ALATIKE AKO 1
Ke Ke Tui Papau Ko Te Folafola ʼa Te ʼAtua “ ʼe Moʼoni”
TE KOGA TOHI ʼO TE TAʼU 2023: “ ʼE moʼoni tau folafola katoa.”—PES. 119:160.
KATIKO 96 Ko Te Tohi ʼa Te ʼAtua—ʼe Ko He Koloa
TE ʼU MANATU FAKANOUNOU a
1. He koʼe tokolahi ia ʼaho nei ʼe mole natou falala ki te Tohi-Tapu?
TOKOLAHI ia ʼaho nei ʼe mole kei natou iloʼi pe ʼe natou falala kia ai. ʼE natou feʼekeʼaki pe kei tokagaʼi koa natou e te hahaʼi ʼae ʼe natou fakaʼapaʼapaʼi, ohage la ko te kau takitaki politike, te kau popoto, mo te ʼu patolo ʼo te ʼu matani gaue. Tahi ʼae, ʼe mole kei natou fakaʼapaʼapa ki te kau takitaki lotu. Koia, ʼe mole tou punamaʼuli ki tanatou mole falala ki te tohi ʼae ʼe mulimuli takua ki ai te kau takitaki lotu ʼaia, ia te Tohi-Tapu.
2. ʼO mulimuli kia Pesalemo 119:160, kotea ʼae ʼe tou tui papau ki ai?
2 Ko tatou ʼae ʼe tauhi kia Sehova ʼe tou tui papau ko ia “te ʼAtua ʼo te moʼoni” pea ʼe ina loto tuʼumaʼu pe ke fua lelei ia meʼa fuli kia tatou. (Pes. 31:5; Esa. 48:17) ʼE tou iloʼi ʼe feala ke tou falala ki te ʼu meʼa ʼae ʼe tou lau ʼi te Tohi-Tapu. ʼE tou tui “ ʼe moʼoni [te] folafola katoa” ʼa te ʼAtua. (Lau ia Pesalemo 119:160.) ʼE tou manatu tahi mo te ui ʼa te tagata sivi Tohi-Tapu: “ ʼE mole he meʼa ʼe ui e te ʼAtua ʼe loi peʼe mole hala anai mo fakahoko. ʼE feala ki ʼana kaugana ke natou falala ki te ʼu faʼahi ʼae ʼe ina ui, he ʼe natou falala ki te ʼAtua ʼae neʼe ina ui.”
3. Kotea ʼae ka tou palalau anai ki ai ʼi te alatike ʼaeni?
3 ʼE feafeaʼi hatatou tokoni ki ʼihi ke natou falala ki te Folafola ʼa te ʼAtua ohage ko tatou? Tou vakaʼi te ʼu fakamoʼoni ʼaeni ʼe tolu ʼe tou falala ai ki te Tohi-Tapu: neʼe mole fetogi te logo ʼae ʼe tuʼu ai, ko ʼana ʼu lea fakapolofeta ʼe hoko moʼoni tuʼumaʼu pea ʼe malohi te Tohi-Tapu ʼo feala ke ina fetogi te maʼuli ʼo te hahaʼi.
NEʼE MOLE FETOGI TE LOGO ʼAE ʼI TE TOHI-TAPU
4. He koʼe ʼe manatu ʼihi ko te logo ʼae ʼi te Tohi-Tapu neʼe fetogi?
4 Neʼe fakaʼaogaʼi e Sehova te ʼu tagata agatonu ʼe toko 40 ke natou tohi te ʼu tohi ʼo te Tohi-Tapu. Kae ʼi te temi nei ʼe mole kei maʼu te ʼu tohi ʼafea ʼaia neʼe tohi nima. Ko te meʼa pe ʼae ʼe tou maʼu e ko te ʼu tohi neʼe hiki mai te tahi ʼu tohi neʼe hiki. Koia ʼe feuiʼaki ai e ʼihi: “ ʼE kei tatau pe koa te meʼa ʼae ʼe tou lau ʼi te Tohi-Tapu ʼi te temi nei mo ʼae neʼe tohi e te ʼu tagata ʼaia mai te kamata?” Neʼe kua ke fakakaukau koa pe koʼe ʼe feala ke tou tui papau ʼe kei tatau pe?
