ALATIKE AKO 29
Kua Ke Teuteu Koa Ki Te Mamahi Lahi?
“Kotou nonofo teuteu.”—MAT. 24:44.
KATIKO 150 Kotou Kumi Te ʼAtua Ke Haofaki Ai Kotou
TE ʼU MANATU FAKANOUNOU a
1. He koe ʼe ko he aga fakapotopoto hatatou teuteu fakatomuʼa ki he tuʼutamaki?
KA TOU teuteu fakatomuʼa ki he aluʼaga, ʼe feala ke haofaki ai totatou maʼuli. Ohage la ka hoko he tuʼutamaki, ʼe ko natou ʼae neʼe teuteu fakatomuʼa ʼae ʼe hao pea ʼe feala ke natou tokoni ki ʼihi. ʼE ui e te kautahi ʼi Eulopa ʼe tokoni ki te hahaʼi: “ ʼE feala ke haofaki te hahaʼi moka ʼe lelei tanatou teuteu fakatomuʼa.”
2. He koe ʼe tonu ke tou teuteu fakatomuʼa ki te mamahi lahi? (Mateo 24:44)
2 ʼE hoko fakapunamaʼuli anai te mamahi lahi. (Mat. 24:21) Kae ʼe kehekehe ia mo ʼihi tuʼutamaki, he ʼe tou iloʼi ʼe hoko moʼoni anai. Kua hili ki ai tau ʼe 2 000, neʼe fakatokaga e Sesu ʼana tisipulo ke natou teuteu ki te ʼaho ʼaia. (Lau ia Mateo 24:44.) Ka tou teuteu fakatomuʼa, ʼe faigafua ai hatatou faʼa kataki ʼi te temi faigataʼa ʼaupito ʼaia pea mo tokoni ki ʼihi ke natou fai feia.—Luka 21:36.
3. He koʼe ʼe tonu anai ke tou faʼa kataki, mo manavaʼofa pea mo ʼofa lolotoga te mamahi lahi?
3 Tou vakaʼi kalitate ʼe tolu ʼe tonu anai ke tou maʼu lolotoga te mamahi lahi. Kotea ʼae ka tou fai moka tou tala te tautea fakamataku ki te hahaʼi pea natou fakafeagai mai? (Fkha. 16:21) ʼE ʼaoga mai anai ke tou faʼa kataki ke tou fakalogo ai kia Sehova pea ke tou falala ʼe ina puipui tatou. Kotea ʼae ka tou fai anai moka puli fuli peʼe ko ʼihi koloa ʼo ʼotatou tehina mo tuagaʼane? (Hap. 3:17, 18) ʼE ʼaoga anai ke tou manavaʼofa ke tou fia tokoni ai kia natou. Kotea ʼae ka tou fai moka ʼe tonu ke tou maʼuli fakatahi mo ʼotatou tehina mo tuagaʼane hili totatou ʼohofi e te ʼu pule aga ʼae ka fakatahi? (Esk. 38:10-12) ʼE ʼaoga anai ke tou ʼofa lahi kia natou ke tou faʼa kataki ai ʼi te temi faigataʼa ʼaia.
4. ʼE fakaha feafeaʼi mai ʼi te Tohi-Tapu ʼe tonu ke tou faʼa kataki, mo manavaʼofa pea mo ʼofa?
