TONATOU MAʼULI
He ʼu Aluʼaga Fakapunamaʼuli Mo Te ʼu Ako ʼi Taku Tauhi Kia Sehova
ʼI TAKU sio ʼi taku kei veliveli ki te fakalaka ʼa he vakalele, neʼe au fia folau ai ki he tahi ʼu fenua mamaʼo. Kae kia au neʼe mole feala ia ke hoko.
Neʼe mavae ʼaku matuʼā ʼi Estonie lolotoga te lua tau fakamalamanei ʼo nā olo ki Siamani ʼae neʼe au tupu ai. Hili ʼaia, neʼe matou teuteu olo ki Canada. Neʼe matou nonofo ovi ki te kolo ko Otawa, ʼi te kiʼi ʼapi neʼe toe maʼuʼuli ai mo te ʼu moa. Neʼe matou masisiva kae ʼi te uhu fuli neʼe matou kai ni foʼi moa.
ʼI te tahi ʼaho, neʼe lau age e te kau Fakamoʼoni ʼa Sehova ki taku faʼe te vaega ʼo Fakaha 21:3, 4. Neʼe tagi he neʼe malave ʼaupito kia ia te manatu ʼo te vaega ʼaia. Neʼe ako e ʼaku matuʼā te Tohi-Tapu, pea mole fualoa ki ai neʼe nā papitema.
Logo la neʼe mole palalau lelei ʼaku matuʼā te Fakapilitania, kae neʼe nā tauhi fakamalotoloto kia Sehova. ʼI te ʼu teitei Moeaki fuli neʼe ʼave au mo toku kiʼi tokolua ko Sylvia e taku tamai ki te faifakamafola, logo la neʼe gaue po katoa ʼi he matagi gaue ʼo te nikele ʼi Sudbury ʼi te kolo ko Ontario. Pea ʼi te vahaʼa fuli neʼe matou teuteuʼi fakafamili Te Tule Leʼo. Neʼe akoʼi mai e ʼaku matuʼā te ʼofa ʼae kia Sehova. Neʼe uga ai au ke au foaki toku maʼuli kia Sehova ʼi te 1956, ʼi toku taʼu hogofulu. Ka au manatuʼi tanā ʼoʼofa moʼoni ia Sehova, ʼe fakalotomalohiʼi ai au ke hoko atu taku tauhi kia te ia.
Hili taku maʼu pepa ʼi te fale ako, neʼe mole kei au faʼa tokaga ki taku tauhi ʼae kia Sehova. Neʼe au manatu, kapau ʼe au pionie ʼe mole feʼauga anai taku foʼi falā ke au faifolau pea mo sio ki te tahi ʼu fenua. Neʼe au maʼu leva he gaue neʼe au leleiʼia ʼi te fale latio, ʼae neʼe ko te fakatagi ʼo te musika. Kae neʼe au gaue poʼuli ʼo au to ai ʼi te ʼu fono pea neʼe au fakatahi mo ni hahaʼi neʼe mole ʼoʼofa kia Sehova. Ki muli age neʼe uga au e toku leʼo loto ʼae neʼe akoʼi ʼaki te Tohi-Tapu ke au fai ni fetogi.
Neʼe au mavae leva ʼo alu ki Oshawa ʼi Ontario. Neʼe au felaveʼi ai mo Ray Norman mo tona tokolua ko Lesli pea mo te tahi ʼu pionie. Neʼe natou fakatalitali lelei au. ʼI taku sio ʼae ki tanatou fiafia, neʼe au toe fakakaukauʼi ai ʼaku fakatuʼutuʼu. Neʼe natou fakalotomalohiʼi au ke au toʼo taku selevisi pionie pea neʼe au pionie ʼi Sepetepeli 1966. Neʼe au maʼuli fiafia. Kae neʼe hoko leva ni aluʼaga neʼe mole au ʼamanaki ki ai pea neʼe fetogi ai toku maʼuli.
