Kotou Kumi Ia Te ʼu Koloa Moʼoni
“Kotou maʼu hokotou ʼu kaumeʼa ʼaki te ʼu koloa heʼe faitotonu.”—LUKA 16:9.
KATIKO: 32, 154
1, 2. He koʼe ʼe ʼi ai tuʼumaʼu pe anai he hahaʼi masisiva ʼi te tuʼu ʼo te ʼu faʼahiga meʼa ʼaeni?
IA ʼAHO nei, kua lahi te agakovi pea mo te heʼe faitotonu ʼi te maʼuli fakaekonomika. Ohage la, kua faigataʼa ki te kau tupulaga te maʼu ʼo hanatou gaue. ʼE tali e ʼihi ke tuʼutamakiʼia ʼonatou maʼuli ʼo natou olo ai ki te ʼu fenua koloaʼia. Kaʼe maʼia pe la ʼi te ʼu fenua ʼaia, kua lahi ai te hahaʼi masisiva. ʼI te malamanei katoa, kua ʼasili koloaʼia pe te hahaʼi koloaʼia, kaʼe kua ʼasili masisiva pe te hahaʼi masisiva. Pea ʼe lau, ko te lahi ʼo te ʼu koloa ʼo ʼihi ʼae ʼe koloaʼia, kua tatau pe ia mo te lahi ʼo te ʼu koloa ʼa te hahaʼi fuli ake ʼae. ʼO ha lelei mai, ʼe kaugā malie age pe anai te hahaʼi masisiva ʼi te hahaʼi koloaʼia ʼi te kele. Pea neʼe fakamoʼoni ia Sesu ki te faʼahi ʼaia ʼi tana ui fenei: “ ʼE nonofo tuʼumaʼu pe te kau masisiva mo koutou.” (Maleko 14:7) Kaʼe he koʼe koa ʼe hoko te aluʼaga ʼaia?
2 Neʼe iloʼi e Sesu, ko te maʼuli faikoloa ʼo te malama ʼaeni, ʼe puli anai ia moka hoko mai te Puleʼaga ʼo te ʼAtua. ʼE fakaha ʼi te Tohi-Tapu, ko “te hahaʼi fakatau koloa,” peʼe ko te maʼuli faikoloa, mo te faʼahi fakapolitike pea mo fakalotu, ʼe kau ia ki te malama ʼa Satana. (Fakaha 18:3) Kua mavae te hahaʼi ʼa te ʼAtua mai te faʼahi fakapolitike pea mo te lotu hala. Kaʼe, ko te tokolahi ia natou ʼe mole heʼeki natou mavae katoa mai te maʼuli faikoloa ʼo te malama ʼa Satana.
3. Kotea te ʼu fehuʼi ʼae ka tou vakaʼi anai?
3 Ko tatou Kilisitiano, ʼe tonu ke tou vakaʼi pe ʼe feafeaʼi tatatou faʼahiga manatu ʼo ʼuhiga mo te faʼahi faikoloa ʼo te malama. Koia ʼe lelei ai ke tou fai te ʼu fehuʼi ʼaeni: ‘ ʼE feafeaʼi anai haku fakaʼaogaʼi ʼoku koloa moʼo fakaha ia taku nofo agatonu ki te ʼAtua? Kotea ʼe tonu ke au fai ke mole au maʼumaʼua fau ʼi te malama faikoloa ʼaeni? Kotea te ʼu aluʼaga ia ʼaho nei ʼe ha ai te falala katoa ʼa te hahaʼi ʼa te ʼAtua kia te ia?’
TE TAGATA TAUHI ʼAPI HEʼE AGATONU
4, 5. (1) Kotea ʼae neʼe hoko ki te tagata tauhi ʼapi? (2) Kotea ʼae neʼe uga e Sesu ke fai e ʼana tisipulo?
