ALATIKE AKO 42
KATIKO 103 Te ʼu Tauhi Ovi Ko He ʼu Meʼa ʼOfa ʼo Te ʼAtua
Ke Ke Lotofakafetaʼi Lahi Ki Te ʼu “Tagata Ohage Ko Ni Meʼa ʼOfa”
“ ʼI tana hake ki ʼoluga . . . , neʼe ina foaki he ʼu tagata ohage ko ni meʼa ʼofa.”—EFE. 4:8.
TE MANATU TAFITO
ʼE tou vakaʼi pe kotea te tokoni ʼe tou maʼu mai te ʼu tagata faifekau fakaminisitelio, mo te ʼu tagata ʼafeā, pea mo te ʼu taupau fakasiliko. Pea ʼe tou toe vakaʼi anai pe ʼe feafeaʼi hatatou fakaha tatatou lotofakafetaʼi ki te ʼu gaue, ʼae ʼe fakahoko e te ʼu tagata agatonu ʼaia.
1. Kotea te ʼu meʼa ʼofa neʼe foaki mai e Sesu?
ʼE MOLE he tahi ʼe tatau tana lotofoaki ohage ko Sesu. ʼI tana ʼi te kele, neʼe ina fakaʼaogaʼi lahi tona malohi moʼo fai ni milakulo ke tokoni ki ʼihi. (Luka 9:12-17) Neʼe ina foaki mai te meʼa ʼofa ʼae ʼe lahi tokotahi, ʼo ina momoli mai tona maʼuli maʼa tatou. (Soa. 15:13) Pea talu mai tona fakatuʼuake, ʼe hoko atu pe tana lotofoaki. Ohage ko tana fakapapauʼi mai, neʼe ina kole kia Sehova ke ina foaki mai tona laumalie maʼoniʼoni ke akoʼi ai tatou pea mo fakalotofimalieʼi. (Soa. 14:16, 17; 16:13) Pea tahi, ʼaki ʼatatou fono ʼe hoko atu pe tana foaki mai te ʼu meʼa ʼae ʼe aoga mai kia tatou moʼo fai ni tisipulo ʼi te kele katoa.—Mat. 28:18-20.
2. Ko ai te ʼu “tagata ohage ko ni meʼa ʼofa” ʼae ʼe palalau ki ai ia Efeso 4:7, 8?
2 Tou talanoa ki he tahi meʼa ʼofa neʼe foaki mai e Sesu. Neʼe ui e te apositolo ko Paulo ʼi te ʼosi hake ʼa Sesu ki selo, “neʼe ina foaki he ʼu tagata ohage ko ni meʼa ʼofa.” (Lau ia Efeso 4:7, 8.) Neʼe fakamahino e Paulo ko ‘te ʼu tagata ʼaia ohage ko ni meʼa ʼofa,’ neʼe foaki e Sesu moʼo fakalotomalohiʼi te kokelekasio ia aluʼaga kehekehe. (Efe. 1:22, 23; 4:11-13) Ia ʼaho nei, ko ‘te ʼu tagata ʼaia ohage ko ni meʼa ʼofa,’ ʼe kau ai te kau tagata faifekau fakaminisitelio, mo te kau tagata ʼafeā pea mo te kau taupau fakasiliko. a ʼE moʼoni, ko te ʼu tagata ʼaia ʼe mole natou haohaoa pea ʼe natou fai ni lakahala. (Sakp. 3:2) Kae ʼe fakaʼaogaʼi natou e totatou ʼAliki ko Sesu Kilisito moʼo tokoni kia tatou. Koia ʼae ko natou ʼe ko he ʼu meʼa ʼofa neʼe ina foaki mai.
