ALATIKE AKO 1
KATIKO 2 Ko Tou Huafa Ko Sehova
Foaki Kia Sehova Te Kololia
TE KOGA TOHI ʼO TE TAʼU 2025: “Kotou foaki kia Sehova te kololia ʼae ʼe tuha mo tona huafa.” —PES. 96:8.
TE MANATU TAFITO
Tou ako ke tou foaki kia Sehova te kololia ʼae ʼe tuha mo ia.
1. Kotea ʼae ʼe tokaga tafito ki ai te tokolahi ia ʼaho nei?
ʼE KE tokagaʼi koa ʼi te temi nei, tokolahi ʼe natou manatu pe kia natou totonu? Ohage la, ʼe fakaʼaogaʼi e ʼihi ia te ʼu fakatahiʼaga ʼi te neti moʼo laupisiʼi pe ia natou totonu, pea mo fakahaha te ʼu gaue ʼae ʼe natou fai. Kae tokosiʼi ia natou ʼaia, ʼe mole natou fia fakakololiaʼi ia Sehova ʼAtua. ʼI te alatike ʼaeni, ʼe tou vakaʼi anai pe kotea te fakaʼuhiga ʼae ke foaki kia Sehova te kololia, pea kotea ʼae ʼe ina uga tatou ke tou fai te faʼahi ʼaia. ʼE tou toe ako anai pe ʼe feafeaʼi hatatou foaki ki te ʼAtua te kololia ʼae ʼe tuha mo ia, pea ʼe ina fakakololia feafeaʼi anai tona huafa ʼi te ka haʼu.
KOTEA TE FAKAʼUHIGA ʼAE KE FOAKI KIA SEHOVA TE KOLOLIA?
2. Neʼe fakaha feafeaʼi e Sehova tona kololia ʼi te moʼuga ʼo Sinai? (Vakaʼi mo te pāki ʼo te takafi.)
2 Kotea ia te kololia? ʼI te Tohi-Tapu, ko te kupu “kololia,” ʼe feala ke fakaʼuhiga kia meʼa fuli ʼe tupu ai te iloa mo te fakamaʼuhigaʼi ʼo he tahi. Hili pe ni kiʼi ʼaho ki te fakaʼateainaʼi e Sehova ia te puleʼaga ʼo Iselaele mai Esipito, neʼe ina fakaha age kia natou tona kololia. Fakakaukauʼi age muʼa koe, te aluʼaga ʼaeni neʼe hoko. Neʼe fakatahitahi te toko lauʼi miliona Iselaele ʼi te vaʼe moʼuga ʼo Sinai, ke natou logo ki te meʼa ʼae ka ui age e te ʼAtua kia natou. Neʼe ʼaofi te moʼuga e he ʼao matolu. Fokifa pe, kua ʼa takai ia te moʼuga e te kohu. Neʼe galulu malohi te kele pea neʼe toe tapa mo te hila, mo ʼuʼulu te mana. Pea neʼe logo ki te pupuhi ʼo te fakatagi pupuhi. (Eke. 19:16-18; 24:17; Pes. 68:8) Fakakaukauʼi age muʼa koe te kau Iselaele ʼi te temi ʼaia. Neʼe natou punamaʼuli ʼosi ʼi te fakaha age e Sehova te malohi ʼaia ʼo tona kololia.
3. Kotea te fakaʼuhiga ʼae ke tou foaki te kololia kia Sehova?
3 Kae ʼe feafeaʼi ki te tagata? ʼE feala moʼoni koa hatatou foaki kia Sehova te kololia? ʼEi, ʼe feala pe ia. ʼE kau ki te fakakololiaʼi ʼo Sehova ia tatatou palalau ki ʼihi, ʼo ʼuhiga mo ʼana gaue fakaofoofo ʼae ʼe ina fai pea mo ʼona kalitate matalelei. ʼE tou toe fakakololiaʼi te ʼAtua moka ʼe tou fakamaʼuhigaʼi ia ia, ʼuhi ko te ʼu meʼa fuli ʼae ʼe tou fai ʼaki tona malohi. (Esa. 26:12) Neʼe tuku mai e te Hau ko Tavite he faʼifaʼitaki lelei, he neʼe ina fakakololiaʼi ia Sehova. Neʼe faikole ia muʼa ʼo te kau Iselaele, ʼo ina ui fenei ki te ʼAtua: “Sehova e, ʼe ʼa koe te maʼoluga, mo te mafimafi, mo te matalelei, mo te taulekaleka pea mo te ʼalikisia, koteʼuhi ko te ʼu meʼa fuli ʼae ʼi te lagi mo te kele ʼe ʼa koe.” ʼI te ʼosi faikole pe ʼa Tavite, “neʼe fakavikiviki ia te hahaʼi katoa kia Sehova.”—1 Klk. 29:11, 20.
