1. Kotea ʼae ʼe tou fiafia ai?

ʼE TOU fiafia ʼaupito moka tou logo ʼe tuku e te ʼu kaugana ʼa te ʼAtua ke mu tonatou malama. ʼI te taʼu ʼaeni kua hili, neʼe takitaki e te hahaʼi ʼa Sehova ni ako Tohi-Tapu ʼe 10 miliona tupu. Pea ko te toko lauʼi miliona hahaʼi foʼou neʼe natou ʼomai ki te ʼAho Fakamanatu ʼo te mate ʼo Kilisito pea mo natou mahino ai ki te meʼa ʼofa ʼae neʼe foaki e Sehova moʼo totogi ʼaki ʼatatou agahala.—1 Soane 4:9.

2, 3. (1) Ke tou hage “ko he ʼu malama” ʼe mu, kotea ʼae ʼe mole tonu ke ina taʼofi te faʼahi ʼaia? (2) Kotea ʼae ka tou vakaʼi anai ʼi te alatike ʼaeni?

² ʼE lahi te ʼu lea kehekehe ʼe palalauʼi e te kau Fakamoʼoni ʼa Sehova ʼi te malamanei katoa. Kae logo la te faʼahi ʼaia, ʼe tou fakavikiviki kia Sehova ohage pe ko he famili ʼe tahi mo logo tahi. (Fakaha 7:9) ʼE feala pe ke tou hage “ko he ʼu malama ʼi te malamanei” tatau aipe pe kotea te lea ʼe tou palalauʼi, mo te koga meʼa ʼe tou maʼuli ai.—Filipe 2:15.

³ ʼE tou fakakololiaʼi ia Sehova moka tou faifakamafola, moka  tou logo tahi, moka tou faʼafai ʼi tatatou tauhi. ʼE feafeaʼi hatatou tuku ke mu totatou malama ʼi te ʼu aluʼaga ʼaia ʼe tolu?—Lau ia Mateo 5:14-16.

4, 5. (1) Kotea te tahi ʼu aluʼaga ʼe tou tuku ai ke mu totatou malama ʼi tuʼa atu ʼo te faifakamafola? (2) Kotea te ʼu fua lelei mo kapau ʼe tou agalelei ki te hahaʼi? (Vakaʼi te ʼuluaki pāki.)

⁴ Ka tou faifakamafola mo fai ni tisipulo ʼe ko he faʼahi maʼuhiga ke tou tuku ai ke mu totatou malama. (Mateo 28:19, 20) Neʼe ui ʼi te alatike “La lumière dans les ténèbres” ʼo Te Tule Leʼo (fakapilitania) ʼo te ʼaho 1 ʼo Sunio 1925, lolotoga te ʼu ʼaho fakamuli, ʼe mole feala anai ke nofo agatonu he tahi ki te ʼAliki mo kapau ʼe “mole ina tuku ke mu tona malama.” Pea ʼe toe ui fenei: “ ʼE mu tona malama moka ina tala te logo lelei ki te hahaʼi fuli ʼo te kele pea mo maʼuli ʼo mulimuli ki te malama ʼaia.” Koia ʼe tou fakakololiaʼi ia Sehova ʼaki tatatou faifakamafola pea toe kau ai mo tatatou aga. Tokolahi ʼe natou sioʼi tatou moka tou faifakamafola. Pea ka tou malimali mo tou fakamalo age kia natou, ʼe natou maʼu ai he manatu ʼe lelei ʼo ʼuhiga mo tatou pea mo te ʼAtua ʼae ʼe tou tauhi ki ai.

