Ke leleiʼia tatou e Sehova, ʼe tonu ke tou tui kia te ia. Kae ʼe ui ʼi te Tohi-Tapu “ ʼe mole tui te hahaʼi fuli.” (2 Tes. 3:2) Neʼe talanoa ia te apositolo ko Paulo ki te hahaʼi ʼae neʼe natou fakatagaʼi ia ia, ʼae neʼe “agakovi ʼaupito.” Neʼe loto e Paulo ke haofaki ia ia mai ia natou. Kae ko te meʼa ʼae neʼe ina ui ʼo ʼuhiga mo te tui neʼe toe fakaʼuhiga ki ʼihi atu. ʼE mole fia tokagaʼi e ʼihi ia te ʼu fakamoʼoni ʼae ʼe ʼi ai he tahi neʼe ina fakatupu ia meʼa fuli, pea ʼe ko te ʼAtua. (Loma 1:20) Pea ʼe ui e ʼihi atu ʼe natou tui ʼe ʼi ai he malohi. Kae ʼe mole feʼauga te tui ʼaia ke leleiʼia ai kita e Sehova.

ʼE tonu ke tou tui papau ʼe maʼuli moʼoni ia Sehova pea ʼe ina “fakapale” ia natou ʼae ʼe tui malohi kia te ia. (Hep. 11:6) ʼE kau te tui ʼi te ʼu kalitate ʼo te fua ʼo te laumalie maʼoniʼoni. Pea ke tou maʼu te laumalie maʼoniʼoni, ʼe tonu ke tou kole kia Sehova ke ina foaki mai. (Luka 11:​9, 10, 13) ʼE toe maʼuhiga foki ke tou lau te Tohi-Tapu, ʼae neʼe tohi ʼaki te takitaki ʼo te laumalie maʼoniʼoni. Pea ʼe tonu leva ke tou metitasio ki te ʼu meʼa ʼae neʼe tou lau pea mo faiga ke tou maʼuliʼi. Pea ka tou fai te ʼu faʼahi ʼaia, ʼe tou tuku ai te laumalie ʼo Sehova ke ina fetogi totatou maʼuli, ʼo tou fakaha ai ʼe tou maʼu te tui ʼae ʼe leleiʼia e Sehova.