4. Neʼe fakakololiaʼi feafeaʼi e Sesu ia Sehova?
4 ʼI te nofo ʼa Sesu ʼi te kele, neʼe ina fakakololiaʼi tana Tamai, mo ina fakaha ki te hahaʼi neʼe ko Sehova ʼae neʼe ina foaki age te malohi moʼo fakahoko tana ʼu milakulo. (Mko. 5:18-20) Neʼe toe fakakololiaʼi e Sesu ia Sehova ʼaki tana faʼahiga palalau ki tana Tamai, pea mo tana aga ki ʼihi. ʼI te tahi ʼaho, neʼe faiakonaki ia Sesu ʼi he sinakoka. ʼI te hahaʼi ʼaia, neʼe ʼi ai te fafine neʼe ulu sino ai te temonio talu mai taʼu ʼe 18. Neʼe faiga te temonio ke tuʼa piko pea neʼe mole lava tuʼu tonu. ʼI fakaʼofaʼofa leva! Neʼe ʼofa Sesu ʼi te fafine ʼo fakaovi ki ai, pea ʼaki he agalelei neʼe ina ui fenei age: “Fafine, kua ke malolo mai tou mahaki. Neʼe ina hili ʼona nima kia ia, pea neʼe tuʼu tonu ake aipe ʼo fakakololiaʼi te ʼAtua.” Neʼe lotofakafetaʼi lahi kia Sehova ʼi tana toe fakamalolo ia ia. (Luka 13:10-13) Koia, neʼe ʼi ai te ʼu tupuʼaga lelei ke fakakololiaʼi ai e te fafine ʼaia ia Sehova, pea ʼe toe feia pe mo tatou.
KOTEA ʼAE ʼE UGA AI TATOU KE TOU FOAKI KIA SEHOVA TE KOLOLIA?
5. He koʼe ʼe tonu ke tou fakaʼapaʼapa kia Sehova?
5 ʼE tou fakakololiaʼi ia Sehova he ʼe tou fakaʼapaʼapa lahi kia te ia. ʼE lahi te ʼu tupuʼaga ke tou fakaʼapaʼapa ai kia te ia. ʼE mafimafi ia Sehova pea ʼe mole he tuʼakoi ʼo tona malohi. (Pes. 96:4-7) ʼE ha lelei te lahi ʼo tona poto ʼi te ʼu meʼa fuli ʼae neʼe ina fakatupu. ʼE ko ia te Matapuna ʼo totatou maʼuli, pea neʼe ina foaki ia meʼa fuli ʼe ʼaoga ke tou maʼuʼuli ai. (Fkha. 4:11) ʼE agatonu. (Fkha. 15:4) ʼE fua lelei ia meʼa fuli ʼe ina fai, pea ʼe ina fakahoko tuʼumaʼu ʼana fakapapau. (Sos. 23:14) Koia ʼae ʼe mole tou punamaʼuli ai ki te ʼu palalau ʼaeni neʼe fai e te polofeta ko Selemia ʼo ʼuhiga mo Sehova: “ ʼE mole he tahi ʼe tatau mo koe, ʼi te kau popoto fuli ʼo te hahaʼi pea mo ʼonatou puleʼaga fuli.” (Sel. 10:6, 7) Koia, ʼe ʼi ai te ʼu tupuʼaga lelei ke tou fakaʼapaʼapa ai ki tatatou Tamai ʼae ʼi selo. Kae, ʼe mole tou fakaʼapaʼapa pe kia Sehova, ʼe tou ʼoʼofa ia te ia.
