ALATIKE AKO 28
Ke Ke Tui Papau ʼe Ke Nofo ʼi Te Moʼoni
“Ke ke haga mulimuli ki te ʼu meʼa ʼae neʼe ke ako pea neʼe fakalotoʼi koe ke ke tui ki ai.”—2 TIM. 3:14.
KATIKO 56 Maʼuliʼi Te Moʼoni
TE ʼU MANATU FAKANOUNOU *
1. Kotea te fakaʼuhiga ʼo tatatou ui ʼae ko “te moʼoni”?
“NEʼE feafeaʼi tau iloʼi te moʼoni?” “Neʼe ke lahilahi koa ʼi te moʼoni?” “Kua ke taʼu fia ʼi te moʼoni?” Neʼe lagi kua fai atu te ʼu fehuʼi ʼaeni, peʼe lagi neʼe ke fai te ʼu fehuʼi ʼaia ki ʼihi age. Kae kotea te fakaʼuhiga ʼo tatatou ui ʼae ko “te moʼoni”? ʼI te agamahani, ʼe tou manatu ki te ʼu akonaki ʼae ʼe tou tui ki ai, mo tatatou tauhi ʼae ki te ʼAtua, pea mo totatou faʼahiga maʼuli. Ko natou ʼae ʼi te moʼoni, ʼe natou iloʼi te ʼu meʼa ʼae ʼe akoʼi ʼi te Tohi-Tapu, pea mo natou maʼuliʼi ʼana pelesepeto. ʼE mole kei natou tui ai ki te ʼu akonaki fakalotu loi, pea ʼe natou maʼuli fiafia ʼi te malama ʼa Satana.—Soa. 8:32.
2. ʼO mulimuli kia Soane 13:34, 35, ʼi te kamata, kotea ʼae neʼe feala ke leleiʼia e he tahi ʼi te moʼoni?
2 ʼI te kamata, kotea ʼae neʼe ke leleiʼia ʼi te moʼoni? Neʼe lagi ko te aga ʼa te ʼu kaugana ʼa Sehova. (1 Pet. 2:12) Peʼe lagi ko tonatou ʼoʼofa ki te hahaʼi. Tokolahi ia natou ʼae neʼe ʼuluaki kau ki ʼatatou fono, neʼe natou tokagaʼi te ʼofa ʼaia, pea neʼe malave lahi age kia natou ʼi te ʼu meʼa ʼae neʼe natou logo mai te faiakonakiʼaga. Pea ʼe mole tou punamaʼuli, he neʼe ui e Sesu ʼe tou iloʼi anai ʼana tisipulo ʼi tonatou femaʼuʼaki te ʼofa. (Lau ia Soane 13:34, 35.) Kae ʼe mole malohi pe anai tatatou tui ʼaki tatatou sisio ki te feʼofaʼaki ʼaia ʼo te hahaʼi ʼa te ʼAtua.
3. Kotea ʼae ʼe feala ke hoko moka ʼe fakatafito pe tatatou tui ki te femaʼuʼaki e ʼotatou tehina mo tuagaʼane ia te ʼofa?
3 ʼE mole tonu pe ke fakatafito tatatou tui ki te feʼofaʼaki ʼo te ʼu tehina mo tuagaʼane. Kotea tona tupuʼaga? Fakakaukauʼi age muʼa moka neʼe agahala mamafa he tehina peʼe ko he tuagaʼane, lagi ko he tagata ʼafeā peʼe ko he pionie. Peʼe moka ke mamahi ki he tehina peʼe ko he tuagaʼane. Peʼe lagi ko he tahi ʼe liliu ko Loma 12:2.