3. Fakamahino ʼaki he faʼifaʼitaki pe ʼe feafeaʼi hatatou tokoni ki ‘te ʼu tagata ʼaia ohage ko ni meʼa ʼofa.’
3 Neʼe tuku e Sesu ki te ʼu tagata ʼaia ia te gaue maʼuhiga ʼae ko te fakalotomalohiʼi ʼo te kokelekasio. (Efe. 4:12) Pea ʼe feala ke tou tokoni fuli kia natou ke natou fakahoko lelei te gaue maʼuhiga ʼaia. Ohage la ko te laga ʼo he fale fono. Ko ʼihi ʼe gaue ʼi te laga fale pea ko ʼihi leva ia ʼe tokoni kia natou, ʼo natou aumai te meʼa kai, mo tonatou feʼaveʼaki pea mo te fakahoko ʼo ʼihi atu gaue. ʼE toe feia pe, ʼe feala tatatou tokoni fuli ki te kau tagata faifekau, mo tagata ʼafeā pea mo te kau taupau fakasiliko ʼaki ʼatatou palalau mo gaue. ʼE tou iloʼi neʼe foaki mai e Sesu ‘te ʼu tagata ʼaia ohage ko ni meʼa ʼofa.’ Koia, tou vakaʼi pe kotea te ʼu fua lelei ʼe tou maʼu mai tanatou gaue kinakina pea mo feafeaʼi hatatou lotofakafetaʼi kia natou pea mo Sesu.
ʼE FAKAHOKO E TE ʼU TAGATA FAIFEKAU HE ʼU GAUE MAʼUHIGA
4. Kotea te ʼu faʼahiga gaue maʼuhiga neʼe fakahoko e te ʼu tagata faifekau ʼi te ʼuluaki sekulo?
4 ʼI te ʼuluaki sekulo, neʼe fakanofo ʼihi ko ni tagata faifekau. (1 Tim. 3:8) ʼE hage ko natou ʼaia neʼe palalau ki ai Paulo ʼi tana tohi ʼae ko ʼihi neʼe natou ‘tokoni ki ʼihi.’ Ko tona fakaʼuhiga neʼe natou fakahoko he ʼu gaue maʼuhiga maʼa te kokelekasio. (1 Ko. 12:28) ʼE ha mai ai neʼe tokaga tafito te kau tagata ʼafeā ki te faiakonaki mo te ʼu gaue fakatauhi ovi, he neʼe tokakakga te ʼu tagata faifekau ia ki ʼihi atu gaue maʼuhiga. Ohage la, ʼe lagi neʼe natou tokoni ki te ta mo te hiki ʼo te ʼu tohi Tapu-Tapu, pe neʼe natou totogi te ʼu meʼa gaue ʼae neʼe ʼaoga ki te ʼu tagata hiki tohi.
5. Kotea ʼihi gaue maʼuhiga ʼe toe tuku age ki te kau tagata faifekau ke natou fakahoko ia ʼaho nei?
5 Tou talanoa ki ʼihi gaue maʼuhiga ʼe tuku age ki te kau tagata faifekau. (1 Pet. 4:10) ʼE natou tokakaga ki te foʼi falā ʼo te kokelekasio pea mo te ʼu telituale. ʼE natou fakaui te ʼu tohi pea mo fakatoka ke omai te kau faifakamafola ʼo toʼo. ʼE natou tokakaga ki te ʼu mikolo pea mo te ʼu ʼata viteo moka fai te ʼu fono. ʼE natou fai te tali kaiga pea mo kau ki te taupau lelei ʼo te Fale Fono. ʼE tokoni te ʼu gaue maʼuhiga ʼaia ki te maui malie ʼo te kokelekasio. (1 Ko. 14:40) Pea tahi, ʼe fai e ʼihi ia natou he ʼu koga ʼo te fono ʼo te vahaʼa Te Maʼuli Fakakilisitiano Mo Te Faifakamafola, mo faiakonaki ki te kaugamalie pea mo tokoni ki ʼae ʼe ina takitaki he kiʼi kutuga faifakamafola. ʼI ʼihi temi, ʼe kaugā olo mo te ʼu tagata ʼafeā ʼo ʼaʼahi te ʼu tehina mo tuagaʼane.
