ALATIKE AKO 2
KATIKO 132 Kua Ta Liliu Ko Te Kakano ʼe Tahi
ʼU Tagata ʼOhoana, Kotou Fakaʼapaʼapa Ki Tokotou ʼOhoana
“ ʼU tagata ʼohoana, . . . kotou fakaʼapaʼapa kia natou.”—1 PET. 3:7.
TE MANATU TAFITO
ʼE feafeaʼi he fakaʼapaʼapa ʼa te tagata ʼohoana ki tona ʼohoana ʼaki ʼana palalau pea mo tana aga?
1. He koʼe neʼe fakatuʼu e Sehova ia te ʼohoana?
KO SEHOVA ʼe ko “te ʼAtua fiafia,” pea ʼe ina loto ke tou toe fiafia mo tatou. (1 Tim. 1:11) Neʼe lahi te ʼu meʼa ʼofa neʼe ina foaki mai ke tou leleiʼia te maʼuli. (Sakp. 1:17) ʼE kau ʼi te ʼu meʼa ʼofa ʼaia te ʼohoana. Ka ʼohoana he tagata mo he fafine, ʼe nā fakapapau ke nā feʼofaʼofani pea mo fefakaʼapaʼapaʼaki. Ka malohi tanā maʼuli feʼofaʼofani pea ʼe nā fiafia moʼoni anai.—Taag. 5:18.
2. ʼE feafeaʼi te aluʼaga ʼo te ʼu taumatuʼa ia ʼaho nei?
2 Kae meʼa fakaʼofaʼofa foki, he tokolahi te ʼu taumatuʼa ia ʼaho nei, kua natou galoʼi te ʼu fakapapau ʼae neʼe natou fai ʼi te ʼaho ʼae neʼe natou ʼohoana ai. ʼE mole natou fiafia. Neʼe heʼeki faʼa fua loa ki ai, neʼe fai he sivi e te kautahi fakamalamanei ʼo te malolo fakasino, ʼe ha ai tokolahi te ʼu tagata ʼohoana ʼe natou gaohi koviʼi mo agamalohi ki ʼonatou ʼohoana, pea mo palalau kovi kia natou pea ʼe mole natou tokagaʼi te ʼu meʼa ʼae ʼe logoʼi e ʼonatou hoa. Ka fai e he tagata ʼohoana te faʼahi ʼaia, ʼe feala ke ina gaohi lelei tona hoa ʼaki he fakaʼapaʼapa ia muʼa ʼo te kaugamalie, kae ʼe ina gaohi koviʼi leva ʼi te loto fale. Tokolahi te ʼu tagata ʼohoana ʼe natou sioʼi he ʼu ʼata ʼe kovi, ʼo feala ai ki te fafine ʼohoana ke ina logoʼi ʼe mole ʼofainaʼi pea mo lotomamahi.
3. He koʼe ʼe gaohi koviʼi e ʼihi tagata ʼohoana ʼonatou hoa?
3 He koʼe ʼe agamalohi ʼihi tagata ʼohoana? ʼE lagi neʼe natou lahilahi ake ʼi he loto fale neʼe agamalohi te tamai, pea ʼe natou manatu ʼe lelei pe te aga ʼaia. ʼE gaohi koviʼi e ʼihi tagata ʼonatou hoa, he ʼe ko te aluʼaga ʼaia ʼe fai e te tokolahi ʼo natou tagata ʼi tonatou agaʼi fenua. ʼE agafefeka te ʼu tagata ʼaia mo ʼonatou hoa, ke iloʼi ʼonatou hoa ko ia pe ʼe feala ke ina puleʼi ia ia. Ko ʼihi tagata neʼe mole natou ako ke natou lolomi te ʼu meʼa ʼae ʼe natou logoʼi, ʼo kau ai tonatou ita. ʼE sioʼi tuʼumaʼu e ʼihi tagata te ʼu ʼata ʼae ʼe kovi, ʼo tupu ai tanatou maʼu he ʼu manatu ʼe kovi ʼo ʼuhiga mo te hahaʼi fafine, pea mo te ʼu felaveʼi fakasino. Pea tahi, neʼe fai te sivi ʼe ha ai neʼe ʼasili hoko te ʼu fihifihia ʼaia ʼi te temi ʼae neʼe to ai te taʼi mahaki te COVID-19. Kae, ʼe mole ko he ʼu takuʼaki ʼaia ke gaohi koviʼi e tagata ʼohoana ia tona hoa.
