ALATIKE AKO 41
Ko He ʼu Ako Tohi-Tapu ʼe Iku Ki Te Papitema—ʼUluaki Koga
“ ʼE iloga ko koutou ko he tohi mai ia Kilisito neʼe matou tohi ʼi tomatou ʼuhiga tagata faifekau.”—2 KO. 3:3.
KATIKO 78 “Akoʼi Kia Natou Te Folafola ʼa Te ʼAtua”
TE ʼU MANATU FAKANOUNOU *
1. ʼE tokoni feafeaʼi mai ia 2 Kolonito 3:1-3, ke tou mahino ki te maʼuhiga ʼo te fai ʼo he ʼu ako Tohi-Tapu ʼe iku ki te papitema? (Vakaʼi te pāki ʼo te takafi.)
KOTEA ʼae ʼe ke logoʼi moka ʼe ke sio ki he tahi neʼe ako mo he tahi ʼo tau kokelekasio ʼe papitema? ʼE ke fiafia anai. (Mat. 28:19) Pea kapau ko koe ʼae neʼe ina fai tana ako, ʼe toe lahi age tau fiafia. (1 Tes. 2:19, 20) Ko te kau tisipulo foʼou ʼaia ʼe ko “he ʼu tohi ʼe vikiʼi” ai ia natou ʼae neʼe natou fai tanatou ako, ʼo feia mo te kokelekasio katoa.—Lau ia 2 Kolonito 3:1-3.
2. (1) Kotea te fehuʼi maʼuhiga ʼe tonu ke tou tali ki ai, pea kotea tona tupuʼaga? (2) Kotea te ako Tohi-Tapu? (Vakaʼi te kiʼi nota.)
2 ʼI te ʼu taʼu ʼe fa ʼaeni kua ʼosi, neʼe tou fai he ʼu ako Tohi-Tapu * ʼe teitei 10 000 000 ʼi te mahina fuli ʼi te malamanei katoa. ʼE ko he meʼa fakalotomalohi foki! Pea ʼi te ʼu taʼu fuli ʼaia, neʼe ko te toko 280 000 tupu hahaʼi neʼe natou papitema. Neʼe natou liliu ai ko he ʼu Fakamoʼoni ʼa Sehova, pea mo he ʼu tisipulo ʼa Sesu Kilisito. ʼE feafeaʼi hatatou tokoni ke lahi age te papitema ʼa te kau ako Tohi-Tapu. ʼE kei tuku pe e Sehova te fealagia ki te hahaʼi ke natou liliu ko he ʼu tisipulo ʼa Kilisito. Koia, ʼe tou faiga malohi ai ʼo tokoni ke natou foimo papitema. ʼEi, he ʼe kua nounou te temi.—1 Ko. 7:29, ʼuluaki koga; 1 Pet. 4:7.
3. Kotea ʼae ka tou vakaʼi anai ʼi te alatike ʼaeni?
* (Taag. 11:14; 15:22) ʼE fakaha ʼi te ʼu talamanatu ʼaia, pe ʼe kotea ʼae ʼe feala ke fai e ia ʼae ʼe ina fai te ako, pea mo ia ʼae ʼe ako ke fua lelei age te ako Tohi-Tapu. ʼI te alatike ʼaeni, ʼe tou vakaʼi anai he ʼu puani ʼe nima ʼe tokoni anai kia ia ʼae ʼe ako ke tuputupu fakalaumalie, pea mo papitema.
3 ʼI te maʼuhiga ʼaupito ʼo te fai ʼo he ʼu tisipulo ʼi te temi nei, neʼe fakakaukauʼi ai e te Kolesi Pule pe ʼe kotea ʼae ʼe feala ke fai, moʼo tokoni ki te kau ako Tohi-Tapu ke natou papitema. Koia, neʼe natou kole ai ki te ʼu filiale tanatou manatu ki te faʼahi ʼaia. ʼI te alatike ʼaeni mo ʼae ka hoa mai, ʼe tou vakaʼi anai te ʼu ako ʼe feala ke tou taʼofi mai he kau pionie, mo he kau misionea, pea mo he kau taupau ʼo te siliko faiva.FAI TE AKO ʼI TE VAHAʼA FULI