he aposita, pea ʼe ina ui atu ʼe mole ke nofo ʼi te moʼoni. Kapau ʼe hoko te ʼu aluʼaga ʼaia, ʼe ke tuku ai anai koa tau tauhi kia Sehova? Kapau ʼe ke fakatafito pe tau tui ki te ʼu meʼa ʼae ʼe fai e te hahaʼi, kae mole ki ʼau felogoi ʼae mo Sehova, ʼe mole malohi anai. Ko te ʼofa ʼae ʼe femaʼuʼaki e te ʼu kaugana ʼa Sehova, ʼe tokoni ke malohi tau tui. Kae ʼe toe ʼaoga foki he ʼu fakamoʼoni ke ke tui ai ʼe moʼoni te ʼu meʼa ʼae ʼe tuʼu ʼi te Tohi-Tapu. ʼE tonu ke ke “vakavakaʼi” e koe totonu pe ʼe akoʼi atu ʼi te Tohi-Tapu te moʼoni ʼo ʼuhiga mo Sehova.—4. ʼO mulimuli kia Mateo 13:3-6, 20, 21, ʼe feafeaʼi ʼihi moka ʼahiʼahiʼi tanatou tui?
4 Neʼe ui e Sesu ʼe tali anai e ʼihi ia te moʼoni “ ʼaki he lotofiafia,” kae ʼe vaivai anai tanatou tui moka ʼahiʼahiʼi. (Lau ia Mateo 13:3-6, 20, 21.) Neʼe mole lagi mahino te hahaʼi ʼaia ʼe hoko anai he ʼu ʼahiʼahi moka natou muliʼi ia Sesu. (Mat. 16:24) Pe neʼe lagi natou manatu ko te kau Kilisitiano ʼe natou hao mai te ʼu fihifihia fuli, pea ʼe maʼu tapuakina pe natou. Kae ʼi te malama heʼe haohaoa ʼaeni, ʼe tou tau fuli mo he ʼu fihifihia. ʼE feala ke fetogi totatou aluʼaga, pea ke mole kei lahi ai totatou fiafia.—Pes. 6:7; Ekl. 9:11.
5. Tokolahi ʼi ʼotatou tehina mo tuagaʼane ʼe natou fakaha feafeaʼi ʼe natou tui papau ʼe natou nonofo ʼi te moʼoni?
5 Tokolahi ʼi ʼotatou tehina mo tuagaʼane ʼe natou fakaha ʼe natou tui papau ʼe natou nonofo ʼi te moʼoni. ʼO feafeaʼi? Tatau aipe pe ʼe natou mamahi ki he tahi, peʼe mole tuha tana aga mo tona ʼuhiga Kilisitiano, kae ʼe mole vaivai tanatou tui. (Pes. 119:165) Ka ʼahiʼahiʼi natou, ʼe ʼaʼasili malohi age tanatou tui kae ʼe mole vaivai. (Sakp. 1:2-4) ʼE ke maʼu feafeaʼi he tui ʼe malohi feia?
‘KE KE MAʼU TE ʼATAMAI MALAMA TOTONU ʼO ʼUHIGA MO TE ʼATUA’
6. Neʼe fakatafito kitea te tui ʼa te ʼu ʼuluaki Kilisitiano?
6 Ko te ʼu ʼuluaki Kilisitiano neʼe natou fakatafito tanatou tui ki tanatou mahino ki te ʼu Tohi Taputapu pea mo te ʼu akonaki ʼa Sesu Kilisito, ʼae ʼe ko “te moʼoni ʼo te logo lelei.” (Kal. 2:5) Ko te moʼoni ʼaia ʼe ko te ʼu akonaki Fakakilisitiano fuli, ʼo kau ai mo te sakilifisio faitotogi ʼa Sesu pea mo tona fakatuʼuake. Neʼe tui papau te apositolo ko Paulo neʼe moʼoni te ʼu akonaki ʼaia. ʼE tou iloʼi feafeaʼi te faʼahi ʼaia? Neʼe ina fakaʼaogaʼi he ʼu vaega Tohi-Tapu “moʼo fakamahino pea mo fakamoʼoni neʼe tonu ke mamahi ia Kilisito pea ke fakatuʼuake mai te kau mate.” (Gaue 17:2, 3) Ko te ʼu ʼuluaki Kilisitiano neʼe natou tali te ʼu akonaki ʼaia pea neʼe natou kole te laumalie maʼoniʼoni ke feala hanatou mahino ki te Folafola ʼa te ʼAtua. Neʼe natou vakavakaʼi takitokotahi pe neʼe fakatafito te ʼu meʼa ʼae neʼe akoʼi age ki te ʼu Tohi Taputapu. (Gaue 17:11, 12; Hep. 5:14) Neʼe mole fakatafito pe tanatou tui ki te ʼofa ʼae neʼe maʼu ʼi te lotolotoiga ʼo te hahaʼi ʼa te ʼAtua. Pea neʼe mole natou tauhi kia Sehova ʼuhi pe ko tanatou leleiʼia te fakatahitahi mo te kau Kilisitiano. Kae neʼe fakatafito tanatou tui ki “te ʼatamai malama totonu ʼae ʼo ʼuhiga mo te ʼAtua.”—Kol. 1:9, 10.
