1-2. He koʼe ʼe feala ke fakatatau he Kilisitiano ki he toe fale fata maʼoluga? (1 Kolonito 15:58)

 ʼI TE taʼu 1978, neʼe fakatuʼu he foʼi fale fata maʼoluga ʼi te kolo ko Tokyo, ʼi Saponia. Neʼe feʼekeʼaki e te hahaʼi pe ʼe feafeaʼi anai hana tuʼu malohi moka hoko he mafuike. Kotea ʼae neʼe fai e te hahaʼi ʼae neʼe natou fakakaukauʼi ia te faʼu ʼo te fale fata maʼoluga ʼaia? Neʼe natou faʼu te fale ke tuʼu malohi, kae neʼe feala pe ke ʼai hana kiʼi gatū kae mole holo moka galulu te kele. ʼE feala ke fakatatau te kau Kilisitiano ki te foʼi fale fata maʼoluga ʼaia. ʼO feafeaʼi?

² ʼE tonu ke iloʼi e he Kilisitiano pe ko te ʼu aluʼaga fea ʼae ʼe tonu ke tuʼu malohi ai pea mo te ʼu aluʼaga ʼae ʼe tonu ke fakapotopoto ai. ʼE tonu ke tuʼu malohi mo fakalogo tuʼumaʼu ki te ʼu lao ʼa Sehova. (Lau ia 1 Kolonito 15:58.) ʼE fakalogo “ ʼaki he lotolelei” maʼia moka tau mo he aluʼaga faigataʼa ʼaupito. Pea ʼi te tahi age faʼahi, ʼe fakapotopoto anai moka ʼe feala pea moka ʼe ʼaoga. (Sakp. 3:17) Ko he Kilisitiano kua feala hana fakafuafua lelei te ʼu faʼahi ʼaia, ʼe mole fefeka fau anai pea ʼe mole ina fakagafua anai ia meʼa fuli. ʼE tou vakaʼi anai ʼi te alatike ʼaeni te ʼu aluʼaga ʼae ʼe tonu ai ke tou tutuʼu malohi. ʼE tou toe vakaʼi anai faʼahi ʼe nima ʼe fakaʼaogaʼi e Satana moʼo fakavaivaiʼi tatatou tutuʼu malohi pea ʼe feafeaʼi hatatou tauʼi ʼana faiga ʼaia.

3. Kotea te ʼu lao mai ia Sehova ʼe tou maʼu ia Gaue 15:28, 29?

³ Ko Sehova te Tagata Failao Lahi. Pea ʼe ina foaki tuʼumaʼu ki tana hahaʼi he ʼu lao ʼe tasilo lelei. (Esa. 33:22) Ohage la, ʼi te temi ʼo te ʼu ʼuluaki Kilisitiano, neʼe fakaha lelei e te Kolesi Pule te ʼu aluʼaga ʼe tolu neʼe tonu ke tutuʼu malohi ai te  kau Kilisitiano: (1) ke natou liʼaki te tauhi tamapua kae natou tauhi ʼateaina pe kia Sehova, (2) ke natou fakaʼapaʼapa ki te ʼuhiga taputapu ʼo te toto, pea (3) ke natou fakalogo ki te lao ʼa Sehova ʼae ke fakamamaʼo mai te ʼu felaveʼi fakasino heʼe ʼaoga. (Lau ia Gaue 15:28, 29.) ʼE fakaha feafeaʼi e te kau Kilisitiano ia ʼaho nei tanatou fakalogo ki te ʼu aluʼaga ʼaia ʼe tolu?

4. ʼE tou fakaha feafeaʼi ʼe tou pipiki ʼateaina pe kia Sehova? (Fakaha 4:11)

⁴ ʼE tou liʼaki te tauhi tamapua, kae ʼe tou tauhi ʼateaina pe kia Sehova. Neʼe fakatotonu e Sehova ki te kau Iselaele ke natou pipiki ʼateaina pe kia te ia. (Tet. 5:6-10) Pea ʼi te fakahalaʼi e te Tevolo ia Sesu, neʼe fakaha lelei ai e Sesu ʼe tonu ke tou atolasio ʼateaina pe kia Sehova. (Mat. 4:8-10) Koia, ʼe mole tou atolasio ai ki ni fakatata. Pea ʼe mole tou ʼatua ki ni tagata, ohage la ko he takitaki lotu, peʼe ko he tagata faipolitike, faigaoʼi peʼe faimaholo. ʼE tou atolasio ʼateaina pe kia Sehova, ʼae ‘neʼe ina fakatupu ia meʼa fuli,’ pea mo tou fakalogo kia te ia.—Lau ia Fakaha 4:11.

