ALATIKE AKO 3
KATIKO 35 “Ke Kotou Iloʼi Papau Te ’u Meʼa ʼAe ʼe Maʼuhiga “
Ke Ke Toʼo He ʼu Tonu ʼe Fiafia Ai Ia Sehova
“Ko te kamataʼaga ʼo te poto ʼe ko te manavasiʼi kia Sehova, pea ko te iloʼi ʼo te ʼAtua Maʼoniʼoni ʼe ko te ʼatamai ʼaia.”—TAAG. 9:10.
TE MANATU TAFITO
ʼE tou vakaʼi anai ʼe ʼaoga mai kia tatou te ʼatamai malama, mo te ʼatamai pea mo te fakasiosio tonu ke tou toʼo he ʼu tonu ʼe fakapotopoto.
1. Kotea ʼae ʼe ʼaoga ʼi te ʼaho fuli ke tou fai?
ʼI TE ʼaho fuli, ʼe tou toʼo ai he ʼu tonu. ʼE ʼi ai ʼihi tonu ʼe faigafua tona toʼo. Ohage la, ʼi te agamahani ʼe mole tou fakakaukau fualoa pe kotea ʼae ka tou kai anai ʼi te inu kafe uhu, peʼe ko te hola ʼae ka tou olo ai ʼo momoe. Kae, ʼe ʼi ai leva ʼihi tonu ʼe faigataʼa age. Ohage la, ʼe tonu ke tou toʼo he ʼu tonu ʼo ʼuhiga mo totatou maʼuli malolo fakasino, mo ʼotatou famili, mo te ʼu aluʼaga ʼae ke tou fiafia ai, peʼe ko tatatou tauhi ʼae kia Sehova. ʼE tou loto ke fua lelei ia te ʼu tonu ʼae ʼe tou fai kia tatou totonu, mo totatou famili, kae tafito ke fiafia ai ia Sehova.—Loma 12:1, 2.
2. Kotea ʼae ʼe tonu ke ke fai ke ke toʼo ai he ʼu tonu ʼe lelei?
2 ʼE ke toʼo anai he ʼu tonu ʼe lelei (1) kapau ʼe ke kumi te ʼu manatu fuli ʼae ʼe ʼaoga kia koe, (2) mo kapau ʼe ke kumi te manatu ʼa Sehova ʼo ʼuhiga mo te aluʼaga ʼaia, pea (3) mo kapau ʼe ke fakakaukauʼi lelei tona ʼu fua kovi pea mo tona ʼu fua lelei. ʼI te alatike ʼaeni, ʼe tou vakaʼi anai te ʼu aluʼaga ʼaia ʼe tolu, pea ʼe tou toe vakaʼi anai pe ʼe feafeaʼi hatatou fakaha tatatou fakasiosio tonu—Taag. 2:11.
KUMI TE ʼU MANATU FULI ʼAE ʼE ʼAOGA KIA KOE
3. Tuku mai he faʼifaʼitaki ʼe ha ai pe koʼe ʼe tonu ke ke kumi he ʼu manatu ʼe ʼaoga kia koe, ʼi muʼa ʼo hau toʼo he tonu.
3 Kapau ʼe tou fia toʼo he tonu ʼe lelei, ʼe tonu muʼa ke tou kumi te ʼu manatu fuli ʼae ʼe ʼaoga mai. He koʼe ʼe maʼuhiga te faʼahi ʼaia? Tou toʼo he faʼifaʼitaki. ʼE alu he tahi ki te toketa, he ʼe kovi tona mahaki. ʼE foimo foaki atu pe koa e te toketa hona faitoʼo ʼi muʼa ʼo tona vakaʼi pea mo faifehuʼi ki ai? Kailoa ia. ʼE ke toe toʼo anai he ʼu tonu ʼe lelei mo kapau ʼe ke kamata vakavakaʼi muʼa te ʼu aluʼaga tafito ʼo ʼuhiga mo tou aluʼaga. ʼO feafeaʼi?
