1. Kotea ʼae ʼe tonu ke tou fai ke tou hao ʼi te ʼaho ʼo Sehova?

 KA PALALAU ʼi te Tohi-Tapu ki “te ʼaho ʼo Sehova” ʼe fakaʼuhiga ki te temi ʼae ʼe fakamauʼi ai e Sehova ʼona fili pea mo haofaki tana hahaʼi. Neʼe kua fakahoko e Sehova te ʼu fakamau ʼaia ʼi te temi muʼa. (Esa. 13:1, 6 ; Esk. 13:5; Sofo. 1:8) ʼI totatou temi, ʼe kamata anai “te ʼaho ʼo Sehova” ʼaki te ʼohofi ʼo Papiloni Lahi pea fakaʼosi ʼaki te tau ʼo Alamaketone. Ke tou hao ʼi “te ʼaho” ʼaia, ʼe tonu ke tou teuteu atu ʼi te temi nei. Neʼe akoʼi mai e Sesu ʼe tonu ke tou “nonofo teuteu” ki te “toe mamahi lahi.” ʼE ha mai ai ko he faʼahi ʼe tonu ke tou haga fai.—Mat. 24:21; Luka 12:40.

2. He koʼe ʼe feala ke fua lelei kia tatou te ʼuluaki toki ki te kau Tesalonika?

² ʼI tana ʼuluaki tohi ki te kau Tesalonika, neʼe fakaʼaogaʼi e te apositolo ko Paulo he ʼu fakata moʼo tokoni kia natou ke natou nonofo teuteu ki te ʼaho lahi ʼo te fakamau ʼo Sehova. Neʼe iloʼi e Paulo ʼe mole hoko anai te ʼaho ʼo Sehova ʼi te temi ʼae neʼe ina fai ai tana tohi. (2 Tes. 2:1-3) Kae neʼe ina foaki pe ni tokoni ki ʼona tehina ke natou nonofo teuteu ki te ʼaho ʼaia ohage pe kua vave hoko mai. ʼE toe ʼaoga kia tatou ʼana tokoni ʼaia. Tou vakaʼi tana ʼu fakamahino ʼo ʼuhiga mo te ʼu fehuʼi ʼaeni: (1) ʼE hoko feafeaʼi mai anai te ʼaho ʼo Sehova, (2) ko ai ʼae ka mole hao anai ʼi te ʼaho ʼaia, pea (3) ʼe feafeaʼi hatatou teuteu ke tou hao ai.

3. He koʼe ʼe fakatatau te hoko mai ʼo te ʼaho ʼo Sehova ki he tagata kaihaʼa ʼi te poʼuli? (Vakaʼi mo te pāki.)

³ “Ohage ko he tagata kaihaʼa ʼi te poʼuli.” (1 Tes. 5:2) Ko te ʼuluaki fakata ʼaia ʼi te ʼu fakata ʼe tolu ʼae ʼe fakaʼaogaʼi e Paulo  moʼo fakaha pe ʼe hoko feafeaʼi mai anai te ʼaho ʼo Sehova. ʼI te agamahani, ʼe ʼomai te kau kaihaʼa ʼi te poʼuli, ʼi he lakaga ʼe mole ʼamanaki ki ai te hahaʼi, pea ʼe natou gaohi meʼa fakavilivili. ʼE toe feia pe, ʼe toe hoko fakavilivili mai anai te ʼaho ʼo Sehova pea ʼe punamaʼuli ai anai te hahaʼi. Maʼia mo te kau Kilisitiano moʼoni ʼe feala ke natou punamaʼuli ʼi te fakavilivili ʼo te ʼu meʼa ʼae ka hoko. Kae ʼe gata pe anai ki te kau agakovi ʼae ka pulihi.