7. ʼE tokoni feafeaʼi mai anai tatatou tui ʼae ki te ʼu moʼoni ʼo te Tohi-Tapu?
7 Ko te ʼu moʼoni ʼo te Folafola ʼa te ʼAtua ʼe mole fetogi. (Pes. 119:160) Ohage la, ʼe mole fetogi te ʼu moʼoni ʼaia moka ʼe tou mamahi ki he tahi ʼi te kokelekasio peʼe moka neʼe agahala mamafa. Pea ʼe mole fetogi moka tou tau mo he ʼahiʼahi. Koia, tou faiga ke tou iloʼi lelei te ʼu akonaki ʼa te Tohi-Tapu pea mo tou tui papau ʼe moʼoni. Ko te faʼahiga tui ʼaia ʼe tokoni mai anai ke tou tutuʼu malohi moka tou tau mo ni faigataʼaʼia, ohage pe ko he vaka ʼe tuʼu maʼu moka afā ʼuhi ko tana foʼi tau. ʼE feafeaʼi hau fakamalohiʼi tau tui ʼae ʼe ke nofo ʼi te moʼoni?
‘KE KE FAKALOTOʼI IA KOE KE KE TUI KI AI’
8. Ohage ko tona ui ia 2 Timoteo 3:14, 15, he koʼe neʼe tui papau ia Timoteo neʼe nofo ʼi te moʼoni?
8 Ko Timoteo neʼe tui papau neʼe nofo ʼi te moʼoni. Neʼe ina iloʼi feafeaʼi te faʼahi ʼaia? (Lau ia 2 Timoteo 3:14, 15.) Ko tana faʼe mo tana kui neʼe nā akoʼi age te ʼu akonaki ʼo “te ʼu Tohi Taputapu.” Kae ʼe mahino ia, neʼe ina toe fakaʼaogaʼi tona temi mo tona malohi moʼo ako te ʼu Tohi Taputapu ʼaia. ʼAki te ʼu faʼahi ʼaia, neʼe tui papau ai ko te ʼu meʼa fuli ʼae neʼe ina ako neʼe moʼoni. Ki muli age, ko Timoteo, mo tana faʼe pea mo tana kui fafine neʼe natou maʼu ia te Lotu Fakakilisitiano. ʼE mahino ia neʼe lagi malave kia Timoteo te feʼofaʼaki ʼo te ʼu tisipulo ʼa Sesu pea neʼe fia fakatahi mo tokoni kia natou. (Flp. 2:19, 20) Kae neʼe mole fakatafito tana tui ki tona ʼofa ʼae ki te hahaʼi, kae ki he ʼu fakamoʼoni neʼe uga ai ia ia ke fakaovi kia Sehova. ʼO toe feia pe mo koe, ʼe tonu ke ke ako te Tohi-Tapu pea mo ke fakakaukauʼi lelei te ʼu meʼa ʼae ʼe ke ako ai ʼo ʼuhiga mo Sehova.