4. Ka tou lau ia Taʼaga Lea 18:13, ʼe feafeaʼi hau maʼu te ʼu manatu fuli ʼae ʼe ʼaoga kia koe? (Vakaʼi mo te pāki.)
4 ʼE feala ke tou maʼu te ʼu manatu ʼae ʼe ʼaoga kia tatou ʼaki hatatou fai he ʼu fehuʼi. Ohage la, ʼe fakaafe koe ki he lafeti. ʼE tonu koa ke ke kau ki ai peʼe kailoa? Kapau ʼe mole ke iloʼi ia ia ʼae neʼe ina fakatuʼutuʼu te fakafiafia ʼaia pe kotea ʼae ka hoko ai, ʼe tonu anai ke ke fai age te ʼu fehuʼi ʼaeni: “ ʼE fai ʼifea te fakafiafia ʼaia? Pea ko ʼafea ka fai ai? Ko te toko fia ka fakaafe ki ai? Ko ai ʼe tokaga anai ki ai ke maui malie te lafeti ʼaia? Ko ai ka kau ai anai? Kotea la te ʼu faʼahi neʼe fakatuʼutuʼu ke fai ʼi te lafeti? ʼE ʼi ai anai koa te kava?” ʼE tokoni atu anai te ʼu tali ki te ʼu fehuʼi ʼaia ke ke toʼo he tonu ʼe fakapotopoto.—Lau ia Taʼaga Lea 18:13.
5. Ka kua ke maʼu te ʼu manatu fuli ʼae ʼe ʼaoga kia koe, kotea ʼae ʼe tonu ke ke fai?
5 Hili ia, ka kua ke maʼu te ʼu manatu ʼae ʼe ʼaoga kia koe, pea ke fakakaukauʼi lelei leva ia te aluʼaga fuli. Ohage la, kotea anai ka ke fai mo kapau ʼe ke maʼu logo ʼe kau anai ʼi te lafeti he ʼu hahaʼi ʼe mole natou fakaʼapaʼapa ki te ʼu pelesepeto Fakatohi-tapu? Peʼe kotea anai ka ke fai moka ʼe ke iloʼi ʼe tufa anai te kava kae mole he tahi ʼe tokaga ki tona faʼahiga fakaalualu? ʼE to lelei anai koa te lafeti ʼaia? (1 Pet. 4:3) Pea tahi, kotea ka ke fai anai mo kapau ʼe to mo he ʼaho fono, peʼe ko he ʼaho ʼe mahani ʼe ke faifakamafola ai? Kapau ʼe ke fakakaukauʼi lelei ia te ʼu aluʼaga fuli ʼaia, pea ʼe ke toʼo anai he tonu ʼe lelei. Kae ʼe mole gata ai pe. ʼE moʼoni, ʼe ke maʼu anai tau faʼahiga sio ki te aluʼaga ʼaia, kae kotea ia te manatu ia ʼa Sehova?—Taag. 2:6.
KUMI TE MANATU ʼA SEHOVA
6. Ka tou lau ia Sakopo 1:5, he koʼe ʼe tonu ke tou kole te tokoni ʼa Sehova?
6 Ke ke kole kia Sehova ke tokoni atu ke ke iloʼi tana manatu ʼo ʼuhiga mo te aluʼaga. ʼE ina fakapapau mai ʼe ina foaki mai anai te poto ʼae ʼe ʼaoga ke tou iloʼi pe ko te tonu ʼae ʼe tou toʼo ʼe fiafia ai. Ko te poto ʼaia “ ʼe foaki lahi e te ʼAtua ki te hahaʼi fuli ʼaki tona loto katoa pea ʼe mole ina fai he valoki.”—Lau ia Sakopo 1:5.
7. ʼE feafeaʼi hau iloʼi te manatu ʼa Sehova ʼo ʼuhiga mo he aluʼaga? Tuku mai he faʼifaʼitaki.
7 Ka ke kole kia Sehova ke ina takitaki koe, faiga ke ke tokagaʼi tana tali ki tau kole. Ohage la, ʼe ke folau pea ʼe mole kei ke iloʼi te faʼahi ʼae ʼe tonu ke ke alu ki ai. ʼE ke kole tokoni ki he tahi ʼo te fenua. ʼE ke alu anai koa kae heʼeki ina tali atu ki tau fehuʼi? Kailoa ia. ʼE mahino ia, ʼe ke fakalogo lelei anai ki te meʼa ʼae ʼe ina ui atu. ʼO toe feia pe, ka ke ʼosi kole kia Sehova te poto, faiga ke ke mahino ki tana tali ʼo ke fai he ʼu fekumi pe kotea te u lao mo pelesepeto ʼae ʼe alu tahi mo tou aluʼaga. Ohage la, ʼi muʼa ʼo tau toʼo he tonu pe ke alu ki te lafeti peʼe kailoa, he koʼe mole ke vakaʼi te manatu ʼa te Tohi-Tapu? Kotea la ʼae e ui ai ʼo ʼuhiga mo te ʼu fakafiafia ʼae ʼe mole lelei, mo te ʼu fakakaugā kovi, pea mo te maʼuhiga ʼae ke ke fakamuʼamuʼa te Puleʼaga ʼi te ʼu meʼa ʼae ʼe ke leleiʼia?—Mat. 6:33; Loma 13:13; 1 Ko. 15:33.
