1-2. Ohage ko Lote, ko te aluʼaga faigataʼa fea ʼe tou tau nei mo ia?

 KA TOU sisio ki te aga heʼe ʼaoga ʼa te hahaʼi ʼi te temi nei, ʼe tou hage ko te tagata agatonu ko Lote. “Neʼe lotomamahi ʼaupito ʼuhi ko te ʼu aga fakalialia ʼa te hahaʼi agakovi,” he neʼe ina iloʼi ʼe fehiʼa tatatou Tamai ʼae ʼi selo ki te ʼu aga ʼae ʼe kovi. (2 Pet. 2:7, 8) Ko te manavasiʼi ʼo Lote pea mo tona ʼofa ki te ʼAtua, neʼe ina uga ia ia ke ina tekeʼi te ʼu aga heʼe ʼaoga ʼa te hahaʼi ʼo tona temi. ʼE toe feia mo tatou, ʼe tou to lotoʼa ʼi te hahaʼi ʼe mole natou fakaʼapaʼapa ki te ʼu lao ʼa Sehova ʼo ʼuhiga mo te aga ʼae ʼe tonu ke fai. Logo la te faʼahi ʼaia, ʼe feala ke tou taupau he aga ʼe maʼa mo kapau ʼe tou haga ʼoʼofa pea mo manavasiʼi ki totatou ʼAtua.—Taag. 14:2.

² ʼE tou lava fai te faʼahi ʼaia he ʼe tokoni mai ia Sehova ʼaki te ʼu fakalotomalohi ʼae ʼe tou maʼu ʼi te tohi ʼo Taʼaga Lea. ʼE feala ke fua lelei ki te kau Kilisitiano fuli, tagata mo fafine, tupulaga mo matuʼa, te ʼu tokoni poto ʼae ʼe tuʼu ʼi ai.

3. ʼO mulimuli kia Taʼaga Lea 17:3, he koʼe ʼe tonu ke tou puipui totatou loto? (Vakaʼi mo te pāki.)

³ ʼE tou tokakaga ʼo puipui totatou loto, he ʼe sivisivi e Sehova. Ko tona fakaʼuhiga, ʼe fakalaka age tana sio ʼi te meʼa ʼae ʼe sio ki ai ʼihi, pea ʼe ina iloʼi lelei totatou ʼuhiga moʼoni. (Lau ia Taʼaga Lea 17:3.) ʼE ʼofa anai Sehova ia tatou mo kapau ʼe tou haga mulimuli ki ʼana tokoni, ʼae ʼe ina taki anai tatou ki te maʼuli heʼe gata. (Soa. 4:14) Pea ʼe tou hao ai anai mai te ʼu fua kovi ʼo te ʼu aga heʼe ʼaoga mo te ʼu loi ʼa Satana pea mo tona malama. (1 Soa. 5:18, 19) Ka lahi age tatatou fakaovi kia  Sehova, ʼe toe ʼaʼasili anai totatou ʼofa mo fakaʼapaʼapa kia te ia. ʼUhi ʼae ʼe mole tou fia fakamamahiʼi tatatou Tamai, ʼe mole pe la hake ia tatou ke tou fai he agahala. Ka fakahalaʼi tatou ke tou fai he meʼa ʼe kovi, ʼe tou feuiʼaki fenei: “ ʼE au lava fakamamahiʼi feafeaʼi ia Ia ʼae neʼe ina fakaha mai tona ʼofa mamahi ia au?”—1 Soa. 4:9, 10.

