1, 2. He koʼe ʼe tonu ke tou akoʼi niʼihi ke feala hanatou fakahoko ni gaue fakateokalatike?

KO SESU neʼe gaue malohi ʼi te fakamafola ʼo te Puleʼaga ʼo te ʼAtua. Neʼe toe lahi mo te temi ʼae neʼe ina akoʼi ai ʼana tisipulo. Neʼe ina fakaha age kia natou te faʼahiga akoʼi mo te faʼahiga tokaga ʼae ki te hahaʼi ʼa te ʼAtua. Pea neʼe ako ai e te ʼu tisipulo ke natou hage ko ni tauhi ovi ʼe tokakaga ki ʼanatou faga ovi. (Mateo 10:5-7) Ko Filipo, ia te tagata faievaselio, neʼe maʼumaʼua mo ia ʼi te faifakamafola, kaʼe neʼe ina akoʼi ʼona ʼofafine ke natou toe fai feia. (Gaue 21:8, 9) ʼO toe feia pe ia ʼaho nei, ʼe tonu ke tou akoʼi niʼihi. Kotea tona tupuʼaga?

² ʼI te ʼu kokelekasio ʼi te malamanei katoa, ʼe tokolahi natou ʼae ʼe kei foʼofoʼou kaʼe heʼeki natou papitema. ʼE tonu ke akoʼi ia natou ʼaia ʼe kei foʼofoʼou. ʼE tonu ke tou tokoni kia natou ke natou mahino pe koʼe ʼe lelei ke natou lau pea mo ako takitokotahi ia te Tohi-Tapu. Pea ʼe tonu foki ke tou akoʼi natou ki te faifakamafola mo te akoʼi ʼo te logo lelei. Ko te ʼu tehina ʼae neʼe hoki papitema ʼe tonu ke akoʼi, ke feala ʼaki te temi ke natou liliu ko he kau  faifekau fakaminisitelio pea mo tagata ʼafeā. Pea ʼe feala kia tatou fuli ʼi te kokelekasio ke tou tokoni kia natou ʼae ʼe kei foʼofoʼou.—Taaga Lea 4:2.

3, 4. (1) Neʼe fakaha feafeaʼi e Paulo ia te pikipikiga ʼo te ako ʼo te Tohi-Tapu pea mo he minisitelio ʼe fua lelei? (2) Kotea ʼae ʼe tonu ke tou fai ʼi muʼa ʼo hatatou fakalotomalohiʼi tatatou ako ke ina ako tokotahi te Tohi-Tapu?

³ ʼE tonu ki te ʼu kaugana fuli ʼa Sehova ke natou lau pea mo ako ia te Tohi-Tapu ke natou iloʼi ai te finegalo ʼo te ʼAtua. Neʼe fakamahino e te apositolo ko Paulo te aluʼaga ʼaia ki ʼona tehina mo tuagaʼane ʼi Kolose. Neʼe ina ui fenei: “E mole kei gata tama faikole ki te Atua o uhiga mo koutou; e ma kole ke kotou fonu i te iloi o tona finegalo.” He koʼe neʼe maʼuhiga ke natou lau pea mo ako ia te Tohi-Tapu? Koteʼuhi ʼe natou maʼu ai anai ia te poto pea ʼe natou mahino anai pe ʼe feafeaʼi hanatou ‘haʼele ʼi hona aluʼaga ʼe tau mo feʼauga mo Sehova, pea ke natou lelei kia te ia ia meʼa fuli.’ Neʼe toe tokoni kia natou ke natou fakahoko “te u gaue lelei kehekehe” ʼae ʼe loto ki ai ia Sehova, kaʼe tafitō ia te fakamafola ʼo te logo lelei. (Kolose 1:9, 10) Koia ʼe tonu ke tou tokoni ki tatatou ako ke mahino, ko tana lau pea mo ako tuʼumaʼu ia te Tohi-Tapu ʼe maʼuhiga ki tana tauhi ʼae kia Sehova.