9. Kotea he ʼu moʼoni maʼuhiga ʼe tolu ʼe tonu ke ke tui papau ki ai?
9 Moʼo kamata, ʼe tonu ke ke tui papau ki he ʼu moʼoni maʼuhiga ʼe tolu. ʼUluaki, ko Sehova ʼAtua ʼe ko te Tupuʼaga ʼo meʼa fuli. (Eke. 3:14, 15; Hep. 3:4; Fkha. 4:11) Lua, ko te Tohi-Tapu ʼe ko te logo mai te ʼAtua ki te tagata. (2 Tim. 3:16, 17) Pea tolu, ʼe maʼu e Sehova hana kau atolasio kua fakatuʼutuʼu lelei, pea ʼe takitaki natou e Kilisito. Ko natou ʼaia ko te kau Fakamoʼoni ʼa Sehova. (Esa. 43:10-12; Soa. 14:6; Gaue 15:14) Ke ke tui papau ki te ʼu moʼoni ʼaia, ʼe mole ʼaoga anai ke ke iloʼi te Tohi-Tapu katoa. Kae ʼe ke fakatuʼutuʼu anai ke ke fakaʼaogaʼi ʼou “fealagia fakakaukau” ke fakamalohiʼi tau tui ʼae ʼe ke nofo ʼi te moʼoni.—Loma 12:1.
KE KE TOKONI KI ʼIHI KE NATOU TUI ʼE KO TE MOʼONI
10. ʼI tatatou kua iloʼi leva ia te moʼoni, kotea ʼae ʼe tonu ke tou popoto ʼi tona fai?
10 ʼI te temi leva ʼae kua ke tui papau ai ki te ʼu moʼoni ʼaia ʼe tolu, ʼe tonu leva ke ke poto ʼi te * (1 Tim. 4:16) Pea ʼi tatatou akoʼi ki te hahaʼi ia te ʼu moʼoni ʼaia, ʼe toe malohi ai tatatou tui ki ai.
fakaʼaogaʼi te Tohi-Tapu moʼo fakamahino ki te hahaʼi ʼe moʼoni te ʼu akonaki ʼaia. Kotea tona tupuʼaga? Koteʼuhi ko tatou ko he kau Kilisitiano, pea ʼe ko totatou maʼua te akoʼi te ʼu moʼoni ʼae neʼe tou ako kia natou ʼae ʼe fia fagono mai.11. Kotea te faʼifaʼitaki neʼe tuku mai e te apositolo ko Paulo ʼo ʼuhiga mo te akoʼi ʼo te hahaʼi?
11 Ka neʼe akoʼi e te apositolo ko Paulo te hahaʼi, neʼe ina fakaʼaogaʼi “te Lao ʼa Moisese pea mo te ʼu tohi ʼa te kau Polofeta” moʼo fakalotoʼi natou ke natou tui kia Sesu. (Gaue 28:23) ʼE feafeaʼi hatatou faʼifaʼitakiʼi ia ia moka tou akoʼi te ʼu moʼoni ki te hahaʼi? ʼE mole tou lau age pe anai te ʼu vaega Tohi-Tapu. Kae ʼe tou tokoni anai ki ʼatatou kau ako ke natou fakakaukauʼi te ʼu meʼa ʼae ʼe natou lau ʼi te Tohi-Tapu. ʼE tou loto ke natou tali te ʼu moʼoni ʼaia, mole ʼuhi ko hanatou fakaʼapaʼapa kia tatou, kae ʼuhi he neʼe natou vakavakaʼi totonu ʼe moʼoni te ʼu meʼa ʼae neʼe natou ako ʼo ʼuhiga mo totatou ʼAtua ʼofa.
ʼU matuʼā, kotou tokoni ki ʼakotou fanau ke natou maʼu te tui ʼaki takotou akoʼi age “te ʼu meʼa loloto ʼo ʼuhiga mo te ʼAtua” (Vakaʼi te palakalafe 12-13) *
12-13. ʼE tokoni feafeaʼi e te ʼu matuʼā ki ʼanatou fanau ke natou nonofo ʼi te moʼoni?