5. Neʼe feafeaʼi te hiki ʼo te ʼu Koga Tohi-Tapu Fakahepeleo? (Vakaʼi te pāki ʼo te takafi.)
5 Moʼo puipui te logo ʼae ʼi te Tohi-Tapu, neʼe ui e Sehova ki tana hahaʼi ke natou hiki. Neʼe ina fakatotonu ki te ʼu hau ʼo Iselaele ke natou hiki maʼa natou totonu te Lao pea ke akoʼi e te ʼu Levite te Lao ʼaia ki te hahaʼi. (Teu. 17:18; 31:24-26; Neh. 8:7) ʼI te toe liliu ʼa te kau Sutea mai tanatou ʼaunofo ʼi Papiloni, neʼe lahi te ʼu Koga Tohi-Tapu Fakahepeleo neʼe kamata hiki e te ʼu tagata poto ʼi te hiki tohi. (Eseta. 7:6, kiʼi nota) Neʼe natou tokaga lelei ki tanatou gaue ʼaia. Ke natou iloʼi pe neʼe totonu tanatou hiki, neʼe mole gata pe tanatou lau pe ko kupu ʼe fia, kae neʼe natou toe lau pe ko mataʼi tohi ʼe fia. Logo la tanatou gaue fakamalotoloto ʼaia, kae ʼuhi ko totatou ʼuhiga agahala, neʼe ʼi ai pe te ʼu kiʼi hala. Kae ʼuhi ʼae neʼe lahi tona hiki, neʼe maʼu te ʼu kiʼi hala ʼaia ki muli age. ʼO feafeaʼi?
6. Neʼe feafeaʼi te maʼu te ʼu hala ʼi te hiki ʼo te Tohi-Tapu?
6 ʼE ʼi ai te faʼahiga fai ʼa te kau sivi Tohi-Tapu ʼi te temi nei, ke natou iloʼi ai te ʼu hala ʼae neʼe fai e natou ʼae neʼe natou hiki te Tohi-Tapu. Tou toʼo he faʼifaʼitaki: Ko te toko 100 tagata ʼe tonu ke natou hiki nima he koga tohi. Pea ʼe fai e he tahi ia natou ʼaia he kiʼi hala ʼi tana hiki. Kae ʼe feala tona maʼu moka fakatatau tana hiki mo ʼa natou ʼae. ʼO toe feia pe, ʼi te fakatatau e te kau sivi Tohi-Tapu te ʼu hiki ʼafea ʼo te Tohi-Tapu, neʼe feala ke natou maʼu te ʼu hala peʼe ko he ʼu meʼa neʼe galoʼi e he tagata hiki tohi.
7. Kotea ʼae ʼe ha ai ko te kau hiki Tohi-Tapu neʼe natou gaue kinakina ke totonu tona hiki?
7 Ko te ʼu tagata ʼae neʼe natou hiki te Tohi-Tapu ʼae neʼe tohi nima ʼi te kamata, neʼe natou gaue kinakina ke totonu. Tou vakaʼi he faʼifaʼitaki ʼe fakamoʼoni ki ai. Ko te Koga Tohi-Tapu Fakahepeleo ʼae kua ʼafea ʼosi, neʼe hiki nima ʼi te taʼu 1008 peʼe 1009 H.T.S. b Ko tona higoa ko te Codex ʼo Leningrad. Kae heʼeki faʼa fualoa, neʼe maʼu ni tuʼuga tohi mo koga tohi ʼo te Tohi-Tapu neʼe hiki nima ʼe ʼafeā age ia taʼu ʼe 1 000 ʼi te Codex ʼaia. ʼE lagi manatu he tahi ko te Codex ʼaia ʼe mole kei tatau anai ia mo te ʼu tohi mo koga tohi ʼafea ʼaia ʼuhi ko tona hiki nima liuliuga ia taʼu ʼe 1 000. Kae ʼe mole koia ʼaia. ʼI te fakatatau e te kau sivi Tohi-Tapu te ʼu tohi ʼae ʼe ʼafeā ʼosi mo ʼae ki muli mai, neʼe natou tokagaʼi neʼe ʼi ai te kiʼi kehekehe ʼi te ʼu kupu kae neʼe mole fetogi te manatu.
