Ka filifili e te kau Kilisitiano pe ʼe feafeaʼi anai te puipui mo te haofaki ʼo tonatou maʼuli, ʼe natou mulimuli anai ki te ʼu pelesepeto Fakatohi-tapu. Pea ʼe fakaha ʼi te ʼu pelesepeto ʼaia, ʼe mole tonu ke fakaʼaogaʼi e te kau Kilisitiano ia te ʼu mahafu ohage la ko te fana, te pikinini peʼe ko ʼihi atu, moʼo puipui tonatou maʼuli mai ʼihi age tagata. Tou fakakaukauʼi age muʼa te ʼu manatu ʼaeni:

Ko te maʼuli ʼo te tagata ʼe taputapu kia Sehova. Neʼe tohi fenei e te tagata faipesalemo ko Tavite ʼo ʼuhiga mo Sehova: “E ia koe te matapuna o te mauli.” (Pesalemo 36:10) Koia, kapau ʼe fia puipui e he Kilisitiano ia tona maʼuli peʼe ko ʼona koloa, ʼe tokaga anai naʼa ina liligi te toto. Ko tona fakaʼuhiga, ʼe mole ina fai anai he meʼa ʼe feala ai ke mate ai he tahi.​—Tetelonome 22:8; Pesalemo 51:⁠16.

Ko meʼa fuli ʼae ʼe fakaʼaogaʼi e he tahi moʼo haofaki tona maʼuli, ʼe feala ia ke iku ki he faifakapo. Kaʼe, ʼe faigafua te matehi ʼo he tahi ʼaki he fana, tatau aipe pe ʼe pa hala te fana pe neʼe tou fakatuʼutuʼu ki ai. * (Vakaʼi te kiʼi nota.) Pea ko te tagata ʼae ʼe ina fia ʼohofi he tahi, ʼe lagi kua lotohoha pea mo mataku. Koia, kapau ʼe sio te tagata ʼaia ki he fana, ʼe lagi ʼaʼasili kovi anai te aluʼaga ʼaia pea ʼe feala ai pe ke mate he tahi.

ʼI te po ʼi muʼa ʼo tana mate, neʼe ui e Sesu ki ʼana tisipulo ke natou tahi maʼu hana heleta. Kaʼe neʼe mole ina ui age te faʼahi ʼaia ke feala ai hanatou puipui ʼonatou maʼuli. (Luka 22:​36, 38) Neʼe loto ia e Sesu ke natou taʼofi te ako ʼaeni: ʼE mole tonu ke agamalohi ʼana tisipulo, tatau aipe pe ʼe natou felaveʼi mo he hahaʼi kaugā malie ʼe toʼo mahafu. (Luka 22:52) ʼI te ʼosi taʼi e Petelo ia te kaugana ʼa te pelepitelo lahi ʼaki tana heleta, neʼe fakatotonu fenei age e Sesu kia Petelo: “Toe ʼai tau heleta ki tona ʼaiʼaga.” Pea neʼe fakaha leva e Sesu ia he pelesepeto ʼe ina takitaki te kau Kilisitiano fuli. Neʼe ina ui fenei: “Ko natou fuli ʼae ʼe natou toʼo te heleta ʼe natou mamate anai ʼi te heleta.”​—Mateo 26:​51, 52.

Ohage ko tona ui ia Mikea 4:​3, ko te hahaʼi ʼa te ʼAtua ʼe natou fai “aki anatou heleta ni huo mataloa pea aki anatou tao ni hele tuusi fulumeto.” ʼE iloʼi e te hahaʼi ko te kau Kilisitiano moʼoni ʼe natou manako ki te tokalelei. ʼE natou fakalogo ki te ʼu fakatotonu neʼe foaki age e te ʼAtua ʼaki ia te apositolo ko Paulo ʼae ke ʼaua naʼa natou “liufaki ki he tahi te kovi ʼaki te kovi” kaʼe ke natou “maʼuʼuli ʼi te tokalelei mo te hahaʼi fuli pe.” (Loma 12:​17, 18) Logo la neʼe tau ia Paulo mo te ʼu faigataʼaʼia mo te ʼu tuʼutamaki “mai te hahaʼi kaihaʼa,” kaʼe neʼe mole ʼi ai he temi neʼe fakafeagai ai ki te ʼu pelesepeto ʼo te Tohi-Tapu moʼo puipui tona maʼuli. (2 Kolonito 11:26) Kaʼe, neʼe falala ia ki te ʼAtua. Pea neʼe mahino kia ia, ko te ʼu tokoni fakapotopoto ʼae ʼe tou maʼu ʼi te Tohi-Tapu ‘ ʼe ʼaoga age ia ʼi te ʼu mahafu tau.’​—Ekelesiasi 9:⁠18.