6. He koʼe ʼe tou ʼoʼofa ia Sehova?
6 ʼE tou fakakololiaʼi ia Sehova he ʼe tou ʼoʼofa mamahi ia te ia. ʼE tou ʼoʼofa ia Sehova koteʼuhi ʼe lahi ʼona kalitate matalelei. ʼE manavaʼofa. (Pes. 103:13; Esa. 49:15) ʼE lotomahino, ka tou mamahi, pea ʼe toe mamahi mo ia. (Sakl. 2:8) ʼE ina loto ke tou fakaovi age kia te ia pea ke tou liliu ko hona ʼu kaumeʼa. (Pes. 25:14; Gaue 17:27) ʼE agavaivai, “ ʼe falele ke sio ki te lagi mo te kele, pea ʼe ina toʼo ake mai te efu ia ia ʼae ʼe veliveli.” (Pes. 113:6, 7) Koia, ʼi tatatou iloʼi te ʼu faʼahi ʼaia, ʼe mole ina uga ai koa la tatou ke tou fakakololiaʼi totatou ʼAtua mafimafi?—Pes. 86:12.
7. Kotea te fealagia tafito ʼe tou maʼu?
7 ʼE tou fakakololiaʼi ia Sehova he ʼe tou loto ke iloʼi ia ia e te hahaʼi. Tokolahi ʼe mole natou iloʼi te moʼoni ʼo ʼuhiga mo Sehova. Kotea tona tupuʼaga? Koteʼuhi neʼe fakakiviʼi natou e Satana ʼo ina folahi he ʼu loi fakamataku ʼo ʼuhiga mo Ia. (2 Ko. 4:4) ʼE loto e Satana ke tui te hahaʼi ko Sehova ko te ʼAtua itaita, ʼe mole tokaga ia kia tatou, pea ʼe ko ia ʼae ʼe ina fakatupu te ʼu mamahi ʼae ʼi te malamanei. Kae, ʼe tou iloʼi te moʼoni ʼo ʼuhiga mo totatou ʼAtua. ʼE tou maʼu te fealagia ʼae ke tou fakaha ki ʼihi ia te ʼuhiga moʼoni ʼo te ʼAtua, pea ke tou fakakololiaʼi ia ia. (Esa. 43:10) ʼE talanoa tafito te Pesalemo 96 ki te fakakololiaʼi ʼo Sehova. ʼE tou vakaʼi anai he ʼu vaega ʼo te pesalemo ʼaia. Koia, ke ke fakakaukauʼi pe ʼe feafeaʼi hau foaki kia Sehova te kololia ʼae ʼe tuha mo ia.
ʼE FEAFEAʼI HATATOU FOAKI KIA SEHOVA TE KOLOLIA ʼAE ʼE TUHA MO IA?
8. ʼE feala ke tou fakakololiaʼi feafeaʼi ia Sehova? (Pesalemo 96:1-3)
8 Lau ia Pesalemo 96:1-3. ʼE feala hatatou fakakololiaʼi ia Sehova ʼaki ʼatatou palalau. ʼI te ʼu vaega ʼaia, ʼe fakalotomalohiʼi ai te hahaʼi ʼa Sehova ke natou “hiva kia Sehova,” mo “vikiʼi tona huafa,” mo “kalagaʼi te logo lelei ʼo tana haofaki” pea mo “tala tona kololia ʼi te ʼu puleʼaga.” Ko te ʼu faʼahi la ʼaia ʼe tou fakakololiaʼi ai tatatou Tamai ʼae ʼi selo. Neʼe fiafia te kau Sutea agatonu mo te kau Kilisitiano ʼo te temi muʼa ke natou fakamatala ki ʼihi te ʼu meʼa lelei fuli ʼae neʼe fai e Sehova maʼa natou pea mo fakaha ia te ʼuhiga moʼoni ʼo Sehova. (Tan. 3:16-18; Gaue 4:29) ʼE feafeaʼi hatatou toe fai ia te faʼahi ʼaia?
9-10. Kotea te ako ʼe tou taʼofi mai te faʼifaʼitaki ʼo Angelena? (Vakaʼi mo te pāki.)