5. He koʼe ʼe tou fakalogo ki te lao ʼa Sehova huʼu mo te taputapu ʼo te maʼuli pea mo te toto?

⁵ ʼE tou fakalogo ki te lao ʼa Sehova huʼu mo te taputapu ʼo te maʼuli pea mo te toto. Kotea tona tupuʼaga? Koteʼuhi ʼe ui e Sehova ko te toto ʼe ko te maʼuli, pea ko te maʼuli ʼe ko he meʼa ʼofa maʼuhiga neʼe ina foaki mai. (Lev. 17:14) ʼI te temi ʼae neʼe fakagafua ai e Sehova ke kai te tagata ki te kanoʼi manu, neʼe ina tapuʼi age te kai ʼo te toto. (Sen. 9:4) Neʼe ina toe ui te tapu ʼaia ki te kau Iselaele ʼi te temi ʼae neʼe ina foaki ai te Lao ʼa Moisese. (Lev. 17:10) Pea ʼi te temi leva ʼo te ʼu ʼuluaki Kilisitiano, ʼaki te Kolesi Pule, neʼe ina fakatotonu ki te kau Kilisitiano fuli ke natou “fakamamaʼo mai . . . te toto.” (Gaue 15:28, 29) ʼE tou fakalogo lelei ki te lao ʼaia moka tou fai he ʼu tonu ʼo ʼuhiga mo he ʼu faitoʼo. b

6. Kotea ʼae ʼe tou fai ke tou mulimuli lelei ai ki te fakatotonu ʼa Sehova ʼae ke tou fakamamaʼo mai te ʼu felaveʼi fakasino heʼe ʼaoga?

⁶ ʼE tou mulimuli lelei ki te fakatotonu ʼa Sehova ʼae ke tou fakamamaʼo mai te ʼu felaveʼi fakasino heʼe ʼaoga. (Hep. 13:4) Neʼe fai mai e te apositolo ko Paulo te tokoni ʼae ke tou “tamateʼi” ʼotatou koga sino, ko tona fakaʼuhiga ke tou fai ia meʼa fuli moʼo liʼaki te ʼu holi ʼae ʼe kovi. ʼE tou tokakaga ai ke mole tou sioʼi he meʼa peʼe tou fai he aga ʼe ina fakaneke anai tatou ke tou fai he ʼu felaveʼi fakasino heʼe ʼaoga. (Kol. 3:5; Sopo 31:1) Ka fakahalaʼi tatou, ʼe tou foimo tekeʼi he manatu peʼe ko he aga ʼe kovi ʼe feala ke maumauʼi ai ʼatatou felogoi mo te ʼAtua.

7. Kotea ʼae ʼe tou fakatotonu ke tou fai, pea kotea tona tupuʼaga?

⁷ ʼE loto e Sehova ke tou “fakalogo . . . mo he lotolelei.” (Loma 6:17) ʼE fua lelei tuʼumaʼu pe kia tatou ʼana tokoni pea ʼe mole feala ke tou fetogi ʼana lao. (Esa. 48:17, 18; 1 Ko. 6:9, 10) Koia, ʼe tou faiga lahi ai ke fiafia ai ia Sehova pea ʼe tatau tatatou manatu mo te tagata faipesalemo, ʼae neʼe ina ui: “Neʼe au fakatotonu ke au fakalogo ki ʼau lekula ʼi te temi fuli pe, ʼo kaku ki te fakaʼosi.” (Pes. 119:112) Kae ʼe faiga e Satana ke faigataʼa hatatou tutuʼu malohi. Kotea ʼae ʼe ina fai?

8. ʼE fakaʼaogaʼi feafeaʼi e Satana te fakataga ke faigataʼa ai hatatou tutuʼu malohi?

