ki te kau Asilia ke natou maumauʼi ia Selusalemi. Kaʼe koʼeni te tali ʼa Sehova: “Aua naa ke mataku ki te u palalau ae nee ke logo ki ai, ae nee laukovi ai kia au te u tagata faifekau a te hau o Asilia.” (2 Hau 18:22-25; 19:6) Neʼe fekauʼi ifo leva e Sehova ia he ʼaselo ke ina matehi ia te toko 185 000 kau Asilia ʼi te po pe ʼe tahi.—2 Hau 19:35.
KOTOU FAKAPOTOPOTO ʼO FAKALOGO TUʼUMAʼU KIA SEHOVA
Neʼe kua kotou sioʼi koa he ʼata ʼe kakaʼi ai he tahi kaʼe ʼe mole ina iloʼi? Pea neʼe lagi kotou fia kalaga fenei: ‘Tuku tau tui kia natou he ʼe natou lohiʼi koe. ʼE toe feia pe mo te kau ʼaselo, ʼe hage pe ʼe natou kalaga fenei atu: “ ʼAua naʼa kakaʼi koutou e Satana ʼaki ʼana loi.”
Koia ʼaua naʼa kotou fakalogo ki te ʼu loi ʼae ʼe folahi e Satana. (Taaga Lea 26:24, 25) Kaʼe kotou fakalogo kia Sehova pea mo kotou tuku takotou falala kia te ia ʼi te ʼu meʼa fuli ʼae ʼe kotou fai. (Taaga Lea 3:5-7) ʼE ʼofa Sehova ia koutou, koia kotou tali ia tana fakaafe ʼaeni: “Sioku foha, ke ke poto, pea ke ke fakafiafiai toku loto.” (Taaga Lea 27:11) Kapau ʼe kotou mulimuli ki te ʼu palalau ʼaeni, ʼe kotou malo anai ʼi te ʼu loi ʼae ʼe ina tauʼi tokotou ʼatamai.