Te ʼu Fehuʼi ʼa Te Kau Lautohi
He koʼe neʼe fakafihiʼi e te kau takitaki lotu ia Sesu ʼo ʼuhiga mo te fufulu ʼo te ʼu nima?
Neʼe lahi te ʼu tukugakovi neʼe fai e te kau takitaki lotu Sutea kia Sesu pea mo ʼana tisipulo. Ohage la neʼe natou valokiʼi natou he neʼe mole natou fufulu ʼonatou nima ʼi muʼa ʼo tanatou kakai. Neʼe fakamahino ʼi te Lao ʼa Moisese te ʼu aluʼaga ʼae ʼe tupu ai te mole maʼa ʼo he tahi. Ohage la ko te ʼuli ʼo te sino, peʼe ko te kilia, peʼe moka fafa he tahi ki he sino mate, ʼo he tagata peʼe ko he manu. Pea neʼe toe fakamahino ʼi te Lao pe ʼe kotea ʼae ʼe tonu ke fai e he tahi ke feala ai hana maʼa. Neʼe tonu ke ina fai he sakilifisio, ke fakamaʼa peʼe ke afuhi ia ia.—Levitiko, kapite 11-15; Numelo, kapite 19.
Neʼe toe hilifaki e te kau takitaki lotu Fakasutea, he tahi age ʼu lekula ki te ʼu lao ʼaia. ʼE fakamahino ʼi he tohi, neʼe fai e te kau takitaki lotu, ʼae ʼe toe fakahigoa ko te kau Lapi, he ʼu tuʼuga lekula ki te fakamaʼa ʼo he tahi pea mo te ʼu aluʼaga ʼae ʼe feala ai ke pikisia he tahi ʼo liliu ai ʼo heʼe maʼa. Neʼe fai e te kau takitaki lotu ʼaia he ʼu lekula ʼo ʼuhiga mo te ʼu meʼa gaue ʼae ʼe feala ke ʼulihi pea mo ʼae ʼe mole feala ke ʼulihi. Neʼe natou fai mo he ʼu fakamaʼua ki te hahaʼi ke natou mulimuli ki ai ke feala ai hanatou toe liliu ʼo maʼa.
Neʼe fehuʼi fenei e te ʼu fili ʼo Sesu ki ai: “Kotea e mole mulimuli ai au tisipulo ki te talatisio a te kau matua afea, kae e natou kai mo ni nima uli?” (Maleko 7:5) Neʼe mole fia talanoa te kau Faliseo ki te lelei ʼae ʼo te fufulu ʼo te ʼu nima ke maʼa, ʼi muʼa ʼo te kakai. Neʼe fakamaʼua e te kau Faliseo ki te hahaʼi ke natou fufulu ʼonatou nima ʼi muʼa ʼo tanatou kakai, kaʼe neʼe tonu ke natou liligi te vai ki ʼonatou nima ʼo mulimuli ki he faʼahiga fai. Neʼe natou “fihi ʼo ʼuhiga mo te ʼu ipu pea mo te vai ʼae neʼe tonu ke fakaʼaogaʼi, peʼe ko ai ʼae ʼe tonu ke ina liligi te vai, pea mo te koga ʼo te ʼu nima ʼae neʼe tonu ke fufulu.”
Kotea ʼae neʼe ui e Sesu ʼo ʼuhiga mo te ʼu lao ʼaia neʼe fai e te tagata? Neʼe ina ui fenei ki te kau takitaki lotu Fakasutea: “Kau malualoi, nee tonu osi te folafola a te polofeta ko Esaia kia koutou, ae e tuu i te tohi: E fakavikiviki te hahai aeni kia au i te u laugutu, kae e mamao tona loto ia au [Sehova]. E mole he uhiga o takotou hu kia au, tuku ni pelesepeto ae ko ni fakatotonu a te u tagata. Kua kotou siaki te u fakatotonu a te Atua, kae kotou tauhi te talatisio a te u tagata.”—Maleko 7:6-8.