ALATIKE AKO 5
KATIKO 108 Te ʼOfa Agatonu ʼo Te ʼAtua
Te ʼu Fua Lelei ʼe Tou Maʼu Mai Te ʼOfa ʼo Sehova
“Neʼe haʼu ia Kilisito Sesu ki te malamanei moʼo haofaki te kau agahala.”—1 TIM. 1:15.
TE MANATU TAFITO
ʼE tou vakaʼi anai pe kotea te ʼu tapuakina ʼe tou maʼu ʼuhi ko te totogi, pea ʼe feafeaʼi hatatou fakaha kia Sehova tatatou lotofakafetaʼi ki te meʼa ʼofa taulekaleka ʼaia.
1. Kotea ʼe feala ke tou fai moʼo fakafiafiaʼi ia Sehova?
FAKAKAUKAUʼI age muʼa ʼe ke foaki ki he tahi ʼe ke ʼofa ai hana meʼa ʼofa makehe. ʼE matalelei pea mo ʼaoga ki ai. ʼE mahino ia, ʼe ke lotomamahi ʼosi mo kapau ʼe ina ʼai tau meʼa ʼofa ki te puha pea ʼe mole kei ina manatuʼi. Kae kapau ʼe ina fakaʼaogaʼi lelei tau meʼa ʼofa pea mo fakaha atu tana lotofakafetaʼi, ʼe mahino ia ʼe ke fiafia ʼaupito anai. Kotea ʼe tou ako mai te faʼifaʼitaki ʼaia? Neʼe foaki mai e Sehova tona ʼAlo maʼa tatou. ʼE mahino ia, ʼe fiafia moka tou fakaha age kia te ia tatatou lotofakafetaʼi ki te totogi pea mo siʼona ʼofa, ʼae neʼe ina uga ia ia ke ina foaki mai te meʼa ʼofa maʼuhiga ʼaia.—Soa. 3:16; Loma 5:7, 8.
2. Kotea ka tou vakaʼi ʼi te alatike ʼaeni?
2 Kae ʼaki te temi, ʼe feala pe ke tou kamata meʼa noaʼi te totogi. ʼE hage pe neʼe tou ʼai te meʼa ʼofa ʼaia ʼo te ʼAtua ki he puha. ʼE tou fiafia anai ʼi tona maʼu kae ʼe mole tou toe sisio mo manatu anai ki ai. Kapau ʼe mole tou loto ke hoko te faʼahi ʼaia, ʼe tonu ke tou manatuʼi tuʼumaʼu te ʼu meʼa ʼae neʼe fai e Sehova mo Sesu maʼa tatou. ʼE tokoni mai anai te alatike ʼaeni ke tou fakahoko te faʼahi ʼaia. ʼE tou vakaʼi anai pe kotea te ʼu fua lelei ʼe tou maʼu ia ʼaho nei ʼuhi ko te totogi pea mo te ʼu tapuakina ka tou maʼu anai ʼi te ka haʼu. ʼE tou toe vakaʼi anai pe ʼe feafeaʼi hatatou lotofakafetaʼi ki te ʼofa ʼo Sehova, tafito ʼi te ʼu vahaʼa ʼi muʼa mo te ʼosi ʼo te ʼAho Fakamanatu.
TE ʼU FUA LELEI ʼE TOU MAʼU IA ʼAHO NEI ʼAKI TE TOTOGI
3. Kotea he fua lelei ʼe tou maʼu ia ʼaho nei ʼuhi ko te totogi?
3 ʼE tou maʼu he ʼu fua lelei ia ʼaho nei ʼuhi ko te sakilifisio ʼo Sesu. Ohage la, ʼe fakamolemole e Sehova ʼatatou agahala ʼo fakatafito ki te totogi. Logo la neʼe mole maʼua ia ke ina fakahoko te faʼahi ʼaia, kae neʼe lotolelei pe ki ai. ʼAki he lotofakafetaʼi lahi, neʼe hiva fenei ia Tavite, te tagata faipesalemo: “Sehova e, ʼe ke agalelei pea mo lotofakamolemole.”—Pes. 86:5; 103:3, 10-13.
