ALATIKE AKO 50
KATIKO 135 “Ke Ke Fakapotopoto, Siʼoku Foha”
ʼU Matuʼā, Kotou Fakamalohiʼi Te Tui ʼo ʼAkotou Fanau
‘Vakavakaʼi e koutou totonu ia te finegalo ʼo te ʼAtua, ʼae ʼe lelei, mo tuha pea mo haohaoa.’—LOMA 12:2.
TE MANATU TAFITO
ʼE tou vakaʼi anai ni manatu ʼe tokoni ki te ʼu matuʼā ke natou maʼu he ʼu felogoi lelei mo ʼanatou fanau, pea mo fakamalohiʼi tanatou tui ʼae ki te ʼAtua mo te Tohi-Tapu.
1-2. Kotea ʼe tonu ke fai e te ʼu matuʼā moka faifehuʼi age ʼanatou fanau ki tatatou tauhi?
TOKOLAHI ʼe natou manatu tahi, ko te akoʼi fanau ʼe mole ko he kihiʼi gaue. Kapau ʼe ʼi ai hakolua fanau, ʼe fakamalo lahi atu ki te ʼu faiga ʼae ʼe kolua fai moʼo tokoni ki ai ke ina maʼu he tui ʼe malohi. (Tet. 6:6, 7) Kae ka lahilahi ake, ʼe feala ke ina fai he ʼu fehuʼi ki tatatou tauhi, pea mo te ʼu lekula Fakatohi-tapu ʼo ʼuhiga mo te aga ʼae ʼe tonu ke fai.
2 ʼI te kamata, ʼe feala ke kolua tuʼania ki te ʼu fehuʼi ʼae ʼe fai atu e takolua fanau, ʼo kolua manatu ai kua vaivai tana tui. Kae kapau ʼe kolua fia fakamalohiʼi tana tui, ʼe maʼuhiga ke fai e te fanau he ʼu fehuʼi. (1 Ko. 13:11) Koia, ʼaua naʼa kolua matataku ki te faʼahi ʼaia. Kapau ʼe fai e takolua fanau he ʼu fehuʼi ki tatatou tauhi, pea ʼe ko he faigamalie ʼaia ke kolua tokoni ki ai ke ina fakaʼaogaʼi ʼona fealagia fakakaukau.
3. Kotea ka tou vakaʼi ʼi te alatike ʼaeni?
3 ʼI te alatike ʼaeni, ʼe tou vakaʼi anai pe ʼe tokoni feafeaʼi te ʼu matuʼā ki ʼanatou fanau (1) ke natou fakamalohiʼi tanatou tui, (2) mo natou fakamaʼuhigaʼi te ʼu lekula Fakatohi-tapu ʼo ʼuhiga mo te aga ʼae ʼe tonu ke fai, (3) pea mo natou tauʼi tanatou tui. ʼE tou toe vakaʼi anai pe koʼe ʼe lelei ke fai e te ʼu fanau he ʼu fehuʼi. Pea ʼe foaki atu anai he ʼu kiʼi gaue ke kotou fai mo ʼakotou fanau ke feala ai ke kotou palalau ki tatatou tauhi.
TOKONI KI AI KE INA FAKAMALOHIʼI TANA TUI
4. Kotea te ʼu fehuʼi ʼe feala ke fai e he fanau? Kotea tona tupuʼaga?
4 ʼE mahino ia te ʼu matuʼā ʼae ʼe tauhi kia Sehova, ʼe mole anai tui ʼanatou fanau ki te ʼAtua ʼuhi pe ʼe natou tui. Manatuʼi, neʼe mole koulua tutupu ake kua kolua tui kia Sehova, pea ʼe toe feia pe mo takolua fanau. Koia ʼae ʼaki te temi, ʼe feala ke hake ʼi tana fakakaukau te taʼi ʼu fehuʼi ʼaeni: ‘Kotea he ʼu fakamoʼoni ʼe au maʼu ʼe maʼuli moʼoni te ʼAtua? ʼE feala koa ke au tui moʼoni ki te meʼa ʼae ʼe ui ʼi te Tohi-Tapu?’ ʼE ui ʼi te Tohi-Tapu ʼe lelei ke tou fakaʼaogaʼi ʼotatou “fealagia fakakaukau” pea mo “vakavakaʼi fakalelei ia meʼa fuli.” (Loma 12:1; 1 Tes. 5:21) Koia, ʼe feafeaʼi hakolua tokoni ki takolua fanau ke ina fakamalohiʼi tana tui?