⁴ Kapau ʼe mole fai hatatou ako tokotahi, pea ʼe mole feala ke tou tokoni ki ʼatatou kau ako ke natou mahino ki te maʼuhiga ʼo te ako tokotahi ʼo te Tohi-Tapu. Kaʼe kapau ʼe tou lau tuʼumaʼu ia te Tohi-Tapu mo tou metitasio ki ai, ʼe fua lelei ai anai ki totatou maʼuli mo totatou minisitelio. Ohage la, ka fai mai e he tahi he fehuʼi faigataʼa ʼi te faifakamafola, pea ʼe feala anai ke tou tali age ʼaki te Tohi-Tapu. Peʼe ka tou lau pe neʼe feafeaʼi te faʼa kataki ʼa Sesu, mo Paulo pea mo ʼihi atu ʼi tanatou faifakamafola, ʼe ʼekenaki ai anai tatou ke tou haga faifakamafola maʼia ʼi te ʼu temi faigataʼa. Ka tou vaevae mo niʼihi te ʼu manatu ʼae neʼe tou ako mo te ʼu fua lelei neʼe tou maʼu mai ai, ʼe uga ai anai natou ke toe loloto age tanatou ako te Tohi-Tapu pea ke natou maʼu mo ni fua lelei.

5. Tuku mai he ʼu tokoni ʼe feala ke fakaʼaogaʼi e natou ʼae ʼe kei foʼofoʼou ke liliu te ako ʼo te Tohi-Tapu ko hanatou agamahani.

⁵ ʼE feala ke ke fai te fehuʼi ʼaeni: ‘ ʼE au lava tokoni feafeaʼi ki taku ako ke ina ako tuʼumaʼu te Tohi-Tapu?’ ʼE lagi feala ke ke fakaha age pe ʼe feafeaʼi te teuteuʼi ʼo tana tohi ako. ʼE toe feala ke ke ui age ke ina lau te ʼu manatu ʼae ʼe tuʼu ʼi te tahi ʼu fakamahino ʼo te tohi Koteā ʼAē ʼe Akoʼi Moʼoni Mai ʼi Te Tohi-Tapu? pea ke ina lau mo ʼona vaega. Hili ia, pea ʼe feala ke  ke fakaha age kia ia te teuteuʼi ʼo te ʼu fono ke feala ai hana faitali. Fakalotomalohiʼi ia ia ke ina lau ia te ʼu Tule Leʼo mo te ʼu Réveillez-vous ! fuli. Pea fakaha age kia ia pe ʼe feafeaʼi hana maʼu te ʼu tali ki te ʼu fehuʼi Fakatohi-tapu ʼaki tana fakaʼaogaʼi te Watchtower Library peʼe ko te TANAKIʼAGA TOHI ʼI TE NETI. ʼE mahino ia, ʼe ina leleiʼia anai ia te fakaʼaogaʼi ʼo te ʼu faʼahiga fai ʼaia ʼi tana ako tokotahi. Pea ʼe toe lahi age ai mo te ʼu manatu ʼae ʼe ina fia iloʼi.

6. (1) ʼE feafeaʼi hau tokoni ki tau ako ke ʼofa fakamalotoloto ki te Tohi-Tapu? (2) Kotea ʼe feala ke fai e ia ʼae ʼe ako mo kapau ʼe ʼofa fakamalotoloto ki te Tohi-Tapu?

⁶ Ka tou fai he ako ʼa he tahi ʼe tou loto ke mahino ki te maʼuhiga ʼo te Tohi-Tapu, koteʼuhi ʼe tokoni kia ia ke ina iloʼi lelei age ia Sehova. ʼAua naʼa tou fakakinauʼi ia ia, kaʼe tou fakaha age ki ai pe ʼe feafeaʼi hana leleiʼia te ako ʼo te Tohi-Tapu. Kapau ʼe loloto ia tana ako te Tohi-Tapu, pea ʼe ina maʼu anai te manatu ʼaeni ʼa te tagata faipesalemo: “Ko taku fakaovi ki te Atua, koena toku koloa: E au fakatuu toku nonoaga i te [Tuʼi ʼAliki ko Sehova].” (Pesalemo 73:28) ʼE mahino papau ia, ʼe tokoni anai te laumalie maʼoniʼoni ʼo Sehova kia ia ʼae ʼe fia fakaovi age kia te ia.