4 Lau ia Luka 16:1-9. ʼE tonu ke tou fakakaukauʼi fuli te fakamatala ʼa Sesu ʼo ʼuhiga mo te tagata tauhi ʼapi heʼe agatonu. Neʼe tukugakoviʼi ia ia ko he tagata maumau koloa pea neʼe fakatotonu ai e tona pule ke ina fakamavae ia ia. * (Vakaʼi te kiʼi nota.) Kaʼe neʼe “aga fakapotopoto” ia te tagata tauhi ʼapi. He ʼe ʼi muʼa ʼo tana mavae ʼi tana gaue, neʼe ina maʼu hona ʼu kaumeʼa ke feala anai hanatou tokoni age ki ʼamuli. Neʼe mole fai e Sesu ia te fakamatala ʼaia ke faʼifaʼitakiʼi e ʼana tisipulo ia te hahaʼi ʼo te malama. He ʼe ko te hahaʼi ʼaia, ʼe natou heʼe agatonu ke feala ai hanatou taupau ʼonatou maʼuli. Kaʼe, neʼe fakaʼaogaʼi e Sesu ia te fakamatala ʼaia ke tou taʼofi mai ai ia he ako maʼuhiga.
5 Ko te tagata tauhi ʼapi neʼe tau mo he aluʼaga faigataʼa neʼe hoko fakapunamaʼuli. Pea neʼe iloʼi e Sesu ʼe toe feia pe anai mo te tokolahi ʼi ʼana tisipulo. ʼE faigataʼa anai hanatou taupau tonatou maʼuli ʼi te malama heʼe faitotonu ʼaeni. Koia ʼae neʼe ina uga fenei ai ia natou: “Kotou maʼu hokotou ʼu kaumeʼa ʼaki te ʼu koloa heʼe faitotonu.” ʼE fakalotomalohiʼi tatou ʼi te ʼu palalau ʼaeni ke tou kaumeʼa mo Sehova pea mo Sesu ʼaki ʼotatou koloa. Kotea tona tupuʼaga? He ʼe ʼi te temi ʼae ʼe puli ai te ʼu koloa ʼaia, ko ʼotatou kaumeʼa ia Sehova pea mo Sesu, ʼe nā tali anai tatou “ ʼi te ʼu nofoʼaga heʼe gata.” Kotea te ako ʼe tou taʼofi mai te tokoni ʼa Sesu?
6. ʼE tou iloʼi feafeaʼi neʼe mole kau te maʼuli faikoloa ʼo te temi nei ki te fakatuʼutuʼu ʼa te ʼAtua?
6 Neʼe mole fakamahino e Sesu pe koʼe neʼe ina fakahigoa ia te ʼu koloa ko te ʼu koloa “heʼe faitotonu.” Kaʼe ʼe ha lelei mai ʼi te Tohi-Tapu, ko te tanaki ʼae ke lahi hakita foʼi falā neʼe mole kau ia ʼi te fakatuʼutuʼu ʼa te ʼAtua. Ohage la, ko te ʼu meʼa ʼae neʼe foaki e Sehova kia Atama mo Eva neʼe lahi age ia ʼi te ʼu meʼa ʼae neʼe ʼaoga kia naua ʼi te ʼoloto ʼo Eteni. (Senesi 2:15, 16) Pea ki muli age, ʼi te temi ʼae neʼe foaki ai e te ʼAtua ia tona laumalie maʼoniʼoni ki ʼana fakanofo, “neʼe mole he tahi ia natou neʼe ʼi ai hana meʼa neʼe ina lau ʼaʼana, kaʼe neʼe natou fakatahiʼi ʼonatou koloa fuli.” (Gaue 4:32) Neʼe ui e te polofeta ko Esaia, ʼe ʼi ai anai he temi ʼe maʼu noa anai e te hahaʼi fuli ia te ʼu fua ʼo te kele. (Esaia 25:6-9; 65:21, 22) Kaʼe ʼi muʼa ʼo te hoko mai ʼo te temi ʼaia, ʼe tonu anai ke “aga fakapotopoto” te ʼu tisipulo ʼa Sesu. ʼE tonu anai ke natou taupau ʼonatou maʼuli ʼaki te ʼu koloa heʼe faitotonu ʼo te malama ʼaeni. Pea ʼe tonu foki ke natou faigaʼi ke natou fakafiafiaʼi te loto ʼo te ʼAtua.
