ALATIKE AKO 43
ʼE Takitaki e Sehova Tana Kautahi
“ ‘ ’E mole ʼaki he ʼu kautau solia, peʼe ʼaki he malohi, kae ʼaki pe toku laumalie,ʼ ko te ui ʼaia ʼa Sehova ʼo te ʼatu kautau.”—SAKL. 4:6, NWT.
KATIKO 40 Ko Ai Neʼe Ke Foaki Ki Ai Tou Maʼuli?
TE ʼU MANATU FAKANOUNOU *
1. Kotea ʼae ʼe tonu ke tou haga fai ʼi te hili ʼo totatou papitema?
KUA ke papitema koa? Kapau koia, neʼe ke fakaha ia muʼa ʼo te hahaʼi ʼe ke tui kia Sehova pea ʼe ke fia tauhi kia te ia. Neʼe ke toe fakaha ai tau fia gaue fakatahi mo tana kautahi. * Kae ʼe tonu ke ke haga fakamalohiʼi tau tui ʼae kia Sehova, pea mo tau tui papau ʼae ʼe ina fakaʼaogaʼi tana kautahi ia ʼaho nei.
2-3. ʼE takitaki feafeaʼi e Sehova tana kautahi ia ʼaho nei, pea kotea te ʼu kalitate ʼe ina fakaha ai?
2 ʼE ha te ʼuluagaaga ʼo Sehova ʼi tana faʼahiga takitaki tana kautahi ia ʼaho nei. ʼE toe ha ai mo tana fakatuʼutuʼu pea mo ʼana lekula. Koia, tou vakaʼi te ʼu kalitate ʼe tolu ʼo Sehova ʼe ha ʼi tana kautahi.
3 ʼUluaki, “ ʼe mole fakapalatahi te ʼAtua.” (Gaue 10:34) ʼI tona ʼofa, neʼe foaki e Sehova tona ʼAlo ‘ko he totogi maʼa te hahaʼi fuli.’ (1 Tim. 2:6; Soa. 3:16) ʼI tana kole ʼae ki ʼana kaugana ke natou faifakamafola ki te hahaʼi fuli, ʼe ina foaki ai ki te tokolahi te faigamalie ʼae ke natou maʼu te ʼu lelei ʼo te totogi ʼaia. Lua, ko Sehova ʼe ko te ʼAtua ʼo te fakatokatoka mo te tokalelei. (1 Ko. 14:33, 40) Koia, ʼe tonu ai ki ʼana kaugana ke natou tauhi kia te ia ʼi te fakatokatoka mo te tokalelei. Tolu, ko Sehova ʼe ko te “Faiako Lahi.” (Esa. 30:20, 21, NWT) ʼE ko te tupuʼaga la ʼaia ʼo te faiga malohi ʼo tana kautahi ke akoʼi tana Folafola ʼi te kokelekasio pea mo te faifakamafola. Neʼe faʼifaʼitakiʼi feafeaʼi e te ʼu ʼuluaki Kilisitiano te ʼu kalitate ʼaia ʼe tolu ʼo Sehova? ʼE toe faʼifaʼitakiʼi feafeaʼi e te ʼu kaugana ʼa te ʼAtua te ʼu kalitate ʼaia ia ʼaho nei? Pea ʼe lava tokoni feafeaʼi atu ia te laumalie maʼoniʼoni ke ke gaue fakatahi mo te kautahi ʼa Sehova?
ʼE MOLE FAKAPALATAHI TE ʼATUA
4. Ia Gaue 1:8, kotea ʼae neʼe fakatotonu e Sesu ke fai e ʼana tisipulo, pea kotea te tokoni neʼe ina fakapapauʼi age?
4 ʼI te temi ʼo te ʼu ʼuluaki Kilisitiano. Ko te logo ʼae neʼe fakamafola e Sesu neʼe ina foaki he ʼamanaki ki te hahaʼi fuli. (Luka 4:43) Koia ʼae neʼe ina fakatotonu ki ʼana tisipulo ke natou hoko atu te gaue ʼaia neʼe ina kamata. Neʼe tonu ke natou faifakamafola “ ʼo kaku ki te ʼu potu taupotu ʼo te kele.” (Lau ia Gaue 1:8.) ʼE mahino ia, neʼe mole natou lavaʼi te gaue ʼaia ʼaki pe tonatou malohi. Neʼe ʼaoga kia natou te laumalie maʼoniʼoni, ia “te tokoni” ʼae neʼe fakapapauʼi age e Sesu kia natou.—Soa. 14:26; Sakl. 4:6.
