ʼE TOU maʼuʼuli ʼi he malama ʼe fakatupu hoha, koia ʼe faigataʼa ai tatatou maʼu ia te tokalelei. Pea ka tou maʼu ia te tokalelei, ʼe toe feala pe ke puli vave ia tatou. ʼE tokoni feafeaʼi mai te Tohi-Tapu ke tou maʼu ia te tokalelei moʼoni pea mo tologa? ʼE feafeaʼi hatatou tokoni ki ʼihi ke natou maʼu mo natou ia te tokalelei?

Kapau ʼe tou fia maʼu ia te tokalelei moʼoni, ʼe tonu ke tou logo fimalie, ke ʼaua naʼa tou hoha, kae ke tou logoʼi ʼe puipui tatou. ʼE ʼaoga ke ʼi ai hotatou ʼu kaumeʼa lelei, kae tafito age ke tou nonofo ovi ki te ʼAtua. ʼE tou lava fai feafeaʼi te faʼahi ʼaia?

ʼE fua lelei tuʼumaʼu pe kia tatou ia te ʼu fakatotonu ʼa Sehova pea mo ʼana pelesepeto. Ka tou fakalogo ki ʼana fakatotonu, ʼe tou fakaha ai ʼe tou falala kia te ia pea mo tou fia maʼu he ʼu felogoi lelei mo ia. (Selemia 17:7, 8; Sakopo 2:22, 23) Ka tou fai te faʼahi ʼaia, ʼe fakaovi mai anai ia Sehova kia tatou pea mo foaki mai ia te tokalelei ʼo te fakakaukau. ʼE ui fenei ia Esaia 32:17: “Ko te gaue o te faitotonu ko te tokalelei, pea ko te fua o te faitotonu ko te malolo mo te fimalie o heegata.” ʼE feala ke tou maʼu ia te tokalelei moʼoni mo kapau ʼe tou fakalogo kia Sehova ʼaki he loto lelei.—Esaia 48:18, 19.

ʼE ʼi ai te tahi meʼa ʼofa neʼe foaki mai e Sehova ke feala ai hatatou maʼu ia te tokalelei ʼae ʼe tologa. Ko te meʼa ʼofa ʼaia ʼe ko tona laumalie maʼoniʼoni.—Gaue 9:31.

Neʼe ui e te apositolo ko Paulo, ʼe kau ia te tokalelei ki “te fua ʼo te laumalie.” (Kalate 5:22, 23) ʼE haʼu ia te tokalelei mai te laumalie ʼo te ʼAtua, koia ʼe tonu ai ke tou tuku ia te laumalie maʼoniʼoni ke ina takitaki tatou mo kapau ʼe tou fia maʼu ia te tokalelei. Kae kotea ʼae ʼe tonu ke tou fai?

ʼUluaki, ʼe tonu ke tou lau tuʼumaʼu ia te Folafola ʼa te ʼAtua. (Pesalemo 1:2, 3) Kapau ʼe tou fakakaukauʼi  lelei te ʼu palalau ʼae ʼe tou lau, ʼe tokoni mai anai te laumalie maʼoniʼoni ke tou mahino pe kotea te manatu ʼa Sehova ʼo ʼuhiga mo te ʼu aluʼaga kehekehe. Ohage la, ʼe tou mahino ai pe ʼe ina taupau feafeaʼi tana tokalelei, pea he koʼe ʼe maʼuhiga ia te tokalelei kia te ia. Ka tou maʼuliʼi te ʼu tokoni ʼe tou maʼu ʼi te Tohi-Tapu, ʼe tuputupu ia tatou te tokalelei.—Taaga Lea 3:1, 2.

Lua, ʼe tonu ke tou kole ki te ʼAtua tona laumalie maʼoniʼoni. (Luka 11:13) Koʼeni te fakapapau neʼe fai e Sehova kia natou ʼae ʼe natou kole tana tokoni: “Ko te tokalelei ʼo te ʼAtua ʼae ʼe maʼoluga age ʼi te ʼu ʼatamai fuli, ʼe ina taupau anai ʼokotou loto pea mo ʼokotou fealagia fakakaukau ʼaki ia Kilisito Sesu.” (Filipe 4:6, 7) Ka tou nonofo ovi kia Sehova pea mo falala ki tona laumalie, ʼe ina foaki mai te tokalelei moʼoni.—Loma 15:13.