KA KOLE ATU E SEHOVA KE KE FAI HE MEʼA, ʼAHIʼAHI FAI MUʼA
ʼI taku kei ako ʼi te lise, neʼe au fai taku kole ke au gaue ʼi te Petele ʼi Toronto ʼi Canada. Ki muli
age ʼi taku kua pionie, neʼe fakaafe au ke au gaue ʼi te Petele ia taʼu ʼe fa. Kae neʼe kua au manako ia Lesli pea neʼe au tuʼania, kapau ʼe au tali te fakaafe ʼaia, ʼe mole ma toe fesioʼaki anai. Neʼe au faikole loaloaga pea mo fakamalotoloto kia Sehova pea neʼe au tali leva ke au gaue ʼi te Petele. Neʼe au lotomamahi ʼi taku tauʼine ʼae kia Lesli.ʼI te Petele, neʼe au kamata gaue ʼi te fale fo pea ki muli age neʼe au sikalaipe. Neʼe pionie makehe ia Lesli ʼi Gatineau ʼi Québec. Neʼe au tau feʼekeʼaki pe neʼe feafeaʼi ia Lesli, pe neʼe lelei koa te tonu ʼae neʼe au fai. Pea neʼe hoko te aluʼaga taulekaleka neʼe mole au ʼamanaki ki ai. Neʼe fakaafe ki te Petele ia Ray, te tuagaʼane ʼo Lesli. Pea neʼe ma koga fale tahi. Neʼe feala ai ke au toe felogoi mo Lesli. Pea neʼe ma ʼohoana leva ʼi te ʼaho fakaʼosi ʼo ʼoku tau ʼe fa ʼi te Petele, ʼi te 27 ʼo Fepualio 1971.
Neʼe hinoʼi maua ki te kokelekasio lea Fakafalani ʼi Québec. Hili ni taʼu, neʼe au punamaʼuli ʼi toku fakaafe ke au liliu ko he taupau fealuʼaki kae neʼe kei au taʼu 28. Kia au neʼe kei au tamasiʼi pea mole au poto ʼi tona fai. Kae neʼe au maʼu he lotomalohi mai te koga Tohi-Tapu ʼo Selemia 1:7, 8. ʼI te tahi age faʼahi, neʼe fakaʼi liuliuga ia Lesli pea neʼe mole mamoe. Neʼe ma manatu ai ʼe faigataʼa ʼaupito anai kia maua mo kapau ʼe ma fai te siliko. Kae neʼe ui e Lesli: “Kapau ʼe kole mai e Sehova ke ta fai he meʼa, ʼe mole tonu koa la ke ta ʼahiʼahi fai muʼa?” Neʼe ma tali te selevisi fakasiliko pea neʼe ma fiafia ʼi tona fai ia taʼu ʼe 17.
Neʼe ʼi ai te tahi faʼahi neʼe au ako. ʼUhi neʼe au maʼumaʼua ʼi taku gaue taupau fealuʼaki, neʼe mole lahi te ʼu temi neʼe au ʼateaina ai mo Lesli. ʼI tahi Monite uhu, neʼe tagi te kiʼi pele ʼo tamā matapa. Neʼe au alu ʼo avahi pea neʼe mole au sio ki he tahi gata pe ki he kato neʼe ʼai ʼi ai te fala, te ʼu fuaʼi ʼakau, te folomasi, te ʼu foʼi pane, he hina vino, he ʼu ipu sioʼata, pea mo he pepa neʼe tohi ai: “Alu mo tou ʼohoana ʼo kakai ki he koga meʼa.” Neʼe laulelei te ʼaho ʼaia. Kae neʼe au ui kia Lesli ʼe mole feala, he ʼe lahi te ʼu akonaki ʼe tonu ke au teuteuʼi. Neʼe mahino ki ai, kae neʼe lotomamahi. ʼI taku heka ʼi toku pilo, neʼe kamata vevele ai toku leʼo loto. Neʼe au manatuʼi ia Efeso 5:25, 28. Neʼe hage kia au neʼe fakaʼaogaʼi e Sehova te vaega ʼaia moʼo fakamanatuʼi mai te maʼua ʼae ke au tokagaʼi te ʼu meʼa ʼae ʼe logoʼi e Lesli. ʼI taku ʼosi faikole, neʼe au ui age kia Lesli: “Ta olo,” pea neʼe fiafia ai. Neʼe ma olo ki he koga meʼa matalelei neʼe ovi ʼi te vai tafe, neʼe ma folahi ai te fala pea ma fiafia ʼi tamā fakatahi ʼi te ʼaho ʼaia. Pea neʼe toe feala pe la ke au teuteuʼi taku ʼu akonaki.
