1-3. (1) Kotea ʼae ʼe tonu ke tou fakapipiki ki ʼatatou akonaki tafito? (2) He koʼe ʼe maʼuhiga ʼaupito ia te fakatuʼuake? (Vakaʼi te ʼuluaki pāki.)

KOTEA anai tau tali moka fehuʼi atu he tahi pe ʼe kotea te ʼu akonaki ʼae ʼe fakatafito ki ai tau tui? ʼE mahino ia, ʼe ke ui age anai ʼe ke tui ko Sehova ko te Tupuʼaga pea ko ia ʼae neʼe ina foaki mai te maʼuli. ʼE lagi ke talanoa anai ki tau tui kia Sesu Kilisito ʼae neʼe mate fakasakilifisio. Pea ʼe ke fia palalau anai ki te Palatiso ʼi te kele, ʼae ka maʼuʼuli ai anai te hahaʼi ʼa te ʼAtua ʼo talu ai. Kae ʼe ke talanoa anai koa ki te tahi akonaki maʼuhiga ohage ko te fakatuʼuake?

² Tatau aipe pe ʼe tou ʼamanaki ke tou hao ʼi te mamahi lahi pea mo maʼuli heʼe gata ʼi te kele, kae ʼe tou maʼu te ʼu tupuʼaga lelei ke tou fakapipiki ki ʼatatou akonaki tafito te fakatuʼuake. Neʼe fakaha e te apositolo ko Paulo pe koʼe ʼe maʼuhiga ʼaupito ia te fakatuʼuake. Neʼe ina ui fenei: “Kapau la ʼe mole fakatuʼuake te kau mate, pea neʼe mole fakatuʼuake ia Kilisito.” Ka na pau la neʼe mole fakatuʼuake ia Sesu, neʼe mole feala ia ke ʼafio  Hau ʼi te lagi. Pea ʼe mahino ia, ʼe mole he ʼuhiga anai ʼo tatatou faifakamafola. (Lau ia 1 Kolonito 15:12-19.) Kae, ʼe tou iloʼi neʼe fakatuʼuake ia Sesu. Pea ʼe tou tui ki te fakatuʼuake ʼo Kilisito koia ʼae ʼe mole tou hage ai ko te kau Satuseo Sutea ʼae neʼe natou fakafihiʼi malohi te ui ʼae ʼe feala ke toe maʼuʼuli ake te kau mate. Pea tatau aipe pe ʼe vaʼi tatou e te hahaʼi, kae ʼe malohi aipe tatatou tui ʼae ʼe feala ke fakatuʼuake e te ʼAtua ia te kau mate.—Maleko 12:18; Gaue 4:2, 3; 17:32; 23:6-8.

³ Neʼe ui e te apositolo ko Paulo, ko te akonaki ʼo “te fakatuʼuake ʼo te kau mate” neʼe kau ki “te ʼu ʼuluaki akonaki ʼo ʼuhiga mo Kilisito.” (Hepeleo 6:1, 2) Neʼe ina fakahaha lelei tana tui ki te fakatuʼuake. (Gaue 24:10, 15, 24, 25) ʼE moʼoni, ʼe kau te fakatuʼuake ki te ʼu ʼuluaki akonaki pea mo te ʼu meʼa tafito ʼae ʼe tou ako ʼi te Folafola ʼa te ʼAtua. Kae, ʼe tonu ke tou haga ako fakalelei ia te fakatuʼuake. (Hepeleo 5:12) Kotea tona tupuʼaga?

