1, 2. He koʼe ʼe tonu ke tou vakaʼi pe ʼe feafeaʼi hatatou fakalotofimalieʼi ia natou ʼae ʼe lotomamahi? (Vakaʼi te ʼuluaki pāki.)

NEʼE ui fenei e Susi: “Kua taʼu katoa te mate ʼo tamā tama, kaʼe ʼe kei ma lotomamahi pe.” Ko te tehina neʼe mate fakapunamaʼuli ia tona ʼohoana, neʼe ina ui “neʼe ko he toe kafo” ʼae neʼe tau mo ia. ʼE fakaʼofaʼofa, koteʼuhi ko te tokolahi ʼae ʼe felaveʼi mo te ʼu mamahi feia. ʼI te ʼu kokelekasio, ko te tokolahi ʼi ʼotatou tehina mo tuagaʼane neʼe mole natou ʼamanaki ʼe mamate anai natou ʼae ʼe natou ʼoʼofa mamahi ai ʼi muʼa ʼo Alamaketone. Neʼe lagi kua mate he tahi neʼe kotou ʼoʼofa mamahi ai, peʼe kotou iloʼi he tahi ʼe lotomamahi. Kapau koia, pea ʼe lagi kotou feʼekeʼaki pe ʼe lava maʼu feafeaʼi e he tahi ʼe lotomamahi ia he fakalotofimalie?

² ʼE ui e ʼihi, ʼe feala pe ʼaki te temi ke puli ai te lotomamahi. Kaʼe ʼe mole feia tuʼumaʼu. ʼE ui fenei e te fafine vitua: “ ʼI taku ia manatu, ʼe moʼoni age te ui ʼae, ko te faʼahiga fakaʼaogaʼi ʼo totatou temi ʼae ʼe feala ke puli ai totatou lotomamahi.” Ohage la, ʼe ʼaoga he temi loaloaga ke faitoʼo ai hotatou lavea pea mo tou  tokakaga ki ai. ʼO toe feia pe, ʼe ʼaoga he temi loaloaga ke puli ai totatou lotomamahi, pea ʼe toe ʼaoga foki ke tou maʼu ia he tokoni ʼofa. Kaʼe kotea anai ʼae ka ina fakasiʼisiʼi ia te lotomamahi ʼo he tahi?

3, 4. He koʼe ʼe tou tui papau ʼe mahino ia Sehova ki totatou lotomamahi?

³ Ko tatatou Tamai manavaʼofa ko Sehova, ʼe ina foaki mai te fakalotofimalie ʼae ʼe ʼaoga kia tatou. (Lau ia 2 Kolonito 1:​3, 4.) Ko te faʼifaʼitaki lelei tukupau ia ʼo te lotomahino, pea ʼe ina fakapapau fenei ki tana hahaʼi: “Ko au totonu ʼae ʼe au fakalotofimalieʼi ia koutou.”​—Isaia 51:​12, MN; Pesalemo 119:​50, 52, 76.

⁴ Neʼe toe lotomamahi foki mo tatatou Tamai ʼofa ʼi te mamate ʼo natou ʼae neʼe ʼofa mamahi ai. Ohage la ko Apalahamo, mo Isaake, mo Sakopo, mo Moisese pea mo te Hau ko Tavite. (Numelo 12:​6-8; Mateo 22:​31, 32; Gaue 13:22) ʼE fakaha mai ʼi te Tohi-Tapu, ʼe fakaʼamu ia Sehova ke hoko mai la te ʼaho ʼae ka ina fakatuʼuake ai te ʼu tagata agatonu ʼaia. (Sopo 14:​14, 15) ʼI te temi ʼaia, ʼe natou maʼuʼuli malolo pea mo fiafia anai. Neʼe toe lotomamahi foki ia Sehova ʼi te mate ʼo tona ʼAlo ʼofaina. ʼE ui ʼi te Tohi-Tapu neʼe ʼofa tafito te ʼAtua ia Sesu. (Taʼaga Lea 8:​22, 30, MN ) Pea ʼe mole feala ia ke tou fakafuafua te lotomamahi ʼae neʼe logoʼi e Sehova ʼi tana sio ifo ki te mate fakaʼofaʼofa ʼo tona ʼAlo.​—Soane 5:20; 10:17.