5-6. Neʼe tokoni feafeaʼi ia te laumalie maʼoniʼoni ki te ʼu tisipulo ʼa Sesu?
5 Neʼe foaki age ki te ʼu tisipulo ʼa Sesu ia te laumalie maʼoniʼoni ʼi te Penikosite ʼo te taʼu 33 H.T.S. * ʼAki te tokoni ʼaia, neʼe natou kamata faifakamafola atu aipe. Pea ʼo mole fualoa ki ai, neʼe ko te toko lauʼi afe hahaʼi neʼe natou tali te logo lelei. (Gaue 2:41; 4:4) ʼI te temi ʼae neʼe kamata fakatagaʼi ai natou, neʼe mole natou matataku ʼo tuku ai tanatou faifakamafola. Kae neʼe natou kole mamahi ki te ʼAtua ke tokoni age kia natou. Neʼe natou faikole fenei: “Ke ke fakafealagia ki ʼau kaugana ke natou haga palalau ki tau folafola ʼaki he lototoʼa.” Neʼe natou fonu ai ʼi te laumalie maʼoniʼoni pea neʼe hoko atu pe tanatou “tala te folafola ʼa te ʼAtua ʼaki he lototoʼa.”—Gaue 4:18-20, 29, 31.
6 Neʼe felaveʼi te ʼu tisipulo ʼa Sesu mo te tahi atu ʼu faigataʼaʼia. Ohage la, neʼe tahitahiga te maʼu ʼo te ʼu Tohi Taputapu. Neʼe mole natou maʼu he ʼu tohi ako ohage ko tatou ia ʼaho nei. Pea neʼe tonu ke natou faifakamafola ki te hahaʼi ʼi ni lea kehekehe. Logo la te ʼu aluʼaga ʼaia, kae neʼe lava fai pe e te ʼu tisipulo faʼafai ʼaia he meʼa neʼe hage neʼe mole feala ke hoko ʼi te temi ʼaia. ʼEi, ia teitei taʼu ʼe 30, neʼe natou fakamafola te logo lelei “ki te hahaʼi fuli ʼae ʼi te lalo lagi.”—Kol. 1:6, 23.
7. ʼI te ʼu taʼu ʼe 100 tupu ki muʼa atu, neʼe mahino feafeaʼi te ʼu kaugana ʼa Sehova ki te meʼa ʼae neʼe fakamaʼua age e te ʼAtua kia natou, pea kotea ʼae neʼe natou fai?
7 ʼI te temi nei. ʼE kei hoko atu pe te takitaki e Sehova tana hahaʼi pea mo ina foaki age te malohi. ʼE ina takitaki tafito natou ʼaki tana Folafola ʼae neʼe tohi ʼaki te laumalie maʼoniʼoni. ʼE tou maʼu ai te fakamatala ʼo te minisitelio ʼa Sesu pea mo tana fakatotonu ʼae ki ʼana tisipulo ke natou fakamafola te logo lelei. (Mat. 28:19, 20) Neʼe kua ui fenei pe ʼi Te Tule Leʼo ʼo Sulio 1881: “Neʼe mole pauʼi peʼe fakanofo matou, ke fakakololiaʼi ai matou peʼe ke matou maʼu koloa, kae ke matou fakaʼaogaʼi ia meʼa fuli ʼae ʼe matou maʼu moʼo fakamafola te logo lelei.” ʼI te kaupepa lahi Neʼe Foaki Kia Ai Te Gaue, ʼae neʼe ta ʼi te Fakapilitania ʼi te taʼu 1919, neʼe tohi fenei: “ ʼE lahi te gaue, kae ʼe ko te gaue ia ʼa te ʼAliki, pea ʼe tou fakahoko pe anai ʼaki tona malohi.” Ohage ko te ʼu ʼuluaki Kilisitiano, ko te ʼu tehina lototoʼa ʼaia neʼe natou gaue kinakina ʼi te faifakamafola. Pea neʼe natou fai feia, koteʼuhi neʼe natou tui papau ʼe tokoni age anai ia te laumalie maʼoniʼoni ke natou faifakamafola ki te hahaʼi fuli. ʼE tou toe tui papau feia mo tatou ia ʼaho nei.
8-9. Kotea te ʼu meʼa gaue ʼae neʼe fakaʼaogaʼi e te kautahi ʼa Sehova ke lahi age te fakamafola ʼo te logo lelei?