8. Kotea ʼe feala ke ke fai mo kapau ʼe ʼaoga atu he tokoni ke ke maʼu he ʼu lao pea mo he ʼu pelesepeto? (Vakaʼi mo te pāki.)
8 ʼE lagi ʼi ʼihi temi ʼe ʼaoga atu anai he tokoni ke ke maʼu te ʼu lao mo pelesepeto ʼae ka tokoni atu. ʼE feala tau kole tokoni ki he tehina peʼe ko he tuagaʼane kua fakapotopoto. Kae ʼe toe maʼuhiga anai ke ke toe fai e koe totonu he ʼu fekumi.ʼE feala tau fakaʼaogaʼi ʼatatou meʼa gaue, ohage la, ko te Kumiʼaga Tohi ʼa Te Kau Fakamoʼoni ʼa Sehova pea mo te Vaega Ki Te Maʼuli Fakakilisitiano. Pea ke ke manatuʼi, ko tau fakatuʼutuʼu ke ke toʼo he tonu ka fiafia ai anai ia Sehova.
9. ʼE feafeaʼi hatatou iloʼi ko te tonu ʼae ka tou toʼo ʼe fiafia ai anai ia Sehova? (Efeso 5:17)
9 ʼE feafeaʼi hatatou iloʼi ko te tonu ʼae ka tou toʼo ʼe fiafia ai anai ia Sehova? ʼE tonu muʼa ke tou iloʼi lelei ia Sehova. ʼE ui fenei ʼi te Tohi-Tapu: “Ko te iloʼi ʼo te ʼAtua Maʼoniʼoni ʼe ko te ʼatamai ʼaia.” (Taag. 9:10) Koia, kapau ʼe tou fia maʼu te ʼatamai mo mahino ki te ʼu aluʼaga, ʼe tonu ke tou iloʼi te ʼu kalitate ʼo Sehova, mo tana fakatuʼutuʼu, mo te meʼa ʼae ʼe ina leleiʼia pea mo fehiʼa ki ai. Ke ke fai te fehuʼi ʼaeni: ‘Ka au fakatafito te tonu ʼaia ʼe au toʼo ki te meʼa ʼe au iloʼi ʼo ʼuhiga mo Sehova, ʼe fiafia ai anai koa?’—Lau ia Efeso 5:17.
10. He koʼe ʼe maʼuhiga age te ʼu pelesepeto Fakatohi-tapu ʼi te ʼu agaʼi fenua?
10 ʼI ʼihi temi, kapau ʼe tou fia fakafiafiaʼi ia Sehova, ʼe tonu anai ke tou fai he meʼa ʼe mamahi ai ʼotatou famili. Ohage la, ʼe ʼi ai he ʼu matuʼā ʼe nā ʼoʼofa ʼi hanā taʼahine. Pea ʼe nā fakaneke tanā taʼahine ke ʼohoana mo te tagata ʼe falāʼia peʼe ʼe feala hana foaki he toe falā ke ina totogi te taʼahine, kae ʼe vaivai ia ʼi te faʼahi fakalaumalie. ʼE moʼoni, ʼe nā loto ke maʼuli fimalie tanā taʼahine ʼi te faʼahi fakakoloa. Kae ko ai anai ka tokoni ki ai ke tuputupu ʼi te faʼahi fakalaumalie? Kotea te manatu ia ʼa Sehova ʼo ʼuhiga mo te ʼu aluʼaga ʼaia? ʼE tou maʼu tona tali ia Mateo 6:33. ʼI te vaega ʼaia, ʼe fakalotomalohiʼi e Sesu ʼana tisipulo ke natou “haga fakamuʼamuʼa ia te Puleʼaga.” Logo la ʼe tou fakaʼapaʼapa ki ʼatatou matuʼā mo te hahaʼi ʼo totatou fenua, kae ko te meʼa ʼae ʼe maʼuhiga kia tatou, ke tou fakafiafiaʼi ia Sehova.