5, 6. ʼE fakalotofimalieʼi feafeaʼi tatou e Sehova?

⁵ ʼE tou iloʼi papau ʼe tokoni mai anai ia Sehova kia tatou. Koia ʼae ʼe tonu ai ke tou faikole tuʼumaʼu mo faʼifaʼitaliha kia te ia. Tou fakaha kia te ia te lotomamahi ʼaupito ʼae ʼe tou logoʼi. Ko tatatou iloʼi ʼae ʼe mahino ia Sehova ki te ʼu meʼa ʼe tou logoʼi, ʼe ko he meʼa fakalotofimalie ia. Pea ʼe ina foaki mai te fakalotofimalie ʼae ʼe ʼaoga kia tatou. Kaʼe ʼe ina fakahoko feafeaʼi te faʼahi ʼaia?

⁶ ʼE fakalotofimalieʼi tatou e Sehova ʼaki ia tona laumalie maʼoniʼoni. (Gaue 9:31) Neʼe fakapapauʼi mai e Sesu, ʼe foaki anai e tatatou Tamai ia tona laumalie maʼoniʼoni kia natou fuli ʼae natou kole age. (Luka 11:13) Ko Susi ʼae neʼe tou talanoa ki ai ʼi muʼa atu, ʼe ina ui fenei: “Neʼe lahi te ʼu lakaga neʼe ma tuʼutuli ai ʼo tagi mamahi kia Sehova ke ina fakalotofimalieʼi maua. Pea ʼi te temi fuli pe, ko te tokalelei ʼo te ʼAtua neʼe ina taupau ʼoma loto pea mo ʼoma ʼatamai.”​—Lau ia Filipe 4:​6, 7.

7, 8. He koʼe ʼe tou iloʼi papau ʼe fakalotofimalieʼi anai tatou e Sesu?

⁷ ʼI te kei nofo ʼa Sesu ʼi te kele, neʼe ina faʼifaʼitakiʼi lelei ia te ʼu kalitate ʼo tana Tamai ʼi ʼana palalau mo ʼana gaue. (Soane 5:19) Neʼe fekauʼi mai e Sehova ia Sesu ki te kele ke haʼu ʼo fakalotofimalieʼi ia natou ʼae ʼe lotomamahi pea mo natou fuli ʼae ʼe putu. (Esaia 61:​1, 2; Luka 4:​17-21) Ko te hahaʼi neʼe natou iloʼi ia te mahino ʼa Sesu ki ʼonatou mamahi pea mo tana fia tokoni kia natou.​—Hepeleo 2:17.

 ⁸ ʼE mahino ia, neʼe ʼi ai he ʼu kaumeʼa lelei pea mo he ʼu kaiga ʼo Sesu neʼe mamate ʼi tana kei tupulaga. Ohage la, ko te tamai tauhi ʼa Sesu ko Sosefo, neʼe lagi mate ia ʼi tana kei tupulaga. * (Vakaʼi te kiʼi nota.) Tou fakafuafua age muʼa ia te faigataʼaʼia ʼae neʼe tau mo te tupulaga lototokaga ʼaia. Neʼe lagi ina katakiʼi ʼona mamahi, ʼo toe feia ki te lotomamahi ʼo tana faʼe mo ʼona tehina mo tuagaʼane.