TE FAKAʼAOGAʼI FAKAPOTOPOTO ʼO TE ʼU KOLOA HEʼE FAITOTONU
7. Kotea te tokoni neʼe foaki mai e Sesu ia Luka 16:10-13?
7 Lau ia Luka 16:10-13. Ko te tagata tauhi ʼapi ʼi te fakamatala ʼa Sesu neʼe ina maʼu hona ʼu kaumeʼa neʼe feala ke natou tokoni age kia ia. Kaʼe, neʼe loto e Sesu ke maʼu e ʼana tisipulo honatou ʼu kaumeʼa ʼi te lagi pea ke mole natou manatu pe kia natou totonu. ʼE fia fakamahino mai e Sesu, ko tatatou faʼahiga fakaʼaogaʼi ʼotatou koloa heʼe faitotonu, ʼe feala ai ke ha pe ʼe tou nonofo agatonu ki te ʼAtua. ʼO feafeaʼi?
8, 9. Kotea te ʼu faʼifaʼitaki ʼe ha ai te agatonu ʼa ʼihi ʼi tanatou fakaʼaogaʼi ʼonatou koloa heʼe faitotonu?
8 ʼE ʼi ai te aluʼaga ʼe tou fakaha ai ʼe tou agatonu ki te ʼAtua ʼaki ʼotatou koloa. Ko tatatou foaki he meʼa ʼofa ki te gaue faifakamafola fakamalamanei ʼae neʼe fakakikite e Sesu. (Mateo 24:14) Ohage la, ko te kiʼi taʼahine ʼe maʼuli ʼi Initia neʼe mole kei ina toʼo hana ʼu meʼa gaoʼi. Koteʼuhi neʼe ina tanaki ʼana foʼi piesi ki te kiʼi puha. Pea ʼi te kua fonu leva ʼo te kiʼi puha, neʼe ina foaki te falā katoa ke fakaʼaogaʼi ki te gaue faifakamafola. Ko te tehina ʼi Initia ʼe ina fakatau te ʼu niu matuʼu. Pea ʼi tana mole loto ʼae ke totogi e te fale faifakaliliu ʼo Malayalam hanatou ʼu niu matuʼa, neʼe foaki ai e te tehina te ʼu niu matuʼu ki te fale faifakaliliu. He ʼe ʼi tana manatu ʼe lelei age tana foaki he ʼu foʼi niu matuʼu ʼi tana foaki he foʼi falā. Ko te “aga fakapotopoto” ʼaia. ʼO toe feia pe mo te ʼu tehina ʼo Keleka, ʼe natou foaki tuʼumaʼu pe ki te Petele ia te lolo oliveto, mo te folomasi pea mo te tahi atu ʼu meʼa kai.
9 Ko te tahi tehina neʼe ina fakagafua ke fai te ʼu fono mo te ʼu fakatahi lalahi ʼi tona moʼi kele ʼi Sri Lanka. Pea neʼe toe maʼuʼuli ʼi ai mo natou ʼe kau ki te selevisi temi katoa. Ko he sakilifisio fakapaʼaga lahi ʼaia neʼe fai e te tehina, pea ʼe ko he toe tokoni ia ki te kau faifakamafola ʼae ʼe mole lahi tanatou foʼi falā. ʼI te tahi fenua ʼae ʼe tapuʼi ai te gaue faifakamafola, ʼe fai te ʼu fono ʼi te ʼu ʼapi ʼo te ʼu tehina. Pea ʼe feala ai ki te kau pionie pea mo natou ʼae ʼe mole lahi tanatou foʼi falā ke natou maʼu honatou fakatahitahiʼaga ʼe mole totogi.