4. Kotea ʼae ʼe tonu ke tokakaga ki ai te ʼu tagata ʼohoana ʼae ʼe tauhi kia Sehova? Pea kotea tona tupuʼaga?
4 ʼE tonu ke tokakaga te ʼu tagata ʼohoana ʼae ʼe tauhi kia Sehova, ke ʼaua naʼa natou maʼu he manatu kovi ʼo ʼuhiga mo te hahaʼi fafine. a Kotea tona tupuʼaga? Koteʼuhi ka nofo he tahi mo he ʼu manatu, pea ʼe feala ke ina uga ia ia ke ina fai he meʼa. Neʼe fakatokaga e te apositolo ko Paulo ia te kau Kilisitiano fakanofo ʼi Loma ke ‘tuku tanatou faʼifaʼitakiʼi ia te ʼu aga ʼo te malama ʼaeni.’ (Loma 12:1, 2) ʼI te faitohi ʼa Paulo ki te kau Loma, neʼe kua fualoa te tuʼu ʼo te kokelekasio ʼaia. Kae, ʼe ha ʼi te ʼu palalau ʼa Paulo neʼe kei ʼi ai pe ʼihi ʼo te kokelekasio neʼe natou muliʼi ʼanatou agaʼi fenua pea mo maʼu te manatu ʼo te malama. Koia ʼae neʼe ina fakalotomalohiʼi ai natou ke natou fetogi ʼanatou manatu pea mo ʼanatou aga. ʼE mahino ia, ʼe toe ʼaoga te tokoni ʼaia ki te ʼu tagata ʼohoana ʼae ʼe tauhi kia Sehova ia ʼaho nei. Kae fakaʼofaʼofa foki, he ʼi ai ʼihi ia natou ʼaia neʼe natou muliʼi te manatu ʼo te malama pea mo gaohi koviʼi ʼonatou hoa. b ʼE loto e Sehova ke tokaga feafeaʼi e he tagata ʼohoana ki tona hoa? ʼE tou maʼu tona tali ʼi te vaega tafito ʼo te alatike ʼaeni.
5. Ka tou lau ia 1 Petelo 3:7, ʼe tonu ke tokagaʼi feafeaʼi he tagata ʼohoana ki tona hoa?
5 Lau ia 1 Petelo 3:7. ʼE fakatotonu e Sehova ki te ʼu tagata ʼohoana ke natou fakaʼapaʼapa ki ʼonatou hoa. Kapau ʼe fakaʼapaʼapa he tagata ʼohoana ki tona hoa, pea ʼe agalelei mo ʼofa anai ki ai. ʼI te alatike ʼaeni, ʼe tou vakaʼi anai pe ʼe fakaʼapaʼapa feafeaʼi he tagata ʼohoana ki tona hoa. Kae ʼe tou vakaʼi muʼa pe kotea te ʼu aga ʼe ha ai ʼe mole ʼofa mo fakaʼapaʼapa ki tona hoa.
