ʼU Tupulaga—‘Kotou Tahi Gaue Ke Kotou Maʼu Te Haofaki’
“Neʼe kotou fakalogo tuʼumaʼu . . . ke kotou tahi gaue ʼaki he fakaʼapaʼapa lahi ke kotou maʼu ai te haofaki.” —FILIPE 2:12.
KATIKO: 133, 135
1. He koʼe ʼe maʼuhiga ia te papitema? (Vakaʼi te ʼuluaki pāki.)
ʼI TE taʼu fuli ko te toko lauʼi afe kau ako ʼo te Tohi-Tapu ʼe natou papitema. Tokolahi ia natou ʼaia ko he kau tupulaga peʼe kau tamaliki kei liliki. Neʼe lagi natou lalahi ake ʼi te moʼoni. ʼE ke kau koa ia natou ʼaia? Kapau ko ia, ʼe ko he faʼahi ʼe lelei ʼaupito ʼae neʼe ke fai. ʼE tonu ki he Kilisitiano ke papitema ke feala ai hana maʼu te haofaki pea mo te maʼuli heʼe gata.—Mateo 28:19, 20; 1 Petelo 3:21.
2. He koʼe ʼe mole tonu ke ke tuʼania te foaki ʼo tou maʼuli kia Sehova?
2 ʼI tou papitema, neʼe kamata ai tou tapuakinaʼi e Sehova ʼo mulimuli ki te ʼu aluʼaga ʼae neʼe ke fakalaka ai. Kae, neʼe ke toe felaveʼi foki mo te tahi ʼu fakamaʼua. ʼO feafeaʼi? ʼI te ʼaho ʼo tou papitema, ko te tehina ʼae neʼe ina fai te akonaki ʼo te papitema neʼe ina fai atu te fehuʼi ʼaeni: “ ʼO fakatafito ki te sakilifisio ʼo Sesu Kilisito, kua kotou fakahemala koa ki ʼakotou agahala pea
mo momoli tokotou maʼuli kia Sehova moʼo fai ʼo tona finegalo?” Pea neʼe ke ʼio ki ai. Neʼe ke fakapapau ai ke ke ʼofa kia Sehova pea mo ke fakamuʼamuʼa tau tauhi ʼae kia te ia ʼi tou maʼuli. ʼE ke fakahemala koa anai ʼi tau fai te fakapapau maʼuhiga ʼaia? Kailoa ia. ʼE mole ke fakahemala anai ʼi he temi ʼi tau tuku ke takitaki tou maʼuli e Sehova. Ko natou ʼae ʼe mole natou iloʼi ia Sehova ʼe kau ki te malama ʼa Satana. Pea ko te Tevolo ʼe mole ʼofa ia natou pea mo koe. ʼE fiafia anai ia mo kapau ʼe mole ke maʼu te maʼuli heʼe gata he ʼe ko tona fakaʼuhiga kua ke kau kia ia pea kua ke liʼaki ia Sehova.3. Neʼe tapuakinaʼi feafeaʼi koe e Sehova ʼuhi ko tau foaki tou maʼuli kia te ia?
3 Fakakaukauʼi age muʼa pe neʼe tapuakinaʼi feafeaʼi koe e Sehova ʼuhi ko tau foaki tou maʼuli kia te ia pea mo ke papitema. Koia, ʼe feala ai ke ke fai te ʼu palalau ʼaeni ʼaki he lotofalala: “E kau [ia Sehova] mo au, e mole au mataku ki he mea: Kotea e feala ke fai mai e te tagata kia au?” (Pesalemo 118:6) ʼE mole he pilivilesio ʼe lahi age ʼi tau kau mo te ʼAtua pea mo tau iloʼi ʼae ʼe ʼofa ia koe.
KO TOKU MAʼUA
4, 5. (1) He koʼe ko te foaki ʼo totatou maʼuli kia Sehova ʼe ko totatou maʼua? (2) Kotea te ʼu fihifihia ʼae ʼe felaveʼi mo te kau Kilisitiano, logo la te kehekehe ʼo ʼonatou taʼu?