12 ʼU matuʼā, ʼe mahino papau ia ʼe kotou loto ke nonofo ʼakotou fanau ʼi te moʼoni. ʼE lagi kotou manatu, kapau ʼe natou maʼu honatou ʼu kaumeʼa lelei ʼi te kokelekasio, ʼe tokoni anai ki tanatou tuputupu ʼi te faʼahi fakalaumalie. Kae ke natou tui papau ʼe natou nonofo ʼi te moʼoni, ʼe mole gata pe hanatou maʼu he ʼu kaumeʼa ʼe uga anai natou ki he ʼu meʼa ʼe lelei. ʼE toe ʼaoga foki ke felogoi lelei ʼakotou fanau mo te ʼAtua, pea ke natou tui papau ʼe moʼoni te ʼu meʼa ʼae ʼe natou ako ʼi te Tohi-Tapu.
13 Moʼo akoʼi ki ʼanatou fanau te ʼu moʼoni ʼo ʼuhiga mo te ʼAtua, ʼe tuku e te ʼu matuʼā he faʼifaʼitaki lelei ʼaki tanatou ako ia te Tohi-Tapu. ʼE natou toʼo he temi ke natou metitasio ki te ʼu meʼa ʼae ʼe natou ako. ʼE feala ai leva hanatou akoʼi age ki ʼanatou fanau, ke natou faʼifaʼitakiʼi ia natou. ʼE natou akoʼi age ki ʼanatou fanau te fakaʼaogaʼi ʼo te ʼu meʼa gaue Fakatohi-tapu, ohage la ko te Kumiʼaga Tohi, peʼe ko ʼatatou tohi peʼe ʼata viteo, ohage pe ko hanatou fai ki he tahi ʼe ina ako te Tohi-Tapu. ʼE natou tokoni ai kia natou ke ʼoʼofa kia Sehova pea ke natou lotofakafetaʼi ki “te tagata faifekau agatonu mo poto,” ʼae ʼe fakaʼaogaʼi e Sehova moʼo fafaga ʼo tatou ʼi te faʼahi fakalaumalie. (Mat. 24:45-47) Koia ʼu matuʼā, ʼaua naʼa kotou akoʼi pe ki ʼakotou fanau te ʼu moʼoni maʼuhiga ʼo te Tohi-Tapu. Kotou tokoni ke natou maʼu he tui malohi, ʼaki takotou akoʼi age “te ʼu meʼa loloto ʼo ʼuhiga mo te ʼAtua,” ʼo mulimuli pe ki ʼonatou taʼu mo ʼonatou fealagia.—1 Ko. 2:10.
KE KE AKO TE ʼU LEA FAKAPOLOFETA ʼO TE TOHI-TAPU
14. He koʼe ʼe tonu ke tou ako te ʼu lea fakapolofeta ʼo te Tohi-Tapu? (Vakaʼi mo te fakamatala ʼae ʼi te ʼa takai “ ʼE Feala Koa Hau Fakamahino Te ʼu Lea Fakapolofeta ʼAeni?”)
14 Ko te ʼu lea fakapolofeta ʼe ko he koga maʼuhiga ʼo te Folafola ʼa te ʼAtua. ʼE tokoni mai ke malohi tatatou tui kia Sehova. Ko te ʼu lea fakapolofeta fea neʼe natou fakalotomalohiʼi ai tau tui? ʼE lagi ke manatu ki te ʼu lea fakapolofeta ʼo ʼuhiga mo “te ʼu ʼaho fakamuli.” (2 Tim. 3:1-5; Mat. 24:3, 7) Kae kotea la he tahi ʼu lea fakapolofeta ʼe feala ke liliu ai ʼo malohi tau tui? Ohage la, ʼe feala koa hau fakamahino pe neʼe hoko feafeaʼi te ʼu lea fakapolofeta ʼo Taniela kapite 2 peʼe ko Taniela kapite 11 pea mo tonatou lolotoga hoko nei? * Kapau ʼe fakatafito leleiʼi tau tui ki te Tohi-Tapu, pea ʼe malohi anai. Tou vakaʼi te faʼifaʼitaki ʼo ʼotatou tehina ʼae neʼe fakatagaʼi koviʼi ʼi Siamani lolotoga te Lua Tau Fakamalamanei. Neʼe mole natou mahino katoa ki te ʼu lea fakapolofeta ʼo te Tohi-Tapu ʼo ʼuhiga mo te ʼu ʼaho fakamuli, kae neʼe malohi pe tanatou tui ki te Folafola ʼa te ʼAtua.