ʼE fakaʼaogaʼi e te hahaʼi ʼa te ʼAtua ʼonatou koloa moʼo tokoni ki ʼihi
10. Kotea te ʼu fua lelei ʼe tou maʼu moka ʼe tou lotofoaki?
10 ʼE ha mai ʼi te ʼu faʼifaʼitaki ʼaia, ko te hahaʼi ʼa te ʼAtua ʼe natou “agatonu ʼi te ʼu meʼa ʼae ʼe liliki.” (Luka 16:10) ʼE natou fakaʼaogaʼi ʼonatou koloa moʼo tokoni ki ʼihi. Pea kotea te manatu ʼa te ʼu kaumeʼa ʼaia ʼa Sehova ʼo ʼuhiga mo te ʼu sakilifisio ʼae ʼe natou fai? ʼE natou fiafia ʼaupito, he ʼe natou iloʼi ko te temi ʼae ʼe natou lotofoaki ai, ʼe natou maʼu te ʼu koloa “moʼoni” ʼae ʼi te lagi. (Luka 16:11) Ko te tuagaʼane ʼe ina foaki tuʼumaʼu he foʼi falā moʼo tokoni ki te gaue ʼo te Puleʼaga, ʼe ina ui, ʼaki te temi neʼe hoko te aluʼaga makehe kia ia. ʼE ina fakamahino fenei: “ ʼI te lahi ʼo taku lotofoaki, neʼe toe lahi ai mo taku agalelei. Neʼe toe lahi ai taku lotofakamolemole, taku faʼa kataki, taku tali ia te ʼu tokoni pea neʼe au galoʼi te ʼu lakahala ʼae ʼe fai mai kia au.” Koia ko te tokolahi neʼe natou mahino ki te fua lelei ʼo te maʼuliʼi ʼo te lotofoaki.—Pesalemo 112:5; Taaga Lea 22:9.
11. (1) ʼE tou fakaha feafeaʼi ʼe tou “aga fakapotopoto” moka tou lotofoaki? (2) Kotea ʼae ʼe hoko ʼi te lotolotoiga ʼo te hahaʼi ʼa te ʼAtua ia ʼaho nei? (Vakaʼi te ʼuluaki pāki.)
11 ʼE tou toe “aga fakapotopoto” foki moka ʼe tou fakaʼaogaʼi ʼotatou koloa moʼo tokoni ki ʼihi ʼi te minisitelio. Pea tatau aipe pe ʼe mole feala ke tou kau ki te selevisi temi katoa peʼe ke tou olo ki te ʼu potu fenua ʼae ʼe ʼaoga lahi ai he kau faifakamafola, kaʼe ʼe feala pe ke tou foaki he tokoni. (Taaga Lea 19:17) Ohage la ʼaki ʼatatou meʼa ʼofa, ʼe feala ki te ʼu fenua masisiva ʼae ʼe lahi ai te tali ʼo te moʼoni, ke natou maʼu te ʼu tohi pea ʼe toe feala ai ke tou lagolago ki te gaue faifakamafola. ʼI te ʼu fenua ohage ko Congo, mo Madagascar, pea mo Rwanda, ʼe totogi kovi ʼaupito ia te ʼu Tohi-Tapu. ʼI ʼihi temi, ko te totogi ʼo he Tohi-Tapu ʼe tatau pe ia mo te li totogi ʼa he tahi ʼe gaue ʼi he vahaʼa katoa peʼe ko he mahina katoa. Koia lolotoga ni taʼu, neʼe tonu ai ke filifili e te ʼu tehina pe ʼe natou totogi he meʼa kai maʼa ʼonatou kiʼi famili, peʼe ko he Tohi-Tapu. Kaʼe ʼi te temi leva ʼaeni, kua fakaliliu pea mo tufa noa e te kautahi ʼa Sehova te ʼu Tohi-Tapu ki te ʼu famili fuli pea mo natou ʼe natou ako ia te Tohi-Tapu. Pea ʼe feala ke hoko te aluʼaga ʼaia ʼuhi pe ko te ʼu meʼa ʼofa ʼae ʼe fai e te tokolahi pea mo te “vaevae fakatatau” ʼo te ʼu meʼa ʼofa ʼaia. (Lau ia 2 Kolonito 8:13-15.) Koia, ko natou ʼae ʼe foaki ʼo feia kia natou ʼae ʼe maʼu, ʼe feala ke natou liliu ko he ʼu kaumeʼa ʼa Sehova.
ʼE FEAFEAʼI ANAI HATATOU MOLE MAʼUMAʼUA FAU ʼI TE MALAMA FAIKOLOA ʼAENI?