4 ʼE fakalotomalohiʼi tatou ʼi te Folafola ʼa te ʼAtua ke tou faʼa kataki, mo manavaʼofa pea mo ʼofa. ʼE ui ia Luka 21:19: “Kapau ʼe kotou faʼa kataki, ʼe kotou haofaki anai tokotou maʼuli.” ʼE ui ia Kolose 3:12: “Kotou kofuʼi . . . te manavaʼofa.” Pea ia 1 Tesalonika 4:9, 10 ʼe ui ai: “Koteʼuhi ʼe akoʼi totonu koutou e te ʼAtua ke kotou feʼofaʼaki. . . . Kae, ʼu tehina, ʼe matou fakalotomalohiʼi koutou ke kotou haga fai te faʼahi ʼaia ʼo laka age.” Neʼe fai te ʼu palalau ʼaia ki te ʼu tisipulo neʼe kua natou faʼa kataki, mo manavaʼofa pea mo fakaha te ʼofa. Kae neʼe tonu pe ke natou haga maʼuliʼi te ʼu kalitate ʼaia.ʼO toe feia mo tatou. Moʼo tokoni mai kia tatou, ʼe tou vakaʼi anai pe neʼe fakaha feafeaʼi e te ʼu ʼuluaki Kilisitiano te ʼu kalitate takitahi ʼaia. Pea ʼe tou toe vakaʼi anai pe ʼe feafeaʼi hatatou faʼifaʼitakiʼi te ʼu tisipulo ʼaia ke tou tokalelei ai ki te mamahi lahi.
KE TOE MALOHI AGE TAU FAʼA KATAKI
5. Neʼe katakiʼi feafeaʼi e te ʼu ʼuluaki Kilisitiano ʼonatou fihifihia?
5 Neʼe tonu ke faʼa kataki te ʼu ʼuluaki Kilisitiano. (Hep. 10:36) Neʼe tatau ʼonatou fihifihia mo ʼae ʼo te hahaʼi ʼae neʼe maʼuʼuli ʼi tonatou temi. Kae neʼe natou toe tau mo ʼihi fihifihia ʼuhi ko tonatou ʼuhiga Kilisitiano. Tokolahi ia natou neʼe fakatagaʼi e te kau takitaki lotu mo te kau takitaki ʼo Loma, pea neʼe toe fakatagaʼi natou ʼe ʼonatou famili. (Mat. 10:21) Pea neʼe tonu ke natou tekeʼi te ʼu akonaki hala ʼa te kau aposita ʼae neʼe fakatupu maveuveu ʼi te loto kokelekasio. (Gaue 20:29, 30) Logo la te ʼu fihifihia ʼaia kae neʼe faʼa kataki pe te ʼu ʼuluaki Kilisitiano. (Fkha. 2:3) Kotea ʼae neʼe tokoni kia natou? Neʼe natou fakakaukauʼi te ʼu faʼifaʼitaki Fakatohi-tapu ohage la ko ʼae ʼo Sopo. (Sakp. 5:10, 11) Neʼe natou faikole ke natou maʼu te malohi. (Gaue 4:29-31) Pea neʼe natou manatuʼi ʼe fakapale anai natou e Sehova moka ʼe natou faʼa kataki.—Gaue 5:41.
6. Kotea ʼae ʼe tou ako mai te meʼa ʼae neʼe fai e Merita ke ina lava katakiʼi te fakafeagai?
6 ʼE feala mo tatou ke tou faʼa kataki mo kapau ʼe tou ako tuʼumaʼu mo metitasio ki te faʼifaʼitaki ʼa te ʼu tagata mo fafine neʼe faʼa kataki ʼe tou maʼu ʼi te Folafola ʼa te ʼAtua pea mo ʼatatou tohi. Neʼe fai e te tuagaʼane ko Merita ʼi Albanie ia te faʼahi ʼaia pea neʼe ina lava tauʼi ai te fakafeagai ʼo tona famili. Neʼe ina ui fenei: “ ʼI taku ako te hisitolia ʼo Sopo neʼe malave ʼosi kia au. Neʼe lahi ʼaupito te mamahi ʼa Sopo kae neʼe mole ina iloʼi te tupuʼaga ʼo ʼona ʼahiʼahi. Logo la te faʼahi ʼaia, kae neʼe ina ui: ‘ ʼO kaku ki toku mate, ʼe mole au fakafisi anai ki taku agatonu.’ (Sopo 27:5) Neʼe au mahino ai neʼe faigataʼa age te ʼu ʼahiʼahi ʼo Sopo ʼi ʼoku ʼahiʼahi. Pea ʼe au iloʼi au te tupuʼaga ʼo ʼoku ʼahiʼahi.”