8. Kotea te kehekehe ʼo te ʼu Koga Tohi-Tapu Fakakeleka ʼae neʼe hiki mo te tahi ʼu tohi ʼafeā?
8 Ohage pe ko te ʼu tagata ʼae neʼe natou hiki te ʼu Koga Tohi-Tapu Fakahepeleo, neʼe toe hiki e te ʼu ʼuluaki Kilisitiano te ʼu Tohi Taputapu. Neʼe natou tokaga fakalelei ʼo hiki te ʼu tohi ʼe 27 ʼo te Koga Tohi-Tapu Fakakeleka, ʼae neʼe natou fakaʼaogaʼi ʼi ʼanatou fono pea mo te faifakamafola. ʼI te fakatatau e te tagata sivi Tohi-Tapu te ʼu hiki ʼaia ʼo te Koga Tohi-Tapu Fakakeleka mo ʼihi tohi neʼe fai ʼi te temi ʼaia, neʼe ina ui fenei: “ ʼE lahi age te ʼu hiki [ʼo te Koga Tohi-Tapu Fakakeleka] ʼe maʼu ia ʼaho nei pea ʼi te aga mahani ʼe katoa.” ʼE ui ʼi he tohi: “Ka tou lau te ʼu Koga Tohi-Tapu Fakakeleka ʼi he Tohi-Tapu ʼi totatou temi ʼe tuha ia mo te falala, ʼe feala ke tou tui papau ʼe tatau pe ia mo ʼae neʼe tohi ʼi te kamata.”
9. Ia Esaia 40:8, kotea te moʼoni huʼu mo te logo ʼo te Tohi-Tapu?
9 Lolotoga ni sekulo, neʼe tokaga te ʼu tagata hiki tohi ke totonu moka natou hiki liuliuga te Tohi-Tapu. ʼUhi ko ʼanatou faiga ʼaia, ko te Tohi-Tapu ʼae ʼe tou lau mo ako ʼi te temi nei, ʼe tuha ia mo te falala. ʼE moʼoni, ʼe ko Sehova ʼae neʼe tokaga ke tou maʼu Tana Folafola pea ke mole fetogi. (Lau ia Esaia 40:8.) Kae ʼe feala pe ke ui e ʼihi, ko te mole fetogi ʼo te logo ʼi te Tohi-Tapu ʼe mole fakaʼuhiga leva ʼe haʼu mai te ʼAtua. Tou vakaʼi he ʼu fakamoʼoni ʼe haʼu te Tohi-Tapu mai te ʼAtua.