4. Ko ai ʼae neʼe foaki ki ai e Sehova te totogi? (Luka 5:32; 1 Timoteo 1:15)
4 ʼE manatu ʼihi ʼe mole natou tuha mo te lotofakamolemole ʼa Sehova. Kae ʼe mole tou tuha fuli mo te lotofakamolemole ʼa Sehova. Neʼe iloʼi e te apositolo ko Paulo ‘neʼe mole tuha mo ia ke fakahigoaʼi ia ia ko he apositolo.’ Kae neʼe ina ui fenei: “ ʼAki te ʼofa makehe ʼo te ʼAtua, ko au ko he apositolo.” (1 Ko. 15:9, 10) Ka tou fakahemala moʼoni ki ʼatatou agahala, ʼe fakamolemole mai ia Sehova. Kotea tona tupuʼaga? Koteʼuhi ʼe ʼofa ia tatou kae mole ʼuhi he ʼe tou tuha mo te faʼahi ʼaia. Kapau ʼe ke mamahi ʼuhi he ʼe ke logoʼi ʼe mole ke tuha mo te fakamolemole ʼa Sehova, ke ke manatuʼi neʼe ina foaki te totogi maʼa te kau agahala ʼae ʼe fakahemala moʼoni, kae mole maʼa he ʼu hahaʼi haohaoa.—Lau ia Luka 5:32; 1 Timoteo 1:15.
5. ʼE tonu koa te manatu ʼaeni ʼa ʼihi ʼe tuha pe ia mo natou ke fakaha age e Sehova ia tona manavaʼofa? Fakamahino.
5 ʼE mole tonu ke tou manatu ʼe tonu ke fakamolemole mai pe ia Sehova koteʼuhi kua fualoa tatatou tauhi kia te ia. ʼE mahino ia, ʼe maʼuhiga ʼaupito kia Sehova te ʼu taʼu fuli ʼae neʼe tou nofo agatonu kia te ia. (Hep. 6:10) Kae neʼe ina foaki noa mai ia te meʼa ʼofa ʼae ko siʼona ʼAlo. Neʼe mole ina totogi tatou ʼuhi ko te ʼu taʼu gaue ʼae neʼe tou fai maʼa ia. Koia, kapau ʼe tou manatu ʼe tou tuha mo te fakamolemole ʼa te ʼAtua koteʼuhi neʼe lahi te ʼu faʼahi neʼe tou fai maʼa Sehova, pea ʼe tou fakaha ai neʼe mole ʼaoga ke mate Sesu maʼa tatou.—Vakaʼi mo Kalate 2:21.
6. He koʼe neʼe faʼa fai ia Paulo ʼi tana tauhi kia Sehova?
6 Neʼe iloʼi e Paulo neʼe mole feala ke ina maʼu te ʼofa ʼo te ʼAtua. Koia, he koʼe neʼe faʼa fai feia ʼi tana tauhi kia Sehova? Mole ʼuhi he neʼe ina fia fakaha ʼe tuha mo ia tona manavaʼofa, kae ʼuhi ʼae neʼe ina fia fakaha kia te ia tana lotofakafetaʼi. (Efe. 3:7) Ohage ko Paulo, tou haga tauhi kia Sehova ʼaki he faʼa fai mole ʼuhi ke tou maʼu tona manavaʼofa kae ke tou fakaha age kia te ia tatatou lotofakafetaʼi.
7. Kotea te tahi fua lelei ʼe tou maʼu ia ʼaho nei ʼuhi ko te totogi? (Loma 5:1; Sakopo 2:23)
7 Kotea te tahi fua lelei ʼe tou maʼu ia ʼaho nei ʼuhi ko te totogi? ʼE feala ke tou maʼu he ʼu felogoi lelei mo ʼateaina pe mo Sehova a ʼuhi ko te sakilifisio ʼo Sesu. Neʼe tou vakaʼi ʼi te alatike ʼaeni kua ʼosi, neʼe tou tutupu ake kae neʼe heʼeki tou maʼu he ʼu felogoi lelei mo te ʼAtua. Kae kua feala “ke tou tokalelei mo te ʼAtua” pea mo fakaovi kia te ia ʼuhi ko te totogi.—Lau ia Loma 5:1; Sakopo 2:23.
