ALATIKE AKO 38
Fakaʼaogaʼi Lelei Tou Temi ʼi Te Temi Tokalelei
“Nee tokalelei te fenua pea nee mole fai he tau kia ia i te lolotoga o te u tau aena, koteuhi nee foaki leva e [“Sehova,” NWT] kia ia he malolo.”—2 KLK. 14:5.
KATIKO 60 Ke Haofaki ʼOnatou Maʼuli
TE ʼU MANATU FAKANOUNOU *
1. Ko te temi fea ʼae ʼe feala ke faigataʼa ai te tauhi kia Sehova?
KIA KOE la, ko te temi fea ʼae ʼe faigataʼa ai te tauhi kia Sehova? ʼE ko te temi koa ʼae ʼe tou tau ai mo ni fihifihia, peʼe ko te temi ʼae ʼe tou maʼuli fimalie ai? Ka tou tau mo ni fihifihia ʼe tou foimo kumi te tokoni ʼa Sehova. Kae ʼe feafeaʼi moka ʼe tokalelei totatou maʼuli? ʼE mole kei tou tokaga koa ki tatatou tauhi ki te ʼAtua? Neʼe fakatokagaʼi e Sehova te kau Iselaele ki te hele ʼaia.—Tet. 6:10-12.
2. Kotea te faʼifaʼitaki ʼae neʼe tuku mai e te Hau ko Asa?
2 Neʼe tuku mai e Asa, te Hau ʼo Suta he faʼifaʼitaki lelei maʼa tatou. Neʼe aga poto, ʼo falala kia Sehova. Neʼe tauhi kia te ia ʼi te ʼu temi faigataʼa pea mo te ʼu temi ʼae neʼe tokalelei ai. “Nee katoa te loto o Asa” kia Sehova ʼi tona maʼuli katoa. (1 Hau 15:14) Neʼe pipiki kia Sehova ʼi tana pulihi te tauhi hala ʼi te puleʼaga ʼo Suta. ʼE ui fenei ʼi te Tohi-Tapu: “Nee ina pulihi leva te u aletale pagani mo te u kogamea maoluga, pea nee ina maumaui leva te u fakatata, pea nee ina tuusi leva te u vao tapu.” (2 Klk. 14:2, 4) Maʼia mo tana kui fafine, neʼe ina fakahifo ia ia mai tona tuʼulaga fineʼaliki ʼo te puleʼaga. Kotea tona tupuʼaga? He neʼe ina uga te hahaʼi ke natou tauhi ki he fakatata.—1 Hau 15:11-13.
3. Kotea ʼae ka tou vakaʼi anai ʼi te alatike ʼaeni?
3 Neʼe mole gata pe te pulihi e Asa te tauhi hala. Neʼe ina fakalotomalohiʼi foki te hahaʼi ke natou toe liliu mai kia Sehova pea ke toe hoko atu te tauhi moʼoni. Neʼe tapuakiʼi e Sehova ia * Koia, ʼi te pule ʼa Asa neʼe fimalie te fenua ia taʼu ʼe hogofulu. (2 Klk. 13:23; 14:3, 5) ʼI te alatike ʼaeni, ʼe tou vakaʼi anai te fakaʼaogaʼi lelei e Asa te temi tokalelei ʼaia. ʼE tou toe vakaʼi te fakaʼaogaʼi lelei e te ʼu ʼuluaki Kilisitiano tonatou temi tokalelei, ohage ko Asa. Pea ʼe tou tali anai ki te fehuʼi ʼaeni: Kapau ʼe ke maʼuli ʼi he fenua ʼe ke lava tauhi faʼifaʼitaliha ai, ʼe feafeaʼi hau fakaʼaogaʼi lelei te temi tokalelei ʼaia?
Asa pea mo tana hahaʼi ʼi tana foaki age te tokalelei.NEʼE FAKAʼAOGAʼI LELEI E ASA TE TEMI TOKALELEI
4. Neʼe fakaʼaogaʼi lelei feafeaʼi e Asa te temi tokalelei ʼo tona puleʼaga, ʼo mulimuli kia 2 Koloniko 14:1, 5, 6?
4 Lau ia 2 Koloniko 14:1, 5, 6. Neʼe ui e Asa ki te hahaʼi neʼe ko Sehova ʼae neʼe ina foaki te malolo mai te potu fuli. Kae neʼe mole manatu ia ke fifimalie ʼi te temi tokalelei ʼaia. Neʼe ina laga ia he ʼu kolo, mo he ʼu kaupa, mo he ʼu tule, pea mo he ʼu matapa ʼi te huʼaga ʼo te ʼu kolo. Neʼe ina fakamahino fenei ki te hahaʼi ʼo Suta: “Kei tuu foki te fenua i otatou mua.” Ko tona fakaʼuhiga neʼe feala ki te hahaʼi ke feoloʼaki faʼifaʼitaliha ʼi te fenua ʼae neʼe foaki age e te ʼAtua. Pea neʼe feala ke natou laga ni fale, ʼo mole matataku naʼa ʼohofi natou e ni fili. Koia, neʼe fakalotomalohiʼi e Asa te hahaʼi ke natou fakaʼaogaʼi lelei te temi tokalelei ʼaia.