9. Neʼe fakaha feafeaʼi e Sesu neʼe ina maʼu ia te lotomahino ʼi te mate ʼa Lasalo?

⁹ Lolotoga tana minisitelio, neʼe fakaha lelei e Sesu tana lotomahino ki te hahaʼi. Ohage la, ʼi te mate ʼo tona kaumeʼa lelei ko Lasalo, neʼe logoʼi e Sesu ia te lotomamahi ʼae neʼe logoʼi e Malia pea mo Maleta. Pea ʼi te lahi ʼo tona ʼofa kia naua, neʼe kamata tagi ai, logo la neʼe ina iloʼi ʼe ina fakatuʼuake anai ia Lasalo.​—Soane 11:​33-36.

10. He koʼe ʼe tou tui papau ʼe mahino ia Sesu ki te ʼu meʼa ʼae ʼe tou logoʼi?

¹⁰ ʼE tokoni feafeaʼi mai te ʼu palalau fakalotofimalie ʼae neʼe fai e Sesu ʼi te temi muʼa? ʼE fakaha lelei mai ʼi te Tohi-Tapu ʼe mole fetogi ia Sesu. He ʼe ui fenei ʼi te Tohi-Tapu: “ ʼE heʼeki fetogi ia Sesu Kilisito talu mai ʼanafi ʼo kaku mai ki te ʼaho nei, pea ʼo talu ai.” (Hepeleo 13:8) ʼE ui ʼi te Tohi-Tapu ko Sesu ʼe ko “Ia ʼae neʼe fakanofo ke ina foaki te maʼuli,” koteʼuhi ʼe ina fakafealagia mai kia tatou ke tou maʼu ia te maʼuli heʼe gata. ʼE toe mahino lelei foki ia Sesu ki te ʼu mamahi ʼae ʼe tau mo te hahaʼi. Pea ʼe feala “hana tokoni kia natou ʼae ʼe ʼahiʼahiʼi.” (Gaue 3:15; Hepeleo 2:​10, 18) Koia ʼae ʼe tou tui papau ai ʼe lotomamahi tuʼumaʼu pe ia Sesu moka lotomamahi he tahi. ʼE mahino ki tona lotomamahi pea ʼe feala ia ke ina fakalotofimalieʼi ia ia “ ʼi tona temi totonu.”​—Lau ia Hepeleo 4:​15, 16.

11. Kotea te ʼu vaega ʼe kotou maʼu tafito ai he fakalotofimalie?

¹¹ ʼE lahi te ʼu fakamatala fakalotofimalie ʼe tou maʼu ʼi te Folafola ʼa te ʼAtua ohage ko te fakamatala ʼo ʼuhiga mo te lotomamahi ʼa Sesu ʼi te mate ʼo Lasalo. Pea ʼe mole tou punamaʼuli ai tatou, koteʼuhi “ko te ʼu meʼa fuli ʼae neʼe tohi ʼi te temi muʼa neʼe tohi ia moʼo akoʼi ʼo tatou. ʼE tou maʼu ai he ʼamanaki koteʼuhi ʼe tokoni mai te ʼu Tohi Taputapu ke tou faʼa kataki pea mo foaki mai he fakafimalie.” (Loma 15:4) Kapau ʼe kotou lotomamahi, ʼe toe feala pe foki mo koutou ke kotou maʼu he fakalotofimalie ʼi te ʼu vaega ʼaeni:

• “E ovi [ia Sehova] kia natou ae e loto fasifasi, pea e ina fakamauli natou ae e loto mamahi.”​—Pesalemo 34:​19, 20.

• “Kapau e lahi te u tuania ia au o hage e hahai kaugamalie, ko au fakapelepele e natou fakafiafiai . . . [“ia au,” MN ].”​—Pesalemo 94:19.

• “Ko te ʼAtua tatatou Tamai ʼe ʼofa ia tatou, pea ʼuhi ko tona ʼofa makehe ʼe ina foaki mai kia tatou he fakafimalie heʼe gata pea mo he ʼamanaki. ʼE matou faikole kia Ia pea mo totatou ʼAliki ko Sesu Kilisito ke nā fakafimalieʼi ʼokotou loto pea ke nā fakamalohiʼi koutou.”​—2 Tesalonika 2:​16, 17. *​—Vakaʼi te kiʼi nota.