4 Kapau kua ke papitema, ʼe mole fakalogo anai ʼau felogoi mo Sehova ki ʼau matuʼā. ʼI te temi leva ʼaeni, kua maʼua ke ke gaue ki tou haofaki, tatau aipe pe ʼe kei ke maʼuli fakatahi mo ʼau matuʼā. He koʼe ʼe maʼuhiga ke tou fakamanatuʼi te faʼahi ʼaia? ʼE mole feala ke iloʼi e he tahi pe ʼe feafeaʼi anai he ʼahiʼahiʼi ʼo tatatou tui ki ʼamuli. Ohage la, neʼe lagi ke papitema kae neʼe kei ke veliveli. Kae ʼi te temi nei kua ke lahi, pea kua ke maʼu he ʼu manatu foʼou, mo he ʼu fihifihia foʼou. Neʼe ui fenei e te kiʼi taʼahine: “ ʼI te agamahani, ʼe mole lotomamahi he kiʼi tamasiʼi moka ʼe mole foaki age hana moʼi kato ʼi he ʼaho tupu ʼi te fale ako ʼuhi ko tana Fakamoʼoni kia Sehova. Kae hili ki ai ni taʼu, ʼi te temi leva ʼae kua malohi ai ʼona holi ki te ʼu felaveʼi fakasino, ʼe maʼuhiga anai ke tui malohi ʼe lelei age tana fakalogo ki te ʼu lao ʼa Sehova.”
5 ʼE mole ko te kau tupulaga pe ʼae ʼe felaveʼi mo ni fihifihia. Maʼia pe la mo natou ʼae ʼe papitema kae kua lalahi, ʼe ʼahiʼahiʼi tanatou tui ʼi he ʼu aluʼaga ʼe mole natou ʼamanaki ki ai. ʼE feala pe ke tupu mai te ʼu ʼahiʼahi mai tonatou maʼuli fakataumatuʼa, tonatou maʼuli malolo fakasino, peʼe mai tanatou gaue. Logo la ʼe kehekehe ʼotatou taʼu, kae ʼe tonu anai ke tou nonofo agatonu kia Sehova ʼi te ʼu aluʼaga fuli pe.—Sakopo 1:12-14.
6. (1) Kotea ʼae ʼe tonu ke ke manatuʼi ʼo ʼuhiga mo tau foaki tou maʼuli kia Sehova? (2) Kotea te ako ʼe tou maʼu ia Filipe 4:11-13?
6 Ke feala hau nofo agatonu, manatuʼi tuʼumaʼu te fakapapau ʼae neʼe ke fai kia Sehova. Ko tona ʼuhiga neʼe ke fakapapau ki te Maʼoluga ʼe ke foaki katoa tou maʼuli ke ke tauhi kia te ia tatau aipe pe ʼe kotea ʼae ka hoko, maʼia moka ʼe mole kei tauhi ʼou kaumeʼa mo ʼau matuʼā kia Sehova. (Pesalemo 27:10) ʼI te ʼu aluʼaga fuli, kole tuʼumaʼu kia Sehova ke tokoni atu ke ke fakahoko tau fakapapau ʼae kia te ia.—Lau ia Filipe 4:11-13.
7. Kotea te fakaʼuhiga ʼo te ui ʼae ke ke gaue “ ʼaki he fakaʼapaʼapa lahi” ke ke maʼu ai te haofaki?
7 ʼE loto e Sehova ke ke liliu ko hona kaumeʼa. Kae ʼe ʼaoga foki ki ai he ʼu faiga ke malohi tuʼumaʼu te fakakaumeʼa ʼaia, pea mo ke Filipe 2:12: “Ke kotou tahi gaue ʼaki he fakaʼapaʼapa lahi ke kotou maʼu ai te haofaki.” Ko tona fakaʼuhiga, ʼe ʼaoga ke tou fakakaukauʼi fakalelei pe ʼe feafeaʼi anai hatatou nonofo ovi kia Sehova, pea mo agatonu kia te ia logo la te ʼu aluʼaga ʼae ʼe feala ke hoko. ʼAua naʼa tou falala fau kia tatou totonu. Tou manatuʼi, maʼia mo natou ʼae neʼe tauhi ki te ʼAtua lolotoga ni taʼu neʼe mole natou nonofo agatonu tuʼumaʼu kia te ia. Kae, kotea ʼae ʼe feala ke tokoni atu ke ke gaue pea ke ke maʼu ai te haofaki?