7. Logo la ʼe mole tou tau nei mo he fihifihia ʼe kovi ʼosi, kae kotea ʼae ʼe tonu ke tou ako atu ʼi te temi nei?
7 Pea ʼe feala ke toe malohi age tatatou faʼa kataki moka ʼe tou faikole tuʼumaʼu mo fakaha ʼotatou tuʼania fuli kia Sehova. (Flp. 4:6; 1 Tes. 5:17) ʼE lagi mole ke lolotoga tau nei mo he fihifihia ʼe kovi ʼosi, kae ʼe ke faikole koa kia Sehova ke tokoni atu ʼi te ʼu lakaga ʼae ʼe ke lotovaivai ai, peʼe ke hoha peʼe mole kei ke iloʼi te meʼa ʼae ʼe tonu ke ke fai? Kapau ko tau agamahani ko te kole tuʼumaʼu kia Sehova ke tokoni atu ʼi te ʼu fihifihia ʼae ʼe ke lolotoga tau nei mo ia, pea ʼe faigafua anai hau faikole kia te ia moka ke tau mo ni fihifihia ʼe kovi ʼosi age. Pea ʼe ke tui papau anai ʼe iloʼi e Sehova te temi ʼae ʼe tonu ke tokoni atu ai pea mo te meʼa ʼae ʼe tonu ke ina fai.—Pes. 27:1, 3.
8. ʼE fakaha feafeaʼi e te faʼifaʼitaki ʼa Mira ka tou katakiʼi he ʼu fihifihia ʼi te temi nei ʼe tokoni mai anai ke tou katakiʼi te ʼu fihifihia ʼae ka hoko mai? (Sakopo 1:2-4) (Vakaʼi mo te pāki.)
8 ʼE feala anai hatatou faʼa kataki ʼi te mamahi lahi ʼae ka hoko mai moka ʼe tou katakiʼi ʼi te temi nei ʼotatou fihifihia. (Loma 5:3) Kotea tona tupuʼaga? Tokolahi ʼi te ʼu tehina mo tuagaʼane neʼe natou tokagaʼi ko tanatou katakiʼi he ʼu fihifihia ʼi te temi muʼa, neʼe tokoni kia natou ke natou faʼa kataki ʼi te temi nei. Ka natou katakiʼi he fihifihia ʼaki te tokoni ʼa Sehova, ʼe toe malohi age tanatou tui ʼae ʼe fia tokoni mai Sehova kia natou. Pea ʼuhi ʼae kua toe malohi age tanatou tui, ʼe feala ai leva ke natou katakiʼi he tahi age fihifihia. (Lau ia Sakopo 1:2-4.) Neʼe tokagaʼi e Mira ʼae ʼe pionie ʼi Albanie, ko tana katakiʼi te ʼu fihifihia ʼi te temi muʼa neʼe tokoni kia ia ke hoko atu pe tana faʼa kataki. Neʼe ina ui, ʼi ʼihi temi neʼe manatu ʼe ko ia tokotahi pe ʼae ʼe tau mo he ʼu tuʼuga fihifihia. Kae ʼi te ʼu temi ʼaia, neʼe ina toe manatuʼi ai leva te tokoni ʼa Sehova kia ia ʼi te ʼu taʼu ʼe 20 ʼae kua hili. Pea ʼe ina ui kia ia totonu: “Nofo agatonu Mira. Neʼe tokoni atu ia Sehova ke ke katakiʼi he ʼu aluʼaga faigataʼa ʼi te temi muʼa. Koia ʼaua naʼa ke tuku tau tauhi kia Sehova.” ʼO toe feia pe mo koe, ʼe feala ke ke fakakaukauʼi pe neʼe tokoni feafeaʼi ia Sehova kia koe ke ke faʼa kataki. Ke ke tui papau ʼe tokagaʼi e Sehova te ʼu lakaga fuli pe ʼae ʼe ke kataki ai he fihifihia pea ʼe ina fakapale anai koe. (Mat. 5:10-12) Pea ka kamata te mamahi lahi, kua faʼa kataki pea ʼe ke fia hoko atu anai tau faʼa kataki.
