ALATIKE AKO 40
Haga Tauhi Kia Sehova Ohage Ko Petelo
“Fakamamaʼo atu, ʼAliki, koteʼuhi ko au ko he tagata agahala.”—LUKA 5:8.
KATIKO 38 ʼE Ina Fakamalohi Anai Ia Koe
TE ʼU MANATU FAKANOUNOU a
1. Neʼe malave feafeaʼi kia Petelo te milakulo ʼae neʼe fai e Sesu?
NEʼE gelu ia Petelo ʼi te po katoa, pea neʼe mole ina maʼu hana ika. Neʼe fai age leva e Sesu te ʼu palalau fakapunamaʼuli ʼaeni: “Hoho atu ki te loloto, ʼo kotou ʼaʼau ʼokotou kupega.” (Luka 5:4) Neʼe mole faʼa tui ia Petelo ʼe ina maʼu anai hana ika, kae neʼe ina fai te meʼa ʼae neʼe kole age e Sesu. Neʼe maʼu leva e Petelo mo ʼona kauga gelu he tuʼuga ika, ʼo kamata motumotu ai ʼanatou kupega. Neʼe natou “punamaʼuli” pea natou mahino ai neʼe fai e Sesu he milakulo. Neʼe ui age e Petelo:“Fakamamaʼo atu, ʼAliki, koteʼuhi ko au ko he tagata agahala.” (Luka 5:6-9) Neʼe fakaha e Petelo ʼi tana ʼu palalau ʼaia neʼe mole tuha mo ia ke fakatahi mo Sesu.
2. Kotea ʼae ʼe tou ako mai te faʼifaʼitaki ʼa Petelo?
2 Neʼe moʼoni te ui ʼae ʼa Petelo ko ia “ko he tagata agahala.” Ohage pe ko tona ui ʼi te Tohi-Tapu, neʼe fai ʼi ʼihi temi e Petelo he ʼu palalau mo he ʼu aga neʼe fakahemala ai ki muli age. Neʼe kua hoko koa kia koe te faʼahi ʼaia? ʼE kei ke tauʼi koa hou vaivaiʼaga? Peʼe ke faiga koa ke lelei age tou ʼuluagaaga? Kapau koia, ʼe feala ke tokoni atu te faʼifaʼitaki ʼa Petelo. ʼO feafeaʼi? Fakakaukauʼi ia te faʼahi ʼaeni: Neʼe feala pe ke mole tuʼu te ʼu vaivaiʼaga ʼo Petelo ʼi te Tohi-Tapu. Kae neʼe tohi ai ke feala hatatou taʼofi mai ai ni ako. (2 Tim. 3:16, 17) Ko te ʼu vaivaiʼaga ʼo te tagata ʼaia mo te ʼu meʼa ʼae neʼe ina logoʼi ʼe hage pe ko tatou. Koia ʼe feala ai ke tou mahino ʼe mole fakamaʼua mai e Sehova ke tou haohaoa. ʼE ina loto ke tou faʼa kataki, ʼo haga tauhi agatonu kia te ia logo la ʼotatou vaivaiʼaga.
3. He koʼe ʼe tonu ke tou faʼa kataki?
3 He koʼe ʼe tonu ke tou faʼa kataki? ʼI te agamahani, ka tou haga fai he gaue pea ʼe tou liliu ʼo faiva. Ohage la, ʼe lagi ʼaoga anai he temi loaloaga ki he tahi ke poto ʼi te ta ʼukalele. Lolotoga te temi ʼae ʼe akoako ai, ʼe lahi anai te ʼu halahala ʼe ina fai, kae kapau ʼe mole ina tuku ʼana faiga, ʼe poto lelei anai. Pea tatau aipe pe kua liliu ʼo faiva, kae ʼe feala pe ke halahala tana ta te ʼukalele. Logo la te faʼahi ʼaia, kae ʼe hoko atu ʼana faiga ke toe lelei age. ʼO toe feia, ka tou manatu kua tou lava tauʼi he vaivaiʼaga, ʼe toe feala pe ke tou toe to ki ai. ʼE tou tuku anai koa ʼatatou faiga? Kailoa. Ko tatou fuli ʼe tou fai ni palalau mo ni aga ʼe tou fakahemala ai ki muli age. Kae kapau ʼe hoko atu ʼatatou faiga, ʼe tokoni mai anai ia Sehova ke tou fetogi. (1 Pet. 5:10) ʼE tou vakaʼi anai ʼi te alatike ʼaeni te faʼa kataki ʼa Petelo. Ko te manavaʼofa ʼo Sesu kia Petelo logo la ʼana lakahala, ʼe ina uga ai tatou ke tou haga tauhi agatonu kia Sehova.