7. Neʼe akoʼi feafeaʼi e Sesu ia te kau faifakamafola ʼo te logo lelei? (Vakaʼi te ʼuluaki pāki.)

⁷ ʼE lahi te faʼahi ʼe tou lava ako mai te faʼahiga akoʼi e Sesu ʼana tisipulo. Neʼe faifakamafola ia Sesu mo natou pea neʼe natou sisio ai ki tana faʼahiga faiakonaki ki te hahaʼi. Pea neʼe ina toe foaki kia natou he ʼu tokoni ʼo ʼuhiga mo te faifakamafola. (Mateo, kapite 10) ^[1] (Vakaʼi te nota ʼi te fakaʼosi ʼo te alatike.) ʼI he kiʼi temi siʼi pe, neʼe sisio ai te kau apositolo ki te faʼahiga akoʼi ʼae e Sesu ia te moʼoni ki te hahaʼi. (Mateo 11:1) Tou vakaʼi te ʼu faʼahi ʼe lua ʼe feala ke tou akoʼi kia natou ʼae ʼe kei foʼofoʼou ke natou fakahoko ʼi te faifakamafola.

8, 9. (1) Neʼe feafeaʼi te aga ʼa Sesu mo te hahaʼi ʼi tana faifakamafola? (2) ʼE tou lava tokoni feafeaʼi kia natou ʼe kei foʼofoʼou ʼi te faifakamafola ke natou faʼifaʼitakiʼi te faipalalau ʼa Sesu mo te hahaʼi?

⁸ Faipalalau mo te hahaʼi. Neʼe mole palalau tuʼumaʼu ia Sesu ki he hahaʼi kaugā malie. Kaʼe neʼe ko hana agamahani tana palalau ki te hahaʼi takitokotahi pea neʼe agalelei kia natou. Ohage la, ko tana faipalalau mo te fafine ʼae neʼe haʼu ʼo ʼohu vai ʼi te vai keli ʼe tuʼu ovi ki te kolo ko Sikale. (Soane 4:5-30) Neʼe toe palalau ia Sesu mo Mateo Levi, ko te tagata tanaki tukuhau, pea neʼe ina fakaafe ia ia ke liliu ko hana tisipulo. Neʼe muliʼi ai e Mateo ia Sesu. Ki muli age neʼe fakaafe e Mateo ia Sesu pea mo ʼihi ki tona loto fale ke natou kakai fakatahi. Pea neʼe palalau ai ia Sesu ki he hahaʼi kaugā malie.—Mateo 9:9; Luka 5:27-39.

⁹ Logo la neʼe mole lelei te ʼu palalau ʼae neʼe fai e Natanaele ʼo ʼuhiga mo te hahaʼi ʼo Nasaleti, te kolo ʼae neʼe haʼu mai ai ia Sesu kaʼe neʼe agalelei ia Sesu ʼi tana palalau ʼae ki ai. Kaʼe ʼuhi ko te agalelei ʼaia ʼa Sesu, neʼe fetogi ai te faʼahiga manatu ʼa Natanaele ʼo ʼuhiga mo Sesu. Pea neʼe lahi ai te ʼu faʼahi ʼae neʼe ina fia ako mai ia Sesu. (Soane 1:46-51) ʼE feala ke  tou taʼofi he ʼu ako mai te faʼifaʼitaki ʼa Sesu. Ohage la, ka tou faipalalau mo te hahaʼi ʼaki he agalelei, ʼe natou fia fakalogo anai te logo ʼae ʼe tou tala age. ^[2] [Vakaʼi te nota ʼi te fakaʼosi ʼo te alatike.] Koia ka tou akoʼi kia natou ʼae ʼe kei foʼofoʼou ke natou agalelei mo te hahaʼi, ʼe toe lahi age ai anai tanatou leleiʼia ia te faifakamafola.

10-12. (1) Neʼe tokoni feafeaʼi ia Sesu kia natou ʼae neʼe fia logo ki te logo lelei? (2) ʼE tou lava tokoni feafeaʼi kia natou ʼae ʼe kei foʼofoʼou ʼi te faifakamafola ke natou faiva ʼi te akoʼi ʼo te ʼu moʼoni Fakatohi-tapu?