8 Neʼe fakaʼaogaʼi e te kautahi ʼa Sehova te ʼu meʼa gaue ʼae ʼe lelei tukupau moʼo fakamafola te logo lelei. Ohage la ko te ʼu tohi, mo te “Photo-Drame de la Création,” mo te ʼu fakatagi feʼaveʼaki, mo te ʼu motoka faifakatagi, mo te ʼu polokalama latio, pea ʼi te ʼu taʼu pe ʼaeni te ʼu olotinatea pea mo te Neti. Pea tahi ʼae, kua lahi ʼaupito te ʼu lea ʼae kua fakaliliu ki ai te ʼu tohi ʼa te kautahi ʼa te ʼAtua. Pea ʼe heʼeki Fkha. 14:6, 7) Koia, ʼe ina loto ai ke logo te hahaʼi fuli ki te logo ʼaia.
he tahi kautahi kua ina fai te faʼahi ʼaia. Kotea te tupuʼaga ʼo te fakaliliu ki te ʼu lea ʼe lahi ʼaupito? Ke logo ai te hahaʼi fuli ki te logo ʼo te Puleʼaga ʼi tanatou lea totonu. Ko Sehova ʼe mole fakapalatahi. Neʼe kua ina fakakikite ʼe tala anai te logo lelei “ki te ʼu puleʼaga fuli, mo te ʼu telepi fuli, mo te ʼu lea fuli, pea mo te hahaʼi fuli.” (9 Kae ʼe feafeaʼi hatatou faifakamafola kia natou ʼae ʼe lagi nonofo ʼi he ʼu fale fata ʼe leʼohi peʼe fakamaʼu? Neʼe mahino e te kautahi ʼa Sehova te ʼaoga ʼae ke fakatuʼutuʼu he ʼu faʼahiga faifakamafola ʼaki te laupapa. Ohage la, ʼi te taʼu 2001, neʼe fakagafua e te Kolesi Pule ke fakaʼaogaʼi ʼi Falani he ʼu laupapa pea mo te tahi age ʼu faʼahiga fakahaha ʼo ʼatatou tohi. Ki muli age, ko te ʼu tehina ʼo te tahi ʼu fenua neʼe natou kamata fai feia mo natou. Neʼe lahi tona ʼu fua lelei. ʼI te taʼu 2011, neʼe kamata ʼi Amelika te fakatuʼutuʼu foʼou pea neʼe ʼahiʼahi fai ʼi he koga meʼa ʼi New York neʼe kaugamalie ai te hahaʼi. Neʼe tufa ʼi te ʼuluaki taʼu pe tohi ʼe 102 129 pea mo nusipepa ʼe 68 911. Pea neʼe kole ʼe te toko 4 701 hahaʼi hanatou ako Tohi-Tapu. Neʼe ha lelei ai neʼe tokoni ia te laumalie maʼoniʼoni ki te faʼahiga faifakamafola ʼaia. Koia, neʼe tali e te Kolesi Pule ke fakaʼaogaʼi ʼi te malamanei katoa te ʼu laupapa pea mo te tahi ʼu faʼahiga fakahaha ʼo ʼatatou tohi.
10. ʼE feafeaʼi hatatou hikihiki ke lelei age tatatou faʼahiga faifakamafola?
10 Te meʼa ʼae ʼe feala ke ke fai. Fakaʼaogaʼi lelei te akoako ʼae ʼe foaki mai e Sehova ʼi te ʼu fono. Alu ʼo faifakamafola tuʼumaʼu mo tau kutuga faifakamafola. ʼE feala ke tokoni atu tau kutuga ʼi te ʼu faʼahi ʼae ʼe ʼaoga ai kia koe, pea ʼe ke lotomalohi anai ʼaki tanatou faʼifaʼitaki. Kataki ʼo faifakamafola logo la te ʼu fihifihia. Ohage ko tona fakamanatuʼi mai ʼi te vaega ʼae ʼe fakatafito ki ai te alatike ʼaeni, ʼe tou fakahoko te finegalo ʼo Sehova mole ʼaki totatou malohi, kae ʼaki te tokoni ʼa te laumalie maʼoniʼoni. (Sakl. 4:6) ʼAua naʼa galo kia koe ʼe ko te gaue ia ʼa te ʼAtua ʼae ʼe tou fakahoko.