KE KE MANAVAʼOFA
9. Neʼe fakaha feafeaʼi e te ʼu tehina mo tuagaʼane ʼo te kokelekasio ʼo Atiokia ʼi Silia tonatou manavaʼofa?
9 Tokagaʼi te meʼa ʼae neʼe hoko ki te kau Kilisitiano ʼi Sutea ʼi te temi ʼae neʼe to ai te toe hoge lahi. ʼI te logo ʼa te ʼu tehina mo tuagaʼane ʼo te kokelekasio ʼo Atiokia ʼi Silia ʼo ʼuhiga mo te hoge, ʼe mahino ia neʼe mole natou logoʼi pe te manavaʼofa ki ʼonatou tehina ʼi Sutea. Kae neʼe natou toe fakaha tonatou manavaʼofa ʼaki he ʼu gaue. Neʼe natou “fakatuʼutuʼu ai . . . ʼo tahi mulimuli ki tona fealagia, ke natou momoli he tokoni ki te ʼu tehina ʼae ʼe maʼuʼuli ʼi Sutea.” (Gaue 11:27-30) Logo la te vaha mamaʼo ʼa te kau Kilisitiano ʼi Atiokia mo ʼonatou tehina ʼae ʼi Sutea, kae neʼe natou loto moʼoni ke natou tokoni kia natou.—1 Soa. 3:17, 18.
10. ʼE feafeaʼi hatatou fakaha te manavaʼofa moka hoko he tuʼutamaki fakanatula ki ʼotatou tehina mo tuagaʼane? (Vakaʼi mo te pāki.)
10 ʼE feala mo tatou ke tou fakaha ia ʼaho nei te manavaʼofa moka hoko he tuʼutamaki fakanatula ki ʼotatou tehina mo tuagaʼane. ʼE tou fia tokoni atu aipe kia natou ʼo lagi tou kole ki te ʼu tagata ʼafea pe ʼe feala ke tou kau ki he fakatuʼutuʼu gaue, peʼe tou fai he meʼa ʼofa ki te gaue fakamalamanei, peʼe tou hufakiʼi natou ʼae ʼe tau mo te tuʼutamaki fakanatula ʼaia. b (Taag. 17:17) Ohage la ʼi te taʼu 2020 neʼe fakatuʼu ʼi te malamanei katoa ia Komite Tokoni Maʼuli ʼe 950 moʼo tokoni kia natou ʼae ʼe ʼaoga ki ai ʼuhi ko te taʼi mahaki COVID-19. ʼE tou fakamalo ʼaupito kia natou ʼae ʼe gaue ʼi te ʼu komite tokoni maʼuli. Ko natou ʼaia neʼe natou fakaha tonatou manavaʼofa ki te ʼu tehina mo tuagaʼane, ʼonatou olo ʼo tufa te ʼu meʼa ʼae ʼe ʼaoga kia natou ʼi te faʼahi fakasino, mo natou foaki he ʼu tokoni fakalaumalie pea neʼe natou toe faʼu ni ʼapi pea mo he ʼu Fale Fono.—Vakaʼi mo 2 Kolonito 8:1-4.
11. He koe ʼe fakakololiaʼi tatatou Tamai ʼae ʼe ʼi selo moka ʼe tou manavaʼofa?
11 ʼE tokagaʼi e ʼihi te ʼu sakilifisio ʼae ʼe tou fai moʼo fakaha totatou manavaʼofa ʼi te ʼosi hoko ʼo he tuʼutamaki fakanatula. Ohage la ʼi te 2019, neʼe maumau te Fale Fono ʼuhi ko te afā ʼae neʼe higoa ko Dorian. Neʼe toe faʼu e totatou ʼu tehina te Fale Fono ʼaia. Neʼe natou fehuʼi ki te patolo ʼo he fale gaue pe ʼe fia anai te ʼu gaue neʼe kole age ke ina fakahoko. Neʼe ina tali fenei age: “ ʼE mole au loto ke kotou totogi te ʼu meʼa gaue ʼo feia mo te kau gaue. . . . ʼE au fai pe te faʼahi ʼaia maʼa takotou kautahi. ʼE malave ʼosi kia au takotou ʼomai ʼo tokoni ki ʼokotou kaumeʼa.” Tokolahi ʼi te malamanei ʼe mole natou iloʼi ia Sehova. Kae ʼe sioʼi ʼe ʼihi te aga ʼa te kau Fakamoʼoni ʼa Sehova. ʼE lahi tatatou fiafia ʼi tatatou iloʼi ʼae ka tou fakaha te manavaʼofa, pea ʼe tupu ai te fia iloʼi e te hahaʼi ia Sehova ʼae “ ʼe fonu ʼi te manavaʼofa.”—Efe. 2:4.