5. Kotea ʼe feala ke fai e te ʼu matuʼā moʼo tokoni ki tanā fanau ke ina fakamalohiʼi tana tui ki te Tohi-Tapu? (Loma 12:2)
5 Fakalotomalohiʼi ke ina vakaʼi tonu ʼe moʼoni te meʼa ʼae ʼe ui ʼi te Tohi-Tapu. (Lau ia Loma 12:2.) Ka faifehuʼi atu takolua fanau, kolua toʼo te faigamalie ʼaia ke kolua fakaha age pe ʼe feafeaʼi hana maʼu te ʼu tali. ʼO feafeaʼi? ʼAki hakolua fakaʼaogaʼi te ʼu meʼa gaue ʼa te kautahi ohage la, ko te Kumiʼaga Tohi ʼa Te Kau Fakamoʼoni ʼa Sehova. ʼI te kumiʼaga tohi ʼaia, ʼe feala ke alu ki te manatu ʼi “Te Tohi-Tapu,” pea alu ki te kupu taki ʼaeni “ ʼE Haʼu Mai Te ʼAtua” ke ina maʼu he ʼu fakamoʼoni ko te Tohi-Tapu, ʼe mole ko he tohi feia pe neʼe tohi e te tagata. Kae, ʼe ko “te folafola ʼa te ʼAtua.” (1 Tes. 2:13) Ohage la, ʼe feala ke ina fai he ʼu fekumi ʼo ʼuhiga mo te kolo ʼo te temi muʼa ʼae ko Ninive. ʼI muʼa atu, neʼe ui e ʼihi tagata sivi Tohi-Tapu, neʼe mole ko he kolo moʼoni. Kae ʼi te ʼu taʼu 1850, neʼe maʼu te ʼu toega ʼo te kolo ko Ninive, ʼo fakamoʼoni ai ʼe moʼoni pe tona hisitolia ʼi te Tohi-Tapu. (Sofo. 2:13-15) ʼE feala ke toe lau e takolua fanau te alatike ʼaeni “Kua Kotou Iloʼi Koa?” ʼi Te Tule Leʼo ʼo Novepeli 2021. ʼE fakaha ai neʼe hoko moʼoni he lea fakapolofeta ʼo te Tohi-Tapu ʼo ʼuhiga mo te maumauʼi ʼo Ninive. Koia, ka ina fakatatau te ʼu meʼa ʼae ʼe ina ako ʼi ʼatatou tohi mo ʼae ʼa te hahaʼi popoto, ʼe ina fakamalohiʼi anai tana tui ʼae ʼe moʼoni pe te meʼa ʼae ʼe ui ʼi te Tohi-Tapu.
6. Kotea ʼe feala ke fai e te ʼu matuʼā ke fakaʼaogaʼi e te fanau ʼona fealagia fakakaukau? Tuku mai he faʼifaʼitaki. (Vakaʼi mo te pāki.)