NEʼE INA TAUʼI ʼONA VAIVAIʼAGA PEA NEʼE TAPUAKINAʼI
4. ʼO mulimuli kia Luka 5:5-10, kotea ʼae neʼe ui e Petelo ʼo ʼuhiga mo ia totonu, kae neʼe fakalotomalohiʼi feafeaʼi ia ia e Sesu?
4 ʼE mole fakaha mai ʼi te Tohi-Tapu pe ʼe koʼe neʼe ui e Petelo ko ia “ko he tagata agahala” peʼe ko te ʼu agahala fea ʼae neʼe manatu ki ai. (Lau ia Luka 5:5-10.) Kae neʼe lagi ina fai ni hala mamafa. Neʼe tokagaʼi e Sesu te mataku ʼa Petelo, he neʼe lagi manatu neʼe mole tuha ke fakatahi mo Sesu. Kae neʼe toe iloʼi e Sesu ʼe feala ke nofo agatonu ia Petelo. Koia la ʼae neʼe ui e Sesu kia Petelo: “Tuku tau mataku.” Ko te falala ʼa Sesu kia Petelo neʼe fetogi ai tona maʼuli. Ki muli age, ko ia mo tona tehina ko Atelea neʼe nā tuku ai tanā fai gelu, kae nā mulimuli tuʼumaʼu ʼi te Mesia. Neʼe tapuakinaʼi lahi naua e Sehova.—Mko. 1:16-18.
5. Kotea te ʼu tapuakina neʼe maʼu e Petelo ʼi tana lava tauʼi ʼana manatu ʼae ʼe mole lelei pea mo ina mulimuli tuʼumaʼu ia Sesu?
5 ʼI te mulimuli ʼa Petelo ia Sesu, neʼe sio ai ki he ʼu aluʼaga fakaofoofo. Neʼe sio ki tana fakamalolo te kau mahahaki, mo kapu te ʼu temonio, pea mo tana fakatuʼuake te kau mate. b (Mat. 8:14-17; Mko. 5:37, 41, 42) ʼI te meʼa ʼae neʼe ha, neʼe toe sio fakatomuʼa ai e Petelo kia Sesu kua fakanofo Hau ʼi tona Puleʼaga. Neʼe mole toe galo kia ia te aluʼaga ʼaia. (Mko. 9:1-8; 2 Pet. 1:16-18) Ka na neʼe mole liliu la ko he tisipulo ʼa Sesu neʼe mole sio mata ki te ʼu aluʼaga ʼaia. ʼE mahino ia, neʼe fiafia ia Petelo ʼi tana lava tauʼi ʼana manatu ʼae neʼe mole lelei pea neʼe tapuakinaʼi lahi ia ia.
6. Neʼe lava tauʼi atu pe koa e Petelo ʼona vaivaiʼaga? Fakamahino.
6 Logo la te ʼu meʼa neʼe sio mo logo ki ai, kae neʼe kei tauʼi pe e Petelo ʼona vaivaiʼaga. Tou vakaʼi ni aluʼaga neʼe hoko. ʼI te fakaha age e Sesu ʼe tonu anai ke mamahi pea mo mate, ohage ko tona tuʼu ʼi te lea fakapolofeta, neʼe fakatonutonuʼi e Petelo ia ia. (Mko. 8:31-33) Neʼe tau fefihiʼaki ia Petelo mo te ʼu apositolo pe ko ai ʼae neʼe lahi age ia natou. (Mko. 9:33, 34) ʼI te po fakaʼosi ʼi muʼa ʼo te mate ʼo Sesu, neʼe ʼohofi e Petelo he tagata ʼo ina tuʼusi tona taliga. (Soa. 18:10) ʼI te po pe ʼaia, neʼe mataku ia Petelo, ʼo ina fakafisi tuʼa tolu ʼe mole ina iloʼi tona kaumeʼa ko Sesu. (Mko. 14:66-72) Neʼe tagi mamahi ai ia Petelo.—Mat. 26:75.
