Lolotoga te taʼu ʼaia, neʼe fai e te kautahi ni fetogi pea neʼe tokoni ai ki te kau Ako Tohi-Tapu ke natou tauhi ʼi te logo tahi. Neʼe tuʼu ʼi Te Tule Leʼo te fakamahino ʼo te ʼu vaega ʼae neʼe vakaʼi ʼi te fono ʼo te vahaʼa, ʼae neʼe higoa ko “Te Fono ʼo Te Faikole Pea Mo Te Fakavikiviki Kia Sehova.” Neʼe toe ta mo he kaletalio neʼe tuʼu ai te ʼu vaega ʼaia, mo te numelo ʼo he katiko neʼe feala ke natou hiva ʼi tanatou ako takitokotahi peʼe ʼi tanatou ako fakafamili.

ʼI ʼanatou fono, neʼe feala ki te kau Ako Tohi-Tapu ke natou fakamatala he aluʼaga neʼe hoko ʼi te faifakamafola, peʼe ko he tupuʼaga neʼe natou fia fakamalo ai kia Sehova. Neʼe toe feala ke natou hiva mo he katiko pe neʼe feala pe la ke natou fai he kole. ʼE ui fenei e te tuagaʼane ko Eva Barney, ʼae neʼe papitema ʼi te 1923 ʼi tona taʼu 15: “Ka neʼe fia fai e he tahi hana fakamatala, neʼe tonu ke tuʼu ake pea mo ina ui: ‘ ʼE au fia fakamalo ki te ʼAliki he neʼe agalelei kia au.’ ” Neʼe loaloaga te faifakamatala ʼa ʼihi. ʼE hoko atu fenei e te tuagaʼane ko Barney: “Neʼe lahi te ʼu aluʼaga neʼe fia fakamalo ai te tehina ko Godwin ki te ʼAliki. Kae ka neʼe tokagaʼi e tona ʼohoana neʼe kua loaloaga fau ʼia e te tehina ʼae neʼe ina takitaki te fono, pea neʼe ina toho mamalie te kofu ʼo tona ʼohoana. Neʼe fakagata ai e te tehina ko Godwin tana faifakamatala pea toe heka leva.”

Tuʼa tahi ʼi te mahina, neʼe makehe te fai ʼo te Fono ʼo Te Faikole Pea Mo Te Fakavikiviki. ʼI Te Tule Leʼo ʼo te ʼaho 1 ʼo Apelili 1923, neʼe fakamahino ai te faʼahiga fai ʼo te fono ʼaia. Neʼe ui ai: “Ko te vaelua ʼo te fono ʼe fai ai anai he ʼu fakamatala ʼo ʼuhiga mo te faifakamafola pea mo fakalotomalohiʼi te kau gaue. . . . ʼE matou tui papau ʼe logo tahi anai te ʼu tehina mo tuagaʼane ʼaki te ʼu fono fakalotomalohi ʼaia.”

Ko te tehina ko Charles Martin, neʼe lahilahi ake ʼi te kolo ko Vancouver, ʼi Kanata. Neʼe taʼu 19 ʼi te temi ʼaia, pea neʼe fua lelei ʼaupito te ʼu fono ʼaia kia ia. ʼE ina manatuʼi fenei: “Neʼe au iloʼi ai leva te ʼu palalau ʼae neʼe tonu ke au fai ʼi te ʼu matapa. Neʼe tau fakamatala e he tahi hana faipalalau ʼi te faifakamafola. Neʼe ʼaoga ai kia au, ke au iloʼi te ʼu palalau ʼae ʼe tonu ke au fai pea mo te faʼahiga tali ki he tahi ʼe fakafeagai mai.”

Neʼe toe lahi age te logo tahi ʼa te ʼu tehina he neʼe fakatuʼutuʼu leva “He ʼu ʼAho Ki Te Faifakamafola.”  ʼI Te Tule Leʼo ʼo te ʼaho 1 ʼo Apelili 1923, neʼe fakaha ai te fakatuʼutuʼu foʼou ʼaeni: “Ke tou logo tahi fuli ʼi he gaue ʼe tahi . . . ʼe fakatuʼutuʼu anai ʼi te Feliatolu ʼaho 1 ʼo Maio ke tou faifakamafola fuli ai, pea ʼe feia pe anai ʼi te ʼu ʼuluaki Feliatolu fuli ʼo te mahina. Ko te kau faifakamafola fuli ʼo te kokelekasio ʼe natou fakaʼaogaʼi anai he temi ke natou faifakamafola ai.”