Tokolahi neʼe natou fetogi tonatou maʼuli ʼuhi tanatou ako te Tohi-Tapu, pea kua natou fiafia ʼi te temi nei ʼi tanatou kua felogoi lelei mo Sehova, mo te kua tokalelei ʼo tanatou fakakaukau pea mo tanatou tokalelei mo te hahaʼi. Neʼe feafeaʼi tanatou fai te ʼu fetogi ʼaia?

Tokolahi te ʼu tehina mo tuagaʼane neʼe natou aga itaita mo agamalohi ʼi muʼa ʼo tanatou ʼomai ki te moʼoni. Kae neʼe natou faiga malohi ke natou fetogi tanatou aga, pea ʼi te temi nei kua natou agaʼofa, mo kataki fualoa, pea mo fia taupau te tokalelei mo te hahaʼi fuli. * (Vakaʼi te kiʼi nota.) (Taaga Lea 29:22) Tou vakaʼi pe neʼe fetogi feafeaʼi e te tehina ʼe higoa ko David pea mo te tuagaʼane ʼe higoa ko Rachel, tanā aga.

ʼI muʼa ʼo te haʼu ʼa David ki te moʼoni, neʼe ko te tagata neʼe faifatufatu tuʼumaʼu mo palalau itaita ki tona famili. Pea neʼe mahino leva kia ia neʼe tonu ke ina fetogi tana aga. Neʼe ina maʼu feafeaʼi ia te tokalelei? Neʼe ui fenei e David: “Neʼe au kamata maʼuliʼi ia te ʼu pelesepeto ʼo te Tohi-Tapu, pea neʼe matou kamata fefakaʼapaʼapaʼaki ai ʼi toku famili.”

 Neʼe faʼifaʼitakiʼi e Rachel ia te aga ʼo tona famili. ʼE ina fakamahino fenei: “Maʼia pe la mo te temi nei, ʼe tonu ke au tauʼi te ita, koteʼuhi neʼe au lahilahi ake ʼi he famili neʼe aga itaita.” Kotea ʼae neʼe tokoni kia Rachel ke ina maʼu ia te tokalelei? ʼE ina ui fenei: “Ko taku faikole ʼae kia Sehova mo he lotofalala.”

Tokolahi te ʼu hahaʼi ohage ko David pea mo Rachel, neʼe natou maʼu ia te tokalelei ʼuhi ko tanatou maʼuliʼi ia te ʼu pelesepeto Fakatohi-tapu pea mo tanatou falala ʼae ki te laumalie maʼoniʼoni. Tatau aipe pe ʼe tou maʼuʼuli ʼi he malama agakovi, kae ʼe feala pe ke tou taupau ia te tokalelei ʼo te fakakaukau. ʼE faigafua ai anai tatatou maʼuli fakatahi mo ʼotatou kaiga, pea mo ʼotatou tehina mo tuagaʼane ʼo te kokelekasio. Kae ʼe kole mai e Sehova ke tou “tokalelei mo te hahaʼi fuli pe.” (Loma 12:18) Kae ʼe feala koa ke tou fai te faʼahi ʼaia? Pea he koʼe ʼe tonu ke tou faigaʼi ke tou maʼuli tokalelei mo ʼihi?

Ka tou olo ʼo fakamafola te logo ʼo ʼuhiga mo te Puleʼaga ʼo te ʼAtua, ʼe tou tokoni ki te hahaʼi ke natou maʼu te tokalelei. (Esaia 9:5, 6; Mateo 24:14) Tokolahi ʼe natou leleiʼia te logo ʼaia pea mo natou tali. Koia ʼe mole kei natou lotovaivai ai peʼe mole kei natou iita ʼo ʼuhiga mo te ʼu aluʼaga ʼae ʼe hoko ʼi te malama ʼaeni. Kua ʼi ai leva tanatou ʼamanaki lelei ʼo ʼuhiga mo te ka haʼu, pea kua natou fia kumi “te tokalelei.”—Pesalemo 34:15.