7. Hili tona fakatuʼuake, kotea te faigamalie neʼe foaki e Sesu kia Petelo?
7 Kae neʼe mole liʼaki e Sesu tana apositolo ʼae neʼe kua lotovaivai. Hili tona fakatuʼuake, neʼe toe foaki age e Sesu he faigamalie ke fakaha age e Petelo tona ʼofa ia te ia. Neʼe kole age e Sesu ke tauhi e Petelo ʼaki he agavaivai tana faga ovi. (Soa. 21:15-17) Neʼe tali koa e Petelo te gaue ʼaia? ʼEi. Pea neʼe nofo ia Petelo ʼi Selusalemi ʼi te ʼaho ʼo te Penikosite, ʼo kau ai ʼi te ʼu ʼuluaki Kilisitiano ʼae neʼe fakanofo ʼaki te laumalie maʼoniʼoni.
8. Kotea te hala mamafa neʼe fai e Petelo ʼi Atiokia?
8 Kae logo la tona kua fakanofo ʼaki te laumalie maʼoniʼoni, neʼe kei tonu pe ke tauʼi e Petelo ʼona vaivaiʼaga. ʼI te taʼu 36 H.T.S, ko Kolonelio ʼae neʼe mole ko he Sutea neʼe fakanofo ʼaki te laumalie maʼoniʼoni. ʼI tona fakanofo ʼaia, neʼe ha ai “ʼe mole fakapalatahi te ʼAtua” pea kua feala kia natou ʼae ʼe mole Sutea ke kau ki te kokelekasio. Neʼe sio mata ia Petelo ki te faʼahi ʼaia. (Gaue 10:34, 44, 45) Hili ʼaia, neʼe kamata kai leva ia Petelo mo natou ʼae ʼe mole Sutea. Ko he aluʼaga neʼe mole manatu pe la ʼe feala anai ʼi he ʼaho. (Kal. 2:12) Kae neʼe manatu ʼihi Kilisitiano Sutea neʼe mole feala ke kakai fakatahi te kau Sutea mo natou ʼae ʼe mole Sutea. Koia ʼi te ʼomai ʼa ʼihi ia natou ʼaia ki Atiokia, neʼe mole kei kai fakatahi leva ia Petelo mo ʼona tehina ʼae mole Sutea, he neʼe lagi mataku naʼa iita te kau Kilisitiano Sutea ʼaia. Neʼe tokagaʼi e te apositolo ko Paulo ia tana malualoi pea neʼe ina fakatonutonuʼi ia muʼa ʼo te kauga malie. (Kal. 2:13, 14) Logo la tana hala ʼaia, kae neʼe haga tauhi agatonu pe ia Petelo kia Sehova. Kotea ʼae neʼe tokoni kia ia?
KOTEA NEʼE TOKONI KIA IA KE HAGA TAUHI AGATONU PE KIA SEHOVA?
9. ʼE fakaha feafeaʼi ia Soane 6:68, 69 ko Petelo neʼe ko he tagata agatonu?
9 Neʼe agatonu ia Petelo. Neʼe mole ina tuku he meʼa ke ina taʼofi tana mulimuli tuʼumaʼu ʼae ia Sesu. Ohage la, neʼe fai ʼi te tahi ʼaho e Sesu he ʼu palalau neʼe mole mahino ki ai ʼana tisipulo. (Lau ia Soane 6:68, 69.) Mole ui ke natou faiga ke natou mahino peʼe natou atali ke ina fakamahino age, kae tokolahi neʼe natou tuku tanatou mulimuli ia Sesu. Kae neʼe mole kau ai ia Petelo. Neʼe agatonu kia Sesu he neʼe ina ui ʼe ko Sesu tokotahi pe ʼe ina “maʼu te ʼu folafola ʼo te maʼuli heʼe gata.”
