ALATIKE AKO 4
ʼE Tapuakina e Sehova ʼAtatou Faiga Ke Tou Kau Ki Te ʼAho Fakamanatu
“Kotou haga fai te faʼahi ʼaeni moʼoku fakamanatu.”—LUKA 22:19.
KATIKO 19 Te Taumafa ʼa Te ʼAliki
TE ʼU MANATU FAKANOUNOU a
1-2. He koʼe ʼe tou kau ʼi te taʼu fuli ki te ʼAho Fakamanatu?
KUA HILI nei ki ai teitei taʼu ʼe 2 000, neʼe foaki e Sesu tona maʼuli maʼa tatou, ʼo tou maʼu ai te ʼamanaki ke tou maʼuli ʼo heʼe gata. ʼI te po ʼi muʼa ʼo tona mate, neʼe fakatotonu e Sesu ki ʼana tisipulo ke natou fakamanatu tona sakilifisio ʼofa. Ko he toʼotoʼoga ʼe fakaʼaogaʼi ai pe te pane mo te vino.—1 Ko. 11:23-26.
2 ʼE tou fakalogo ki te fakatotonu ʼa Sesu he ʼe tou ʼofa mamahi ia te ia. (Soa. 14:15) ʼI te taʼu fuli, ʼi ni vahaʼa ʼi muʼa pea mo te hili ʼo te ʼAho Fakamanatu, ʼe tou fakaha totatou lotofakafetaʼi ki te faʼahi ʼae neʼe ina fai ʼaki hatatou toʼo he temi ke tou faikole mo metitasio ki te fakaʼuhiga ʼo tona mate maʼa te hahaʼi fuli. ʼE tou toe fiafia ʼi te hikihiki ia tatatou kau ʼae ki te faifakamafola ke tou fakaafe ai te hahaʼi tokolahi ke natou kau mo tatou ki te toʼotoʼoga maʼuhiga ʼaia. Pea ʼe mahino ia, ʼe tou fakatotonu ke mole he aluʼaga ʼe ina taʼofi anai tatatou kau ai.
3. Kotea te ʼu faʼahi ka tou vakaʼi anai ʼi te alatike ʼaeni?
3 ʼI te alatike ʼaeni, ʼe tou vakaʼi anai faʼahi ʼe tolu, ʼe ha ai ʼe maʼuhiga ʼaupito ki te ʼu kaugana ʼa Sehova te fakamanatu ʼo te mate ʼo Sesu: (1) ʼE natou faʼifaʼitakiʼi te faʼahiga fai e Sesu te ʼAho Fakamanatu, (2) ʼe natou fakaafe te hahaʼi ke natou kau ki ai, pea (3) ʼe natou fakahoko te ʼAho Fakamanatu maʼia ʼi te ʼu aluʼaga faigataʼa.
ʼE NATOU FAʼIFAʼITAKIʼI TE FAʼAHIGA FAI E SESU TE ʼAHO FAKAMANATU
4. ʼI te taʼu fuli, kotea te ʼu moʼoni ʼe tou fakalogo ʼi te akonaki ʼo te ʼAho Fakamanatu, pea he koʼe ʼe maʼuhiga ʼaupito kia tatou? (Luka 22:19, 20)
4 ʼI te taʼu fuli, ʼi te ʼAho Fakamanatu ʼe tou fakalogo ki he akonaki ʼe fakatafito ki te Tohi-Tapu, pea ʼe tali ai ki he ʼu fehuʼi. ʼE fakamahino mai pe koʼe ʼe ʼaoga ki te hahaʼi fuli te totogi, pea ʼe fakamolemole feafeaʼi te ʼu agahala ʼo te tokolahi ʼaki pe te mate ʼa te tokotahi. ʼE toe fakamanatuʼi mai pe kotea ʼae ʼe fakata e te pane mo te vino, pea ko ai ʼae ʼe tonu ke kai mo inu ki ai. (Lau ia Luka 22:19, 20.) Pea ʼe tou fakakaukauʼi ia te ʼu tapuakina ʼae ka maʼu ʼe natou ʼae ʼe ʼamanaki maʼuʼuli ʼi te kele. (Esa. 35:5, 6; 65:17, 21-23) ʼE maʼuhiga ʼaupito te ʼu moʼoni ʼaia kia tatou. Ko te toko lauʼi miliale hahaʼi ʼe mole natou mahino ki ai, pea ʼe mole natou iloʼi te maʼuhiga ʼo te sakilifisio ʼo Sesu. Pea maʼia pe ʼe natou fakamanatu te mate ʼo Sesu, kae ʼe mole hage ko tona faʼahiga fai e Sesu. Kotea tona tupuʼaga?