¹⁰ Akoʼi ia natou ʼae ʼe fia logo. Neʼe maʼumaʼua ʼaupito ia Sesu. Kaʼe ʼi te temi ʼae neʼe lotolelei ai te hahaʼi ke natou fagono kia te ia, neʼe ina fakaʼaogaʼi tona temi ke ina akoʼi ai natou. Ohage la, ʼi te tahi ʼaho neʼe fakatahitahi te toe hahaʼi tokolahi ʼi te kauvai ke natou fagono kia Sesu. Koia neʼe hake ai ia Sesu mo Petelo ki te vaka ʼo faiakonaki mai ai ki te hahaʼi. Hili ia, neʼe fakahoko e Sesu ia he milakulo ʼo maʼu lahi ai e Petelo ʼi te kupega ni ika. Neʼe loto e Sesu ke taʼofi e Petelo he ako mai ai. Pea neʼe ina ui fenei kia Petelo: “Koeni e ke liliu anai ko he tagata tautai . . . tagata.” ʼI te temi pe ʼaia, ko Petelo mo ʼana kau vaka neʼe natou “toho ake leva te u vaka ki uta, pea nee natou tuku leva te u mea fuli,” ʼo natou muliʼi ai ia Sesu.—Luka 5:1-11.

¹¹ Ko Nikotemo, neʼe lahi te ʼu faʼahi neʼe ina toe fia ako mai ia Sesu. Kaʼe, neʼe ina tuʼaniaʼi te manatu ʼa te hahaʼi ʼae neʼe feala ke sisio age ki tana faipalalau mo Sesu, koteʼuhi neʼe kau ʼi te Sanetualio. Koia ʼae neʼe alu ai kia Sesu ʼi te poʼuli. Neʼe mole fakaliliu ia ia e Sesu, kaʼe neʼe ina toʼo he temi moʼo fakamahino ia te moʼoni kia Nikotemo. (Soane 3:1, 2) Neʼe lotolelei tuʼumaʼu ia Sesu ke ina fakaʼaogaʼi tona temi moʼo akoʼi te moʼoni ki te hahaʼi pea ke ina fakamalohiʼi tanatou tui. ʼO toe feia pe, ʼe tonu ke tou lotolelei ʼo tou olo ʼo ʼaʼahi te hahaʼi ʼi te temi ʼae ʼe natou loto ki ai. Pea ʼe tonu ke tou toʼo he temi ke tou tokoni ai kia natou ke natou mahino ki te Tohi-Tapu.

¹² Ka tou faifakamafola mo natou ʼae ʼe kei foʼofoʼou, tou akoʼi age kia natou ke natou toe liliu ʼo ʼaʼahi te kilisitiano ʼae neʼe fia logo. ʼE feala ke tou olo fakatahi mo natou ki ʼatatou ʼaʼahi pea mo ʼatatou ako Tohi-Tapu. ʼI tatatou fai te faʼahi ʼaia, ʼe natou popoto ai anai ʼi te akoʼi ʼo niʼihi. Pea ʼe natou toe logoʼi anai foki te fiafia ʼae ʼe kita maʼu moka tou tokoni ki niʼihi ke natou iloʼi te moʼoni ʼo ʼuhiga mo Sehova. ʼE fiafia anai ia natou ʼaia ʼe kei foʼofoʼou ʼi te toe ʼaʼahi ʼo te hahaʼi mo fai hanatou ako Tohi-Tapu. ʼE natou toe ako anai foki mo te faʼa kataki. Pea ʼe mole natou lotovaivai atu aipe mo kapau ʼe mole natou maʼu tuʼumaʼu te hahaʼi ki ʼonatou loto fale.—Kalate 5:22; vakaʼi te fakamatala ʼae ʼi te ʼa takai “ Neʼe Ina Hoko Atu Pe.”

13, 14. (1) Kotea tau manatu ki te ʼu faʼifaʼitaki Fakatohi-tapu ʼo natou ʼae neʼe natou fai he ʼu gaue maʼa ʼihi? (2) ʼE feafeaʼi hau akoʼi ia natou ʼae ʼe kei foʼofoʼou pea mo natou ʼae ʼe kei tupulaga ke natou fakaha tonatou ʼofa ki ʼonatou tehina mo tuagaʼane?