4. He koʼe ʼe fakatatau te ʼaho ʼo Sehova ki te mamahi fanau ʼa he fafine faitama?

⁴ “Ohage ko te ʼu mamahi fanau ʼa he fafine ʼe faitama.” (1 Tes. 5:3) ʼE mole iloʼi fakatomuʼa e he fafine faitama te temi ʼae ka kamata mamahi fanau ai. Kae ʼe ina iloʼi papau ʼe hoko mai anai. Pea ka hoko mai tona temi, ʼe fakapunamaʼuli, mo mamahi pea ʼe mole feala hona fakatataʼofi. ʼO toe feia pe, ʼe mole tou iloʼi te ʼaho mo te hola ʼae ka kamata ai te ʼaho ʼo Sehova. Kae ʼe tou tui papau ʼe hoko mai anai, pea ko te fakamauʼi ʼo te kau agakovi e te ʼAtua ʼe fakapunamaʼuli pea ʼe mole natou hao anai.

5. He koʼe ʼe fakatatau te mamahi lahi ki te kamata ʼo te ʼaho?

⁵ “Ohage ko te . . . kamata ʼo te ʼaho.” ʼI te tolu fakata ʼae ʼe fakaʼaogaʼi e Paulo, neʼe toe palalau ai ki te kau kaihaʼa ʼi te poʼuli. Kae ʼe hage leva ʼe ina fakata te ʼaho ʼo Sehova ki te mafoata. (1 Tes. 5:4) Ko te kau kaihaʼa ʼae ʼe ʼomai ʼi te poʼuli, ʼe feala ke mole kei natou tokagaʼi te fakalaka ʼo te temi. Pea ʼe maʼutoka ai natou moka kamata ʼaho. ʼO feia pe ʼi te mamahi lahi, ʼe ha anai ia natou ʼae ʼe hage ko he kau kaihaʼa, he ʼe natou nonofo ʼi te poʼuli ke natou fai te ʼu meʼa ʼae ʼe mole leleiʼia e te ʼAtua. Kae ʼe tou nonofo teuteu tatou, ʼo tou liʼaki te ʼu aga ʼae ʼe mole leleiʼia e Sehova pea mo tou haga fai “te ʼu agalelei fuli, mo te faitotonu pea mo te moʼoni.” (Efe.  5:8-12) ʼE fakaʼaogaʼi leva e Paulo he ʼu fakata ʼe lua ʼo ʼuhiga mo natou ʼae ka mole hao anai ʼi te ʼaho ʼo Sehova. Tou vakaʼi te ʼu fakata ʼaia.

6. Kotea te fakaʼuhiga ʼo te ui ʼae ko te hahaʼi tokolahi ʼe natou momoe? (1 Tesalonika 5:6, 7)

⁶ “Natou ʼae ʼe momoe.” (Lau ia 1 Tesalonika 5:6, 7.) Neʼe fakatatau e Paulo ia natou ʼae ʼe mole hao anai ʼi te ʼaho ʼo Sehova, ki ni hahaʼi ʼe momoe. Kotea tona tupuʼaga? Koteʼuhi ʼe mole natou tokagaʼi te ʼu aluʼaga ʼae ʼe hoko ʼi te malamanei peʼe ko te fakalaka ʼo te temi. Koia, ʼe mole feala ai hanatou mahino ki te maʼuhiga ʼo te ʼu aluʼaga ʼaia, pea mole natou fai ai he ʼu tonu. Tokolahi ia ʼaho nei ʼe natou tulemomoe ʼi te faʼahi fakalaumalie. (Loma 11:8) ʼE mole natou tui ki te ʼu fakamoʼoni ʼae ʼe tou maʼuli nei ʼi “te ʼu ʼaho fakamuli” pea kua vave hoko mai te mamahi lahi. Ka hoko he ʼu fetogi lahi ʼi te malamanei, ʼe ʼi ai pe ni ʼihi ʼe natou ʼaʼala ake ʼi hona aluʼaga fakata, ʼo natou fia iloʼi te logo ʼae ʼe tou fakamafola. Kae tokolahi ia natou ʼaia, ʼe mole nonofo ʼalaʼala kae natou toe tulemomoe. Maʼia mo natou ʼae ʼe tui ʼe hoko mai anai te ʼaho fakamau, kae maʼa natou ʼe kei mamaʼo atu ia. (2 Pet. 3:3, 4) Kae ʼe ha lelei mai, ʼaki te fakalaka ʼo te temi, ʼe maʼuhiga ke tou muliʼi te tokoni ʼa Paulo, ʼae ke tou nonofo ʼalaʼala.