FAKAKAUKAUʼI LELEI TONA ʼU FUA LELEI MO TONA ʼU FUA KOVI
11. Ka tou lau ia Filipe 1:9, 10, ʼe tokoni feafeaʼi atu anai te fakasiosio tonu?
11 Ka ke ʼosi vakaʼi te ʼu pelesepeto Fakatohi-tapu ʼae ʼe tonu ke ke tokagaʼi ʼi te tonu ʼae ka ke toʼo, fakakaukauʼi lelei te ʼu faigamalie ʼae ʼe ke maʼu. (Lau ia Filipe 1:9, 10.) ʼE tokoni atu anai te fakasiosio tonu ke ke iloʼi ia te ʼu fua kovi ʼe feala ke hoko. ʼI ʼihi temi, ʼe faigafua anai te toʼo ʼo he tonu. Kae ʼe mole faigafua tuʼumaʼu anai. ʼE tokoni atu anai te fakasiosio tonu ke ke toʼo he ʼu tonu ʼe lelei, maʼia mo te ʼu aluʼaga faigataʼa.
12-13. Kapau ʼe ke kumi hau gaue, ʼe tokoni feafeaʼi atu anai te fakasiosio tonu ke ke fai he tonu ʼe lelei?
12 Fakakaukauʼi age muʼa te aluʼaga ʼaeni. ʼE ke kumi hau gaue ke tokoni ki tau taupau tou kiʼi famili. ʼE ke maʼu anai hau ʼu gaue ʼe lua, pea ʼe ke vakavakaʼi leva te ʼu aluʼaga fuli ʼo te ʼu gaue ʼaia ʼe lua. Ohage la, ʼe ke fakakaukauʼi te agaaga ʼo te gaue ʼae ka ke fai, te ʼu ʼaho mo te ʼu hola ka ke gaue ai, mo te temi ʼae ʼe ʼaoga ai ke ke alu ki te gaue, pea mo ʼihi atu aluʼaga. ʼE lelei lualua te gaue ʼaia. Kae ko te ʼu gaue ʼaia ʼe lua, ʼe ke leleiʼia te tahi ʼuhi he ʼe ke fia fai te agaaga ʼo te gaue ʼaia, peʼe ko tona totogi? ʼE ʼi ai ʼihi aluʼaga ʼe tonu ke ke tokagaʼi ʼi muʼa ʼo hau fai he tonu.
13 Ohage la, ko tou ʼu hola gaue ʼe ina fakafealagia koa ke ke kau ki te ʼu fono? ʼE ke maʼu tuʼumaʼu anai koa hou temi ke ke tokaga ki tou kiʼi famili ʼi te faʼahi fakalaumalie mo logoʼi honatou fimalie pea mo fiafia? Kapau ʼe ke fai te ʼu fehuʼi ʼaia, ʼe tokoni atu anai ke ke fakamuʼamuʼa “te ʼu meʼa ʼae ʼe maʼuhiga ʼaupito,” ʼae ko tau tauhi kia Sehova pea mo te ʼu meʼa ʼae ʼe ʼaoga ki tou famili, ʼi hau fakamuʼamuʼa te ʼu lelei ʼi te faʼahi fakasino. ʼE feala anai leva ke ke fai he tonu ʼe tapuakinaʼi anai e Sehova.
14. Kapau ʼe tou maʼu te fakasiosio tonu pea mo te ʼofa, kotea ka ina uga tatou ke tou fai?
14 ʼE toe tokoni mai te fakasiosio tonu ke tou fakakaukauʼi pe ʼe malave feafeaʼi anai ki ʼihi te ʼu tonu ʼae ʼe tou fai. ʼE mole tou loto ke “fakatupu tukia ki ʼihi.” (Flp. 1:10) ʼE maʼuhiga ke tou muliʼi te pelesepeto ʼaia moka tou toʼo he ʼu tonu takitokotahi ʼo ʼuhiga mo ʼotatou mutuʼi meʼa pea mo tatatou faʼahiga faiteuteu. ʼE lagi ʼi te ʼu aluʼaga ʼaia, ʼe tou leleiʼia ʼihi faʼahiga faiteuteu. Kae ʼe feala anai koa ki te ʼu faʼahiga faiteuteu ʼaia ke tukia ai ʼotatou tehina mo tuagaʼane, peʼe ko natou ʼae ʼe mole tauhi kia Sehova? ʼE tokoni mai anai te fakasiosio tonu ke tou fakaʼapaʼapa ki te ʼu meʼa ʼae ʼe logoʼi e ʼihi. Pea ko te ʼofa ʼe ina uga tatou ke tou kumi te meʼa ʼae ʼe lelei ki ‘tokita tatau’ pea mo agavaivai. (1 Ko. 10:23, 24, 32; 1 Tim. 2:9, 10) Koia, ʼe tou toʼo anai he tonu ʼe ha ai totatou ʼofa pea mo tatatou fakaʼapaʼapa ʼae ki ʼihi.