4. Kotea ʼae ʼe tonu ke tou mahino ki ai mo kapau ʼe tou fia tokoni ki he ako ke tuputupu ʼo papitema?
4 ʼE tokolahi te kau faifakamafola ʼe natou fai he ʼu ako ʼi te muʼa matapa. ʼE tuputupu ai te fia iloʼi ʼa te hahaʼi ia te Tohi-Tapu. Kae ʼe nounou te ʼu faipalalau ʼaia, pea ʼe mole fai ʼi te ʼu vahaʼa fuli. Koia, moʼo taupau te fia iloʼi ʼa he tahi, ko ʼihi kau faifakamafola ʼe natou kole age tona numelo telefoni. Feia la, ʼi muʼa ʼo hanatou fai he tahi ʼaʼahi, ʼe natou pauʼi ki ai, peʼe momoli age he manatu Fakatohi-tapu. ʼE feala ke lauʼi mahina tanā felogoi feia, kae ʼe tuputupu ai anai koa ʼo papitema mo kapau ʼe mole lahi age tona temi, mo ʼana faiga ki tana ako Tohi-Tapu? Kailoa ia.
5. Kotea te manatu ʼe fakaha lelei e Sesu ia Luka 14:27-33? Pea ʼe feafeaʼi te tokoni ʼa te manatu ʼaia ki ʼatatou ako?
5 ʼI te tahi ʼaho, neʼe fakamahino e Sesu pe ʼe kotea ʼae ʼe tonu ke fai e he tahi ʼe fia liliu ko hana tisipulo. Neʼe ina toʼo te faʼifaʼitaki ʼa he tagata ʼe ina fia laga hana tule, pea mo he hau ʼe alu ʼo tauʼi he tahi age hau. Neʼe ina ui ko te tagata ʼae ʼe ina laga tana tule, ʼe tonu ke “nofo ifo muʼa ki lalo ʼo fakafuafua tona totogi” moʼo vakaʼi pe ʼe ina fakaʼosi anai. Pea ʼe tonu ki te hau ke “nofo ifo muʼa ʼo kumi tokoni” ke ina iloʼi ai pe ʼe lava tauʼi ʼana kau solia tona fili. (Lau ia Luka 14:27-33.) Neʼe fakaha e Sesu ko he tahi ʼe fia liliu ko hana tisipulo, ʼe tonu ke ina vakavakaʼi fakalelei te ʼu meʼa ʼae ʼe tonu ke ina fai. Koia ʼae, ʼe tonu ai ke tou fakalotomalohiʼi he tahi ʼe fia liliu ko he tisipulo ke ina ako mo tatou te Tohi-Tapu ʼi te vahaʼa fuli. ʼO feafeaʼi?
6. Kotea ʼe feala ke ke fai ke tuputupu ia ia ʼae ʼe ke fai tana ako?
6 Ke ke faiga ke loaloaga age takolua faipalalau ʼi tona muʼa matapa. Ohage la moka ke ʼaʼahi ia ia, ʼe mole ke faipalalau anai mo ia ki he vaega pe ʼe tahi, kae kia vaega ʼe lua. Kapau kua mahani takolua faipalalau ʼaia, ʼe feala ke ke kole age ke koulua heheka ke hoko atu takolua faipalalau. ʼE fakaha atu anai ʼi tana tali, pe ʼe loto fakamalotoloto ki tana ako. Ki muli age moʼo tokoni ki ai ke tuputupu vave, ʼe feala ke ke kole age pe ʼe ina fia fai tana ako tuʼa lua ʼi te vahaʼa. Kae ke tuputupu ʼo papitema, ʼe mole gata pe ki te fai ʼo tana ako tuʼa tahi peʼe tuʼa lua ʼi te vahaʼa.
TEUTEUʼI LELEI TE AKO
7. ʼE feafeaʼi te teuteuʼi lelei te ako e ia ʼae ʼe ina fai te ako?