Maʼia mo te kau Ako Tohi-Tapu ʼae neʼe kei tupulaga neʼe natou kau ki te gaue ʼaia. ʼE ui fenei e te tuagaʼane ko Hazel Burford ʼae neʼe taʼu 16 ʼi te temi ʼaia: “Neʼe tuʼu ʼi te kaupepa ʼae ko te Bulletin he ʼu faipalalau neʼe tonu ke matou maʼu loto.” a Neʼe lahi taku kau mo taku kui tagata ki te ʼu gaue fuli ʼaia.” Kae neʼe punamaʼuli totatou tuagaʼane he neʼe mole loto te tahi tehina ke kau ia ia ki te faifakamafola. ʼE fakamatala fenei e te tuagaʼane ko Hazel: “Ko te tehina agalelei neʼe kua matuʼa, neʼe mole ina loto ke au palalau ki te hahaʼi. ʼI te temi ʼaia, neʼe mole mahino ʼihi ko te kau Ako Tohi-Tapu fuli, ʼo kau ai ‘te kau talavou mo te kau finemui,’ neʼe tonu ke fakavikiviki mo natou ki totatou Tupuʼaga Lahi.” (Pes. 148:​12, 13) Kae neʼe mole lotovaivai ai totatou tuagaʼane. Ki muli age, neʼe kau ki te lua kalasi ʼo te Fale Ako ʼo Kileate pea neʼe misionea ʼi Panama. ʼAki te temi, neʼe fetogi leva e te ʼu tehina tanatou manatu ʼo ʼuhiga mo te kau ʼa te ʼu tupulaga ki te faifakamafola.

Neʼe toe ʼaoga te ʼu fakatahi ke logo tahi ai te ʼu tehina mo tuagaʼane. Neʼe fakatuʼutuʼu ʼi te ʼu fakatahi ʼaia he ʼu ʼaho ki te faifakamafola. Ohage la ʼi te fakatahi neʼe fai ʼi te kolo ko Winnipeg ʼi Kanata, neʼe fakaafe ʼi te ʼaho 31 ʼo Malesio ia te nofoʼaki katoa ke natou olo ʼo faifakamafola ʼi te kolo ʼaia. ʼI te ʼu ʼaho faifakamafola makehe ʼaia neʼe lahi te hahaʼi neʼe maʼu pea neʼe ʼi ai ʼona ʼu fua lelei. ʼI te ʼaho 5 ʼo ʼAukusito, ʼi te tahi fakatahi neʼe fai ʼi te kolo pe ko Winnipeg, neʼe ko te toko 7 000 hahaʼi neʼe kau ki ai.

ʼI te ʼaho 18 ki 26 ʼo ʼAukusito 1923, neʼe fai ai e te hahaʼi ʼa Sehova te fakatahi maʼuhiga ʼi te kolo ko Los Angeles, ʼi Californie. ʼI te ʼu vahaʼa ʼi muʼa ʼo te fai ʼo te fakatahi, neʼe fakaha ʼi te ʼu sulunale te fakatahi ʼaia pea neʼe tufa e te kau Ako Tohi-Tapu  te ʼu pepa fakaafe ʼe 500 000. Pea neʼe toe fakahaha ʼi te ʼu ka ʼo feia mo te ʼu motoka ʼa ʼihi tehina.