4. Neʼe tokoni feafeaʼi ki he tuagaʼane tana manavasiʼi kia Sehova ke mole to ki te fakahala?

⁴ Ko Marta, te tuagaʼane ʼi Croatie neʼe ina fia fai he aga heʼe ʼaoga. Koʼeni te meʼa ʼae neʼe ina tohi: “Neʼe faigataʼa haku maʼu he manatu fakapotopoto pea ke au tauʼi te holi ʼae ki te meʼa ʼae ʼe kovi. Kae ʼuhi ko taku manavasiʼi kia Sehova, neʼe puipui ai au.” b ʼO feafeaʼi? Neʼe ui e Marta neʼe fakakaukau ki te ʼu nunuʼa kovi ʼae ka ina maʼu moka ʼe ina fai he aga heʼe ʼaoga. ʼE lelei ke tou fai feia mo tatou. Ko te nunuʼa ʼae ʼe kovi ʼosi ʼe ko hatatou fakamamahiʼi ia Sehova, pea mole kei feala ai leva ke tou tauhi kia te ia ʼo tali ai.—Sen. 6:5, 6.

5. Kotea te ako ʼe ke maʼu mai te faʼifaʼitaki ʼa Leo?

⁵ Ka tou manavasiʼi kia Sehova ʼe tou tokaga ke mole tou kaumeʼa mo ni hahaʼi ʼe natou fai ni aga ʼe kovi. Ko Leo, ʼae ʼe maʼuli ʼi Congo, neʼe hoko ki ai te faʼahi ʼaia. Hili taʼu ʼe fa ki tana papitema, neʼe fakakaugā mo ni hahaʼi neʼe natou fai he ʼu aga ʼe kovi. ʼI tana manatu, kapau heʼeki ina fai he aga ʼe kovi, pea ʼe mole agahala ia kia Sehova. Kae mole fualoa, neʼe inu kava fakavale pea mo ina fai ni aga heʼe ʼaoga ʼuhi ko ʼana fakakaugā kovi ʼaia. Pea neʼe ina manatuʼi leva te ʼu moʼoni ʼae neʼe akoʼi age e ʼana matuʼā ʼo feia mo tona fiafia. Kotea tona fua? Neʼe ina toe maʼu he ʼu manatu fakapotopoto. ʼAki te tokoni ʼa te ʼu tagata ʼafea, neʼe toe liliu mai kia Sehova. ʼI te temi nei, kua fiafia ʼi tana tagata ʼafea pea mo pionie makehe.

6. ʼE fakata kitea te ʼu fafine ʼe lua ʼae ka tou palalau ki ai?

 ⁶ Tou vakaʼi te kapite 9 ʼo Taʼaga Lea, ʼae ʼe palalau ai kia fafine ʼe lua. ʼE fakata e te tahi te poto pea fakata e te tahi age te agavale. (Vakaʼi mo Loma 5:14; Kal. 4:24.) ʼI tatatou vakaʼi te kapite ʼaia, tou manatuʼi te holi fakavale ʼo te hahaʼi ʼi te malama ʼa Satana ki te ʼu aga heʼe ʼaoga pea mo te ʼu ʼata kovi. (Efe. 4:19) ʼE maʼuhiga ʼaupito ai ke tou haga manavasiʼi ki te ʼAtua pea mo tou maliu kehe mai te kovi. (Taag. 16:6) Koia ʼe feala ke fua lelei kia tatou fuli, tagata mo fafine, te ʼu manatu ʼae ʼe tuʼu ʼi te kapite ʼaia. ʼE tahi fai e te ʼu fafine ʼaia he fakaafe kia natou ʼae ʼe mole aga fakapotopoto. ʼE hage pe ʼe nā tahi ui: “ ʼOmai ki toku ʼapi ʼo kakai.” (Taag. 9:1, 5, 6, 13, 16, 17) Kae ko te meʼa ʼae ʼe hoko kia natou ʼae ʼe natou tali te fakaafe ʼo te ʼu fafine ʼaia ʼe lua, ʼe kehekehe ʼaupito.   

7. ʼO mulimuli kia Taʼaga Lea 9:13-18, kotea ʼae ʼe hoko kia natou ʼae ʼe natou tali te fakaafe ʼa te fafine agavale? (Vakaʼi mo te pāki.)