4. Kotea te ʼu fehuʼi ʼe feala ke tou fai ʼo ʼuhiga mo te fakatuʼuake?

⁴ ʼI te agamahani, ka kamata ako e te hahaʼi ia te Tohi-Tapu, ʼe natou lau te ʼu fakamatala ʼo te ʼu fakatuʼuake, ohage la ko te fakatuʼuake ʼo Lasalo. ʼE natou toe ako ai foki, ko Apalahamo, mo Sopo, pea mo Taniela neʼe natou tui papau ʼe toe maʼuli ake anai te kau mate ʼi te ka haʼu. Kae, kotea anai ka ke ui moka fehiʼi atu e he tahi ke ke fakamoʼoni ʼaki te Tohi-Tapu ia te tupuʼaga ʼae ke tou tui ai ki te ʼu fakapapau ʼo ʼuhiga mo te fakatuʼuake neʼe fai kua hili ki ai taʼu ʼe lauʼi teau? Pea ʼe ui koa ʼi te Tohi-Tapu pe ʼe ko te temi fea ʼae ka hoko ai anai te fakatuʼuake ʼi te ka haʼu? Ko te ʼu tali ki te ʼu fehuʼi ʼaia ʼe ina fakamalohiʼi anai tatatou tui.

5. Kotea ʼae ka tou talanoa muʼa ki ai?

⁵ ʼE lagi faigafua hatatou fakakaukauʼi te fakatuʼuake ʼo he tahi neʼe hoki mate atu pe. (Soane 11:11; Gaue 20:9, 10) Kae ʼe feala koa ke tou tui ki he fakatuʼuake ʼo he tahi neʼe fakapapauʼi kua hili ki ai taʼu ʼe lauʼi teau? ʼE feala koa ke tou tui ki te fakapapau ʼaia tatau aipe pe neʼe fai ʼo ʼuhiga mo he tahi kua fualoa tana mate peʼe ki he tahi neʼe hoki mate pe? ʼE moʼoni, kua tou tui ki te fakatuʼuake neʼe hoko ia taʼu ʼe lauʼi teau hili tona fakakikite. Ko te fakatuʼuake fea ʼaia? Pea kotea tona pikipikiga mo tatatou ʼamanaki ʼae ki he fakatuʼuake ʼi te ka haʼu?

6. Kotea te pikipikiga ʼo Sesu mo te fakahoko ʼo te kapite 118 ʼo Pesalemo?

⁶ ʼAki te kapite 118 ʼo Pesalemo, ʼae neʼe lagi tohi e Tavite, tou talanoa ai ki he fakatuʼuake neʼe kua tala fakatomuʼa ʼi he ʼu taʼu. ʼI te Pesalemo ʼaia, ʼe tou lau fenei ai: “Oi [Sehova], tuku mai te fakamauli!” pea “Ke tapuaki ae e hau i te huafa o [Sehova]!” Neʼe talanoa te hahaʼi ki te lea fakapolofeta ʼaia ʼo ʼuhiga mo te Mesia ʼi te temi ʼae neʼe hu ai ia Sesu ki Selusalemi ʼi te ʼaho 9 ʼo Nisani, ʼi ni ʼaho ʼi muʼa ʼo tana mate. (Pesalemo 118:25, 26; Mateo 21:7-9) Kae, neʼe feafeaʼi te talanoa ʼo te kapite 118 ʼo Pesalemo ki he fakatuʼuake ʼe hoki hoko anai ʼi he ʼu taʼu ki muli age? Tou toe fakatokagaʼi te ʼu palalau ʼaeni ʼo te pesalemo ʼaia: “Ko te maka ae nee siaki e natou ae nee natou fakatuu te fale kua liliu ia ko te maka tafito o te agele.”—Pesalemo 118:22.

7. Neʼe liʼaki feafeaʼi e te kau Sutea ia Sesu?

 ⁷ Ko te kau ‘fakatuʼu fale’ ʼae neʼe natou liʼaki ia te Mesia, neʼe ko te kau takitaki lotu Sutea. Neʼe mole gata ʼaki pe tanatou meʼa noaʼi ia Sesu peʼe ko tanatou fakafisi ki tona ʼuhiga Kilisito. Kae tokolahi te kau Sutea neʼe natou fakakinauʼi ia Pilato ke ina matehi ia Sesu. (Luka 23:18-23) ʼEi, neʼe natou toe lagolago ki te matehi ʼo Sesu.