Ko tatatou ako ia te Tohi-Tapu, ʼo feia mo te ʼu lea fakapolofeta, ʼe tokoni mai anai ke tou nonofo agatonu moka ʼahiʼahiʼi tatou (Vakaʼi te palakalafe 15-17) *
15-17. Neʼe tokoni feafeaʼi ia te ako ʼo te Tohi-Tapu ke malohi te tui ʼo ʼotatou tehina ʼi tonatou fakatagaʼi e te kau Nasi?
15 ʼI te temi ʼae neʼe pule ai te kau Nasi ʼi Siamani, ko te toko lauʼi afe ʼo ʼotatou tehina mo tuagaʼane neʼe ʼave ki te ʼu lotoʼa fakamamahi. Ko Itilele pea mo Himmler, ʼae neʼe ko he pule maʼuhiga, neʼe nā fehihiʼa ʼi te kau Fakamoʼoni ʼa Sehova. ʼE fakamatala e he tuagaʼane, neʼe ui fenei e Himmler ki te ʼu tuagaʼane neʼe nonofo ʼi he lotoʼa fakamamahi: “ ʼE ko takotou Sehova ʼae ʼe lagi pule ʼi te lagi, kae ʼi te kele, ʼe ko matou ʼaeni ʼe pule! ʼE tou vakaʼi anai pe ko ai ʼae ka maʼuli fualoa, ko koutou peʼe ko matou!” Kotea ʼae neʼe tokoni ki te ʼu kaugana ʼa Sehova ke natou nonofo agatonu?
16 Neʼe iloʼi e te kau Ako ʼaia ʼo Te Tohi-Tapu neʼe kua kamata ʼafio ia te Puleʼaga ʼo Te ʼAtua ʼi te taʼu 1914. Koia, neʼe mole natou punamaʼuli ai ʼi tonatou fakatagaʼi koviʼi ʼaia. Kae neʼe natou
tui papau neʼe mole feala ki he puleʼaga fakatagata ke ina taʼofi te fakahoko e te ʼAtua tana fakatuʼutuʼu. Neʼe mole feala kia Itilele ke ina pulihi te tauhi moʼoni, peʼe ke ina fakatuʼu he puleʼaga ʼe malohi age ʼi te Puleʼaga ʼo Te ʼAtua. Neʼe tui papau e ʼotatou tehina ʼe gata pe anai ʼi he ʼaho te pule ʼa Itilele.17 Neʼe hoko moʼoni te ʼu meʼa ʼae neʼe tui ki ai ʼotatou tehina mo tuagaʼane. Mole fualoa ki muli age, neʼe to te pule ʼa te kau Nasi, pea ko Himmler, ʼae neʼe ina ui “ ʼi te kele, ko matou ʼaeni ʼe pule,” neʼe hola. ʼI tana hola ʼaia, neʼe felaveʼi mo te Tehina ko Lübke, ʼae neʼe pilisoni ʼi muʼa atu pea neʼe iloʼi e Himmler neʼe kau ʼi te kau Ako ʼo Te Tohi-Tapu. ʼI te kua lotovaivai ʼa Himmler, neʼe ina fehuʼi fenei ki te tehina: “Ia koe ʼae ʼe ke ako te Tohi-Tapu, kotea ʼae ka hoko anai?” Neʼe fakamahino age e Lübke neʼe kua iloʼi e te kau Fakamoʼoni ʼa Sehova ʼe to noa anai te puleʼaga ʼa te kau Nasi, pea ʼe fakaʼateainaʼi anai te kau Fakamoʼoni ʼa Sehova. Ko Himmler, ʼae neʼe lahi tana palalau ʼo ʼuhiga mo te kau Fakamoʼoni ʼa Sehova ʼi muʼa atu, neʼe mole kei ina iloʼi he meʼa ke palalau ki ai. Mole fualoa pea neʼe fakamate. Kotea te ako maʼa tatou? Ko tatatou ako ia te Tohi-Tapu, ʼo feia mo te ʼu lea fakapolofeta, ʼe tokoni mai ke malohi tatatou tui pea ke tou nonofo agatonu moka tou tau mo ni ʼahiʼahi.—2 Pet. 1:19-21.