10. Neʼe fakaha feafeaʼi e Sesu tana falala ʼae kia Petelo? (Vakaʼi mo te pāki.)
10 Neʼe mole liʼakinaʼi e Sesu ia Petelo. Neʼe ina iloʼi ʼe liʼakinaʼi anai ia ia e Petelo mo ʼana tahi kau apositolo ʼi te po fakaʼosi ʼo tona maʼuli ʼi te kele. Kae neʼe fakaha age e Sesu kia Petelo tana falala ʼae ʼe toe lotomalohi anai pea mo nofo agatonu. (Luka 22:31, 32) Neʼe mahino kia Sesu “ʼe tuʼu te loto, kaʼe ʼe vaivai te kakano.” (Mko. 14:38) Koia la ʼae, logo la neʼe fakafisi ia Petelo ʼe mole ina iloʼi ia Sesu, kae neʼe falala aipe Sesu ki tana apositolo. Hili tona fakatuʼuake, neʼe ha kia Petelo, ʼi he temi neʼe lagi nofo tokotahi ai. (Mko. 16:7; Luka 24:34; 1 Ko. 15:5) Neʼe lagi lotomalohi ai ia Petelo, ʼae neʼe kua lahi tona lotomamahi.
11. Kotea ʼae neʼe fai e Sesu moʼo fakamoʼoni kia Petelo ʼe tokaga anai ia Sehova kia ia?
11 Neʼe foaki e Sesu kia Petelo he fakamoʼoni ʼe tokoni anai ia Sehova kia ia. Hili tona fakatuʼuake, neʼe fai e Sesu he milakulo, ʼo toe fakafealagia kia Petelo mo te tahi ʼu apositolo ke natou maʼu he tuʼuga ika. (Soa. 21:4-6) ʼE mahino ia, ʼaki te milakulo ʼaia, neʼe mole toe hoha ai ia Petelo he ʼe tokaga anai ia Sehova ke ina foaki te ʼu meʼa ʼae ʼe ʼaoga kia ia. Neʼe lagi manatuʼi ai e Petelo te ui ʼae ʼa Sesu ʼe foaki anai e Sehova te ʼu meʼa ʼae ʼe ʼaoga kia natou ʼae ʼe natou “haga fakamuʼamuʼa ia te Puleʼaga.” (Mat. 6:33) Neʼe uga ai ia Petelo ke ina fakamuʼamuʼa tana minisitelio ʼi tana gaue ʼae ko te gelu. ʼI te Penikosite ʼo te taʼu 33 neʼe faifakamafola ʼaki he lototoʼa pea neʼe tali ai e te toko lauʼi afe ia te logo lelei. (Gaue 2:14, 37-41) Ki muli age, neʼe tokoni ki te kau Samalitana mo natou ʼae neʼe mole Sutea ke natou ako ke natou iloʼi ia Kilisito pea mo mulimuli ia te ia. (Gaue 8:14-17; 10:44-48) ʼE mahino ia neʼe fakaʼaogaʼi e Sehova ia Petelo ke ina taki mai te faʼahiga hahaʼi kehekehe ki te kokelekasio.
KOTEA TE ʼU AKO ʼE TOU MAʼU?
12. ʼE fakalotomalohiʼi feafeaʼi tatou e te faʼifaʼitaki ʼa Petelo moka ʼe kua fualoa tatatou tauʼi hotatou vaivaiʼaga?
12 ʼE lava tokoni mai ia Sehova ke tou haga tauhi agatonu kia te ia. ʼE lagi faigataʼa hatatou hoko atu, tafito la moka kua fualoa tatatou tauʼi hotatou vaivaiʼaga. ʼI ʼihi temi, ʼe hage mai ʼe kovi age ʼotatou vaivaiʼaga ʼi ʼae neʼe tauʼi e Petelo. Kae ʼe foaki mai anai e Sehova te malohi ke ʼaua naʼa tou tuku ʼatatou faiga. (Pes. 94:17-19) Ohage la, ko te tehina neʼe faitagata lolotoga ni taʼu ʼi muʼa ʼo tana iloʼi te moʼoni. ʼE mole kei ina fai tana aga heʼe ʼaoga ʼaia. Kae neʼe tonu ke ina haga tauʼi lolotoga he temi tona holi kovi ʼaia. Kotea ʼae neʼe tokoni kia ia? ʼE ina ui: “ʼE foaki mai e Sehova te malohi.” Pea ʼe ina hoko atu fenei: “ʼAki te tokoni ʼa te laumalie ʼo Sehova . . . neʼe au ako ai ʼe feala ke au fakaalutahi toku maʼuli mo te moʼoni . . . Neʼe feala ai ke fakaʼaogaʼi au e Sehova, pea logo la ʼoku vaivaiʼaga, kae ʼe haga foaki tuʼumaʼu mai pe e Sehova te malohi.”