12. He koʼe ko te fakaha ʼo te manavaʼofa ki ʼotatou tehina mo tuagaʼane ʼi te temi nei ʼe ina teuteuʼi tatou ki te mamahi lahi? (Fakaha 13:16, 17)
12 He koʼe ʼe tonu anai ke tou manavaʼofa lolotoga te mamahi lahi? ʼE fakaha ʼi te Tohi-Tapu, ko natou ʼae ʼe mole natou fia lagolago ki te ʼu puleʼaga fakatagata ʼi te temi nei pea lolotoga te mamahi lahi, ʼe natou tau anai mo he ʼu faigataʼaʼia. (Lau ia Fakaha 13:16, 17.) ʼE lagi tonu anai ke tou foaki ki ʼotatou tehina mo tuagaʼane te ʼu meʼa ʼae ʼe ʼaoga kia natou ʼi te faʼahi fakasino. Ka fakahoko anai e Sesu, te Hau, ia te fakamau, ʼofa pe ke ina maʼu mai tatou ʼe tou fakaha te manavaʼofa pea mo ina fakaafe tatou ke tou “maʼu te Puleʼaga.”—Mat. 25:34-40.
KE TOE MALOHI AGE TOU ʼOFA
13. ʼO mulimuli kia Loma 15:7, kotea ʼae neʼe fai ʼe te ʼu ʼuluaki Kilisitiano ke toe malohi age tanatou feʼofaʼaki?
13 Neʼe iloʼi e te hahaʼi te feʼofaʼaki ʼa te ʼu ʼuluaki Kilisitiano. Kae neʼe faigafua koa kia natou tanatou feʼofaʼaki? Neʼe maʼu ʼi te kokelekasio ʼo Loma he kau Suta neʼe natou fakaʼapaʼapa ki te lao ʼa Moisese, pea ko ʼihi neʼe mole ko he kau Sutea, neʼe kehe age tanatou agaʼi fenua. Ko ʼihi neʼe ko he ʼu kaugana kae ko ʼihi leva neʼe natou ʼateaina. Neʼe lagi maʼu pe la e ʼihi Kilisitiano hanatou ʼu kaugana. Neʼe feafeaʼi ki te ʼu Kilisitiano ʼaia hanatou feʼofaʼaki logo la tonatou kehekehe? Neʼe fakalotomalohiʼi natou e te apositolo ko Paulo ke natou “fefakatalitaliʼaki.” (Lau ia Loma 15:7.) Kotea tona fakaʼuhiga? Ko te kupu “fakatalitali” ko tona fakaʼuhiga ke fakatalitali he tahi ʼaki he agalelei peʼe ke fakaha te tali kaiga. Ohage la ko hakita fakatalitali lelei he tahi ki tokita ʼapi peʼe ke liliu ko hokita kaumeʼa. Neʼe faitohi te apositolo ko Paulo kia Filemone ʼo fakaha age pe neʼe tonu ke feafeaʼi tana fakatalitali ia Onesimo. Neʼe ina ui fenei: “Fakatalitali lelei ia ia.” (Flm. 17) Pea ko Akila mo Pilisila neʼe nā fakatalitali ia Apolose, ʼo nā tokoni age ke mahino lelei age ki te lotu Fakakilisitiano pea mo “nā toʼo ia ia” mo naua. (Gaue 18:26) Neʼe mole tuku e te kau Kilisitiano ʼaia ke natou fetokakoviʼaki ʼuhi ko tonatou kehekehe kae neʼe natou fefakatalitali lelei ʼaki.