6. Kotea te ʼu tupuʼaga ke tou lotofakafetaʼi lahi ai ki siʼatatou ʼu tagata faifekau?
6 Kotea te ʼu lelei ʼe maʼu e te kokelekasio mai te ʼu gaue ʼa te kau tagata faifekau? ʼE ui fenei e te tuagaʼane ʼe maʼuli ʼi Bolivie ko Beberly b: “ ʼE au fiafia ʼosi ʼi ʼatatou fono ʼuhi ko te ʼu gaue ʼo ʼatatou tagata faifekau. ʼE feala haku hiva, mo faitali, mo fagono ki he ʼu akonaki pea ʼe akoʼi au ʼaki he ʼu viteo mo he ʼu pāki. ʼE natou tokaga ki totatou puipui pea ʼaki tanatou tokoni ʼe feala ai ke muliʼi e ʼihi te polokalama ʼo te fono ʼi te neti. Hili te fono, ʼe natou fakatuʼutuʼu te fakamaʼa ʼo te Fale Fono mo natou kau ki ai, ʼe natou tokakaga ki te foʼi falā ʼo te kokelekasio pea mo faiga ke tou maʼu te ʼu tohi ʼae ʼe ʼaoga kia tatou. ʼE au lotofakafetaʼi lahi kia natou.” ʼE ui fenei e Leslie, ʼe maʼuli ʼi Colombie pea ko tona ʼohoana ʼe tagata ʼafeā: “ ʼE ʼaoga ʼosi ki toku ʼohoana te tokoni ʼa te ʼu tagata faifekau ki te fakahoko ʼo ʼihi atu gaue. Kapau ʼe mole natou tokoni age pea toe lahi ʼosi age tona maʼumaʼua. ʼE au lotofakafetaʼi lahi ʼosi ki tanatou faʼa fai pea mo tanatou fia tokoni.” ʼE mole koa la ke toe logoʼi mo koe ia te aluʼaga ʼaia?—1 Tim. 3:13.
7. ʼE feafeaʼi hatatou fakaha ʼe tou lotofakafetaʼi ki ʼatatou tagata faifekau? (Vakaʼi mo te pāki.)
7 ʼE lelei ke tou logoʼi totatou lotofakafetaʼi ki te ʼu gaue ʼa te ʼu tagata faifekau. Kae ʼe foaki mai e te Tohi-Tapu ia te tokoni ʼaeni: “Ke kotou fakaha tokotou lotofakafetaʼi.” (Kol. 3:15) ʼE ui fenei e Krzysztof, ko he tagata ʼafeā mai Finlande, pe ʼe feafeaʼi hana lotofakafetaʼi ʼo ʼuhiga mo natou: “ ʼE au momoli he kiʼi kate peʼe faitohi kia natou ʼo fakatuʼu ai he vaega Tohi-Tapu. Pea ʼe au fakamahino age ai ia tanatou fakalotomalohiʼi au pea mo te tupuʼaga ʼo taku leleiʼia ia tanatou gaue.” Ko Pascal mo Jael, ʼe nā maʼuʼuli ʼi Niu Kaletonia, ʼe nā faikole tafito ʼo ʼuhiga mo te kau tagata faifekau. ʼE ui fenei e Pascal: “Heʼeki fualoa ki ai, neʼe ma fakamalo kia Sehova ki te ʼu tehina ʼaia ʼo tamatou kokelekasio. Neʼe ma kole kia te ia ke tokoni pea mo nofo mo natou.” ʼE fagono ia Sehova ki te taʼi ʼu faikole ʼaia pea ʼe fua lelei ki te kokelekasio katoa.—2 Ko. 1:11.
‘ ʼE GAUE KINAKINA TE KAU TAGATA ʼAFEĀ ʼI TE LOTOLOTOIGA ʼO KOUTOU’
8. He koʼe neʼe ui e Paulo neʼe “gaue kinakina” te kau tagata ʼafeā ʼo te ʼuluaki sekulo? (1 Tesalonika 5:12, 13)
8 Neʼe gaue kinakina te ʼu tagata ʼafeā ʼo te ʼuluaki sekulo maʼa te kokelekasio. (Lau ia 1 Tesalonika 5:12, 13; 1 Tim. 5:17) Neʼe natou “takitaki” natou, mo fai he ʼu fono pea neʼe toʼo e te komite ʼo te kau tagata ʼafeā he ʼu tonu. Pea neʼe natou ‘fakatokaga’ ʼonatou tehina mo tuagaʼane. Neʼe natou foaki age he ʼu tokoni ʼe mahino gafua kae fai ʼaki te ʼofa moʼo puipui ʼo te kokelekasio. (1 Tes. 2:11, 12; 2 Tim. 4:2) ʼE mahino ia, ʼe natou toe gaue kinakina ki te taupau ʼo tonatou kiʼi famili pea mo tokakaga ke natou malolohi ʼi te faʼahi fakalaumalie.—1 Tim. 3:2, 4; Tito 1:6-9.