12. Neʼe fakaha feafeaʼi e Apalahamo ia tana falala ki te ʼAtua?
12 Kapau ʼe mole tou maʼumaʼua fau ʼi te malama faikoloa ʼaeni, kaʼe tou kumi te ʼu koloa “moʼoni,” ʼe toe feala ai foki ke tou liliu ko he ʼu kaumeʼa ʼa Sehova. Ko te faʼahi ʼaia neʼe fai e te tagata agatonu ko Apalahamo. Neʼe fakalogo ia kia Sehova pea neʼe mavae mai te kolo koloaʼia ʼo Ulu ke alu ʼo maʼuli ʼi te ʼu fale la, koteʼuhi neʼe fia kaumeʼa ia mo Sehova. (Hepeleo 11:8-10) Neʼe ina tuku tuʼumaʼu ia tana falala ki te ʼAtua, kaʼe mole ki te ʼu koloa. (Senesi 14:22, 23) Neʼe toe fakalotomalohiʼi foki ʼihi e Sesu ke natou faʼifaʼitakiʼi ia te tui ʼae neʼe maʼu e Apalahamo. ʼI te tahi ʼaho, neʼe ina ui fenei ki te tupulaga maʼu koloa: “Kapau ʼe ke loto ke ke haohaoa, alu ʼo fakatau ʼou koloa pea ke foaki ki te kau masisiva, pea ʼe ke maʼu anai he koloa ʼi selo, pea ke haʼu ʼo mulimuli mai ia te au.” (Mateo 19:21) Neʼe mole maʼu e te tupulaga ʼaia ia te tui ʼae neʼe maʼu e Apalahamo. Kaʼe neʼe ʼi ai ʼihi hahaʼi neʼe natou tui ki te ʼAtua.
13. (1) Kotea te tokoni neʼe foaki e Paulo kia Timoteo? (2) ʼE tou lava maʼuliʼi feafeaʼi te tokoni ʼa Paulo ia ʼaho nei?
13 Ko Timoteo neʼe tui ki te ʼAtua. Neʼe fakahigoaʼi e te apositolo ko Paulo ia Timoteo ko “he tagata solia lelei ʼa Kilisito Sesu.” Pea hili ʼaia, neʼe ina ui fenei kia Timoteo: “Ko he tahi ʼe hu ki te solia ʼe mole ina fai he tahi age gaue moʼo taupau tona maʼuli, koteʼuhi ʼe ina loto ke leleiʼia ia ia e te tagata ʼae neʼe ina fakahu ia 2 Timoteo 2:3, 4) Ia ʼaho nei, ko te ʼu tisipulo ʼa Sesu ʼae ʼe kau ai te toko tahi miliona tupu ʼu tehina mo tuagaʼane ʼo te selevisi temi katoa, ʼe natou faiga malohi ke natou maʼuliʼi te tokoni ʼaia ʼa Paulo. ʼE natou tekeʼi te fakahaha ʼo te ʼu koloa ʼo te malama manumanū ʼaeni. Pea ʼe natou manatuʼi te pelesepeto ʼaeni: “E pule te tagata mau koloa ki te kau masiva, pea ko ia ae e too maua e popula kia ae nee too maua ai.” (Taaga Lea 22:7) ʼE loto e Satana ke tou fakaʼaogaʼi totatou temi mo totatou malohi ki te maʼuli faikoloa ʼo tona malama. Ko ʼihi ʼe natou toʼo maʼua moʼo totogi ʼaki honatou ʼapi, he motoka, peʼe ko he faiʼohoana. Kapau ʼe mole tou tokakaga, ʼe feala pe ke tou tuʼu maʼua lolotoga he ʼu taʼu. ʼE tou aga fakapotopoto anai moka ʼe tou maʼuli fakafeʼauga, moka mole tou toʼo maʼua pea moka tou fakaʼaogaʼi lelei tatatou foʼi falā. Pea kapau ʼe tou fai feia, ʼe tou tauhi ʼateaina anai ki te ʼAtua kaʼe mole tou popula ki te malama faikoloa ʼaeni.—1 Timoteo 6:10.
ia.” (14. Kotea ʼae ʼe tou fakatotonu ke tou fai? Kotou tuku mai he ʼu faʼifaʼitaki.