7. He koʼe ʼe fakatatau ki ni hahaʼi konana ia natou ʼae ʼe fakaʼauha anai e te ʼAtua?

⁷ “Natou ʼae ʼe konana.” Neʼe fakatatau e Paulo natou ʼae ʼe fakaʼauha anai e te ʼAtua ki ni hahaʼi konana. Ko te hahaʼi ʼae ʼe konana ʼe mole natou malama ki te ʼu aluʼaga ʼae ʼe hoko pea ʼe natou toʼo he ʼu tonu ʼe mole lelei. ʼO toe feia pe, ʼe mole fia tokagaʼi e te kau agakovi te ʼu fakatokaga mai te ʼAtua. ʼE natou filifili he faʼahiga maʼuli ʼe taki ai natou ki te fakaʼauha. Kae ʼe fakalotomalohiʼi te kau Kilisitiano ke natou fakaʼaogaʼi ʼonatou fealagia fakakaukau, peʼe ke mole natou konana ʼi tona aluʼaga fakalaumalie. (1 Tes. 5:6) ʼE ui e te tagata sivi Tohi-Tapu, ko he tahi ʼe mole konahia, ʼe ina maʼu he ʼatamai malama lelei, ʼe totonu tana fakafuafua ia te ʼu meʼa pea ʼe ina fai he ʼu tonu ʼe lelei. He koʼe ʼe maʼuhiga ke fena te kau Kilisitiano? Koteʼuhi ʼe mole tonu ke natou kau ki te ʼu fihifihia fakapolitike peʼe fakasosiale ʼo te malamanei. ʼI te fakaovi mai ʼo te ʼaho ʼo Sehova ʼe toe ʼaʼasili anai totatou fakaneke ʼae ke tou kau ki te ʼu fihifihia ʼaia. Kae ʼe mole tonu ke tou tuʼania fau pe ʼe feafeaʼi anai tatatou aga. ʼE tokoni mai anai te laumalie ʼo te ʼAtua ke tou maʼu te tokalelei mo tou malohi, pea ke tou fai he ʼu tonu ʼe lelei.—Luka 12:11, 12.

8. Ia 1 Tesalonika 5:8, ko te ʼu kalitate fea ka tokoni mai ke tou nofo ʼalaʼala pea mo tou fakapotopoto? (Vakaʼi mo te pāki.)

⁸ “[Tou] kofuʼi te kofu ukamea . . . pea mo ʼai te puloga tau.” ʼE fakatatau tatou e Paulo ki he kau solia kua tui tonatou kofu tau pea ʼe nonofo tokaga. (Lau ia 1 Tesalonika 5:8.) ʼI te temi tau, ʼe nofo teuteu tuʼumaʼu pe he tagata solia ki te tau. ʼE toe feia pe mo tatou. ʼE tou nofo teuteu ki te ʼaho ʼo Sehova moka tou kofuʼi te kofu ukamea ʼo te tui mo te ʼofa, pea mo ʼai te puloga tau ʼo te ʼamanaki. ʼE tokoni lahi mai anai te ʼu kalitate ʼaia.

9. ʼE puipui feafeaʼi tatou e tatatou tui?

