ʼE fakatuʼakoi totatou temi ʼae ke tou fai ai tatatou ako takitokotahi. Koia, ʼe feafeaʼi hatatou fakaʼaogaʼi lelei te temi ʼaia? ʼUluaki, ʼaua naʼa ke fai fakavilivili tau ako. ʼE ke maʼu anai ni fua lelei moka ʼe ke lau fakalelei mo mamalie he ʼu kiʼi manatu ʼi hau vakaʼi ni tuʼuga manatu.

Pea ke fakatuʼutuʼu leva pe kotea ʼae ʼe tonu muʼa ke ke ako. (Efe. 5:15, 16) Lagi ʼaoga atu anai te ʼu tokoni ʼaeni:

• Lau te Tohi-Tapu ʼi te ʼaho fuli. (Pes. 1:2) Ke ke kamata lau ia te Tohi-Tapu, ʼe feala ke tokoni atu te ʼu kapite ʼo te Tohi-Tapu ʼae ʼe tonu ke tou lau ki te fono ʼo te vahaʼa.

• Teuteuʼi te alatike ako ʼo Te Tule Leʼo pea mo te fono ʼo te vahaʼa. Faiga ʼo teuteuʼi fakalelei ke feala ai hau tali.—Pes. 22:22.

• Ka kei toe hou temi, faiga ʼo lau mo vakaʼi te meʼa kai fakalaumalie fuli ʼae ʼe maʼu ʼi te jw.org. Ohage la ko ʼatatou nusipepa, mo te ʼu viteo pea mo te ʼu tohi.

• Fai ni fekumi ʼo ʼuhiga mo he manatu ʼe ke fia iloʼi. ʼE lagi ko he faigataʼaʼia ʼe ke tau mo ia, peʼe ko he fehuʼi ʼe ke fai, peʼe ko he manatu fakatohi-tapu ʼe ke fia mahino lelei age ki ai. Ke ke maʼu ni tokoni, alu ki te jw.org ʼo vakaʼi ʼi te faʼahi ʼae “Te ʼu Meʼa Gaue Ki Te Ako.”