Neʼe ma fiafia ʼi tamā gaue ʼi te siliko pea neʼe lahi te ʼu koga meʼa neʼe ma ʼaʼahi mai Colombie-Britannique ki Terre-Neuve. Neʼe au faifolau ohage pe ko te meʼa ʼae neʼe au loto ki ai ʼi taku kei veliveli. Neʼe au fia kau ʼi te ako ʼo Kalaate kae neʼe mole au fia misionea pea mo maʼuli ʼi he tahi age fenua. Kia au, neʼe hage te kau misionea ko ni hahaʼi makehe pea neʼe au manatu ʼe mole feala ke au liliu ʼo misionea. Pea neʼe au mataku
naʼa hinoʼi maua ki he fenua ʼi Afelika ʼe lahi ai te mahaki mo te tau. Neʼe au fiafia pe au ʼi taku nofo ʼi Canada.NEʼE MA PUNAMAʼULI ʼI TOMĀ HINOʼI KI ESTONIE MO TE ʼU FENUA BALTES
ʼI te 1992, neʼe kua feala ke toe faifakamafola te kau Fakamoʼoni ʼa Sehova ʼi ʼihi fenua ʼo te Lusia ʼafea. Neʼe kole mai e te ʼu tehina pe ʼe ma lotolelei ke ma olo ʼo misionea ʼi Estonie. Neʼe ma punamaʼuli kae neʼe ma faikole huʼu mo te faʼahi ʼaia. Neʼe ma toe ui fenei: “Kapau ʼe kole mai e Sehova ke ta fai he meʼa, ʼe mole tonu koa la ke ta ʼahiʼahi fai muʼa?” Neʼe ma tali pea neʼe au manatu fenei: “ ʼE lelei he ʼe mole ma olo ki Afelika.”
Neʼe ma kamata ako atu aipe te lea fakaestonia. Hili ni mahina, neʼe kole mai ke ma ʼaʼahi ni kokelekasio ʼo te siliko. Neʼe ko kokelekasio mo kiʼi kutuga ʼe 46 ia fenua ʼe tolu ʼo Baltes mo te kolo ko Kaliningrad, ʼi Lusia. Koia neʼe tonu ke ma ako he ʼu kiʼi kupu ʼi te ʼu lea fakaletton, fakalituania pea mo fakalusia. Neʼe faigataʼa ʼosi. Kae neʼe malave ki te ʼu tehina mo tuagaʼane ʼama faiga pea neʼe natou tokoni mai. ʼI te 1999 neʼe fakatuʼu te Petele ʼi Estonie pea neʼe au kau ʼi te Komite ʼo Te Filiale mo te ʼu tehina ko Toomas Edur, mo Lembit Reile pea mo Tommi Kauko.
Neʼe ma feiloʼiʼaki mo he ʼu Fakamoʼoni ʼa Sehova ʼe tokolahi neʼe ʼave ki Sipelia ʼi muʼa atu. Logo la tonatou gaohi koviʼi ʼi te ʼu fale pilisoni, mo tanatou mavete mo ʼonatou famili kae neʼe mole natou iita. Neʼe natou fiafia pe pea mo faʼafai ʼi te faifakamafola. Neʼe ma ako mai tanatou faʼifaʼitaki ʼe feala pe ke ma faʼa kataki mo fiafia logo la te ʼu faigataʼaʼia.
ʼAki te temi pea ʼuhi ʼae neʼe mole lahi toma ʼu temi malolo, neʼe kovi ʼosi te gaʼegaʼe ʼa Lesli. Neʼe mole ma iloʼi neʼe tupu tona gaʼegaʼe he neʼe kau ʼi te mahaki ʼae ʼe higoa ko te fibromyalgie. Neʼe ma fakakaukauʼi ai ke ma toe liliu ki Canada. Neʼe fakaafe maua ke ma kau ki te ako ʼo te ʼu tehina ʼo te ʼu Komite ʼo Te Filiale ʼae neʼe fai ʼi Patterson, ʼi New York ʼi Amelika. Kae neʼe au manatu ʼe mole feala anai ia. Kae ʼi tamā ʼosi faikole fakamalotoloto neʼe ma tali ke ma kau ki ai. Neʼe tapuakinaʼi e Sehova te tonu ʼae neʼe ma fai. ʼI tamā fai te ako ʼaia, neʼe feala ai ke faitoʼo ia Lesli. Koia neʼe feala ai ke hoko atu tamā selevisi.
NEʼE MA TOE PUNAMAʼULI HE NEʼE HINOʼI MAUA KI HE TAHI FENUA
ʼI te tahi po ʼo te taʼu 2008, ʼi tamā toe liliu ki Estonie, neʼe pauʼi mai ʼatatou pilo lalahi, pea neʼe kole mai pe ʼe ma lotolelei ke ma olo misionea ʼi Congo. Neʼe au punamaʼuli. Tahi ʼae neʼe tonu ke au fakaha age taku tonu ʼi te ʼaho ake. Neʼe mole au fakaha age kia Lesli he neʼe au iloʼi ʼe mole mamoe anai. Kae neʼe ko au ia ʼae neʼe mole mamoe he neʼe au faikole kia Sehova ʼo fakaha ʼaku tuʼania ʼo ʼuhiga mo tamā olo ʼae ki Afelika.