9 Tou vakaʼi te faʼifaʼitaki ʼo Angelena, a ko he tuagaʼane ʼe maʼuli ʼi Amelika. Neʼe lototoʼa he neʼe ina fakaha ia te ʼuhiga moʼoni ʼo Sehova ʼi te matani gaue ʼae ʼe gaue ai. Neʼe heʼeki fualoa te gaue ʼi ai ʼa Angelena. Koia neʼe fakaafe ia ia ki he fono. Pea ʼi te fono ʼaia, neʼe tuku age te faigamalie ʼae kia natou ʼae neʼe hoki hu ʼi te matani gaue ʼaia, ke natou palalau ki ʼonatou kauga gaue ʼo ʼuhiga mo tonatou maʼuli ʼi muʼa atu. Neʼe teuteuʼi e Angelena he ʼu pāki ke ina fakahaha, ʼe ha ai te fiafia ʼe ina logoʼi ʼi tona ʼuhiga Fakamoʼoni ʼa Sehova. Kae ʼi muʼa pe ʼo tana palalau, neʼe ʼi ai hona kauga gaue neʼe ina ui, ko ia neʼe lahilahi ake mo he kau Fakamoʼoni ʼa Sehova. Neʼe ina kamata manukiʼi ai tatatou tauhi. ʼE fakamatala fenei e Angelena: “Neʼe ta malohi ʼosi toku mafu. Kae neʼe au ui fenei: ‘ ʼE au tuku anai koa he tahi ke ina fakamafola he ʼu loi ʼo ʼuhiga mo Sehova? Pe ʼe au fakaha anai ia te ʼuhiga moʼoni ʼo Sehova?’ ”
10 ʼI te ʼosi palalau ʼo tona kauga gaue, neʼe foimo faikole fakalogologo atu aipe ia Angelena. ʼAki he agalelei, neʼe palalau leva ki ai ʼo ina ui fenei: “Neʼe au hage pe ko koe, neʼe au toe lahilahi ake ʼi he loto fale ko he ʼu Fakamoʼoni ʼa Sehova, pea ʼe kei au tauhi pe ʼi te temi nei kia Sehova.” Neʼe mole kei gu he tahi. Kae neʼe mole itaita ia Angelena. Neʼe ina fakaha te ʼu pāki fakalotofimalie ʼo te ʼu aluʼaga fakalaumalie ʼae neʼe kau ki ai. Pea neʼe ina tauʼi tana tui ʼaki he aga fakaʼeteʼete. (1 Pet. 3:15) Neʼe kotea ʼona fua? ʼI te ʼosi palalau ʼa Angelena, neʼe mole ita te tagata. Neʼe ina toe fakaha pe la mo ia, neʼe ina toe maʼu he ʼu aluʼaga fakafiafia, ʼi tana kei veliveli ʼi tana fakatahi mo te kau Fakamoʼoni ʼa Sehova. ʼE ui fenei e Angelena: “ ʼE tuha ia mo Sehova ke tou fakaha ia tona ʼuhiga moʼoni. ʼE ko he toe pilivilesio kia au taku fakaha te moʼoni ʼo ʼuhiga mo tona huafa.” ʼO feia pe mo tatou, ʼe tou maʼu te pilivilesio ʼae ke tou vikiʼi pea mo fakakololiaʼi ia Sehova, maʼia pe ʼe fakalainoaʼi ia ia e ʼihi.
11. Neʼe mulimuli feafeaʼi te kau atolasio ʼa Sehova ki te pelesepeto ʼae ia Pesalemo 96:8?
11 Lau ia Pesalemo 96:8. ʼE feala hatatou fakakololiaʼi ia Sehova ʼaki ʼotatou koloa. Neʼe fakakololiaʼi tuʼumaʼu e te kau atolasio moʼoni ia Sehova ʼaki ʼonatou koloa. (Taag. 3:9) Ohage la, neʼe kau te kau Iselaele ki te laga pea mo te taupau lelei ʼo te fale lotu. (2 Hau 12:4, 5; 1 Klk. 29:3-9) Neʼe lagolago te kau tisipulo ʼa Kilisito ʼaki “ ʼonatou koloa” kia Kilisito mo ʼana apositolo. (Luka 8:1-3) Neʼe toe tokoni te kau Kilisitiano ʼo te ʼuluaki sekulo ki ʼonatou tehina mo tuagaʼane fakalaumalie. (Gaue 11:27-29) Ia ʼaho nei, ʼe tou toe fakakololiaʼi ia Sehova ʼaki ʼotatou meʼa ʼofa.
12. ʼE feafeaʼi hatatou fakakololiaʼi ia Sehova ʼaki ʼotatou meʼa ʼofa? (Vakaʼi mo te pāki.)