KO SEHOVA KO TE ʼATUA ʼO TE FAKATOKATOKA MO TE TOKALELEI
11. ʼI te temi ʼo te ʼu ʼuluaki Kilisitiano, neʼe gaue fakatahi feafeaʼi te kolesi pule moʼo taupau te fakatokatoka ʼi te hahaʼi ʼa te ʼAtua?
11 ʼI te temi ʼo te ʼu ʼuluaki Kilisitiano. Ko te ʼu tehina ʼo te kolesi pule ʼae neʼe tuʼu ʼi Selusalemi, Gaue 2:42) Ohage la, ʼi te lagi taʼu 49 H.T.S. neʼe natou vakavakaʼi te fihifihia ʼo ʼuhiga mo te silikosisio ʼaki te takitaki ʼa te laumalie maʼoniʼoni. Kapau neʼe hoko atu te maveuveu ʼa te ʼu kokelekasio ʼuhi ko te fihifihia ʼaia, neʼe feala ai ke mole hoko atu tanatou faifakamafola. Logo la ko te ʼu apositolo mo te ʼu tagata ʼafea ʼo te kolesi pule neʼe ko he ʼu tagata Sutea, kae neʼe mole mulimuli tanatou tonu ki te talatisio Fakasutea peʼe kia natou ʼae neʼe pipiki malohi ki ai. Kae neʼe natou tuku ke takitaki natou e te Folafola ʼa te ʼAtua pea mo te laumalie maʼoniʼoni. (Gaue 15:1, 2, 5-20, 28) Neʼe kotea tona fua? Neʼe tapuakiʼi e Sehova tanatou tonu, neʼe taupau te tokalelei mo te logo tahi, pea neʼe hoko atu pe tanatou fakamafola te logo lelei.—Gaue 15:30, 31; 16:4, 5.
neʼe natou gaue ʼi te logo tahi moʼo taupau te fakatokatoka mo te tokalelei ʼi te hahaʼi ʼa te ʼAtua. (12. Kotea ʼae ʼe ha ai ʼe maʼu te fakatokatoka mo te tokalelei ʼi te kautahi ʼa Sehova?
12 ʼI te temi nei. ʼE faiga malohi e te kautahi ʼa Sehova ke taupau maʼu te fakatokatoka mo te tokalelei ʼi tana hahaʼi. ʼI te taʼu 1895, ʼi Te Tule Leʼo ʼo te ʼaho 15 ʼo Novepeli, neʼe maʼu ai te alatike neʼe fakatafito kia 1 Kolonito 14:40 pea neʼe ko tona kupu tafito “ ʼAki Te Fakatokatoka Mo Te Tokalelei.” Neʼe ui fenei ai: “Neʼe lahi te ʼu meʼa neʼe tohi e te ʼu apositolo ki te ʼuluaki kokelekasio, ʼo ʼuhiga mo te fakatokatoka . . . ʼE lelei ke tou fakaʼapaʼapa tuʼumaʼu ki ‘te ʼu meʼa fuli ʼae neʼe tohi ʼi te temi muʼa moʼo akoʼi ʼo tatou.’ ” (Loma 15:4) Ohage pe ko te ʼu ʼuluaki Kilisitiano, ʼe loto moʼoni te ʼu kaugana ʼa Sehova ʼi totatou temi ke natou taupau te fakatokatoka mo te tokalelei. Ohage la, kapau ʼe ke kau ki te Ako ʼo Te Tule Leʼo ʼi he tahi age kokelekasio peʼe ko he tahi age fenua, ʼe ke iloʼi lelei pe anai te fakaalualu ʼo te ako ʼaia ʼo Te Tule Leʼo pea mo te alatike ʼae ka vakaʼi. Pea ʼe hage pe ia ʼe ke nofo ʼi tau kokelekasio! ʼE feala ke maʼu te logo tahi ʼaia ʼaki pe te gaue ʼa te laumalie ʼo te ʼAtua.—Sofo. 3:9.
