1. Kotea ʼae ʼe tokoni ki te ʼu kaugana ʼa Sehova ke hoko atu tanatou tauhi kia te ia logo la te ʼu faigataʼaʼia?

 ʼE UI ʼi te Tohi-Tapu ʼe tou maʼuʼuli nei ʼi “he ʼu temi makehe pea mo faigataʼa.” (2 Tim. 3:1) ʼE tau te ʼu kaugana ʼa Sehova mo te ʼu faigataʼaʼia ʼae ʼe tau mo te hahaʼi fuli ʼi te malama ʼaeni. Kae mole gata ai, he ʼe toe fakatagaʼi natou ʼuhi ko tanatou tauhi ʼae kia Sehova. Kotea ka tokoni mai ke tou hoko atu tatatou tauhi logo la te ʼu faigataʼaʼia? Ko he faʼahi ʼe lava tokoni mai ko tatatou iloʼi ʼae ko Sehova ko “te ʼAtua ʼe maʼuli.”—Sel. 10:10; 2 Tim. 1:12.

2. Kotea ʼae ʼe tou iloʼi ʼo ʼuhiga mo Sehova, ʼe tokoni mai ai ke tou tauʼi ʼotatou faigataʼaʼia?

² ʼE iloʼi e Sehova te ʼu faigataʼaʼia fuli ʼae ʼe tou felaveʼi mo ia pea ʼe fia tokoni tuʼumaʼu mai. (2 Klk. 16:9; Pes. 23:4) Kapau ʼe tou manatuʼi ko ia ko te ʼAtua ʼe maʼuli, ʼe tou lava tauʼi anai ʼotatou faigataʼaʼia. Tou vakaʼi pe neʼe hoko feafeaʼi te faʼahi ʼaia ki te Hau ko Tavite.

3. Kotea te fakaʼuhiga ʼo te ui ʼae e Tavite “ ʼe maʼuli ia Sehova”?

³ Neʼe iloʼi e Tavite ia Sehova pea neʼe falala kia te ia. ʼI te temi ʼae neʼe kumi ai e te Hau ko Saulo pea mo ʼihi atu ke natou matehi ia ia, neʼe faikole kia Sehova ke tokoni age. (Pes. 18:6) Neʼe tali e te ʼAtua ki tana faikole pea neʼe ina haofaki ia ia. Pea neʼe ui ai leva e Tavite: “ ʼE maʼuli ia Sehova!” (Pes. 18:46) Kotea te fakaʼuhiga ʼo tana ʼu palalau ʼaia? ʼO mulimuli ki te fakamahino ʼa te tagata sivi Tohi-Tapu, neʼe fakaha lelei ai e Tavite ko Sehova ʼe ko te ʼAtua moʼoni pea ʼe tokoni tuʼumaʼu pe ki ʼana kaugana. ʼEi, ʼuhi ko te ʼu aluʼaga ʼae neʼe hoko kia Tavite, neʼe ina iloʼi ai ko tona ʼAtua ʼe maʼuli. Pea ʼi tana tui papau ki te faʼahi ʼaia neʼe ina  maʼu ai te malohi ke hoko atu tana tauhi pea mo fakavikiviki kia Sehova.—Pes. 18:​28, 29, 49.

4. Kotea te ʼu lelei ʼe tou maʼu moka tou tui ko Sehova ʼe ko te ʼAtua ʼe maʼuli?

⁴ Ka tou tui papau ko Sehova ʼe ko te ʼAtua ʼe maʼuli, ʼe tou tauhi ai kia te ia ʼaki he faʼafai. ʼE tou maʼu ai te malohi ʼae ke tou ʼutakiʼi ʼotatou faigataʼaʼia pea mo uga ai tatou ke tou haga faʼa gaue ʼi tatatou tauhi ʼae ki te ia. ʼE toe malohi ai mo tatatou loto ʼae ke tou nonofo ovi kia Sehova.