gaue ke ke maʼu te haofaki. ʼE ui fenei iaʼE MAʼUHIGA TE AKO ʼO TE TOHI-TAPU
8. Kotea ʼae ʼe toe kau ki te ako takitokotahi? He koʼe ʼe maʼuhiga te faʼahi ʼaia?
8 Ke feala hatatou fakakaumeʼa mo Sehova, ʼe toe ʼaoga ke tou fakalogo pea mo palalau kia te ia. Pea ʼe tou fakalogo tafito kia Sehova moka tou ako ia te Tohi-Tapu. ʼE toe kau ki ai te lau mo te metitasio ki te Folafola ʼa te ʼAtua pea mo ʼatatou tohi Fakatohi-tapu. Pea ko te ako ʼo te Tohi-Tapu ʼe mole ko he ako fakaʼatamai ʼo he ʼu manatu ohage ko tona fai ʼi te ʼu sivi ʼi te fale ako. Kae ka ke ako te Tohi-Tapu, ʼe hage pe ko hau folau ʼo kumi pea mo mamata ki he ʼu aluʼaga foʼou ʼo ʼuhiga mo Sehova. ʼE ke fakaovi ai anai ki te ʼAtua, pea ʼe fakaovi atu anai kia koe.—Sakopo 4:8.
ʼE lelei koa ʼau felogoi mo Sehova? (Vakaʼi te palakalafe 8-11)
9. Kotea ʼae ʼe feala ke tokoni ki tau ako tokotahi?
9 ʼE foaki mai e te kautahi ʼa Sehova te ʼu tohi ʼae ʼe feala ke tokoni atu ki tau polokalama ako. Ohage la, ʼe feala ke ke alu ki te Adolescents ” hili ia, pea ke kumi te kupu tafito ʼaeni “ Explore la Bible ! ” ʼE tokoni atu anai ke ke maʼuliʼi te ʼu faʼahi ʼae ʼe ke ako ʼo ʼuhiga mo te ʼu fakamatala Fakatohi-tapu. ʼO toe feia pe mo te ʼu pepa ako “ Qu’enseigne réellement la Bible ? ” ʼE feala ke tokoni atu te ʼu pepa ako ʼaia ke ke fakamalohiʼi tau tui pea mo ke fakamahino te ʼu akonaki ʼae ʼe ke tui ki ai ki ʼihi. ʼE feala ke ke maʼu he tahi ʼu manatu ki tau ako tokotahi ʼi te alatike “ Les jeunes s’interrogent... Comment trouver du plaisir à lire la Bible ? ” ʼo te Réveillez-vous ! ʼo Apelili 2009. Koia, ko te ako pea mo te metitasio ʼe maʼuhiga ki tau gaue ʼae ke ke maʼu ai te haofaki.—Lau ia Pesalemo 119:105.
jw.org ʼi te pasina ʼo te kau tupulaga “ʼE MAʼUHIGA TE FAIKOLE
10. He koʼe ʼe tonu ki he tahi kua papitema ke faikole?
Kapau ʼe ke lotohoha ki he meʼa, ʼe ui ʼi te Tohi-Tapu ke ke “tuku tau kavega kia Sehova”
10 Ka tou ako ia te Tohi-Tapu, ʼe tou fakalogo kia Sehova pea ka tou faikole, ʼe tou palalau kia te ia. ʼE mole tonu ke tou manatu ko te faikole ʼe ko he agamahani pe ia peʼe ko he meʼa puipui ke maʼu ai he maʼuli fiafia. Ko te faikole, ʼe ko he felogoi moʼoni mo te Tupuʼaga. Kotou fakafuafua age muʼa, ʼe fia fagono ia Sehova ki te ʼu meʼa ʼae ʼe kotou ui age. (Lau ia Filipe 4:6.) Koia kapau ʼe ke lotohoha ki he meʼa, ʼe ui ʼi te Tohi-Tapu ke ke “tuku tau kavega kia Sehova.” (Pesalemo 55:22, MN) ʼE feala ke fakamoʼoni atu e te ʼu tehina mo tuagaʼane ʼe toko lauʼi miliona, neʼe fua lelei te tokoni ʼaia kia natou. Pea ʼe toe fua lelei pe anai kia koe.