⁸ Te fakataga. Ke faigataʼa hatatou tutuʼu malohi, ʼe fakaʼaogaʼi e Satana te agamalohi mo te ʼu fakaneke. ʼE ina kumi ke ina  “kai” tatou, ko tona fakaʼuhiga ke mole kei tou felogoi lelei mo Sehova. (1 Pet. 5:8) Ko te ʼu ʼuluaki Kilisitiano neʼe fakamatakuʼi natou, mo ta pea mo matehi natou he neʼe natou fia nonofo agatonu ki te ʼAtua. (Gaue 5:27, 28, 40; 7:54-60) ʼI totatou temi, ʼe kei fakaʼaogaʼi pe e Satana te fakataga. Ohage la ʼi Lusia pea mo te tahi ʼu fenua ʼe gaohi koviʼi e ʼotatou fili ʼotatou tehina mo tuagaʼane pea ʼe gaohi koviʼi pe la mo tatou.

9. Fakamatala mai he aluʼaga neʼe hoko ʼe ha ai te maʼuhiga ke tou tokakaga ki te ʼu fakaneke kaka.

⁹ Te ʼu fakaneke kaka. ʼE toe fakaʼaogaʼi e Satana “te ʼu kaka.” (Efe. 6:11) Tou vakaʼi te aluʼaga neʼe hoko ki totatou tehina ko Bob, ʼae neʼe tonu ke tafa. ʼI tona tuku ʼi lopitali, neʼe ina fakaha ki te ʼu toketa tana fakafisi ʼae ki te ʼu foʼi huki toto. Neʼe fakapapauʼi age e te toketa tafa ʼe fakaʼapaʼapa anai ki tana tonu. Kae ʼi te po ʼi muʼa ʼo tona tafa, ʼi te ʼosi mavae ʼa te famili ʼo Bob, neʼe alu age te toketa ʼae neʼe tonu ke ina fai tona foʼi huki fakamate. Neʼe ina ui age kia Bob ʼe mole ʼaoga anai he foʼi huki toto, kae ʼe tuku ovi age pe he foʼi huki toto naʼa meʼa hala age pe . . . Neʼe lagi ui e te toketa ʼaia ʼe fetogi anai te manatu ʼa Bob ʼi te kua puli ʼo tona famili. Kae neʼe tuʼu malohi pe te tonu ʼa Bob. Neʼe ina toe fakaha age tana fakafisi ʼae ki te foʼi huki toto.

10. He koʼe ʼe fakatupu tuʼutamaki te maʼu ʼo he ʼu manatu fakatagata? (1 Kolonito 3:19, 20)

¹⁰ Te ʼu manatu fakatagata. Ka tou kamata maʼu he ʼu manatu fakatagata, ʼe tou galoʼi ai ia Sehova pea mo ʼana lao. (Lau ia 1 Kolonito 3:19, 20.) ʼE tau uga e “te poto ʼo te malamanei” ia te hahaʼi ke natou fakahoko ʼonatou holi ʼae ʼe kovi. ʼI te temi ʼo te ʼu ʼuluaki Kilisitiano, neʼe atolasio te hahaʼi ʼo te ʼu kolo ko Pelekame mo Tiatile ki te ʼu taula ʼatua pea mo natou fai he ʼu felaveʼi fakasino heʼe ʼaoga. Pea neʼe fai e ʼihi Kilisitiano te ʼu aga ʼaia. Koia neʼe fakatonutonuʼi ai e Sesu te ʼu kokelekasio ʼi te ʼu kolo ʼaia ʼe lua, he neʼe natou tuku ke fai ai te ʼu taʼi aga ʼaia. (Fkha. 2:14, 20) Ia ʼaho nei, ʼe toe uga tatou e te malama ʼaeni ke tou maʼu te ʼu manatu hala ʼaia. ʼE faiga anai e totatou famili peʼe ko ʼotatou feilo, ke tou manatu ʼe fefeka fau te ʼu lao ʼa Sehova pea ʼe mole kovi moka mole tou fakalogo ki ai. Ohage la ʼe feala ke natou ui mai ʼe mole kovi te fai ʼo te ʼu aga heʼe ʼaoga pea ko te ʼu lao ʼi te Tohi-Tapu kua ʼafea ia.