¹³ ʼE loto e Sehova ke feʼofaʼofani ʼana kaugana pea mo fetokoniʼaki, ohage pe ko he ʼu tehina mo he ʼu tuagaʼane. (Lau ia Luka 22:24-27; 1 Petelo 1:22.) ʼE fakamahino mai ʼi te Tohi-Tapu, neʼe foaki e Sesu ia meʼa fuli maʼia mo tona maʼuli moʼo tokoni ki niʼihi. (Mateo 20:28) Ko te fafine ko Tolokasi, “nee lahi te u gaue lelei mo te u meaofa” neʼe ina fai. (Gaue 9:36, 39) Pea ko Malia “nee lahi osi tana gaue” ki ʼona tehina mo tuagaʼane ʼae ʼi Loma. (Loma 16:6) ʼE feafeaʼi hatatou fakamahino kia natou ʼae ʼe kei foʼofoʼou te maʼuhiga  ʼo te fai ʼo he ʼu gaue lelei ki ʼonatou tehina mo tuagaʼane?

¹⁴ ʼE feala pe ke tou kole age kia natou ʼae ʼe kei foʼofoʼou ke tou kaugā olo ʼo ʼaʼahi ia natou ʼae kua matutuʼa peʼe ko natou ʼae ʼe mahahaki. Pea ʼe toe feala pe ki te ʼu fanau ke olo mo ʼanatou matuʼā mo kapau ʼe feala. Ko te ʼu tagata ʼafeā ʼe feala ke natou kole age ki te kau tupulaga peʼe ko natou ʼae ʼe kei foʼofoʼou ke natou gaue fakatahi mo kapau ʼe ʼaoga ke foaki he meʼa kai ki te hahaʼi matutuʼa peʼe ko he fai ʼo he ʼu kiʼi gaue ʼi ʼonatou ʼapi. Ka sisio te kau tupulaga pea mo natou ʼae ʼe kei foʼofoʼou ki te tokoni ʼa te ʼu tehina mo tuagaʼane ki niʼihi, pea ʼe natou toe fai feia pe anai. Ohage la ko he tagata ʼafeā, ʼi tana faifakamafola ʼi te vao, ʼe tau alu ʼo fakasiosio te ʼu tehina mo tuagaʼane ʼae ʼe nonofo ai pe ʼe natou feafeaʼi. Pea ko te tupulaga ʼae ʼe nā kaugā gaue tuʼumaʼu ʼe ina ako mai te faʼifaʼitaki ʼo te tagata ʼafeā ʼaia pe ʼe feafeaʼi anai hana tokoni ki ʼona tehina mo tuagaʼane.—Loma 12:10.

15. He koʼe ʼe maʼuhiga ke tokagaʼi e te kau tagata ʼafeā te tuputupu ʼa te ʼu tehina ʼo te kokelekasio?

¹⁵ Neʼe foaki e Sehova ki te ʼu tehina te maʼua ʼae ke natou akoʼi te Folafola ʼa Te ʼAtua ʼi te kokelekasio. Koia, ʼe maʼuhiga ki te ʼu tehina ke lelei tanatou faiakonaki. Kapau ko koe ko he tagata ʼafeā, ʼe feala ke ke fakalogo ki he akonaki ʼa he faifekau fakaminisitelio ʼe ina lau atu pea mo ke tokoni ki ai pe ʼe feafeaʼi hana hikihiki ke lelei age. (Neemia 8:8) ^[3]—Vakaʼi te nota ʼi te fakaʼosi ʼo te alatike.

16, 17. (1) Neʼe tokaga feafeaʼi ia Paulo ki te tuputupu ʼa Timoteo? (2) Pea ʼe feafeaʼi he akoʼi lelei e te kau tagata ʼafeā ia te ʼu tehina ke natou liliu ko he ʼu tauhi ovi ʼi te kokelekasio?