9. Kotea ʼihi gaue ʼe tonu ke fakahoko e te kau tagata ʼafeā ia ʼaho nei?
9 ʼE maʼumaʼua ʼosi te kau tagata ʼafeā. Ko he ʼu tagata faifakamafola ʼo te logo lelei. (2 Tim. 4:5) ʼE natou fakatuʼutuʼu te faifakamafola ʼi te telituale ʼo tanatou kokelekasio. ʼE natou tuku mai he faʼifaʼitaki lelei ʼo natou faifakamafola ʼaki he faʼa fai. Pea ʼe natou akoʼi tatou ke tou faiva ʼi te faifakamafola mo te faiakonaki. ʼE natou toe gaue ohage ko ni tuʼi fakamau, ʼe manavaʼofa pea ʼe mole fakapalatahi. Ka fai e he tehina hana agahala mamafa, ʼe natou tokoni ki ai ke ina toe maʼu he ʼu felogoi lelei mo Sehova, ʼo natou tokaga tafito ke maʼa te kokelekasio. (1 Ko. 5:12, 13; Kal. 6:1) Kae ʼe iloʼi tafito natou ko he ʼu tagata tauhi ovi. (1 Pet. 5:1-3) ʼE natou fai he ʼu akonaki Fakatohi-tapu neʼe teuteuʼi lelei, mo faiga ke natou iloʼi ia natou fuli ʼo te kokelekasio pea mo olo ʼo ʼaʼahi te ʼu tehina mo tuagaʼane. Kae mole gata ai, ʼe ʼi te tahi ʼu gaue ʼe natou toe fai. Ko ʼihi ʼe kau ki te laga fale, mo taupau ke lelei te ʼu Fale Fono mo te fakatuʼutuʼu ʼo te ʼu fakatahi lalahi fakafenua. Pea ʼe toe kau ʼihi ki te Komite Fakafelogoi Mo Te Lopitali peʼe ki te Kutuga ʼe Natou ʼAʼahi Te Kau Mahaki. ʼEi, ʼe gaue kinakina ʼosi te kau tagata ʼafeā maʼa tatou.
10. Kotea te ʼu tupuʼaga ke tou lotofakafetaʼi lahi ai ki siʼatatou ʼu tagata ʼafeā?
10 Neʼe fakakikite e Sehova ʼe tokaga lelei anai he ʼu tagata tauhi ovi kia tatou, pea ‘ ʼe mole tou toe matataku anai mo tekelili.’ (Sel. 23:4) Neʼe ha te moʼoni ʼo te ʼu palalau ʼaia ʼi te aluʼaga ʼo Johanna. Ko he tuagaʼane mai Finlande, pea ko tana faʼe neʼe kovi ʼosi tona mahaki. ʼE ina ui fenei: “Neʼe faigataʼa ʼosi kia au taku fakaha te ʼu meʼa ʼe au logoʼi ki ʼihi. Kae neʼe ʼi te tagata ʼafeā neʼe mole au iloʼi lelei, neʼe faʼa kataki ʼo ʼuhiga mo au mo faikole mo au, pea neʼe ina fakamanatuʼi mai e ʼofa ia Sehova ia au. Neʼe mole kei au manatuʼi lelei te meʼa ʼae neʼe ina ui mai kae neʼe au manatuʼi neʼe au logoʼi ʼosi hoku fimalie. Neʼe au tui papau neʼe fekauʼi mai ia ia e Sehova ke tokoni mai ʼi tona temi totonu.” Neʼe kua tokoni feafeaʼi atu te ʼu tagata ʼafeā ʼo tou kokelekasio?
11. ʼE feafeaʼi hatatou fakaha ʼe tou lotofakafetaʼi ki ʼatatou tagata ʼafeā? (Vakaʼi mo te pāki.)