12 Tou vakaʼi he faʼifaʼitaki ʼe ha ai pe ʼe tou fakakololiaʼi feafeaʼi ia Sehova ʼaki ʼotatou meʼa ʼofa. ʼI te 2020, neʼe fai te sivi neʼe ha ai te ʼu aluʼaga neʼe hoko ʼi Zimbabwe ʼuhi ko te taʼi laʼa. Ko te toko lauʼi miliona hahaʼi neʼe mole kei hanatou meʼa kai, ʼo kau ai te tuagaʼane ʼe higoa ko Prisca. Logo pe te taʼi laʼa, kae neʼe haga faifakamafola pe ia Prisca ʼi te ʼu Feliafa mo Feliaono fuli, maʼia mo te ʼu temi ʼae ʼe fuli ai te kele. Neʼe vaʼi ia ia ʼe tona ʼu vahaʼa fale, he neʼe alu ia ʼo faifakamafola, kae neʼe mole nofo ia ʼo gaue ʼi ʼana gaueʼaga. Neʼe natou ui fenei age: “ ʼE ke mate pakupaku anai.” Neʼe falala ia Prisca, ʼe tokaga pe anai ia Sehova kia ia. Koia, neʼe ina tali fenei age ai: “ ʼE mole liʼaki anai ʼi he temi e Sehova ʼana kaugana.” Mole faʼa fualoa ki ai, neʼe ina maʼu he tokoni mai tatatou kautahi. Neʼe ina maʼu tana meʼa kai mo ʼihi atu meʼa neʼe ʼaoga ki ai, ʼuhi ko te ʼu meʼa ʼofa ʼae ʼe tou foaki. Neʼe punamaʼuli tona ʼu vahaʼa fale, ʼo natou ui fenei age ki ai: “Neʼe mole liʼaki koe e te ʼAtua, koia ʼe matou fia mahino lahi age ʼo ʼuhiga mo ia.” Ko te toko fitu ʼi ʼona vahaʼa fale neʼe kau leva ki te ʼu fono.
13. ʼE feafeaʼi hatatou fakakololiaʼi ia Sehova ʼaki tatatou aga? (Pesalemo 96:9)
13 Lau ia Pesalemo 96:9. ʼE feala hatatou fakakololiaʼi ia Sehova ʼaki tatatou aga. Neʼe tonu ke maʼa ʼi te faʼahi fakasino ia te ʼu pelepitelo ʼae neʼe gaue ʼi te fale lotu ʼo Sehova. (Eke. 40:30-32) Kae, ʼe mole gata pe ki tatatou maʼa ʼi te faʼahi fakasino, kae ʼe maʼuhiga age ke tou toe maʼa ʼi te aga. (Pes. 24:3, 4; 1 Pet. 1:15, 16) ʼE tonu ke tou faiga malohi ke tou liʼaki “te ʼuluagaaga ʼafeā,” ko tona fakaʼuhiga te ʼu aga mo te ʼu manatu ʼae ʼe kovi. Pea ʼe tonu ke tou kofuʼi “te ʼuluagaaga foʼou,” ko tona fakaʼuhiga ke tou maʼu he ʼu manatu pea mo te aga ʼae ʼe ha ai te ʼu kalitate matalelei ʼo Sehova. (Kol. 3:9, 10) ʼAki te tokoni ʼa Sehova, ʼe feala ki te hahaʼi ʼae neʼe kovi ʼaupito tanatou fai he ʼu aga heʼe ʼaoga mo agamalohi ke natou fetogi, pea mo kofuʼi te ʼuluagaaga foʼou.