8. Neʼe feala ke liliu feafeaʼi ia Sesu ko “te maka tafito ʼo te agele”?

⁸ Kapau neʼe liʼaki ia Sesu pea mo matehi, neʼe feafeaʼi hana liliu ko “te maka tafito o te agele”? Neʼe hoki feala pe mo kapau neʼe fakatuʼuake. Neʼe fakaha lelei e Sesu ʼi tana fakamatala ʼae ʼo ʼuhiga mo te tagata mo tona kele. Neʼe fekauʼi e te tagata ʼaia te ʼu tagata ʼave logo ki te ʼu tagata ʼae neʼe gaue kele maʼa ia. Kae neʼe gaohi koviʼi te ʼu tagata ʼave logo e te ʼu tagata gaue kele. Pea neʼe fekauʼi leva e te tagata ia tona foha totonu, he ʼe ʼi tana manatu ʼe fakalogo anai ki ai te ʼu tagata gaue kele. Kae, neʼe natou matehi te foha. ʼI te ʼosi ʼo tana fakamatala, neʼe talanoa leva ia Sesu ki te lea fakapolofeta ʼo Pesalemo 118:22. (Luka 20:9-17) Neʼe toe fakaʼaogaʼi pe e te apositolo ko Petelo ia te vaega ʼaia ʼi tana palalau ʼae ki te ʼu pule pea mo te ʼu sekelipa Sutea ʼae neʼe fakatahitahi ʼi Selusalemi. ʼO ina ui age fenei: “[Ko] Sesu Kilisito te tagata Nasaleti, ʼae neʼe kotou tutuki ki te pou kaʼe neʼe fakatuʼuake ia ia e te ʼAtua mai te kau mate.” Pea neʼe ina ui fenei leva: “ ʼE ko ‘te maka ʼaia ʼae neʼe kotou meʼa noaʼi, kau tufuga, kua liliu ko te maka tafito ʼo te agele.’”—Gaue 3:15; 4:5-11; 1 Petelo 2:5-7.

9. Kotea te aluʼaga fakaofoofo ʼae neʼe fakakikite ʼi te Pesalemo 118:22?

⁹ ʼE ha lelei mai, ko te lea fakapolofeta ʼo te Pesalemo 118:22 neʼe ina fakakikite he fakatuʼuake neʼe hoki hoko ʼi he ʼu taʼu ʼe lauʼi teau ki muli age. Neʼe liʼaki ia te Mesia pea mo matehi. Kae neʼe toe fakatuʼuake ʼo liliu ai ko te maka tafito ʼo te agele. Hili tona fakatuʼuake, neʼe mole he tahi age higoa ʼi te higoa ʼo Sesu “neʼe kua foaki ki te tagata, ʼe tonu ke haofaki ai tatou.”—Gaue 4:12; Efeso 1:20.

10. (1) Kotea ʼae neʼe fakakikite ʼi te Pesalemo 16:10? (2) He koʼe ʼe feala ke tou tui papau neʼe mole fakaʼuhiga te Pesalemo 16:10 kia Tavite?