8. He koʼe ʼe tonu ke tou lotofakafetaʼi lahi kia Sehova ki tatatou lava palalau kia te ia ʼi te faikole?
8 Tou tokagaʼi ka tou maʼu he ʼu felogoi lelei mo Sehova, pea ʼe feala ke tou palalau kia te ia ʼi te faikole. ʼI toe pilivilesio leva ʼae ʼe tou maʼu! ʼE mole fagono pe ia Sehova ki te ʼu faikole ʼae ʼe fai age e ʼana kaugana ia muʼa ʼo te hahaʼi. Kae ʼe toe fagono ki te ʼu faikole ʼae ʼe tou fai takitokotahi kia te ia. Ka tou faikole ʼe tokoni mai ke siʼisiʼi ʼatatou tuʼania pea mo tou maʼu ai te tokalelei ʼo te fakakaukau. Kae ʼe mole ko te ʼu fua lelei pe ʼaia ʼe tou maʼu moka tou faikole. ʼE toe tokoni mai ke tou fakamalohiʼi ai ʼatatou ʼu felogoi lelei mo te ʼAtua. (Pes. 65:2; Sakp. 4:8; 1 Soa. 5:14) ʼI te nofo ʼa Sesu ʼi te kele, neʼe faikole tuʼumaʼu koteʼuhi neʼe ina iloʼi ʼe fagono age tana Tamai, pea ʼe tokoni age te faikole ke ina haga taupau maʼu tana ʼu felogoi lelei mo ia. (Luka 5:16) Koia, ʼe tou lotofakafetaʼi lahi kia Sehova koteʼuhi ʼaki te totogi ʼe feala ai ke tou kaumeʼa mo ia pea mo felogoi mo Ia ʼi te faikole.
TE ʼU TAPUAKINA ʼE TOU MAʼU ANAI ʼI TE KA HAʼU ʼAKI TE TOTOGI
9. Kotea ʼae ka maʼu e te u kagana agatonu ʼa Sehova ʼuhi pe ko te totogi?
9 Kotea te ʼu tapuakina ka maʼu e te ʼu kaugana agatonu ʼa Sehova ʼi te ka haʼu ʼuhi ko te totogi? ʼE foaki age anai e Sehova kia natou ia te maʼuli heʼe gata. Tokolahi ʼe natou manatu ʼe mole feala ke tou maʼuʼuli ʼo heʼe gata koteʼuhi ʼe mamate pe te hahaʼi talu mai ni lauʼi taʼu ʼe ʼafe. Kae ʼi te ʼu fakatuʼutuʼu ʼa Sehova ʼe tonu ke maʼuli ʼo heʼe gata te tagata. Kapau la neʼe mole agahala ia Atama, ʼe mole hake anai ʼi te fakakaukau ʼa he tahi ʼe mole feala anai ke tou maʼuʼuli ʼo heʼe gata. Pea logo la ʼe faigataʼa kia tatou ʼi te temi nei hatatou fakakaukauʼi ʼe feala ke tou maʼuʼuli ʼo heʼe gata, kae ʼe tou tui ʼe hoko anai. Kotea tona tupuʼaga? Koteʼuhi ʼe tou iloʼi neʼe kua foaki e Sehova te totogi ʼae ʼe maʼoluga ʼaupito, ia te maʼuli ʼo siona ʼAlo totonu ke feala hatatou maʼu ia te maʼuli heʼe gata.—Loma 8:32.