15. Kotea he ʼu tokoni ʼe ʼaoga mai anai moka ʼe tou toʼo he tonu ʼe maʼuhiga?
15 Kapau ʼe tonu ke ke toʼo he tonu maʼuhiga, ke ke fakakaukauʼi muʼa te ʼu aluʼaga ka hoko anai moka ke toʼo te tonu ʼaia. Neʼe fakalotomalohiʼi e Sesu tana ʼu tisipulo ke natou ‘fakafuafua te totogi’ ʼo tanatou gaue. (Luka 14:28) Kapau ʼe ke fia muliʼi tana tokoni ʼaia, ke ke feuiʼaki pe ʼe lahi feafeaʼi anai te temi mo te falā pea mo te malohi ʼae ka ke fakaʼaogaʼi ke to lelei te tonu ʼae ʼe ke toʼo. ʼI ʼihi aluʼaga, ʼe lelei anai ke ke vakavakaʼi mo natou ʼo tou famili pe ʼe feafeaʼi hanatou lagolago ki te gaue ʼaia. He koʼe ʼe fakapotopoto te ʼu tokoni ʼaia? Kapau ʼe ke mulimuli ki ai, ʼe lagi ke tokagaʼi anai ʼe tonu ke ke fai he ʼu fetogi, peʼe ke toʼo he tahi age tonu ʼe lelei age. Pea kapau ʼe ke fakakau ki ai tou kiʼi famili pea mo fakalogo ki tanatou manatu, ʼe natou lotolelei anai ke natou fakatahi mo koe ke fua lelei te tonu ʼae ka ke toʼo—Taag. 15:22.
TOʼO HE TONU ʼE FUA LELEI ANAI
16. Kotea te ʼu tokoni ʼe tokoni atu anai ke ke toʼo he tonu ʼe fua lelei anai? (Vakaʼi mo te ʼa takai “ ʼE Feafeaʼi Hau Toʼo He ʼu Tonu Fakapotopoto?”)
16 Neʼe ke mulimuli koa ki te ʼu tokoni ʼae neʼe tou vakaʼi ʼi ʼoluga? Neʼe ke kumi koa ia te ʼu manatu ʼae neʼe ʼaoga atu? Neʼe ke muliʼi koa te ʼu pelesepeto ʼae neʼe tokoni atu ke ke toʼo he tonu ʼe fiafia ai ia Sehova? Kapau ko ia, kua ke tokalelei ke ke toʼo hau tonu. Pea ʼe feala hau kole kia Sehova ke tokoni atu ke fua lelei.
17. Kotea ʼe tonu ke ke manatuʼi moka ʼe ke fia toʼo he ʼu tonu ʼe lelei?
17 Logo la ʼi muʼa atu, neʼe kua lahi te ʼu tonu fakapotopoto neʼe ke toʼo, kae ʼaua naʼa ke galoʼi te faʼahi ʼaeni. Kapau ʼe ke fia toʼo he tonu ʼe lelei, ke ke falala tuʼumaʼu ki te poto ʼo Sehova, kae mole ki tou poto fakatagata, peʼe ke manatu kua ke mahani mo te aluʼaga ʼaia. Ko Sehova tokotahi pe ʼe feala ke ina foaki atu te ʼatamai malama moʼoni, mo te ʼatamai moʼoni pea mo te fakasiosio tonu moʼoni, ʼae ko te ʼu koga tafito ʼo te poto. (Taag. 2:1-5) ʼEi, ʼe feala ke tokoni atu ke ke toʼo he ʼu tonu ʼe fiafia ai ia Sehova.—Pes. 23:2, 3.
KATIKO 28 Tou Kaumeʼa Mo Sehova