¹⁰ Tou vakaʼi te tahi vaega ʼe talanoa ʼo ʼuhiga mo he fakatuʼuake. Neʼe hoko moʼoni te fakatuʼuake ʼaia ʼi he ʼu taʼu ʼe afe tupu ki muli age. Pea ʼe tonu ki te aluʼaga ʼaia ke ina fakamalohiʼi tatatou falala ʼae ʼe feala ke hoko he  fakatuʼuake logo la neʼe fakakikite peʼe fakapapauʼi ʼi he ʼu lauʼi taʼu ki muʼa atu. ʼI te kapite 16 ʼo Pesalemo, ʼe tou lau ai te ʼu palalau ʼaeni ʼa Tavite: “E mole ke tuku anai toku laumalie ki te nofoaga o te kau mate, pea e mole ke fakagafua anai ke sio tou ofaaga [“tau tagata agatonu,” MN] ki te pala.” (Pesalemo 16:10) Neʼe mole fia ui e Tavite ʼe mole mate anai ia ʼi he temi pea ʼe mole tuku anai ki he Fale Maka. ʼE fakaha lelei mai ʼi te Folafola ʼa te ʼAtua, neʼe matuʼa ia Tavite pea neʼe mate, pea neʼe “moe leva ia Tavite mo ana tamai, pea nee tanu leva ia ia i te kolo o Tavite.” (1 Hau 2:1, 10) Kae, ʼe fakaʼuhiga kia ai te vaega ʼaia?

11. Ko te temi fea ʼae neʼe fakamahino ai e Petelo ia Pesalemo 16:10?

¹¹ Hili taʼu ʼe afe tupu ki te tohi e Tavite te ʼu palalau ʼaia, neʼe fakamahino leva e Petelo pe neʼe fakaʼuhiga kia ai te Pesalemo 16:10. Pea neʼe palalau ia Petelo ki te toko lauʼi afe kau Sutea mo te kau poloselite, hili ki ai te ʼu vahaʼa ki te mate mo te fakatuʼuake ʼo Sesu. (Lau ia Gaue 2:29-32.) Neʼe ina fakamanatuʼi kia natou neʼe mate ia Tavite pea neʼe tanu. Pea ʼe mole ui mai ʼi te Tohi-Tapu pe neʼe fakafihiʼi e he tahi ia Petelo, ʼi tana ui ʼae ko Tavite “neʼe sio fakatomuʼa ia pea neʼe palalau ʼo ʼuhiga mo te fakatuʼuake” ʼo te Mesia.

12. Neʼe hoko feafeaʼi ia Pesalemo 16:10, pea kotea neʼe ina fakamoʼoni ʼo ʼuhiga mo te fakapapau ki te fakatuʼuake?

¹² Neʼe fakamalohiʼi e Petelo tana manatu ʼaki tana talanoa ki te ʼu palalau ʼa Tavite ʼi te Pesalemo 110:1. (Lau ia Gaue 2:33-36.) Neʼe fakatafito te faʼahiga manatu ʼa Petelo ki te Tohi-Tapu. Pea neʼe tokoni ki te tokolahi ke natou tui ko Sesu neʼe “ ʼAliki pea mo Kilisito.” Neʼe mahino ai te hahaʼi neʼe hoko moʼoni ia Pesalemo 16:10 ʼi te temi ʼae neʼe fakatuʼuake ai Sesu. Ki muli age, neʼe fakaʼaogaʼi e te apositolo ko Paulo te fakamoʼoni ʼaia ʼi tana palalau ki te kau Sutea ʼi te loto kolo ʼo Atiokia ʼi Pisitia. Neʼe malave moʼoni te aluʼaga ʼaia kia natou, pea neʼe toe lahi ai tanatou fia fagono kia Paulo. (Lau ia Gaue 13:32-37, 42.) ʼE moʼoni, neʼe hoko te fakatuʼuake ʼaia hili ki ai taʼu ʼe lauʼi teau ki tona fakakikite. Kae ʼe tonu foki ke tou tui mo tatou ko te ʼu lea fakapolofeta ʼi te Tohi-Tapu ʼo ʼuhiga mo he fakatuʼuake ʼi te ka haʼu ʼe tuha mo te falala.