ʼE FOAKI ATU ANAI TE MALOHI E TE ʼATUA MAʼULI

5. Kotea ʼae ʼe feala ke tou tui papau ki ai moka tou tau mo he ʼu faigataʼaʼia? (Filipe 4:13)

⁵ Kapau ʼe tou manatuʼi ko Sehova ʼe maʼuli pea ʼe fia tokoni tuʼumaʼu mai kia tatou, ʼe tou lava katakiʼi ai he faigataʼaʼia, pe ʼe lahi peʼe veliveli. ʼE mole he fihifihia ʼe faigataʼa fau ki totatou ʼAtua. Ko ia te Mafimafi, pea ʼe feala ke ina foaki mai te malohi ke tou faʼa kataki. (Lau ia Filipe 4:13.) Koia, ʼe feala ai ke tou tauʼi ʼotatou faigataʼaʼia ʼaki he loto falala. Ka tou sisio ki te tokoni mai ʼa Sehova ʼi te ʼu faigataʼaʼia ʼae ʼe liliki, ʼe tou toe tui papau ai ʼe tokoni mai pe anai ʼi te ʼu faigataʼaʼia ʼae ʼe lalahi age.

6. Kotea ʼae neʼe hoko kia Tavite ʼi tona temi tupulaga neʼe toe lahi age ai tana falala kia Sehova?

⁶ Tou vakaʼi aluʼaga ʼe lua neʼe hoko kia Tavite pea neʼe toe lahi age ai tana falala ʼae kia Sehova. ʼI tana kei tupulaga, neʼe tauhi manu. Ko te uluso mo te laione neʼe nā tahi ʼave te kiʼi ovi ʼi te faga manu ʼo tana tamai. Neʼe lototoʼa ia Tavite ʼo ina tuli te ʼu manu ʼaia ʼe lua pea neʼe ina haofaki mai ai te ʼu kiʼi ovi. Kae neʼe mole manatu ia Tavite neʼe ina fai pe ʼaki tona malohi ʼo ia totonu. Neʼe ina iloʼi lelei pe neʼe ko Sehova ʼae neʼe ina foaki age te malohi. (1 Sam. 17:​34-37) Neʼe mole galo kia Tavite te meʼa ʼaia neʼe hoko kia ia. ʼI tana metitasio ki ai, neʼe falala ai ʼe toe foaki age pe anai e te ʼAtua maʼuli te malohi ki muli age.

7. Ko ai ʼae neʼe manatuʼi tafito e Tavite, pea he koʼe neʼe tokoni ai kia ia ke ina tauʼi ia Koliate?

⁷ Ki muli age, ʼi te kei lagi tupulaga ʼa Tavite, neʼe alu ki te nofoʼaga tau ʼa te kau Iselaele. Neʼe sio ai neʼe matataku ʼosi te kau solia ʼuhi ko te toe tagata lahi Filisitini neʼe higoa ko Koliate, neʼe “laga tau ki te kau solia ʼo Iselaele.” (1 Sam. 17:​10, 11) Neʼe matataku te kau solia Iselaele he neʼe natou sioʼi pe te lahi ʼo te tagata ʼaia pea mo natou tokagaʼi tafito ʼana palalau. (1 Sam. 17:​24, 25) Kae neʼe mole feia te sio ʼa Tavite. Kia ia, ko te vaʼi ʼaia e Koliate te foʼi tau ʼo Iselaele, neʼe ko hana laukoviʼi ki “te kautau ʼa te ʼAtua maʼuli.” (1 Sam. 17:26) Neʼe manatuʼi tafito pe e Tavite ia Sehova. Neʼe falala ko te ʼAtua ʼae neʼe tokoni kia ia ʼi tana tauhi manu, ʼe toe tokoni pe anai kia ia ʼi te fai aga ʼaeni. ʼI tana tui papau ki te faʼahi ʼaia, neʼe alu ai ʼo tauʼi ia Koliate pea neʼe malo ai.—1 Sam. 17:​45-51.