¹⁶ ʼE ʼaoga ke akoʼi te ʼu tehina ke natou liliu ko he ʼu tagata tauhi ovi ʼi te kokelekasio. Neʼe akoʼi e Paulo ia Timoteo pea neʼe ina fakalotomalohiʼi ke ina akoʼi niʼihi. Neʼe ui fenei e Paulo: “Ke ke fakamalohi ia koe aki te kalasia e ia Sesu-Kilisito. Pea ko te mea nee ke logo maia au, ia mua o he kau fakamooni kaugamalie, ke ke tuku ia ki he u tagata agatonu, ae e natou lavai tona fakaako foki ki ni ihi age.” (2 Timoteo 2:1, 2) Neʼe lahi te ʼu ako neʼe maʼu e Timoteo mai ia Paulo koteʼuhi neʼe ko te tagata ʼafeā pea neʼe ko te apositolo. Ohage la, neʼe ina ako pe ʼe feafeaʼi ia te hikihiki ʼo tana faifakamafola pea mo tana tokoni ki niʼihi ʼi te kokelekasio.—2 Timoteo 3:10-12.

¹⁷ Neʼe lahi te temi ʼae neʼe gaue fakatahi ai ia Paulo mo Timoteo. Koteʼuhi neʼe loto e Paulo ke lelei te akoʼi ʼo Timoteo. (Gaue 16:1-5) ʼE feala ki te ʼu tagata ʼafeā ke natou faʼifaʼitakiʼi ia Paulo ʼo natou kaugā olo mo te kau  faifekau fakaminisitelio ʼae kua faiva ʼo ʼaʼahi ia te ʼu tehina mo tuagaʼane ʼi tonatou ʼuhiga tauhi ovi. Koia, ko te kau faifekau fakaminisitelio ʼe natou ako anai mai te faʼifaʼitaki ʼo te kau tagata ʼafeā. Ohage la, ko te faʼahiga akoʼi ʼo niʼihi, te maʼu ʼo te kataki fualoa mo te ʼofa, pea mo te falala kia Sehova ʼi tanatou tokakaga ki te faga ovi.—1 Petelo 5:2.

18. He koʼe ʼe tonu ke maʼuhiga kia tatou ia te akoʼi ʼo niʼihi ʼi tatatou tauhi kia Sehova?

¹⁸ ʼI te ʼu temi fakaʼosi ʼaeni, ʼe ʼaoga ki te tokolahi ʼo natou ʼae ʼe kei foʼofoʼou ke lelei age tonatou akoʼi, pea ke natou faiva ʼi te gaue faifakamafola. Pea ʼe toe ʼaoga ke akoʼi te ʼu tehina ke natou tokakaga ki te kokelekasio. ʼE loto e Sehova ke lelei te akoʼi ʼo ʼana kaugana fuli, pea neʼe ina foaki mai kia tatou te pilivilesio ʼae ke tou tokoni kia natou ʼae ʼe kei foʼofoʼou. Koia, ʼe maʼuhiga ke tou faiga malohi ʼo akoʼi niʼihi, ohage pe ko tona fai e Sesu pea mo Paulo. ʼI muʼa ʼo te ʼaho fakaʼosi, ʼe tonu ke tou akoʼi ia te tokolahi, koteʼuhi ʼe kei lahi te ʼu gaue ʼae ke tou fai ʼi te faifakamafola.

19. He koʼe ʼe ke iloʼi papau ko ʼau faiga malohi ke ke akoʼi niʼihi ʼe fua lelei anai?

¹⁹ Ko te akoʼi ʼo natou ʼae ʼe kei foʼofoʼou ʼe ʼaoga ki ai he temi mo he ʼu faiga malohi. Kaʼe ʼe tou iloʼi papau ko Sehova mo Sesu ʼe nā tokoni mai anai ke lelei age tatatou akoʼi niʼihi. ʼE tou fiafia lahi anai ʼi te sisio kia natou ʼae neʼe tou akoʼi ʼe faiga malohi ʼi te kokelekasio peʼe ʼi te gaue faifakamafola. (1 Timoteo 4:10) Pea ʼe toe ʼaoga foki, ke tou haga tuputupu ʼi te faʼahi fakalaumalie, mo hikihiki ʼotatou kalitate Fakakilisitiano, pea ke toe lelei age ʼatatou felogoʼi mo Sehova.