⁵ Neʼe ui fenei e Sesu ki ʼana tisipulo: “Ka kotou hu ki he loto fale, kotou fakamalo kia natou ʼo te loto fale.” (Mateo 10:12) Ko te ʼu koga meʼa ʼae neʼe faifakamafola ai Sesu, neʼe ko tanatou agamahani te fakaafe ʼo te ʼu matapule ki tonatou ʼapi. Kae ʼe lahi te ʼu fenua ia ʼaho nei ʼe mole kei natou fai te faʼahi ʼaia. Tokolahi te hahaʼi ʼe natou tuʼania peʼe natou iita moka natou sisio ki he matapule ʼe alu age ki tonatou ʼapi. Kae kapau ʼe tou agalelei pea mo aga fakakaumeʼa, ʼe feala ke siʼisiʼi ifo tanatou tuʼania. Neʼe kua kotou tokagaʼi pe, ka kotou failaupapa ia muʼa ʼo te kaugā malie, mo matamalimali pea mo fakamalo ki te hahaʼi, ʼe natou fia ʼomai ʼo toʼo hanatou tohi. Pea ʼe toe feala pe ke natou fia faipalalau mo koutou.

6. Kotea ʼae neʼe fai e te taumatuʼa kua vaivavai ke hoko atu tanā faifakamafola?

⁶ Ko te taumatuʼa ʼi Pilitania ʼe mole kei feala hanā olo ʼo faifakamafola ʼi te ʼu ʼapi ʼuhi ko te vaivai matuʼā pea kua nā mahamahaki. Koia neʼe nā fakatuʼu ai hanā laupapa ʼi tonā muʼa ʼapi. ʼE tuʼu ovi tonā ʼapi ki he fale ako. Koia neʼe nā hili ai te ʼu tohi ʼae ʼe fia lau anai e te ʼu matuʼā ʼae ʼe ʼomai ʼo toʼo ʼanatou fanau. Ko ʼihi matuʼā neʼe natou toʼo te ʼu tohi ʼaia, pea mo te ʼu tohi Les jeunes sʼinterrogent. Réponses pratiques, Tohi 1 mo te 2. Neʼe ʼi ai te tuagaʼane pionie neʼe tautau fakatahi age ki te taumatuʼa. Pea neʼe tokagaʼi e te ʼu matuʼā te agalelei ʼa te tuagaʼane pea mo te loto moʼoni ʼa te taumatuʼa ke nā tokoni ki te hahaʼi. Koia neʼe tali ai e te tamai ke fai hana ako Tohi-Tapu.

7. ʼE feafeaʼi hakotou tokoni kia natou ʼae neʼe feholaki mai tonatou fenua?

⁷ Mole faʼa fualoa ki ai, tokolahi neʼe natou feholaki mai tonatou fenua pea kua natou maʼuʼuli nei ʼi he fenua matapule. Kotea ʼae ʼe feala ke kotou fai kia natou ʼaia ke feala hanatou  ako ʼo ʼuhiga mo Sehova? ʼUluaki, ʼe feala ke kotou ako pe ʼe feafeaʼi te fakamalo age ʼi tanatou lea. ʼE feala ke kotou fakaʼaogaʼi te JW Language, ke kotou ako ni kupuʼi palalau, ke tupu ai hanatou fia faipalalau mo koutou. ʼE feala ke kotou fakaha age te ʼu ʼata viteo peʼe ko te ʼu tohi ʼi tanatou lea, ʼae ʼe kua maʼu ʼi tatatou tuʼasila ʼi te Neti jw.org.—Tetelonome 10:19.

8, 9. (1) He koe ʼe ʼaoga te ʼu fono ʼo te vahaʼa? (2) ʼE lava tokoni feafeaʼi te ʼu matuʼā ke hikihiki e ʼanatou fanau te lelei ʼo tanatou faitali ʼi te ʼu fono?

⁸ ʼE foaki mai e Sehova ia te ʼu meʼa gaue fuli ʼae ʼe ʼaoga ki te faifakamafola. Ohage la ʼe tou ako ʼi te ʼu fono ʼo te vahaʼa ke tou lotomalohi ke tou olo ʼo toe ʼaʼahi te hahaʼi pea mo kamata he ʼu ako Tohi-Tapu.