13. Kotea te ʼu fehuʼi ʼe feala ke tou fai ʼo ʼuhiga mo te fakatuʼuake?

¹³ Ko he fakalotomalohi tatatou iloʼi ʼae ʼe feala ke hoko he fakatuʼuake neʼe kua fakakikite hili ki ai taʼu ʼe lauʼi teau. Kae, ʼe feala ke fai e ʼihi te ʼu fehuʼi ʼaeni: “Ko tona fakaʼuhiga koa, ʼe tonu anai ke au atalitali lolotoga he temi loaloaga pea hoki au sio ai kia ia ʼae neʼe au ʼofa mamahi ai? ʼE hoko anai ʼafeā te fakatuʼuake?” Neʼe ui e Sesu ki ʼana apositolo ʼe ʼi ai te ʼu aluʼaga ʼe mole natou iloʼi pea ʼe mole feala ke natou iloʼi. ʼE ʼi ai te ʼu faʼahi ʼo ʼuhiga mo “te ʼu temi peʼe ko te ʼu fasiga taʼu, . . . ʼe gata pe ki te Tamai ʼe feala ke ina fakatuʼutuʼu te ʼu faʼahi ʼaia.” (Gaue 1:6, 7; Soane 16:12) Kae, ʼe ʼi ai te ʼu faʼahi ʼe tou iloʼi ʼo ʼuhiga mo te temi ʼae ka hoko ai te fakatuʼuake.

14. Kotea te kehekehe ʼo te fakatuʼuake ʼo Sesu mo te fakatuʼuake ʼo ʼihi ʼi muʼa atu?

¹⁴ ʼI te Tohi-Tapu, ko te fakatuʼuake ʼae ʼe maʼuhiga tokotahi, ko te fakatuʼuake ʼo Sesu. Kapau neʼe mole fakatuʼuake ia ia, ʼe  mole tou ʼamanaki anai ke tou toe sisio ki he tahi kua mate kae neʼe tou ʼofa mamahi ai. Ko te hahaʼi ʼae neʼe ʼuluaki fakatuʼuake ia Sesu, ohage la ko natou ʼae neʼe fakatuʼuake e Elia mo Eliseo, neʼe mole maʼuʼuli ʼo talu ai. Neʼe natou toe mamate pea mo liliu ʼo efu ʼi ʼonatou fale maka. Kae ko Sesu neʼe “fakatuʼuake mai te kau mate, ʼe mole toe mate anai ia. Pea ʼe mole toe pule te mate kia te ia.” ʼI te lagi, ʼe “maʼuli ʼo talu ai.”—Loma 6:9; Fakaha 1:5, 18; Kolose 1:18; 1 Petelo 3:18.

15. Kotea te fakaʼuhiga ʼo te ui ʼae ko Sesu “ ʼae neʼe ʼuluaki fakatuʼuake mai te kau mate”?

¹⁵ Ko Sesu ʼae neʼe ʼuluaki fakatuʼuake ko he laumalie ki te lagi pea neʼe maʼuhiga tokotahi te fakatuʼuake ʼaia. (Gaue 26:23) Kae, ʼe ʼi ai anai mo ʼihi ka fakatuʼuake ki te lagi. Neʼe fakapapauʼi e Sesu ʼe kaugā ʼafio anai mo ʼana apositolo agatonu ʼi te lagi. (Luka 22:28-30) Kae hoki natou maʼu anai tonatou fakapale ʼi te ʼosi mate. Pea ʼe fakatuʼuake anai natou ko he ʼu laumalie ohage ko Sesu. Neʼe tohi e Paulo, “kua fakatuʼuake ia Kilisito, pea ʼe ko ia ʼae neʼe ʼuluaki fakatuʼuake mai te kau mate.” Pea neʼe ui e Paulo, ʼe ʼi ai anai ʼihi ka fakatuʼuake ki te maʼuli ʼi te lagi, ʼo “tahi mulimuli pe ki tona aluʼaga: Ko ia ʼae neʼe ʼuluaki fakatuʼuake, ʼe ko Kilisito, hili ia ko natou ʼae ʼe kau mo Kilisito lolotoga tana ʼi heni.”—1 Kolonito 15:20, 23.