ʼE HOKO TE ʼU LEA FAKAPOLOFETA ʼO TE TOHI-TAPU
10. Tuku mai he faʼifaʼitaki ʼe ha ai ʼe moʼoni te ʼu folafola ʼae ia 2 Petelo 1:21. (Vakaʼi te ʼu pāki.)
10 ʼE lahi te ʼu lea fakapolofeta ʼo te Tohi-Tapu kua hoko, pea neʼe hoko ʼihi hili taʼu ʼe lauʼi teau ʼi tona ʼosi tohi. Pea ʼe fakamoʼoni e te Hisitolia neʼe hoko moʼoni te ʼu lea fakapolofeta ʼaia. ʼE mole tou punamaʼuli ki te faʼahi ʼaia he ʼe haʼu mai ia Sehova. (Lau ia 2 Petelo 1:21.) Tou palalau ki te ʼu lea fakapolofeta huʼu mo te to ʼo te kolo ko Papiloni. ʼI he temi, mai te taʼu 778 ki te taʼu 732 I.M.T.S. c neʼe fakakikite e Esaia ʼaki te takitaki ʼa te ʼAtua ʼe to anai te kolo malohi ko Papiloni. Neʼe ina fakaha mo te higoa ʼo te tagata ʼae ka ina ʼohofi te kolo ʼaia, ia Siliusi, pea neʼe feafeaʼi tana fakahoko. (Esa. 44:27–45:2) Neʼe toe fakakikite e Esaia ʼe maumauʼi katoa anai te kolo ʼaia pea ʼe mole toe nofoʼi anai. (Esa. 13:19, 20) Ko te faʼahi tonu pe ʼaia neʼe hoko. Neʼe to ia Papiloni ia Metia mo Pelesia ʼi te taʼu 539 I.M.T.S. Pea ko te kolo matalelei ʼaia ʼi te temi muʼa kua liliu ia ko he tuʼuga maka ʼi te temi nei.—Vakaʼi ʼi he kiʼi masini, te ʼata viteo Neʼe Fakakikite ʼi Te Tohi-Tapu Te To ʼo Papiloni ʼi te tohi Ke Ke Fiafia ʼo Heʼe Gata ʼi te kapite 03, manatu 5.
11. Fakamahino pe ʼe fakahoko feafeaʼi ia Taniela 2:41-43 ia ʼaho nei.
11 Neʼe ʼi ai te ʼu lea fakapolofeta ʼi te Tohi-Tapu neʼe hoko ʼi te temi muʼa, pea ʼe toe ʼi ai ʼihi ʼe lolotoga hoko ʼi totatou temi. Ohage la tou vakaʼi pe ʼe hoko feafeaʼi te lea fakapolofeta ia Taniela ʼo ʼuhiga mo te Malohi Fakamalamanei ʼo Pilitania mo Amelika. (Lau ia Taniela 2:41-43.) Neʼe fakakikite ʼi te lea fakapolofeta ʼaia ko te malohi fakamalamanei ʼaia ʼe koga lua, ʼe “malohi” ʼi he tahi faʼahi ohage ko te ukamea pea “vaivai” ʼi te tahi faʼahi ohage ko te kele pulu. Pea ko te faʼahi pe ʼaia ʼe tou sio ki ai ia ʼaho nei. ʼE ha mai ʼe malohi ia Pilitania mo Amelika ohage ko te ukamea he neʼe ʼi ai tonā tuʼulaga maʼuhiga ʼi te malo ʼi te ʼu tau fakamalamanei ʼe lua, pea ʼe kei hoko atu pe tanā malolohi ʼi te ʼu mahafu tau. Kae ʼe toe vaivai tanā malohi ʼuhi ko te fakafeagai ʼa ʼanā hahaʼi fakalogo, ʼae ʼe natou fakatuʼu ni kautahi moʼo fakafifihi ki ʼanatou patolo, mo natou fai ni laka moʼo tauʼi ni lao peʼe natou fia puleʼaga faʼitaliha. Mole heʼeki faʼa fualoa, neʼe ui e he taga sivi politike ʼo te malamanei: “Ia ʼaho nei, ʼi te ʼu fenua ʼae kua laka ki muʼa, mole he fenua ʼe maveuveu age ohage ko Amelika ʼi te faʼahi fakapolitike.” Pea ko Pilitania, te tahi koga ʼo te malohi fakamalamanei ʼaia, ʼe maveuveu talu mai ni taʼu ʼuhi he ʼe mole manatu tahi te hahaʼi ʼo ʼuhiga mo ʼanatou felogoi mo te ʼu fenua ʼo te Logo Tahi Fakaeulopa. Neʼe faigataʼa ki te Malohi Fakamalamanei ʼo Pilitania mo Amelika tanā fakahoko katoa ʼanā fakatuʼutuʼu ʼuhi ko te ʼu maveuveu ʼaia.