7 Ko ia ʼae ʼe ina fai te ako, ʼe tonu ke ina teuteuʼi lelei te ako ʼi te vahaʼa fuli. Kamata lau te ʼu palakalafe pea mo te ʼu vaega ʼo te kapite, peʼe ko te ako ʼae ka vakaʼi anai. Tokagaʼi te ʼu manatu tafito. Fakakaukauʼi te kupu tafito pea mo te ʼu kupu taki, mo te ʼu fehuʼi, mo te ʼu vaega ʼae ʼe tonu ke lau, pea mo te ʼu pāki. Filifili te ʼu ʼata viteo ʼae ka ke fakaha age. Pea ke ke manatuʼi tau ako pea mo feafeaʼi hau fakaha age te ʼu manatu ʼi hona aluʼaga ʼe faigafua mo tasilo. Pea ʼe faigafua anai tana mahino ki ai pea mo tona maʼuliʼi.—Nee. 8:8; Taag. 15:28, ʼuluaki koga.
8. Kotea ʼae ʼe feala ke tou kole kia Sehova maʼa tatatou ako, ʼo mulimuli kia Kolose 1:9, 10?
8 Moka ke teuteuʼi te ako, manatuʼi ʼo faikole kia Sehova maʼa tau ako pea mo te ʼu meʼa ʼae ʼe ʼaoga kia ia. Ke ke kole kia Sehova ke tokoni atu ke ke fakaʼaogaʼi te Tohi-Tapu ke malave ki tona loto. (Lau ia Kolose 1:9, 10.) Fakakaukauʼi pe ʼe ko te manatu fea ʼae ka faigataʼa tana mahino ki ai, peʼe ko te manatu fea ʼae ka mole ina tali. Pea ke ke manatuʼi ko tau fakatuʼutuʼu ke ke tokoni kia ia ke tuputupu ʼo papitema.
9. ʼE ke lava tokoni feafeaʼi ki tau ako ke ina teuteuʼi tana ako?
9 Ko ia ʼae ʼe fai tuʼumaʼu tana ako ʼe ina leleiʼia te ʼu meʼa fuli ʼae neʼe fai e Sehova mo Sesu, pea mo ina fia iloʼi he tahi ʼu meʼa. (Mat. 5:3, 6) Kae ke fua lelei kia ia ʼae ʼe ako, ʼe tonu ke tokaga lelei ki te ʼu meʼa ʼae ʼe ina ako. Pea ke feala hana fai te faʼahi ʼaia, tou fakamahino age ki ai ʼe maʼuhiga ʼaupito ke ina teuteuʼi fakatomuʼa tana ako. ʼE tonu ke ina lau te kapite, pea mo fakakaukauʼi pe ʼe feafeaʼi hana maʼuliʼi te ʼu manatu. Kotea ʼae ʼe feala ke ke fai moʼo tokoni ki ai? Teuteuʼi he kapite mo ia. * Fakamahino age pe ʼe feafeaʼi tana maʼu te tali ki he fehuʼi. Pea fakaha age ʼe feala pe hana fakailoga he ʼu kupu peʼe ko he ʼu kupuʼi palalau ke ina manatuʼi ai te tali. Pea ke tali ʼaki ʼana palalau mahani. ʼE feala ai hau iloʼi pe neʼe mahino lelei ki te ʼu manatu. Kae ʼe ʼi ai te tahi faʼahi ʼe feala ke ke fakalotomalohiʼi tau ako ke ina fai.
AKOʼI AGE KE FELOGOI MO SEHOVA ʼI TE ʼAHO FULI
10. He koʼe ʼe maʼuhiga kia ia ʼae ʼe ako ke ina lau te Tohi-Tapu ʼi te ʼaho fuli? Pea kotea ʼe tonu ke ina fai ke fua lelei kia ia?