5. Hili te mate ʼo te kau apositolo, neʼe kamata fakamanatu feafeaʼi e te hahaʼi te mate ʼo Sesu?
5 Mole fualoa hili te mate ʼo te kau apositolo, neʼe ulufi te kokelekasio e he kau Kilisitiano loi. (Mat. 13:24-27, 37-39) Neʼe “natou ʼave keheʼi ia te moʼoni, ke mulimuli te ʼu tisipulo ia natou.” (Gaue 20:29, 30) Ohage la, neʼe natou akoʼi neʼe mole mate Sesu “tuʼa tahi ʼo talu ai ke ina ʼamo te ʼu agahala ʼa te tokolahi,” ohage ko tona akoʼi mai ʼi te Tohi-Tapu. Kae neʼe natou akoʼi ʼe tonu ia ke fai liuliuga tona sakilifisio. (Hep. 9:27, 28) Ia ʼaho nei, tokolahi te hahaʼi ʼe natou tui ki te akonaki hala ʼaia. ʼE natou olo ʼi te vahaʼa fuli, peʼe ʼi te ʼaho fuli pe la, ʼo misa ke natou komunio. b Ko ʼihi ʼi te tahi ʼu lotu ʼe natou tau fakamanatu te mate ʼo Sesu, kae tokolahi ia natou ʼaia ʼe mole natou mahino ki te fakaʼuhiga ʼo tona sakilifisio. ʼE lagi feuiʼaki ai e ʼihi: “ ʼE feala koa ke fakamolemole moʼoni ʼaku agahala ʼaki te sakilifisio ʼo Sesu?” He koʼe ʼe natou fai te fehuʼi ʼaia? Koteʼuhi ʼe natou tui ki te ui ʼa ʼihi ʼe mole feala ke fakamolemole te ʼu agahala ʼaki te sakilifisio ʼo Sesu. Neʼe kotea te mahino ʼa te ʼu tisipulo ʼa Sesu ʼo ʼuhiga mo tona sakilifisio?
6. ʼI te 1872, kotea ʼae neʼe mahino ki ai te kiʼi kutuga ako ʼo te Tohi-Tapu?
6 ʼI te 1870, ko te kiʼi kutuga ako ʼo te Tohi-Tapu neʼe taki e Charles Russell neʼe natou ako fakamalotoloto te Tohi-Tapu. Neʼe natou fia mahino ki te fakaʼuhiga moʼoni ʼo te sakilifisio ʼo Sesu pea ʼe tonu ke fakamanatu feafeaʼi tona mate. Koia, ʼi te 1872, neʼe natou mahino ai neʼe foaki moʼoni e Sesu he totogi maʼa te malamanei. Pea neʼe mole natou taupau pe maʼa natou te moʼoni ʼaia. Neʼe natou fakaha ʼi ni tohi, mo ni sulunale pea mo te ʼu nusipepa. Pea neʼe natou fakahoko atu aipe te ʼAho Fakamanatu tuʼa tahi ʼi te taʼu, ohage ko tona fai e te ʼu ʼuluaki Kilisitiano.
