1-2. (1) He koʼe ʼe mole tou punamaʼuli moka tou tau mo ni faigataʼaʼia? (2) Kotea ʼae ka tou vakaʼi ʼi te alatike ʼaeni?

 KO TATOU ʼae ʼe tauhi kia Sehova, ʼe mole tou punamaʼuli moka tou tau mo he ʼu faigataʼaʼia. ʼE tou iloʼi lelei ʼe ui ʼi te Tohi-Tapu: “ ʼE lahi te ʼu mamahi ʼe tonu ke tou fakalaka ai ke tou hu ki te Puleʼaga ʼo te ʼAtua.” (Gaue 14:22) ʼE tou toe iloʼi, ko ʼotatou tahi ʼu fihifihia ʼe pulihi katoa anai ʼi te malama foʼou ʼa te ʼAtua, ʼae “ ʼe mole toe ʼi ai anai te mate, mo te putu, mo te lauga pea mo te mamahi.”​—Apk. 21:4.

² ʼE mole puipui tatou e Sehova mai te ʼu faigataʼaʼia. Kae ʼe tokoni mai ke tou lava ʼutakiʼi. Tokagaʼi te faʼahi neʼe ui e te apositolo ko Paulo ki te kau Kilisitiano ʼo Loma. Hili tana palalau ki te ʼu faigataʼaʼia kehekehe neʼe hoko ki ʼona tehina mo tuagaʼane pea mo ia totonu, neʼe ina tohi fenei: “ ʼAki te tokoni ʼo ia ʼae ʼe ʼofa kia tatou, ʼe tou malo katoa ʼi te ʼu meʼa ʼaia.” (Loma 8:35-37) Ko tona fakaʼuhiga, ʼe tokoni mai ia Sehova ke tou lava katakiʼi te fihifihia ʼae ʼe tou tau mo ia. Tou vakaʼi pe neʼe tokoni feafeaʼi ia Sehova kia Sosefo pea ʼe feafeaʼi Hana tokoni atu kia koe.

3. Kotea te fetogi fakafokifa neʼe hoko ʼi te maʼuli ʼo Sosefo?

³ Neʼe fakaha lelei e te pateliaka ko Sakopo tana ʼofa mamahi ʼi tona foha ko Sosefo. (Sen. 37:3, 4) ʼUhi ko te faʼahi ʼaia, neʼe maheheka te ʼu tehina lalahi ʼa Sosefo kia ia. ʼI tanatou  maʼu leva he faigamalie, neʼe natou fakatau ia Sosefo ki te kau faikoloa Matiane. Neʼe ʼave mamaʼo e te kau faikoloa ʼaia ia Sosefo ki Esipito pea neʼe natou toe fakatau ai kia Potifale te pule ʼo te kau leʼo ʼo Falaone. ʼI toe fetogi fakafokifa leva ʼi te maʼuli ʼo Sosefo! Ko te foha fakapelepele ʼaia ʼo tana tamai kua liliu ia ko te kaugana ʼi Esipito.​—Sen. 39:1.

4. Kotea te ʼu faigataʼaʼia ʼe feala ke tou tau mo ia ʼe tatau mo ʼae ʼo Sosefo?

⁴ ʼE ui ʼi te Tohi-Tapu “ ʼe tou tau fuli mo te malaʼia.” (Ekl. 9:11, Parole de Vie) ʼE feala pe ke tou tau mo te ʼu faigataʼaʼia ʼae ʼe hoko ki te hahaʼi fuli. (1 Ko. 10:13) Pea ʼi ʼihi temi ʼe feala ke tou mamahi ʼuhi ko tatou ko te ʼu tisipulo ʼa Sesu. Ohage la, ʼe feala pe ke vaʼi tatou, ke fakafeagai mai, peʼe fakatagaʼi tatou ʼuhi ko tatatou tui. (2 Tim. 3:12) Tatau aipe pe kotea te faigataʼaʼia ʼe tou tau mo ia, ʼe feala pe ke tokoni mai ia Sehova ke tou ʼutakiʼi mo he lototoʼa. Ko te faʼahi ʼaia neʼe ina fai kia Sosefo. ʼO feafeaʼi?