10. Kotea te aluʼaga ʼe fakaʼamu ki ai te kau Kilsitiano fakanofo pea mo ʼihi atu ovi?
10 Logo la ʼe foaki mai anai e Sehova te maʼuli heʼe gata ʼi te ka haʼu, kae ʼe ina loto ke tou fiafia ʼi te temi nei, ʼo tou fakakaukauʼi te ka haʼu fiafia ʼaia. ʼE maʼuli fiafia anai te kau Kilisitiano fakanofo ʼi selo, pea ʼe natou pule anai ki te kele fakatahi mo Kilisito. (Fkh 20:6) ʼEmaʼuʼuli anai ʼihi atu ovi ʼi te kele, ʼi he palatiso ʼe mole toe maʼu ai anai te mamahi. (Fkh 21:3, 4) ʼE ke kau koa ʼi te lua kutuga ʼaia ka maʼuʼuli ʼi te kele? ʼE mole ui leva ʼe maʼuhiga age te maʼuli ʼae ʼi selo ʼi te maʼuli ʼi te kele. Kailoa ia. Neʼe fakatupu tatou e Sehova ke tou maʼuʼuli ʼi te kele. Koia, ka tou maʼuʼuli anai ʼo heʼe gata ʼe tou fiafia lahi anai.
11-12. Kotea he ʼu tapuakina ʼe tou maʼu anai ʼi te Palatiso peaʼe tou fakaʼamu anai ke tou fakahoko? (Vakaʼi mo te ʼu pāki.)
11 Fakakaukauʼi age muʼa pe ʼe feafeaʼi anai tou maʼuli ʼi te palatiso. ʼE mole tou toe tuʼania anai pe ʼe tou mahahaki mo mamate anai. (Esa. 25:8; 33:24) Pea ʼe foaki atu anai e Sehova te ʼu meʼa ʼae ʼe ke loto ki ai. ʼE ke ʼamusia age koa la ke lahi age tau ako ʼo ʼuhiga mo te ʼu manu? Peʼe ko te ta ukalele? Peʼe ko te fai pāki? ʼE mahino papau ia, ʼe ʼaoga anai he ʼu hahaʼi ʼe fai pāki fale, mo he ʼu hahaʼi ʼe popoto ʼi te faʼu fale, pea mo gaue kele. Kae ʼe toe ʼaoga anai he ʼu hahaʼi ke natou to mo teuteuʼi te meʼa kai, pea mo faʼu he ʼu meʼa gaue mo fai ʼoloto pea mo tokakaga ki ai. (Esa. 35:1; 65:21) Koia, ka ke maʼuli anai ʼo heʼe gata, ʼe ke maʼu anai hou temi ke ke fai te ʼu meʼa fuli ʼaia pea mo ʼihi atu gaue.
12 Pea tahi, ko he meʼa fakafiafia anai tatatou fakatalitali te kau fakatuʼuake! (Gaue 24:15) ʼE ko he toe aluʼaga fakafiafia anai hatatou iloʼi lelei age ia Sehova ʼaki hatatou ako ia te ʼu meʼa taulekaleka neʼe ina fakatupu. (Pes. 104:24; Esa. 11:9) Kae tafito age la, ʼe mole tou toe fai anai he meʼa ʼe kovi. Koia ʼe tou tauhi anai kia Sehova ʼo mole ʼaoga ke tou toe kole tana fakamolemole. ʼE ke liʼaki anai koa te ʼu tapuakina ʼaia ʼi te ka haʼu kae ke ke fakahoko “te ʼu fakafiafia fakatemi ʼo te agahala”? (Hep. 11:25) Kailoa ia. Kotea pe he sakilifisio ʼe tonu ke tou fai ke tou maʼu te ʼu tapuakina ʼaia, ʼe maʼuhiga ʼaupito ia. Ke ke manatuʼi ʼe tou maʼuʼuli anai ʼi te Palatiso ʼi te kele, pea ʼe mole ko he koga pe ia ʼe tou fakatalitali ki ai. Kae ʼe hoko moʼoni anai ʼi he ʼaho. Koia, ʼe hoko anai te ʼu faʼahi ʼaia koteʼuhi neʼe ʼofa mamahi ia Sehova kia tatou ʼo ina foaki mai tona ʼAlo ke mate maʼa tatou.