7. Kotea te ʼu lelei ʼe tou maʼu ia ʼaho nei ʼuhi ko te ʼu fekumi neʼe fai e Charles Russell mo ʼona tehina?
7 ʼE lahi te ʼu lelei ʼe tou maʼu ia ʼaho nei mai te ʼu fekumi ʼae neʼe fai e te ʼu tagata Kilisitiano fakamalotoloto ʼaia. Koia, neʼe tokoni mai ia Sehova ke tou mahino ki te fakaʼuhiga ʼo te sakilifisio ʼo Sesu pea kotea ʼe fakafealagia e te sakilifisio ʼaia. (1 Soa. 2:1, 2) Neʼe tou toe ako te ʼu ʼamanaki ʼe lua ʼae ʼe palalau ki ai te Tohi-Tapu maʼa natou ʼae ʼe natou fakafiafiaʼi te loto ʼo te ʼAtua. Ko te maʼuli tuputupua ʼi selo maʼa ʼihi, pea mo te maʼuli ʼo heʼe gata ʼi te kele maʼa te toko lauʼi miliona hahaʼi. ʼI tatatou mahino ki te toe ʼofa lahi ʼo Sehova kia tatou pea mo te ʼu fua lelei ʼi totatou maʼuli mai te sakilifisio ʼo Sesu, ʼe tou fakaovi ai ki te ʼAtua. (1 Pet. 3:18; 1 Soa. 4:9) Koia, ohage ko ʼotatou tehina agatonu ʼi muʼa atu, ʼe tou fakaafe te hahaʼi fuli ke natou kau mo tatou ki te ʼAho Fakamanatu, ʼae ʼe fai ʼo mulimuli ki tona faʼahiga fai e Sesu.
ʼE TOU FAKAAFE TE HAHAʼI KI TE ʼAHO FAKAMANATU
Kotea ʼae ʼe feala ke ke fai ke lahi ai tau kau ki te tufa ʼo te pepa fakaafe ki te ʼAho Fakamanatu? (Vakaʼi te palakalafe 8-10) e
8. ʼAki te temi, kotea ʼae neʼe fai e te ʼu kaugana ʼa Sehova ke natou fakaafe te hahaʼi ki te ʼAho Fakamanatu? (Vakaʼi te pāki.)
8 Kua fualoa te fakaafe e te ʼu kaugana ʼa Sehova ia te hahaʼi ki te ʼAho Fakamanatu. ʼI te 1881, neʼe fakaafe te ʼu tehina mo tuagaʼane ʼo Amelika ke natou fakatahi ki te ʼapi ʼo te tehina ʼi Allegheny, ʼi Pennsylvanie, moʼo fakamanatu te mate ʼo Sesu. Ki muli age, neʼe tahi fakahoko e te kokelekasio te ʼAho Fakamanatu. ʼI Malesio 1940 neʼe fakaha ki te kau faifakamafola ke natou fakaafe te hahaʼi fuli pe ʼi tonatou telituale ʼae neʼe natou fia iloʼi te ʼu moʼoni Fakatohi-tapu. ʼI te 1960, neʼe kamata foaki e te Petele ki te ʼu kokelekasio te ʼu pepa fakaafe ki te ʼAho Fakamanatu neʼe ta. Talu mai ai, neʼe tufa te ʼu pepa fakaafe ʼe lauʼi miliale. He koʼe ʼe tou faiga fakamalotoloto ke tou fakaafe te hahaʼi fuli?
9-10. Ko ai ʼae ʼe tou fakaafe ki te ʼAho Fakamanatu, pea he koʼe ʼe fua lelei kia natou moka natou kau ki ai? (Soane 3:16)
9 ʼE tou fakaafe te hahaʼi fuli ki te ʼAho Fakamanatu he ʼe tou loto ke iloʼi e natou ʼae ka hoki kau anai ki ai te ʼu faʼahi ʼae neʼe fai e Sehova mo Sesu maʼa tatou fuli. (Lau ia Soane 3:16.) ʼE tou fakaʼamu ke lahi anai te ʼu faʼahi ʼe natou fia iloʼi ʼuhi ko te ʼu meʼa ka natou sio mo logo ki ai, pea ke natou fia liliu ko he ʼu kaugana ʼa Sehova. Kae ʼe mole gata pe kia natou ʼaia.