18. ʼO mulimuli kia Soane 6:67, 68, he koʼe ʼe tonu ke tou maʼu “te ʼatamai malama totonu pea mo te fakasiosio tonu katoa”?
18 ʼE tonu kia tatou takitokotahi ke tou fakaha te ʼofa, ʼae ʼe ko te fakailoga makehe ʼa te kau Kilisitiano moʼoni. Kae ʼe toe ʼaoga foki ke tou maʼu “te ʼatamai malama totonu pea mo te fakasiosio tonu katoa.” (Flp. 1:9) Kapau ʼe mole tou maʼu te ʼu faʼahi ʼaia, ʼe feala anai ke tou muliʼi te ʼu akonaki loi ʼa te hahaʼi kaka, mo ʼae ʼa te kau aposita. (Efe. 4:14) ʼI te temi ʼo Sesu, tokolahi neʼe natou tuku tanatou mulimuli ia te ia. Kae neʼe fakaha e te apositolo ko Petelo tana tui papau ʼae ʼe maʼu e Sesu “te ʼu folafola ʼo te maʼuli heʼe gata.” (Lau ia Soane 6:67, 68.) Logo la neʼe mole mahino ia Petelo ki te ʼu folafola fuli ʼa Sesu, kae neʼe nofo agatonu he neʼe mahino ki te moʼoni ʼo ʼuhiga mo Kilisito. Mo koe foki, ʼe feala tau fakamalohiʼi tau tui ʼae ko te ʼu meʼa ʼae ʼe ke ako ʼi te Tohi-Tapu ʼe moʼoni. ʼE malohi ai anai tau tui logo la he faʼahi ʼe feala ke hoko, pea ʼe ke tokoni anai ki ʼihi ke natou maʼu mo natou he tui ʼe malohi.—2 Soa. 1, 2.
KATIKO 72 Tou Fakamafola Te Moʼoni ʼo Te Puleʼaga
^ pal. 5 ʼE tou vakaʼi anai ʼi te alatike ʼaeni te maʼuhiga ʼo te ʼu Folafola ʼa te ʼAtua. ʼE toe fakaha ai pe ʼe feafeaʼi hatatou fakamalohiʼi tatatou tui papau ʼe moʼoni te ʼu akonaki ʼae ʼe tou tui ki ai.
^ pal. 10 Ke feala hau akoʼi te ʼu moʼoni maʼuhiga ʼo te Tohi-Tapu ki te hahaʼi, vakaʼi te ʼu alatike ʼi te kupu tafito “Ko He Faipalalau Mo He Vahaʼa Fale,” ʼae neʼe ha ʼi Te Tule Leʼo mai te taʼu 2013 ki te taʼu 2015. ʼE tou maʼu ai te ʼu fehuʼi ʼaeni: “ ʼE Tokaga Koa Te ʼAtua Ki ʼOtatou Mamahi?,” “ ʼE Tui Koa Ia Te Kau Fakamoʼoni ʼa Sehova Kia Sesu?” pea “He Koʼe ʼe Tonu Ke Tou Vakaʼi Ia Te Tohi-Tapu?”
^ pal. 60 FAKAMATALA ʼO TE ʼU PĀKI: Lolotoga tanatou ako fakafamili, ʼe vakaʼi e te ʼu matuʼā mo ʼana fanau te ʼu lea fakapolofeta ʼo ʼuhiga mo te mamahi lahi.
^ pal. 62 FAKAMATALA ʼO TE ʼU PĀKI: Lolotoga te mamahi lahi, ko te famili pe ʼaia ʼe mole natou punamaʼuli ʼo ʼuhiga mo te ʼu meʼa ʼae ʼe hoko.