ʼI te Moeaki ʼaho 25 ʼo ʼAukusito, neʼe fai e te tehina ko Rutherford te akonaki, ko tona kupu tafito “Te ʼu Ovi Mo Te ʼu Tao.” Neʼe ina fakamahino lelei ai ko “te ʼu ovi” ʼe ko te ʼu hahaʼi ʼae ʼe natou leleiʼia te faitotonu pea ka maʼuʼuli anai ʼi te palatiso ʼi te kele. Neʼe ina toe lau mo te fakapapau ko tona kupu tafito “He Fakatokaga.” Neʼe fakaha ai te ʼu aga kovi ʼa te Keletiate pea mo fakalotomalohiʼi te hahaʼi loto fakamalotoloto ke natou mavae mai “Papiloni Lahi.” (Fkha. 18:​2, 4) Ki muli age, neʼe tufa e te kau Ako Tohi-Tapu ʼi te kele katoa ia pepa ʼe lauʼi miliona neʼe tuʼu ai te fakapapau ʼaia.

ʼI te ʼaho fakaʼosi ʼo te fakatahi, ko hahaʼi ʼe toko 30 000 tupu neʼe fakalogo ki te akonaki ʼa te tehina ko Rutherford. Ko te kupu tafito ʼo tana akonaki “ ʼE Kaku Anai Te ʼu Puleʼaga Fuli Ki Alamaketone, Kae ʼe Ko Te Toko Miliona Hahaʼi ʼe Mole Natou Mamate Anai.” Neʼe iloʼi e te kau Ako Tohi-Tapu ʼe kauga malie anai te hahaʼi, koia neʼe natou lue te foʼi fale gaoʼi lahi ʼi Los Angeles neʼe hoki ʼosi age pe tona faʼu. Pea ke logo lelei te nofoʼaki, neʼe natou fakaʼaogaʼi te ʼu fakatagi ʼo te malaʼe, neʼe ko he ʼu meʼa gaue foʼou ʼi te temi ʼaia. Tokolahi neʼe natou toe muliʼi te akonaki ʼi te latio.

ʼI te taʼu 1923 neʼe iloga te tuputupu ʼo te gaue faifakamafola ʼi Afelika, mo Eulopa, mo Initia pea mo Amelika Saute. ʼI Initia, ko te tehina ko A. J. Joseph neʼe tokaga ki tona kiʼi famili, tona ʼohoana mo ʼana tamaliki ʼe toko ono, pea neʼe toe tokoni ki te ta ʼo te ʼu tohi ʼi te ʼu lea Hindi, mo Tamoul, mo Telugu, pea mo Urdu.

Neʼe ʼaoga he tokoni ʼi Sierra Leone. Koia neʼe faitohi ai te ʼu tehina ko Alfred Joseph pea mo Leonard Blackman ki ʼatatou ʼu pilo fakamalamanei ʼae neʼe tuʼu ʼi Brooklyn, ʼi New York. ʼI te ʼaho 14 ʼo Apelili 1923, neʼe tali ai tanā kole. ʼE fakamatala e Alfred: “ ʼI te Moeaki poʼuli, neʼe tagi ia te telefoni pea neʼe au tali.” Neʼe fehuʼi age ai e he tagata: “Ko koe ʼae neʼe faitohi ki te Sosiete Watch Tower ʼo kole he kau faifakamafola?” Neʼe tali e Alfred: “ ʼEi, ko au.” Pea neʼe ui e te tagata: “ ʼIo, pea koʼeni au kua au ʼi heni.” Ko te tagata ʼaia neʼe ko te tehina ko William R. Brown. Neʼe hoki tau age pe mai te ʼu Antilles mo tona ʼohoana ko Antonia pea mo ʼanā taʼahine ʼe toko lua ko Louise mo Lucy. Neʼe mole tuai ai te felaveʼi ʼa te ʼu tehina mo te kiʼi famili ʼaia.

ʼE hoko atu fenei e Alfred: “ ʼI te uhu ake, neʼe mā lolotoga faipalalau mo Leonard ki te Tohi-Tapu mo te ʼasi age ʼa he toe tagata lahi, ʼi  te muʼa matapa. Neʼe ko te tehina ko Brown. Neʼe ko he tahi neʼe faʼafai ʼi te moʼoni, koia neʼe ina fia fai atu aipe he akonaki ki te kauga malie ʼi te ʼaho ake.” Neʼe heʼeki ʼosi pe la te mahina, kae neʼe kua tufa e te tehina ko Brown te ʼu tohi fuli ʼae neʼe haʼu mo ia. Neʼe toe momoli age ki ai te ʼu tohi ʼe 5 000. Mole fualoa, neʼe kua ʼosi fuli ʼi tana tufa. Kae maʼa te hahaʼi, neʼe mole ko he tagata tufa tohi. ʼI tana tauhi fualoa kia Sehova, neʼe ina fakaʼaogaʼi tuʼumaʼu pe ia te Tohi-Tapu moka faiakonaki. Koia neʼe fakahigoaʼi ia ia e te hahaʼi ko Brown te Tohi-Tapu.