8. Kotea ʼae ʼe ina fakamalohiʼi tatatou tui papau ʼae ʼe tokoni mai anai ia Sehova ke tou tauʼi ʼotatou faigataʼaʼia? (Vakaʼi mo te pāki.)

⁸ ʼO toe feia pe, kapau ʼe tou manatuʼi ʼe fia tokoni mai te ʼAtua maʼuli kia tatou, ʼe tou toe lava tauʼi anai ʼotatou faigataʼaʼia pea mo nonofo agatonu. (Pes. 118:6) ʼE feala ke tou falala ki te faʼahi ʼaia moka tou fakakaukauʼi pe kotea ʼae neʼe fai e Sehova ʼi te temi muʼa. Lau he ʼu fakamatala ʼi te Tohi-Tapu ʼe fakamanatuʼi atu pe neʼe haofaki feafeaʼi e Sehova tana hahaʼi. (Esa. 37:​17, 33-37) Pea toe lau peʼe sioʼi ʼi totatou tuʼasila ʼi te Neti jw.org he ʼu fakamatala ʼe ha ai pe tokoni feafeaʼi ia Sehova ki ʼotatou tehina mo tuagaʼane ia ʼaho nei. ʼE toe feala foki ke ke manatuʼi te ʼu meʼa ʼae neʼe fai e Sehova moʼo tokoni atu ke ke tauʼi ʼou faigataʼaʼia. Pea tatau aipe pe hage kia koe neʼe mole faigataʼa leva ke feafeaʼi, neʼe mole hage ko he tauʼi ʼo he uluso  peʼe ko he laione, kae ke ke tui papau neʼe nofo Sehova mo koe ʼi te ʼu lakaga ʼaia. ʼEi, neʼe ina taki mai koe ke ke liliu ko hona kaumeʼa. (Soa. 6:44) ʼI te temi ʼaeni, ʼe kei ke nofo ʼi te moʼoni ʼuhi pe he ʼe tokoni atu ia Sehova. Kole age kia te ia ke ina fakamanatuʼi atu te ʼu temi ʼae neʼe ina tali ai ki ʼau faikole, peʼe ko tana tokoni atu ʼi tona temi totonu, peʼe ko tana tokaga ʼae kia koe ʼi tau tauʼi he faigataʼaʼia. Ko tau fakakaukauʼi te ʼu meʼa ʼaia neʼe hoko kia koe, ʼe toe malohi ai anai tau tui papau ʼae haga tokoni atu pe anai ia Sehova.

9. Kotea ʼae ʼe tonu ke tou manatuʼi moka tou tau mo he ʼu faigataʼaʼia? (Taʼaga Lea 27:11)

⁹ Ka tou manatuʼi tuʼumaʼu ko Sehova ʼe maʼuli moʼoni, ʼe tokoni mai anai ke tou maʼu he manatu fakapotopoto ʼo ʼuhiga mo ʼotatou faigataʼaʼia. ʼO feafeaʼi? Ka tou tau mo he faigataʼaʼia, ʼe tonu ke tou tokagaʼi tafito te meʼa ʼae ʼe maʼuhiga ʼaupito age. ʼE lau e te Tevolo ʼe tou liʼaki anai ia Sehova moka tou tau mo he ʼu fihifihia. Koia, ʼe maʼuhiga ai kia Sehova te meʼa ʼae ʼe tou fai. (Sopo 1:​10, 11; lau ia Taʼaga Lea 27:11.) Ka tou nonofo agatonu ʼi te ʼu faigataʼaʼia, ʼe tou fakaha ai ʼe tou ʼoʼofa kia Sehova pea tou fakamoʼoni ai ko te Tevolo ʼe gutuloi. ʼE fakafeagai koa te puleʼaga ki tatatou tauhi, peʼe ke tau mo he ʼu fihifihia fakapaʼaga, peʼe mole tali leleiʼi e te hahaʼi tau faifakamafola, peʼe ko he tahi atu ʼu faigataʼaʼia? Kapau ko ia, manatuʼi ko te aluʼaga ʼaia ʼe ko he faigamalie ke ke fakafiafiaʼi ai te loto ʼo Sehova. Pea ke ke toe manatuʼi ʼe mole ina tuku anai tou ʼahiʼahi ke fakalaka ʼi te meʼa ʼae ʼe ke lavaʼi. (1 Ko. 10:13) ʼE ina foaki atu anai te malohi ke ke lava katakiʼi.