⁹ Ka ʼomai te hahaʼi ki ʼatatou fono, ʼe natou punamaʼuli moka natou logo ki te ʼu tali ʼae ʼe fai e te ʼu fanau. ʼE feala ke tou akoʼi ʼatatou fanau ke natou fakaʼaogaʼi ʼanatou faʼahiga palalau mahani moka natou faitali. Neʼe ʼi ai ʼihi hahaʼi neʼe natou fia ako te moʼoni talu tanatou logo ki te fakaha e te ʼu tamaliki tanatou tui ʼaki ʼanatou faitali.—1 Kolonito 14:25.

10. Kotea te ʼaoga ʼo te ako fakafamili ki te logo tahi ʼo te ʼu famili?

¹⁰ Ka tou faiga ke tou akoʼi totatou famili ke natou gaue ʼi te logo tahi pea mo te tokalelei, ʼe tou fakakololiaʼi ai ia Sehova. Ohage la ko koutou ʼu matuʼā, kotou faiga ke kotou fakahoko takotou Ako Fakafamili ʼi te vahaʼa fuli. Tokolahi te ʼu famili ʼe natou sioʼi fakatahi te JW Télédiffusion pea mo natou faipalalau ki te  ʼu ako neʼe natou maʼu mai ai. Kotou manatuʼi ʼe mole tatau te akoʼi ʼo te kiʼi fanau ʼe kei veliveli pea mo he tupulaga. Kotou faiga fakamalotoloto ke kotou tokoni kia natou fuli ʼo tokotou loto fale ke natou maʼu ni fua lelei mai te ako fakafamili.—Pesalemo 148:12, 13.

11-13. ʼE tou lava tokoni feafeaʼi ki te kokelekasio ke malohi age tatatou logo tahi?

¹¹ Tatau aipe pe ʼe kei ke tupulaga, kae ʼe feala pe ke ke fakalotomalohiʼi he tahi ʼo te kokelekasio. Ohage la, ʼe feala ke ke fakakaumeʼa mo te ʼu tehina mo tuagaʼane kua vaivavai. Kotou fakalavelave age kia natou pe ʼe kotea ʼae neʼe tokoni kia natou ke natou tauhi kia Sehova lolotoga ni taʼu. ʼE feala ke natou tuku atu he ʼu tokoni ʼe ʼaoga. ʼE feala ai ke natou maʼu ni fakalotomalohi ʼo feia pea mo koe. Ko tatou fuli, pe ʼe kei tou tupulaga peʼe kua tou matuʼa, kae ʼe feala pe ke tou fakatalitali lelei te hahaʼi fuli ki ʼatatou fono. ʼE feala pe ke tou fakamalo age kia natou, mo malimali pea mo tokoni kia natou ke natou maʼu honatou hekaʼaga, peʼe ke tou ʼave natou ʼo fakafelaveʼi mo ʼotatou tehina mo tuagaʼane. Kotou faiga ke natou fiafia ʼi te fakatahi mo tatou ʼi ʼatatou fono.

¹² Kapau ʼe hinoʼi koe ke ke taki te fono ki te faifakamafola, ʼe feala ke ke tokoni kia natou kua vaivavai ke mu tuʼumaʼu tonatou malama. Tokaga ke natou maʼu hanatou telituale. Kotou faiga ke faifakamafola te kau tupulaga mo natou ʼaia. ʼI te agamahani, ko ʼotatou tehina mo tuagaʼane ʼae kua matuʼa mo mahamahaki ʼe natou lotovaivai, koteʼuhi ʼe mole kei feala hanatou faifakamafola ohage ko te temi muʼa. Kae ʼe fiafia ʼonatou loto moka ʼe ke tokagaʼi natou pea mo mahino ki ʼonatou aluʼaga. Tatau aipe tonatou taʼu, peʼe kua fualoa tanatou ʼi te moʼoni, kae kapau ʼe ke agalelei mo natou ʼe natou lotomalohi anai ʼo hoko atu tanatou faʼafai ʼi te faifakamafola.—Levitiko 19:32.