⁹ Ko te kofu ukamea ʼe ina puipui te mafu ʼo te tagata solia. ʼO toe feia pe, ʼe puipui e te tui mo te ʼofa totatou loto. ʼE tokoni mai anai ke tou haga tauhi ki te ʼAtua pea mo muliʼi ia Sesu. Ka tou maʼu te tui, ʼe tou falala ʼe fakapale anai tatou e Sehova ʼuhi ko tatatou kumi fakamalotoloto ia ia. (Hep. 11:6) ʼE uga tatou e te tui ke tou nofo agatonu  ki totatou Pule, ia Sesu logo la ʼotatou fihifihia. ʼE malohi anai tatatou tui moʼo tauʼi te ʼu faigataʼaʼia, moka tou tokagaʼi te ʼu faʼifaʼitaki ʼa he ʼu kaugana ʼa Sehova ʼi totatou temi neʼe nonofo agatonu logo la tonatou fakatagaʼi peʼe ko te ʼu fihifihia fakapaʼaga. Pea ʼe mole tou to anai ki te hele ʼo te fia maʼu koloa moka ʼe tou faʼifaʼitakiʼi natou ʼae neʼe natou fakafaigafua tonatou maʼuli ke natou fakamuʼamuʼa ai te ʼu gaue ʼo te Puleʼaga ʼo te ʼAtua. b

10. ʼE tokoni feafeaʼi mai te ʼofa ki te ʼAtua pea mo te hahaʼi ke tou faʼa kataki?

¹⁰ ʼE toe maʼuhiga te ʼofa ke tou nofo ʼalaʼala pea ke tou fakapotopoto. (Mat. 22:37-39) Kotea pe he fihifihia ʼe feala ke hoko ʼi tatatou faifakamafola, kae ʼe tokoni mai totatou ʼofa ki te ʼAtua ke hoko atu tatatou gaue. (2 Tim. 1:7, 8) ʼUhi ʼae ʼe tou ʼoʼofa ki te hahaʼi ʼae ʼe mole tauhi kia Sehova, ʼe tou haga faifakamafola pea mo faitelefoni peʼe tou faitohi. ʼE tou falala ʼe fetogi anai te hahaʼi ʼi he ʼaho pea mo natou kamata fai te meʼa ʼae ʼe totonu.—Esk. 18:27, 28

11. He koʼe ʼe toe maʼuhiga ke tou ʼoʼofa ki ʼotatou tehina mo tuagaʼane? (1 Tesalonika 5:11)

¹¹ ʼE tou toe ʼoʼofa ki ʼotatou tehina mo tuagaʼane. ʼE tou fakaha te ʼofa ʼaia moka tou “fefakalotomalohiʼaki pea mo fetokoniʼaki.” (Lau ia 1 Tesalonika 5:11.) ʼE tou fefakalotomalohiʼaki ohage pe ko he kau solia ʼe natou fetokoniʼaki ʼi te tau. ʼE moʼoni, lolotoga te tau, ʼe feala pe ki he tagata solia ke ina fai he meʼa ʼe lavea ai he tahi tagata solia ʼo tana foʼi kautau, kae neʼe mole loto ki ai. ʼO toe feia pe, ʼe mole tou fia fakamamahiʼi hotatou tehina peʼe tuagaʼane, peʼe tou liufaki te kovi ʼaki te kovi. (1 Tes. 5:13, 15) ʼE tou toe fakaha te ʼofa moka tou fakaʼapaʼapa ki te ʼu tehina ʼae ʼe natou takitaki te kokelekasio. (1 Tes. 5:12) ʼI te temi ʼae neʼe fai ai e Paulo tana ʼuluaki tohi ki te kau Tesalonika, neʼe heʼeki taʼu katoa te fakatuʼu ʼo te kokelekasio ʼaia. Neʼe lagi heʼeki iloʼi lelei e te ʼu tehina taupau te fakahoko ʼo ʼonatou maʼua, pea neʼe lagi natou faihala. Kae neʼe tonu pe ke fakaʼapaʼapaʼi natou. ʼI te ovi mai ʼo te mamahi lahi, ʼe lagi tonu ke lahi age anai tatatou fakalogo ki te takitaki ʼa te kau tagata ʼafea. Koteʼuhi ʼe lagi mole kei tou maʼu anai he ʼu fakatotonu mai  te Kolesi Pule peʼe ko te Petele ʼo totatou fenua. Koia, ʼe maʼuhiga ke tou ʼoʼofa pea mo fakaʼapaʼapa ki te ʼu tagata ʼafea ʼi te temi nei. Kotea pe he meʼa ka hoko, tou fakapotopoto, ʼo mole tou tokagaʼi ʼonatou vaivaiʼaga kae tou manatuʼi tuʼumaʼu ʼe takitaki e Sehova te ʼu tagata agatonu ʼaia ʼaki ia Kilisito.