11 ʼE loto e Sehova ke tou fakaha he lotofakafetaʼi lahi ki te kau tagata ʼafeā “ ʼuhi ko tanatou gaue.” (1 Tes. 5:12, 13) ʼE ui fenei e Henrietta, ʼae ʼe toe maʼuli ʼi Finlande: “ ʼE fiafia te kau tagata ʼafeā ʼi te tokoni mai kia tatou. Kae mole fakaʼuhiga leva ʼe lahi age tonatou temi mo tonatou malohi ʼi ʼihi age tehina mo tuagaʼane, peʼe mole honatou ʼu fihifihia. ʼI ʼihi temi, ʼe au fai age pe te ʼu palalau ʼaeni: ‘ ʼE ke iloʼi ko koe ko he tagata agalelei, pea ʼe au loto ke ke iloʼi te faʼahi ʼaia.’ ” ʼE ui fenei ia e Sera, ko he tuagaʼane mai Turquie: “Ohage ko te ʼaoga ʼo te ‘penisi’ ki te haele ʼo he masini, ʼe toe feia pe mo te kau tagata ʼafeā. ʼE ʼaoga kia natou he ʼu fakalotomalohi ke hoko atu tanatou gaue. Koia ʼe feala ke tou momoli age he kiʼi kate, mo fakaafe natou ke tou kakai peʼe ke tou faifakamafola fakatahi mo natou.” ʼE ke fiafia koa ʼi te ʼu gaue ʼe fai e he tagata ʼafeā ʼo tou kokelekasio? Koia, fakakaukauʼi pe ʼe feafeaʼi hau fakaha age ki ai tau lotofakafetaʼi.—1 Ko. 16:18.
ʼE FAKALOTOMALOHIʼI E TE ʼU TAUPAU FAKASILIKO TE ʼU KOKELEKASIO
12. Kotea te fakatuʼutuʼu neʼe fai ke feala ai he fakalotomalohiʼi ʼo te ʼu kokelekasio ʼo te ʼuluaki sekulo? (1 Tesalonika 2:7, 8)
12 Neʼe foaki e Kilisito Sesu “he ʼu tagata ohage ko ni meʼa ʼofa” maʼa te kokelekasio. ʼE natou tokoni ʼi he tahi age aluʼaga. ʼAki tana takitaki, neʼe fakanofo e te kau tagata ʼafeā ʼo Selusalemi ia Paulo, mo Palenapa, pea mo ʼihi atu ke natou liliu ko he ʼu taupau feoloʼaki. (Gaue 11:22) Kotea tona tupuʼaga? Ke fakalotomalohiʼi e te ʼu tehina ʼaia te ʼu kokelekasio, ohage pe ko te ʼu tagata faifekau pea mo tagata ʼafeā. (Gaue 15:40, 41) Neʼe sakilifisioʼi e ‘te ʼu tagata ʼaia ohage ko ni meʼa ʼofa’ tonatou maʼuli fimalie. Pea ʼi ʼihi temi neʼe feala ke tuʼutamakiʼia tonatou maʼuli ʼuhi ko tanatou akoʼi mo fakalotomalohiʼi ʼihi.—Lau ia 1 Tesalonika 2:7, 8.
13. Kotea ʼihi gaue ʼe fai e te ʼu taupau?
13 ʼE faifolau tuʼumaʼu te ʼu taupau. ʼE fai e ʼihi ni kilometa ʼe teau tupu moka olo ʼo ʼaʼahi he ʼu kokelekasio. ʼI te vahaʼa fuli, ʼe fai e te taupau he ʼu akonaki, mo olo ʼo ʼaʼahi te ʼu tehina mo tuagaʼane, mo takitaki he fono mo te kau pionie, mo te kau tagata ʼafeā, ʼo feia pe mo te gaue faifakamafola. ʼE ina toe teuteuʼi mo he ʼu akonaki, mo fakatuʼutuʼu te ʼu fakatahi lalahi ʼo te siliko mo fakafenua. Pea tahi, ko ia ʼae ʼe ina fai te ʼu ako ki te kau pionie, mo fakatuʼutuʼu he fono makehe mo te kau pionie ʼo te siliko. Pea ʼi ʼihi temi, ʼe kole age e te Petele ke tokaga ki he ʼu gaue ke tulikaki.