5. Kotea ʼae neʼe tokagaʼi e Potifale ʼo ʼuhiga mo Sosefo, pea kotea tona tupuʼaga? (Senesi 39:2-6)

⁵ Lau ia Senesi 39:2-6. Neʼe tokagaʼi e Potifale ko Sosefo neʼe ko te tupulaga faiva mo faʼa gaue. Pea neʼe toe mahino ki tona tupuʼaga. He “neʼe tapuakiʼi e Sehova te ʼu meʼa fuli ʼae neʼe . . . fai [e Sosefo].” b Koia la ʼae, ki muli age, neʼe liliu ia Sosefo ko tana tagata faifekau neʼe falala ki ai. Neʼe ina toe fakanofo ia Sosefo ke pule ki tona loto fale pea ke tokaga ki ʼana meʼa fuli. Neʼe kotea leva tona fua? Neʼe ʼasili ai te maʼu koloa ʼa Potifale.

6. Kotea ʼape neʼe logoʼi e Sosefo?

⁶ Fakakaukauʼi age muʼa pe kotea ʼape neʼe logoʼi e Sosefo. Kotea ʼae neʼe loto tafito ki ai? Neʼe loto koa ke tokagaʼi e Potifale ʼana faiga pea ke ina fakapale? ʼE mahino ia, ko te meʼa ʼae neʼe loto tafito ki ai ia Sosefo ke fakaʼateainaʼi pea ke liliu ki tana tamai. Koteʼuhi, logo la te ʼu tuʼulaga neʼe kua tuku age ki ai, kae neʼe kei kaugana pe ia ki he pule ʼe atolasio ki he ʼu ʼatua loi. Neʼe mole uga e Sehova ke fakaʼateainaʼi e Potifale ia Sosefo. Pea neʼe ʼasili kovi age te aluʼaga ʼo Sosefo.

7. Neʼe ʼasili kovi feafeaʼi te aluʼaga ʼo Sosefo? (Senesi 39:14, 15)

⁷ Ohage ko tona fakamatala ia Senesi kapite 39, neʼe tokagaʼi e te ʼohoana ʼo Potifale te talavou ʼo Sosefo pea neʼe faiga tuʼa lahi ke nā momoe. Kae neʼe fakafisi tuʼumaʼu pe ia Sosefo. ʼI tona ita, neʼe ina tukugakoviʼi ia Sosefo takua neʼe ina fia fakaʼalikiʼi ia ia. (Lau ia Senesi 39:14, 15.) ʼI te iloʼi e Potifale te faʼahi ʼaia, neʼe ina fakatotonu ke pilisoniʼi ia Sosefo. Pea neʼe nofo ʼi ai lolotoga ni taʼu. (Sen. 39:19, 20) Neʼe feafeaʼi te fale pilisoni ʼaia? Ia Senesi 40:15, ko te kupu “pilisoniʼi” ʼae neʼe ui e Sosefo, ʼe feala pe ke fakaʼuhiga ki “he tane” peʼe ki “he luo” neʼe tuku ai ia ia. (Vakaʼi te kiʼi nota ʼo te vaega ʼaia.) ʼE ha mai ai neʼe fakapoʼuli pea neʼe lotovaivai ia Sosefo. Pea ʼe ui ʼi te Tohi-Tapu neʼe ʼi ai te temi neʼe seiniʼi ai ʼona vaʼe mo tona kia. (Pes. 105:17, 18) Neʼe ʼasili kovi tona aluʼaga. Ko te tagata kaugana ʼaia neʼe falala ki ai tona pule kua liliu ia ʼi te temi nei ko he tama pilisoni fakaʼofaʼofa.

8. Kapau ʼe ʼasili kovi totatou aluʼaga, kotea ʼae ʼe feala ke tou tui papau ki ai?

⁸ Neʼe kua ke tau koa la mo he aluʼaga faigataʼa neʼe ʼasili kovi, logo la tau faikole fakamalotoloto kia Sehova? Ko he faʼahi ʼe feala ke hoko. ʼI te malama ʼaeni ʼe puleʼi e Satana, ʼe tou tau mo he ʼu faigataʼaʼia pea ʼe mole puipui fakamilakulo tatou e Sehova. (1 Soa. 5:19) Kae ke ke tui papau ʼe iloʼi lelei e Sehova te meʼa ʼae ʼe hoko kia koe, pea ʼe tokaga atu. (Mat. 10:29-31; 1 Pet. 5:6, 7) Tahi ʼae, ʼe ina fakapapau atu: “ ʼE mole au tuku anai koe ʼi he temi, pea ʼe mole au liakī anai koe ʼi he temi.” (Hep. 13:5) ʼE feala ke tokoni atu ia Sehova ke ke faʼa kataki, maʼia pe ʼe ke manatu ʼe mole hona puleʼaki. Ko te faʼahi ʼaia neʼe ina fai kia Sosefo. ʼO feafeaʼi?