⁷ Lau te fakaafe ʼae ʼe fai e “te fafine agavale.” (Lau ia Taʼaga Lea 9:13-18.) ʼE mole fakameʼameʼa tana fakaafe ia natou ʼae ʼe mole aga fakapotopoto ke natou ʼomai ki tona ʼapi ʼo fakafiafia mo ia. Kotea ʼae ʼe hoko kia natou? “Ko te potu ʼaia ʼe maʼu ai ia natou ʼae ʼe mole kei honatou malohi ʼi te mate.” ʼE lagi ke manatuʼi he ʼu palalau fakata ʼe teitei tatau ʼi te ʼu kapite ki muʼa atu ʼo Taʼaga Lea. Ohage la, ʼe fakapotoʼi tatou ke tou tokaga ki “te fafine faiaga” pea mo “te fafine . . . aga heʼe ʼaoga.” ʼE ui ai: “Ko te hifo ki tona ʼapi ʼe hage ko te hifo ki te mate.” (Taag. 2:11-19) Pea ia Taʼaga Lea 5:3-10 ʼe fakapotoʼi ai tatou ke tou tokakaga ki “te fafine faiaga” ʼae “ ʼe hifo ʼona vaʼe ki te mate.”

8. Kotea te tonu ʼe maʼua anai ke tou fai?

⁸ Ko natou ʼae ʼe logo ki te fakaafe ʼa “te fafine agavale,” ʼe maʼua ke natou fai he tonu: Pe ʼe natou tali peʼe natou fakafisi ki ai. ʼE feala ke hoko kia tatou he aluʼaga ʼe maʼua ai ke tou fai he tonu. Ka fakaneke tatou e he tahi ke tou fai he ʼu felaveʼi fakasino heʼe ʼaoga peʼe ʼasi fakafokifa mai he ʼu pāki kovi, kotea anai ka tou fai?

9-10. Kotea ni tupuʼaga ʼe tonu ai ke tou fakafisi ki te ʼu felaveʼi fakasino heʼe ʼaoga?

⁹ ʼE ʼi ai ni tupuʼaga lelei ke tou fakafisi ai ki te ʼu aga heʼe ʼaoga. ʼE tou lau ʼe ui fenei e “te fafine agavale”: “ ʼE malie te ʼu vai ʼae ʼe kaihaʼa.” Kotea ‘te ʼu vai ʼaia ʼe kaihaʼa? ʼI te Tohi-Tapu, ʼe fakatatau te ʼu felaveʼi fakasino ʼi te nofo ʼohoana ki he vai mokomoko. (Taag. 5:15-18) Ko te tagata mo te fafine ʼae  kua fakamoʼoni tonā ʼohoana ʼi te puleʼaga, ʼe gafua ke nā fai he ʼu felaveʼi fakasino. Kae ʼe kehe leva ia mo “te ʼu vai ʼae ʼe kaihaʼa.” ʼE feala ke fakaʼuhiga ki te ʼu felaveʼi fakasino ʼae ʼe mole gafua pea mo heʼe ʼaoga. ʼI te agamahani, ko te ʼu aga ʼaia ʼe fai fakafufu, ohage pe ko he tahi ʼe kaihaʼa. ʼE hage mai ʼe lelei ‘te ʼu vai ʼaia neʼe kaihaʼa’ he ʼe kia natou ʼae ʼe natou fai te agahala ʼaia ʼe mole iloʼi ia e he tahi. Kae ʼe natou faihala, he ʼe sio ia Sehova kia meʼa fuli. ʼE fakalotomamahi ʼaupito moka mole kei ʼofa Sehova ia tatou. Koia la ʼae ʼe mole feala ia ke ui ʼe “malie” peʼe lelei te fai ʼo te taʼi aga ʼaia. (1 Ko. 6:9, 10) Kae mole gata ai.