14. Neʼe fakaha feafeaʼi e Anna mo tona ʼohoana te ʼofa?
14 ʼO toe feia mo tatou, ʼe tou ʼoʼofa ki ʼotatou tehina mo tuagaʼane ʼi tatatou tali natou ko hotatou ʼu kaumeʼa. Pea ʼi tatatou fai ʼaia ʼe natou toe ʼoʼofa anai kia tatou. (2 Ko. 6:11-13) Koʼeni te meʼa neʼe hoko kia Anna mo tona ʼohoana. Mole fualoa ʼi tanā ʼosi mavae ʼae ʼo olo misionea ki Afelika Uesite, neʼe to te taʼi mahaki COVID-19. ʼUhi ko te taʼi mahaki neʼe mole feala ke nā felaveʼi mo feiloʼiʼaki lelei mo te ʼu tehina mo tuagaʼane ʼo tanā kokelekasio foʼou. Neʼe fakaha feafeaʼi e te taumatuʼa tonā ʼofa? Neʼe nā fakaʼaogaʼi te Neti ke nā feiloʼiʼaki mo te ʼu tehina mo tuagaʼane pea mo fakaha age tana loto ʼae ke natou kaumeʼa. Neʼe malave te faʼahi ʼaia ki te ʼu famili pea neʼe natou kamata pauʼi mo faitohi tuʼumaʼu kia naua. He koʼe neʼe faiga te taumatuʼa misionea ʼaia ke nā iloʼi lelei te ʼu tehina mo tuagaʼane? ʼE ui fenei e Anna: “ ʼE mole au galoʼi anai te ʼofa ʼae neʼe fakaha mai e te ʼu tehina mo tuagaʼane kia au mo toku famili ʼi te ʼu temi lelei mo te ʼu temi faigataʼa. Neʼe uga au e tanatou faʼifaʼitaki ʼaia ke au toe fakaha te ʼofa.”
15. Kotea ʼae ʼe ke ako mai te faʼifaʼitaki ʼa Vanessa ʼo ʼuhiga mo te ʼofa ki ʼotatou tehina mo tuagaʼane fuli? (Vakaʼi mo te pāki.)
15 Tokolahi ia tatou ʼe tou kau ʼi he ʼu kokelekasio ʼe maʼu ai ni tehina mo tuagaʼane ʼe kehekehe tonatou haʼuʼaga pea mo tonatou ʼuluagaaga. ʼE feala ke toe malohi age tatatou ʼoʼofa kia natou ,moka ʼe tou tokagaʼi tafito ʼonatou kalitate. Ko te tuagaʼane ko Vanessa ʼae ʼe maʼuli ʼi Niusila, neʼe faigataʼa tana felogoi lelei mo ʼihi ʼo tana kokelekasio. Kae neʼe mole fakamamaʼo ia mai ia natou ʼae neʼe mole ina leleiʼia. Neʼe ina fai te fakatuʼutuʼu ʼae ke toʼo hona temi ke fakatahi ai mo natou. Neʼe tokoni ai kia ia ke sio ki te faʼahi ʼae ʼe lelei ia e Sehova ia natou. ʼE ina ui fenei: “ ʼUhi ʼae kua tagata taupau fakasiliko ia toku ʼohoana, ʼe lahi te temi ʼe ma fakatahi ai mo te ʼu tehina mo tuagaʼane kehekehe, pea kua faigafua age kia au haku felogoi lelei mo natou. Kua au leleiʼia te kehekehe ʼaia ʼo te hahaʼi ʼa Sehova. Pea ʼe toe leleiʼia foki e Sehova he ʼe ko ia ʼae ʼe ina taki mai te hahaʼi kehekehe ke natou tauhi kia te ia.” Ka tou maʼu te faʼahiga sio ʼa Sehova ki ʼotatou tehina mo tuagaʼane ʼe tou fakaha ai ʼe tou ʼoʼofa kia natou.—2 Ko. 8:24.