12. ʼUhi ko te ʼu lea fakapolofeta ʼo te Tohi-Tapu, kotea ʼae ʼe tou tui papau ki ai?
12 Ko te ʼu lea fakapolofeta ʼae kua hoko ʼe fakamalohi ai tatatou tui papau ʼe hoko moʼoni anai te ʼu fakapapau ʼa te ʼAtua ki te ka haʼu. ʼE tou manatu tahi ai mo te tagata faipesalemo ʼae neʼe faikole fenei kia Sehova: “ ʼE au fakaʼamu lahi ki tau haofaki, he ʼe au tuku taku ʼamanaki ki tau folafola.” (Pes. 119:81) ʼE foaki mai kia tatou e Sehova ʼi te Tohi-Tapu ia “he ka haʼu mo he ʼamanaki.” (Sel. 29:11) ʼE mole hoko anai totatou ʼamanaki ʼuhi ko te ʼu faiga ʼa te tagata, kae ʼe hoko anai ʼuhi he neʼe fakapapauʼi mai e Sehova. Tou haga fakamalohi tatatou falala ki te Folafola ʼa te ʼAtua ʼaki tatatou ako fakalelei ʼana lea fakapolofeta.
ʼE FUA LELEI TE ʼU TOKONI ʼI TE TOHI-TAPU KI TE TOKO MILIONA
13. ʼO mulimuli kia Pesalemo 119:66, 138, kotea te tahi fakamoʼoni ʼe tuha te Tohi-Tapu mo te falala?
13 Ko te fua lelei ʼo te maʼuliʼi ʼo te ʼu tokoni ʼi te Tohi-Tapu ko te tahi ʼaia fakamoʼoni ʼe tuha ia mo te falala. (Lau ia Pesalemo 119:66, 138.) Ohage la, ʼi tanatou maʼuliʼi te ʼu pelesepeto fakatohi-tapu, ko te ʼu taumatuʼa ʼae neʼe ʼamanaki mavete, kua natou logo tahi mo fiafia. Pea ʼe maʼuli lelei mo logo fimalie ʼanatou fanau he ʼe pusiaki ʼi te ʼofa.—Efe. 5:22-29.
14. Tuku mai he faʼifaʼitaki ʼe ha ai ʼe feala ke fetogi te hahaʼi ʼuhi ko tanatou maʼuliʼi te ʼu tokoni ʼi te Tohi-Tapu.
14 ʼI tanatou maʼuliʼi te ʼu tokoni ʼo te Tohi-Tapu, neʼe feala pe la ki he ʼu hahaʼi faifakapo ke natou fai ni toe fetogi. Tou toʼo te faʼifaʼitaki ʼa te tagata pilisoni ko Sake. d Neʼe ko te tagata faifakapo agamalohi, pea ʼi te kau pilisoni ʼae neʼe fakatuʼā ki te mate, neʼe ko ia ʼae neʼe agakovi ʼosi age. Kae neʼe kau ʼi te tahi ʼaho ia Sake ki te ako Tohi-Tapu. Neʼe malave ʼosi kia ia te agalelei ʼa te ʼu tehina ʼae neʼe natou fai te ako. Pea neʼe ina ako ai leva te Tohi-Tapu. ʼI tana maʼuliʼi te ʼu pelesepeto fakatohi-tapu neʼe fetogi ai tana aga, pea neʼe liliu ʼo agalelei. ʼAki te temi, neʼe liliu ʼo kauga fagona, pea ki muli age neʼe papitema. Neʼe palalau fakamalotoloto ki ʼihi kau pilisoni ʼo ʼuhiga mo te Puleʼaga ʼo te ʼAtua pea neʼe ina akoʼi te Tohi-Tapu ki te toko fa ia natou. Ko te ʼaho ʼae neʼe tonu ke matehi ai, neʼe mole kei ko te Sake ʼafea. Neʼe ui e te tahi ʼi ʼana avoka: “ ʼE mole ko te Sake ʼae neʼe au iloʼi kua hili ki ai taʼu ʼe 20. Kua fetogi ʼosi tona maʼuli e te ʼu akonaki ʼa te kau Fakamoʼoni ʼa Sehova.” Logo pe la neʼe matehi ia Sake, kae ʼe ha ʼi tana faʼifaʼitaki ʼe feala ke tou falala ki te Folafola ʼa te ʼAtua pea ʼe ina maʼu te malohi ke ina fetogi ai te hahaʼi.—Esa. 11:6-9.