16. Kotea ʼae ʼe tou mahino ai ʼi te ʼu palalau ʼa Paulo ʼo ʼuhiga mo te fakatuʼuake ki te maʼuli ʼi selo?

¹⁶ ʼAki te ʼu palalau ʼa Paulo, ʼe tou mahino ai ki te temi ʼae ka hoko ai te fakatuʼuake ki te maʼuli ʼi selo. ʼE hoko anai lolotoga te ʼi heni ʼa Kilisito. Lolotoga he ʼu taʼu, neʼe fakaha e te kau Fakamoʼoni ʼa Sehova ʼaki te Tohi-Tapu neʼe kamata te “ ʼi heni” ʼa Kilisito ʼi te taʼu 1914. ʼE kei tou maʼuʼuli nei lolotoga “tana ʼi heni,” pea kua ovi mai te fakaʼosi ʼo te tuʼu agakovi ʼaeni.

17, 18. Kotea ʼae ka hoko anai ki ʼihi fakanofo lolotoga te ʼi heni ʼa Kilisito?

¹⁷ ʼE tou toe maʼu ʼihi fakamahino ʼi te Tohi-Tapu ʼo ʼuhiga mo te fakatuʼuake ki te lagi. ʼE ui fenei: “ ʼE mole matou loto ke kotou nonofo ʼi te fakapoʼuli ʼo ʼuhiga mo natou ʼae kua mamate. . . . Koteʼuhi kapau ʼe tou tui neʼe mate ia Sesu pea kua toe maʼuli, ʼo toe feia aipe, ko te ʼu tisipulo ʼae neʼe mamate . . . ʼe ʼave anai natou e te ʼAtua ke natou fakatahi mo ia. Ko natou ʼae ia tatou ʼe kei maʼuʼuli . . . lolotoga te ʼi heni ʼa te ʼAliki, ʼe mole natou muʼamuʼa anai ia natou ʼae kua mamate. ʼE hifo mai anai ia te ʼAliki mai te lagi. ʼE ina foaki anai he ʼu fakatotonu. . . . Pea ʼe ʼuluaki fakatuʼuake anai ʼana tisipulo ʼae kua mamate. Hili ʼaia, ko tatou ʼae ʼe kei maʼuʼuli anai, ʼe ʼave anai tatou ʼi te ʼu ʼao ke tou fakatahi mo natou pea ke tou felaveʼi mo te ʼAliki ʼi te lagi, pea ʼe tou nonofo tuʼumaʼu anai mo te ʼAliki.”—1 Tesalonika 4:13-17.

¹⁸ Neʼe kamata te fakatuʼuake ki te lagi hili he kiʼi temi ki te kamata ʼo te ʼi heni ʼa Kilisito. Ko te kau fakanofo ʼae ʼe kei maʼuʼuli anai lolotoga te mamahi lahi ‘ ʼe ʼave anai ʼi te ʼu ʼao.’ (Mateo 24:31) Kotea tona fakaʼuhiga? Ko natou ʼaia ka ʼave anai ʼe mole “mamate fualoa anai,” ko tona fakaʼuhiga ʼe mole natou momoe fualoa anai ʼi te mate. Kae, ʼi te temi pe ʼae ʼe natou mamate ai, “ ʼe fetogi fuli anai, ʼi he moʼi temi ʼe tahi, ʼi hona aluʼaga fakafokifa, lolotoga te pupuhi ʼo te fakatagi pupuhi fakamuli.”—1 Kolonito 15:51, 52.

