NEʼE leleiʼia ʼaupito e te kau Iselaele ia te musika. ʼE palalau ʼi te Tohi-Tapu ki ni hahaʼi ʼe faimaholo pea mo hiva. ʼE lahi te koga ʼo te Tohi-Tapu ʼe ko ni hiva. Ohage la ko te ʼu tohi ʼo Pesalemo, mo Hiva ʼo Salomone pea mo Tagilaulau neʼe tohi ke hivaʼi. ʼE ui ʼi te tohi ʼe fakamatala ai te maʼuli ʼo te temi muʼa, ʼe ha lelei ʼi te Tohi-Tapu neʼe faimaholo te kau Iselaele moka neʼe natou fakahoko ni gaue.

Te musika ʼi te maʼuli ʼo te kau Iselaele. Neʼe faimaholo te kau Iselaele moʼo fakaha tonatou fiafia. (Esa. 30:29) Neʼe ta nafa te hahaʼi fafine mo hiva fakafiafia pea mo memeʼe. Ohage la moka neʼe fakanofo he hau, moka neʼe malo te kau solia ʼi te tau, pea ʼi te ʼu ʼaho lalahi ʼo tanatou tauhi. (Tfm. 11:34; 1 Sam. 18:6, 7; 1 Hau 1:39, 40) Neʼe toe hiva te kau Iselaele moʼo fakaha tonatou lotomamahi moka neʼe mate he tahi. (2 Klk. 35:25) Ohage ko tona ui ʼi te tohi, ʼe ha lelei mai ai “neʼe leleiʼia ʼaupito e te kau Iselaele te musika.” a

Te musika ʼi te fale hau. Neʼe fia logo musika te ʼu hau ʼo Iselaele. Neʼe fekauʼi e te Hau ko Saulo ia Tavite ke haʼu ʼo ta alepa ʼi tona fale hau. (1 Sam. 16:18, 23) Ki muli age, ʼi te kua liliu leva ʼa Tavite ko te hau, neʼe ina faʼu ni meʼa faimaholo pea mo fatu ni hiva malie. Pea ʼi te fale lotu ʼa Sehova neʼe ina fakatuʼutuʼu ai he hahaʼi faimaholo. (2 Klk. 7:6; Amo. 6:5) ʼI te fale hau ʼa te Hau ko Salomone neʼe ʼi ai tana kauhiva, tagata mo fafine.​—Ekl. 2:8.

Te musika ʼi te tauhi ʼa te kau Iselaele. Neʼe maʼuhiga ʼaupito te faimaholo ʼi te tauhi ʼa te kau Iselaele kia Sehova. ʼE tou lau ʼi te Tohi-Tapu, neʼe ko te toko 4 000 tagata faimaholo ʼi te fale lotu ʼi Selusalemi. (1 Klk. 23:5) Neʼe natou ta he ʼu simepale, mo ni alepa, mo he tahi age ʼu meʼa faimaholo pea mo pupuhi he ʼu fakatagi pupuhi. (2 Klk. 5:12) Kae neʼe mole gata pe ki te ʼu tagata faiva ʼaia neʼe natou faimaholo ʼi tanatou tauhi kia Sehova. ʼE ha mai tokolahi te kau Iselaele neʼe natou hiva lolotoga tanatou faifagona ki Selusalemi, ki te ʼu ʼaho lalahi ʼae neʼe fai ʼi te taʼu fuli. Neʼe higoa te ʼu hiva ʼaia ko te ʼu Hiva ʼo Te Faifagona. (Pes. 120–134) Pea ʼo mulimuli ki te meʼa ʼae ʼe tohi ʼi te ʼu tohi Fakasutea, neʼe hiva te kau Iselaele te ʼu Pesalemo b lolotoga te taumafa ʼo te Pasikate.

ʼE kei maʼuhiga ia ʼaho nei te musika ki te hahaʼi ʼa te ʼAtua. (Sakp. 5:13) ʼE tou hiva moʼo fakavikiviki kia Sehova. (Efe. 5:19) ʼE tou logo tahi mo ʼotatou tehina mo tuagaʼane moka tou hiva fakatahi kia Sehova. (Kol. 3:16) Pea ka tou hiva, faimaholo peʼe fakalogo he musika ʼe vikiʼi ai ia Sehova, ʼe tou maʼu ai te malohi moʼo tauʼi ʼotatou fihifihia. (Gaue 16:25) ʼEi, ka tou hiva kia Sehova, ʼe ko te faʼahiga fakaha ʼaia ʼo tatatou tui mo totatou ʼofa ʼae kia Sehova.