ʼI te ʼu taʼu ʼe 40 ʼae neʼe maʼuʼuli ai te kau Iselaele ʼi te toafa, neʼe ko tanatou meʼa kai tafito neʼe ko te mane. (Eke. 16:35) Pea neʼe toe foaki tuʼa lua e Sehova te ʼu kiʼi manulele ke natou kai. (Eke. 16:12, 13; Num. 11:31) Kae neʼe toe kai foki te kau Iselaele te tahi age ʼu meʼa kai.

Ohage la, ʼi ʼihi lakaga, neʼe taki e Sehova tana hahaʼi ki “he koga meʼa ke natou malolo ai” pea neʼe natou maʼu ai te vai mo he meʼa kai. (Num. 10:33) Ohage la ko te koga meʼa ko Elimi “ ʼae neʼe ʼi ai ni matapuna vai ʼe 12 pea mo ni fuʼu palema ʼe 70” neʼe fua. (Eke. 15:27) ʼE ui ʼi te tohi ʼe talanoa ki te ʼu fuʼu ʼakau ʼo te temi muʼa, neʼe lahi te ʼu koga meʼa neʼe fua ai te ʼu fuʼu palema pea neʼe ko te meʼa kai ʼaia ʼi te toafa. Neʼe toe fakaʼaogaʼi te ʼu fua palema moʼo fai ʼaki he moʼi lolo pea neʼe fakamalumalu te hahaʼi ʼi te ʼu lalo palema.

Neʼe lagi toe fakatuʼu te nofoʼaga ʼa te kau Iselaele ʼi te tahi matapuna vai lahi ʼe higoa ʼi te temi nei ko Feiran. ʼE tuʼu te matapuna vai ʼaia ʼi te faʼahi ʼo te Vai Tafe Feiran. a ʼE fakaha ʼi te tohi (Discovering the World of the Bible) ko te vai tafe ʼaia ʼe loa ia kilometa e 130. ʼE ko te vai tafe ʼae ʼe loa age, mo matalelei age pea mo iloa age ʼi te ʼu vai tafe ʼo te koga meʼa ko Sinai. ʼE toe ui ʼi te tohi ʼaia kapau ʼe haʼele he tahi ia kilometa ʼe 45 mai te faʼahi ʼae ʼe to ai te vai tafe ʼaia ki te tai, ʼe kaku ki te Matapuna Vai ko Feiran. ʼE tuʼu te matapuna vai ʼaia ia meta ʼe 610 mai te fuga tai. ʼE lahi ai te ʼu fuʼu palema pea ʼuhi ʼae ʼe matalelei ʼaupito, neʼe tau fakatatau ki te ʼoloto ʼo Eteni. Ia taʼu ʼe lauʼi afe, neʼe ʼomai te hahaʼi ki ai ʼuhi ko te ʼu fua ʼo te ʼu fuʼu palema.

ʼI te mavae ʼa te kau Iselaele mai Esipito, neʼe natou ʼave te falaoa ʼae kua natu, mo ni natuʼaga falaoa, pea lagi mo ni tegaʼi ʼakau mo te lolo. ʼE mahino ia neʼe mole tologa te ʼu meʼa kai ʼaia. Neʼe natou toe ʼave foki mo “ni faga ovi pea mo ni faga pipi, neʼe ko he toe faga manu.” (Eke. 12:34-39) Kae ʼuhi ko te ʼu aluʼaga faigataʼa ʼae ʼi te toafa, neʼe lagi lahi te ʼu manu neʼe mamate. Ko ʼihi manu neʼe lagi kai e te kau Iselaele. Pea ko ʼihi manu neʼe lagi sakilifisioʼi, maʼia ki te ʼu ʼatua loi. b (Gaue 7:39-43) Logo la te faʼahi ʼaia, kae  neʼe kei maʼu pe e te kau Iselaele he ʼu manu. ʼE ha te faʼahi ʼaia ʼi te ʼu palalau ʼae neʼe fai e Sehova ki tana hahaʼi ʼi tanatou talagataʼa. Neʼe ina ui fenei: “ ʼE liliu anai ʼokotou foha ko ni tagata tauhi manu ʼi te toafa lolotoga taʼu ʼe 40.” (Num. 14:33) Koia, neʼe lagi natou inu huʼa pipi mo kai ai he kanoʼi manu. Kae ʼe mahino ia neʼe mole feʼauga moʼo fafaga ʼaki te toko tolu miliona hahaʼi lolotoga taʼu ʼe 40. c

Neʼe natou maʼu ʼifea he meʼa kai mo he vai maʼa te ʼu manu? d ʼI te temi ʼaia, neʼe feala ke to he ʼu ʼua lalahi pea mo lahi ai te vao ʼakau ʼi te toafa. ʼE ui ʼi te tohi (Fakafalani) Étude perspicace des Écritures Tohi 1, ia taʼu e 3 500 ki muʼa atu neʼe lahi age ai te vai ʼi te temi nei. ʼE tou iloʼi te faʼahi ʼaia ʼuhi ko te lahi pea mo te loloto ʼo te ʼu takele vai tafe ʼae kua mamaha kae neʼe fonu vai ʼi te temi muʼa. Kae logo la neʼe lahi te vai ʼi te toafa, kae neʼe mole lahi ai te ʼulu ʼakau pea neʼe fakamatakutaku. (Tet. 8:14-16) Ka na ʼaua la te vai ʼae neʼe foaki fakamilakulo age e Sehova, neʼe mahino ia neʼe mamate fuli te hahaʼi mo te ʼu manu.​—Eke. 15:22-25; 17:1-6; Num. 20:2, 11.

Neʼe ui e Moisese ki te kau Iselaele neʼe fafaga natou e Sehova ʼaki te mane ke natou “mahino ai ʼe mole maʼuli pe te tagata ki te pane kae ki te ʼu folafola fuli ʼae ʼe haʼu mai ia Sehova.”—Tet. 8:3.