15. Tuku mai he faʼifaʼitaki ʼe ha ai ʼe kehe age te hahaʼi ʼa te ʼAtua ʼuhi ko tanatou maʼuliʼi te ʼu pelesepeto fakatohi-tapu. (Vakaʼi te pāki.)
15 ʼUhi ko tanatou maʼuliʼi te ʼu pelesepeto fakatohi-tapu, ʼe logo tahi te ʼu kaugana ʼa Sehova. (Soa. 13:35; 1 Ko. 1:10) Ko totatou tokalelei mo logo tahi ʼe iloga kehe. Kua lahi te maveuveu ʼa te hahaʼi ia ʼaho nei, ʼuhi ko te faʼahi fakapolitike, tonatou lanu, peʼe ko tonatou tuʼulaga. Ko te logo tahi ʼa te hahaʼi ʼa te ʼAtua neʼe malave ki te tupulaga ʼe higoa ko Soane. Neʼe lahilahi ake ʼi he fenua ʼo Afelika. ʼI te hoko ʼo te tau ʼi tona fenua, neʼe kau ki te foʼi tau solia, kae ki muli age neʼe hola ki he fenua neʼe ovi age. Neʼe fetaulaki mo he kau Fakamoʼoni ʼa Sehova ʼi ai. ʼE ui fenei e Soane: “Neʼe au iloʼi ai ko natou ʼae ʼe kau ki te lotu moʼoni ʼe mole natou faipolitike pea ʼe mole natou maveuveu. Kae ʼe natou feʼofaʼofani.” ʼE ina hoko atu: “Neʼe au momoli toku maʼuli ke au lagolago ki he fenua. Kae ʼi taku iloʼi leva te ʼu moʼoni fakatohi-tapu neʼe au fia momoli ai toku maʼuli kia Sehova.” Neʼe fetogi ʼosi ia Soane. Ia ʼaho nei, ʼe mole kei ina tauʼi te ʼu hahaʼi ʼae ʼe kehe age ʼi tona lanu, kae ʼe ina tala ki te hahaʼi fuli te logo ʼo te tokalelei ʼae ʼi te Tohi-Tapu. Ko te ʼu fua lelei ʼo te ʼu tokoni ʼo te Folafola ʼa te ʼAtua ki te hahaʼi ʼo te ʼu fenua kehekehe ʼe ko te fakamoʼoni lahi ʼaia ʼe feala ke tou falala ki te Tohi-Tapu.