10 ʼE tou toe fakaafe ia natou ʼae mole kei tauhi kia Sehova. ʼE tou loto ke natou manatuʼi ʼe kei ʼofa pe Sehova ia natou. Tokolahi ʼe natou tali tatatou fakaafe, pea ʼe tou fiafia ʼaupito ʼi tatatou sio kia natou ʼi te ʼAho Fakamanatu. ʼE natou manatuʼi ai te fiafia ʼae neʼe natou maʼu ʼi te temi ʼae neʼe kei natou tauhi ai kia Sehova. Tou vakaʼi te faʼifaʼitaki ʼo Monika. c Neʼe toe kamata faifakamafola lolotoga te taʼi mahaki COVID-19. ʼI tana ʼosi kau ʼae ki te ʼAho Fakamanatu ʼo te 2021, neʼe ina ui fenei: “ ʼE mole au galoʼi anai te ʼAho Fakamanatu ʼo te taʼu ʼaia. Neʼe kua taʼu 20 taku mole kei faifakamafola. Kae ʼi te temi ʼaia, neʼe kua feala leva ke au kau ki ai pea mo fakaafe te hahaʼi ki te ʼAho Fakamanatu. Neʼe au faiga fakamalotoloto he neʼe au lotofakafetaʼi ʼaupito ki te ʼu faʼahi ʼae neʼe fai e Sehova mo Sesu maʼaku.” (Pes. 103:1-4) ʼE lahi tatatou tufa te pepa fakaafe ki te ʼAho Fakamanatu, pe ʼe ʼomai te hahaʼi peʼe kailoa, heʼe tou iloʼi ko ʼatatou faiga ʼe fakafiafiaʼi ai te loto ʼo Sehova.
11. Neʼe tapuakina feafeaʼi e Sehova ʼatatou faiga ʼae ke tou fakaafe te hahaʼi ki te ʼAho Fakamanatu? (Akeseo 2:7)
11 Neʼe tapuakina lahi e Sehova ʼatatou faiga ʼae ke tou fakaafe te hahaʼi ki te ʼAho Fakamanatu. ʼI te 2021, logo la te ʼu fakatuʼakoi ʼuhi ko te COVID-19, ko te toko 21 367 603 hahaʼi neʼe natou kau ki ai. Ko te hoki kaku ʼae ki te numelo ʼaia. Ko te teitei tuʼa lua vaelua ʼo te kaugamalie ʼa te kau Fakamoʼoni ʼa Sehova ʼi te malamanei. ʼE moʼoni, ʼe mole ko te kaugamalie ʼae ʼe maʼuhiga kia Sehova. ʼE tokaga ia ki te tagata takitokotahi. (Luka 15:7; 1 Tim. 2:3, 4) ʼE tou tui papau, ʼe ina fakaʼaogaʼi te tufa ʼo te ʼu pepa fakaafe moʼo tokoni mai ke tou maʼu te hahaʼi fakamalotoloto.—Lau ia Akeseo 2:7.
ʼE TOU KAU KI TE ʼAHO FAKAMANATU LOGO LA TE ʼU ALUʼAGA FAIGATAʼA
ʼE tapuakinaʼi e Sehova ʼatatou faiga ʼae ke tou kau ki te ʼAho Fakamanatu (Vakaʼi te palakalafe 12) f
12. He koʼe ʼe feala ke faigataʼa hatatou kau ki te ʼAho Fakamanatu? (Vakaʼi te pāki.)
12 Neʼe fakakikite e Sesu ʼi te ʼu ʼaho fakamuli ʼe tou tau anai mo ni aluʼaga faigataʼa: te fakafeagai ʼo te famili, te fakataga, te ʼu tau, te ʼu taʼi mahaki, pea mo ʼihi atu aluʼaga. (Mat. 10:36; Mko. 13:9; Luka 21:10, 11) ʼI ʼihi temi, ʼuhi ko te ʼu faʼahi ʼaia, ʼe lagi faigataʼa kia tatou hatatou kau ki te fakamanatu ʼo te mate ʼo Sesu. Tou vakaʼi pe neʼe tauʼi feafeaʼi e ni tehina mo tuagaʼane te ʼu aluʼaga ʼaia, pea neʼe tokoni feafeaʼi ia Sehova kia natou.
13. Neʼe tapuakinaʼi feafeaʼi e Sehova te lototoʼa mo te fia fakahoko moʼoni e Artem te ʼAho Fakamanatu ʼi te fale pilisoni?