11. Kotea ʼae ʼe tonu ke tou tekeʼi?

¹¹ ʼE feala ʼi ʼihi temi ke tou ui ʼe mole mahino lelei te ʼu lao ʼa Sehova. Pea ʼe lagi feala pe ke tou fia “fakalaka ʼi te ʼu meʼa ʼae kua ʼosi tohi.” (1 Ko. 4:6) Ko te hala ʼaia neʼe fai e te kau takitaki lotu ʼi te temi ʼo Sesu. Neʼe natou hilifaki ki te Lao ʼa Moisese he ʼu lao fakatagata. Neʼe natou hili ai he kavega mamafa ki te hahaʼi. (Mat. 23:4) Neʼe foaki mai e Sehova he ʼu fakatotonu ʼe mahino gafua ʼi tana Folafola pea ʼaki tana kautahi. Koia ʼe mole ʼaoga ai ke tou toe hilifaki atu he tahi ʼu lao. (Taag. 3:5-7) ʼE tou tokakaga ai ke mole tou fakalaka ʼi te meʼa ʼae kua ʼosi tohi ʼi te Tohi-Tapu pea ke mole tou fakatuʼu he ʼu lao huʼu mo he ʼu faʼahi ʼe fakalogo ki te ʼu Kilisitiano takitokotahi.

12. ʼE fakamafola feafeaʼi e Satana te ʼu manatu kaka?

¹² Te ʼu manatu kaka. ʼE fakaʼaogaʼi e Satana te ʼu “manatu kaka” pea mo “te ʼu manatu ʼa te malamanei” moʼo fakaheʼi pea mo fakamavetevete te hahaʼi. (Kol. 2:8) ʼI te temi ʼo te ʼu ʼuluaki Kilisitiano, neʼe kau ʼi te ʼu manatu kaka te ʼu filosofia ʼae neʼe mulimuli ki te poto fakatagata, ʼo feia mo te ʼu talatisio Fakasutea ʼae neʼe mole tuʼu ʼi te Tohi-Tapu pea mo te manatu ʼae ke fakaʼapaʼapa te kau Kilisitiano ki te Lao ʼa  Moisese. Neʼe ko he ʼu manatu kaka, he neʼe natou fakamaliu kehe te hahaʼi mai ia Sehova, ʼae ko te Matapuna moʼoni ʼo te poto. Ia ʼaho nei, ʼe fakaʼaogaʼi e Satana te ʼu tala logo mo te ʼu fakatahiʼaga ʼi te Neti moʼo fakamafola he ʼu logo mai te kau takitaki politike ʼe mole hona ʼu fakamoʼoni pea ʼe hala. Neʼe hoko te faʼahi ʼaia lolotoga te COVID-19. Ko te ʼu tehina mo tuagaʼane ʼae neʼe mulimuli ki te ʼu fakatotonu mai tatatou kautahi neʼe natou hao mai te ʼu tuʼania ʼae neʼe maʼu ʼe natou ʼae neʼe fakalogo ki te ʼu manatu kaka ʼaia.—Mat. 24:45.

13. Ko te ʼu aluʼaga fea ʼe feala ke natou fakaleluʼi tatou, pea he koʼe ʼe tonu ke tou nofo tokaga?

¹³ He ʼu aluʼaga ʼe natou fakaleluʼi tatou. ʼE tonu ke tou manatu tuʼumaʼu pe ki “te ʼu meʼa ʼae ʼe maʼuhiga ʼaupito.” (Flp. 1:9, 10) Ko te ʼu aluʼaga ʼae ʼe natou fakaleluʼi tatou ʼe natou toʼo lahi totatou temi, ʼo mole kei tou tokakaga ai ki te ʼu gaue ʼae ʼe ʼaoga. Ko te ʼu faʼahi ʼae ʼe tou fai ʼi te ʼaho fuli, ohage la ko te kai, te inu, te malolo mo te gaue, ʼe feala ke fakaleluʼi ai tatou moka kua tou fakamaʼuhigaʼi ʼi totatou maʼuli. (Luka 21:34, 35) Tahi ʼae, ʼe mole māu tatatou logo ki te ʼu laka ʼe fai e te hahaʼi pea mo te ʼu fihi fakapolitike. ʼE mole tonu anai ke fakaleluʼi tatou e te ʼu faʼahi ʼaia. Heʼe feala ke tou lagolago ki ai ʼi tatatou fakakaukau pea mo totatou loto. Neʼe tou vakaʼi te ʼu faʼahi ʼae ʼe fakaʼaogaʼi e Satana moʼo fakavaivaiʼi tatatou fakatotonu ʼae ke tou fai te meʼa ʼae ʼe lelei. Tou vakaʼi nei pe ʼe feafeaʼi hatatou mole to ki te ʼu hele ʼaia ʼa Satana kae ke tou tutuʼu malohi.