12. ʼE tou lava fakalotofimalieʼi feafeaʼi ia natou ʼae ʼe lotomamahi?

¹² ʼE toe lava maʼu e natou ʼae ʼe lotomamahi ia he fakalotofimalie ʼi te loto kokelekasio. (Lau ia 1 Tesalonika 5:11.) ʼE feafeaʼi hatatou fakamalohiʼi mo fakalotofimalieʼi ia natou ʼae ʼe “loto mamahi”? (Taaga Lea 17:22) Tou manatuʼi ʼe ʼi ai he “temi ke fakalologo ai, pea mo he temi ke palalau ai.” (Ekelesiasi 3:7) ʼE fakamahino e te fafine vitua ʼe higoa ko Dalene, ʼe ʼaoga kia natou ʼae ʼe lotomamahi ke natou fakaha ʼanatou manatu pea mo te ʼu meʼa ʼae ʼe natou logoʼi. Koia, ko te faʼahi maʼuhiga ʼaupito ʼae ʼe tou lava fai, ko tatatou fagono lelei kia natou kaʼe mole tou tuʼusi ʼanatou palalau. Ko Junia ʼae neʼe fakamate ia tona tokolua, ʼe ina ui fenei: “Tatau aipe pe ʼe lagi mole kotou mahino katoa ki tonatou lotomamahi, kaʼe ko te meʼa ʼae ʼe maʼuhiga ko takotou fia mahino ki te ʼu meʼa ʼae ʼe natou logoʼi.”

13. Kotea ʼae ʼe tonu ke tou manatuʼi ʼo ʼuhiga mo te lotomamahi?

¹³ ʼE tonu ke tou manatuʼi ʼe kehekehe ʼatatou manatu pea mo tatatou faʼahiga fakaha totatou lotomamahi. ʼI ʼihi temi, ʼe faigataʼa hatatou fakamahino ia te mamahi ʼae ʼe tou logoʼi. ʼE ui fenei ʼi te Folafola ʼa te ʼAtua: “E iloi e te loto ona mamahi totonu, pea e mole feala ke kau he tahi kehe i ona fiafia.” (Taaga Lea 14:10) Maʼia pe la moka fakaha e he tahi ia te ʼu meʼa ʼae ʼe ina logoʼi, kaʼe ʼe mole mahino tuʼumaʼu ʼihi ki te ʼu meʼa ʼae ʼe fia palalau ki ai.

14. Kotea te ʼu palalau fakalotofimalie ʼe feala ke tou fai kia natou ʼae ʼe lotomamahi?

¹⁴ ʼI ʼihi temi ʼe mole tou iloʼi pe ʼe kotea ʼae ka tou ui ki he tahi ʼe lotomamahi. Kaʼe ʼe ui ʼi te Tohi-Tapu “ko te ʼalelo ʼo te kau popoto ʼe ina fakamalolo ia.” (Taʼaga Lea 12:​18, MN ) Ko te tokolahi neʼe natou maʼu ʼi te kaupepa lahi Mokā Mate He Tahi ʼe Tou ʼOfa Mamahi Ai ia he ʼu palalau fakalotofimalie ke natou vaevae mo ʼihi. * (Vakaʼi te kiʼi nota.) Kaʼe ʼi ʼihi temi, ko te meʼa ʼae ʼe lelei tafito ke tou fai ko tatatou “fetagihi mo natou ʼae ʼe fetagihi.” (Loma 12:15) Ko te tuagaʼane ʼe higoa ko Gaby ʼae kua mate tona ʼohoana, ʼe ina ui, ʼi ʼihi temi ʼe ina fakaha te ʼu meʼa ʼae ʼe ina logoʼi ʼaki pe ia tana tagi. Pea ʼe ina toe ui fenei: “Ko te tupuʼaga la ʼaia ʼo taku lotofimalie moka fetagihi ʼoku kaumeʼa pea mo au. He ʼe ʼi te ʼu lakaga ʼaia, ʼe mole au lotomamahi tokotahi ai.”