5. He koʼe neʼe fakamalohiʼi e Asa tana foʼi kautau?
5 Neʼe toe fakaʼaogaʼi e Asa te temi tokalelei ʼaia moʼo fakamalohiʼi tana foʼi kautau. (2 Klk. 14:7) Ko tona fakaʼuhiga koa neʼe mole falala kia Sehova? Kailoa ia. Neʼe ina iloʼi ʼe ko te maʼua ʼa he hau ke ina teuteuʼi tana hahaʼi ki te ʼu tau ka hoko mai. Neʼe mahino kia ia ʼe mole fualoa anai te temi tokalelei ʼaia. Pea neʼe tonu tana manatu ʼaia.
NEʼE FAKAʼAOGAʼI LELEI E TE ʼU ʼULUAKI KILISITIANO TONATOU TEMI TOKALELEI
6. Neʼe feafeaʼi te fakaʼaogaʼi lelei e te ʼu ʼuluaki Kilisitiano tonatou temi tokalelei?
6 Neʼe tau fakatagaʼi te ʼu ʼuluaki Kilisitiano. Kae neʼe toe ʼi ai pe mo he ʼu temi tokalelei. Neʼe feafeaʼi te fakaʼaogaʼi lelei e te ʼu tagata mo fafine agatonu ʼaia tonatou temi tokalelei? Neʼe natou fakamafola tuʼumaʼu pe te logo lelei. ʼE ui ʼi te tohi ʼo Gaue, “neʼe natou manavasiʼi kia Sehova” pea ʼi tanatou faifakamafola tuʼumaʼu, “neʼe natou haga tuputupu.” Neʼe ko te fakamoʼoni ʼaia neʼe tapuakiʼi e Sehova tanatou faʼafai ʼi te ʼu temi tokalelei.—Gaue 9:26-31.
7-8. Neʼe fakaʼaogaʼi feafeaʼi e Paulo pea mo te tahi ʼu Kilisitiano tonatou temi faigamalie?
7 Neʼe fakamafola e te ʼu ʼuluaki tisipulo te logo lelei ʼi te ʼu temi faigamalie fuli. Ohage la, ʼi te mahino ʼa Paulo ʼe feala ke faifakamafola ki te tokolahi ʼi Efeso, neʼe nofo ai ʼo faifakamafola pea mo fai ʼo ni tisipulo.—1 Ko. 16:8, 9.
8 Neʼe toe faifakamafola ia Paulo pea mo te tahi ʼu Kilisitiano ki te hahaʼi tokolahi ʼi te taʼu 49 H.T.S. * hili te fakatokatoka ʼo te fihifihia ʼo te silikosisio. (Gaue 15:23-29) ʼI te ʼosi fakaha ʼo te tonu ki te ʼu kokelekasio, neʼe faiga malohi e te ʼu tisipulo ke natou tala “te logo lelei ʼo ʼuhiga mo te folafola ʼa Sehova.” (Gaue 15:30-35) Pea neʼe kotea tona fua? ʼE ui fenei ʼi te Tohi-Tapu: “Ko te ʼu kokelekasio neʼe haga malolohi aipe ʼi te tui pea mo tuputupu ʼo kaugā malie ʼi te ʼaho fuli.”—Gaue 16:4, 5.
ʼE FEAFEAʼI HAU FAKAʼAOGAʼI TE TEMI TOKALELEI IA ʼAHO NEI
9. Ia ʼaho nei, kotea te aluʼaga ʼi ʼihi fenua, pea kotea te fehuʼi ʼe tonu ke tou fai?
9 Ia ʼaho nei, ʼe lahi te ʼu fenua ʼe feala ke tou faifakamafola faʼifaʼitaliha ai. ʼE ke maʼuli koa ʼi he fenua ʼe feia? Kapau koia, ke ke fai te fehuʼi ʼaeni: “ ʼE feafeaʼi koa haku fakaʼaogaʼi te faigamalie ʼaia?” Ke ke manatuʼi ʼe tou maʼuʼuli ʼi te ʼu ʼaho fakaʼosi. Pea kua fakatuʼutuʼu e te kautahi ʼa Sehova he gaue faifakamafola mo faiako ʼe lahi neʼe heʼeki hoko ʼi te malamanei. (Mko. 13:10) ʼE lahi te ʼu meʼa ʼe feala ke tou fakahoko ʼi te gaue ʼaia.