14. Kotea te ʼu tupuʼaga ke tou lotofakafetaʼi lahi ai ki siʼotatou ʼu taupau?
14 Kotea te ʼu fua lelei ʼe maʼu e te kokelekasio ʼuhi ko te gaue maʼuhiga ʼa te ʼu taupau? ʼE ui fenei e te tehina mai Turquie ʼo ʼuhiga mo te ʼu taupau feoloʼaki, ʼae neʼe omai ʼo ʼaʼahi tana kokelekasio: “Ka natou ʼaʼahi matou pea ʼe fakalotomalohiʼi ai au ke lahi age toku temi ʼae ʼe au tokaga ai ki ʼoku tehina mo tuagaʼane. Logo la neʼe lahi natou neʼe au felaveʼi mo ia, kae neʼe mole au logoʼi ʼi he temi ʼe ui mai e he tahi ʼe maʼumaʼua peʼe mole fia palalau mo au.” ʼI te tahi ʼaho, ko Johanna, ʼae neʼe kua tou talanoa pe ki ai, neʼe faifakamafola mo he taupau, pea neʼe mole nā maʼu he tahi ke nā palalau ki ai. ʼE ina ui fenei: “ ʼE mole au galoʼi anai te ʼaho ʼaia. Neʼe hoki mavae atu pe ʼoku kiʼi tehina ʼe lua ʼi tomatou lotofale, pea neʼe au manatuʼi ʼosi naua. Neʼe fakalotomalohiʼi au e te taupau. Neʼe tokoni mai ke au mahino, ka tou tauhi kia Sehova ʼe mole feala ke tou maʼuʼuli ovi tuʼumaʼu pe ki totatou kiʼi famili pea kaumeʼa. Kae ʼi te malama foʼou ʼe lahi anai te temi ke tou fakatahi ai mo natou.” Tokolahi te ʼu taupau, ohage ko ʼae neʼe faifakamafola mo Johanna, neʼe lahi tonatou ʼofainaʼi e te ʼu tehina mo tuagaʼane ʼae neʼe natou ʼaʼahi.—Gaue 20:37–21:1.
15. (1) Ka tou lau ia 3 Soane 5-8, ʼe feafeaʼi hatatou fakaha ʼe tou lotofakafetaʼi lahi ki te ʼu taupau? (Vakaʼi mo te pāki.) (2) He koʼe ʼe tonu ke tou tokagaʼi te ʼu ʼohoana ʼo te ʼu tehina taupau? Pea kotea ʼe feala ke tou fai? (Vakaʼi te ʼa takai “ ʼAua Naʼa Tou Galoʼi ʼOnatou ʼOhoana.”)
15 Neʼe fakalotomalohiʼi e te apositolo ko Soane ia Kaiusi ke tali kaiga ki te ʼu tehina, ʼae ʼe ʼomai ʼo ʼaʼahi natou, pea ke ‘natou mavae ʼi hona aluʼaga ʼe tuha mo te ʼAtua.’ (Lau ia 3 Soane 5-8.) ʼE feala pe mo tatou ke tou muliʼi te tokoni ʼaia. ʼO feafeaʼi? ʼO tou fakaafe te taupau ke tou kakai, peʼe tou lagolago ki te ʼu fakatuʼutuʼu ʼe fai ki te gaue faifakamafola lolotoga tana ʼaʼahi. Ko Leslie, ʼae neʼe tou talanoa ki ai ʼi muʼa atu, ʼe ina fakaha tana lotofakafetaʼi ʼi hona tahi age aluʼaga. ʼE ina ui fenei: “ ʼE au kole kia Sehova ke ina foaki age kia natou te ʼu meʼa ʼae ʼe aoga kia natou. ʼE ma toe faitohi taumatuʼa kia natou ʼo fakaha age ia tama leleiʼia tana ʼaʼahi matou.” Manatuʼi ʼe toe tau pe la te ʼu taupau mo he ʼu fihifihia pea ʼe natou gaʼegaʼe pe ohage ko tatou. ʼE feala pe ke natou mahahaki, mo lotohoha, pea mo lotovaivai. Ko ai ʼe ina iloʼi kapau ʼe ke fai he ʼu palalau agalelei peʼe foaki he meʼa ʼofa ki tau taupau, ʼe ko he tali ʼaia ki ʼana faikole?—Taag. 12:25.