13. Kotea te ʼu fehuʼi ʼe tonu ke tou fai moka tou fakakaukauʼi ia Sakopo 3:17?
13 Te meʼa ʼae ʼe feala ke ke fai. ʼE loto e Sehova ke maʼuli ʼana kaugana ʼi te tokalelei, pea ke natou ‘taupau te logo tahi ʼae ʼe natou maʼu mai te laumalie maʼoniʼoni.’ (Efe. 4:1-3) Koia, ke ke fai te ʼu fehuʼi ʼaeni: “ ʼE au faiga koa ke maʼu ʼi te kokelekasio te logo tahi mo te tokalelei? ʼE au fakalogo koa kia natou ʼae ʼe takitaki? ʼE feala koa ke falala mai ia natou ʼo te kokelekasio, tafito la moka ʼe au maʼu he ʼu pilivilesio ʼi ai? ʼE au tautonu tuʼumaʼu koa pea ʼe au fia tokoni koa ki te ʼu tehina mo tuagaʼane?” (Lau ia Sakopo 3:17.) Kapau ʼe ke tokagaʼi ʼe tonu ke ke gaueʼi ʼihi faʼahi, kole kia Sehova tona laumalie maʼoniʼoni. Pea ke ke tuku ke fetogi e tona laumalie tou ʼuluagaaga pea ke ina takitaki te ʼu meʼa ʼae ʼe ke fai. Kapau ʼe ke fai feia, ʼe lahi age anai te ʼofa mo te lotofakafetaʼi ʼa te ʼu tehina mo tuagaʼane kia koe.
ʼE AKOʼI TATOU E SEHOVA
14. Neʼe akoʼi feafeaʼi e Sehova te ʼu ʼuluaki Kilisitiano, ʼo mulimuli kia Kolose 1:9, 10?
14 ʼI te temi ʼo te ʼu ʼuluaki Kilisitiano. ʼE fiafia ia Sehova ʼi tana akoʼi ʼana kaugana. (Pes. 32:8) ʼE ina loto ke natou iloʼi ia te ia, mo ʼoʼofa kia te ia, pea ke natou maʼuli ʼo talu ai. ʼE feala pe ke hoko te ʼu faʼahi ʼaia he ʼe ina akoʼi natou. (Soa. 17:3) ʼI te temi ʼo te ʼu ʼuluaki Kilisitiano, neʼe ina fakaʼaogaʼi te kokelekasio moʼo akoʼi tana hahaʼi. (Lau ia Kolose 1:9, 10.) Neʼe ʼaoga ʼaupito kia natou ia te laumalie maʼoniʼoni, te “tokoni” ʼae neʼe fakapapauʼi age e Sesu. (Soa. 14:16) Neʼe tokoni te laumalie ʼaia ki te ʼu tisipulo ke lahi age tanatou mahino ki te Folafola ʼa te ʼAtua. Neʼe ina toe fakamanatuʼi age te ʼu akonaki mo te ʼu gaue neʼe fai e Sesu, ʼae neʼe feala leva ke natou lau ki muli age ʼi te ʼu Evaselio. Ko tanatou maʼu te ʼatamai malama ʼaia neʼe toe malohi age ai tonatou ʼofa mo tanatou tui ki te ʼAtua mo tona ʼAlo, pea toe malohi ai tonatou feʼofaʼaki.
15. ʼE ha feafeaʼi kia koe kua hoko te fakapapau ʼae ʼe maʼu ia Esaia 2:2, 3?
15 ʼI te temi nei. Neʼe fakakikite e Sehova “i te u aho fakamuli” ʼe hake anai he hahaʼi kaugamalie mai te ʼu puleʼaga fuli ki tona moʼuga. Ko tona fakaʼuhiga, ʼe natou fakatahi anai ki ʼana kaugana ke akoʼi natou e Sehova. (Lau ia Esaia 2:2, 3.) ʼE tou tokagaʼi ʼi te temi nei te kua hoko ʼo te lea fakapolofeta ʼaia. ʼE mahino ia, ʼe maʼoluga age te tauhi moʼoni ʼi te ʼu tauhi hala fuli ʼae. Pea ʼe ko he kaitahi fakalaumalie lahi ʼe foaki mai e Sehova! (Esa. ) ʼAki “te tagata faifekau agatonu mo poto,” ʼe mahu pea mo kehekehe te meʼa kai fakalaumalie ʼae ʼe ina foaki mai. ( 25:6Mat. 24:45) Ohage la, ʼe feala ke tou lau he ʼu alatike, peʼe ke tou fagono ki he ʼu akonaki, peʼe ke tou sioʼi he ʼu ʼata viteo kehekehe. ʼE tou manatu tahi ai mo Eliu, te kaumeʼa ʼo Sopo, ʼae neʼe ina ui fenei: “Ko ai e ina iloi te akonaki o hage ko [te ʼAtua]?”—Sopo 36:22.