9. Kotea ʼae ʼe ha ai neʼe nofo ia Sehova mo Sosefo ʼi te temi ʼae neʼe pilisoniʼi ai? (Senesi 39:21-23)

⁹ Lau ia Senesi 39:21-23. Neʼe nofo ia Sehova mo Sosefo maʼia ʼi te ʼu taʼu faigataʼa ʼae neʼe pilisoni ai. Neʼe tokoni feafeaʼi ki ai? ʼAki te temi, neʼe falala mo fakaʼapaʼapa te pule ʼo te fale pilisoni kia Sosefo, ohage pe ko Potifale ʼi muʼa atu. Mole tuai neʼe fakanofo e te pule ʼo te fale pilisoni ia Sosefo ke tokaga ki te kau pilisoni. ʼE ui ʼi te Tohi-Tapu “neʼe mole toe vakaʼi ai e te pule ʼo te fale pilisoni te ʼu meʼa ʼae neʼe tokaga ki ai ia Sosefo.” Kua ʼi ai leva te gaue ke tokaga ki ai ia Sosefo. Neʼe mole ʼamanaki ki te fetogi ʼaia. Ko ai la ʼae neʼe ina ui ʼe tuku age he gaue ʼe tuha mo te falala ki he tahi ʼe pilisoni, neʼe tukugakoviʼi neʼe ina fia fakaʼalikiʼi te ʼohoana ʼo he tagata maʼuhiga? Neʼe feala pe ia, he ʼe ui ia Senesi 39:23: “Neʼe nofo ia Sehova mo Sosefo pea neʼe tapuakiʼi e Sehova te ʼu meʼa fuli ʼae neʼe ina fai.”

10. Fakamahino pe koʼe neʼe feala ke manatu ia Sosefo neʼe mole tapuakinaʼi e Sehova te ʼu meʼa fuli ʼae neʼe ina fai.

¹⁰ Toe fakakaukauʼi age muʼa pe kotea ʼape neʼe logoʼi e Sosefo. ʼI tona tukugakoviʼi hala mo pilisoniʼi, kia koe la, neʼe manatu koa ia Sosefo ʼe tapuakinaʼi e Sehova ia meʼa fuli ʼae neʼe ina fai? Kotea ʼae neʼe loto tafito ki ai Sosefo? Ke ʼofainaʼi koa e te pule ʼo te fale pilisoni? ʼE mahino ia, neʼe ina loto tafito ke fakalakatonuʼi neʼe mole ina fai he hala, pea ke fakaʼateainaʼi. Neʼe ina kole age pe la ki he tagata neʼe ʼamanaki fakaʼateaina ke palalau kia Falaone ʼo ʼuhiga mo ia pea ke fakamavae mai te fale pilisoni. (Sen. 40:14) Kae neʼe mole manatuʼi e te tagata ʼaia ke palalau kia Falaone ʼo ʼuhiga mo Sosefo. Pea neʼe hoko atu tana nofo  pilisoni ia taʼu ʼe lua. (Sen. 40:23; 41:1, 14) Kae neʼe haga tapuakinaʼi pe e Sehova te ʼu meʼa ʼae neʼe ina fai. ʼO feafeaʼi?

11. Kotea te fealagia makehe neʼe tuku age e Sehova kia Sosefo, pea neʼe tokoni feafeaʼi te faʼahi ʼaia ki te fakahoko ʼo te fakatuʼutuʼu ʼa Sehova?

¹¹ ʼI te kei pilisoni ʼa Sosefo, neʼe fakafealagia e Sehova ke fai e te Hau ʼo Esipito he ʼu moemisi ʼe lua neʼe hoha ai. ʼI te iloʼi ʼae e Falaone ʼe maʼu e Sosefo te fealagia ke ina fakamahino te ʼu moemisi, neʼe ina fekauʼi ke kumi age. Neʼe ina fia iloʼi moʼoni te fakaʼuhiga ʼo tana ʼu moemisi. ʼAki te tokoni ʼa Sehova, neʼe fakamahino e Sosefo te ʼu moemisi pea neʼe punamaʼuli ia Falaone ʼi te ʼu tokoni ʼaoga ʼae neʼe ina fai age. ʼI tana tokagaʼi ʼae ʼe nofo ia Sehova mo te tupulaga ʼaia, neʼe ina fakafono ke pule ki te meʼa kai ʼo Esipito katoa. (Sen. 41:38, 41-44) Ki muli age, neʼe to te toe hoge ʼi Esipito pea mo Kanaane, te fenua ʼae neʼe nofo ai te famili ʼo Sosefo. Neʼe feala ai ke ina haofaki tona famili pea mo puipui ai te hologa ʼae neʼe hifo mai ai te Mesia.

