Ko te tamai ʼa Lopoamo ko Salomone, neʼe nofo hau ki Iselaele lolotoga taʼu ʼe 40. (1 Hau 11:42) ʼI te ʼosi mate ʼo tana tamai, neʼe mavae ia Lopoamo mai Selusalemi ʼo alu ki Siseme ke fakanofo hau ai. (2 Koloniko10:1) Neʼe tuʼania koa ki tana nofo hau ʼo fetogi tana tamai? Koteʼuhi neʼe iloa Salomone ʼi tona ʼuhiga poto. Pea kua vave hoko te temi ʼae ke fakaha ai e Lopoamo pe ʼe poto anai ʼi te fakatokatoka ʼo te ʼu faigataʼaʼia.

Neʼe logoʼi e te kau Iselaele tonatou taʼomia pea natou tuʼu fekau ai kia Lopoamo ʼo fakaha age te meʼa ʼae ʼe natou loto ki ai. Neʼe natou ui fenei: “Nee fakamamafa e tau tamai tamatou amoga; koeni, ke ke fakamaamaa tamatou amoga, pea e matou faifekau anai kia koe.”—2 Koloniko 10:3, 4.

Neʼe maʼua ke fai e Lopoamo he tonu faigataʼa. Kapau neʼe mulimuli ki te loto ʼo te hahaʼi, ko ia mo tona famili mo natou ʼe maʼuli ʼi te fale hau, ʼe lagi mole kei natou maʼu anai he maʼuli fakaʼaliʼaliki. Kae kapau neʼe mole ina tali te loto ʼo te hahaʼi, ʼe natou fakafeagai anai ki ai. Kotea anai ka ina fai? Neʼe ina fia iloʼi muʼa te manatu ʼo te ʼu matuʼa fakapotopoto ʼae neʼe tokoni ki tana tamai. Pea neʼe natou ui age ke mulimuli ki te loto ʼo te hahaʼi. Kae ki muli age neʼe palalau ia Lopoamo mo natou ʼe taʼiake fakatahi mo ia pea neʼe ina fakatotonu ai ke ina gaohi koviʼi te hahaʼi. Neʼe ina ui fenei kia natou: “Nee hili e taku tamai kia koutou he amoga mamafa, pea ko au, e au hili anai kia koutou te amoga ae e toe mamafa age; nee ta koutou e taku tamai aki te suipi, pea ko au, e au ta anai koutou aki te akau talatala.”—2 Koloniko 10:6-14.

Kotea te ako ʼe tou maʼu mai ai? Ia ʼaho nei, ʼe ʼi ai ʼotatou kau matuʼa ʼe tauhi fakatahi mo tatou kia Sehova talu mai ni taʼu pea ʼe feala ke natou tokoni mai ke tou toʼo he ʼu tonu fakapotopoto. Koia tou aga fakapotopoto ʼo fakalogo kia natou.—Sopo 12:12.

Neʼe fakatahitahiʼi e Lopoamo tana kau tau ke natou olo ʼo tauʼi te ʼu telepi fiatuʼu. Kae neʼe fekauʼi e Sehova te polofeta ko Semaesa ke ina ui fenei age kia natou: “Aua naa kotou hahake o taui okotou tehina  ko te u fanau a Iselaele! E kotou tahi liliu ki tona api, koteuhi ko au ae nee au fakagafua ke hoko te mea aeni.”—1 Hau 12:21-24. *—Vakaʼi te kiʼi nota.

Neʼe faigafua koa kia Lopoamo tana fakalogo kia Sehova? Kotea anai te manatu ʼa te hahaʼi ʼo ʼuhiga mo tonatou hau foʼou? Neʼe ina ui age ʼe ina fakatuʼā anai natou “aki te akau talatala,” kae ʼi te temi nei ʼe mole ina fai anai he meʼa ki te kau fakafeagai ʼaia. (Vakaʼi ia 2 Koloniko 13:7.) Kae logo pe la pe kotea te manatu ʼa te hahaʼi ʼo ʼuhiga mo ia kae neʼe fakalogo te hau mo tana kau tau “ki te folafola a [Sehova], pea nee natou toe liliu leva ki onatou falela, o mulimuli ki te folafola a [Sehova].”