LIʼAKI TE ʼU AGA ʼAE ʼE FAKALAINOAʼI AI ʼOKOTOU HOA
6. Kotea te manatu ʼa Sehova ki te ʼu tagata ʼohoana ʼae ʼe agamalohi ki ʼonatou hoa? (Kolose 3:19)
6 ʼE mole tonu ke agamalohi te tagata ʼohoana ki tona hoa. ʼE fehiʼa ia Sehova ʼi te ʼu agamalohi fuli pe. (Pes. 11:5) ʼE fehiʼa tafito ki te ʼu tagata ʼohoana ʼae ʼe natou gaohi koviʼi ʼonatou hoa. (Mala. 2:16; lau ia Kolose 3:19.) Ka tou lau tatatou vaega tafito ia 1 Petelo 3:7, kapau ʼe mole tokaga lelei te tagata ʼohoana ki tona hoa, pea ʼe ʼi anai ʼona fua kovi ki tana ʼu felogoi ʼae mo te ʼAtua. ʼE feala pe ke mole fakalogo e Sehova ki ʼana faikole.
7. Ka tou lau ia Efeso 4:31, 32, kotea te ʼu palalau ʼae ʼe mole tonu ke fai e te ʼu tagata ʼohoana? (Vakaʼi mo “He ʼu Fakamahino.”)
7 ʼE mole tonu ki te tagata ʼohoana ke leʼo lahi, peʼe ke ina fai he ʼu palalau kovi ki tona hoa. ʼE gaohi koviʼi e te ʼu tagata ʼohoana ʼonatou hoa ʼaki he ʼu palalau itaita mo mamahi. Kae, ʼe fehiʼa ia Sehova ki “te ita, mo te hauhau, mo te kalaga, mo te laukovi.” c (Lau ia Efeso 4:31, 32.) ʼE logo kia meʼa fuli. Pea ʼe maʼuhiga kia Sehova ia te faʼahiga palalau ʼa he tagata ʼohoana ki tona hoa, maʼia pe ʼe nā ʼateaina ʼi tonā loto fale. Ka palalau fefeka fau ki tona hoa, ʼe mole fakatupu kovi pe ki tonā maʼuli fakataumatuʼa, kae ʼe toe fakatupu kovi ki tana ʼu felogoi ʼae mo te ʼAtua.—Sakp. 1:26.
8. Kotea te manatu ʼa Sehova ʼo ʼuhiga mo te ʼu ʼata ʼae ʼe kovi? Pea kotea tona tupuʼaga?
8 ʼE mole tonu ki he tagata ʼohoana ke ina sioʼi he ʼu ʼata ʼe kovi. Kotea te manatu ʼa Sehova ʼo ʼuhiga mo te ʼu ʼata ʼae ʼe kovi? ʼE fehiʼa ʼosi e Sehova ki te faʼahi ʼaia. Ka sioʼi e he tagata ʼohoana he ʼu pāki heʼe maʼa, pea ʼe fakatupu kovi ki ʼana felogoi mo Sehova, pea ʼe mole fakaʼapaʼapa ki tona hoa. d ʼE loto e Sehova ke nofo agatonu te tagata ʼohoana ki tona hoa. ʼE mole gata pe ʼi tana aga kae ʼe toe feia pe mo ʼana manatu. Neʼe ui e Sesu ka haga sioʼi e he tagata he tahi age fafine ʼo holi ki ai, ʼe kua tono ia “ ʼi tona loto.” e—Mat. 5:28, 29.
9. He koʼe ʼe fehiʼa ia Sehova ki he tagata ʼohoana ʼe ina fakamalohiʼi tona hoa ke ina fai he meʼa ʼe mole loto ki ai moka nā fai he ʼu felaveʼi fakasino?