ʼE maʼuhiga age ki te kau Kilisitiano ia te maʼuli ʼi te ʼu koloa. ʼE tou iloʼi ko te maʼuli ʼo te tagata “ ʼe mole fakalogo . . . ki te ʼu koloa ʼae ʼe ina maʼu.” (Luka 12:15) Koia, kapau ʼe tou palalau ʼaki he agamalū ki he tagata kaihaʼa ʼe ʼi ai hana fana kaʼe mole fakalogo mai, tou mulimuli ki te tokoni ʼaeni ʼa Sesu: “ ʼAua naʼa kotou fakatutuʼu ki he tahi ʼe agakovi.” Ko tona fakaʼuhiga, ʼe lagi tonu ke tou tuku ke ina toʼo te ʼu meʼa ʼae ʼe loto ki ai. (Mateo 5:​39, 40; Luka 6:29) * (Vakaʼi te kiʼi nota.) ʼE mahino ia, ʼe  mole tou loto ke fanahi tatou e te hahaʼi faifakapo. Kapau ʼe mole tou fakahaha ʼotatou koloa kaʼe tou mulimuli ki te ʼu tokoni Fakatohi-tapu, ʼe mole tou tuʼutamakiʼia ai anai. (1 Soane 2:16) Pea ʼe ko he puipui anai kia tatou mo kapau ʼe iloʼi e ʼotatou vahaʼa fale ko tatou ko he kau Fakamoʼoni ʼa Sehova ʼe maʼuʼuli ʼi te tokalelei.​—Taaga Lea 18:⁠10.

ʼE fakaʼapaʼapa te kau Kilisitiano ki te leʼo ʼo loto ʼo ʼihi. (Loma 14:21) ʼE punamaʼuli anai peʼe tukia anai ʼihi tehina mo tuagaʼane, mo kapau ʼe natou iloʼi ʼe maʼu e ʼonatou tehina hanatou fana moʼo puipui tonatou maʼuli. ʼE lagi fakagafua e te lao ke tou maʼu hatatou fana, kaʼe ʼuhi ko totatou ʼofa ʼi ʼotatou tehina mo tuagaʼane, ʼe mole tou fia fakatupu tukia anai kia natou ʼi he temi.​—1 Kolonito 10:​32, 33; 13:​4, 5.

Ko te kau Kilisitiano ʼe natou faiga ke natou tuku he faʼifaʼitaki lelei ki ʼihi. (2 Kolonito 4:2; 1 Petelo 5:​2, 3) Kapau ʼe maʼu e he Kilisitiano hana fana moʼo puipui tona maʼuli mai ʼihi tagata, ʼe tokoni anai te kau tagata ʼafeā ki ai ʼaki te Tohi-Tapu. Kaʼe kapau ʼe ina haga taupau te fana, ʼe mole ko he faʼifaʼitaki lelei anai ia. Koia, ʼe mole feala anai ke maʼu hona ʼu pilivilesio ʼi te kokelekasio. ʼE toe fakaʼuhiga te aluʼaga ʼaia ki te Kilisitiano ʼae ʼe fealuʼaki mo hana fana ʼi tana gaue. ʼE lagi lelei age ke ina kumi hana tahi gaue. *​—Vakaʼi te kiʼi nota.

ʼE tonu ke filifili e he Kilisitiano pe ʼe ina puipui feafeaʼi anai ia ia, mo tona famili, mo ʼona koloa pea mo tana gaue. Kaʼe ko te ʼu tonu ʼaia, ʼe ina fakatafito anai ki te ʼu pelesepeto Fakatohi-tapu. Neʼe foaki mai e te ʼAtua ia te ʼu pelesepeto ʼaia kia tatou he ʼe ʼofa ia tatou. Koia, ko te kau Kilisitiano ʼae ʼe natou maʼu he ʼu felogoʼi lelei mo Sehova, ʼe mole natou taupau anai hanatou ʼu fana moʼo puipui ʼonatou maʼuli mai ʼihi tagata. ʼE mahino kia natou, kapau ʼe natou falala ki te ʼAtua pea mo fakalogo ki te ʼu pelesepeto Fakatohi-tapu ʼi tonatou maʼuli, ʼe natou maʼu anai te maʼuli fimalie moʼoni ʼo talu ai.​—Pesalemo 97:10; Taaga Lea 1:33; 2:​6, 7.