15. Kapau ʼe faigataʼa hatatou fakalotofimalieʼi he tahi, kotea ʼae ʼe feala ke tou fai? (Vakaʼi mo te fakamatala ʼae ʼi te ʼa takai “He ʼu Palalau Fakalotofimalie.”)

¹⁵ ʼE moʼoni, ʼi ʼihi temi ʼe faigataʼa takotou fai he ʼu palalau moʼo fakalotofimalieʼi he tahi. Koia ʼae ʼe lagi lelei age ke kotou momoli ki ai he kiʼi kate peʼe ko he tohi, peʼe kotou faitohi ki ai ʼi te Neti peʼe ʼi te telefoni. ʼE feala pe ke kotou talanoa ʼo ʼuhiga mo he ʼu vaega fakalotomalohi. Peʼe kotou palalau ki he kalitate, peʼe ki he aluʼaga fakafiafia ʼo ʼuhiga mo ia ʼae kua mate. ʼE ui fenei e Junia: “Ka mo moli mai e he tahi ia he ʼu palalau fakalotomalohi peʼe loto ke ina fakaʼaogaʼi hona kiʼi temi kia au, ʼe mole au maʼu he kupu feʼauga moʼo fakaha ia toku fiafia. Pea ʼe au logoʼi ai toku ʼofainaʼi pea mo te tokaga mai ʼa ʼihi kia au.”

16. Kotea te tokoni lelei ʼe feala ke tou foaki kia natou ʼae ʼe lotomamahi?

¹⁶ ʼE feala ke tou tokoni ki ʼotatou tehina mo tuagaʼane ʼae ʼe lotomamahi ʼaki te faikole. ʼE feala pe ke tou hufakiʼi natou peʼe ke tou faikole fakatahi mo natou. ʼE moʼoni, ʼe feala ke faigataʼa hatatou faikole mo kapau ʼe tou fia fetagihi, kaʼe ko tatatou faikole fakamalotoloto ʼe ko he toe fakalotofimalie anai ia. ʼE ui fenei e Dalene: “ ʼI te ʼu temi ʼae ʼe ʼomai ai te ʼu tuagaʼane ʼo fakalotofimalieʼi au, ʼe au kole age pe ʼe natou lotolelei la ke natou fai he kole. ʼI te kamata ʼo tanatou faikole ʼe faigataʼa. Kaʼe tuʼumaʼu pe ʼe natou hoko atu te faikole ʼaki he lotomalohi pea mo tonatou loto katoa. Ko te malohi ʼo tanatou tui, mo tonatou ʼofa pea mo tanatou lototokaga, neʼe ko he toe fakalotomalohi ia ki taku tui.”

17-19. He koʼe ʼe ʼaoga ke tou fakalotofimalieʼi tuʼumaʼu ia natou ʼae ʼe lotomamahi?

¹⁷ ʼE mole feala ke tou iloʼi ia te loaloaga ʼo te lotomamahi ʼa he tahi. Ka lotomamahi he tahi ʼuhi ko te mate ʼo he tahi neʼe ʼofa mamahi ai, ʼi te kamata ʼe ʼomai ʼona kaumeʼa mo ʼona kaiga ʼo fakalotofimalieʼi ia ia. Pea hili ia, ʼe natou toe liliu pe anai ki tonatou maʼuli mahani, kaʼe ʼe kei ʼaoga aipe ke fakalotofimalieʼi ia ia ʼae ʼe mamahi. Koia, ʼae ʼe ʼaoga ai ke tou fakaha tatatou fia tokoni. “Ko he kaumeʼa moʼoni ʼe ʼofa ia ʼi te temi fuli pe, pea ʼe ko he tehina neʼe tupu ki te ʼu ʼaho  mamahi.” (Taʼaga Lea 17:​17, MN ) Kaʼe ʼe tou fakalotofimalieʼi anai ia natou ʼae ʼe lotomamahi ʼi te ʼu temi fuli pe ʼae ʼe ʼaoga ai kia natou he fakalotofimalie.​—Lau ia 1 Tesalonika 3:7.