12. ʼE puipui feafeaʼi e te ʼamanaki tatatou fakakaukau?

¹² Ko te puloga tau ʼe ina puipui te ʼulu ʼo te tagata solia. ʼO toe feia pe, ko te ʼamanaki ʼo te haofaki ʼe ina puipui tatatou fakakaukau. Kapau ʼe malohi tatatou tui, pea ʼe tou mahino ai ʼe vaʼiganoa ia meʼa fuli ʼi te malama ʼaeni. (Flp. 3 :8) ʼE tokoni mai tatatou ʼamanaki ke tou nofo tokalelei pea ke tou malolohi. Neʼe moʼoni te faʼahi ʼaia kia Wallace mo Laurinda, ʼae ʼe nā Petelite ʼi Afelika. Ia vahaʼa ʼe tolu, neʼe mate te faʼe ʼa Laurinda pea mo te tamai ʼa Wallace. ʼUhi ko te taʼi mahaki COVID-19, neʼe mole feala ke nā toe liliu ki ʼonā famili. Neʼe tohi e Wallace: “ ʼE tokoni mai te ʼamanaki ʼo te fakatuʼuake ke mole au manatuʼi pe neʼe nā feafeaʼi ʼi muʼa ʼo tonā mamate, kae ke au fakakaukauʼi pe ʼe nā feafeaʼi anai moka fakatuʼuake naua ʼi te malama foʼou. ʼE fakafimalieʼi au e te ʼamanaki ʼaia moka au lotomamahi peʼe moka au logoʼi tanā kua pupuli.”

13. Kotea ʼae ʼe feala ke tou fai ke tou maʼu te laumalie maʼoniʼoni?

¹³ “ ʼAua naʼa kotou taʼofi te gaue ʼo te laumalie.” (1 Tes. 5:19) ʼE ui e Paulo ʼe gaue te laumalie maʼoniʼoni ia tatou. Ka mole tou taʼofi tana gaue ʼaia, ʼe tou faʼafai mo fiafia ʼi te fai ʼo te meʼa ʼae ʼe totonu pea ʼe tou maʼu mo te malohi ke tou gaue ai maʼa Sehova. (Loma 12:11) Kotea ʼae ʼe feala ke tou fai ke tou maʼu te laumalie maʼoniʼoni? Tou kole ki te ʼAtua ke ina foaki mai, tou ako tana Folafola ʼae neʼe tohi ʼaki te takitaki ʼo te laumalie, pea tou lagolago ki tana kautahi ʼae ʼe takitaki e te laumalie maʼoniʼoni. Ka tou fai feia, ʼe tou maʼu ai anai “te fua ʼo te laumalie.”—Kal. 5:22, 23.

14. Ke tou maʼu tuʼumaʼu te laumalie ʼo te ʼAtua, kotea ʼae ʼe mole tonu ke tou fai? (Vakaʼi mo te pāki.)

¹⁴ Ka kua tou maʼu te laumalie maʼoniʼoni, tou tokakaga ke mole tou taʼofi tana gaue. ʼE foaki e te ʼAtua tona laumalie kia natou pe  ʼae ʼe maʼa ʼanatou manatu mo tanatou aga. ʼE mole hoko atu anai tana foaki mai tona laumalie mo kapau ʼe tou maʼu he ʼu manatu heʼe maʼa ʼo tou fakahoko ai he ʼu aga ʼe kovi. (1 Tes. 4:7, 8) Ke tou maʼu tuʼumaʼu pe tona laumalie, ʼe tonu foki ke mole tou “meʼa noaʼi te ʼu lea fakapolofeta.” (1 Tes. 5:20) ʼI te vaega ʼaeni, ko te ʼu lea fakapolofeta ʼe fakaʼuhiga ki te ʼu logo ʼae ʼe foaki mai e te ʼAtua ʼaki tona laumalie maʼoniʼoni. ʼE kau ki ai te ʼu lea fakapolofeta ʼo ʼuhiga mo te ʼaho ʼo Sehova pea mo te maʼuhiga ʼo te ʼu temi ʼae ʼe tou maʼuʼuli ai. ʼE tou tekeʼi te manatu ʼae ʼe kei mamaʼo atu ia Alamaketone pea ʼe mole hoko mai anai ʼi totatou temi. Kae ʼe tou taupau te manatu ʼae kua vave hoko mai pe, ʼo tou haga fai ʼi te ʼaho fuli te aga ʼae ʼe lelei pea mo ‘he ʼu gaue ʼe ha ai tatatou pipiki ki te ʼAtua.’—2 Pet. 3:11, 12.