14. Kotea ʼae ʼe lava tokoni mai ke tou tutuʼu malohi?

¹⁴ Manatuʼi pe ko ʼe neʼe ke foaki tou maʼuli kia Sehova pea mo papitema. Neʼe ke fakahoko te ʼu faʼahi ʼaia he neʼe ke loto ke ʼofa Sehova ia koe. Manatuʼi pe kotea ʼae neʼe ke tui ai kua ke maʼu te moʼoni. Neʼe ke ako ke ke iloʼi ia Sehova pea neʼe ke ʼofa mo fakaʼapaʼapa ai ki tau Tamai ʼae ʼi selo. Neʼe tuputupu tau tui pea neʼe ke fakahemala. Neʼe ke fakagata tau fai te ʼu aga ʼae ʼe fehiʼa ki ai Sehova kae ke fai te ʼu aga ʼe ina leleiʼia. Neʼe ke fimalie ʼi tau iloʼi ʼae kua  fakamolemole atu te ʼAtua. (Pes. 32:1, 2) Neʼe ke kau leva ki te ʼu fono mo palalau ki ʼihi ʼo ʼuhiga mo te ʼu meʼa taulekaleka ʼae neʼe ke ako. ʼI te temi nei, ʼi tau kua foaki tou maʼuli kia Sehova pea mo papitema, ʼe ke haʼele ʼi te ala ʼae ʼe ina taki ki te maʼuli, pea mo ke fakatotonu ke mole ke mavae mai ai.—Mat. 7:13, 14.

15. Kotea te ʼu fua lelei ʼe tou maʼu moka tou ako mo metitasio ki te Folafola ʼa te ʼAtua?

¹⁵ Ako te Folafola ʼa te ʼAtua pea ke metitasio ki ai. ʼE tuʼu tonu he fuʼu ʼakau moka ʼe tauaka loloto. ʼO toe feia pe, ke tou tutuʼu malohi ʼe tonu ke tauaka loloto tatatou tui ʼi te Folafola ʼa te ʼAtua. Pea ka tuputupu he fuʼu ʼakau, ʼe mafola ʼona aka pea ʼe ʼulu loloto ʼi te kele. ʼO toe feia pe, ka tou ako mo metitasio ʼe toe malohi ai tatatou tui, ʼo feia mo tatatou falala ʼae ʼe lelei ʼaupito te ʼu lao ʼa te ʼAtua. (Kol. 2:6, 7) Manatuʼi pe neʼe tokoni feafeaʼi Sehova ki ʼana kaugana ʼi te temi muʼa ʼi tana foaki age he ʼu fakatotonu, mo he ʼu tokoni pea mo puipui natou. Ohage la, neʼe sioʼi fakalelei e Esekiele te haga ʼae ʼa he ʼaselo ʼo fakafuafua lelei te fale lotu ʼae neʼe ha kia ia. Neʼe toe malohi age ia Esekiele, pea ia ʼaho nei, ʼe tou ako mai te meʼa ʼaia neʼe sio ki ai Esekiele te maʼuhiga ʼae ke tou fakalogo ki te ʼu lao ʼa Sehova huʼu mo te tauhi maʼa. (Esk. 40:1-4; 43:10-12) Koia, ʼe toe fua lelei kia tatou moka tou toʼo he temi ke tou ako te ʼu manatu loloto ʼo te Folafola ʼa te ʼAtua pea mo metitasio ki ai.

16. Neʼe puipui feafeaʼi ia Bob ʼuhi ʼae he neʼe malohi tona loto? (Pesalemo 112:7)

¹⁶ Ke liliu ʼo malohi tou loto. Neʼe ui e Tavite ʼe mole puli anai ʼi he temi tona ʼofa ʼae kia Sehova. Neʼe hiva fenei: “ ʼAtua e, ʼe malohi toku loto.” (Pes. 57:7) ʼE feala mo tatou ke malohi totatou loto, ko tona fakaʼuhiga ʼae ke tou falala katoa kia Sehova. (Lau ia Pesalemo 112:7.) Neʼe tokoni te faʼahi ʼaia kia Bob, ʼae neʼe tou palalau ki ai ʼi muʼa atu. ʼI te ui age e te toketa, ʼe tuku ovi age pe he foʼi huki toto naʼa meʼa hala age pe ʼe hoko he meʼa, neʼe tali age e Bob, kapau koia ʼe mavae anai ʼi te lopitali. Ki muli age, neʼe ui fenei e te tehina: “Neʼe au tuʼu malohi ʼi taku fakatotonu pea neʼe mole au tuʼania.”

