Te ʼu Fehuʼi ʼa Te Kau Lautohi
Ko te ʼu palalau ʼa Paulo ʼae ʼe tuʼu ia 1 Kolonito 15:29, ko tona fakaʼuhiga koa neʼe papitema ʼihi ʼo te ʼu ʼuluaki Kilisitiano maʼa te kau mate?
Kailoa ia. ʼE mole tuʼu ʼi te Tohi-Tapu peʼe ʼi te ʼu tohi fakahisitolia neʼe papitema te kau Kilisitiano maʼa te kau mate.
Neʼe tupu te manatu feia ʼa ʼihi ʼuhi ko te faʼahiga fakaliliu ʼo te vaega ʼaia ʼi ʼihi Tohi-Tapu. Neʼe natou ui ai neʼe papitema te kau Kilisitiano ʼi te temi ʼo Paulo maʼa te kau mate. Ohage la, ʼe fakaliliu fenei ʼi ʼihi Tohi-Tapu: “Kapau ʼe mole ʼi ai he fakatuʼuake, he koʼe ʼe papitema ia natou ʼaia maʼa te kau mate?”
Kae ʼe feala ke ke tokagaʼi te meʼa ʼae neʼe ui e te ʼu tagata sivi Tohi-Tapu ʼe lua. Neʼe ui e te Polofesea ʼo te teolosia ko Gregory Lockwood, ʼe mole he fakamoʼoni ʼi te Tohi-Tapu peʼe ʼi te hisitolia neʼe papitema he tahi maʼa he tahi kua mate. Neʼe toe tatau te manatu ʼa te Polofesea ko Gordon Fee. Neʼe ina tohi neʼe mole talanoa te Tohi-Tapu peʼe ko te hisitolia ki te faʼahiga papitema ʼaia. Neʼe ina ui neʼe mole palalau te Tauhi Foʼou ki ai, pea ʼe mole he fakamoʼoni neʼe fai te faʼahiga papitema ʼaia e te ʼu lotu ʼae neʼe fakatuʼu hili pe te mate ʼa te kau apositolo.
ʼE ui ʼi te Tohi-Tapu, neʼe tonu ki te ʼu tisipulo ʼa Sesu ke natou “fai ni tisipulo ʼi te hahaʼi ʼo te ʼu fenua fuli pe, ʼo [natou] papitemaʼi natou . . . ʼo akoʼi natou ke natou mulimuli ki te ʼu meʼa fuli” ʼae neʼe ina fakatotonu age. (Mat. 28:19, 20) Neʼe tonu muʼa ke iloʼi e he tahi pe ʼe ko ai ia Sehova pea mo Sesu, mo tui pea mo fakalogo kia naua, pea hoki feala leva ke papitema. Neʼe mole feala ke fai e he tahi kua mate te faʼahi ʼaia. Pea neʼe mole feala ke fai e he Kilisitiano kei maʼuli te faʼahi ʼaia maʼa he tahi kua mate.—Ekl. 9:5, 10; Soa. 4:1; 1 Ko. 1:14-16.
Pea kotea la te fakaʼuhiga ʼo te ʼu palalau ʼaia ʼa Paulo?
Neʼe ui e ʼihi Kilisitiano ʼo Kolonito ʼe mole he fakatuʼuake. (1 Ko. 15:12) Neʼe ui age e Paulo neʼe natou faihala. Neʼe ina fakamahino age ‘ ʼi te ʼaho fuli neʼe feala pe ke mate.’ Kae neʼe ina fakaha age, kapau neʼe ina tali ke tuʼutamakiʼia tona maʼuli he neʼe tui papau ia, ka mate ʼe fakatuʼuake anai ke maʼuli ʼi selo, ohage pe ko Sesu.—1 Ko. 15:30-32, 42-44.
Neʼe tonu ke mahino te kau Kolonito ki te ʼuhiga ʼo tanatou fakanofo ʼaki te laumalie maʼoniʼoni. Neʼe tonu ke natou tauʼi he ʼu ʼahiʼahi ʼi te ʼaho fuli, mo mamate agatonu ke feala ai hanatou fakatuʼuake ki selo. Ko natou ʼaia “neʼe papitema ia Kilisito Sesu [pea] neʼe toe papitemaʼi foki mo [natou] ʼi tona mate.” (Loma 6:3) Ko tona fakaʼuhiga ʼae ʼe tonu ke natou maʼuli fakasakilifisio pea mo mamate, ke feala hanatou fakatuʼuake ki selo.
Hili taʼu ʼe lua ʼi tana kua ʼosi papitema, neʼe ui fenei e Sesu ki ʼana apositolo ʼe toku lua: “Ko te papitema ʼae ʼe au lolotoga papitema ai, ʼe kolua papitema ai anai.” (Mko. 10:38, 39) ʼI te vaega ʼaia, neʼe mole palalau ia Sesu ki tana papitema ʼi te vai, kae ki tana papitema ʼi te mate. Ko tona fakaʼuhiga, ʼe nofo agatonu anai ki te ʼAtua ʼo kaku ki tona mate. Neʼe tohi e Paulo ko te kau Kilisitiano fakanofo ʼe natou “mamahi fakatahi mo [Kilisito], pea ʼe toe fakakololiaʼi anai foki [natou] fakatahi mo ia.” (Loma 8:16, 17; 2 Ko. 4:17) Koia, ʼe tonu foki mo natou ke natou mamate ke fakatuʼuake natou ki selo.
Koia, koʼeni he fakaliliu totonu ʼo te ʼu palalau ʼa Paulo: “Kapau la ʼe mole koia, kotea anai ka hoko kia natou ʼae ʼe papitema ke natou mamate ai? Kapau la ʼe mole tonu ke fakatuʼuake te kau mate, pea kotea te ʼuhiga ʼo tanatou papitema ke natou mamate ai?”