13. ʼO mulimuli kia Gaue 4:13, 29, 31, ʼe feafeaʼi hatatou faʼifaʼitakiʼi ia Petelo? (Vakaʼi mo te pāki.)
13 Ohage ko tatatou kua ʼosi vakaʼi, neʼe fai e Petelo he ʼu hala mamafa he neʼe mataku ʼi te hahaʼi. Kae neʼe faikole ia Petelo ke foaki age e Sehova te malohi pea neʼe lototoʼa ai. (Lau ia Gaue 4:13, 29, 31.) ʼO toe feia mo tatou, ʼe feala ke tou tauʼi te mataku. Neʼe hoko te faʼahi ʼaia ki te tehina tupulaga ko Horst, neʼe maʼuli ʼi Siamani lolotoga te Lua Tau Fakamalamanei. Neʼe fakaneke tuʼa lahi ia ia e ʼona kauga ako ke ina ui ʼe haʼu te haofaki mai ia Itilele. Neʼe ina iloʼi ʼe kovi, kae neʼe ina fai tuʼa lahi te ʼu palalau ʼaia he neʼe mataku. Neʼe mole munaʼi ia ia e ʼana matuʼā, kae neʼe nā faikole mo ia. Neʼe nā kole kia Sehova ke ina foaki age kia Horst te lototoʼa. ʼAki te tokoni ʼo tana ʼu matuʼā pea mo tana falala ʼae kia Sehova, neʼe maʼu e Horst te malohi ʼae ke fakafisi. Neʼe ina ui ki muli age: “Neʼe mole liʼakinaʼi au e Sehova.” c
14. Kotea ʼae ʼe feala ke fai e he tagata tauhi ovi ʼofa moʼo fakalotomalohiʼi he ovi kua lotovaivai?
14 ʼE mole liʼakinaʼi anai tatou e Sehova mo Sesu. Hili tana fakafisi kia Sesu, neʼe tonu ke fai e Petelo he tonu maʼuhiga. ʼE ina tuku anai koa tana muliʼi ia Sesu peʼe hoko atu pe anai? Neʼe kole mamahi e Sesu kia Sehova ke ʼaua naʼa vaivai te tui ʼa Petelo. Tahi ʼae, neʼe ui age e Sesu kia Petelo neʼe ina hufakiʼi ia ia pea neʼe ina fakaha age tana falala ʼae ʼe toe fakalotomalohiʼi anai e Petelo ʼona tehina. (Luka 22:31, 32) Ka neʼe manatuʼi e Petelo te ʼu palalau ʼaia ʼa Sesu, neʼe lagi lotomalohi ai. Ka tonu ke tou fai he tonu maʼuhiga, ʼe feala ke fakaʼaogaʼi e Sehova he ʼu tagata tauhi ovi ʼofa moʼo fakalotomalohiʼi ʼo tatou pea mo tokoni mai ke tou nonofo agatonu. (Efe. 4:8, 11) Ko te tehina ko Paul, ʼae kua fualoa tana tagata ʼafea, ʼe ina fakalotomalohiʼi feia ʼona tehina mo tuagaʼane. ʼE ina ui age kia natou ʼae kua lotovaivai, ke natou manatuʼi pe neʼe taki feafeaʼi mai e Sehova ia natou ki te moʼoni. Pea ʼe ina ui age leva kia natou ko Sehova ʼe ko he ʼAtua ʼe ʼofa agatonu, pea ʼe mole ina liʼakinaʼi anai natou. ʼE ina ui: “ʼE au tokagaʼi, tokolahi te ʼu tehina mo tuagaʼane ʼae neʼe lotovaivai neʼe natou toe hoko atu tanatou tauhi kia Sehova ʼaki tana tokoni.”
15. ʼE fakaha feafeaʼi e te faʼifaʼitaki ʼa Petelo mo ʼae ʼa Horst, ʼe moʼoni te ʼu palalau ʼae ia Mateo 6:33?