13 Te pilisoni. Ko ʼotatou tehina mo tuagaʼane ʼae ʼe pilisoni ʼuhi ko tanatou tui, ʼe natou fai ia meʼa fuli ke natou fakamanatu te mate ʼo Sesu. Ko te faʼahi ʼaia neʼe fai e te tehina ko Artem. ʼI te temi ʼae neʼe fai ai te ʼAho Fakamanatu ʼo te tau 2020, neʼe pilisoni ʼi te kiʼi koga fale veliveli, pea neʼe feala ke toe pilisoniʼi ai he toko nima. Ko te ʼu meʼa ʼae neʼe ina maʼu ʼi te fale pilisoni neʼe ina fakaʼaogaʼi ke hage ko te pane mo te vino, pea neʼe ina fakatuʼutuʼu ke ina fai te akonaki maʼa ia pe. Kae ko ʼona kauga pilisoni neʼe suluka mo gutu tauvele. Kotea neʼe ina fai? Neʼe ina kole age pe ʼe feala ke mole natou suluka mo tauvele ʼi he kiʼi hola pe ʼe tahi. Neʼe punamaʼuli he neʼe natou lotolelei ki ai. ʼE ui e Artem: “Neʼe au fehuʼi age pe natou fia iloʼi la te fakaʼuhiga ʼo te ʼAho Fakamanatu.” Neʼe mole natou loto ki ai, kae ʼi tanatou ʼosi sio ki te fakahoko e Artem te ʼAho Fakamanatu pea mo logo ki tana akonaki, neʼe mole māu te ʼu fehuʼi neʼe natou fai ki ai.
14. Kotea te ʼu fakatuʼutuʼu neʼe fai ke fakahoko ai te ʼAho Fakamanatu logo la te taʼi mahaki COVID-19?
14 Te taʼi mahaki COVID-19. ʼI te hoko ʼo te taʼi mahaki ʼaia, neʼe mole feala ke fai e te kau Fakamoʼoni ʼa Sehova te ʼAho Fakamanatu ʼi te ʼu Fale Fono. Logo la te faʼahi ʼaia, kae neʼe natou fakahoko pe. d Ko ʼihi kokelekasio neʼe natou fakahoko ʼi te Neti. Kae neʼe feafeaʼi ki te toko miliona ʼae ʼe mole natou maʼu te Neti? ʼI ʼihi fenua neʼe feala ke muliʼi ia te akonaki ʼi te televisio peʼe ʼi te latio. Neʼe toe puke te akonaki ia lea ʼe 500 tupu, ke feala ai kia natou ʼe nonofo ʼi te ʼu koga meʼa mamaʼo, ke natou fakahoko te ʼAho Fakamanatu. Pea neʼe ʼave leva e te ʼu tehina te akonaki ʼae neʼe puke kia natou ʼae neʼe ʼaoga ki ai.
15. Kotea te ako ʼe tou maʼu mai te faʼifaʼitaki ʼo te fafine ko Sue, ʼae ʼe kei ina ako te Tohi-Tapu?
15 Te fakafeagai ʼo te famili. ʼE faigataʼa tafito ki ʼihi tanatou kau ki te ʼAho Fakamanatu ʼuhi ko te fakafeagai ʼo tonatou famili. Tou vakaʼi te faʼifaʼitaki ʼo te fafine ko Sue, ʼae ʼe kei ina ako te Tohi-Tapu. ʼI te 2021, ʼi te ʼaho ʼi muʼa ʼo te ʼAho Fakamanatu, neʼe ina ui age ki te tuagaʼane ʼae ʼe ina fai tana ako ʼe mole feala anai hana kau ai ʼuhi he ʼe fakafeagai ʼihi ʼo tona loto fale ki ai. Neʼe lau age e te tuagaʼane ia Luka 22:44. Pea neʼe ina fakamahino age, ka tou tau mo ni faigataʼaʼia ʼe tonu ke tou faʼifaʼitakiʼi ia Sesu, ʼo tou faikole kia Sehova pea mo falala katoa kia te ia. ʼI te ʼaho ake, neʼe teuteuʼi e Sue te pane mo te vino pea neʼe ina sioʼi te Tauhi Uhu ʼo Te ʼAho Fakamanatu ʼi te jw.org. ʼI te afiafi leva, neʼe alu ki tona koga fale ʼo ina muliʼi te ʼAho Fakamanatu ʼi tana telefoni, pea neʼe mole pe la fakaleluʼi ia ia e he tahi. Ki muli age, neʼe tohi fenei e Sue ki te tuagaʼane ʼae ʼe ina fai tana ako: “Neʼe ke fakalotomalohiʼi moʼoni au ʼanafi. Neʼe au fai ia meʼa fuli ke au kau ki te ʼAho Fakamanatu, pea neʼe tokoni mai ia Sehova. ʼE lahi ʼosi toku fiafia mo toku lotofakafetaʼi!” ʼE mole ke manatu koa la ʼe feala ke toe tokoni atu ia Sehova moka ke tau mo he fihifihia feia?