9 ʼE mole tonu ki he tagata ʼohoana ke ina fakamalohiʼi tona hoa ke ina fai he meʼa ʼe mole loto ki ai moka nā fai he ʼu felaveʼi fakasino. ʼE fakamalohiʼi e ʼihi tagata ʼohoana ʼonatou hoa ke natou fai he ʼu felaveʼi fakasino ʼe ufiufi ai tona hoa pea mo logoʼi ai hona gaohi koviʼi peʼe mole hona ʼofainaʼi. ʼE fehiʼa ia Sehova ki te taʼi aga ʼaia. ʼE fakaha ai e te tagata ʼohoana tana manatu pe ʼae kia ia totonu, pea mo tana mole tokagaʼi te ʼu meʼa ʼae ʼe logoʼi e tona hoa. ʼE ina loto ke ʼofa te tagata ʼohoana ki tona hoa pea ke ina fakaʼapaʼapa ki te ʼu meʼa ʼae ʼe ina logoʼi. (Efe. 5:28, 29) Kotea ʼe hoko mo kapau ko te tagata ʼohoana ʼae ʼe tauhi kia Sehova kua ina meʼa noaʼi, peʼe ʼe ina gaohi koviʼi tona hoa, peʼe sioʼi te ʼu ʼata kovi? ʼE feafeaʼi hana fetogi tana manatu pea mo tana aga?
ʼE FEAFEAʼI HAKOTOU LIʼAKI HE ʼU AGA ʼE KOVI?
10. Kotea te ʼu ako ʼe feala ke maʼu e te ʼu tagata ʼohoana mai te faʼifaʼitaki ʼo Sesu?
10 Kotea ʼae ʼe feala ke tokoni ki he tagata ʼohoana ke ina liʼaki he aga ʼe kovi mo fakaufiufi? ʼE faiga ke ina faʼifaʼitakiʼi ia Sesu. Logo la neʼe mole ʼohoana ia Sesu, kae ko tana faʼahiga tokaga ki ʼana tisipulo, ʼe ko he faʼifaʼitaki lelei ki te tagata ʼohoana. (Efe. 5:25) Ohage la, kotou fakakaukauʼi pe kotea te ʼu ako ʼe feala ke maʼu e te ʼu tagata ʼohoana mai te faʼahiga tokoni ʼa Sesu ki ʼana apositolo, pea mo tana faʼahiga palalau kia natou.
11. Neʼe feafeaʼi te aga ʼa Sesu ki ʼana apositolo?
11 Neʼe agalelei tuʼumaʼu ia Sesu kia ʼana apositolo, pea neʼe tokaga kia natou ʼaki he fakaʼapaʼapa. Neʼe mole he temi neʼe agakovi ai, pe neʼe ina fia puleʼi fau ai natou. Logo la ko ia neʼe ko tonatou ʼAliki pea mo Pule, kae neʼe mole fakaʼaogaʼi e Sesu tona malohi ʼaia, ke tupu ai hanatou logoʼi mole honatou ʼuhiga, peʼe ke natou matataku kia ia. Kae neʼe agavaivai pe ia Sesu mo natou. (Soa. 13:12-17) Neʼe ina ui fenei ki ʼana tisipulo: “Kotou ako mai ia te au, koteʼuhi ʼe au agamalū mo agavaivai, pea ʼe kotou maʼu anai he fakafimalie.” (Mat. 11:28-30) Koia, kotou tokagaʼi neʼe agamalū ia Sesu. Ka agamalū he tahi, ʼe mole fakaʼuhiga leva ko hona vaivaiʼaga ʼaia, kae ko he tahi ʼe ina maʼu te lotololomi. Ka fai age he meʼa ʼe kovi ki ai, ʼe faiga ke mole ita pea ʼe ina lolomi te ʼu meʼa ʼae ʼe ina logoʼi.
12. Neʼe feafeaʼi te ʼu palalau ʼae neʼe fai e Sesu ki ʼihi?
12 Neʼe fai e Sesu te ʼu palalau ʼaia moʼo fakalotomalohiʼi pea mo fakalotofimalieʼi ʼihi. (Luka 8:47, 48) Neʼe mole palalau fefeka fau ki ʼana tisipulo. Maʼia pe la mo tona leakoviʼi e tona ʼu fili pea mo tanatou faiga ʼae ke ita, kae “neʼe mole ina toe leakoviʼi ia natou.” (1 Pet. 2:21-23) ʼI ʼihi temi, neʼe leleiʼia age e Sesu ke nofo fakalogologo, ʼi hana fai age he ʼu palalau ʼe fefeka fau. (Mat. 27:12-14) ʼE ko he faʼifaʼitaki lelei ia neʼe ina tuku ki te ʼu tagata ʼohoana ʼae ʼe tauhi kia Sehova.
