Neʼe tuʼu te fakamalumaluʼaga ʼi te huʼaga ʼae ki te Potu Taputapu ʼo te fale lotu. ʼI te Tohi-Tapu. Fakaliliu ʼo Te Malama Foʼou ʼae neʼe ta ʼi muʼa ʼo te taʼu 2023, ʼe ui ai “ko te fakamalumaluʼaga ʼae neʼe tuʼu ʼi muʼa, neʼe ko fasiga nima ʼe 20 tona loa, ʼo tatau mo te laulahi ʼo te fale, pea neʼe 120 tona maʼoluga.” (2 Klk. 3:⁠4) ʼE toe ui ʼi te tahi atu ʼu Tohi-Tapu ko te fakamalumaluʼaga neʼe “fasiga nima ʼe 120” tona maʼoluga, ʼo fakafuafua ai neʼe ko he tule neʼe meta 53!

Kae ʼi te Fakaliliu ʼo Te Malama Foʼou ʼae neʼe ta ʼi te taʼu 2023 ʼe ui ai ʼo ʼuhiga mo te fale lotu ʼo Salomone: “Neʼe fasiga nima 20 tona maʼoluga” peʼe teitei meta 9. a Tou vakaʼi ʼihi fakamahino neʼe tupu ai te fetogi ʼaia.

Ia 1 Hau 6:3 ʼe mole fakaha ai te maʼoluga ʼo te fakamalumaluʼaga. ʼI te vaega ʼaia, ko te tagata faitohi ko Selemia ʼe ina fakaha ai te loa ʼo te fakamalumaluʼaga pea neʼe meta fia mai te muʼa fakamalumaluʼaga ki te huʼaga ʼo te fale lotu, kae mole ina fakaha ai tona maʼoluga. Pea ʼi te kapite ʼae ʼe hoa mai ki ai, neʼe palalau ia Selemia ki te tahi ʼu meʼa fakaofoofo neʼe faʼu maʼa te fale lotu, ohage ko te Tai ukamea, te ʼu saliote ʼe hogofulu, pea mo te ʼu pou kapa ʼe lua neʼe fakatuʼu ʼi te huʼaga ʼo te fakamalumaluʼaga. (1 Hau 7:15-37) Kapau la ko te fakamalumaluʼaga neʼe feala ke meta 50 tupu ʼo maʼoluga ʼaupito age ia ʼi te fale lotu, he koʼe leva neʼe mole fakaha mai e Selemia tona maʼoluga? Pea ʼi ni taʼu ki muli age, ko te ʼu tagata tohi hisitolia Sutea neʼe natou tohi neʼe mole maʼoluga age te fakamalumaluʼaga ʼi te fale lotu ʼo Salomone.

Neʼe feʼekeʼaki e te ʼu tagata sivi Tohi-Tapu pe neʼe feala koa ki te ʼu kaupa ʼo te fale lotu hanatou tali te maʼoluga ʼo te fakamalumaluʼaga moka neʼe fasiga nima ʼe 120. ʼI te temi muʼa, ko te ʼu tule maʼoluga ʼae neʼe faʼu ʼaki te ʼu maka mo te ʼu piliki, ohage la ko te ʼu matapa ʼo te fale lotu ʼi Esipito, neʼe matolu te fakatafito pea fakaalualu ʼo manifi ki te tumutumu. Kae neʼe kehe ia te fale lotu ʼa Salomone. ʼE manatu e te kau sivi Tohi-Tapu ko te matolu ʼo tona ʼu kaupa neʼe ko fasiga nima ʼe ono, peʼe meta 2,7. Ko te tagata ko Théodore Busink ʼe ina ako te faʼu fale ʼo te temi muʼa, neʼe ina ui fenei: “Kapau neʼe matolu feia te kaupa ʼo te huʼaga ʼo te fale lotu, neʼe mole feala ke fasiga nima 120 [te maʼoluga ʼo] te fakamalumaluʼaga.”

ʼE mahalo pe ko te vaega ʼo 2 Koloniko 3:4 neʼe hala tona hiki. Logo la ʼi ʼihi tohi ʼafea ʼae neʼe tohi nima, ʼe tuʼu ai “120” ʼi te vaega ʼaia, kae ʼi te tahi age ʼu tohi ʼe tuha mo falala ohage ko te Codex ʼo Alexandrinus ʼo te nima sekulo, pea mo te Codex ʼo Ambrosianus ʼo te ono sekulo ʼe tuʼu ai “fasiga nima ʼe 20.” He koʼe neʼe lagi faihala te tagata hiki tohi ʼo ina tohi “120”? ʼI te Fakahepeleo, ko te ʼu kupu “teau” mo “fasiga nima” ʼe tatau. Koia, neʼe lagi tohi ai e te tagata hiki tohi te kupu “teau” kae mole “fasiga nima.”

ʼE moʼoni, ʼe tou faiga ke tou mahino ki te ʼu faʼahi ʼaia pea ke totonu tatatou fakamatala ʼo ʼuhiga mo te fale lotu ʼa Salomone. Kae ko te faʼahi ʼae ʼe maʼuhiga kia tatou, ko te meʼa ʼae ʼe fakata e te fale lotu ʼaia, ia te fale lotu lahi fakalaumalie. ʼE tou lotofakafetaʼi ai kia Sehova ʼi tana fakaafe mai tana ʼu kaugana fuli ke natou tauhi fuli kia te ia ʼi te fale lotu ʼaia!​—Hep. 9:11-14; Fkha. 3:12; 7:9-17.