6 Tokoni ki ai ke ina fakaʼaogaʼi ʼona fealagia fakakaukau. ʼU matuʼā, ʼe lahi te ʼu faigamalie ke koulua faipalalau ai mo takolua fanau ki te Tohi-Tapu pea mo takolua tui ki te ʼAtua. ʼE feala ke kolua akoʼi age te ʼu faʼahi ʼaia mo kapau ʼe kotou olo ʼo mamata he fale mataga, peʼe ki te ʼu motu peʼe ko te fale mataga ʼae ʼi te Petele, pea mo ʼihi atu koga meʼa. Ka kotou olo ki he fale mataga peʼe kotou mamata pe ʼi te neti, ʼe feala ke kolua fakaha age ki takolua fanau he ʼu aluʼaga peʼe ko he ʼu meʼa gaue ʼo te hisitolia ʼi te temi muʼa, ke fakamalohiʼi ai tana tui ko te Tohi-Tapu ʼe moʼoni. ʼE lagi feala ke kolua akoʼi age ki takolua fanau te Lauʼi Maka ʼo Moape. ʼE kua taʼu 3 000 te lauʼi maka ʼaia pea ʼe tuʼu ai te huafa ʼo Sehova. ʼE maʼu te lauʼi maka ʼaia ʼi te fale mataga ʼo Louvre, ʼi Palesi, ʼi Falani. Pea tahi, neʼe toe faʼifaʼitakiʼi te lauʼi maka ʼaia ʼo tuku ki te fakahahaʼaga ʼo te Tohi-Tapu ʼe higoa ko “Te Tohi-Tapu Pea Mo Te Huafa ʼo Te ʼAtua.” ʼE tuʼu ʼi ʼotatou pilo lalahi ʼi Warwick, ʼi New York, ʼi Amelika. ʼE ha ʼi te lauʼi maka ʼaia te fiatuʼu ʼa te Hau ʼo Moape ko Mesa ki te kau Iselaele. Pea ʼe alu tahi te meʼa ʼae ʼe tuʼu ai mo ʼae ʼe ui ʼi te Tohi-Tapu. (2 Hau 3:4, 5) Koia, ka sio mata takolua fanau ki he ʼu fakamoʼoni ki te moʼoni ʼo te Tohi-Tapu, ʼe malohi age anai tana tui.—Vakaʼi mo 2 Koloniko 9:6.
7-8. (1) Kotea ʼe tou ako mai te ʼu meʼa taulekaleka ʼo te natula? Tuku mai he faʼifaʼitaki. (Vakaʼi mo te pāki.) (2) Kotea te fehuʼi ʼe tokoni ki takolua fanau ke ina fakamalohiʼi tana tui ʼae ʼe ʼi ai te Tupuʼaga?
7 Uga ia ia ke ina fakakaukauʼi te ʼu meʼa fakaofoofo ʼo te natula. Ka kotou haʼele lalo peʼe fai ʼoloto, kolua fakaha age te ʼu meʼa fakaofoofo ʼo te natula. Kotea tona tupuʼaga? Koteʼuhi ke mahino takolua fanau ko ia ʼae neʼe ina fakatupu te ʼu meʼa fakaofoofo ʼaia ʼe lahi tona poto. Ohage la, ʼe lahi te ʼu meʼa ʼi te natula neʼe fakatupu ko tonatou agaaga ʼe takaminomino. ʼE fakamahino e te tagata sienesia ʼe higoa ko Nicola Fameli, ka kotou lau pe ko meʼa ʼe fia ʼe takaminomino ʼi he meʼa ʼo te natula, ʼe kotou toe sisio pe anai ki te ʼu numelo ʼaia ʼi he tahi age meʼa ʼo te natula. Ko te ʼu numelo ʼaia ʼe higoa ko te suite de Fibonacci. ʼE lahi te ʼu meʼa ʼo te natula ʼe tou maʼu ai he ʼu meʼa ʼe takaminomino, ohage la, ʼi te ʼu pupuʼaga fetuʼu, mo te figota ʼae ko te fuiono, mo te ʼu lau ʼo te ʼu fuʼu ʼakau pea mo te meʼa ʼae ʼi lotomalie ʼo te ʼakau ʼaeni ko te tournesol. a
8 ʼI te fale ako, ʼe feala ke ako ai e takolua fanau he tahi age meʼa feia ʼi te natula. Ohage la, ʼe lahi te ʼu fuʼu ʼakau ʼe maʼu ʼi loto he ʼu koga ʼe tonu ke faʼifaʼitakiʼi. ʼI he sinoʼi ʼakau ʼe homo leva he ʼu vaʼa, pea ʼi te ʼu vaʼa ʼaia, ʼe toe homo ake ai he ʼu kiʼi vaʼa liliki, kae ko tonatou agaaga ʼe tatau. Pea ʼe fakahigoaʼi ko te fractale. Kae, ko ai ʼae neʼe ina fakatuʼu te ʼu lao ʼae ʼe tupu ai te ʼu meʼa matalelei mo fakaofoofo ʼaia? Ka fakakaukau takolua fanau ki te fehuʼi ʼaia, ʼe ʼasili malohi anai tana tui ʼae neʼe fakatupu e te ʼAtua te ʼu meʼa fuli ʼaia. (Hep. 3:4) ʼE feala ke kolua fai age te fehuʼi ʼaeni ʼi he ʼaho: “Kapau neʼe fakatupu tatou e te ʼAtua, mole matatonu koa ke ina toe foaki mai he ʼu tokoni ʼo ʼuhiga mo te aga ʼae ʼe tonu ke fai ke tou fiafia ai?” Koia, kolua fakaha lelei age ki ai, ʼe maʼu te ʼu tokoni maʼuhiga ʼaia ʼi te Tohi-Tapu.