13. Ohage ko tona ui ia Mateo 19:4-6, ʼe pipiki feafeaʼi anai he tagata ʼohoana ki tonatou ʼohoana? (Vakaʼi mo te pāki.)
13 Neʼe akoʼi e Sesu te kau tagata ʼohoana ke natou nonofo agatonu ki ʼonatou hoa. Neʼe ina fakaha te ʼu palalau ʼae neʼe fai e tana Tamai, ʼe tonu ki te tagata ʼohoana ke “pipiki ki tona ʼohoana.” (Lau ia Mateo 19:4-6.) Ko te kupu Fakakeleka ʼi heni “pipiki ki” ʼe fakaʼuhiga ʼe “pipiki tahi.” Koia, ʼe tonu ke malohi te ʼu felogoi ʼa te tagata mo te fafine ʼohoana ohage pe ʼe nā pipiki tahi. Kapau ʼe fai e tahi ia naua he meʼa ke mamahi ai tona hoa, pea ʼe nā mamahi toko lua anai. Ka pipiki feia te tagata ʼohoana ki tona hoa, pea ʼe ina liʼaki anai ia ʼata mo tohi fuli ʼe ha ai ni meʼa kovi mo fakalialia. ʼE ina foimo ‘fakahaga kehe ʼona mata mai te meʼa ʼae ʼe mole hona ʼuhiga.’ (Pes. 119:37) Koia, ʼe ina fakatotonu ke mole ina haga sioʼi he tahi age fafine mo ni holi ʼe kovi.—Sopo 31:1.
14. Kotea te ʼu puleʼaki ʼe tonu ke fai e he tagata ʼohoana agamalohi moʼo fakatokatoka ʼana felogoi mo Sehova pea mo tona hoa?
14 Kapau ʼe agamalohi peʼe palalau kovi te tagata ʼohoana ki tona hoa, ʼe tonu ke ina fai he tahi ʼu puleʼaki moʼo fakatokatoka tana ʼu felogoi mo Sehova, ʼo feia mo tona hoa. Kotea te ʼu puleʼaki ʼaia? ʼUluaki, ʼe mahino kia ia ʼe kovi te meʼa ʼae ʼe ina fai. ʼE sio ia Sehova kia meʼa fuli. (Pes. 44:21; Ekl. 12:14; Hep. 4:13) Lua, ʼe ina tuku tana gaohi koviʼi tona ʼohoana pea mo fetogi ia tana aga. (Taag. 28:13) Tolu, ʼe faifakalelei ki tona ʼohoana pea mo Sehova, pea kole fakamolemole kia naua. (Gaue 3:19) ʼE ina toe kole mamahi kia Sehova ke ina foaki age te fakaʼamu ʼae ke fetogi, pea ke tokoni age ke ina lolomi tana ʼu manatu, mo ʼana palalau pea mo tana aga. (Pes. 51:10-12; 2 Ko. 10:5; Flp. 2:13) Fa, ʼe mulimuli ki tana ʼu faikole ʼo fehiʼa ki te ʼu agamalohi mo palalau kovi fuli pe. (Pes. 97:10) Nima, ʼe ina kumi atu aipe te tokoni ʼa te ʼu tagata tauhi ovi ʼofa ʼo te kokelekasio. (Sakp. 5:14-16) Ono, ʼe ina fai hana fakatuʼutuʼu ʼe tokoni anai ki ai ke ʼaua naʼa toe to ki te ʼu taʼi aga ʼaia ʼi te ka haʼu. Ka sioʼi e he tagata ʼohoana he ʼu ʼata kovi mo fakalialia, pea ʼe tonu anai ke ina muliʼi ia te ʼu puleʼaki ʼaia. ʼE tapuakiʼi anai e Sehova tana ʼu faiga ke fetogi tana aga (Pes. 37:5) ʼE mole gata pe ki te liʼaki e he tagata ʼohoana ia he aga ʼe ufiufi, kae ʼe tonu ke ina toe ako pe ʼe feafeaʼi hana fakaʼapaʼapa ki tona ʼohoana. ʼO feafeaʼi?