16. Kotea ʼae ʼe feala ke ke fai ke ke tuputupu ʼi te faʼahi fakalaumalie?
16 Te meʼa ʼae ʼe feala ke ke fai. ʼE tokoni atu anai te laumalie maʼoniʼoni ke ke maʼuliʼi te ʼu meʼa ʼae ʼe ke lau pea mo ako ʼi te Tohi-Tapu. Faikole fenei, ohage ko tona fai e te tagata faipesalemo: “Oi Eteleno, ako mai kia au ou ala; e au haele anai i tou agatonu. Teuteui toku loto ke mataku ki tou huafa.” (Pes. 86:11) Pea ke hoko atu tau kai ki te meʼa kai fakalaumalie ʼae ʼe foaki mai e Sehova ʼaki tana Folafola pea mo tana kautahi. Kae ke ke manatuʼi, ʼe mole ke fai anai te faʼahi ʼaia ke lahi pe te ʼu meʼa ʼae ʼe ke iloʼi. Kae ʼe ke loto ke malave te ʼu moʼoni Fakatohi-tapu ki tou loto pea ke ke maʼuliʼi. ʼE feala ke tokoni atu te laumalie maʼoniʼoni ʼa Sehova. Pea ʼe ke toe loto foki ke ke fakalotomalohiʼi ʼou tehina mo tuagaʼane. (Hep. 10:24, 25) Kotea tona tupuʼaga? Koteʼuhi ko natou ʼe ko tou famili fakalaumalie. Kole kia Sehova tona laumalie ke feala hau fai he ʼu tali ʼi te fono mo tou loto katoa, pea ke ke fakahoko fakalelei hau faipalalau peʼe ko hau akonaki. ʼE ke fakaha ai anai kia Sehova mo tona ʼAlo ʼe ke ʼofa ki ʼanā “ovi” ʼae ʼe maʼuhiga.—Soa. 21:15-17.
17. ʼE feafeaʼi hau fakaha ʼe ke lagolago ki te kautahi ʼa Sehova?
17 Kua ovi mai te temi ʼae ʼe ko te kautahi pe ʼae ʼe takitaki e te laumalie ʼa te ʼAtua ka maʼu ʼi te kele. Koia ʼae, ke ke lagolago mo tou loto katoa ki te kautahi ʼa Sehova. Ohage ko te ʼAtua, ʼaua naʼa ke fakapalatahi, kae ke ke ʼofa pea mo fakamafola ki te hahaʼi fuli. Faʼifaʼitakiʼi te ʼAtua ʼo te fakatokatoka mo te tokalelei, ʼo ke taupau te logo tahi ʼo te kokelekasio. Pea ke ke fakalogo ki tau Faiako Lahi, ʼo ke kai ki te kaitahi fakalaumalie lahi ʼae ʼe ina foaki mai. Koia, ʼi te fakaovi mai ʼo te fakaʼosi ʼo te malama ʼa Satana, ʼe mole ke mataku anai. Kae ʼe hoko atu pe anai tau tauhi kia Sehova ʼaki he lototoʼa, fakatahi mo natou ʼae ʼe kau ki tana kautahi.
KATIKO 3 Ko Toku Malohiʼaga, Taku ʼAmanakiʼaga, Toku Falanakiʼaga
^ pal. 5 ʼE ke tui papau koa ʼe takitaki e Sehova tana kautahi? ʼI te alatike ʼaeni, ʼe tou vakaʼi anai pe neʼe takitaki feafeaʼi e Sehova te kokelekasio ʼi te temi ʼo te ʼu ʼuluaki Kilisitiano. ʼE tou toe vakaʼi anai pe ʼe feafeaʼi tana takitaki tana hahaʼi ʼi te temi nei.
^ pal. 1 HE ʼU FAKAMAHINO: ʼE ʼi ai te ʼu koga ʼe lua ʼa te kautahi ʼa Sehova. Ko he koga ʼi selo pea mo he koga ʼi te kele. ʼI te alatike ʼaeni, ʼe fakaʼuhiga te kupu “kautahi” ki tona koga ʼae ʼi te kele.
^ pal. 5 Ko te ʼu mataʼi tohi H.T.S. ko tona fakaʼuhiga Hili te Temi ʼo Sesu.
^ pal. 53 FAKAMATALA ʼO TE PĀKI: Neʼe sioʼi e he tuagaʼane pionie te ʼu ʼata viteo ʼe talanoa ai ki he kau faifakamafola neʼe olo ki he ʼu fenua ʼe ʼaoga lahi ai he kau faifakamafola. Hili ʼaia, ʼe ina fia muliʼi tanatou faʼifaʼitaki. Pea ʼe ina lava fakahoko leva tana fakatuʼutuʼu.