FAKAHA AGE TE MAʼUHIGA ʼO TE ʼU LEKULA FAKATOHI-TAPU
9. He koʼe ʼe feala ke fai e takolua fanau he ʼu fehuʼi ʼo ʼuhiga mo te ʼu lekula Fakatohi-tapu ki te aga ʼe tonu ke fai?
9 ʼI ʼihi temi, ʼe feala ke fai e takolua fanau he ʼu fehuʼi ki te meʼa ʼae ʼe ui ʼi te Tohi-Tapu, ʼo ʼuhiga mo te meʼa ʼae ʼe lelei mo ʼae ʼe kovi. Kolua faiga ke kolua iloʼi pe koʼe ʼe ina fai te ʼu fehuʼi ʼaia. ʼE fakafeagai moʼoni koa ki te ʼu lekula ʼaia? Peʼe lagi ʼe mole ina iloʼi pe feafeaʼi hana fakamahino ki ʼihi te ʼu akonaki ʼe tui ki ai? Tatau aipe pe kotea te tupuʼaga ʼo tana fai he ʼu fehuʼi, kae kolua tokoni ki ai ke mahino ki te maʼuhiga ʼo te ʼu lekula Fakatohi-tapu ʼo ʼuhiga mo te aga ʼae ʼe tonu ke fai. ʼO feafeaʼi? ʼAki hakolua ako mo ia te tohi Ke Ke Fiafia ʼo Heʼe Gata. b
10. ʼE feafeaʼi hakolua tokoni ki takolua fanau ke ina fakakaukauʼi te ʼu felogoi lelei ʼe feala ke ina maʼu mo Sehova?
10 Tokoni ki ai ke fia kaumeʼa mo Sehova. Ka kolua ako te Tohi-tapu fakatahi mo takolua fanau, kolua faiga ke kolua tokoni ki ai ke ina fakaha te ʼu meʼa ʼe ina logoʼi. ʼO feafeaʼi? ʼAki hakolua fakaʼaogaʼi te ʼu fehuʼi mo te ʼu pāki ʼi te tohi Ke Ke Fiafia ʼo Heʼe Gata. (Taag. 20:5) Ohage la, ʼi te kapite 8 ʼe fakatatau ai ia Sehova ki he kaumeʼa agalelei ʼe ina fakamanatuʼi mai ʼe ina fia puipui tatou mo ina loto ke tou fiafia. Hili takotou faipalalau kia 1 Soane 5:3, ʼe feala hakolua fai age te fehuʼi ʼaeni: “Ka tou fakakaukauʼi ko Sehova ʼe ko hotatou Kaumeʼa lelei, kotea ʼe tonu ke tou manatu ʼo ʼuhiga mo te meʼa ʼe ina kole mai ke tou fai?” ʼE lagi ko he fehuʼi faigafua, kae ʼe tokoni anai ki takolua fanau ke mahino ʼe foaki mai e Sehova he ʼu lekula koteʼuhi ʼe ʼofa ia tatou.—Esa. 48:17, 18.
