Ko He Tehina Foʼou ʼi Te Kolesi Pule
ʼI TE Feliafa ʼaho 24 ʼo Sanualio 2018, neʼe fakaha he logo lelei ki te ʼu famili ʼo te ʼu Petele ʼo Amelika pea mo Kanata: Kua hinoʼi te tehina ko Kenneth Cook, Jr. ki te Kolesi Pule ʼo te Kau Fakamoʼoni ʼa Sehova.
Neʼe maʼuli ia te tehina ko Cook ʼi Pennsylvanie ʼi Amelika. Neʼe ina iloʼi te moʼoni ʼaki ia tona kaugā ako ʼi te fale ako. Pea neʼe papitema ʼi te ʼaho 7 ʼo Sunio 1980. Neʼe pionie katoa ʼi te ʼaho 1 ʼo Sepetepeli 1982. Hili ki ai taʼu ʼe lua, ʼi te ʼaho 12 ʼo Oketopeli 1984, neʼe fakaafe leva ia ia ke hu ki te Petele ʼi Wallkill.
Lolotoga te ʼu taʼu ʼe 25 ʼae neʼe hoa mai ki ai, neʼe lahi te ʼu gaue neʼe tuku age ke fai e te tehina ko Cook ʼi te Fale Ta Tohi pea mo taupau ki te ʼu gaue fuli ʼo te Petele. ʼI te taʼu 1996, neʼe ʼohoana mo te tuagaʼane ko Jamie, pea neʼe hu mo ia ki te Petele ʼo Wallkill. ʼI Tesepeli 2009, neʼe fakaafe ia te taumatuʼa Cook ke nā gaue ʼi te fale ʼae ʼe fai ai te ʼu ako ʼa te Kau Fakamoʼoni ʼa Sehova, ʼi Patterson. Neʼe gaue te tehina ko Cook ʼi te Selevisi ʼo Te Meli. Neʼe nā toe liliu leva ki te Petele ʼi Wallkill, pea mole faʼa fualoa ki ai, ʼi Apelili 2016, neʼe toe fekauʼi naua ki Brooklyn. Hili ki ai mahina ʼe nima, neʼe nā olo leva ki ʼotatou pilo lalahi ʼi Warwick. Pea ʼi Sanualio 2017, neʼe hinoʼi ia te tehina ko Cook ke tokoni ki te Komite ʼo Te Faitohi ʼo te Kolesi Pule.