ʼE FAKAPALE ANAI KOE E TE ʼATUA MAʼULI

10. Kotea ʼae ka fai e te ʼAtua maʼuli kia natou ʼae ʼe tauhi kia te ia?

¹⁰ Ko Sehova ʼe ina fakapale ia natou ʼae ʼe tauhi kia te ia. (Hep. 11:6) ʼE ina foaki mai te tokalelei mo te fiafia ʼi te temi nei pea mo te maʼuli heʼe gata ʼi te ka haʼu. ʼE feala ke tou falala kia Sehova he ʼe tou tui ʼe ina loto ke ina fakapale ia tatou pea ʼe ina toe maʼu mo te malohi moʼona fakahoko. Pea ko tatatou tui ki te faʼahi ʼaia, ʼe ina uga ai tatou ke tou nonofo  maʼumaʼua ʼi tatatou tauhi kia te ia, ohage ko tona fai e te ʼu kaugana agatonu ʼa te ʼAtua ʼi te temi muʼa. Ko te faʼahi ʼaia neʼe fai e Timoteo ʼi te temi ʼo te ʼu ʼuluaki Kilisitiano.—Hep. 6:​10-12.

11. He koʼe neʼe fia gaue kinakina ia Timoteo ʼi te kokelekasio? (1 Timoteo 4:10)

¹¹ Lau ia 1 Timoteo 4:10. Neʼe falala ia Timoteo ki te ʼAtua maʼuli. Koia neʼe fia gaue kinakina ai maʼa Sehova pea mo ʼihi atu. Kotea ʼae neʼe ina fai? Ko te apositolo ko Paulo neʼe ina fakalotomalohiʼi ia ia ke hikihiki tana faʼahiga faiako ʼi te faifakamafola pea ʼi te kokelekasio. Neʼe toe tonu foki ke tuku e Timoteo he faʼifaʼitaki lelei ki te ʼu tehina mo tuagaʼane, tupulaga mo matutuʼa. Pea neʼe foaki age kia ia he ʼu gaue faigataʼa, ohage la ke tokoniʼi fakahagatonu kae ʼaki te ʼofa ia natou ʼae neʼe ʼaoga ki ai. (1 Tim. 4:​11-16; 2 Tim. 4:​1-5) Logo la ʼi ʼihi temi neʼe mole ha te ʼu gaue ʼae neʼe ina fai peʼe mole fakamalo age ʼihi, kae neʼe feala ke tui papau ʼe fakapale anai e Sehova.—Loma 2:​6, 7.

12. He koʼe ʼe haga gaue kinakina te ʼu tagata ʼafea ʼi te kokelekasio? (Vakaʼi mo te pāki.)

¹² ʼO toe feia ia ʼaho nei, ʼe feala ke tui papau te kau tagata ʼafea ʼe sio ia Sehova ki ʼanatou gaue lelei pea ʼe maʼuhiga kia te ia. ʼE natou tokakaga ʼo tauhi te ʼu ovi, mo faiako, pea mo faifakamafola. Pea tokolahi ʼe natou kau ki te ʼu fakatuʼutuʼu gaue laga fale pea mo natou tokoni ki te ʼu tuʼutamaki fakanatula. Ko ʼihi atu ʼe natou kau ʼi te ʼu Kutuga ʼe Natou ʼAʼahi Te Kau Mahahaki peʼe ki te Komite Fakafelogoi Mo Te Lopitali. Ko te ʼu tagata ʼafea ʼae ʼe natou kau ki te ʼu gaue ʼaia ʼe natou mahino ko te kokelekasio ʼe ʼa Sehova kae mole ʼa te tagata. ʼI tanatou manatu feia, ʼe natou fakahoko fakamalotoloto ai ʼanatou gaue pea natou falala katoa ʼe fakapale anai natou e te ʼAtua ʼuhi ko ʼanatou gaue ʼaia.—Kol. 3:​23, 24.