17. Kotea ʼae ʼe tou ako mai te faʼifaʼitaki ʼa Bob? (Vakaʼi mo te pāki.)

 ¹⁷ Neʼe feala ke tuʼu malohi ia Bob he ʼe ʼi muʼa ʼo tana hu ki te lopitali neʼe kua ina ʼosi fai te tonu ʼae ke mole talagataʼa. He koʼe neʼe ina fai te tonu ʼaia? ʼUluaki, he neʼe ina fia fakafiafiaʼi te loto ʼo Sehova. Lua, neʼe ina vakaʼi fakalelei pe kotea ʼae ʼe ui ʼi te Tohi-Tapu pea mo ʼatatou tohi ʼo ʼuhiga mo te taputapu ʼo te maʼuli pea mo te toto. Pea tolu, neʼe tui papau ia kapau ʼe fakalogo kia Sehova pea ʼe tapuakiʼi anai ia ia. ʼE feala mo tatou ke malohi totatou loto tatau aipe kotea he faigataʼaʼia ʼe tou tau mo ia.

18. Kotea te faʼifaʼitaki lelei ʼe tuku mai e Palake ʼo ʼuhiga mo te falala kia Sehova? (Vakaʼi te pāki ʼo te takafi.)

¹⁸ Falala kia Sehova. Neʼe malo ia Palake ʼi te tau he neʼe falala ki te ʼu fakatotonu mai ia Sehova. ʼI te temi ʼaia neʼe mole maʼu ʼi Iselaele ni meʼa tali tau pea mo ni tao. Kae neʼe ui age e Sehova ke alu ʼo tauʼi te kautau Kanaane, ʼae neʼe takitaki e Sisela, pea neʼe lahi tanatou ʼu mahafu. (Tfm. 5:8) Neʼe fakaha age e te fafine polofeta ko Tepola kia Palake ke hifo ʼo tauʼi ia Sisela mo ʼana saliote tau ʼe 900 ʼi he koga meʼa laulelei. Logo la neʼe iloʼi e Palake ʼe lele gaholo anai te ʼu saliote tau ʼi he koga meʼa feia, ʼo faigataʼa ai kia natou te tau, kae neʼe fakalogo pe ia. ʼI te temi ʼae neʼe hifo ai te ʼu solia Iselaele mai te Moʼuga ʼo Tapole, neʼe fakato e Sehova he toe ʼua lahi. Neʼe maʼua te ʼu saliote ʼa Sisela ʼi te pela pea neʼe foaki e Sehova kia Palake ia te malo. (Tfm. 4:1-7, 10, 13-16) ʼE toe foaki mai anai e Sehova te malo mo kapau ʼe tou falala kia te ia pea mo te ʼu fakatotonu ʼae ʼe ina tuku mai ʼaki tana kautahi.—Tet. 31:6.

19. He koʼe ʼe ke fakatotonu ke ke tuʼu malohi?

¹⁹ ʼI tatatou kei maʼuli ʼi te malama ʼaeni, ʼe tonu anai ke tou faiga fakamalotoloto ke tou tutuʼu malohi. (1 Tim. 6:11, 12; 2 Pet. 3:17) Tou fakatotonu ke tou nonofo agatonu ki te ʼAtua moka fakatagaʼi tatou, peʼe fai mai he ʼu fakaneke kaka, peʼe moka mafola he ʼu manatu fakatagata, peʼe ko he ʼu manatu kaka, pea ke tou tokakaga ki te ʼu faʼahi ʼae ʼe fakaleluʼi ai tatou. (Efe. 4:14) Pea tou fakalogo tuʼumaʼu ki te ʼu fakatotonu ʼa Sehova. Kae ʼe ʼi ai leva te tahi ʼu faʼahi ʼe tonu ai ke tou fakapotopoto. ʼE tou vakaʼi anai ʼi te alatike ka hoa mai te faʼifaʼitaki haohaoa ʼae ʼe tuku mai e Sehova mo Sesu ʼo ʼuhiga mo te fakapotopoto.