Te ʼu Fehuʼi ʼa Te Kau Lautohi
Ko ʼanafea ʼae neʼe liliu ai ia Sesu ko te Pelepitelo Lahi, pea ʼe kehekehe koa te temi ʼae neʼe fakamoʼoni ai te fuakava foʼou mo ʼae neʼe hoko ai?
ʼE ha mai, neʼe liliu ia Sesu ko te Pelepitelo Lahi ʼi te temi ʼae neʼe papitema ai ʼi te taʼu 29 H.T.S. ʼE tou iloʼi feafeaʼi? ʼI te temi ʼae neʼe papitema ai ia Sesu, neʼe tuʼu ia muʼa ʼo te ʼAtua moʼo fai Tona “finegalo.” Neʼe tali ai e Sesu ke ina sakilifisioʼi tona maʼuli moʼo foaki te totogi. (Kal. 1:4; Hep. 10:5-10) Ko te finegalo ʼo Sehova ʼe fakatatau ki he ʼaletale. Koia, ʼi te temi ʼae neʼe foaki ai e Sesu tona maʼuli neʼe hage ko hana sakilifisioʼi ia ia totonu ʼi te ʼaletale ʼaia. ʼI hona aluʼaga fakata, neʼe fakatuʼu te ʼaletale ʼaia ʼi te temi ʼae neʼe papitema ai ia Sesu. Koia, ʼe mahino papau, neʼe toe fakatuʼu foki ia te fale lotu fakalaumalie lahi ʼi te temi ʼaia. Ko te fale lotu fakalaumalie lahi ʼaia ʼe ina fakatata te ʼu fakatuʼutuʼu ʼae neʼe fai e Sehova ʼaki te sakilifisio ʼa Sesu. Pea ʼe feala ai ke tou foaki he tauhi maʼa kia te ia. Ko te ʼaletale, ʼae ʼe ina fakatata ia te finegalo ʼo Sehova, ʼe ko he koga maʼuhiga ʼo te fale lotu fakalaumalie.—Mat. 3:16, 17; Hep. 5:4-6.
ʼI te kua fakatuʼu ʼo te fale lotu fakalaumalie lahi, neʼe ʼaoga leva he pelepitelo lahi ke gaue ai. Koia, neʼe fakanofo ai ia Sesu “ ʼaki te laumalie maʼoniʼoni pea mo te malohi” ke ina maʼu te tuʼulaga ʼaia. (Gaue 10:37, 38; Mko. 1:9-11) Kae ʼe tou iloʼi feafeaʼi neʼe fakanofo ia Sesu ko te Pelepitelo Lahi ʼi muʼa ʼo tona mate pea mo tona fakatuʼuake? ʼE tou tali anai ki ai ʼaki tatatou vakavakaʼi te faʼifaʼitaki ʼa Alone pea mo te kau pelepitelo ʼae neʼe hoa kia ia.
Ohage ko tona fakamaʼua ʼi te Lao, neʼe gata pe ki te pelepitelo lahi ʼae neʼe feala ke hu ki te Potu Taputapu ʼAupito ʼo te tapenakulo, pea ki muli age, ʼo te fale lotu. Neʼe ʼi ai te lito neʼe ina vaheʼi te Potu Taputapu pea mo te Potu Taputapu ʼAupito. Neʼe fakalaka ia te pelepitelo lahi ʼi te lito ʼaia ʼi te ʼAho pe ʼo Te ʼu Faifakalelei. (Hep. 9:1-3, 6, 7) Ko Alone pea mo te ʼu pelepitelo lahi ʼae neʼe hoa kia ia, neʼe tonu ke fakanofo ki tonatou tuʼulaga ʼi muʼa ʼo tanatou “fakalaka ʼi te lito” ʼaia ʼo te tapenakulo. ʼO toe feia pe mo Sesu, neʼe tonu ke fakanofo ia ia ko te Pelepitelo Lahi ʼo te fale lotu fakalaumalie lahi ʼo Sehova, ʼi muʼa ʼo tona mate pea ki muli age ʼi tana “fakalaka ʼi te lito, ʼae ʼe ko tona kakano” ke hu ai ki te lagi. (Hep. 10:20) Ko te tupuʼaga la ʼae ʼo te ui e te apositolo ko Paulo neʼe haʼu ia Sesu “ ʼi tona ʼuhiga pelepitelo lahi,” pea ki muli age neʼe “hu ki te fale la ʼe lahi age pea mo lelei age, neʼe mole faʼu e te tagata” ʼae ko “selo.”—Hep. 9:11, 24.
ʼE mole kehekehe te temi ʼae neʼe fakamoʼoni ai te fuakava foʼou pea mo ʼae neʼe hoko ai. Kotea tona tupuʼaga? Neʼe hake ia Sesu ki selo pea neʼe ina momoli tona maʼuli haohaoa maʼa tatou. Ko te ʼu faʼahi ʼaia ʼe lua, ʼi te ʼu faʼahi ʼe tolu, neʼe fakamoʼoni ai pea mo fakahoko te fuakava foʼou. Kotea te ʼu faʼahi ʼaia?
ʼUluaki, ʼi te hake ʼa Sesu ki selo, neʼe tuʼu ia muʼa ʼo Sehova. Lua, neʼe ina momoli age te maʼuhiga ʼo tona sakilifisio. Pea tolu leva, neʼe tali e Sehova te maʼuhiga ʼo te taʼataʼa ʼo Sesu. Hili te fai ʼo te ʼu faʼahi ʼaia ʼe tolu, neʼe feala leva ke kamata maʼu te ʼu fua mai te fuakava foʼou.
ʼE mole fakaha mai ʼi te Tohi-Tapu pe ʼe ko te temi fea ʼae neʼe tali ai e Sehova te maʼuhiga ʼo te sakilifisio ʼo Sesu. Koia, ʼe mole feala ke tou fakaha pe ʼe ko te temi fea ʼae neʼe fakamoʼoni pea mo kamata maʼu ai te ʼu fua mai te fuakava foʼou. Kae ʼe tou iloʼi neʼe hake ia Sesu ki selo ia ʼaho ʼe hogofulu ʼi muʼa ʼo te Penikosite. (Gaue 1:3) Lolotoga te ʼu kiʼi ʼaho ʼaia, neʼe ʼi ai te lakaga neʼe momoli ai e Sesu te maʼuhiga ʼo tona sakilifisio kia Sehova, ʼae neʼe ina tali. (Hep. 9:12) ʼE tou iloʼi te faʼahi ʼaia ʼuhi ko te ʼu meʼa ʼae neʼe hoko ʼi te Penikosite ʼo te taʼu 33 H.T.S. (Gaue 2:1-4, 32, 33) Koia, neʼe kua fakatuʼu leva te fuakava foʼou.
ʼI tona fakanounou, ʼi te temi ʼae neʼe tali ai e Sehova te maʼuhiga ʼo te taʼataʼa ʼo Sesu, neʼe fakamoʼoni ai pea mo hoko ai te fuakava foʼou. Neʼe feala leva ke kamata maʼu te ʼu fua mai te fuakava foʼou ʼaia, pea ko Sesu te Pelepitelo Lahi ʼae ʼe ko te Tagata Fakafelogoi ʼo te fuakava foʼou ʼaia.—Hep. 7:25; 8:1-3, 6; 9:13-15.