13. Kotea te manatu ʼa Sehova ʼo ʼuhiga mo te ʼu meʼa ʼae ʼe tou fai maʼa ia?

¹³ ʼE mole feala ke tou tagata ʼafea fuli. Kae ʼe tou maʼu fuli he meʼa ke tou foaki kia Sehova.  ʼE fiafia ʼaupito totatou ʼAtua moka tou foaki kia te ia te meʼa ʼae ʼe lelei tukupau. ʼE ina tokagaʼi ʼotatou meʼa ʼofa ki te gaue fakamalamanei, tatau aipe pe ʼe mole lahi. ʼE fiafia moka sio mai ʼe tou tauʼi totatou umiuminoa moka tou hiki totatou nima moʼo fai hatatou tali ʼi te ʼu fono, pea moka tou fakamolemole ki he tahi neʼe ina fai he palalau peʼe ko he aga neʼe mole tou leleiʼia. Tatau aipe pe ʼe ke manatu neʼe mole lahi te meʼa ʼae neʼe ke fai maʼa Sehova, kae ke ke tui papau ʼe maʼuhiga ia kia te ia. ʼE ʼofa ia koe pea ʼe ina fakapale anai koe ʼuhi ko te meʼa ʼae neʼe ke fai.—Luka 21:​1-4.

NOFO OVI KI TE ʼATUA MAʼULI

14. Kapau ʼe tou fakaovi lelei kia Sehova, ʼe tokoni feafeaʼi mai ke tou nonofo agatonu? (Vakaʼi mo te pāki.)

¹⁴ Kapau kia tatou ʼe maʼuli moʼoni ia Sehova, ʼe faigafua anai hatatou nonofo agatonu kia te ia. Ko te faʼahi ʼaia neʼe hoko kia Sosefo. Neʼe fakafisi malohi ke ina fai ni felaveʼi fakasino heʼe ʼaoga. Kia ia neʼe maʼuli moʼoni ia te ʼAtua pea neʼe mole ina fia fai he meʼa ke lotomamahi ai. (Sen. 39:9) Ke feala hatatou tui papau mo tatou ʼe maʼuli moʼoni ia Sehova, ʼe tonu ke tou toʼo he temi ke tou faikole pea mo ako tana Folafola. ʼE toe malohi age ai ʼatatou felogoi mo ia. Pea, ohage ko Sosefo, ka tou fakaovi lelei kia Sehova ʼe mole tou fia fai anai he meʼa ʼe lotomamahi ai.—Sakp. 4:8.

15. Kotea te ako ʼe tou taʼofi mai te meʼa ʼae neʼe hoko ki te kau Iselaele ʼi tanatou nonofo ʼi te toafa? (Hepeleo 3:12)

¹⁵ Ko natou ʼae ʼe natou galoʼi ko Sehova ʼe ko te ʼAtua ʼe maʼuli, ʼe faigafua hanatou fakamamaʼo mai ia te ia. Tou vakaʼi te meʼa ʼae neʼe hoko ki te kau Iselaele ʼi tanatou nonofo ʼi te toafa. Neʼe natou iloʼi ʼe maʼuli ia Sehova, kae neʼe mole kei natou tui papau ʼe tokaga kia natou. Neʼe natou feʼekeʼaki pe la: “ ʼE nofo koa ia Sehova ʼi te lotolotoiga ʼo tatou peʼe kailoa?” (Eke. 17:​2, 7) Neʼe natou agatuʼu leva ki te ʼAtua. ʼE mahino ia, ʼe mole tou fia faʼifaʼitakiʼi tanatou aga.—Lau ia Hepeleo 3:12.