11. ʼE feafeaʼi hakolua tokoni ki takolua fanau ke mahino ki te maʼuhiga ʼo te ʼu pelesepeto Fakatohi-tapu? (Taʼaga Lea 2:10, 11)
11 Fakaha age te ʼu fua lelei moka tou maʼuliʼi te ʼu pelesepeto Fakatohi-tapu. Ka kotou lau te Tohi-Tapu peʼe ko te koga tohi ʼo te ʼaho, kotou faipalalau ki te ʼu fua lelei ʼe maʼu anai e tokotou kiʼi famili moka koutou maʼuliʼi te ʼu pelesepeto. Ohage la, ʼe mahino koa takolua fanau ki te maʼuhiga ʼae ke faʼa gaue pea mo aga fakahagatonu? (Hep. 13:18) Kolua toe fakaha age ki ai ka tou maʼuliʼi te ʼu pelesepeto, ʼe tou puipui ai totatou maʼuli malolo fakasino pea mo fiafia ai. (Taag. 14:29, 30) Ka kotou faipalalau ki he ʼu pelesepeto feia, ʼe tokoni anai ki takolua fanau ke mahino lelei age ki te maʼuhiga ʼo te ʼu tokoni ʼa te ʼAtua.—Lau ia Taʼaga Lea 2:10, 11.
12. Neʼe tokoni feafeaʼi he tamai ki tona foha ke mahino ki te maʼuhiga ʼo te maʼuliʼi ʼo te ʼu pelesepeto?
12 Ko Steve, ʼe maʼuli ʼi Falani. Pea ʼe ina fakamahino pe ʼe feafeaʼi tanā tokoni taumatuʼa ki tanā tama ko Ethan, ʼae ʼe kei taʼu 16, ke mahino ʼe fakaʼaogaʼi e Sehova ʼana lao moʼo fakaha mai tona ʼofa. ʼE ina ui fenei: “ ʼE mā fai age he ʼu fehuʼi fenei, ‘He koʼe ʼe loto e Sehova ke tou maʼuliʼi te pelesepeto ʼaia? He koʼe ʼe ha ai tona ʼofa kia tatou? Kapau ʼe mole ke maʼuliʼi, kotea ka hoko?’ ” ʼE tokoni te ʼu faipalalau ʼaia kia Ethan ke ina fakamalohiʼi tana tui ʼae ko te meʼa ʼae ʼe ui e Sehova ʼe moʼoni. ʼE toe ui fenei e Steve: “Ko tamā fakatuʼutuʼu, ʼe ko te tokoni kia Ethan ke mahino ʼe maʼu ʼi te Tohi-Tapu, te poto ʼae ʼe maʼoluga age ʼi te poto fakatagata.”
13. ʼE tokoni feafeaʼi te ʼu matuʼā ki ʼanā fanau ke ina maʼuliʼi te ʼu pelesepeto Fakatohi-tapu? Tuku mai he faʼifaʼitaki.
13 Akoʼi age ke ina maʼuliʼi te ʼu pelesepeto Fakatohi-tapu. Tou toʼo he faʼifaʼitaki. ʼE tonu ke lau e takolua fanau he tohi neʼe ʼavage ʼi te fale ako. Kae ʼi te tohi ʼaia, ʼe palalau ai ki ni hahaʼi ʼe natou fai he ʼu aga heʼe ʼaoga, mo ni aga ʼe kovi, pea mo agamalohi. ʼE feala hakolua fakalotomalohiʼi takolua fanau ke ina fakakaukauʼi te aga ʼa te ʼu hahaʼi ʼaia ʼaki hana fakaʼaogaʼi te ʼu pelesepeto Fakatohi-tapu. (Taag. 22:24, 25; 1 Ko. 15:33; Flp. 4:8) Ka ina fakakaukauʼi te faʼahi ʼaia, ʼe tokoni moʼoni anai ki ai ke faifakamafola ki tana faiako, peʼe ko ʼona kaumeʼa ʼi te fale ako.
AKOʼI TAKOLUA FANAU KE INA TAUʼI TANA TUI
14. Kotea he manatu ʼe feala ke ufiufi ai he tehina tupulaga moka palalau mo ʼihi? Kotea tona tupuʼaga?
14 ʼI ʼihi temi, ʼe mole faigafua ki he tehina tupulaga tana tauʼi tana tui. ʼE feala ke ufiufi tafito la moka palalau ʼi te fale ako ki te manatu ʼae ʼe tou ʼomai mai te geli. Kotea tona tupuʼaga? Koteʼuhi ʼi te agamahani ʼe fakaha e te kau faiako ko te evolisio ʼe moʼoni. Koia, ʼe feafeaʼi hakolua tokoni ki takolua fanau ke tui papau ki te ʼu meʼa ʼae ʼe tui ki ai ʼi te Tohi-Tapu?