ʼE FEAFEAʼI HAKOTOU FAKAʼAPAʼAPAʼI KI ʼOKOTOU HOA?
15. ʼE feafeaʼi he fakaha e te tagata ʼohoana te ʼofa ki tona hoa?
15 Kotou fakaha ʼe kotou ʼofa ki ai. ʼE ko he agamahani ʼa ʼihi tehina ʼohoana hanatou fai he meʼa ʼi te ʼaho fuli moʼo fakaha tonatou ʼofa mamahi ki tonatou hoa. (1 Soa. 3:18) ʼE feala ke fakaha e te tagata ʼohoana tona ʼofa ki tona hoa ʼaki hana fai he ʼu kiʼi meʼa faigafua. Ohage la, ʼe feala ke ina puke tona nima peʼe faʼofua ki ai. ʼE feala pe hana faitohi ki ai ʼi te telefoni ʼo ui “ ʼE au fia sio ʼosi kia koe,” peʼe ke ui “Neʼe feafeaʼi te ʼaho?” ʼE feala pe ʼi ʼihi temi, ke kotou fai he kiʼi tohi ʼo kotou fakaha ai ʼe kotou ʼofa mamahi ki ʼokotou hoa. Koia, ka fai e he tagata ʼohoana te ʼu meʼa ʼaia, ʼe ina fakaha ai ʼe fakaʼapaʼapa ki tona hoa, pea mo fakamalohiʼi tonā maʼuli fakataumatuʼa.
16. He koʼe ʼe tonu ke vikiʼi e te tagata ʼohoana ia tona hoa?
16 Kotou fakaha takotou lotofakafetaʼi. ʼE fakaʼapaʼapa te tagata ʼohoana ki tona hoa ʼaki hana fakaha age pe koʼe ʼe ʼofa ia ia, pea mo ina fakalotomalohiʼi ia ia. Ohage la, ʼe lotofakafetaʼi ki tona hoa ki te ʼu meʼa fuli ʼe ina fai moʼo tokoni ki ai. (Kol. 3:15) Ka vikiʼi fakamalotoloto e te tagata ʼohoana ia tona hoa, ʼe ina logoʼi hona fiafia, mo hona fimalie, mo hona ʼofainaʼi pea mo hona fakaʼapaʼapaʼi.—Taag. 31:28.
17. ʼE fakaha feafeaʼi e he tagata ʼohoana tana fakaʼapaʼapa ki tona hoa?
17 Kotou agalelei pea mo fakaʼapaʼapa. ʼE fakaha e te tagata ʼohoana tona ʼofa ki tona hoa ʼaki hana fakamaʼuhigaʼi pea mo ʼofa ki ai. ʼE ina fakaʼuhiga ia ia ko he meʼa ʼofa maʼuhiga mai ia Sehova. (Taag. 18:22; 31:10) Koia, ʼe agalelei mo fakaʼapaʼapa ki ai, maʼia mo te ʼu temi ʼae ʼe nā fai ai he ʼu felaveʼi fakasino. ʼE mole ina fakamalohiʼi anai ke ina fai he meʼa, ʼe ufiufi ai mo lainoa ai, peʼe ke hoha ai tona leʼo loto. f ʼE toe faiga anai te tagata ʼohoana ke ina taupau he leʼo ʼo loto ʼe maʼa ia muʼa ʼa Sehova.—Gaue 24:16.