14 Ke feala hatatou taupau totatou maʼuli fakafeʼauga, ʼe tonu ke tou fakamuʼamuʼa te Puleʼaga ʼo te ʼAtua. Ko te taumatuʼa neʼe ʼi ai tanā matani gaue neʼe haʼele lelei. Kaʼe neʼe nā toe fia toʼo tanā selevisi temi katoa. Neʼe nā fakatau ai tanā matani gaue, mo tanā vaka pea mo ʼihi atu koloa. Pea nā olo ai ʼo tokoni ki te laga ʼo ʼotatou pilo lalahi ʼi Warwick, ʼi New York. Neʼe ko he aluʼaga makehe kia naua, koteʼuhi neʼe nā gaue fakatahi ai ʼi Petele mo tanā taʼahine mo tona ʼohoana lolotoga ni vahaʼa. Pea neʼe natou gaue fakatahi foki mo te ʼu matuʼā ʼa te tehina ʼae neʼe ina fakatau tana matani gaue. Ko te tuagaʼane ʼe pionie ʼi Colorado ʼi Amelika, neʼe gaue kogaʼi ʼaho pe ia ʼi te fale paʼaga. ʼI te lelei ʼo tana gaue, neʼe kole age e ʼona patolo pe ʼe mole fia gaue ʼaho katoa. Pea ʼe toe hiki ai foki mo tona totogi ʼo liuga tolu. Kaʼe neʼe mole loto ki ai totatou tuagaʼane, he ʼe mole toe feala ai anai ke ina fakahoko tana minisitelio. Koia ʼe lahi te ʼu faʼifaʼitaki ʼo te ʼu kaugana ʼa Sehova neʼe natou fai he ʼu sakilifisio feia. Ka tou fakatotonu ke tou fakamuʼamuʼa ia te Puleʼaga, ʼe tou fakaha ai ʼe maʼuhiga kia tatou ia tatatou fakakaumeʼa mo te ʼAtua. Pea ʼe tou toe fakaha ai ʼe maʼuhiga age kia tatou ia te ʼu koloa moʼoni ʼi te ʼu koloa fakamalama.
MOKA PULI TE ʼU KOLOA
15. Kotea te ʼu koloa ʼae ʼe tou maʼu ai te fiafia?
15 Ka tou maʼu koloa, ʼe mole fakaʼuhiga leva ʼe tou maʼu tuʼumaʼu pe te ʼofa ʼo te ʼAtua. ʼE tapuakinaʼi e Sehova ia natou ʼae ʼe natou “fai he ʼatu ʼu gaue ʼe lelei.” (Lau ia 1 Timoteo 6:17-19.) Ohage la, neʼe logo te tuagaʼane ʼe higoa ko Lucia neʼe ʼaoga he kau faifakamafola ʼi Albanie. * (Vakaʼi te kiʼi nota.) Koia neʼe mavae ai mai Italia ʼi te taʼu 1993. Neʼe mole ʼi ai hana gaue, kaʼe neʼe falala ia ʼe tokaga anai ia Sehova kia ia. Neʼe ina ako ia te lea ʼo Albanie pea neʼe tokoni ki te toko 60 tupu hahaʼi ke natou foaki ʼonatou maʼuli kia Sehova. ʼE moʼoni, ʼe mole tatau anai te ʼu fua lelei ʼae ʼe tou maʼu fuli ʼi te faifakamafola. Kaʼe ko te ʼu meʼa fuli ʼae ʼe tou fai moʼo tokoni ki te hahaʼi ke natou iloʼi ia Sehova pea ke natou liliu ko ʼona kaumeʼa, ʼe maʼuhiga anai kia tatou ʼo talu ai.—Mateo 6:20.
ʼE tou fiafia moʼoni anai ʼi te ʼu gaue ʼae ʼe tou fai maʼa Sehova mo tona Puleʼaga
16. (1) Kotea ʼae ka hoko ki te faʼahi fakaekonomika? (2) ʼE tonu anai ke feafeaʼi tatatou faʼahiga manatu ʼo ʼuhiga mo te ʼu koloa?