16. He koe ʼe tonu anai ke tou feʼofaʼaki lolotoga te mamahi lahi? (Vakaʼi mo te pāki.)
16 ʼE tonu anai ke tou feʼofaʼaki lolotoga te mamahi lahi. Ka kamata te mamahi lahi, ʼe puipui feafeaʼi anai tatou? Tokagaʼi te faʼahi ʼae neʼe kole e Sehova ke fai e tana hahaʼi ʼi te temi ʼae neʼe ʼohofi ai te kolo ʼafea ko Papiloni: “Alu taku hahaʼi, ʼulu ki ʼou koga fale taupotu pea ke pupunu te ʼu matapa ʼi ʼou tuʼa. Ke ke nono ʼi he kiʼi temi, ʼo kaku ki te ʼosi ʼo toku hauhau.” (Esa. 26:20) ʼE lagi tonu anai ke tou mulimuli ki te ʼu fakatotonu ʼaia lolotoga te mamahi lahi. ʼE lagi fakaʼuhiga te ʼu “koga fale taupotu” ki ʼatatou kokelekasio. Lolotoga te mamahi lahi, ʼe fakapapau e Sehova ʼe ina puipui anai tatou mo kapau ʼe tou haga tauhi kia te ia fakatahi mo ʼotatou tehina mo tuagaʼane. Koia, ʼe mole tou faiga pe ʼi te temi nei ke tou katakiʼi ʼotatou tehina mo tuagaʼane, kae ʼe tonu ke tou ʼoʼofa mamahi ia natou. ʼE feala ai ke haofaki tatou.
TEUTEU NEI
17. Kapau ʼe tou teuteu nei, kotea ʼae ʼe feala anai ke tou fai lolotoga te mamahi lahi?
17 ʼE ko he temi faigataʼa maʼa te hahaʼi fuli moka hoko anai “te ʼaho lahi ʼo Sehova!” (Sofo. 1:14, 15) ʼE toe tau anai te hahaʼi ʼa Sehova mo he ʼu faigataʼa ia. Kae kapau ʼe tou teuteu nei, ʼe mole tou matataku anai pea ʼe feala anai ke tou tokoni ki ʼihi. ʼE tou faʼa kataki moka tou tau anai mo he ʼu fihifihia. Ka mamahi anai ʼotatou tehina mo tuagaʼane, ʼe tou manavaʼofa anai kia natou ʼo foaki te ʼu meʼa ʼae ʼe ʼaoga kia natou. Pea kapau ʼe tou ako ʼi te temi nei ke tou ʼoʼofa ki ʼotatou tehina mo tuagaʼane, ʼe tou fakaha anai tatatou ʼofa kia natou ʼi te ka haʼu. ʼE fakapale anai tatou e Sehova ʼo ina foaki mai te maʼuli heʼe gata ʼi he malama ʼe mole tou toe manatuʼi ai anai te ʼu mamahi fuli.—Esa. 65:17.
KATIKO 144 Haga Sio Ki Te Totogi
a Kua vave hoko mai pe te mamahi lahi. ʼE tonu anai ke tou faʼa kataki, mo manavaʼofa pea mo ʼofa ke feala hatatou tauʼi te temi faigataʼa ʼaupito ʼaia neʼe heʼeki hoko. Tou vakaʼi pe neʼe fakaha feafeaʼi e te ʼu ʼuluaki Kilisitiano te ʼu kalitate ʼaia, ʼe feafeaʼi hatatou mulimuli ki tanatou faʼifaʼitaki, pea he koʼe ʼe ʼaoga te ʼu kalitate ʼaia ke tou teuteu ai ki te mamahi lahi.
b Ko natou ʼae ʼe fia kau ki te ʼu gaue ʼae moʼo tokoni, ʼe tonu muʼa ke natou tohi te pepa DC-50 peʼe ko te pepa A-19. Pea ʼe tonu ke natou atalitali ke fakaafe natou ki ai.