¹⁰ Ko he tahi ʼe ina fai he ʼu felaveʼi fakasino heʼe ʼaoga, ʼe feala ke ufiufi ai, ke manatu ʼe mole kei hona ʼaoga, ke faitama kae mole loto ki ai, pea ke maumauʼi ai te ʼu felogoi fakafamili. Koia ko he aga poto te fakafisi ki te fakaafe ʼa “te fafine agavale.” Ko natou ʼae neʼe natou fai he ʼu aga heʼe ʼaoga ʼe mole kei natou fakakaumeʼa mo Sehova, pea tokolahi ʼe natou maʼu ni mahaki ʼe feala ke natou mamate ai. (Taag. 7:23, 26) ʼE fakaʼosi fenei te kapite 9, ʼi te vaega 18: “Ko te kau fakaafe ʼa te fafine ʼaia ʼe natou nonofo ʼi te ʼu potu loloto ʼo te Faitoka.” Kae he koʼe ʼe hahaʼi natou ʼae ʼe natou tali tana fakaafe kae feala ke natou tuʼutamakiʼia ai?—Taag. 9:13-18.

11. He koʼe ʼe fua kovi ʼaupito te sioʼi ʼo he ʼu ʼata kovi?

¹¹ Ko te sioʼi ʼo te ʼu ʼata kovi ʼe ko he hele. ʼE manatu ʼihi ʼe mole kovi te sioʼi ʼo te ʼu ʼata ʼaia. Kae ʼe kovi ia, heʼe mole kei natou fakaʼapaʼapa kia natou totonu pea mo ʼihi, pea ʼe natou fia sioʼi tuʼumaʼu pe te ʼu ʼata ʼaia. ʼE faigataʼa ki he tahi hana galoʼi he ʼu pāki ʼe kovi. Pea ʼe mole pulihi e te ʼu ʼata kovi te ʼu holi ʼae ʼe kovi, kae ʼe natou fakaʼaʼasili age. (Kol. 3:5; Sakp. 1:14, 15) ʼEi, tokolahi ia natou ʼae ʼe natou sioʼi he ʼu ʼata kovi, ʼe natou fakahoko ki muli age he ʼu aga heʼe ʼaoga.

12. ʼE tou fakaha feafeaʼi ʼe tou lototokaga moka ha mai he ʼu pāki ʼe fakatupu ia tatou he ʼu manatu heʼe ʼaoga?

¹² Kotea ʼae ʼe tonu ke tou fai moka ha fakafokifa mai he pāki kovi? ʼE tonu ke tou foimo sio kehe. ʼE tou fai anai te faʼahi ʼaia moka tou manatuʼi ko ʼatatou felogoi mo Sehova ʼe maʼuhiga ʼaupito age. Kae maʼia mo he ʼu pāki ʼe lagi mole kovi kae ʼe feala ke fakatupu ia tatou he ʼu manatu heʼe ʼaoga. He koʼe ʼe mole tonu ke tou sioʼi te ʼu taʼi pāki ʼaia? He ʼe mole tou loto pe la ke tupu ʼi totatou loto he holi ke tou fai he aga heʼe ʼaoga. (Mat. 5:28, 29) ʼE ui e David, ʼae ʼe tagata ʼafea ʼi Thaïlande: “ ʼE au fai kia au totonu te fehuʼi ʼaeni: ‘Maʼia pe mole ko he ʼu pāki kovi, kae ʼe fiafia anai koa Sehova moka au hoko atu te sioʼi ʼo te ʼu pāki ʼaia?’ Ka au fakakaukau feia, ʼe tokoni mai ke au aga fakapotopoto.”

13. Kotea ka tokoni mai ke tou aga fakapotopoto?

¹³ ʼE tou aga fakapotopoto anai moka tou manavasiʼi peʼe matataku naʼa tou fai he aga ʼe lotomamahi ai ia Sehova. Ko te manavasiʼi ki te ʼAtua ʼe “ko te kamataʼaga [peʼe ko te fakatafitoʼaga ʼaia] ʼo te poto.” (Taag. 9:10) ʼE ha te faʼahi ʼaia ia Taʼaga Lea ʼi te kamataʼaga ʼo te kapite 9, ʼae ʼe fakata ai “te poto moʼoni” ki he tahi fafine.