10 ʼE mole gata pe ki tana fai ʼo tana ako ʼi te vahaʼa fuli, kae ʼe ʼi ai te tahi ʼu meʼa ʼe tonu ke ina fai ʼi te ʼaho fuli. ʼE tonu ke felogoi mo Sehova ʼo fakalogo pea mo palalau kia te ia. ʼE feala ke fakalogo ki te ʼAtua ʼi tana lau te Tohi-Tapu ʼi te ʼaho fuli. (Sos. 1:8; Pes. 1:1-3) Fakaha age pe ʼe feafeaʼi hana fakaʼaogaʼi te polokalama lau ʼo te Tohi-Tapu Fakafalani ʼae ʼe maʼu ʼi te jw.org. * Pea ʼe feala ke ina ta ʼi he moʼi pepa mo kapau ʼe loto ki ai. Ke fua lelei kia ia tana lau te Tohi-Tapu, ke ke tokoni kia ia ke ina fakakaukauʼi pe ʼe kotea ʼae ʼe ina ako ʼo ʼuhiga mo Sehova, pea mo feafeaʼi tana fakaʼaogaʼi ʼi tona maʼuli.—Gaue 17:11; Sakp. 1:25.
11. (1) ʼE ke lava tokoni feafeaʼi ki tau ako ke lelei tana faʼahiga faikole? (2) He koʼe ʼe maʼuhiga kia ia ʼae ʼe ako ke faikole tuʼumaʼu kia Sehova?
11 Fakalotomalohiʼi tau ako ke palalau kia Sehova ʼi te faikole ʼi te ʼaho fuli. ʼI te kamata pea mo te fakaʼosi ʼo te ako, ke ke faikole fakamalotoloto, pea ke ke palalau ʼo ʼuhiga mo tau ako ʼi tau faikole ʼaia. ʼI tana logo atu, ʼe ina ako ai anai te faikole fakamalotoloto, pea ʼe feala ke faikole kia Sehova ʼAtua ʼi te huafa ʼo Sesu Kilisito. (Mat. 6:9; Soa. 15:16) ʼI tana lau te Tohi-Tapu ʼi te ʼaho fuli, ʼe fakalogo ai ki te ʼAtua. Pea ʼi tana faikole, ʼe palalau ai kia te ia. Pea ʼe feala ai leva ke fakaovi kia Sehova. (Sakp. 4:8) Kapau ʼe ina fai te ʼu faʼahi ʼaia ʼi te ʼaho fuli, ʼe tuputupu anai ʼo foaki tona maʼuli kia Sehova pea mo papitema. Kotea ʼae ka toe tokoni anai kia ia?
TOKONI KI AI KE KAUMEʼA LELEI MO SEHOVA
12. ʼE feafeaʼi hatatou tokoni ki tatatou ako ke kaumeʼa lelei mo Sehova?
12 ʼE tonu ke malave ki te loto ʼo ia ʼae ʼe ako te ʼu meʼa ʼae ʼe ina ako. ʼE mole tonu pe ke ina ui ʼe lelei te ʼu manatu ʼaia. Kotea tona tupuʼaga? Koteʼuhi kapau ʼe malave ki totatou loto, ʼae ʼe fakaʼuhiga ki ʼotatou holi pea mo te ʼu meʼa ʼae ʼe tou logoʼi, ʼe ina uga anai tatou ke tou fai he ʼu gaue. Neʼe lahi te ʼu manatu neʼe akoʼi e Sesu ki te hahaʼi pea neʼe natou leleiʼia. Kae neʼe natou muliʼi ia te ia, he neʼe malave ki tonatou loto te ʼu meʼa ʼae neʼe natou logo ki ai. (Luka 24:15, 27, 32) ʼE tonu ke mahino ki tau ako ko Sehova ʼe maʼuli moʼoni, ko he tahi ʼe feala ke felogoi lelei mo ia. ʼE tonu ke liliu ia Sehova ko tana Tamai, mo tona ʼAtua pea mo tona Kaumeʼa. (Pes. 25:4, 5) Koia lolotoga tau fai te ako, fakatokagaʼi te ʼuluagaaga taulekaleka ʼo te ʼAtua. (Eke. 34:5, 6; 1 Pet. 5:6, 7) Kotea pe he meʼa ʼe kolua ako, fakaha age te ʼu kalitate ʼo te ʼAtua, ohage ko tona ʼofa, tana agalelei, pea mo tona manavaʼofa. Neʼe ui e Sesu ko te “ ʼofa kia Sehova tou ʼAtua” ʼe ko “te ʼuluaki fakatotonu ʼaia pea mo lahi age.” (Mat. 22:37, 38) Koia, faigaʼi ke tuputupu ʼi te loto ʼo tau ako, tona ʼofa ki te ʼAtua.