15 Ohage pe ko te foaki e Sehova te ʼu meʼa ʼae neʼe ʼaoga kia Petelo pea mo te tahi ʼu apositolo, ʼe ina toe fai feia pe anai kia tatou moka tou fakamuʼamuʼa te minisitelio ʼi totatou maʼuli. (Mat. 6:33) Hili te Lua Tau Fakamalamanei, ko te tehina ko Horst, ʼae neʼe kua tou ʼosi palalau ki ai, neʼe fia pionie katoa. Kae neʼe faigataʼa he neʼe masiva pea neʼe manatu ʼe mole feʼauga anai tana foʼi falā moʼo hoko atu tana pionie. Kotea ʼae neʼe ina fai? Neʼe ina fia vakaʼi pe ʼe fakahoko anai e Sehova tana fakapapau. Koia, ʼi te ʼaʼahi e te taupau fakasiliko tanatou kokelekasio, neʼe faifakamafola ʼi te foʼi vahaʼa katoa ʼaia. ʼI te fakaʼosi ʼo te vahaʼa, neʼe punamaʼuli ʼi te fakatoʼo age e te tehina taupau ia he sila pea neʼe mole ina fakaha age pe ko ai ʼae neʼe ina foaki age. ʼAki te falā ʼae neʼe ʼi te sila, neʼe feala ai ke hoko atu e Horst tana pionie ʼi ni mahina. Neʼe tui papau ai te tehina, ko te meʼa ʼofa ʼaia neʼe ko he fakamoʼoni ʼe tokaga anai Sehova kia ia. Neʼe ina fakamuʼamuʼa ai te Puleʼaga ʼi tona maʼuli katoa.—Mala. 3:10.
16. He koʼe ʼe lelei ke tou tokagaʼi te faʼifaʼitaki ʼa Petelo pea mo te ʼu tohi ʼae neʼe ina fai?
16 ʼE mahino ia neʼe fiafia ia Petelo ʼi te mole fakamamaʼo ʼa Sesu mai ia ia, ohage ko tana kole age. Neʼe akoako ia ia e Sesu ke liliu ko he apositolo agatonu mo he faʼifaʼitakiʼaga maʼa te kau Kilisitiano. ʼE lahi te ʼu ako ʼe feala ke tou taʼofi mai te ʼu vaega Tohi-Tapu ʼae ʼe palalau ki te akoako ʼaia pea ʼe feala ke fua lelei kia tatou fuli. ʼI te ʼu tohi ʼe lua ʼae neʼe fai e Petelo ʼaki te takitaki ʼa te laumalie ki te ʼu kokelekasio ʼi te temi ʼo te ʼu ʼuluaki Kilisitiano, neʼe ina fakaha ai ʼihi ako ʼo te ʼu ako ʼaia pea mo te tahi ʼu manatu. ʼE tou vakaʼi anai ʼi te alatike ka hoa mai he ʼu manatu ʼi te ʼu tohi ʼaia pea ʼe feafeaʼi hatatou mulimuli ki ai ia ʼaho nei.
KATIKO 126 Tou ʼAlaʼala, Mo Tuʼu Malohi
a Neʼe fai te alatike ʼaeni moʼo fakalotomalohiʼi natou ʼae ʼe natou tauʼi ʼonatou vaivaiʼaga. ʼE fakaha ai ʼe feala ke natou tauʼi pea mo hoko atu tanatou tauhi agatonu kia Sehova.
b ʼE lahi te ʼu vaega ʼi te alatike ʼaeni neʼe toʼo tafito mai te Evaselio ʼa Maleko. ʼE ha mai neʼe tohi e Maleko te ʼu meʼa ʼae neʼe fakamatala age e Petelo, ʼae neʼe sio mata ki te ʼu aluʼaga neʼe hoko.
c Vakaʼi te fakamatala ʼo te maʼuli ʼo te tehina ko Horst Henshel, ʼi te Kotou ʼAʼala (Fakafalani) ʼo te ʼaho 22 ʼo Fepualio 1998, ko tona kupu tafito “Affermi par la fidélité de ma famille.”
d FAKAMATALA ʼO TE PĀKI: Ohage ko tona ha ʼi te pāki, neʼe faikole te ʼu matuʼā ʼa Horst Henschel mo ia pea mo nā fakalotomalohiʼi ia ia ke nofo agatonu.