14. Kotea ʼe tou ako mai te faʼifaʼitaki ʼo Jack? (Vakaʼi mo te pāki.)
14 Tou vakaʼi te faʼifaʼitaki ʼo Jack, ko he tagata agamalohi ʼaupito mo faifakapo. Pea neʼe tau fakahigoaʼi ko Te Temonio. Neʼe fakatuʼā ia Jack ki te mate, ʼuhi ko tana ʼu faifakapo. Kae ʼi tana fakatalitali ki tona matehi, neʼe ina tali leva ke ina ako te Tohi-Tapu mo te tehina ʼae neʼe ina ʼaʼahi te kau pilisoni ʼi te fale pilisoni ʼae neʼe pupunu ai. Logo la tona maʼuli ʼi muʼa atu, kae neʼe liʼaki leva e Jack tona ʼuluagaaga ʼafeā. Pea ʼaki te temi, neʼe papitema leva. Neʼe fetogi ʼosi ia Jack pea ʼi te ʼaho ʼae neʼe tonu ke matehi ai, neʼe fetagihi ʼihi tagata leʼo ʼo te fale pilisoni ʼi tanatou tauʼine mo ia. Neʼe ui fenei e te tagata maʼu tuʼulaga ʼo te solia neʼe gaue ʼi te fale pilisoni: “ ʼI muʼa atu, ko Jack neʼe ko ia ʼae neʼe agakovi ʼaupito ʼi te kau pilisoni. Kae ia ʼaho nei, ko ia leva ʼae kua agalelei ʼosi.” ʼI te vahaʼa ʼae neʼe hoa mai ki te ʼosi matehi ʼo Jack, neʼe toe liliu te ʼu tehina ki te fale pilisoni ʼo fai ai te fono ʼo te vahaʼa. Pea neʼe natou felaveʼi ai mo te tagata pilisoni ko tana hoki kau e ki te fono. Kotea ʼae neʼe ina uga ia ia ke haʼu ʼo fono? Neʼe malave ʼosi kia ia tana sio ki te fetogi ʼo te aga ʼa Jack, pea neʼe fia mahino ki te meʼa ʼae ʼe tonu ke ina fai ke tauhi ai kia Sehova. Koia, ʼe feala ke tou fakakololiaʼi tatatou Tamai ʼae ʼi selo ʼaki tatatou aga.—1 Pet. 2:12.
ʼE FAKAKOLOLIAʼI FEAFEAʼI ANAI E SEHOVA TONA HUAFA ʼI TE KA HAʼU?
15. ʼE fakakololiaʼi feafeaʼi anai e Sehova tona huafa ʼi te ka haʼu? (Pesalemo 96:10-13)
15 Lau ia Pesalemo 96:10-13. ʼE fakaha ʼi te ʼu vaega fakaʼosi ʼo te Pesalemo 96, ko Sehova ʼe ko he Tuʼi Fakamau mo he Hau faitotonu. ʼE fakakololiaʼi feafeaʼi anai e Sehova tona huafa ʼi te ka haʼu? ʼAki ʼana fakamau. ʼE kua ina vave pulihi pe ia Papiloni Lahi ʼae ʼe ina ʼulihi tona huafa maʼoniʼoni. (Fkha. 17:5, 16; 19:1, 2) ʼE feala pe ki ʼihi ʼae ka sisio mata ki te pulihi ʼo Papiloni Lahi ke natou kau mo tatou ki te tauhi moʼoni. Koia, ʼi Alamaketone, ʼe pulihi anai e Sehova ia te malama ʼaeni ʼo Satana, ʼo kau ai ia natou fuli ʼae ʼe fakafeagai kia te ia, pea mo laukovi ki tona huafa. Kae ʼe ina haofaki anai ia natou fuli ʼae ʼe ʼoʼofa mo fakalogo kia te ia, pea mo fia meamea ʼi te fakakololiaʼi ʼo ia. (Mko. 8:38; 2 Tes. 1:6-10) Hili te ʼahiʼahi fakaʼosi ʼi te ʼosi ʼo te Pule ʼa Kilisito ia Taʼu ʼe Afe, ʼe fakatapuha anai e Sehova tona huafa. (Fkha. 20:7-10) ʼI te temi ʼaia, “ ʼe iloʼi anai e te hahaʼi ʼi te kele katoa ʼe maʼu e Sehova te kololia, ohage pe ko te ʼaofi e te vai ia te takele ʼo te tai.”—Hap. 2:14.
16. Kotea ʼae ʼe ke fakatotonu ke ke fai? (Vakaʼi mo te pāki.)
16 Ko he meʼa fakafiafia anai hatatou sisio ki te foaki kia Sehova e te kau maʼuʼuli fuli ia te kololia ʼae ʼe tuha mo ia. Kae ʼi te fakatalitali ki te ʼaho ʼaia, ʼe feala kia tatou takitokotahi hatatou fakakololiaʼi totatou ʼAtua ia aluʼaga fuli pe. Kapau ʼe tou fia tokaga tafito ki te gaue ʼaia, neʼe filifili e te Kolesi Pule ia Pesalemo 96:8, ko te vaega ʼaia ʼo te taʼu 2025: “Kotou foaki kia Sehova te kololia ʼae ʼe tuha mo tona huafa.”
KATIKO 12 Ko Sehova Te ʼAtua Lahi
a Ko ʼihi higoa neʼe fetogi.