19. Kotea te faʼahiga ‘fakatuʼuake fea ʼae ʼe lelei age’?

¹⁹ Ia ʼaho nei, tokolahi ʼi te kau Kilisitiano  agatonu ʼe mole ko he kau fakanofo. Pea neʼe mole filifili ke natou kaugā ʼafio mo Kilisito ʼi te lagi. Kae, ʼe natou fakaʼamu lahi ki “te ʼaho ʼo Sehova,” ʼae ka ina pulihi ai anai te malama agakovi ʼaeni. ʼE mole iloʼi e he tahi pe ʼe hoko ʼafeā te fakaʼosi. Kae ʼaki te ʼu aluʼaga ʼae ʼe hoko, ʼe tou iloʼi kua ovi mai te fakaʼosi. (1 Tesalonika 5:1-3) Ka tuʼu anai te malama foʼou ʼo te ʼAtua, ʼe hoko anai te tahi faʼahiga fakatuʼuake. ʼI te temi ʼaia, ʼe fakatuʼuake anai te hahaʼi ki te maʼuli ʼi te kele. Pea ʼe natou maʼu te ʼamanaki ʼae ke natou liliu ʼo haohaoa mo maʼuli ʼo talu ai. Ko te ‘fakatuʼuake ʼaia ʼe lelei age’ anai ia ʼi te ʼu fakatuʼuake ʼo te temi muʼa. Koteʼuhi ko natou ʼaia neʼe fakatuʼuake, neʼe toe mamate ki muli age.—Hepeleo 11:35.

20. He koʼe ʼe tou tui papau ʼe fakatuʼutuʼu lelei anai te fakatuʼuake?

²⁰ ʼE ui ʼi te Tohi-Tapu, ko natou ʼae ʼe hake ki selo ʼe fakatuʼuake ʼo “tahi mulimuli pe ki tona aluʼaga.” (1 Kolonito 15:23) Koia ʼe tou tui papau, ʼe toe fakatuʼutuʼu lelei anai te fakatuʼuake ʼi te kele. ʼE feala ke tou fai te ʼu fehuʼi ʼaeni: Ko natou koa ʼae neʼe mamate ʼi totatou temi, ʼae ka fakatuʼuake ʼi te kamata ʼAfio ʼa Kilisito Ia Taʼu ʼe Afe, pea fakatalitali natou e ʼonatou feʼilo mo ʼonatou ʼofaʼaga? ʼE ʼuluaki fakatuʼuake anai koa te kau takitaki faiva agatonu ʼo te temi muʼa moʼo fakatuʼutuʼu lelei te hahaʼi ʼa te ʼAtua ʼi te malama foʼou? Kotea anai ka hoko ki te hahaʼi ʼae neʼe heʼeki tauhi kia Sehova? ʼE fakatuʼuake anai natou ʼi te temi fea mo te koga meʼa fea? ʼE lahi ʼaupito te ʼu fehuʼi ʼe feala ke tou fai. Kae ʼe mole ʼaoga ke tou tuʼania ki te ʼu faʼahi ʼaia ʼi te temi nei. ʼE lelei age pe tatatou atalitali ke tou sisio ki te ʼu aluʼaga ʼae ka hoko. Pea ʼe tou tui papau, ʼe fakaofoofo anai tatatou sisio ki te fakahoko e Sehova ia te ʼu aluʼaga ʼaia.

21. Kotea tau ʼamanaki?

²¹ Kae ʼi tatatou atalitali ki te temi ʼaia, ʼe tonu ke tou fakamalohiʼi tatatou tui kia Sehova. Neʼe fakapapauʼi mai e Sehova ʼaki ia Sesu, ʼe ina manatuʼi anai te kau mate pea ʼe natou toe maʼuʼuli ake anai. (Soane 5:28, 29; 11:23) ʼI te tahi ʼaho, neʼe fakaha e Sesu ʼe fakatuʼuake anai e Sehova te kau mate, he ʼe kia Sehova ko Apalahamo, mo Isaake pea mo Sakopo “ ʼe natou maʼuʼuli fuli.” (Luka 20:37, 38) ʼE ha lelei mai, ʼe lahi te ʼu tupuʼaga ʼe tou maʼu ke tou fai ai te ʼu palalau ʼaeni ʼa te apositolo ko Paulo: “ ʼE au falala ki te ʼAtua, . . . ʼe ʼi ai anai he fakatuʼuake.”—Gaue 24:15.