12. He koʼe ʼe feala ke tou ui neʼe tapuakinaʼi e Sehova te ʼu meʼa ʼae neʼe fai e Sosefo?

¹² Fakakaukauʼi age muʼa te ʼu aluʼaga makehe ʼae neʼe hoko kia Sosefo. Ko ai ʼae neʼe ina uga ia Potifale ke ina tokagaʼi ia Sosefo kae neʼe ko te kaugana pe? Ko ai ʼae neʼe ina uga te pule ʼo te fale pilisoni ke ina tuku age he gaue kia Sosefo kae neʼe ko te tama pilisoni fakaʼofaʼofa? Ko ai ʼae neʼe ina fakafealagia ke fai e Falaone he ʼu moemisi ʼe fakatupu hoha, pea mo foaki kia Sosefo te fealagia ke ina fakamahino? Ko ai ʼae neʼe ina uga ia Falaone ke ina fakanofo ia Sosefo ko te pule ʼo te meʼa kai ʼo Esipito? (Sen. 45:5) ʼE mahino ia, ʼe ko Sehova ʼae neʼe ina tapuakinaʼi te ʼu meʼa fuli ʼae neʼe fai e Sosefo. Logo la neʼe fonofono te ʼu tehina ʼo Sosefo ke natou matehi ia ia, kae neʼe fetogi e Sehova te aluʼaga ke fakahoko ai Tona finegalo.

13. ʼE fakatupu koa e Sehova te ʼu aluʼaga fuli ʼae ʼe hoko ʼi totatou maʼuli? Fakamahino.

¹³ Kotea te ako mai te fakamatala ʼo Sosefo? ʼE fakatupu koa e Sehova te ʼu aluʼaga fuli ʼae ʼe hoko ʼi totatou maʼuli? Pea ʼe ina fakatupu koa ni faigataʼaʼia he ʼe ʼi ai tona tupuʼaga lelei? Mole akoʼi mai ʼi te  Tohi-Tapu te faʼahi ʼaia. (Ekl. 8:9; 9:11) Kae ʼe tou iloʼi lelei ka tou tau mo ni faigataʼaʼia, ʼe tokaga mai ia Sehova pea ʼe fagono ki ʼatatou kole tokoni age. (Pes. 34:15; 55:22; Esa. 59:1) ʼE mole gata ai, kae ʼe toe tokoni mai ia Sehova ke tou faʼa kataki mo he lototoʼa. ʼO feafeaʼi?

14. ʼE tokoni feafeaʼi mai ia Sehova ʼi te ʼu temi faigataʼa?

¹⁴ ʼE tokoni mai ia Sehova ʼaki tana fakalotofimalieʼi pea mo fakalotomalohiʼi tatou, pea ʼi ʼihi temi, ʼi tona temi totonu. (2 Ko. 1:3, 4) Ko te faʼahi ʼaia neʼe ina fai ki te tehina ko Eziz, mai Turkménistan, ʼae neʼe fakatuʼā ke pilisoni ia taʼu ʼe lua ʼuhi ko tana tui. ʼE ina fakamatala: “ ʼI te uhu pe ʼae neʼe tonu ke fakamauʼi ai au, neʼe lau mai e te tehina te koga tohi ʼo Esaia 30:15. ʼE ui ai: ‘ ʼE kotou malolohi anai mo kapau ʼe mole kotou hoha kae ʼe kotou falala.’ Neʼe tokoni mai te vaega ʼaia ke ʼaua taku hoha, kae ke au falala katoa kia Sehova. Lolotoga taku pilisoni, neʼe au metitasio ki te vaega ʼaia pea neʼe tokoni lahi mai kia au.” Kei ke manatuʼi koa te temi ʼi tou maʼuli ʼae neʼe tokoni atu ai ia Sehova, ʼo fakalotofimalieʼi mo fakalotomalohiʼi koe pea neʼe ʼaoga ʼaupito kia koe?

15-16. Kotea ʼae ʼe ke ako mai te faʼifaʼitaki ʼo Tori?