16 Neʼe fakaha lelei e Sesu, ko te maʼuli fakaekonomika ʼe puli anai. He neʼe ina ui ‘ka puli ia te ʼu koloa,’ kaʼe neʼe mole ina ui ‘mo kapau ʼe puli te ʼu koloa.’ (Luka 16:9) ʼI te ʼu ʼaho fakamuli ʼaeni, kua pupunu ʼihi fale paʼaga pea ko ʼihi fenua kua faigataʼaʼia ʼaupito te faʼahi fakaekonomika. Kaʼe ʼe kei toe age la tona ia kovi ʼi te ʼu taʼu pe ʼaeni ka haʼu. Ko te faʼahi fakapolitike, mo te faʼahi fakalotu pea mo te faʼahi fakaekonomika ʼo te malama ʼa Satana ʼe puli anai ia. Neʼe tala fakatomuʼa e te ʼu polofeta ko Esekiele mo Sofoni, ko te aulo pea mo te siliva ʼae ʼe maʼuhiga ʼi te faʼahi fakaekonomika, ʼe mole ʼi ai anai hona ʼuhiga. (Esekiele 7:19; Sofoni 1:18) Pea kotea anai ka tou logoʼi moka ʼe kua tou matutuʼa, neʼe tou sakilifisioʼi te ʼu koloa moʼoni ke tou maʼu te ʼu koloa heʼe faitotonu ʼo te malama ʼaeni? ʼE lagi tou hage anai ko he tagata neʼe gaue ʼi tona maʼuli katoa ke lahi tana falā, kaʼe neʼe fakaha age leva ki ʼamuli ko tana paʼaga katoa neʼe ko he falā loi. (Taaga Lea 18:11) Ko te ʼu koloa ʼo te malama ʼaeni ʼe puli anai. Koia tou fakaʼaogaʼi ia te ʼu faigamalie fuli ke tou maʼu hotatou ʼu kaumeʼa ʼi te lagi ʼaki ʼotatou koloa. Pea ʼe tou fiafia moʼoni anai ʼi te ʼu gaue ʼae ʼe tou fai maʼa Sehova mo tona Puleʼaga.
17, 18. Kotea ʼae ʼe fakaʼamu ki ai ia te ʼu kaumeʼa ʼo te ʼAtua?
17 ʼI te temi ʼae ka hoko mai ai te Puleʼaga, ʼe mole toe ʼi ai anai he tahi ʼe toʼo maʼua peʼe ina totogi hona ʼapi. ʼE mahu anai te meʼa kai pea ʼe tou kai noa anai. Pea ʼe mole toe ʼaoga anai ke tou totogi he ʼu toketa peʼe ko he ʼu faitoʼo. ʼE maʼu anai e te ʼu kaumeʼa ʼa Sehova ia te ʼu fua lelei tukupau ʼo te kele. Ko te aulo, mo te siliva pea mo te ʼu maka maʼuhiga ʼe fakaʼaogaʼi pe anai ʼuhi ko tonatou matalelei, kaʼe mole fakaʼaogaʼi anai moʼo fakakoloaʼia he tahi. ʼE maʼu gafua pe anai te ʼu ʼakau ʼae ʼe lelei, mo te ʼu maka pea mo te ukamea moʼo laga ʼaki he ʼu fale matalelei. Pea ʼe fia tokoni moʼoni mai anai ʼotatou kaumeʼa, he ʼe natou loto ki ai kaʼe mole ke totogi natou. Pea ʼe tou vaevae anai te ʼu fua ʼo te kele.
18 Ko he kiʼi koga pe ʼaia ʼo te fakapale fakaofoofo ka maʼu e natou ʼae ʼe natou kumi honatou ʼu kaumeʼa ʼi te lagi. Pea ʼe kalaga fakafiafia anai te ʼu kaugana ʼa Sehova ʼi te kele ʼi te temi ʼae ʼe natou logo ai ki te ʼu palalau ʼaeni ʼa Sesu: “Kotou ʼomai, ia koutou ʼae neʼe tapuakiʼi e taku Tamai, kotou maʼu te Puleʼaga ʼae neʼe teuteuʼi maʼa koutou talu mai te kamataʼaga ʼo te malamanei.”—Mateo 25:34.
^ pal. 4 Neʼe mole ui e Sesu pe neʼe moʼoni peʼe kailoa te tukugakoviʼi ʼo te tagata tauhi ʼapi. Ko te kupu “tukugakoviʼi” ʼae ʼe tuʼu ia Luka 16:1, ʼe feala ke fakaʼuhiga, ko he tahi neʼe faifasituʼu ʼo ʼuhiga mo te tagata tauhi ʼapi. Kaʼe ʼe fakatokagaʼi tafito e Sesu ia te faʼahiga aga ʼa te tagata tauhi ʼapi, kaʼe mole ko te ʼu tupuʼaga ʼo tona fakamavae ʼi tana gaue.
^ pal. 15 ʼE tou maʼu te hisitolia ʼo te maʼuli ʼo Lucia Moussanett ʼi te Réveillez-vous ! ʼo te ʼaho 22 ʼo Sunio 2003, pasina 18-22.