¹⁸ ʼAua naʼa galo kia tatou, ʼe feala pe ki he tahi ke lotomamahi ʼi he temi pe. Ohage la, ʼe lagi ina manatuʼi ia ia ʼae kua mate, ʼi te ʼu temi ʼo te ʼu ʼaho fakamanatu, peʼe ʼuhi ko he musika, peʼe ko he ʼu pāki, peʼe ko he ʼu gaue, peʼe ko hana mamanu ki he meʼa, peʼe ko hana logo ki he meʼa, peʼe ko he fasiga taʼu. Ko he tahi kua vitua, ʼe feala anai ke lotomamahi ʼi tana ʼuluaki kau tokotahi ki he fakatahi lahi peʼe ko te ʼAho Fakamanatu. ʼE fakamatala fenei e te tehina: “Neʼe au iloʼi lelei pe ʼe au lotomamahi ʼaupito anai ʼi te ʼaho fakamanatu ʼo toma ʼohoana, kaʼe kua mate. Kaʼe neʼe fakatuʼutuʼu e ʼihi tehina mo tuagaʼane ia he kiʼi kai tahi mo ʼoku kaumeʼa lelei ke mole au nofo tokotahi ai ʼi te ʼaho ʼaia.”

¹⁹ Tou manatuʼi, ʼe mole tonu pe ke tou fakalotomalohiʼi ia natou ʼae ʼe lotomamahi ʼi te ʼu aluʼaga ʼaia. He ʼe ui fenei e Junia: “ ʼI te ʼu temi pe la ʼae ʼe mole ʼi ai he ʼu ʼaho fakamanatu, ʼe au fiafia ʼosi moka tokoni mai ʼihi pea mo natou kaugā nonofo mo au. Pea ko te ʼu lakaga ʼaia, ʼe maʼuhiga kia au he ʼe au maʼu ai he fakalotofimalie.” ʼE moʼoni, ʼe mole feala ke tou pulihi tonatou lotomamahi peʼe ko tanatou logoʼi tanatou nonofo tokotahi. Kaʼe ʼe feala pe hatatou fakalotofimalieʼi natou ʼaki te fai ʼo he kiʼi meʼa maʼa natou. (1 Soane 3:18) ʼE ui fenei e Gaby: “ ʼE au lotofakafetaʼi ʼaupito kia Sehova ʼi te kaugā mamahi fakatahi ʼa te kau tagata ʼafeā pea mo au ʼi te ʼu temi fuli ʼae neʼe faigataʼa ai taku haʼele ki muʼa. Neʼe natou tokoni mai ke au logoʼi ia te tokaga ʼofa ʼa Sehova kia au.”

20. He koʼe ʼe ko he fakalotofimalie lahi ia te ʼu fakapapau ʼa Sehova?

²⁰ Ko tatatou iloʼi ʼae ka haga anai ia Sehova, te ʼAtua ʼo te fakalotofimalie ʼo pulihi ia te ʼu mamahi fuli ʼi te temi ʼo te fakatuʼuake, ʼe ko he toe fakalotofimalie ia. (Soane 5:​28, 29) ʼE fakapapauʼi mai e te ʼAtua “ ʼe ina pulihi anai te mate ʼo talu ai, pea ko te Tuʼi ʼAliki ko Sehova ʼe ina holoholoʼi anai te ʼu loʼimata ʼi te ʼu fofoga fuli pe.” (Isaia 25:​8, MN ) Pea, ʼe mole tou toe fetagihi anai “mo natou ʼae ʼe fetagihi,” kaʼe ʼe tou fakafiafia fuli anai “mo natou ʼae ʼe fakafiafia.”​—Loma 12:15.