Kae ʼe mole ko te hahaʼi fuli ʼae ʼe natou leleiʼia te logo ʼae ʼe tou tala, tatau aipe pe ʼe natou tali anai ki ʼamuli. (Soane 3:19) Pe ʼe tali e te hahaʼi peʼe kailoa, kae ʼe foaki mai pe e te ʼAtua tona laumalie, ke tou taupau te tokalelei mo te hahaʼi pea mo tou aga fakaʼapaʼapa moka tou faifakamafola. Ka tou fai feia, ʼe tou mulimuli ki te tokoni ʼae neʼe fai e Sesu: “Ka kotou hu ki he loto fale, kotou fakamalo kia natou ʼo te loto fale. Kapau ʼe tali leleiʼi koutou e te loto fale ʼaia, pea ke hifo tokotou tokalelei kia natou. Kae kapau ʼe mole natou tali leleiʼi koutou, pea ke toe liliu atu kia koutou tokotou tokalelei.” (Mateo 10:11-13) Kapau ʼe tou maʼu te faʼahiga manatu ʼaia, ʼe tou taupau anai te tokalelei, tatau aipe pe kotea ʼae ʼe ui peʼe fai anai e te hahaʼi kia tatou. Pea ke tou manatuʼi ʼe toe feala pe anai ke tou tokoni kia natou ʼaia ʼi he tahi age ʼaho.

ʼE tou toe fakaha foki ʼe tou faiga ki te tokalelei moka tou palalau ʼaki he fakaʼapaʼapa kia natou ʼae ʼe gaue maʼa te puleʼaga, tatau aipe pe ʼe natou fakafeagai ki tatatou gaue. Ohage la ʼi te tahi fenua ʼo Afelika, neʼe mole fakagafua ai e te puleʼaga ke laga honatou ʼu fale fono. Neʼe iloʼi e te ʼu tehina ʼe tonu anai ke natou fakatokatoka te fihifihia ʼaia ʼi te tokalelei. Koia neʼe natou fekauʼi ai he tehina neʼe misionea ʼi te fenua ʼaia ʼi muʼa atu ke folau ki Pilitania he ko te pilo fakafelogoi mo te Kovana ʼo te fenua ʼaia neʼe tuʼu ʼi Lonitoni. Neʼe tonu ke ina fakamahino age ki ai te ʼu gaue ʼae ʼe fakahoko e te kau Fakamoʼoni ʼa Sehova ʼi te tokalelei.

Neʼe ui fenei e te tehina: “ ʼI taku tau atu ki te pilo ʼae ʼe fakatalitali ai te hahaʼi, neʼe au tokagaʼi te teu ʼa te fafine ʼae ʼe gaue ai, pea neʼe au iloʼi ai te telepi ʼa te fafine ʼaia. He neʼe au ako te lea ʼo te telepi ʼaia. Neʼe au fakamalo age ki ai ʼi tana lea. Neʼe punamaʼuli pea neʼe ina fehuʼi fenei mai: ‘ ʼE ʼi ai he fekau ʼe ke haʼu ai?’ Pea neʼe au kolekole age pe ʼe feala la ke au felogoi mo te kovana. Neʼe telefoni ki ai, pea neʼe haʼu te kovana ʼo fakafelaveʼi mo au pea mo fakamalo mai ʼi tana lea. Hili ʼaia pea neʼe fakalogo lelei ki taku fakamahino age ko te gaue ʼae ʼe fakahoko e te kau Fakamoʼoni, ʼe mole ko he gaue ʼe fakatupu kovi ki te hahaʼi.”

ʼI te kua mahino leva ʼa te Kovana ki te ʼu fakamahino ʼa te tehina, neʼe fetogi ai tana manatu ʼo ʼuhiga mo tatou. Mole faʼa fualoa ki ai, neʼe fetogi e te Puleʼaga ia te tonu ʼae neʼe toʼo ʼi muʼa atu pea mo fakagafua leva ke laga e te kau Fakamoʼoni ʼa Sehova ʼonatou fale fono. Neʼe fiafia ʼaupito te ʼu tehina. ʼE mahino ia, ka tou aga fakaʼapaʼapa, ʼe tou kumi ai te tokalelei.

Ia ʼaho nei, ʼe fiafia te hahaʼi ʼa Sehova koteʼuhi ʼe natou maʼuʼuli ʼi he palatiso fakalaumalie, ʼo natou fakahoko ai tanatou tauhi ʼi te tokalelei. ʼE feala kia tatou fuli ke tou lagolago ki te tokalelei ʼaia mo kapau ʼe tou faiga ke tuputupu ia te tokalelei ʼi totatou maʼuli. ʼE feala ke tou tui papau ʼe fiafia ia Sehova ʼo ʼuhiga mo tatou. Pea ʼi tona malama foʼou, ʼe ina foaki mai anai te tokalelei ʼo talu ai.—2 Petelo 3:13, 14.