11. He koʼe ʼe tonu ke tou fakafetaʼi tuʼumaʼu kia Sehova?
11 Kae, ʼe mole tonu pe ke tou faikole moka ʼe tou loto ke tokoni mai ia Sehova. ʼE fakamanatuʼi fenei mai ʼi te Tohi-Tapu: “Ke kotou fakaha tokotou lotofakafetaʼi.” (Kolose 3:15) ʼI ʼihi temi, ʼe kua galo leva te ʼu meʼa lelei ʼae ʼe tou maʼu ʼuhi ko tatatou tokaga fau ki ʼotatou fihifihia. Koia ohage la ʼi te ʼaho fuli, fakakaukauʼi he ʼu faʼahi ʼe tolu ʼe ke fia lotofakafetaʼi ki ai, hili ia, pea ke fakafetaʼi kia Sehova ki te ʼu faʼahi ʼaia. Ko te kiʼi taʼahine ʼe higoa ko Abigail, neʼe papitema ʼi tona taʼu 12, ʼe ina ui fenei: “ ʼI taku manatu, ʼi te ʼatulaulau katoa ko Sehova tokotahi pe ʼae ʼe tau mo feʼauga ke tou fakafetaʼi ki ai. ʼE tonu ke tou fakamalo kia te ia ʼi te temi fuli pe ʼo ʼuhiga mo te ʼu meʼa ʼofa ʼae ʼe ina foaki mai.”
ʼE MAʼUHIGA KE KITA MAʼULIʼI TOTONU HE ALUʼAGA
12, 13. Neʼe kua ke logoʼi koa te agalelei ʼa Sehova ʼi tou maʼuli? Pea he koʼe ʼe maʼuhiga ke ke fakakaukau pe neʼe tokoni feafeaʼi atu ia Sehova kia koe?
12 Neʼe tokoni ia Sehova ki te Hau ko Tavite ke ina katakiʼi he ʼu aluʼaga faigataʼa. Koia neʼe talanoa ai Tavite ki te aluʼaga neʼe ina logoʼi ʼi tona maʼuli. Neʼe ina ui fenei: “Ke koutou logoi pea ke koutou sisio ki te lelei o [Sehova]! Manuia te tagata ae e ina kumi tona nonoaga ia ia!” (Pesalemo 34:9) ʼE ha mai ʼi te vaega ʼaeni, ʼe tonu ke tou logoʼi e tatou totonu te agalelei ʼa Sehova. Kapau ʼe ke lau te Tohi-Tapu mo ʼatatou tohi pea ke kau ki te ʼu fono, ʼe ke iloʼi ai anai pe neʼe tokoni feafeaʼi te ʼAtua ki ʼihi ke natou nonofo agatonu kia te ia. Kae, ʼi te tuputupu ʼo ʼau felogoi mo Sehova, ʼe tonu ke ke sio pe ʼe tokoni feafeaʼi atu ia Sehova kia koe. Neʼe kua ke logoʼi koa la te agalelei ʼa Sehova ʼi tou maʼuli?