18. Kotea ʼae ʼe fakatotonu e te ʼu tagata ʼohoana ka natou fai? (Vakaʼi mo te ʼa takai “ Ko Aluʼaga ʼe Fa ʼe Fakaha Ai e Te Tagata ʼOhoana Tana Fakaʼapaʼapa.”)
18 ʼU tagata ʼohoana, kotou tui papau ʼe sio mo fiafia ia Sehova ki ʼakotou faiga ʼae ke kotou fakaʼapaʼapa ki tokotou hoa, ia aluʼaga fuli pe ʼo tokotou maʼuli. Kotou fakatotonu ke kotou fakaʼapaʼapa ki ai, ʼo mole kotou fai he meʼa ke mamahi ai. Kae ke kotou agalelei mo fakaha takotou ʼofa ki ai. Ka kotou fai feia, ʼe kotou fakaha ki ai ʼe kotou ʼoʼofa ai, pea ʼe kotou fakamaʼuhigaʼi ia ia. Koia kotou fakaʼapaʼapa ki ʼokotou hoa, pea ʼe kotou puipui anai ʼakotou felogoi lelei mo Sehova, ʼae ʼe maʼuhiga ʼaupito.—Pes. 25:14.
KATIKO 131 “Ko Te Meʼa ʼAe Neʼe Fakatahi’i e Te ʼAtua”
a ʼE leleiʼia anai e te ʼu tagata ʼohoana ia tanatou lau te alatike ʼaeni “ ʼE ke tokaga koa ki te hahaʼi fafine ohage ko Sehova?” ʼi Te Tule Leʼo ʼo Sanualio 2024.
b Kapau neʼe gaohi koviʼi koutou e tokotou ʼohoana, ʼe tokoni atu te alatike ʼaeni “De l’aide pour les victimes de violence conjuguales” ʼi te manatu “Divers” ʼi te jw.org pea mo te JW Library®.
c HE ʼU FAKAMAHINO: ʼE fakaʼuhiga te “laukovi” ki te ʼu leakovi pea mo te ʼu palalau fefeka ʼe fai ki he tahi ke ufiufi ai. ʼE toe fakaʼuhiga ki te ʼu palalau ʼe fai tuʼumaʼu ki he tahi ʼo ʼuhiga mo te ʼu meʼa ʼae ʼe mole kei ke leleiʼia ia ia.
d Vakaʼi ʼi te jw.org mo te JW Library te alatike “La pornographie peut briser votre couple.”
e Ka sioʼi e te tagata ʼohoana he ʼu ʼata ʼe kovi, ʼe tokoni anai te alatike ʼaeni ki te fafine ʼohoana, “Kapau ʼe Sioʼi Tou ʼOhoana He ʼu ʼAta ʼe Kovi” ʼi Te Tule Leʼo ʼo ʼAukusito 2023.
f ʼE mole fakaha mai ʼi te Tohi-Tapu te meʼa ʼae ʼe lelei mo ʼae ʼe kovi, moka fai e te taumatuʼa he ʼu felaveʼi fakasino. ʼE tonu ki he taumatuʼa Kilisitiano ke nā toʼo he ʼu tonu, ʼe fakaha ai ʼe nā fia fakaʼapaʼapa kia Sehova, mo fiafia ʼi te fakahoko te koga ʼaia pea mo tanā taupau he leʼo ʼo loto ʼe maʼa. ʼE mahino ia, ʼe mole palalau anai he taumatuʼa ki ʼihi ʼo ʼuhiga mo te aluʼaga ʼaia ʼo tonā maʼuli fakataumatuʼa.
g FAKAMATALA ʼO TE PĀKI: ʼE faiga he ʼu kauga gaue ʼo he tehina ke ina sioʼi he ʼu tohi ʼe ha ai he ʼu pāki ʼe kovi.