16. He koʼe ʼe tou tui papau ʼe tapuakinaʼi anai e Sehova ʼatatou faiga ke tou kau ki te ʼAho Fakamanatu? (Loma 8:31, 32)
16 ʼE maʼuhiga ʼaupito kia Sehova ʼatatou faiga ʼae ke tou fakamanatu te mate ʼo Sesu. Ka tou fakaha totatou lotofakafetaʼi ʼuhi ko te ʼu faʼahi ʼae neʼe fai e Sehova maʼa tatou, ʼe ina tokagaʼi pea ʼe ina tapuakinaʼi tatou. (Lau ia Loma 8:31, 32.) Koia, tou fakatotonu ke tou kau ki te ʼAho Fakamanatu ʼo te taʼu ʼaeni. Pea ʼi te ʼu vahaʼa ʼi muʼa pea mo te hili ʼo te ʼAho Fakamanatu tou faiga ke lahi tatatou kau ki te ʼu gaue fakalaumalie.
KATIKO 18 Fakafetaʼi Ki Te Totogi
a ʼI te Feliatolu, ʼaho 4 ʼo Apelili 2023, ʼe fakamanatuʼi anai e te toko lauʼi miliona hahaʼi ʼi te malamanei te mate ʼo Sesu. Ki te tokolahi, ʼe ko tanatou hoki kau anai ʼaia ki ai. ʼE toe kau anai ki ai ʼihi ʼe mole kei tauhi kia Sehova, pea kua lauʼi taʼu tanatou mole kei kau ki te ʼAho Fakamanatu. Pea ko ʼihi leva, ʼe natou kau anai ki ai logo la ni faigataʼaʼia. Pe kotea pe tou aluʼaga, ʼe feala hau tui papau ʼe fiafia anai ia Sehova ʼi tau faiga ʼae ke ke kau ki te toʼotoʼoga ʼaia.
b ʼO mulimuli ki te akonaki fakalotu ʼaia, ʼe tui te hahaʼi ʼe liliu te pane mo te vino ko te sino mo te taʼataʼa ʼo Kilisito lolotoga te toʼotoʼoga ʼaia. Pea ʼo mulimuli pe ki te akonaki ʼaia, ko te sino mo te taʼataʼa ʼo Sesu ʼe momoli ohage ko he sakilifisio ʼi te temi fuli pe ʼae ʼe natou komunio ai.
c Ko ʼihi higoa neʼe fetogi.
d Vakaʼi mo te ʼu alatike ʼi te jw.org (Fakafalani) ʼi te kupu tafito “Le Mémorial de 2021”
e FAKAMATALA ʼO TE ʼU PĀKI: Neʼe kamata ta te ʼu pepa fakaafe ki te ʼAho Fakamanatu ʼi te 1960. Pea talu mai ai, kua toe lelei age te ʼu pepa fakaafe pea ʼe toe maʼu ʼi te Neti.
f FAKAMATALA ʼO TE ʼU PĀKI: Ko he pāki ʼe ha ai he ʼu tehina mo tuagaʼane ʼe natou fakahoko te ʼAho Fakamanatu logo la te tau ʼi te fenua.