Ke maʼuhiga tuʼumaʼu kia koe ia tau kau ki te kautahi ʼa Sehova
13 Ko te kau Kilisitiano fuli kua natou sisio ki te agalelei ʼa Sehova ʼi hona aluʼaga ʼe makehe. ʼE fakaafe e Sehova ia tatou takitokotahi ke tou fakaovi age kia te ia mo tona ʼAlo. Neʼe ui fenei e Sesu: “ ʼE mole he tahi ʼe feala ke haʼu kia te au mo ka na pau la neʼe mole taki mai ia ia e taku Tamai, ʼae neʼe ina fekauʼi mai au.” (Soane 6:44) ʼI tau manatu, ko Sehova koa ʼae neʼe ina taki mai koe kia te ia? Peʼe ke manatu koe, ‘Ko ʼaku matuʼā ʼae neʼe taki e Sehova kia te ia, pea ʼe tonu ke au mulimuli ai.’ Manatuʼi, ʼi tau foaki tou maʼuli kia Sehova pea mo tau papitema, neʼe ke maʼu ai leva he ʼu felogoi ʼe makehe age mo Sehova. ʼE ui fenei mai ʼi te Tohi-Tapu: “Kapau ʼe ʼofa he tahi ki te ʼAtua, ʼe iloʼi e te ʼAtua ia ia ʼaia.” (1 Kolonito 8:3) Koia, ke maʼuhiga tuʼumaʼu kia koe ia tau kau ki te kautahi ʼa Sehova.
14, 15. ʼE ke lava fakamalohiʼi feafeaʼi tau tui ʼaki tau faifakamafola?
14 Neʼe ke logoʼi foki te agalelei ʼa Sehova ʼi tana foaki atu he lototoʼa ke ke palalau ki tau tui ki ʼihi, ʼi te faifakamafola peʼe ʼi te fale ako. ʼE mahino ia, ʼe mole faigafua tau faifakamafola ki ʼou kaugā ako. He ʼe lagi ke tuʼania pe ʼe natou tali feafeaʼi anai. Pea ʼe lagi ke mataku ʼi te fakamahino ʼo tau tui ʼi muʼa ʼo he kaugā malie. Kae kotea ʼae ʼe feala ke tokoni atu?
15 Fakakaukauʼi pe koʼe ʼe ke tui papau ki te ʼu akonaki ʼae ʼe ke tui ki ai. Fakaʼaogaʼi te ʼu pepa ako ʼi te jw.org, mo kapau ʼe maʼu ʼi tau lea. ʼE feala ke tokoni atu te ʼu pepa ako ʼaia ke ke fakakaukauʼi pe kotea te ʼu akonaki ʼae ʼe ke tui ki ai, he koʼe ʼe ke tui ki ai, pea ʼe feafeaʼi hau fakamahino te ʼu akonaki ʼaia ki ʼihi. Pea ʼi tau tui papau ki ai mo tau teuteuʼi lelei, ʼe mahino ia, ʼe ke fia palalau ai anai ʼo ʼuhiga mo Sehova.—Selemia 20:8, 9.
16. Kotea ʼae ʼe tokoni atu ke ke lototoʼa ʼi te palalau ki tau tui?
16 Tatau aipe pe neʼe ke teuteuʼi lelei, kae ʼe kei ke lagi lotohoha pe ʼi te fakamahino ʼo tau tui. Ko te tuagaʼane neʼe papitema ʼi tona taʼu 13 pea kua taʼu 18 nei, ʼe ina ui fenei: “ ʼE au iloʼi te meʼa ʼae ʼe au tui ki ai. Kae ʼi ʼihi temi ʼe faigataʼa taku fakaha ʼaku manatu.” Koia ʼae ʼe ina faigaʼi ai ke palalau faʼifaʼitaliha ʼo ʼuhiga mo te moʼoni. ʼE ina ui fenei: “ ʼE palalau faʼifaʼitaliha ʼoku kaugā ako ki te ʼu meʼa ʼae ʼe natou fai. Pea ʼe tonu ke toe feia mo au. Koia, ʼe au talanoa anai ki he aluʼaga, ʼo au kamata fenei, ‘ ʼI taku ako te Tohi-Tapu ʼi te ʼaho ʼae . . .’ Hili ia, pea ʼe au hoko atu taku fakamatala. Logo la ʼe mole au palalau atu aipe ki te Tohi-Tapu, kae ʼi te agamahani ʼe fia iloʼi e ʼihi pe kotea ʼae ʼe au fai moka au ako te Tohi-Tapu. ʼI ʼihi temi, ʼe natou faifehuʼi mai. ʼI taku fakaʼaogaʼi tuʼumaʼu te faʼahiga fai ʼaia, ʼe faigafua ai kia au taku palalau. Pea ʼe ko he toe lotofimalie ʼe au logoʼi ai tuʼumaʼu.”