15. Kotea ʼe feala ke tokoni ki he tehina tupulaga ke lahi age tana falala ki te ʼu meʼa ʼae ʼe tui ki ai ʼi te Tohi-Tapu?
15 Tokoni ki ai ke lahi age tana falala ki te ʼu meʼa ʼae ʼe tui ki ai ʼi te Tohi-Tapu. ʼE mole tonu ke ufiufi takolua fanau ʼi tana iloʼi ʼae ʼe ʼi ai te tahi neʼe ina fakatupu ia meʼa fuli. (2 Tim. 1:8) Kotea tona tupuʼaga? Koteʼuhi tokolahi te kau popoto ʼe natou fakamoʼoni neʼe mole ha feia pe te maʼuli. ʼE natou mahino ʼe ʼi ai te tahi ʼe poto neʼe ina fakatupu te ʼu meʼa maʼuli ʼaia pea mo fakaofoofo. Koia, ʼe mole natou tali te manatu ʼae neʼe tou ʼomai mai te geli, ʼae ʼe akoʼi ʼi te agamahani ʼi te fale ako. ʼE feala ke toe fakamalohiʼi e takolua fanau te ʼu meʼa ʼae ʼe tui ki ai ʼi te Tohi-Tapu. O feafeaʼi? ʼAki hana fakakaukauʼi te ʼu fakamoʼoni ʼae neʼe uga ai he ʼu tehina mo tuagaʼane ke natou tui papau neʼe fakatupu e he tahi te maʼuli. c
16. ʼE tokoni feafeaʼi te ʼu matuʼā ki tanā fanau ke ina lava fakamahino ʼe ʼi ai te Tupuʼaga? (1 Petelo 3:15) (Vakaʼi mo te pāki.)
16 Tokoni ki ai ke ina lava fakamahino tana tui ʼae ʼe ʼi ai te Tupuʼaga. (Lau ia 1 Petelo 3:15). ʼE fua lelei anai ki takolua fanau moka koutou vakaʼi fakatahi ia te ʼu alatike ʼaeni “Création ou évolution ?” ʼi te jw.org “Les jeunes s’interrogent.” Hili ia, pea kolua vakavakaʼi mo ia te manatu ʼae ʼe sio ʼe malave anai ki ʼihi, pea kolua akoako ia ia ke ina lava fakamahino. Fakamanatuʼi ki ai ko te fakatuʼutuʼu ke mole fihi mo ʼona kauga ako. Kae, fakalotomalohiʼi ia ia ke ina fakaʼaogaʼi he manatu ʼe mahino gafua mo kapau ʼe faipalalau mo he tahi ʼe fia logo. Ohage la, ʼe feala ke ui fenei age e hona kauga ako: “ ʼE au tui pe au ki te meʼa ʼe au sio ki ai. Pea tahi, heʼeki au sio au ki te ʼAtua.” ʼE feala ke tali fenei age e he tehina tupulaga: “Fakakaukauʼi age muʼa ʼe ke haʼele lalo ʼi he vao matuʼa, pea ʼe ke sio ki he vai keli neʼe lelei tona faʼu. Kotea ka ke ui anai? Kapau la neʼe faʼu te vai keli ʼaia e he tahi ʼe poto, ʼe feafeaʼi age la ki te ʼAtulaulau?”
17. ʼE fakalotomalohiʼi feafeaʼi e te ʼu matuʼā tanā fanau ke ina toʼo ia faigamalie fuli ke palalau ki ʼihi ki te moʼoni? Tuku mai he faʼifaʼitaki.