14. Kotea te tahi age fakaafe ʼe fai mai ia Taʼaga Lea 9:1-6?

¹⁴ Lau ia Taʼaga Lea 9:1-6. ʼE tou lau ʼi heni te fakaafe mai ia Sehova, ʼae ko te Matapuna mo te Tafitoʼaga ʼo te poto moʼoni. (Taag. 2:6; Loma 16:27) ʼE fakaʼaogaʼi ʼi heni te fakata ʼo he ʼapi ʼe lahi mo ʼona pou ʼe fitu. ʼE fakaʼuhiga ki te loto foaki lahi ʼo Sehova pea mo tana fakatalitali ia natou fuli ʼae ʼe natou fia mulimuli ki tana ʼu tokoni poto ʼi tonatou maʼuli.

15. ʼE fakaafe tatou e te ʼAtua ke tou fai tea?

 ¹⁵ ʼE tou ako mai te fafine ʼae ʼe ina fakata “te poto moʼoni” ia Taʼaga Lea kapite 9, ko Sehova ʼe loto foaki pea ʼe ina foaki mai he ʼu meʼa ʼe lelei. ʼE ui ʼi te ʼu vaega ʼaia, ko te fafine fakata ʼaia kua ina teuteuʼi lelei tana moʼi pipi, mo huʼi tana vino, pea kua ina fakatoka tona laupapa. (Taag. 9:2) Pea ohage ko tona fakaha ʼi te ʼu vaega 4 mo 5: “ ʼE ui e te fafine ʼaia [ʼae ʼe ina fakata te poto moʼoni] kia natou ʼae ʼe mole aga fakapotopoto: ‘Kotou ʼomai ʼo kai taku pane.’ ” He koʼe ʼe tonu ke tou tali te fakaafe ʼa te fafine ʼaia? ʼE loto e Sehova ke aga fakapotopoto ʼana fanau pea ke puipui natou. ʼE mole ina loto ke tou fai ni hala ʼe tou lotomamahi ai anai. Koia la ʼae “ ʼe ina taupau fakalelei te aga fakapotopoto maʼa te hahaʼi faitotonu.” (Taag. 2:7) Ka tou manavasiʼi kia Sehova, ʼe tou fia fakafiafiaʼi tona loto. ʼE tou logo ki ʼana tokoni poto, pea ʼe tou fiafia ʼi te mulimuli ki ai.—Sakp. 1:25.

16. Neʼe tokoni feafeaʼi kia Alain tana manavasiʼi ki te ʼAtua ke ina fai he tonu ʼe lelei, pea kotea tona fua?

¹⁶ Tou vakaʼi te faʼifaʼitaki ʼa Alain ʼae neʼe ina fai he tonu ʼe lelei ʼuhi he ʼe manavasiʼi ki te ʼAtua. Ko Alain ʼe tagata ʼafea ʼi tana kokelekasio pea ʼe faiako. ʼE ina ui : “Maʼa ʼihi ʼi ʼoku kaugā gaue, ko te sioʼi ʼo te ʼu ʼata kovi ʼe ko tanatou faʼahiga ako ʼaia te ʼu felaveʼi fakasino.” Kae neʼe iloʼi e Alain ʼe ko he kaka ia. ʼE ina hoko atu fenei: “Neʼe au fakafisi ki te sioʼi ʼo te ʼu ʼata ʼaia he ʼe au manavasiʼi ki te ʼAtua. Neʼe au toe fakamahino ki ʼoku kaugā gaue te tupuʼaga ʼo taku fakafisi.” Neʼe fakalogo ia Alain ki te tokoni ʼae ʼe fai age e “te poto moʼoni,” ʼae ke “mulimuli ki te ʼatamai ʼae kua [ina] maʼu.” (Taag. 9:6) Neʼe punamaʼuli ʼihi faiako ki te lotomalohi ʼo Alain, pea kua natou ako nei te Tohi-Tapu pea mo kau ki te ʼu fono.