ʼI Siamani, neʼe fai e te ʼu tehina te tonu ʼae ke kumi he tahi koga meʼa ke fakatuʼu ai te Petele ʼae neʼe ʼi te kolo ko Barmen he neʼe kua veliveli. Pea neʼe natou toe logo neʼe ʼamanaki ʼohofi e te ʼu solia Falani ia te kolo. Neʼe maʼu e te kau Ako Tohi-Tapu he ʼu fale ʼi te kolo ko Magdebourg, pea neʼe feʼauga ʼosi ki te ʼu masini ta tohi. ʼI te ʼaho 19 ʼo Sunio, neʼe kua ʼosi fafaʼo te ʼu meʼa gaue ta tohi pea mo te tahi ʼu meʼa pea natou olo ai ki te Petele foʼou ʼi Magdebourg. Neʼe fakaha e te ʼu tehina ki ʼatatou pilo fakamalamanei kua natou nonofo ʼi te Petele foʼou. Pea ʼi te ʼaho ake pe neʼe tala ʼi te ʼu sulunale kua ʼohofi e te ʼu solia Falani ia te kolo ko Barmen. Neʼe fakamalo ai te ʼu tehina kia Sehova, ʼi tana haga puipui natou pea mo tokoni kia natou.

Ko George Young, ʼae neʼe lahi tana faifolau moʼo fakamafola te logo lelei, neʼe ina fakatuʼu ʼi Pelesile he Petele pea mo ina kamata ta Te Tule Leʼo ʼi te Fakapotukalia. Hili ni kiʼi mahina, neʼe kua ina tufa ni tohi ʼe 7 000. Neʼe toe fiafia lahi foki mo te tuagaʼane ko Sarah Ferguson ʼi te tau age ʼa te tehina ko Young. Talu mai te taʼu 1899 mo tana lau ia Te Tule Leʼo. Pea logo la neʼe kua ina foaki tona maʼuli kia Sehova kae neʼe heʼeki papitema. Koia, hili ki ai ni mahina, neʼe papitema leva ia te tuagaʼane ko Ferguson mo ʼana fanau ʼe toko fa.

ʼI te fakaovi ʼae ki te fakaʼosi taʼu, neʼe fakaha ʼi Te Tule Leʼo ʼo te ʼaho 15 ʼo Tesepeli 1923 te ʼu fua lelei ʼo te ʼu faiga ʼa te kau Ako Tohi-Tapu ke natou tauhi ʼi te logo tahi. Neʼe tohi fenei ai: “ ʼE ha lelei ko te ʼu kokelekasio . . . kua malolohi ʼi te faʼahi fakalaumalie . . . Tou kofuʼi totatou kofu tau pea ʼaki he faʼafai mo he lotomalohi ʼe lahi age, tou hoko atu ʼatatou faiga ʼi te taʼu ʼaeni ka hoko mai. Tou haga haʼele ki muʼa mo he loto fiafia.”

Neʼe toe hoko ni aluʼaga fakafiafia maʼa te kau Ako Tohi-Tapu ʼi te taʼu ʼae neʼe hoa mai. Neʼe kua kamata e te ʼu tehina ʼo te Petele te ʼu gaue laga fale ʼi te kolo ko Staten Island, ʼae ʼe ovi ki Brooklyn, neʼe tuʼu ai te ʼu pilo fakamalamanei. Pea neʼe ʼosi leva te ʼu gaue ʼi te kamata pe ʼo te taʼu 1924. Neʼe feala ai ke toe malohi age te logo tahi ʼa te kau Ako Tohi-Tapu pea mo fakaʼaogaʼi he ʼu faʼahiga fai ʼe foʼou moʼo fakamafola te logo lelei.