FAKAHA TAU LOTOFAKAFETAʼI KI TE ʼOFA ʼO SEHOVA
13. ʼE feafeaʼi hatatou fakaha ʼe tou lotofakafetaʼi ki te ʼofa ʼo Sehova? (2 Kolonito 6:1)
13 ʼE feafeaʼi hatatou fakaha tatatou lotofakafetaʼi kia Sehova ʼo ʼuhiga mo te totogi ʼae neʼe ina foaki mai? ʼAki hatatou fakamuʼamuʼa ʼi totatou maʼuli tatatou tauhi kia te ia. (Mat. 6:33) Tou manatuʼi neʼe mate ia Sesu “ke feala ai kia natou ʼae ʼe maʼuʼuli ke mole natou maʼuʼuli pe maʼa natou totonu, kae maʼa ia ʼae neʼe mate maʼa natou pea kua fakatuʼuake.” (2 Ko. 5:15) Neʼe agalelei pea mo lotofakamolemole mai ia Sehova. Koia, ka tou fai ia meʼa fuli ʼe tou lavaʼi moʼo tauhi kia te ia, ʼe tou fakaha ai ʼe tou iloʼi ia meʼa fuli neʼe ina fai maʼa tatou, pea ʼe tou lotofakafetaʼi moʼoni kia te ia.—Lau ia 2 Kolonito 6:1.
14. ʼE tou fakaha feafeaʼi ʼe tou falala kia Sehova?
14 ʼE feala ke tou toe fakaha totatou ʼofa kia Sehova ʼaki hatatou falala kia te ia pea mo muliʼi tana ʼu tokoni. Ka tou toʼo he tonu ʼo ʼuhiga mo te loaloaga ʼo tatatou ako ʼi te ʼu fale ako peʼe ko te fai ʼo he faʼahiga gaue, tou kole kia te ia pe kotea anai ʼe ina loto ke tou fai. (1 Ko. 10:31; 2 Ko. 5:7) Ka tou toʼo he ʼu tonu ʼo fakatafito ki tatatou tui kia Sehova, ʼe ʼasili malohi anai tatatou tui mo ʼatatou ʼu felogoi lelei mo ia. Pea ʼe tou tui papau ʼe hoko moʼoni anai tatatou maʼuʼuli ʼae ʼo heʼe gata.—Loma 5:3-5; Sakp. 2:21, 22.
15. ʼE tou fakaha feafeaʼi tatatou lotofakafetaʼi kia Sehova ʼi te ʼu vahaʼa ʼi muʼa mo te ʼosi ʼo te ʼAho Fakamanatu?
15 ʼE ʼi ai te tahi aluʼaga ʼe feala ai ke tou fakaha tatatou lotofakafetaʼi ki te ʼofa ʼo Sehova. ʼE feala ke tou fai ia meʼa fuli ʼe tou lavaʼi ʼi te ʼu vahaʼa ʼi muʼa mo te ʼosi ʼo te ʼAho Fakamanatu ke tou fakaha ai kia te ia tatatou lotofakafetaʼi ki te totogi. ʼE mole gata pe ki tatatou fai he ʼu fakatuʼutuʼu ke tou kau ki te toʼotoʼoga ʼaia. Kae ʼe tou toe fakaafe he tokolahi ke natou kau ki ai. (1 Tim. 2:4) Pea tou fakamahino age pe ʼe fakahoko feafeaʼi anai te toʼotoʼoga ʼaia. ʼE feala hatatou fakaha age te ʼu ʼata viteo ʼaeni ʼe tou maʼu ʼi te jw.org He Koʼe pea Neʼe Mate Ia Sesu?Tou Fakamanatu Te Mate ʼo Sesu. ʼE faiga anai te kau tagata ʼafeā ke natou fakaafe ia natou ʼae kua fakamamaʼo mai te kokelekasio. Fakafuafua age muʼa koe ki te fiafia ʼe maʼu anai ʼi selo mo te kele mo kapau ʼe toe liliu mai ʼihi ovi ʼa Sehova neʼe pupuli ki tana faga ovi. (Luka 15:4-7) ʼI te ʼAho ʼo Te Fakamanatu, tou fefakamaloʼaki ohage pe ko te mahani. Kae tou fakamalo tafito kia natou ʼae ko tanatou hoki omai ki te fale fono, peʼe ko natou ʼae kua fualoa tanatou mole heʼeki toe kau ki ʼatatou ʼu fono. ʼE tou loto ke natou logoʼi honatou fakatalitali lelei pea mo he fiafia.—Loma 12:13.