16. Kotea ʼae ʼe feala ke ina fakavaivaiʼi tatatou tui?

¹⁶ ʼE mole faigafua hatatou nonofo ovi kia  Sehova ʼuhi ko te hahaʼi ʼi te malamanei. Tokolahi ʼe mole natou tui ʼe maʼuli moʼoni ia te ʼAtua. ʼI ʼihi temi, ko natou ʼae ʼe mole fia fakalogo ki te ʼu fakatotonu ʼa te ʼAtua, ʼe hage ʼe maʼuʼuli lelei pe natou. Ka tou sisio ki te faʼahi ʼaia, ʼe feala ke lotovaivai ai tatatou tui. ʼE moʼoni, ʼe mole tou ui anai ʼe mole maʼuli moʼoni te ʼAtua, kae ʼe feala ke tou kamata feuiʼaki pe ʼe tokaga moʼoni koa kia tatou. Neʼe manatu feia te tagata ʼae neʼe ina tohi te Pesalemo 73. Neʼe ina tokagaʼi ko natou ʼae neʼe mole natou mulimuli ki te ʼu lao ʼa te ʼAtua neʼe maʼuʼuli fiafia pe natou. Koia neʼe feʼekeʼaki ai pe ʼi ai koa he ʼuhiga ʼo tana tauhi kia Sehova.—Pes. 73:​11-13.

17. Kotea ʼae ka tokoni mai ke tou nonofo ovi kia Sehova?

¹⁷ Kotea ʼae neʼe tokoni ki te tagata ʼae neʼe ina tohi te Pesalemo 73 ke fetogi tana manatu? Neʼe metitasio ki te meʼa ʼae ʼe hoko kia natou ʼae ʼe natou galoʼi ia Sehova. (Pes. 73:​18, 19, 27) Neʼe ina toe manatuʼi te ʼu lelei ʼae ʼe ina maʼu ʼi tana tauhi ki te ʼAtua. (Pes. 73:24) ʼE feala mo tatou ke tou fakakaukauʼi te ʼu tapuakina ʼae kua foaki mai e Sehova pea ʼe feafeaʼi totatou maʼuli mo ka na pau la neʼe mole tou tauhi kia Sehova. Ka tou fai te faʼahi ʼaia, ʼe uga anai tatou ke tou nonofo agatonu kia Sehova pea ʼe tou ui anai ohage ko te tagata faipesalemo: “ ʼE ko he meʼa lelei kia au te fakaovi ki te ʼAtua.”—Pes. 73:28.

18. He koʼe ʼe mole tonu ke tou matataku ki tatatou ka haʼu?

¹⁸ Tatau aipe te faigataʼaʼia ʼae ka tou tau anai mo ia ʼi te ʼu ʼaho fakamuli ʼaeni, ʼe feala anai hatatou tauʼi koteʼuhi ʼe tou “kaugana ki te ʼAtua ʼae ʼe maʼuli mo moʼoni.” (1 Tes. 1:9) ʼEi, ko totatou ʼAtua ʼe maʼuli moʼoni, ʼe tokaga kia tatou pea mo tokoni tuʼumaʼu mai. Ko te meʼa ʼaia neʼe ina fai ki ʼana kaugana ʼi te temi muʼa, pea ʼe toe fai feia anai mo tatou ʼi te temi nei. Kua vave hoko mai te mamahi lahi ʼae ʼe mole hona tatau. Kae ʼe mole tou tokotahi anai ʼi te temi ʼaia. (Esa. 41:10) Koia ʼofa pe ke tou “falala . . . pea mo ui: ‘Ko Sehova ʼe ko toku haofakiʼaga. ʼE mole au mataku anai.’ ”—Hep. 13:​5, 6.