Kotea te ako ʼe tou maʼu mai ai? ʼE ko he aga fakapotopoto tatatou fakalogo tuʼumaʼu ki te ʼAtua tatau aipe pe ʼe vaʼi ai tatou. Ka tou fakalogo ki te ʼAtua ʼe ina tapuakinaʼi tuʼumaʼu tatou.—Tetelonome 28:2.

Neʼe tapuakinaʼi koa ia Lopoamo ʼi tana fakalogo? Neʼe kei pule pe ki te ʼu telepi ʼo Suta mo Pesamino, pea neʼe ina fakatotonu ke ina laga he ʼu kolo foʼou ʼi te ʼu telituale ʼaia. Neʼe ina toe ‘fakaliliu mo ʼihi kolo ʼo malolohi ʼosi.’ (2 Koloniko 11:5-12) Ko te faʼahi ʼae ʼe maʼuhiga, neʼe fakalogo ia Lopoamo ki te ʼu lao ʼa Sehova lolotoga he temi. Neʼe tauhi leva te ʼu telepi ʼe hogofulu ʼo te puleʼaga ʼo te potu noleto ki te ʼu taula ʼatua. Kae neʼe kaugā malie ʼanatou hahaʼi ʼae neʼe ʼomai ki Selusalemi ʼo lagolago kia Lopoamo pea mo te tauhi moʼoni. (2 Koloniko 11:16, 17) Koia neʼe liliu ai te puleʼaga ʼo Lopoamo ʼo malohi, he neʼe fakalogo kia Sehova.

ʼI te temi ʼae kua malohi ai te puleʼaga ʼo Lopoamo, neʼe ina fai te meʼa fakapunamaʼuli. Neʼe situʼa ki te lao ʼa Sehova pea atolasio ki te ʼu ʼatua loi. Kotea tona tupuʼaga? Neʼe faigaʼi koa e tana faʼe, ʼae neʼe ko he Amone, ke maliu age? (1 Hau 14:21)ʼE mole tou iloʼi, kae neʼe faʼifaʼitakiʼi e te puleʼaga katoa ia Lopoamo. Koia neʼe tuku ai e Sehova ke maʼu e te Hau ʼo Esipito ko Sisake ni kolo ʼo te puleʼaga ʼo Suta. Neʼe hoko te aluʼaga ʼaia, logo la te fakamalohiʼi e Lopoamo te ʼu kolo ʼaia.—1 Hau 14:22-24; 2 Koloniko 12:1-4.

Neʼe kovi age ʼosi te aluʼaga ʼi te temi ʼae neʼe kaku ai ia Sisake mo tana foʼi kau tau ki Selusalemi, ʼae ʼe ʼafio ai ia Lopoamo. ʼI te temi ʼaia, neʼe fakaha e te polofeta ko Semaesa kia Lopoamo mo ʼana kau pule ia te ʼu folafola ʼaeni mai ia Sehova: “Kua kotou siaki au; Koia kua au siaki ai koutou, pea kua au tuku ai koutou kia nima o Sisake.” Kotea neʼe fai e Lopoamo ʼi tona fakatonutonuʼi ʼaia? Neʼe ina tali leleiʼi. ʼE ʼui fenei ʼi te Tohi-Tapu: “Nee fakahemala leva te kau pule o Iselaele mo te hau, o ui: E faitotonu [ia Sehova]!” Koia, neʼe haofaki e Sehova ia Lopoamo, ʼo mole maumauʼi ai ia Selusalemi.—2 Koloniko 12:5-7, 12.