10. Kotea te fakalotomalohi ʼe foaki mai e Paulo ia 2 Timoteo 4:2?
10 ʼE feafeaʼi hau fakaʼaogaʼi lelei tou temi ʼi te temi tokalelei? (Lau ia 2 Timoteo 4:2.) He koʼe ʼe mole ke vakavakaʼi tou aluʼaga, ke ke iloʼi ai pe ʼe feala ke lahi age tau faifakamafola? ʼE feala koa ke ke liliu ʼo pionie, peʼe ko he tahi ʼo tou famili? ʼE mole ko te temi ʼaeni ke maʼu falā, peʼe tanaki koloa, he ʼe pulihi anai te ʼu meʼa ʼaia ʼi te mamahi lahi.—Taag. 11:4; Mat. 6:31-33; 1 Soa. 2:15-17.
11. Kotea ʼae ʼe fai e ʼihi tehina mo tuagaʼane moʼo fakamafola te logo lelei ki te tokolahi?
11 ʼE lahi te ʼu tehina mo tuagaʼane ʼe natou ako he tahi lea ke feala ai hanatou faifakamafola ki te hahaʼi pea mo fai ni ako. ʼE tokoni te kautahi ʼa te ʼAtua kia natou he ʼe kua lahi te ʼu tohi ʼe ina fai ʼi te ʼu lea kehekehe. Ohage la, ʼi te taʼu 2010 neʼe maʼu ʼatatou tohi ia lea ʼe 500 tupu. Kae ia ʼaho nei, kua maʼu ia lea ʼe 1 000 tupu.
12. ʼE malave feafeaʼi ki te hahaʼi moka natou logo ki te moʼoni ʼi tanatou lea? Tuku mai he faʼifaʼitaki.
12 ʼE malave feafeaʼi ki te hahaʼi moka natou logo ki te moʼoni ʼi tanatou lea? Tou toʼo te faʼifaʼitaki ʼa he tuagaʼane neʼe kau ki he fakatahi fakafenua ʼi Amelika. Neʼe fai te ʼu akonaki ʼi te
lea Kinyarwanda, ʼe ko te lea Afelika ʼe palalau tafito ʼi Rwanda, mo Congo (Kinshasa), pea mo Ouganda. Hili te fakatahi ʼaia, ko te tuagaʼane ʼae ko tana lea ko te Kinyarwanda, neʼe ina ui fenei: “Kua taʼu 17 taku nofo ʼi Amelika, pea ko taku hoki mahino ē ki te polokalama katoa ʼo he fakatahi.” Neʼe malave ʼaupito ki te tuagaʼane tana logo ki te ʼu akonaki ʼi tana lea. Kapau ʼe feala kia koe, ʼe feala koa hau ako he tahi lea? ʼE fia logo anai koa ʼihi hahaʼi ʼo tau telituale mo kapau ʼe ke fakamafola age ʼi tonatou lea? ʼE mahino ia ʼe ke fiafia ʼaupito anai ʼi ʼau faiga.13. Neʼe feafeaʼi te fakaʼaogaʼi lelei e ʼotatou tehina mo tuagaʼane ʼo Lusia tonatou temi ʼi te temi tokalelei?
13 ʼI tahi ʼu fenua, ʼe mole feala ki ʼotatou tehina mo tuagaʼane ke natou faifakamafola faʼifaʼitaliha, he ʼe fakatuʼakoi e te puleʼaga tatatou gaue. Ohage la ko ʼotatou tehina mo tuagaʼane ʼo Lusia. Neʼe tapuʼi tatatou gaue ʼi te fenua ʼaia lolotoga ni taʼu ʼe hogofulu tupu. Pea ʼi Malesio 1991, neʼe fakamoʼoni leva e te lao tatatou lotu. ʼI te temi ʼaia, neʼe ko te toko 16 000 kau faifakamafola ʼi Lusia. Pea hili taʼu e ʼuafulu, neʼe natou teitei toko 160 000 kau faifakamafola. Neʼe fakaʼaogaʼi lelei e ʼotatou tehina mo tuagaʼane te temi ʼae neʼe kei feala ai hanatou faifakamafola faʼifaʼitaliha. Kae neʼe gata leva te temi ʼaia. Logo la te aluʼaga ʼaia, ʼe kei malohi pe tanatou faʼafai ʼi te tauhi maʼa. ʼE kei hoko atu tanatou tauhi kia Sehova, ʼo natou fakaʼaogaʼi te ʼu faigamalie fuli.