ʼI te ʼaho ake, neʼe au fakaha kia Lesli te faʼahi ʼaia pea neʼe ma feuiʼaki: “ ʼE fakaafe taua e Sehova ke ta olo ki Afelika. ʼE feafeaʼi hatā iloʼi ʼe mole ta lavaʼi pea ʼe mole ta fiafia anai mo kapau ʼe mole ta ʼahiʼahi muʼa?” Koia hili taʼu ʼe 16 ʼi Estonie, neʼe ma faifolau leva ki Kinshasa,ʼi Congo.
Neʼe lahi te lauʼakau matalelei ʼi te Petele pea neʼe mole logoaʼa. Ko te ʼuluaki meʼa neʼe fakapipiki e Lesli ʼi toma koga fale neʼe ko te mape neʼe ina taupau talu tamā mavae ʼi Canada. Neʼe tohi ai: “Kolua fiafia ʼi he potu pe neʼe hinoʼi koulua ki ai.” ʼI tamā ʼosi feiloʼiʼaki mo te ʼu tehina mo tuagaʼane, mo kamata he ʼu ako Tohi-Tapu pea mo fiafia ʼi te selevisi misionea, neʼe ma maʼu te tahi age fiafia. Neʼe ma ʼaʼahi leva te ʼu Filiale ʼi te ʼu fenua Afelika ʼe 13. Neʼe ma fetaulaki ai mo ni hahaʼi kaugamalie mo kehekehe. Neʼe kua puli ʼama tuʼania pea neʼe ma fakamalo kia Sehova ʼi tana fekauʼi maua ki Afelika.ʼI Congo, neʼe ʼaumai ke ma kai te ʼu kiʼi manu liliki pea mo ʼihi age meʼa kai ʼo te fenua. Neʼe au manatu ʼe mole ma lava kai anai. Kae ʼi tamā sio ki te fia kai ai ʼa te ʼu tehina mo tuagaʼane, neʼe ma ʼahiʼahi pea neʼe ma leleiʼia.
Neʼe ma olo ki te potu esete ʼo te fenua ʼo fakalotomalohiʼi te ʼu tehina mo tuagaʼane pea mo foaki te ʼu meʼa ʼae ʼe ʼaoga kia natou. ʼI te ʼu koga meʼa ʼaia, neʼe ʼohofi e te kutuga agatuʼu te ʼu kolo pea neʼe natou gaohi koviʼi te hahaʼi fafine mo te ʼu fanau. Tokolahi te ʼu tehina neʼe natou masisiva. Kae neʼe malave kia maua tanatou tui malohi ʼae ki te fakatuʼuake, tonatou ʼoʼofa ia Sehova pea mo tanatou nonofo agatonu ki tana kautahi. Neʼe uga ai maua ke ma toe vakavakaʼi mo fakamalohi tamā tui. Neʼe au mahino ai ko te ʼu koloa ʼe feala pe ke puli vave pea mo te maʼuhiga ʼaupito ʼo te ʼu koloa fakalaumalie. Neʼe mole meo te ʼu tehina logo la te kovi ʼosi ʼo ʼonatou faigataʼaʼia. Ko tanatou aga ʼaia neʼe fakalotomalohiʼi ai maua ke ma tauʼi mo he lototoʼa ʼoma fihifihia pea mo ʼoma mahaki.
ʼE TOE HINOʼI MAUA KI ASIA
Pea neʼe hoko leva te tahi aluʼaga neʼe ma punamaʼuli ai. Neʼe kole mai ke ma mavae ʼo olo ki te Petele ʼo Hong Kong. Neʼe mole ma manatu ʼe ma maʼuli anai ʼi Asia. Kae ʼi tamā ʼosi tokagaʼi te tokoni ʼofa ʼa Sehova ʼi te ʼu potu fuli ʼae neʼe hinoʼi maua ki ai, neʼe ma tali ai ke ma olo. ʼI te 2013 neʼe ma fetagihi ʼi tamā mavete mo te ʼu tehina mo tuagaʼane ʼofaina pea mo mavae ʼi te fenua matalelei ʼo Afelika.Pea neʼe mole ma iloʼi pe kotea ka hoko.