¹³ Neʼe fiafia te kau Iselaele ʼi tanatou tauhi fakatahi kia Sehova. Neʼe tohi fenei e te tagata faipesalemo: “Koeni, io! e lelei aupito, e fakafimalie osi ki ni tehina ke nonofo fakatahi!” (Lau ia Pesalemo 133:1, 2.) Neʼe ina fakata ia te logo tahi ki te lolo ʼae ʼe liligi ki te ʼulu ʼo he tahi ʼe fakanofo ki he tuʼulaga. Ko te lolo ʼaia ʼe ina fakafimalieʼi te kili pea mo fakamagoni. ʼO toe feia pe, ʼe feala ke tou fakafimalieʼi te loto ʼo ʼotatou tehina mo tuagaʼane mo kapau ʼe tou agalelei mo natou. Kapau ʼe tou fai feia ʼe toe malohi age anai te logo tahi ʼo te kokelekasio. ʼE feala koa ke kotou iloʼi lelei age ʼokotou tehina mo tuagaʼane ʼo te kokelekasio?—2 Kolonito 6:11-13.

14. ʼE feafeaʼi hakotou fakamu tokotou malama ʼi he koga meʼa pe ʼe kotou maʼuʼuli ai?

¹⁴ ʼE feala pe ke mu tokotou malama ʼi he koga meʼa pe ʼe kotou maʼuʼuli ai. Kapau ʼe kotou agalelei ʼe feala ke tupu ʼi ʼokotou vahaʼa fale ia tanatou fia mahino kia Sehova. Kotou tahi fai te ʼu fehuʼi ʼaeni: ‘Kotea te manatu ʼo ʼoku vahaʼa fale ʼo ʼuhiga mo au? ʼE maʼa koa pea mo matalelei toku ʼapi? ʼE tokagaʼi koa e ʼoku vahaʼa fale? ʼE au agalelei koa mo tokoni ki ʼoku vahaʼa fale?’ Kotou fakafehuʼi ʼokotou tehina mo tuagaʼane pe neʼe malave feafeaʼi  tanatou agalelei pea mo tanatou faʼifaʼitaki lelei ki tonatou famili, ʼonatou vahaʼa fale, ʼonatou kaugā gaue, peʼe ko ʼonatou kaugā ako.—Efeso 5:9.

15. He koʼe ʼe tonu ke tou nonofo ʼalaʼala?

¹⁵ Kapau ʼe tou loto ke mu tuʼumaʼu totatou malama, ʼe tonu ke tou mahino lelei ki te temi ʼae ʼe tou maʼuʼuli ai. Neʼe tautau ui fenei e Sesu ki ʼana tisipulo: “Ke kotou nonofo ʼalaʼala.” (Mateo 24:42; 25:13; 26:41) Kapau ʼe tou manatu heʼeki vave hoko mai te “mamahi lahi,” ʼe mole tou lamalama anai te ʼu faigamalie fuli ʼae ke tou tokoni ki te hahaʼi ke natou iloʼi ia Sehova. (Mateo 24:21) ʼE mole mu lelei anai totatou malama, kae ʼe alualu pe ia ʼo mu mamalie pea mo feala pe ke mate.

16, 17. Kotea ʼae ʼe tonu ke tou fai ke tou nonofo ʼalaʼala?

¹⁶ Ko te temi ʼaeni ʼae ʼe tonu ai ke tou nonofo ʼalaʼala. ʼE fakaalualu pe te aluʼaga ʼo te malama ʼaeni ʼo kovi. Kae ʼe tou iloʼi ʼe hoko mai anai te fakaʼosi ʼi te temi ʼae kua fakatuʼutuʼu e Sehova. (Mateo 24:42-44) Kae ʼe tonu ke tou faʼa kataki pea mo haga sio ki muʼa, ki totatou ka haʼu. Tou lau te Tohi-Tapu ʼi te ʼaho fuli, pea ke tou haga faikole kia Sehova. (1 Petelo 4:7)  Tou kumi tokoni ki ʼotatou tehina mo tuagaʼane ʼae kua fualoa tanatou tauhi kia Sehova, peʼe ke tou lau te ʼu fakamatala ʼo te maʼuli ʼo ʼotatou tehina mo tuagaʼane ʼi ʼatatou tohi.