17 Fakalotomalohiʼi ia ia ke ina toʼo ia faigamalie fuli ke palalau ki ʼihi ki te moʼoni. (Loma 10:10) ʼE feala ke koulua fakatatau te ʼu faiga ʼe fai e takolua fanau ki te ʼu faiga ʼe fai e he tahi ke ina ako he meʼa faimaholo. ʼE ina kamata anai ʼaki he ʼu musika faigafua. Pea ʼaki te temi, kua faiva leva ʼi te meʼa faimaholo ʼaia. ʼO toe feia pe, ʼe feala pe ke kamata palalau he tehina tupulaga ki tana tui ʼaki hana fakaʼaogaʼi he ʼu manatu ʼe mahino gafua. Ohage la, ʼe feala ke ina fai te fehuʼi ʼaeni ki hona kauga ako: “ ʼE ke iloʼi la ʼe tau fakaʼaogaʼi e te kau popoto te ʼu meʼa ʼo te natula moʼo faʼu ʼaki he ʼu masini? Tali ke au fakaha atu te kiʼi ʼata viteo ʼaeni.” Hili tau fakaha age he ʼata ʼi te kupu tafito Fakatupu, ʼe feala ke ina ui fenei: “Kapau la ʼe vikiʼi he tagata poto ʼuhi ko tana faʼu he meʼa kae neʼe ina faʼifaʼitakiʼi pe te natula, ko ai koa ʼae ʼe tuha moʼoni ke vikiʼi? ʼE mole koa la ko ia ʼae neʼe ina fakatupu te meʼa ʼaia ʼo te natula?” ʼE tokoni atu anai te faʼahiga fai ʼaia ʼe mahino gafua ke tupu ai he fia logo ʼa he tupulaga pea ke fia mahino lahi age.
HAGA TOKONI KI AI KE INA FAKAMALOHIʼI TANA TUI
18. ʼE haga fakamalohiʼi feafeaʼi e te ʼu matuʼā te tui ʼo tanā fanau?
18 Tokolahi ʼi te malama ʼaeni ʼe mole natou tui kia Sehova. (2 Pet. 3:3) Koia, ʼu matuʼā, ka kolua akoʼi te Tohi-Tapu ki takolua fanau, kolua fakalotomalohiʼi ke ina fakaloloto he ʼu manatu. ʼE feala anai ke tokoni ki ai ke lahi age tana fakaʼapaʼapa ki te Folafola mo te ʼu lekula ʼa te ʼAtua ki te aga ʼae ʼe tonu ke fai. Tokoni ki ai ke ina fakaʼaogaʼi ʼona fealagia fakakaukau ke ina tokagaʼi te ʼu meʼa fakaofoofo ʼo te fakatupu. Toe tokoni ki ai ke mahino ki te ʼu lea fakapolofeta ʼo te Tohi-Tapu kua ʼosi hoko. Kae tafito, kolua faikole fakatahi mo takolua fanau. ʼE mahino ia, ʼe fakapale anai e Sehova ia faiga fuli ʼe kolua fai anai moʼo fakamalohiʼi te tui ʼo takolua fanau.—2 Klk. 15:7.
KATIKO 133 Atolasio Kia Sehova ’i Tou Temi Tupulaga
a Kapau ʼe ke fia maʼu he tahi age ʼu fakamahino, vakaʼi ʼi te jw.org te ʼata viteo Les merveilles de la création révèlent la gloire de Dieu.
b Kapau kua ʼosi takolua ako mo takolua fanau te tohi Ke Ke Fiafia ʼo Heʼe Gata, ʼe feala anai hakolua toe vakaʼi mo ia he ʼu kapite ʼo te koga 3 mo 4, ʼae ʼe talanoa ai ki te ʼu lekula ʼo te Tohi-Tapu ʼo ʼuhiga mo te aga ʼae ʼe tonu ke fai.
c Vakaʼi te alatike “Pourquoi nous croyons en un créateur” ʼi te Réveillez-vous ! ʼo Sepetepeli 2006, pea mo te kaupepa lahi Cinq questions à se poser sur l’origine de la vie. Kapau ʼe ke fia maʼu he tahi ʼu faʼifaʼitaki, vakaʼi ʼi te jw.org te ʼu ʼata viteo Points de vue sur l’origine de la vie.
d FAKAMATALA ʼO TE PĀKI: ʼE fakaha e he tehina tupulaga he ʼata ʼi te kupu tafito Fakatupu ki hona kauga ako ʼe ina leleiʼia te ʼu kiʼi meʼa fai pāki ʼe fealuʼaki ʼi te ʼaele.