HAGA FALALA KI TE FOLAFOLA ʼA TE ʼATUA ʼAE ʼE MOʼONI
16. He koʼe ʼe maʼuhiga ke tou fakamalohi tatatou falala ki te Folafola ʼa te ʼAtua?
16 ʼI te fakaalu ʼo te malama ʼaeni ki te kovi ʼosi, ʼe ʼahiʼahiʼi moʼoni anai tatatou falala ki te Folafola ʼa Sehova. ʼE faiga anai ʼihi ke tou lotolotolua, ke tou manatu ʼe mole moʼoni te meʼa ʼae ʼe ui ʼi te Tohi-Tapu. Peʼe ke tou manatu neʼe mole filifili e Sehova te tagata faifekau agatonu mo poto ke ina takitaki ʼana kaugana ia ʼaho nei. Kae kapau ʼe tou haga tui ʼe ui tuʼumaʼu pe ʼi te Folafola ʼa Sehova ia te moʼoni, ʼe tou lava tekeʼi anai te ʼu faiga ʼae ke fakavaivai ai tatatou tui. ʼE tou loto moʼoni ke tou fakalogo ki te ʼu “lekula [ʼa Sehova] ʼi te temi fuli pe, ʼo kaku ki te fakaʼosi.” (Pes. 119:112) ʼE mole tou ufiufi anai ʼi te palalau ki te ʼu moʼoni fakatohi-tapu ki ʼihi pea mo fakalotomalohiʼi natou ke natou maʼuliʼi. (Pes. 119:46) Pea ʼe tou lava katakiʼi anai te ʼu aluʼaga faigataʼa, ʼo kau ai mo te ʼu fakataga, ʼaki he “kataki fualoa ʼi te fiafia.”—Kol. 1:11; Pes. 119:143, 157.
17. Kotea ʼae ka fakamanatuʼi mai ʼi te koga tohi ʼo te taʼu?
17 ʼE tou lotofakafetaʼi kia Sehova ʼi tana fakaha mai te moʼoni. ʼE tou maʼu ai he fimalie, pea ʼe tou iloʼi ai te faʼahiga maʼuli ʼe tonu ke tou mulimuli ki ai ʼi he malama kua ʼasili maveuveu mo tokakovi. ʼE toe foaki mai e te moʼoni he ʼamanaki ki he maʼuli ʼe lelei age ʼi te takitaki ʼa te Puleʼaga ʼo te ʼAtua. ʼOfa pe ke fakamalohi e te koga tohi ʼo te taʼu 2023 tatatou tui papau ʼae ko te Folafola katoa ʼa te ʼAtua ʼe moʼoni!—Pes. 119:160.
KATIKO 94 Tou Lotofakafetaʼi Ki Te Folafola ʼa Te ʼAtua
a Moʼo fakamalohi tatatou tui, neʼe filifili te vaega ʼaeni ki te taʼu 2023: “ ʼE moʼoni tau folafola katoa.” (Pes. 119:160) ʼE mahino ia ʼe ke tui ki te faʼahi ʼaia. Kae tokolahi ʼe mole natou tui ʼe moʼoni te Tohi-Tapu pea ʼe maʼu ai he ʼu tokoni ʼe tuha mo te falala. ʼI te alatike ʼaeni, ʼe tou vakaʼi anai fakamoʼoni ʼe tolu ʼe feala ke tou fakaʼaogaʼi moʼo uga te hahaʼi fakamalotoloto ke natou falala ki te Tohi-Tapu pea mo ʼana tokoni.
b Ko te ʼu mataʼi tohi H.T.S. ko tona fakaʼuhiga: Hili te Temi ʼo Sesu.
c Ko te ʼu mataʼi tohi I.M.T.S. ko tona fakaʼuhiga: ʼI Muʼa ʼo te Temi ʼo Sesu.
d Ko ʼihi higoa neʼe fetogi.
e FAKAMATALA ʼO TE ʼU PĀKI: Ohage ko tona fakakikite e te ʼAtua, ko Papiloni ʼae neʼe ko he kolo matalelei ʼi te temi muʼa, kua liliu ko he tuʼuga maka ʼi te temi nei.
f FAKAMATALA ʼO TE ʼU PĀKI: ʼI te pāki: ʼe mole kei tau te tupulaga, kae ʼi tana ako te Tohi-Tapu, kua ina iloʼi pe ʼe feafeaʼi tana maʼuli tokalelei mo ʼihi pea mo akoʼi natou ke natou fai feia.