¹⁷ Kotou maʼumaʼua ʼi takotou tauhi ʼae kia Sehova. Kotou agalelei ki te hahaʼi pea mo fakatahi mo ʼokotou tehina mo tuagaʼane. ʼE kotou fiafia anai pea ʼe mole kotou tokagaʼi anai te fakalaka vave ʼo te temi. (Efeso 5:16) Neʼe lahi te ʼu gaue neʼe fakahoko e te ʼu kaugana ʼa Sehova ʼi te ʼu taʼu ʼaeni ʼe teau kua ʼosi atu. Pea ia ʼaho nei, kua toe ʼasili lahi age tatatou maʼumaʼua ki te ʼu gaue ʼa Sehova. Koia ʼae ʼe mu ai totatou malama.

18, 19. ʼE tokoni feafeaʼi te kau tagata ʼafeā kia tatou ke tou tauhi mo he faʼa fai kia Sehova? Tuku mai he faʼifaʼitaki.

¹⁸ Logo la ʼe tou lakahala tuʼumaʼu, kae ʼe tali pe e Sehova ke tou tauhi kia te ia. ʼE tokoni mai kia tatou ʼo ina foaki mai he ʼu meʼa ʼofa, ko te kau tagata ʼafeā ʼo te kokelekasio. (Lau ia Efeso 4:8, 11, 12.) Koia ka ʼaʼahi koutou e te kau tagata ʼafeā, kotou fakaʼaogaʼi lelei te faigamalie ʼaia ke kotou maʼu mai ia natou he ʼu tokoni fakapotopoto.

¹⁹ Ohage la, ko te taumatuʼa ʼi Pilitania neʼe ʼi ai ʼonā fihifihia fakataumatuʼa pea neʼe nā kole tokoni ki te ʼu tagata ʼafeā ʼe lua. Neʼe manatu te tuagaʼane ʼe mole fakahoko e tona ʼohoana tona tuʼulaga pule ʼi te faʼahi fakalaumalie. Ko te tehina neʼe ina ui ʼe mole lelei tana faiako pea neʼe mole fai tuʼumaʼu te ako fakafamili. Neʼe tokoni ai te ʼu tagata ʼafeā ki te taumatuʼa ʼaia ke nā fakakaukauʼi te faʼifaʼitaki ʼa Sesu. Neʼe nā tokoni ki te tehina ke ina toʼo te faʼahiga tokaga ʼa Sesu ki ʼana tisipulo. Pea neʼe nā fakalotomalohiʼi te tuagaʼane ke ina maʼu te faʼa kataki. Neʼe nā toe foaki age ki te taumatuʼa he ʼu faʼahiga fai ʼo te ako fakafamili pea mo ʼanā fanau ʼe lua. (Efeso 5:21-29) Neʼe faiga fakamalotoloto te tehina ke liliu ko he pule famili ʼe lelei. Pea Neʼe toe fakalotomalohiʼi ia ia e te ʼu tagata ʼafeā ke ina maʼu te faʼa kataki pea mo haga falala ki te laumalie ʼo Sehova. Ko te ʼofa pea mo te agalelei ʼa te ʼu tagata ʼafeā neʼe ko he tokoni moʼoni ki te famili ʼaia.

20. Kotea anai tona fua moka ke fakamu tou malama?

²⁰ “Manuia te tagata fuli ae e [manavasiʼi kia Sehova], ae e haele i ona ala! “ (Pesalemo 128:1) ʼE ke fiafia anai moka ke fakamu tou malama. Koia akoʼi ki ʼihi pe ʼe ko ai te ʼAtua, mo ke faiga malohi ʼo tokoni ki tou famili mo te kokelekasio ke logo tahi, pea ke nofo ʼalaʼala. ʼE sisio anai ʼihi ki tau faʼifaʼitaki lelei pea natou fia fakakololiaʼi anai tatatou Tamai ko Sehova.—Mateo 5:16.