Pea neʼe hoko atu aipe te puleʼi ʼo te puleʼaga ʼo Suta e Lopoamo. ʼI muʼa ʼo tana mate, neʼe lahi te ʼu meʼa ʼofa neʼe ina foaki ki ʼona foha. Neʼe lagi mole ina loto ke natou fakafeagai ki tonatou tehina ko Apisa, ʼae ka fakanofo hau. (2 Koloniko 11:21-23) ʼI tana fai te faʼahi ʼaia, neʼe aga fakapotopoto ia Lopoamo ʼo lahi age ʼi tana kei tupulaga.

Logo la neʼe fai e Lopoamo he ʼu gaue lelei, kae ʼe ui fenei ʼi te Tohi-Tapu ʼo ʼuhiga mo tana pule: “Nee ina fai te mea ae e kovi.” Kotea tona tupuʼaga? Koteʼuhi “nee mole ina kumi [ia Sehova] i tona loto katoa.” Koia, neʼe mole leleiʼia e Sehova ia Lopoamo.—2 Koloniko 12:14.

Kotea ʼae ʼe tou ako mai te maʼuli ʼo Lopoamo? ʼI ʼihi temi neʼe fakalogo ki te ʼAtua. Pea neʼe ina fai he ʼu gaue lelei maʼa te hahaʼi ʼa Sehova. Kae neʼe mole malohi ʼana felogoi ʼae mo Sehova, pea neʼe mole ina kumi fakamalotoloto ke ina fakafiafiaʼi ia Sehova. Koia ʼae neʼe mole kei ina fai ai te meʼa ʼae ʼe lelei pea neʼe toe tauhi ki te ʼu ʼatua loi. ʼE lagi tou feʼekeʼaki fenei: ‘ ʼI te temi ʼae neʼe tali ai e Lopoamo ia tona fakatonutonuʼi e Sehova, neʼe fakahemala moʼoni koa pea mo fia fakafiafiaʼi te loto ʼo te ʼAtua? Pe neʼe mulimuli pe koa ia ki te manatu ʼa ʼihi?’ (2 Koloniko 11:3, 4; 12:6) Ki muli age, neʼe ina toe fai pe te meʼa ʼae ʼe kovi. Neʼe mole pe la tatau ia mo tana kui, ia te Hau ko Tavite. ʼE moʼoni, neʼe agahala ia Tavite ʼi ʼihi temi. Kae neʼe fakahemala moʼoni ki ʼana agahala mamafa. Pea neʼe ʼofa kia Sehova mo te tauhi moʼoni ʼi tona maʼuli katoa.—1 Hau 14:8; Pesalemo 51:2, 3, 19; 63:2.

 ʼE lahi te ʼu ako ʼe feala ke tou taʼofi mai te fakamatala Fakatohi-tapu ʼaia. ʼE ko he meʼa fakafiafia moka taupau e te hahaʼi ʼonatou famili pea mo natou fai he ʼu gaue lelei maʼa ʼihi. Kae kapau ʼe tou fia maʼu ia te ʼofa ʼo Sehova, ʼe tonu ke tou tauhi kia te ia ʼo mulimuli ki tona finegalo, pea ʼe tonu ke malohi ʼatatou felogoi ʼae mo ia.

ʼE tonu ke lahi totatou ʼofa ʼae kia Sehova ke feala hatatou fai te ʼu faʼahi ʼaia. Ohage pe ko tatatou hokohokoʼi he afi ke mole mate, ʼe tonu ke tou ako te Tohi-Tapu, mo metitasio ki ai, mo tou kataki ʼi te faikole ke toe lahi age totatou ʼofa ʼae ki te ʼAtua. (Pesalemo 1:2; Loma 12:12) Pea ʼe tou fakafiafiaʼi anai ia Sehova ʼi te ʼu meʼa fuli ʼae ʼe tou fai ʼuhi ko totatou ʼofa ʼae kia te ia. ʼE toe uga ai foki tatou ke tou fakahemala moʼoni moka tou fai he lakahala pea mo tou kole te lotofakamolemole ʼa Sehova. Pea ʼe mole tou faʼifaʼitakiʼi anai ia Lopoamo, kae tou nonofo agatonu anai ki te tauhi moʼoni.—Suta 20, 21.