16. He koʼe ʼe lelei tau fakatuʼutuʼu ke lahi age tau tauhi kia Sehova ʼi te ʼu vahaʼa ʼi muʼa mo te ʼosi ʼo te ʼAho Fakamanatu?
16 ʼE feala koa hau lagolago ʼo lahi age ki te ʼu gaue fakalaumalie ka fakahoko ʼi te ʼu vahaʼa ʼi muʼa mo te ʼosi ʼo te ʼAho Fakamanatu? Ka lahi age te ʼu gaue ʼe ke fai maʼa Sehova ʼi te temi ʼaia, ʼe ko he faʼahiga fakaha ʼaia ʼo tatatou lotofakafetaʼi ki te ʼu meʼa fuli neʼe ina fai mo tona ʼAlo maʼa tatou. Koia, ka lahi age tatatou tauhi kia Sehova, ʼe toe lahi age anai mo tana tokoni mai pea mo toe malohi age anai tatatou falala kia te ia. (1 Ko. 3:9) Ke ke toe lau mo te ʼu koga Tohi-Tapu ʼae neʼe fakatuʼutuʼu ke lau ʼi te ʼu vahaʼa ʼi muʼa mo te ʼosi ʼo te ʼAho Fakamanatu. ʼE ke maʼu anai te polokalama lautohi ʼi te kaupepa Tou Vakaʼi Ia Te Tohi-Tapu ʼi Te ʼAho Fuli, peʼe ʼi te kaupepa Te Maʼuli Fakakilisitiano Mo Te Faifakamafola. ʼE feala pe la hau fakaloloto te ʼu koga Tohi-Tapu ʼaia moka ke fai tau ako tokotahi.
17. Kotea te meʼa ʼae ʼe fiafia ai ia Sehova? (Vakaʼi mo te ʼa takai “ He ʼu Aluʼaga Ke Ke Fakaha Ai Tou ʼOfa Kia Sehova.”)
17 ʼE lagi mole feala anai hau muliʼi fuli te ʼu tokoni ʼaeni neʼe foaki ʼi te alatike ʼaeni ʼuhi ko tou aluʼaga. Kae ke ke manatuʼi ʼe mole fakatatau e Sehova te meʼa ʼae ʼe ke fai mo ʼae ʼe fai e ʼihi. ʼE sio ia ki te meʼa ʼae ʼi tou loto, pea ʼe fiafia ia moka ina tokagaʼi ʼe ke lotofakafetaʼi lahi ki tona meʼa ʼofa maʼuhiga, ia te totogi.—1 Sam. 16:7; Mko. 12:41-44.
18. He koʼe ʼe tou lotofakafetaʼi kia Sehova mo Sesu?
18 ʼE tou iloʼi ʼaki pe te totogi ʼe feala ai ke fakamolemole ʼatatou agahala, mo tou maʼu he ʼu felogoi lelei mo Sehova, pea ke tou maʼu te ʼamanaki ʼae ke tou maʼuʼuli ʼo heʼe gata. Koia, tou fakaha tuʼumaʼu tatatou lotofakafetaʼi ki te ʼofa ʼo Sehova, ʼae tupu ai tatatou maʼu te ʼu tapuakina ʼaia. (1 Soa. 4:19) Tou toe fakaha tatatou lotofakafetaʼi ki te ʼofa ʼo Sesu he neʼe ina foaki siʼona maʼuli maʼa tatou.—Soa. 15:13.
KATIKO 154 Ko Te ʼOfa ʼe Mole Puli Anai ʼi He Temi