ʼE GATA ANAI TE TEMI TOKALELEI
14-15. Neʼe fakaʼaogaʼi feafeaʼi e Sehova tona mafimafi moʼo haofaki ia Asa?
14 Neʼe gata leva te temi tokalelei ia ʼaho ʼo Asa. Neʼe haʼu leva te foʼi kautau ʼo Etiopea ʼo tauʼi te puleʼaga ʼo Suta. Pea ko Selake, tana kamutoa, neʼe manatu ia ʼe malo anai ia Suta 2 Klk. 14:10.
ʼaki tana foʼi toko tahi miliona kau solia. Kae neʼe iloʼi e Asa ʼe mole fakalogo te malo ki te lahi ʼo te kau solia. Neʼe falala ia ki tona ʼAtua, ia Sehova. Neʼe faikole fenei: “Hau o tokoni mai kia matou, [“Sehova,” NWT] tomatou Atua! Koteuhi ko koe ae e matou falala ki ai, pea nee matou omai i tou huafa o taui te hahai kaugamalie aeni.”—15 Neʼe tuʼa lua age te kaugamalie ʼo te kau solia Etiopea ʼi te kau solia ʼa Asa. Kae neʼe iloʼi e Asa ʼe mafimafi ia Sehova pea ʼe feala ke ina haofaki Tana hahaʼi. Pea neʼe tokoni moʼoni ia Sehova kia ia. Neʼe mole malo te foʼi kautau ʼo Etiopea.—2 Klk. 14:7-12.
16. ʼE tou iloʼi feafeaʼi ʼe fakatemi pe te temi tokalelei ʼae ʼe tou maʼuʼuli ai nei?
16 ʼE mole tou iloʼi lelei pe ʼe kotea ka hoko kia tatou takitokotahi ʼi te ka haʼu. Kae ʼe tou iloʼi ʼe fakatemi pe te temi tokalelei ʼae ʼe tou maʼuʼuli ai nei. Ke ke manatuʼi, neʼe fakakikite e Sesu ʼe fehiʼaʼinaʼi anai ʼana tisipulo e te ʼu puleʼaga fuli ʼi te ʼu ʼaho fakamuli. (Mat. 24:9) ʼO toe feia aipe, neʼe tohi fenei e Paulo: “Ko natou fuli ʼae ʼe fia pipiki ki te ʼAtua ʼi ʼonatou maʼuli, ʼi tonatou ʼuhiga tisipulo ʼa Kilisito Sesu, ʼe toe fakatagaʼi anai mo natou.” (2 Tim. 3:12) Pea ʼe “ita lahi” ia Satana. (Fkha. 12:12) Koia, ʼaua naʼa tou faihala. ʼE mole hao anai he tahi ʼi tana ita.
17. ʼE lagi ʼahiʼahiʼi feafeaʼi anai tatatou tui?
17 Kua vave ʼahiʼahiʼi anai tatatou tui. ʼEi, ʼe hoko anai ʼi te kele katoa, “he toe mamahi lahi neʼe heʼeki hoko talu mai te kamataʼaga ʼo te malamanei ʼo kaku mai ki te temi nei.” (Mat. 24:21) ʼI te temi ʼaia, ʼe lagi fakafeagai mai anai totatou famili peʼe tapuʼi anai tatatou gaue. (Mat. 10:35, 36) ʼE ke falala anai koa ʼe puipui koe e Sehova pea mo tokoni atu, ohage ko Asa?
18. Kotea ʼae ʼe tonu ke tou fai nei ke tou nofo teuteu ki te temi ʼae ka gata ai te temi tokalelei, ʼo mulimuli kia Hepeleo 10:38, 39?
18 ʼE teuteuʼi nei tatou e Sehova ki te ʼu aluʼaga ʼae ka hoko mai. ʼE ina fakaʼaogaʼi “te tagata faifekau agatonu mo poto” ke ina foaki mai tatatou “meʼa kai ʼi tona temi totonu.” ʼAki te meʼa kai ʼaia, ʼe feala ai ke hoko atu tatatou tauhi kia Sehova mo he lototoʼa. (Mat. ) Kae ʼe tonu ke tou tahi faiga ʼo fakamalohiʼi tatatou tui kia Sehova.—Lau ia 24:45Hepeleo 10:38, 39.