¹⁵ Kae ʼi ʼihi temi, ka tou ʼosi tau mo he faigataʼaʼia, pea hoki tou mahino ai neʼe tokoni mai ia Sehova ke tou faʼa kataki. Ko te faʼahi ʼaia neʼe tokagaʼi e te tuagaʼane ko Tori. Neʼe tau tana kiʼi tama ko Mason mo te kosea lolotoga taʼu ʼe ono, pea neʼe mate leva ʼi tona taʼu 14. Neʼe lotomamahi ʼaupito ia Tori, pea ʼe tou mahino ki ai. Neʼe ina ui: “Kia au, ko te kafo mamahi ʼaia ki he faʼe.” Neʼe ina toe hoko atu fenei: “ ʼE au tui papau ʼe fakaʼio anai te tahi ʼu matuʼā, ko te sio ki te mamahi ʼo hakita toe ʼe kovi age ia ʼi hakita mamahi ʼo kita totonu.”

 ¹⁶ Neʼe lotomamahi ʼaupito ia Tori ʼi te aluʼaga faigataʼa ʼaia. Pea ki muli age, neʼe fakakaukau ki te tokoni age ʼa Sehova kia ia. ʼE ina ui: “Ka au manatuʼi te ʼu meʼa ʼae neʼe hoko, ʼe au iloʼi ai neʼe tokoni mai ia Sehova ki taku fai mahaki mo taku kiʼi tama. Ohage la, maʼia pe ʼi te ʼu temi ʼae neʼe kovi ʼosi ai te mahaki ʼo Mason, kae neʼe fai e te ʼu tehina mo tuagaʼane hola ʼe lua ke ʼomai ki te lopitali. Neʼe ʼi ai tuʼumaʼu pe he tahi ʼi te koga fale tali fagona. Neʼe fia haʼu ʼo tokoni mai kia maua. Tahi ʼae, neʼe tokaga te ʼu tehina mo tuagaʼane ke ma maʼu pe te ʼu meʼa ʼae ʼe ʼaoga ki toma maʼuli fakasino. Maʼia ʼi te ʼu lakaga ʼae neʼe faigataʼa ʼaupito ai, neʼe ma maʼu pe te ʼu meʼa ʼae ʼe ʼaoga kia maua.” Neʼe foaki age e Sehova kia Tori, ʼo feia mo Mason, te malohi ʼae ke nā faʼa kataki mo he lototoʼa.​—Vakaʼi te fakamatala ʼae ʼi te ʼa takai “ Neʼe Foaki Mai e Sehova Te Meʼa Pe ʼAe Neʼe ʼAoga Kia Maua.”

17-18. Kotea ʼae ka tokoni mai ke tou mahino ʼe lagolago mai ia Sehova lolotoga te ʼu faigataʼaʼia pea ke tou lotofakafetaʼi kia te ia? (Pesalemo 40:5)

¹⁷ Lau ia Pesalemo 40:5. Ko te fakatuʼutuʼu ʼa he tagata kake moʼuga, ke kaku ki tona tumutumu. Kae ʼi tana kake ʼaia, ʼe tautau tuʼu ʼo mamata ki te matalelei ʼo te fenua. ʼO toe feia pe, ʼi tau lolotoga tau mo te mamahi, toʼo hou temi ke ke fakakaukauʼi pe ʼe tokoni feafeaʼi atu ia Sehova. ʼI te afiafi fuli, fai te fehuʼi ʼaeni: “Neʼe tapuakinaʼi feafeaʼi au e Sehova ʼi te ʼaho nei? Logo la heʼeki puli toku faigataʼaʼia, kae ʼe tokoni feafeaʼi mai ia Sehova ke au ʼutakiʼi?” Fakakaukauʼi he aluʼaga neʼe tokoni atu ai ia Sehova ke ke faʼa kataki mo he lototoʼa.

¹⁸ ʼE lagi ke faikole kia Sehova ke ina toʼo la tou faigataʼaʼia. Mole hona ia kovi, ko totatou ʼuhiga fuli pe ʼaia. (Flp. 4:6) Kae faiga ke ke tokagaʼi te ʼu tapuakina ʼae ʼe foaki atu e Sehova ʼi te temi nei. Pea ʼe fakapapau atu ke ina fakalotomalohi pea mo tokoni atu ke ke faʼa kataki. Koia ke ke lotofakafetaʼi tuʼumaʼu kia te ia. Pea ʼe ke sio anai, lolotoga tou faigataʼaʼia, peʼe feafeaʼi te tokoni atu ʼa Sehova ke ke faʼa kataki mo he lototoʼa ohage ko tana fai kia Sosefo.​—Sen. 41:51, 52.