ʼE ʼAOGA KIA TATOU “HE ʼU TAGATA OHAGE KO NI MEʼA ʼOFA”
16. Ka tou lau ia Taʼaga Lea 3:27, kotea te ʼu fehuʼi ʼe feala ke fai e te ʼu tehina?
16 ʼI te kele katoa, ʼe ʼaoga lahi kia tatou “he ʼu tagata ohage ko ni meʼa ʼofa.” Kapau ko koe ko he tehina, ke ke fai te fehuʼi ʼaeni: ‘ ʼE feala koa haku tokoni kia natou ʼae ʼe ʼaoga ki ai he tokoni?’ (Lau ia Taʼaga Lea 3:27.) ʼE ke lotolelei koa ke ke liliu ko he tagata faifekau fakaminisitelio? Kapau kua ke tagata faifekau, ʼe ke fakatuʼutuʼu koa ke toe lahi age tau gaue maʼa ʼou tehina mo tuagaʼane, ʼo ke liliu ko he tagata ʼafeā? c ʼE ke fia fai koa he ʼu fetogi ʼi tou maʼuli ke ke kau ki te Ako ʼo Te Kau Faifakamafola ʼo Te Puleʼaga? ʼE tokoni atu anai te ako ʼaia ke fakaʼaogaʼi lahi koe e Sesu. Kapau ʼe ke manatu ʼe mole ke lava fakahoko te ʼu fakatuʼutuʼu ʼaia, ke ke faikole kia Sehova. Kole kia te ia ke ina foaki atu tona laumalie maʼoniʼoni ke ke fakahoko lelei te ʼu gaue fuli neʼe tuku atu.—Luka 11:13; Gaue 20:28.
17. Kotea ʼae ʼe fakamoʼoni ki ai ʼo ʼuhiga mo totatou Hau ko Kilisito Sesu ʼi tana filifili “he ʼu tagata ohage ko ni meʼa ʼofa”?
17 Neʼe filifili e Sesu he ʼu tehina ke liliu ko “he ʼu tagata ohage ko ni meʼa ʼofa,” pea ʼe fakamoʼoni ai ʼe ina takitaki tatou ʼi te ʼu ʼaho fakamuli ʼaeni. (Mat. 28:20) ʼE ke lotofakafetaʼi lahi koa ki totatou Hau ʼofa, mo lotofoaki, pea mo lototokaga ʼi tana foaki mai he ʼu tehina faiva ke tokakaga lelei kia tatou? Koia, ke ke kumi he ʼu faigamalie ke ke fakaha ai tau lotofakafetaʼi lahi ki te ʼu tagata ʼaia ʼe gaue kinakina. Pea ke ke manatuʼi ʼo fakamalo kia Sehova, ia te Tupuʼaga ʼo “meʼa lelei fuli mo haohaoa.”—Sakp. 1:17.
KATIKO 99 Te ʼu Lauʼi Miliona Tehina
a Ko te kau tagata ʼafeā ʼae ʼe kau ki te Kolesi Pule, mo natou ʼae ʼe tokoni gaue ki te Kolesi Pule, peʼe ko natou ʼae ʼe kau ki te Komite ʼo Te Filiale ʼo feia mo natou ʼae ʼe natou fakahoko ʼihi atu gaue, ʼe natou toe kau ki te ʼu ‘tagata ʼaia ohage ko ni meʼa ʼofa.’
b Ko ʼihi higoa neʼe fetogi.
c Kapau ʼe ke fia mahino pe ʼe feafeaʼi hau liliu ko he tagata faifekau fakaminisitelio, peʼe tagata ʼafeā, vakaʼi te ʼu alatike ʼaeni “ ʼU Tehina, ʼe Koutou Faiga Koa Ke Kotou Tagata Faifekau?” pea “ ʼU Tehina, ʼe Koutou Faiga Koa Ke Kotou Tagata ʼAfeā?” ʼi Te Tule Leʼo ʼo Novepeli 2024.