Neʼe tohi fenei e te apositolo ko Paulo kia Timoteo, ʼae neʼe tagata ʼafea ohage ko ia: “ ʼE au fakatotonu atu kia koe, ia muʼa ʼo te ʼAtua, mo Kilisito Sesu pea mo te kau ʼaselo maʼoniʼoni, ke ke mulimuli ki te ʼu fakatotonu ʼaia, ʼo vakavakaʼi fakalelei ia meʼa fuli ʼi muʼa ʼo tau fai he tonu pea ʼaua naʼa ke fakapalatahi.”—1 Tim. 5:21.

Tou vakaʼi muʼa pe ko ai ʼae ʼe mole kau ki te ʼu ʼaselo ʼaia. ʼE ha lelei mai ʼe mole kau ia natou ʼaia te toko 144 000. ʼI te temi ʼae neʼe faitohi ai ia Paulo kia Timoteo neʼe heʼeki fakatuʼuake te kau fakanofo ki selo. Ko te kau apositolo mo te tahi kau fakanofo neʼe heʼeki liliu ko ni ʼaselo, koia la ʼae ʼe mole ko natou “te kau ʼaselo maʼoniʼoni.”—1 Ko. 15:​50-54; 1 Tes. 4:​13-17; 1 Soa. 3:2.

Pea ko “te kau ʼaselo maʼoniʼoni” neʼe mole ko te ʼu ʼaselo ʼae neʼe talagataʼa ʼi te temi ʼo te Tulivio. Neʼe fakalogo te ʼu ʼaselo ʼaia kia Satana pea natou liliu ko ni temonio. Neʼe natou toe fakafeagai kia Sesu. (Sen. 6:2; Luka 8:​30, 31; 2 Pet. 2:4) ʼI te ka haʼu, ʼe li anai natou ki he luo lolotoga taʼu ʼe 1 000. Pea hili ʼaia ʼe pulihi anai natou fakatahi mo te Tevolo.—Suta 6; Fkha. 20:​1-3, 10.

Koia, ʼe mahino mai ko “te kau ʼaselo maʼoniʼoni” ʼae neʼe palalau ki ai ia Paulo ʼe ko te ʼu ʼaselo ʼi selo ʼae ʼe natou nonofo agatonu ki “te ʼAtua, [pea] mo Kilisito Sesu.”

ʼE ʼi ai te toko lauʼi afe mo afe kau ʼaselo agatonu. (Hep. 12:​22, 23) ʼE ha mai neʼe mole foaki e Sehova he gaue pe ʼe tahi kia natou fuli. (Fkha. 14:​17, 18) Ohage la neʼe fakatotonu e Sehova ki he ʼaselo pe ʼe tahi ke ina matehi te toko 185 000 kau solia Asilia. (2 Hau 19:35) Kae neʼe ina kole ki he kau ʼaselo ke natou “taʼaki . . . mai [te] Puleʼaga [ʼo Sesu] ia meʼa fuli ʼae ʼe fakatupu higa pea mo te hahaʼi ʼae ʼe natou maumauʼi te lao.” (Mat. 13:​39-41) Neʼe hinoʼi te tahi age ʼu ʼaselo “ke natou tanaki . . . ia natou ʼae neʼe ina filifili” ke olo ki selo. (Mat. 24:31) Pea neʼe fakatotonu age leva ki te tahi ʼu ʼaselo ‘ke natou puipui tatou ʼi he potu pe ʼe tou olo ki ai.’—Pes. 91:11; Mat. 18:10; vakaʼi mo Mateo 4:11; Luka 22:43.

ʼE ha mai ai, ko “te kau ʼaselo maʼoniʼoni” ʼae ʼe talanoa ki ai ia 1 Timoteo 5:21 neʼe foaki age kia natou te gaue ʼae ke natou tokakaga ki te ʼu kokelekasio. ʼI te ʼu vaega ki muʼa atu pea ki muli age, neʼe foaki e Paulo ia he tokoni poto ki te ʼu tagata ʼafea, pe ʼe feafeaʼi hanatou fakahoko ʼonatou maʼua pea ʼe tonu kia natou ʼi te kokelekasio ke natou fakaʼapaʼapa ki te ʼu tagata ʼafea. Neʼe ui e Paulo ʼe mole tonu ki te kau tagata ʼafea ke natou “fakapalatahi” pea tonu ke natou vakavakaʼi fakalelei ia meʼa fuli ʼi muʼa ʼo hanatou fai he tonu. ʼE maʼuhiga ke natou mulimuli ki te tokoni ʼaeni neʼe fai e Paulo koteʼuhi ʼe natou gaue “ia muʼa ʼo te ʼAtua, mo Kilisito Sesu pea mo te kau ʼaselo maʼoniʼoni.” Koia ʼe ha lelei mai neʼe foaki age ki ʼihi ʼaselo te gaue ʼae ke natou tokakaga ki te kokelekasio, ohage la ke natou puipui te ʼu kaugana ʼa te ʼAtua, mo tokoni kia natou ʼi te faifakamafola pea mo natou fakaha kia Sehova te ʼu meʼa fuli ʼae ʼe natou sisio ki ai.—Mat. 18:10; Fkha. 14:6.