17. Kotea ʼae ʼe feala ke toe tokoni atu ke ke palalau ki ʼihi?
17 Ka sisio niʼihi ʼe ke tokaga mo ke fakaʼapaʼapa kia natou, ʼe faigafua anai tanatou fakaʼapaʼapa ki tau tui pea mo koe. Ko Olivia, neʼe papitema ʼi tana kei veliveli kae kua taʼu 17 nei, ʼe ina ui fenei: “Neʼe au mataku tuʼumaʼu pe naʼa ui e te hahaʼi ʼe au tauhi lotu fakavale ʼi taku fakaʼaogaʼi te Tohi-Tapu.” Kae neʼe kamata fetogi leva tana faʼahiga manatu. Neʼe mole kei ina tokagaʼi tona mataku, kae neʼe fakakaukau fenei: “Tokolahi te kau tupulaga ʼe mole natou iloʼi he meʼa ʼo ʼuhiga mo te kau Fakamoʼoni ʼa Sehova. Ko te kau Fakamoʼoni pe ʼae ʼe feala ke natou felaveʼi, ko matou. Koia ʼaki tatatou aga, ʼe feala ke tou iloʼi ai pe ʼe feafeaʼi anai hanatou tali. Kae ʼe feafeaʼi mo kapau ʼe tou umiuminoa peʼe tou matataku ʼi te palalau ʼo ʼuhiga mo tatatou tui? ʼE feala leva ke natou ui ʼe mole tou leleiʼia totatou ʼuhiga kau Fakamoʼoni ʼa Sehova. Pea ʼe feala ai ke mole natou tali lelei ia tatou ʼuhi ʼae he ʼe mole tou falala kia tatou. Kae, kapau ʼe tou palalau faʼifaʼitaliha mo he lotofalala ʼo ʼuhiga mo tatatou tui, ʼe mahino ia, ʼe natou fakaʼapaʼapa anai kia tatou.”
GAUE KE KE MAʼU TE HAOFAKI
18. Kotea ʼae ʼe ʼaoga ke ke fai ke ke maʼu ai te haofaki?
18 Neʼe tou vakaʼi, ko te gaue ʼae ke tou maʼu ai te haofaki ʼe ko te maʼua ʼo tatou takitokotahi. Pea ke feala hau fai te faʼahi ʼaia, ʼe tonu ke ke lau mo metitasio ki te Folafola ʼa te ʼAtua, mo ke faikole kia Sehova, pea ke fakakaukauʼi fakamalotoloto tana faʼahiga tokoni atu ki tou maʼuli. Ko tau faʼahiga fai ʼaia, ʼe tokoni atu anai ke ke tui papau ko Sehova ko tou Kaumeʼa. Pea ʼe uga ai anai koe ke ke fakaha ki ʼihi te ʼu akonaki ʼae ʼe ke tui ki ai.—Lau ia Pesalemo 73:28.
19. He koʼe ʼe maʼuhiga ʼau faiga ke ke maʼu ai te haofaki?
19 Neʼe ui fenei e Sesu: “Kapau ʼe fia muli mai he tahi ia te au, ke fakafisi kia ia totonu pea ke ina toʼo tona pou fakamamahi pea mo haga muli mai ia te au.” (Mateo 16:24) ʼEi, ʼe tonu ki te Kilisitiano takitokotahi ke ina foaki tona maʼuli kia Sehova pea mo papitema ke feala hana mulimuli ia Sesu. Kae ko te hoki kamataʼaga ʼaia ʼo he maʼuli tapuakina, pea ʼe iku anai ki te maʼuli heʼe gata ʼi te malama foʼou ʼo te ʼAtua. Koia faiga malohi ʼo gaue ke ke maʼu te haofaki.