17-18. Kotea te ʼu fua lelei ʼe maʼu ʼe natou ʼae ʼe natou tali te fakaafe ʼa te fafine ʼae ʼe ina fakata “te poto moʼoni,” pea kotea ʼae ʼe natou ʼamanaki ki ai? (Vakaʼi mo te pāki.)

¹⁷ ʼE fakaʼaogaʼi e Sehova te ʼu fakata ʼaia ʼo te ʼu fafine ʼe lua moʼo fakaha mai pe ʼe feafeaʼi hatatou maʼu he ka haʼu fiafia. Ko natou ʼae ʼe natou tali te fakaafe ʼa te fafine logoaʼa mo “agavale” ʼe natou fia maʼu he fiafia ʼi te fai ʼo te ʼu aga heʼe ʼaoga. Kae ʼe mole natou iloʼi ko te ʼu aga ʼae ʼe natou fai ʼi te temi nei ʼe ʼi ai pe anai hona ʼu fua kovi ʼi te ka haʼu. ʼE taki natou ki “te ʼu potu loloto ʼo te Faitoka.”—Taag. 9:13, 17, 18.

¹⁸ ʼE kehe age te aluʼaga ʼae ʼo natou ʼae ʼe natou tali te fakaafe ʼa te fafine ʼae ʼe ina fakata “te poto moʼoni”! ʼE natou kakai ʼi he katoaga kano lelei. Pea ʼe natou fiafia he ʼe  natou maʼu ia meʼa fuli ʼe ʼaoga ke natou nonofo ovi ai kia Sehova. (Esa. 65:13) ʼE ui fenei mai e Sehova ʼaki te polofeta ko Esaia: “Kotou fakalogo lelei mai pea kotou kai te meʼa ʼae ʼe lelei. ʼE kotou fiafia anai ʼi he meʼa ʼe kano lelei age.” (Esa. 55:1, 2) ʼEi, ʼe akoʼi tatou ke tou ʼoʼofa ki te ʼu meʼa ʼae ʼe ʼofa ki ai ia Sehova pea ke tou fehihiʼa ki te ʼu meʼa ʼae ʼe fehiʼa ki ai. (Pes. 97:10) Pea ʼe tou fiafia ʼi te fakaafe ʼo te hahaʼi ke natou maʼu te ʼu fua lelei mai “te poto moʼoni.” ʼE hage “ ʼe tou kalaga ʼi te ʼu potu maʼoluga ʼo te kolo: ‘Hahaʼi ʼae ʼe hoko tui, kotou ʼomai ki heni.’ ” Ko te ʼu lelei ʼae ʼe tou maʼu ʼo feia mo natou ʼae ʼe natou tali te fakaafe ʼaia, ʼe mole gata pe ʼi te temi nei. Kae ʼe heʼe gata, he ʼe feala ai ke tou “maʼuʼuli” ʼo heʼe gata “ ʼo mulimuli ki te ʼatamai ʼae kua [tou] maʼu.”—Taag. 9:3, 4, 6.

19. ʼO mulimuli kia Ekelesiasi 12:13, 14, kotea ʼae ʼe tou fakatotonu ke tou fai? (Vakaʼi mo te fakamatala ʼae ʼi te ʼa takai “  ʼE Fua Lelei Kia Tatou Tatatou Manavasiʼi Ki Te ʼAtua.”)

¹⁹ Lau ia Ekelesiasi 12:13, 14. Ko tatatou manavasiʼi ʼae kia Sehova ʼe ina puipui anai totatou loto pea ʼe tokoni mai ke tou taupau he aga ʼe maʼa pea mo nofo ovi kia te ia ʼi te ʼu ʼaho fakamuli ʼaeni. ʼE uga anai tatou e tatatou manavasiʼi ke tou fakaafe te tokolahi ke natou kumi “te poto moʼoni” pea mo maʼu mai ai te ʼu fua lelei.