15. Kotea ʼae ʼe tonu ke tou fai ke mole kakaʼi ai tatou e te ʼu logo ʼae ʼe hala pea mo ʼae ʼe haʼu mai te kau temonio? (1 Tesalonika 5:21)

¹⁵ Kua ovi mai pe te ui ʼa te ʼu fili ʼo te ʼAtua: “Tokalelei pea mo fimalie!” (1 Tes. 5:3) Ko te logo ʼaia, ʼae ʼe haʼu mai te ʼu temonio, ʼe mafola anai ʼi te kele katoa, ʼo kakaʼi ai te hahaʼi tokolahi. (Fkha. 16:13, 14). Kae ʼe feafeaʼi kia tatou? ʼE mole tou hoko tui anai ki ai mo kapau ʼe tou “vakavakaʼi fakalelei ia meʼa fuli.” (Lau ia 1 Tesalonika 5:21.) ʼI te Fakakeleka, ko te kupu “vakavakaʼi fakalelei” neʼe fakaʼaogaʼi moʼo palalau ki te faʼahiga vakavakaʼi ʼo te aulo peʼe ko te siliva ke iloʼi pe ʼe moʼoni. Koia, ʼe tonu ke tou vakavakaʼi fakalelei te ʼu meʼa ʼae ʼe tou logo ki ai peʼe ko ʼae ʼe tou lau, ke tou iloʼi ai pe ʼe moʼoni. Neʼe maʼuhiga ke fai e te kau Tesalonika te faʼahi ʼaia. Pea ʼe toe maʼuhiga age kia tatou ʼi te ovi mai ʼo te mamahi lahi. ʼAua naʼa tou hoko tui ki te ʼu palalau ʼa ʼihi, kae tou fakaʼaogaʼi ʼotatou fealagia fakakaukau moʼo fakatatau te ʼu meʼa ʼe tou lau peʼe ko ʼae ʼe tou logo ki ai mo te meʼa ʼe akoʼi mai ʼi te Tohi-Tapu pea mo te kautahi ʼa Sehova. ʼE mole kakaʼi ai anai tatou e te ʼu logo ʼae ʼe haʼu mai te kau temonio.—Taag. 14:15; 1 Tim. 4:1.

16. Kotea tatatou ʼamanaki, pea kotea ʼae ʼe tou fakatotonu ke tou fai?

¹⁶ Kua tou iloʼi ʼe hao anai te hahaʼi ʼa te ʼAtua ʼi te mamahi lahi. Kae ʼe mole tou iloʼi pe kotea ka hoko kia tatou takitokotahi ʼi te ka haʼu. (Sakp. 4:14) Ko te faʼahi ʼe tou tui papau ki ai, pe ʼe tou fakalaka maʼuli ʼi te mamahi lahi peʼe tou mamate ʼi muʼa ʼo tona hoko mai, ʼe foaki mai anai te maʼuli heʼe gata mo kapau ʼe tou nonofo agatonu. ʼE fakatahi anai te kau fakanofo mo Kilisito ʼi selo. ʼE maʼuʼuli anai te tahi ʼu ovi ʼi te palatiso ʼi te kele. ʼOfa pe ke tou sioʼi fakamamaʼu tatatou ʼamanaki taulekaleka pea ke tou nofo teuteu ki te ʼaho ʼo Sehova!