13. Kotea ʼae ʼe feala ke tokoni ki tau ako ke ina iloʼi te ʼuluagaaga taulekaleka ʼo Sehova?
13 Moka ke fai tana ako, fakamahino age pe ʼe koʼe ʼe ke ʼofa ia Sehova. ʼE mahino ai anai ʼe toe ʼaoga kia ia ke kaumeʼa lelei mo Sehova, pea mo ako ke ʼofa kia te ia. (Pes. 73:28) Ohage la, ʼe maʼu koa ʼi he vaega, peʼe ʼi te tohi ʼae ʼe kolua vakaʼi he manatu ʼe ha ai te ʼofa ʼo Sehova, peʼe ko tona poto, peʼe ko tona faitotonu, peʼe ko tona mafimafi? ʼE malave koa te manatu ʼaia kia koe? Fakaha age ki tau ako. Pea mo fakamahino age ʼe ko te kalitate tafito ʼaia ʼae ʼe tupu ai tou ʼofa ki tau Tamai ʼae ʼi selo. Kae ʼe ʼi ai te tahi age meʼa ʼe tonu ke ina fai ke tuputupu ai ʼo papitema.
FAKALOTOMALOHIʼI IA IA KE KAU KI TE ʼU FONO
14. Kotea te ʼu manatu ia Hepeleo 10:24, 25, ʼe feala ke tokoni kia ia ʼae ʼe ako ke tuputupu?
14 ʼE tou loto fuli ke tuputupu ʼatatou Pes. 111:1) ʼE fakamahino age e ʼihi faiako ʼe lahi age anai te ʼu meʼa ʼae ʼe natou ako ʼi te ʼu fono, ʼi tanatou ako ʼae ʼe fai ʼi te vahaʼa fuli. Lau ia Hepeleo 10:24, 25 mo tau ako, pea fakamahino age te ʼu lelei ʼae ʼe ina maʼu anai mo kapau ʼe kau ki te ʼu fono. Kolua vakaʼi te ʼata viteo Kotea ʼAe ʼe Fai ʼi Te ʼu Fale Fono? * Tokoni ki tau ako ke kau tuʼumaʼu ki te ʼu fono.
ako ʼo papitema. Moʼo tokoni ki ai, tou fakalotomalohiʼi natou ke natou kau ki te ʼu fono ʼo te kokelekasio. ʼE ui e he ʼu faiako faiva ʼo te Tohi-Tapu, ʼe tuputupu vave te kau ako ʼae ʼe kau ki te ʼu fono ʼi te kamata pe ʼo tanatou ako. (15. ʼE feafeaʼi hatatou fakalotomalohiʼi tatatou ako ke kau tuʼumaʼu ki te ʼu fono?
15 ʼE feafeaʼi hau fakalotomalohiʼi tau ako mo kapau heʼeki kau ki he fono, peʼe haʼu tahitahiga? Ke mole gata pe ʼi tau fakaafe ia ia, kae ʼe feala ke ke palalau fakafiafia age ki he manatu neʼe ke ako ʼi te fono, ke tupu ai hana fia kau ki ai. Foaki age Te Tule Leʼo mo te Kaupepa Ako Te Maʼuli Fakakilisitiano Mo Te Faifakamafola ʼo te mahina. Fakaha age te ʼu manatu ʼae ka vakaʼi anai ʼi te fono, pea mo fehuʼi age pe ʼe kotea la te ʼu manatu ʼae ʼe ina leleiʼia. ʼE kehe anai ʼi te tahi age ʼu lotu te ʼu meʼa ʼae ka sio mo logo ki ai ʼi tana ʼuluaki fono. ʼE mahino papau ia ʼe malave anai kia ia. (1 Ko. 14:24, 25) Pea ʼe felaveʼi anai ʼi ʼatatou fono mo he ʼu hahaʼi ʼe natou tuku he faʼifaʼitaki lelei, pea ʼe natou tokoni anai kia ia ke tuputupu ʼo papitema.