Neʼe ko he fetogi lahi te maʼuli ʼi Hong Kong he ʼe ko te kolo ʼe kaugamalie ʼaupito te hahaʼi mai te ʼu fenua kehekehe. Neʼe toe faigataʼa te ako ʼo te lea Fakasiaina. Kae neʼe fakatalitali leleiʼi maua e te ʼu tehina pea neʼe ma leleiʼia te meʼa kai ʼo te fenua. Neʼe tuputupu vave te ʼu gaue ʼae neʼe fai ʼi te Petele kae neʼe toe hiki vave foki mo te totogi ʼo te ʼu nofoʼaga. Koia neʼe fai ai e te Kolesi Pule te tonu fakapotopoto ʼae ke fakatau ʼihi fale ʼo te Filiale. Mole fualoa ki muli age, ʼi te 2015 neʼe matou mavae ʼo olo ki Kolea Saute ʼae ʼe hoko ai tamā selevisi. ʼE ma ako he tahi lea faigataʼa pea logo la ʼe mole ma palalau lelei te lea ʼaia kae ʼe fakalotomalohiʼi maua e te ʼu tehina mo tuagaʼane ʼi tanatou ui mai ʼae kua fakahaʼuhaʼu pe te lelei ʼo tamā palalau ʼi te lea fakakolea.
TE ʼU AKO NEʼE MA MAʼU ʼI TAMĀ SELEVISI
ʼI ʼihi temi ʼe mole faigafua hatatou fakakaumeʼa mo ʼihi, kae neʼe ma tokagaʼi ka ma fakaha te tali kaiga, ʼe ma feiloʼiʼaki vave ai mo ʼihi. Neʼe ma sio ki te ʼu tehina mo tuagaʼane kehekehe kae ʼe tou tatau fuli pe. Pea neʼe ma mahino ki taulekaleka ʼo totatou faʼu e Sehova ʼaki te fealagia ʼae ke tou ʼoʼofa moʼoni ki te hahaʼi fuli.—2 Ko. 6:11.
Neʼe ma iloʼi te maʼuhiga ʼae ke ma tali te hahaʼi ohage pe ko tona fai e Sehova pea mo kumi he ʼu fakamoʼoni ʼe ha ai te ʼofa ʼo Sehova ia tatou pea mo tana takitaki totatou maʼuli. Ka ma lotovaivai peʼe ma feʼekeʼaki pe ʼe ʼoʼofa te ʼu tehina mo tuagaʼane kia maua, neʼe ma toe lau te ʼu kate peʼe ko te ʼu tohi fakalotomalohi mai ʼoma kaumeʼa. ʼE mahino ia neʼe tali e Sehova ʼama faikole mo ina fakaha mai tona ʼofa pea mo foaki mai te malohi ke ma hoko atu.
ʼAki te temi, neʼe ma mahino ki te maʼuhiga ʼae ke ma toʼo he temi ʼateaina pe kia maua, tatau aipe pe ʼe ma maʼumaʼua. Neʼe ma toe ako te maʼuhiga ʼae ke ma fekataʼi, tafito la moka ma faihala ʼi tamā ako he tahi lea. Pea ʼi te ʼu afiafi fuli ʼe ma faiga ke ma manatuʼi he aluʼaga neʼe ma leleiʼia ke ma fakafetaʼi ai kia Sehova.
ʼE moʼoni, neʼe au manatu ʼe mole feala anai ke au misionea peʼe ke au maʼuli ki he tahi fenua. Kae neʼe au fiafia he neʼe au iloʼi ʼe fealagia ia meʼa fuli kia Sehova. ʼE au manatuʼi te ʼu palalau ʼa te polofeta ko Selemia ʼae neʼe ina ui fenei: “Sehova e, neʼe ke kakaʼi au.” (Sel. 20:7) ʼEi, neʼe fakahoko e Sehova ni aluʼaga neʼe ma punamaʼuli ai pea mo he ʼu tapuakina neʼe mole ma ʼamanaki ki ai. Neʼe ina toe fakahoko pe la taku fia faifolau vakalele. Neʼe lahi tamā faifolau ki te ʼu fenua kehekehe moʼo ʼaʼahi te ʼu Filiale. Koia neʼe lahi age taku faifolau ʼi ʼae neʼe au fakaʼamu ki ai ʼi taku kei veliveli. ʼE au toe fakamalo kia Lesli ʼi tana lotolelei ʼae ke lagolago mai ʼi tamā ʼu gaue fuli ʼae neʼe hinoʼi maua ki ai.
ʼE ma faiga tuʼumaʼu ke ma manatuʼi ʼe ma fakahoko ʼama gaue ʼuhi ko toma ʼoʼofa ʼae kia Sehova. Ko te ʼu tapuakina ʼae ʼe ma fiafia ai ʼi te temi nei, ʼe ha ai te taulekaleka ʼo te maʼuli heʼe gata, moka ‘avahi anai e Sehova tona nima pea mo fakahoko te fakaʼamu ʼo te ʼu meʼa maʼuli fuli.’—Pes. 145:16.