19-20. Kotea te ʼu fehuʼi ʼae ʼe tonu ke tou fai ʼi tatatou ʼosi lau ia 1 Koloniko 28:9?
19 Ohage ko Asa, ʼe tonu ke tou “kumi” ia Sehova. (2 Klk. 14:3; 15:1, 2) Ke tou fakahoko te faʼahi ʼaia, ʼe tonu muʼa ke tou iloʼi ia Sehova pea mo tou papitema. Pea ʼe tonu ke tou faiga ke toe malohi age totatou ʼofa kia te ia. Koia, tou fai te fehuʼi ʼaeni: “ ʼE au kau tuʼumaʼu koa ki te ʼu fono ʼo te kokelekasio?” ʼI te ʼu fono ʼaia, ʼae ʼe fakatuʼutuʼu e te kautahi ʼa Sehova, ʼe fakalotomalohiʼi ai tatou. Pea ʼe toe fakalotofimalieʼi ai tatou e ʼotatou tehina mo tuagaʼane. (Mat. 11:28) ʼE feala ke tou toe fai mo te ʼu fehuʼi ʼaeni: “ ʼE ko taku agamahani koa te lau ʼo te Tohi-Tapu ʼi te ʼaho fuli?” ʼI te vahaʼa fuli, kua ke fakatuʼutuʼu koa he temi mo tou famili ke fai ai takotou ako fakafamili? Peʼe kapau ʼe ke maʼuli tokotahi, kua ke fakatuʼutuʼu koa he temi ke ke ako ai te Tohi-Tapu mo fai he ʼu fekumi? Pea ʼe ke faiga malohi koa ke ke faifakamafola pea mo fai ni tisipulo?
20 He koʼe ʼe tonu ke tou fai te ʼu fehuʼi ʼaia? ʼE ui ʼi te Tohi-Tapu, ko Sehova ʼe ina vakaʼi tatatou ʼu manatu pea mo te ʼu meʼa ʼi totatou loto. Koia la ʼae, ʼe tonu ai ke tou fai feia mo tatou. (Lau ia 1 Koloniko 28:9.) Kapau leva ʼe tou tokagaʼi ʼe tonu ke tou fetogi ʼatatou fakatuʼutuʼu peʼe ko tatatou faʼahiga manatu, tou kole kia Sehova ke tokoni mai. ʼE ko te temi nei ʼae ʼe tonu ai ke tou teuteu ki te ʼu ʼahiʼahi ʼae ka hoko mai anai. Koia, ke ke fakaʼaogaʼi lelei te temi tokalelei ʼaeni!
KATIKO 62 Te Hiva Foʼou
^ pal. 5 ʼE ke maʼuli koa ʼi he fenua ʼe ke tauhi ʼateaina ai kia Sehova? Kapau koia, ʼe feafeaʼi hau fakaʼaogaʼi te temi tokalelei ʼaia? ʼE tokoni atu anai te alatike ʼaeni ke ke fakakaukauʼi te faʼifaʼitaki ʼa Asa, te Hau ʼo Suta pea mo ʼae ʼo te ʼu ʼuluaki Kilisitiano. Neʼe natou fakaʼaogaʼi lelei tonatou temi ʼi te ʼu temi tokalelei.
^ pal. 3 HE ʼU FAKAMAHINO: ʼE mole fakaʼuhiga pe te kupu “tokalelei” ki he temi ʼe mole hoko ai he tau. ʼI te Fakahepeleo, ʼe toe fakaʼuhiga ki he tahi ʼe mole mahaki, ʼe mole hona ʼu fihifihia, pea ʼe mole tuʼania.
^ pal. 8 Ko te ʼu mataʼi tohi ʼaeni H.T.S. ko tona fakaʼuhiga: Hili te Temi ʼo Sesu.
^ pal. 58 FAKAMATALA ʼO TE ʼU PĀKI: Neʼe fakahifo e te Hau ko Asa tana kui fafine mai tona tuʼulaga ʼi te puleʼaga, he neʼe ina uga te hahaʼi ke natou tauhi ki he fakatata. Ko te ʼu tagata ʼae neʼe lagolago kia Asa, neʼe natou mulimuli ki tana faʼifaʼitaki ʼo maumauʼi te ʼu fakatata.
^ pal. 60 FAKAMATALA ʼO TE ʼU PĀKI: Ko he taumatuʼa ʼe faʼafai ʼi te minisitelio, ʼe nā fakafaigafua tonā maʼuli ke nā olo ki he telituale ʼe ʼaoga lahi ai he kau faifakamafola.