16. Kotea ʼe tonu ke tou fai ke tuputupu tatatou ako ʼo papitema, pea kotea ʼae ka tou vakaʼi anai ʼi te alatike ka hoa mai?
16 Kotea ʼe tonu ke tou fai ke tuputupu tatatou ako ʼo papitema? Tou tokoni kia ia ke mahino ki te maʼuhiga ʼo tana ako, ʼo fai ʼi te vahaʼa fuli pea ke ina teuteuʼi lelei. Fakalotomalohiʼi ia ia ke felogoi mo Sehova ʼi te ʼaho fuli, pea ke kaumeʼa lelei mo Ia. Pea tou faigaʼi ke fia kau ki ʼatatou fono. (Vakaʼi te fakamatala ʼae ʼi te ʼa takai “ Te ʼu Meʼa ʼAe ʼe Tonu Ke Fai e Ia ʼAe ʼe Ako,” ʼi te pasina 12.) Kae, ʼe tou vakaʼi anai ʼi te alatike ka hoa mai he tahi ʼu puani ʼe nima ʼe tonu ke fai e te faiako ke tuputupu tana ako ʼo papitema.
KATIKO 76 Te Fiafia ʼe Ke Logoʼi ʼi Tou Loto
^ pal. 5 Ka tou akoʼi he tahi, ʼe tou tokoni ki ai ke ina fetogi tana faʼahiga manatu, mo te ʼu meʼa ʼae ʼe ina logoʼi, pea mo tana aga. ʼE fakamanatuʼi mai e te koga tohi ʼo te taʼu 2020, ia Mateo 28:19, te maʼuhiga ʼae ke tou fai he ʼu ako Tohi-Tapu. ʼE tonu ke tou akoʼi ki te hahaʼi te meʼa ʼae ʼe tonu ke natou fai ke natou liliu ko he ʼu tisipulo ʼa Sesu Kilisito, pea mo papitema. ʼE tou vakaʼi anai ʼi te alatike ʼaeni pea mo ʼae ka hoa mai, pe ʼe feafeaʼi hatatou hikihiki ke lelei age tatatou fai te gaue maʼuhiga ʼaia.
^ pal. 2 HE ʼU FAKAMAHINO: ʼE lau ko he ako Tohi-Tapu, mo kapau ʼe kotou faipalalau tuʼumaʼu mo he tahi ki te Tohi-Tapu pea mo faihoholo. ʼE feala ke tohi ʼe ko he ako, mo kapau ʼe kua fai tuʼa lua ʼi te ʼosi fakahaha age te faʼahiga fai ʼo te ako, pea mo kapau ʼe kotou tui ʼe hoko atu anai te ako.
^ pal. 3 ʼE toe maʼu ʼi te ʼu alatike ʼaeni, he ʼu manatu neʼe toʼo mai Te Minisitelio ʼo Te Puleʼaga ʼo Sulio 2004 ki Maio 2005 ʼi te ʼu alatike “Tou Fai He ʼu Ako Tohi-Tapu ʼe Tuputupu.”
^ pal. 9 Vakaʼi te ʼata viteo ʼe minuta fa Tou Tokoni Ki ʼAtatou Kau Ako Ke Natou Teuteuʼi ʼi te jw.org®, alu ki TOHI > ʼATA VITEO > FONO MO FAIFAKAMAFOLA > KE LELEI AGE TATATOU MINISITELIO.
^ pal. 10 Alu ki LA BIBLE ET VOUS > OUTILS D’ÉTUDE DE LA BIBLE.
^ pal. 14 ʼI te JW Library®, alu ki MULTIMÉDIA > NOS RÉUNIONS ET NOTRE MINISTÈRE > OUTILS POUR LA PRÉDICATION.